1 Foela-u Allae asman ar dunia foeda ḳorla. 2 Duniai niraḳar ar ḳali asil, goin fanir ufre fura andair asil. Allar ruh er ufre solasol ḳorta. 3 Bade Allae formaila for ouk, ar for oilo. 4 Allae deḳla for bala. Tain andair taki forre alga ḳoria 5 er nam raḳla din, ar andairor nam raḳla rait. Hainja gelo, biano gelo, ikṭa oilo foela din.

6 Bade Allae formaila, fanir maze gumbuzor laḳan faḳ zaga ouk, ar fani dui bag oizauk. 7 Ar Allae faḳ zaga foeda ḳoria, tolor ar ufror fani alga ḳorla. Ar oula oilo. 8 Allae gumbuzor laḳan ze zaga banaila, tar nam raḳla asman. Hainja gelo, biano gelo, ikṭa oilo dui nombor din.

9 Erbade Allae formaila, asmanor tolor fani eḳ zagat dola ouk, ar hukna zaga deḳa zauk. Ar oula oilo. 10 Allae hukna zagar nam raḳla zomin ar zomail fanir nam doria. Tain deḳla ita bala. 11 Bade Allae formaila, zomino gash folouk; ar hoḳol zator bisala lota-fata gas-biriḳor zonom ouk. Ar zominor ufre hoḳol zator folor gas-o ouk, era nizor zatmoto fol dorbo ar folor maze zarzir bis-o taḳbo. Ar oula oilo. 12 Zomino gash folilo, hoḳol zator bisala lota-fata gas-biriḳ zonmilo. Zominor ufre hoḳol zator folor gas oilo zetae zarzir zatmoto fol dore, hi folor maze zarzir bis-o ase. Allae deḳla ita bala. 13 Hainja gelo, biano gelo, ikṭa oilo tin nombor din.

14 Bade Allae formaila, asmanor maze oula serag oḳol ouk, zara rait taki dinre alga ḳore. Ita alga alga din, ar bosor ar id-utshobor nishana oibo. 15 Asman taki tara duniair ufre for dibo. Oula-u oilo. 16 Allae duiṭa boṛo serag banaila, ermaze boṛoṭare dinor ufre bashshai ḳorar lagi ar huruṭare raitor ufore. Ita saṛa tain tera oḳolo foeda ḳorla. 17 Tain erare asmanor maze boaila zate tara duniait for dey. 18 Era din ar raitor ufre bashshai ḳore, andair taki forre alga ḳore. Allae deḳla ita bala. 19 Hainja gelo, biano gelo, ikṭa oilo sair nombor din.

20 Bade Allae formaila, fanir maze zandar oḳol fale fale bori zauk, ar duniair ufre asmanor maze fakin uṛouk. 21 Ar Allae doriar biraṭ zandar oḳol, ar fanir maze fal bandia gurra hoḳol zator zandar foeda ḳorla, ar hoḳol zator fakio foeda ḳorla. Tain deḳla ita bala. 22 Tain tara hoḳolre ou laḳan boroḳot nazil ḳorla, tumra folala oia baṛo ar doriar fani bori zao, duniair maze faki oḳolo baṛouk. 23 Hainja gelo, biano gelo, ikṭa oilo fas nombor din.

24 Erbade Allae formaila, maṭi taki oula zandar ouk zarar nizor zat oḳolre baṛaibo, erar maze fala heman, fuḳ-zuḳ ar zongli zanuar oḳolo. Oula-u oilo. 25 Allae duniair maze hoḳol zator zongli zanuar, fala heman ar maṭir maze buke solra zandar banaila. Tain deḳla ita bala.