ইছাউ আল্লার খাছ মায়ার জন মানিয়া জয়ী অও
৫
১ হজরত ইছাউ অইলা আল্লার ওয়াদা করা হউ আল-মসী,
ইখান যেরা একিন করে,
তারার জনম অইছে আল্লার নুর থাকি।
জানো নি,
যে মানষে কুনু মা-বাফরে মহব্বত করে,
হে এরার আওলাদরেও মহব্বত করবো।
২ তে আল্লা পাকর আওলাদরে মহব্বতর বেয়াপার কিলা বুজাইতাম?
আল্লা পাকরে মহব্বত করিয়া তান হুকুম-আহকাম মানিয়া চললেউ বুজা যায়,
আমরা হাছাউ তান আওলাদরে মহব্বত করি।
৩ আল্লার হুকুম-আহকাম মানিয়া চলাউ অইলো আল্লারে মহব্বত করা।
আর তান হুকুম-আহকাম মানা তো খুব কঠিন কুনু কাম নায়।
৪ কারন আল্লার নুরর আওলাদ অকল ই জগতর উপরে জয়ী অইন,
আর জগতর লাড়াইত যে জিনিসর বলে জয়ী অইছি,
ইকটা অইলো আমরার ইমান।
৫ হজরত ইছাউ অইলা আল্লার খাছ মায়ার জন ইবনুল্লা,
ইখান যেরা একিন করে,
ই জগতর লাড়াইত তারাউ খালি জয়ী অয়।
৬ ইছা আল-মসী অইলা হউ জন,
যেইন পানি আর লউর বলে দুনিয়াত আইছইন।
তাইন খালি পানির জরিয়ায় নায়,
বরং হউ পাক গোছলর পানি আর সলিবো জান কুরবানির লউর বলে আইছইন।
ইতা বেয়াপারে আল্লাই পাক রুহে সাক্ষি দিরা,
আর অউ রুহ তো হক।
৭ আসলে তিনো সাক্ষিয়ে সাক্ষি দিরা:
৮ রুহ,
পানি আর লউ,
অউ তিন সাক্ষির সাক্ষি এক সমান।
৯ মানষর মুখর সাক্ষি যেবলা আমরা মানি,
তে আল্লার দেওয়া সাক্ষি তো আরো মজবুত,
তান খাছ মায়ার জন ইবনুল্লার বেয়াপারে তাইন অলা সাক্ষি দিছইন।
১০ আর অউ মায়ার জনর উপরে যেরা ইমান আনে,
তারার দিলেও অউলা সাক্ষি দেয়।
অখন আল্লাই সাক্ষিরে যেরা মানছে না,
তারা তো স্বয়ং আল্লারেউ মিছা মাতরা বানাইলিছে,
কারন আল্লায় নিজে তান মায়ার জনর বেয়াপারে যে সাক্ষি দিছইন,
তারা ইতা মানছে না।
১১ তান সাক্ষি অইলো,
তাইন নিজে আমরারে আখেরাতর জিন্দেগি দান করছইন,
অউ জিন্দেগি তান খাছ মায়ার জনর গেছে আছে।
১২ যে মানষে অউ মায়ার জনরে পাইছে,
হে জিন্দেগিও পাইছে।
আর আল্লার হউ মায়ার জনরে যেরা পাইছে না,
তারা ই জিন্দেগিও পাইছে না।
১৩ ভাইয়াইনরে,
তুমরা যেরা ইছা ইবনুল্লার উপরে ইমান আনছো,
তুমরারে জানানির লাগি আমি ইতা লেখলাম,
তুমরা আখেরাতর জিন্দেগি পাইলিছো।
১৪ অখন আমরা তান দরবারো অউ সাওস পাইছি,
তান মর্জি মাফিক আমরা কুন্তা মাগিলে,
ইতা তাইন হুনবা।
১৫ আমরা যেবলা জানি,
আমরা যেতা মাগি ইতা তাইন হুনইন,
তে এওখানও জানি,
তান দরবারো আমরা যেতা মাগিছি,
ইতা নিচ্চিত পাইলিছি।
১৬ কেউ যুদি কুনু মুমিন ভাইরে অলা এক গুনা করাত দেখে,
যে গুনা মউতর পথি নায়,
তে হে আরজ করলে আল্লায় হউ ভাইরে হেফাজত করবা।
আমি ইনো অউ লাখান গুনার কথা কইরাম,
যেরার গুনা মউতর পথি নায়।
অইলে মনো রাখিও,
মউতর পথি গুনাও আছে,
ইলা গুনার বেয়াপারে আরজ করার লাগি আমি কইরাম না।
১৭ আসলে হকল জাতর নাফরমানিউ গুনা,
অইলে হকল গুনা তো মউতর পথি নায়।
১৮ আমরা জানি,
আল্লার নুর থাকি যে বন্দা অকলর জনম অইছে,
এরা গুনার কামো বন্দি রয় না।
বরং আল্লার নুরে জনম লওয়া হউ খাছ মায়ার জনে তারার জানর হেফাজত করইন,
ইবলিছে তারারে কবজা করতো পারে না।
১৯ আর আমরা তো জানি,
খালি আমরাউ অইলাম আল্লার মানুষ,
বাদ-বাকি আস্তা জগতউ ইবলিছর পাওর তলে।
২০ আমরা এওখানও জানি,
আল্লার খাছ মায়ার জন আইয়া হারি আমরারে অউ আখল দিছইন,
যাতে হক আল্লারে আমরা চিনি।
তে হক আল্লার লগে আমরার মিলন অইছে,
মানি তান খাছ মায়ার জন ইছা আল-মসীর লগে আমরার মিলন অইছে।
তাইনউ তো হক আল্লা,
তাইনউ আখেরি জিন্দেগি।
২১ ও ছাবাল অকল,
হকল নমুনার মুর্তিপুজা থাকি বাচিয়া রও।
আমিন॥