1 Duniar ufre zebla manush baṛa arombo oilo, ar bout fuṛintoro zonom oilo. 2 Teu Allar ḳadim oḳole ou fuṛintore kubsurot dekia, ze zare kushi tare bia ḳorat lagla. 3 Ita dekia Mabude ḳoila, “Amar ruh hamesha manshor loge taḳto nae. Manush to ḳali lou ar gust, oḳon taki ami tarare eḳ-sho bish boros haeat diar.” 4 Ou fuṛintor loge Allar ḳadim oḳolor mila-mishar ḳarone ze aolador zonom oilo, tara asla furana zomanar foeluan oḳol, hi shomoe ba tar bade-o duniait Samud zator manush asil.

5 Mabude deḳla, duniait manshor naformani kub baṛi gese, ar tarar dilor ḳaish, kial-kushi ḳali ḳarafir bae. 6 Ita dekia Mabude kub toklif faila, tain duniait manush foeda ḳorsila ḳori kub bezar oila. 7 Ar ḳoila, “Amar foeda ḳora manshore, ar tarar loge hoḳol zator zanuar, fuḳ-zuḳ ar asmanor fakio ḳotom ḳori dimu. Itare foeda ḳoria amar dilo duk lager.” 8 Oile Nuhor ufre Mabud kushi asla.

9 Ita oilo Nuhor zindegir boean. Nuh eḳzon kamil manush, tan amolor manshor maze tain-u asla pak-forezgar. Allar loge tanor ḳas didar asil. 10 Sham, Ham ar Iafet namor tan tin fua asil.

11 I shomoe Allar sokut hara duniai gunae fosigese ar zur-zulume borigese. 12 Allae duniar bae saia deḳla, ita gunae fosigese. Ḳaron duniar manshor ḳaisolot be-fote gesegi. 13 Ita dekia Allae Nuhre ḳoila, “Tamam manush zatre ami ḳotom ḳorilaitam ṭik korsi. Manshor lagi duniai zur-zulume borigese. Manshor loge loge duniar hoḳolta ami shesh ḳorilitam. 14 Tumi goforor tokta dia tumar lagi ekkan zaz banao. Er bitre alga alga kuṭa taḳbo. Ar zazor bare-bitre alkatra lagaio. 15 Zazḳan lambae tin-sho at, fashe fonchash at ar ḳaṛa-ubi tish at banaio. 16 Ar salo taki eḳ at tole sairobae kiṛki raḳbae, ar duar dibae zazor ek kandat. Zazḳan titala banaio. 17 Dekio, ami duniait ola boinna dimu, asmanor tole zoto zandare dom falae hoḳolta-u binash oizibo. Duniair hoḳol zandar-u morizibo. 18 Ḳali tumar loge amar oada zari raḳmu. Tumi gia zazo uṭbae, ar tumar loge tumar fuain, tumar bibi ar tumar fuaintor bou-o. 19 Ar zan basanir lagi tumi hoḳol zator zandaror beṭa-beṭir zuṛa milaia tumar loge zazo tulbae. 20 Forteḳ zator faki, heman-zanuar ar maṭir maze buke solra zandarre basanir lagi zuṛa zuṛa ḳori tumar gese anbae. 21 Ar tumi hoḳol zator lagi ḳanir zinish zugaṛ ḳori raḳbae. Ita tumar ar tarar ḳani oibo.” 22 Nuhe Allar hukum mafik hoḳolta-u ḳorla.

1 Ar Mabude Nuhre ḳoila, “Tumi ar tumar foribaror hoḳol aia zazo uṭbae. Ami dekiar i zomanar manshor maze tumi-u ḳali dindar. 2 Tumi halal zanuar oḳol taki nor-medi milaia shat zuṛa ḳori ar haram zanuar taki eḳ zuṛa ḳori tumar loge loio. 3 Asmano uṛra fakir maz taki nor-medi milaia shat zuṛa ḳori loio. Duniar maze erar bongsho basanir lagi ikan ḳorio. 4 Ami shat din bade duniair ufre sallish din sallish rait eḳlagare meg dimu, ar hoḳol zandarre dunia taki ḳotom ḳormu.” 5 Mabudor hukum mafik Nuhe hoḳol ḳam ḳorla.

6 Boinna shurur shomoe Nuhor boeosh asil soe-sho boros. 7 Boinna taki basar lagi Nuh, tan bibi, tan fuain ar fuaintor boure loia zazo gia uṭla. 8-9 Allar hukum mafik halal-haram zanuar, faki, buke solra zandaror nor-medi milia zuṛa zuṛa oia Nuhor gese aia zazo hamaila. 10 Ou shat din bade duniait boinna oilo.

11 Nuhor soe-sho bosoror shomoe dusra mashor shotoro tariḳ fatalor hoḳol fani baroito laglo, ar asman zenu faṭigelo. 12 Sallish din sallish rait duniair ufre meg oilo. 13 Zedin meg shuru oilo, idin Nuh, tan bibi, tan fuain Sham, Ham, Iafet ar tarar bou oḳolo zazo aia uṭla. 14 Tarar loge zuṛa zuṛa ḳori hoḳol zator zongli zanuar, fala heman, maṭir maze buke solra zandar, faki ar ḍaḳna-ala hoḳoltao uṭla. 15 Dom falaia base ila hoḳol zator zandar Nuhor gese aia zazo uṭsil. 16 Allar hukum mafik-u nor-medir zuṛa milia tara uṭsil. Erbade Mabude zazor duar bond ḳori dila.

17 Sallish din dori duniait fani baṛte-u taḳlo. Fani baṛi zaoae zazḳan maṭi taki ufre baia uṭlo. 18 Bade fani kub baṛlo ar zazḳan fanir ufre solasol ḳorlo. 19 Ar fani baṛte-u taḳlo. Ete zeno zoto boṛo boṛo faṛ asil, hokkolta buṛi gelo. 20 Hoḳol faṛ-forbot buṛia fani aro fonro at ufre uṭlo. 21 Ar duniait solra hoḳol zandar, mani faki, fala heman, zongli zanuar ar fal bandia gurra hoḳolta, manshor loge binash oigelo. 22 Maṭir ufre zoto roḳomor zoto zandar dom falaia base ita hoḳolta-u morigelo. 23 Allae ou nomunae zominor hoḳol zandar duniair ufor taki fusilaila. Ete manush, zanuar, buke solra zandar ar asmanor faki duniai taki saf oigelo. Ḳali Nuh ar tan loge zara asil, tara-u basia roila. 24 Dunia deṛ-sho din fanit buṛail roilo.

1 Zazo Nuh ar tan loge zoto zandar ar fala heman asil, Allae tarar ḳota-o faurila na. Tain duniait batash salaile fani ḳoma shuru oilo. 2 Maṭir tol taki fani baroni ar asman tone meg foṛar faṭa bond oigelo, ar mego dom loilo. 3 Maṭir uforor fani hori gelo, ar deṛ-sho din bade deḳa gelo fani bout komse. 4 Shat nombor mashor shotoro tariḳ zazḳan Ararator faṛi elaḳat gia aṭkilo. 5 Erbadeo fani ḳomat taḳlo, ar dosh nombor mashor foela din faṛ oḳolor mata deḳa gelo.

6 Er sallish din bade Nuhe zazor kiṛki kulla. 7 Ar kiṛkibae ek kaua saṛla. Maṭi taki fani na hukani forzonto ḳauaṭa aoa-zaoat roilo. 8 Maṭir ufor tone fani ḳomse ki na deḳar lagi Nuhe bade eḳṭa faro saṛla. 9 I shomoyo asta duniait fani asil ḳori fao toibar zaga na faia faroṭa hirbar firia ailo. Tain at baṛaia tare bitre anla. 10 Heshe tain aro shat din bar saia hirbar tare saṛla. 11 Hainjabala he tan gese firia ailo, ar tar ṭuṭo asil zoetun gasor hazma fata, tain buzla maṭir ufor taki fani ḳomi gese. 12 Aro shat din bade tain hirbar faroṭa saṛla, ikṭa ar firia ailo na.

13 Nuhor boeosh soe-sho eḳ bosoror shomoe foela mashor foela din maṭir ufor taki fani horigelo, ar Nuhe zazor sal kulia saia deḳla, maṭi hukani dorse. 14 Dusra mashor shataish dinor din maṭi ekoibare hukai gelo. 15 Allae tanre ḳoila, 16 “Tumi tumar bibi, tumar fuain ar tumar fuaintor boure loia zaz taki baroia ao. 17 Ar tumar loge zoto zator zandar ase—faki, zanuar ar maṭir maze buke solra zandar—tarare-o bar ḳori loia ao, zenu hara duniai zuṛi tara sitria gia folala oia baṛe.” 18 Teu Nuhe tan bibi, tan fuain ar tarar boure loia zaz taki baroila. 19 Tarar loge duniair hoḳol zanuar, fuḳ-zuḳ ar faki, ek kotae duniait solra hoḳol zandar, zarzir zatmoto baroilo.

20 Bade Nuhe Mabudor name ekkan kurbani ḳana banaila, ar forteḳ zator halal foshu-faki taki eḳ eḳṭa loia zobo ḳoria, zalaia kurbani dila. 21 Mabud i kurbanir dumar kushbue kushi oila, ar tain ḳoila, “Manshor lagi ami ar kunu shomoyo maṭire lannot ditam nae, zudio hurubala takiu manshor monor kial ḳarafir bae taḳe. Ifira zela hoḳol zandarre marsi, ilaḳan ar kunu din-u martam nae. 22 Zotodin i duniai taḳbo, otodin niommoto bis falani ar foshol ḳaṭa, ṭanda ar gorom, barisha ar eot, din ar rait solte-u taḳbo.”

1 Allae Nuh ar tan fuaintore boroḳot dia ḳoila, “Tumitain folala oia baṛia duniai bori zao. 2 Duniair zanuar, asmanor faki, maṭir maze buke solra zandar ar doriar mas, hoḳole-u tumrare ḍor-boe ḳori solbo. Itare tumrar ato deoa oilo. 3 Zela tumrare ḳetor fol-foshol ar tori-torḳari dislam, oula oḳon zita zandar hoḳolreo tumrar ḳanir lagi dilam. 4 Ḳali lou-shoho gust tumra ḳaio na, lou oilogi zan. 5 Ḳeu zudi manshore kun ḳore te ami oboshsho-u tar kunor bodla loimu. He zanuar ouk ba manush ouk, manshor zan ze ney, tar zano deon lagbo. 6 Manshor lou ze bar ḳore, mansheo tar lou bar ḳorbo, ḳaron Allae manshore nizor surote banaisoin. 7 Tumitain beshḳori folala oia baṛo ar duniait sitria zao.”

8 Bade Allae Nuh ar tan fuaintore ḳoila, 9 “Huno, ami zoban diar, tumra ar tumrar bador hoḳol manshore, 10 ar faki, fala heman ar duniair zoto zanuar tumrar loge zaz taki baroise, tarare-o. 11 Zobanṭa oilo, banor fani dia ar kunu shomoe-u hokkol zandarre mara oito nae, ar tamam duniai saf ḳorar lagi ila kunu bano oito nae.” 12 Allae aro ḳoila, “Ze zoban ami tumrare ar tumrar logor zandar oḳolre dilam, ikṭa kiamot forzonto boail roibo. 13 Ar megor ḳalnir maze amar rongdenu dilam, ikṭa oilo duniait amar zobanor nishana. 14 Zebla ami duniair ufre ḳalni dimu, i shomoe ou rongdenu deḳbae. 15 Ar ou shomoe-u ami tumrar ar hoḳol zandaror loge amar zobanor ḳota iad ḳormu. Ar kunu shomoe-u boinna oia hoḳol zandarre fani dia doia nito nae. 16 Ḳalnir maze zebla hi rongdenu deḳa zaibo ou shomoe ami duniair hoḳol zandaror loge amar i hameshakur zobanor ḳota iad ḳormu.” 17 Heshe Allae Nuhre ḳoila, “Duniair hoḳol zandaror loge ami ze zoban disi, ikṭa oilo tar nishana.”