Shottoirzon shagridre tobligo faṭaila
10
1 Bade Hozrot Isae aro shottoirzon shagridre tobligo faṭaita ḳori fosond ḳorla.
Tain nize zeta ṭaun ba gauainto zaoar irada ḳorsila,
hono zaibar age erare duizon duizon ḳoria faṭaila.
2 Faṭanir bala erare ḳoila,
“Huno,
zomino to foshol bout ase,
oile ḳamla kub ḳom.
Erlagi zominor malikor gese dua ḳoro,
tan foshol tular lagi tain ḳamla faṭaiba.
3 Tumra oḳon roana oizao.
Kial rakio,
bagor falor maze meṛa-baichchar laḳan ami tumrare faṭailam.
4 Tumra zaoar ḳalo ṭeḳar toli,
gaiṭ-buski,
faor zuta ita kuntau loge nio na,
ar fotor maze ḳeurore salamo ḳorio na.
5 Ze baṛit gia hamaibae,
hamaiau ḳoio,
assalamu alaikum.
6 Salam loar zuka ḳeu hino taḳle,
tumrar salam tar ufre bortibo,
ar ila ḳeu na taḳle,
tumrar salam tumrar gese-u firot aibo.
7 Foela ze baṛit hamaibae,
hou baṛitu roio.
I baṛi saṛia dusra baṛit zaio na.
Tara zeta dein ota ḳaio,
ḳaron ḳamlae tar beton faoar zoiggo.
8 “Zebla kunu gaut zaibae,
hinor manshe tumrare ḳobul ḳoria,
tara zeta ḳaite dein,
otau ḳaio.
9 Tarar bemari oḳolor bemar bala ḳorio.
Tarare ḳoio,
Allar bashshai to tumrar daro aichche.
10 Oile kunu gaut gele honor manshe zudi tumrare ḳobul na ḳoroin,
te gaut aṭi aṭi oḳan ḳoio,
11 Hoba,
tumrar gaur ze duil amrar faot lagse,
ita amra fusia falai diram,
ou duileu tumrar bifokke shakki dibo.
Oile mono rakio,
Allar bashshai ḳandat aichche.
12 Ami tumrare ḳoiram,
kiamotor din lannoti Sadum ṭaunor dosha taki,
hi gaur dosha aro ḳoṭin oibo.
13 “Haere Baet-Soeda ar Kurasin gau,
tumra to lannoti.
Tumrar maze zeta kudroti ḳam deḳail oise,
ita Shur ar Sidon elaḳat deḳail oile,
tara ḳator oia touba ḳorlo one.
14 Ashole kiamotor din Shur ar Sidon elaḳar dosha takio,
tumrar dosha bout ḳoṭin oibo.
15 Ar O Kofornaum ṭaun,
tumi bule usa oia asmano gia lagtae?
Na,
fartae nae!
Tumare fatalo lamail oibo.
16 “Tumra mono rakio,
zera tumrar ḳota mane,
tara ashole amar ḳotau mane.
Ar zera tumrare mane na,
tara amareo mane na.
Zera amare mane na,
tara ashole hou Allareo mane na,
zein amare bezisoin.”
17 Bade hi shottoirzon shagride toblig koria kub kush mizaze firot aila.
Aia ḳoila,
“Huzur,
afnar nam hunle zin-buteo amrar ḳota mane.”
18 Isae tarare ḳoila,
“Huno,
ami deḳsi,
Iblis-shoetan megor zilkir laḳan behest taki foṛizar.
19 Te ami tumrare haf-bichur ufredi aṭar ḳemota disi,
ar tumrar dushmon,
Iblisor hoḳol shoktir ufre tumrare ḳemota disi.
Kunuzat kuntaeu tumrar ḳeti ḳorto farto nae.
20 Ar zin-bute tumrar ḳota huner dekia kushi na oia,
borong behesti ḳatat tumrar nam leḳa oise ḳoriu kushi ḳoro.”
21 Ou shomoe Isao Pak Ruhur bole kushi oia ḳoila,
“O gaibi baba,
tumiu to asman-zominor malik.
Ami tumar shukria adae ḳorram,
ḳaron tumi aḳoldar-buddiman oḳolor gese ita zair na ḳoria,
bebuz-huruttar laḳan manshor gese zair ḳorso.
Baba,
ashole to ita hoḳolta-u tumar morzi.
22 Amar gaibi babae hoḳolta-u amar ato shofi disoin.
Baf saṛa dusra ḳeu zane na ou fut ḳe,
ar fut saṛa dusra ḳeu zane na ou baf ḳe.
Fute bafore zar gese zair ḳorar kial oe,
ḳali he-u bafor forisoe fae.”
23 Bade tain shagrid oḳolor bae firia ḳane ḳane ḳoila,
“Tumra zeta zeta deḳso,
ita deḳar shuzug zar oe,
he-u nek kofali.
24 Ami tumrare ḳoiram,
tumra zeta deḳrae,
ita bout nobie ar raza-bashshae deḳar asha ḳorleo,
deḳar ḳofal oise na.
Tumra zeta hunrae,
ita tara hunte saileo hunar ḳofal oise na.”
Hoḳol taki boṛo hukum
25 Eḳbar eḳ alim sab Isar gese aila.
Aia tanre forikka ḳorar lagi zikaila,
“Huzur,
kita ḳam ḳorle ami behest faimu?”
26 Isae ḳoila,
“Musa nobir kitabo kita leḳa ase?
Afne kita faisoin?”
27 Alime zuaf dila,
“Leḳa ase,
Tumi tumar asta dil dia,
zan dia,
hoḳol bol-shokti dia,
tumar shullo-ana mon dia,
tumar Mabud Allare mohobbot ḳorbae.
ar,
Tumar ari-forire nizor laḳan maea ḳorbae.”
28 Isae tanre ḳoila,
“Afne ṭik kota ḳoisoin.
Te afneo oula ḳoroukka,
teu behest faiba.”
29 Ou alime nizor dam baṛanir lagi Isare ḳoila,
“Aichcha,
te amar ari-fori ḳe?”
30 Isae ḳoila,
“Hunoukka,
eḳzon manush Zeruzalem taki Ziriho ṭauno zaoat asil.
Foto ḍaḳaite faia tar ḳafoṛ-sufoṛ hoḳolta ḳaṛia nia,
tare maria ad-mora ḳori falai toia gelogi.
31 Bade eḳ imam-sab ou fotedi zaira,
tain ou beṭare dekia galabae horia gelagi.
32 Ou laḳan Lebir ḳandanor ek kadim-sabo ou fotedi aila,
taino ere dekia galabae gelagi.
33 Heshe Shomoria zatir eḳ beṭa ou fotedi ailo,
he bidormi zatir oileo er halot dekia tar dilo dorod hamailo.
34 Ou he er zoḳomor ufre tel ar anguror rosh malish ḳoria foṭṭi bandia dilo.
Bade tar nizor gadar ufre tulia,
eḳ musafir ḳanat nia tar zoton ḳorlo.
35 Bador din ou Shomorio beṭae musafir ḳanar malikor ato duiṭa dinar dia ḳoilo,
ou manushgur zoton ḳorba.
Er beshi ḳoros oileo,
ami aia dimu.
36 “Te alim sab,
afnar kita mono oe,
ou tinzonor maze kun zon,
ḍaḳaitor ato fiṭa ḳaura beṭar ari-fori?”
37 Alime ḳoila,
“Ze manshe tare dorod ḳorlo he-u to.”
Teu Isae ḳoila,
“Te afneo gia oula ḳoroukka.”
Bibi Marta ar tan boin
38 Bade Isa ar tan sahabi oḳol aṭi aṭi eḳ gaut gela.
Hou gaur eḳ beṭi manshe kushi oia Isare tan baṛit nia memandari ḳorla.
Ou beṭir nam Marta.
39 Beṭir eḳ boinor nam oilo Moriom,
ein huzuror faor ḳandat boia nosiot hunra.
40 Ar Marta gia randa-baṛa ar ḳatir-zoton ḳorat fereshanit roila.
Ermaze Marta aia huzur Isare ḳoila,
“Huzur,
deḳra ni amar boine hokkol ḳam-ḳaz eḳla amar ufre toia ono aise?
Te afne ḳoukka,
amare shaijjo ḳorto.”
41 Huzure ḳoila,
“Marta,
tumi bout befare sinta ḳoria fereshan oigeso.
42 Huno,
ashole eḳṭa befaru ḳali zorur ase.
Tumar boin Moriome hou zoruri befarre fosond ḳorse.
Ita to tair ges taki ḳaṛia neoa zaito nae.”