Manshor gunar bisar
2
1 Erlagiu ḳoiram,
O manush zati,
tumi to oinno zonre dushi shaibosto ḳorrae,
ita bisar tumi hiklae kila?
Tumar zuaf dibar kunu fot ase ni?
Ḳaron tumi nize ze oforad ḳorrae,
ou eḳoi oforade tumi aroḳzonre dushi ḳoirae.
Te i dush tumar ufreo foṛer na ni?
2 Amra to zani,
zera ilaḳan oforad ḳore,
Allae hok insaf mafik tarar faona shaza diba.
3 O manush zati,
ze ḳam tumi nizeo ḳoro,
ou eḳoi ḳamor lagi tumi aroḳzonre dushi shaibosto ḳoro,
te ḳemne buzlae,
tumi Allar shaza taki rehai failibae?
4 Tumi to Alla Pakor oshesh meherbani,
tan doijjo-shokti ar soborgarire elami ḳorrae.
Tan meherbanie tumare ḳali touba ḳorar fote ṭania ney,
ikan fauriliso ni?
5 Oile tumar fashan dil ar touba na ḳorar monobabor lagi,
tumar ufre Allar gozob dola ḳori toirae,
Allae zedin gozob zair ḳorba,
hok bisar ḳorba,
hou dinor lagi shaza dola ḳorrae.
6 Tain forteḳ manshore zarzir ḳamor fol diba.
7 Zera doijjo doria nek kamor mazdi Allai tarif,
ijjot,
ar koehin zindegi tallash ḳore,
Allae tarareu aḳeri zindegi dan ḳorba.
8 Oile zera nizor ḳaishor boshe sole,
Allai hokor birudde roe,
naformanir fokke taḳe,
tarar ufre Allai duk-mosibot,
gozob ar lannot aibo.
9 Forteḳ naformanor ufre ita aibo,
foela Boni Israilor ufre,
bade bin zatir ufre.
10 Oile zera nek kam ḳore,
tara forteḳe tarif,
ijjot ar shanti faibo.
Foela Boni Israile, bade bin zatie faiba.
11 Allar dorbaro to fokkofatir kunu ḳarbar nai,
hoḳolu homan.
12 Shoriotor baire roia zeta manshe guna ḳorse,
tara binasho oiba shoriot saṛa,
ar shoriotor bitre roia zera guna ḳore,
ou shoriot mafiku tarar bisar oibo.
13 Zeta manshe shoriotor boean ḳali hune,
Allar nozoro to tara be-ḳosur nae,
oile zera shoriot amol ḳore,
tarau ḳali be-ḳosur ḳalas ḳoia goinno oiba.
14 Bin zati oḳole Allai kunu shoriot na faileo,
tara zebla emneu shoriot mafik soloin,
ou shomoe tarar bibeḳu shoriot bonizae.
15 Ete deḳa zae,
shoriot mafik zeta ḳora zorur,
ita tarar dilor bibeḳor maze leḳa ase.
Tarar bibeḳe tarar ḳamor shakki dey,
kunu kunu shomoe tarar bibeḳe tarare dushi shaibosto ḳore,
ar kunu kunu shomoe tarar fokkeo shae dey.
16 Te Allae zedin Isa al-Mosir mazdi hoḳol manshor lukail amolor bisar ḳorba,
hou dinu ita zair oibo.
Ar ami oḳon ze kush-ḳobri toblig koriar,
ou mafiku bisar oibo.
Boni Israil ar shoriot
17 Tumi zebla nizor forisoe dirae Boni Israil ḳoia,
tumi Hozrot Musar shoriotor ufre borosha ḳorrae ar Allar maear bonda ḳoia boṛai deḳairae.
18 Te Allae tumar ges taki kita asha ḳoroin,
tumi kita ḳortae,
ikan to tumi zano-u,
shoriot taki tumi itar talim faiso.
19 Tumi mone mone ḳoirae,
ami to andare fot deḳaiar,
andarit zeta asoin,
itar gese ami nuror rushoni.
20 Be-aḳolre hedaeot ḳoriar,
huruttainre talim diar.
Tumi buzrae,
shoriotor bitre hok ar aḳol-buddi ase.
21 Ita kub bala ḳota,
oile tumi zebla oinno manshore hikairae,
te nizeo ita hiko na ḳene?
Tumi manshore ḳoirae,
suri ḳorio na,
oile tumi nizeu suri ḳorrae na ni?
22 Manshore ḳoirae,
zina ḳorio na,
oile tumi nize kunu zina ḳorrae na ni?
Tumi to deb-debir murtire ginnairae,
hirbar nizeu murtir mondirre luṭ-toraz ḳorrae na ni?
23 Ze shoriot loia tumi boṛai ḳorrae,
i shoriotor ulṭa solia tumi nizeu Allare oshomman ḳorrae na ni?
24 Allar kalamo ase,
“Tumrar sal-cholon dekia bin zati oḳole Allar namre beijjot ḳorer.”
25 Huno,
tumi zudi shoriot mania solo,
te mosolmani ḳam ḳoranir dam ase,
ar shoriot mafik na solle,
mosolmani ḳam ḳoraileo zeta,
na ḳoraileo ota.
Allar nozoro tumi mosolmani na ḳorail be-dinor laḳan.
26 Oḳon mosolmani na ḳoraiao zudi ḳeu shoriot mania sole,
te Allae tare mosolmani ḳorail ḳoia shomzita nae ni?
27 Ar mosolmani na ḳorail manshe zebla shoriot mania sole,
te likito shoriot faia ar mosolmani ḳoraiao zudi tumi er ulṭa solo,
taile hou mosolmani na ḳorail beṭae tumare dushito nae ni?
28 Bishoeṭa buzrae ni?
Ḳali name Boni Israil oileu ḳeu ashol Boni Israil nae.
Shorilor ongo ḳaṭia mosolmani ḳoraileo to,
ashol mosolmani oe na.
29 Oile mon taki zera Boni Israil,
tarau ashol Boni Israil.
Ita kunu likito ain-ḳanunor befar nae,
dilor bitoror ruhani befar.
Dilor mosolmaniu oilo ashol mosolmani.
Zogotor manshe erar tarif na ḳorleo,
Allae tarif ḳoroin.