1 I goṭonar bade Allae Ibrahimor eḳ forikka loila. Allae tanre ḍak dila, “Ibrahim!” Tain zuaf dila, “Ounu ami.” 2 Mabude formaila, “Tumar fuare, zare tumi oto mohobbot koro, hou ḳas maear fut Isʼhakre loia tumi Muria elaḳat zao. Hoḳano ze faṛor ḳota ami tumare ḳoimu, er ufre tare nia zalail kurbani deo.” 3 Teu Ibrahime fozore uṭia gadar fiṭit goddi lagaia tan fua Isʼhak, duizon gulam ar zalail kurbanir lagi laḳṛi ḳaṭia loia, ze zagar ḳota Allae tanre ḳoisla, hobaedi roana oila. 4 Tin dinor din Ibrahime souḳ tulia saiteu duroi taki hou zagaḳan deḳla. 5 Ou tan gulam oḳolre ḳoila, “Tumra gadaṭa loia ono ubao, ami ar amar fua hono gia ebadoti shesh ḳoria harle tumrar gese aimu.” 6 Ibrahime zalail kurbanir laḳṛir aṭa tan fua Isʼhakor ḳando tulia dia nize aguinor fatil ar suri loia, duio zone samnor bae aguaila. 7 Ou Isʼhake tan bafore ḳoila, “Baba.” Tain ḳoila, “Kitare baf ḳo?” Isʼhake ḳoila, “Ino to laḳṛi ar aguin ase, te kurbanir meṛar baichcha kuai?” 8 Tain zuaf dila, “Babare, kurbanir lagi Allae nize-u meṛar baichcha zugaiba.” Ota matte matte tara aguai gela.

9 Allar fosondor zagat fousia Ibrahime kurbani ḳana banaia, laḳṛi hazaila. Bade nizor fua Isʼhakre bandia ou darur ufre hutaila. 10 Ar tain nizor fuare kurbanir lagi suri ato loila. 11 Ou Mabudor firistae asman tone tane ḍak dila, “Ibrahim! O Ibrahim!” Tain ḳoila, “Ounu ami.” 12 Firistae ḳoila, “Fuagur bae tumar at tulio na, ba tare ar kunta ḳorio na. Tumi zen Allare ḍorao ita buza gese, ḳaron amare tumar fua, tumar ḳas maear fua dan ḳorte-o na-kush oiso na.” 13 Ibrahime souḳ tuli saia deḳoin, tan ḳore eḳṭa dumba ar tar hing zongolor maze aṭki roise. Ou tain gia dumbaṭa ania, nizor fuar bodla zalail kurbani dila. 14 Tain hi zagar nam raḳla Iaoeh-Jirih [mani, Mabude zugain]. Erlagi oḳono manshe ḳoin, “Mabudor faṛo zugail oibo.”

15 Mabudor firistae asman tone hirbar Ibrahimre ḍakia ḳoila, 16 “Huno, Mabude ḳoira, tumi oula ḳorlae, tumar fuare, tumar ḳas maear fuare dan ḳorteo naraz oilae na. Erlagi ami Mabude ḳosom ḳoria ḳoiar, 17 ami nichoe tumare boroḳot nazil ḳormu, tumar bongshore asmanor tera ar doriar soror balur laḳan behishab ḳormu. Tumar bongshe tarar dushmonor ṭaun oḳol doḳol ḳorba. 18 Ar tumar bongshor usillae duniar hoḳol zatie boroḳot hasil ḳorba. Ḳaron tumi amar hukum mancho.” 19 Bade Ibrahime tan gulam oḳlor gese firia aila, ar tara eḳloge Ber-Sheba namor zagat gela. Ou zagatu tain boshoti ḳorla.