১ ꠖꠥꠘꠤꠀꠞ ꠃꠙꠞꠦ ꠎꠦꠛꠟꠣ ꠝꠣꠘꠥꠡ ꠛꠣꠠꠣ ꠀꠞꠝ꠆ꠛ ꠅꠁꠟ, ꠀꠞ ꠛꠃꠔ ꠙꠥꠠꠤꠘ꠆ꠔꠞꠅ ꠎꠘꠝ ꠅꠁꠟ। ২ ꠔꠦꠃ ꠀꠟ꠆ꠟꠣꠞ ꠈꠣꠖꠤꠝ ꠅꠇꠟꠦ ꠅꠃ ꠙꠥꠠꠤꠘ꠆ꠔꠞꠦ ꠈꠥꠛꠍꠥꠞꠔ ꠖꠦꠈꠤꠀ, ꠎꠦ ꠎꠣꠞꠦ ꠈꠥꠡꠤ ꠔꠣꠞꠦ ꠛꠤꠀ ꠇꠞꠣꠔ ꠟꠣꠉꠟꠣ। ৩ ꠁꠔꠣ ꠖꠦꠈꠤꠀ ꠝꠣꠛꠥꠖꠦ ꠇꠁꠟꠣ, “ꠀꠝꠣꠞ ꠞꠥꠢꠥ ꠢꠣꠝꠦꠡꠣ ꠝꠣꠘꠡꠞ ꠟꠉꠦ ꠕꠣꠇꠔ ꠘꠣꠄ। ꠝꠣꠘꠥꠡ ꠔ ꠈꠣꠟꠤ ꠟꠃ ꠀꠞ ꠉꠥꠡ꠆ꠔ, ꠅꠈꠘ ꠕꠣꠇꠤ ꠀꠝꠤ ꠔꠣꠞꠣꠞꠦ ꠄꠇ-ꠡ ꠛꠤꠡ ꠛꠞꠍ ꠢꠣꠄꠀꠔ ꠖꠤꠀꠞ।” ৪ ꠅꠃ ꠙꠥꠠꠤꠘ꠆ꠔꠞ ꠟꠉꠦ ꠀꠟ꠆ꠟꠣꠞ ꠈꠣꠖꠤꠝ ꠅꠇꠟꠞ ꠝꠤꠟꠣ-ꠝꠤꠡꠣꠞ ꠇꠣꠞꠘꠦ ꠎꠦ ꠀꠅꠟꠣꠖꠞ ꠎꠘꠝ ꠅꠁꠟ, ꠔꠣꠞꠣ ꠀꠍꠟꠣ ꠙꠥꠞꠣꠘꠣ ꠎꠝꠣꠘꠣꠞ ꠙꠄꠟꠥꠀꠘ ꠅꠇꠟ, ꠢꠤ ꠡꠝꠄ ꠛꠣ ꠔꠣꠞ ꠛꠣꠖꠦꠅ ꠖꠥꠘꠤꠀꠁꠔ ꠍꠣꠝꠥꠖ ꠎꠣꠔꠞ ꠝꠣꠘꠥꠡ ꠀꠍꠤꠟ।

৫ ꠝꠣꠛꠥꠖꠦ ꠖꠦꠈꠟꠣ, ꠖꠥꠘꠤꠀꠁꠔ ꠝꠣꠘꠡꠞ ꠘꠣꠚꠞꠝꠣꠘꠤ ꠈꠥꠛ ꠛꠣꠠꠤ ꠉꠦꠍꠦ, ꠀꠞ ꠔꠣꠞꠣꠞ ꠖꠤꠟꠞ ꠈꠣꠁꠡ, ꠈꠤꠀꠟ-ꠈꠥꠡꠤ ꠈꠣꠟꠤ ꠈꠣꠞꠣꠙꠤꠞ ꠛꠣꠄ। ৬ ꠁꠔꠣ ꠖꠦꠈꠤꠀ ꠝꠣꠛꠥꠖꠦ ꠈꠥꠛ ꠔꠇꠟꠤꠚ ꠙꠣꠁꠟꠣ, ꠔꠣꠁꠘ ꠖꠥꠘꠤꠀꠁꠔ ꠝꠣꠘꠥꠡ ꠙꠄꠖꠣ ꠇꠞꠍꠤꠟꠣ ꠇꠞꠤ ꠈꠥꠛ ꠛꠦꠎꠣꠞ ꠅꠁꠟꠣ। ৭ ꠀꠞ ꠇꠁꠟꠣ, “ꠀꠝꠣꠞ ꠙꠄꠖꠣ ꠇꠞꠣ ꠝꠣꠘꠡꠞꠦ, ꠀꠞ ꠔꠣꠞꠣꠞ ꠟꠉꠦ ꠢꠇꠟ ꠎꠣꠔꠞ ꠎꠣꠘꠥꠀꠞ, ꠙꠥꠇ-ꠎꠥꠇ ꠀꠞ ꠀꠍꠝꠣꠘꠞ ꠙꠣꠈꠤꠅ ꠈꠔꠝ ꠇꠞꠤ ꠖꠤꠝꠥ। ꠁꠔꠣꠞꠦ ꠙꠄꠖꠣ ꠇꠞꠤꠀ ꠀꠝꠣꠞ ꠖꠤꠟꠅ ꠖꠥꠈ ꠟꠣꠉꠦꠞ।” ৮ ꠅꠁꠟꠦ ꠘꠥꠢꠞ ꠃꠙꠞꠦ ꠝꠣꠛꠥꠖ ꠈꠥꠡꠤ ꠀꠍꠟꠣ।

৯ ꠁꠔꠣ ꠅꠁꠟ ꠘꠥꠢꠞ ꠎꠤꠘ꠆ꠖꠦꠉꠤꠞ ꠛꠄꠀꠘ। ꠘꠥꠢ ꠄꠇꠎꠘ ꠇꠣꠝꠤꠟ ꠝꠣꠘꠥꠡ, ꠔꠣꠘ ꠀꠝꠟꠞ ꠝꠣꠘꠡꠞ ꠝꠣꠎꠦ ꠔꠣꠁꠘꠃ ꠀꠍꠟꠣ ꠙꠣꠇ-ꠙꠞꠦꠎꠉꠣꠞ। ꠀꠟ꠆ꠟꠣꠞ ꠟꠉꠦ ꠔꠣꠘꠞ ꠈꠣꠍ ꠖꠤꠖꠣꠞ ꠀꠍꠤꠟ। ১০ ꠡꠣꠝ, ꠢꠣꠝ ꠀꠞ ꠁꠀꠚꠦꠔ ꠘꠣꠝꠞ ꠔꠣꠘ ꠔꠤꠘ ꠙꠥꠀ ꠀꠍꠤꠟ।

১১ ꠁ ꠡꠝꠄ ꠀꠟ꠆ꠟꠣꠞ ꠌꠈꠥꠔ ꠢꠣꠞꠣ ꠖꠥꠘꠤꠀꠁ ꠉꠥꠘꠣꠄ ꠙꠌꠤꠉꠦꠍꠦ ꠀꠞ ꠎꠥꠞ ꠎꠥꠟꠥꠝꠦ ꠜꠞꠤꠉꠦꠍꠦ। ১২ ꠀꠟ꠆ꠟꠣꠄ ꠖꠥꠘꠤꠀꠞ ꠛꠣꠄ ꠌꠣꠁꠀ ꠖꠦꠈꠟꠣ, ꠁꠔꠣ ꠉꠥꠘꠣꠄ ꠙꠌꠤꠉꠦꠍꠦ। ꠇꠣꠞꠘ ꠖꠥꠘꠤꠀꠞ ꠝꠣꠘꠡꠞ ꠈꠣꠁꠍꠟꠔ ꠛꠦ-ꠙꠕꠦ ꠉꠦꠍꠦꠉꠤ। ১৩ ꠁꠔꠣ ꠖꠦꠈꠤꠀ ꠀꠟ꠆ꠟꠣꠄ ꠘꠥꠢꠞꠦ ꠇꠁꠟꠣ, “ꠔꠣꠝꠣꠝ ꠝꠣꠘꠥꠡ ꠎꠣꠔꠞꠦ ꠀꠝꠤ ꠈꠔꠝ ꠇꠞꠤꠟꠣꠁꠔꠣꠝ ꠑꠤꠇ ꠇꠞꠍꠤ। ꠝꠣꠘꠡꠞ ꠟꠣꠉꠤ ꠖꠥꠘꠤꠀꠁ ꠎꠥꠞ-ꠎꠥꠟꠥꠝꠦ ꠜꠞꠤꠉꠦꠍꠦ। ꠝꠣꠘꠡꠞ ꠟꠉꠦ ꠟꠉꠦ ꠖꠥꠘꠤꠀꠞ ꠢꠇꠟꠔꠣ ꠀꠝꠤ ꠡꠦꠡ ꠇꠞꠤꠟꠤꠔꠣꠝ। ১৪ ꠔꠥꠝꠤ ꠉꠚꠞꠞ ꠔꠇ꠆ꠔꠣ ꠖꠤꠀ ꠔꠥꠝꠣꠞ ꠟꠣꠉꠤ ꠄꠇꠈꠣꠘ ꠎꠣꠎ ꠛꠣꠘꠣꠅ। ꠄꠞ ꠜꠤꠔꠞꠦ ꠀꠟꠉꠣ ꠀꠟꠉꠣ ꠇꠥꠑꠣ ꠕꠣꠇꠛ। ꠀꠞ ꠎꠣꠎꠞ ꠛꠣꠞꠦ-ꠜꠤꠔꠞꠦ ꠀꠟꠇꠣꠔꠞꠣ ꠟꠣꠉꠣꠁꠅ। ১৫ ꠎꠣꠎꠈꠣꠘ ꠟꠣꠝ꠆ꠛꠣꠄ ꠔꠤꠘꠡ ꠀꠔ, ꠚꠣꠡꠦ ꠙꠁꠘ꠆ꠌꠣꠡ ꠀꠔ ꠀꠞ ꠈꠣꠠꠣ-ꠃꠛꠤ ꠔꠤꠡ ꠀꠔ ꠛꠣꠘꠣꠁꠅ। ১৬ ꠀꠞ ꠌꠣꠟꠅ ꠕꠣꠇꠤ ꠄꠇ ꠀꠔ ꠔꠟꠦ ꠌꠣꠁꠞꠅꠛꠣꠄ ꠈꠤꠠꠇꠤ ꠞꠣꠈꠛꠣꠄ, ꠀꠞ ꠖꠥꠀꠞ ꠖꠤꠛꠣꠄ ꠎꠣꠎꠞ ꠄꠇ ꠇꠣꠘ꠆ꠖꠣꠔ। ꠎꠣꠎꠈꠣꠘ ꠔꠤꠔꠣꠟꠣ ꠛꠣꠘꠣꠁꠅ। ১৭ ꠖꠦꠈꠤꠅ, ꠀꠝꠤ ꠖꠥꠘꠤꠀꠁꠔ ꠅꠟꠣ ꠛꠁꠘ꠆ꠘꠣ ꠖꠤꠝꠥ, ꠀꠍꠝꠣꠘꠞ ꠔꠟꠦ ꠎꠔ ꠎꠣꠘꠖꠣꠞꠦ ꠖꠝ ꠚꠣꠟꠣꠄ ꠢꠇꠟꠔꠣꠃ ꠛꠤꠘꠣꠡ ꠅꠁꠎꠤꠛ। ꠖꠥꠘꠤꠀꠁꠞ ꠢꠇꠟ ꠎꠣꠘꠖꠣꠞꠃ ꠝꠞꠤꠎꠤꠛ। ১৮ ꠈꠣꠟꠤ ꠔꠥꠝꠣꠞ ꠟꠉꠦ ꠀꠝꠣꠞ ꠅꠀꠖꠣ ꠎꠣꠞꠤ ꠞꠣꠈꠝꠥ। ꠔꠥꠝꠤ ꠉꠤꠀ ꠎꠣꠎꠅ ꠃꠑꠛꠣꠄ, ꠀꠞ ꠔꠥꠝꠣꠞ ꠟꠉꠦ ꠔꠥꠝꠣꠞ ꠙꠥꠀꠂꠘ, ꠔꠥꠝꠣꠞ ꠛꠤꠛꠤ ꠀꠞ ꠔꠥꠝꠣꠞ ꠙꠥꠀꠂꠘ꠆ꠔꠞ ꠛꠃ-ꠅ। ১৯ ꠀꠞ ꠎꠣꠘ ꠛꠣꠌꠣꠘꠤꠞ ꠟꠣꠉꠤ ꠔꠥꠝꠤ ꠢꠇꠟ ꠎꠣꠔꠞ ꠎꠣꠘꠖꠣꠞꠞ ꠛꠦꠐꠣ-ꠛꠦꠐꠤꠞ ꠎꠥꠠꠣ ꠝꠤꠟꠣꠁꠀ ꠔꠥꠝꠣꠞ ꠟꠉꠦ ꠎꠣꠎꠅ ꠔꠥꠟꠛꠣꠄ। ২০ ꠙꠞꠔꠦꠇ ꠎꠣꠔꠞ ꠙꠣꠈꠤ, ꠢꠦꠝꠣꠘ-ꠎꠣꠘꠥꠀꠞ ꠀꠞ ꠝꠣꠐꠤꠞ ꠝꠣꠎꠦ ꠛꠥꠇꠦ ꠌꠟꠞꠣ ꠎꠣꠘꠖꠣꠞꠞꠦ ꠛꠣꠌꠣꠘꠤꠞ ꠟꠣꠉꠤ ꠎꠥꠠꠣ ꠎꠥꠠꠣ ꠇꠞꠤ ꠔꠥꠝꠣꠞ ꠉꠦꠍꠦ ꠀꠘꠛꠣꠄ। ২১ ꠀꠞ ꠔꠥꠝꠤ ꠢꠇꠟ ꠎꠣꠔꠞ ꠟꠣꠉꠤ ꠈꠣꠘꠤꠞ ꠎꠤꠘꠤꠡ ꠎꠥꠉꠣꠠ ꠇꠞꠤ ꠞꠣꠈꠛꠣꠄ। ꠁꠔꠣ ꠔꠥꠝꠣꠞ ꠀꠞ ꠔꠣꠞꠣꠞ ꠈꠣꠘꠤ ꠅꠁꠛ।” ২২ ꠘꠥꠢꠦ ꠀꠟ꠆ꠟꠣꠞ ꠢꠥꠇꠥꠝ ꠝꠣꠚꠤꠇ ꠢꠇꠟꠔꠣꠃ ꠇꠞꠟꠣ।

১ ꠀꠞ ꠝꠣꠛꠥꠖꠦ ꠘꠥꠢꠞꠦ ꠇꠁꠟꠣ, “ꠔꠥꠝꠤ ꠀꠞ ꠔꠥꠝꠣꠞ ꠙꠞꠤꠛꠣꠞꠞ ꠢꠇꠟ ꠀꠁꠀ ꠎꠣꠎꠅ ꠃꠑꠛꠣꠄ। ꠀꠝꠤ ꠖꠦꠈꠤꠀꠞ ꠁ ꠎꠝꠣꠘꠣꠞ ꠝꠣꠘꠡꠞ ꠝꠣꠎꠦ ꠔꠥꠝꠤꠃ ꠈꠣꠟꠤ ꠖꠤꠘꠖꠣꠞ। ২ ꠔꠥꠝꠤ ꠢꠣꠟꠣꠟ ꠎꠣꠘꠥꠀꠞ ꠅꠇꠟ ꠕꠣꠇꠤ ꠘꠞ-ꠝꠦꠖꠤ ꠝꠤꠟꠣꠁꠀ ꠡꠣꠔ ꠎꠥꠠꠣ ꠇꠞꠤ ꠀꠞ ꠢꠣꠞꠣꠝ ꠎꠣꠘꠥꠀꠞ ꠕꠣꠇꠤ ꠄꠇ ꠎꠥꠠꠣ ꠇꠞꠤ ꠔꠥꠝꠣꠞ ꠟꠉꠦ ꠟꠁꠅ। ৩ ꠀꠍꠝꠣꠘꠅ ꠃꠠꠞꠣ ꠙꠣꠈꠤꠞ ꠝꠣꠎ ꠕꠣꠇꠤ ꠘꠞ-ꠝꠦꠖꠤ ꠝꠤꠟꠣꠁꠀ ꠡꠣꠔ ꠎꠥꠠꠣ ꠇꠞꠤ ꠟꠁꠅ। ꠖꠥꠘꠤꠀꠞ ꠝꠣꠎꠦ ꠄꠞꠣꠞ ꠛꠋꠡ ꠛꠣꠌꠣꠘꠤꠞ ꠟꠣꠉꠤ ꠁꠈꠣꠘ ꠇꠞꠤꠅ। ৪ ꠀꠝꠤ ꠡꠣꠔ ꠖꠤꠘ ꠛꠣꠖꠦ ꠖꠥꠘꠤꠀꠁꠞ ꠃꠙꠞꠦ ꠌꠣꠟ꠆ꠟꠤꠡ ꠖꠤꠘ ꠌꠣꠟ꠆ꠟꠤꠡ ꠞꠣꠁꠔ ꠄꠇꠟꠣꠉꠣꠞꠦ ꠝꠦꠊ ꠖꠤꠝꠥ, ꠀꠞ ꠢꠇꠟ ꠎꠣꠘꠖꠣꠞꠞꠦ ꠖꠥꠘꠤꠀ ꠕꠣꠇꠤ ꠈꠔꠝ ꠇꠞꠝꠥ।” ৫ ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠘꠥꠢꠦ ꠢꠇꠟ ꠇꠣꠝ ꠇꠞꠟꠣ।

৬ ꠛꠁꠘ꠆ꠘꠣ ꠡꠥꠞꠥꠞ ꠡꠝꠄ ꠘꠥꠢꠞ ꠛꠄꠅꠡ ꠀꠍꠤꠟ ꠍꠄꠡ ꠛꠞꠍ। ৭ ꠛꠁꠘ꠆ꠘꠣ ꠕꠣꠇꠤ ꠛꠣꠌꠣꠞ ꠟꠣꠉꠤ ꠘꠥꠢ, ꠔꠣꠘ ꠛꠤꠛꠤ, ꠔꠣꠘ ꠙꠥꠀꠂꠘ ꠀꠞ ꠙꠥꠀꠂꠘ꠆ꠔꠞ ꠛꠃꠞꠦ ꠟꠁꠀ ꠎꠣꠎꠅ ꠉꠤꠀ ꠃꠑꠟꠣ। ৮-৯ ꠀꠟ꠆ꠟꠣꠞ ꠢꠥꠇꠥꠝ ꠝꠣꠚꠤꠇ ꠢꠣꠟꠣꠟ-ꠢꠣꠞꠣꠝ ꠎꠣꠘꠥꠀꠞ, ꠙꠣꠈꠤ, ꠛꠥꠇꠦ ꠌꠟꠞꠣ ꠎꠣꠘꠖꠣꠞꠞ ꠘꠞ-ꠝꠦꠖꠤ ꠝꠤꠟꠤꠀ ꠎꠥꠠꠣ ꠎꠥꠠꠣ ꠅꠁꠀ ꠘꠥꠢꠞ ꠉꠦꠍꠦ ꠀꠁꠀ ꠎꠣꠎꠅ ꠢꠣꠝꠣꠁꠟꠣ। ১০ ꠅꠃ ꠡꠣꠔ ꠖꠤꠘ ꠛꠣꠖꠦ ꠖꠥꠘꠤꠀꠁꠔ ꠛꠁꠘ꠆ꠘꠣ ꠅꠁꠟ।

১১ ꠘꠥꠢꠞ ꠍꠄ ꠡ ꠛꠍꠞꠞ ꠡꠝꠄ ꠖꠥꠍꠞꠣ ꠝꠣꠡꠞ ꠡꠔꠞ ꠔꠣꠞꠤꠈ ꠙꠣꠔꠣꠟꠞ ꠢꠇꠟ ꠙꠣꠘꠤ ꠛꠣꠞ ꠅꠁꠔ ꠟꠣꠉꠟ, ꠀꠞ ꠀꠍꠝꠣꠘ ꠎꠦꠘꠥ ꠚꠣꠐꠤꠉꠦꠟ। ১২ ꠌꠣꠟ꠆ꠟꠤꠡ ꠖꠤꠘ ꠌꠣꠟ꠆ꠟꠤꠡ ꠞꠣꠁꠔ ꠖꠥꠘꠤꠀꠁꠞ ꠃꠙꠞꠦ ꠝꠦꠊ ꠅꠁꠟ। ১৩ ꠎꠦꠖꠤꠘ ꠝꠦꠊ ꠡꠥꠞꠥ ꠅꠁꠟ, ꠁꠖꠤꠘ ꠘꠥꠢ, ꠔꠣꠘ ꠛꠤꠛꠤ, ꠔꠣꠘ ꠙꠥꠀꠂꠘ ꠡꠣꠝ, ꠢꠣꠝ, ꠁꠀꠚꠦꠔ ꠀꠞ ꠔꠣꠞꠣꠞ ꠛꠃ ꠅꠇꠟꠅ ꠎꠣꠎꠅ ꠀꠁꠀ ꠃꠑꠟꠣ। ১৪ ꠔꠣꠞꠣꠞ ꠟꠉꠦ ꠎꠥꠠꠣ ꠎꠥꠠꠣ ꠇꠞꠤ ꠢꠇꠟ ꠎꠣꠔꠞ ꠎꠋꠟꠤ ꠎꠣꠘꠥꠀꠞ, ꠙꠣꠟꠣ ꠢꠦꠝꠣꠘ, ꠝꠣꠐꠤꠞ ꠝꠣꠎꠦ ꠛꠥꠇꠦ ꠌꠟꠞꠣ ꠎꠣꠘꠖꠣꠞ, ꠙꠣꠈꠤ ꠀꠞ ꠒꠣꠈꠘꠣ-ꠀꠟꠣ ꠢꠇꠟꠔꠣꠅ ꠃꠑꠟꠣ। ১৫ ꠖꠝ ꠚꠣꠟꠣꠁꠀ ꠛꠣꠌꠦ ꠁꠟꠣ ꠢꠇꠟ ꠎꠣꠔꠞ ꠎꠣꠘꠖꠣꠞ ꠘꠥꠢꠞ ꠉꠦꠍꠦ ꠀꠁꠀ ꠎꠣꠎꠅ ꠃꠑꠍꠤꠟ। ১৬ ꠀꠟ꠆ꠟꠣꠞ ꠢꠥꠇꠥꠝ ꠝꠣꠚꠤꠇꠃ ꠘꠞ-ꠝꠦꠖꠤꠞ ꠎꠥꠠꠣ ꠝꠤꠟꠤꠀ ꠔꠣꠞꠣ ꠃꠑꠍꠤꠟ। ꠄꠞꠛꠣꠖꠦ ꠝꠣꠛꠥꠖꠦ ꠎꠣꠎꠞ ꠖꠥꠀꠞ ꠛꠘ꠆ꠖ ꠇꠞꠤ ꠖꠤꠟꠣ।

১৭ ꠌꠣꠟ꠆ꠟꠤꠡ ꠖꠤꠘ ꠗꠞꠤ ꠖꠥꠘꠤꠀꠁꠔ ꠙꠣꠘꠤ ꠛꠣꠠꠔꠦꠃ ꠕꠣꠇꠟ। ꠙꠣꠘꠤ ꠛꠣꠠꠤ ꠎꠣꠅꠀꠄ ꠎꠣꠎꠈꠣꠘ ꠝꠣꠐꠤ ꠕꠣꠇꠤ ꠃꠙꠞꠦ ꠜꠣꠁꠀ ꠃꠑꠟ। ১৮ ꠛꠣꠖꠦ ꠙꠣꠘꠤ ꠈꠥꠛ ꠛꠣꠠꠟ ꠀꠞ ꠎꠣꠎꠈꠣꠘ ꠙꠣꠘꠤꠞ ꠃꠙꠞꠦ ꠌꠟꠣꠌꠟ ꠇꠞꠟ। ১৯ ꠀꠞ ꠙꠣꠘꠤ ꠛꠣꠠꠔꠦꠃ ꠕꠣꠇꠟ। ꠄꠔꠦ ꠎꠦꠘꠅ ꠎꠔ ꠛꠠ ꠛꠠ ꠙꠣꠠ ꠀꠍꠤꠟ, ꠢꠇ꠆ꠇꠟꠔꠣ ꠛꠥꠠꠤ ꠉꠦꠟ। ২০ ꠢꠇꠟ ꠙꠣꠠ-ꠙꠞꠛꠔ ꠛꠥꠠꠤꠀ ꠙꠣꠘꠤ ꠀꠞꠅ ꠙꠘꠞ ꠀꠔ ꠃꠙꠞꠦ ꠃꠑꠟ। ২১ ꠀꠞ ꠖꠥꠘꠤꠀꠁꠔ ꠌꠟꠞꠣ ꠢꠇꠟ ꠎꠣꠘꠖꠣꠞ, ꠝꠣꠘꠤ ꠙꠣꠈꠤ, ꠙꠣꠟꠣ ꠢꠦꠝꠣꠘ, ꠎꠋꠟꠤ ꠎꠣꠘꠥꠀꠞ ꠀꠞ ꠙꠣꠟ ꠛꠣꠘ꠆ꠖꠤꠀ ꠉꠥꠞꠞꠣ ꠢꠇꠟꠔꠣ, ꠝꠣꠘꠡꠞ ꠟꠉꠦ ꠛꠤꠘꠣꠡ ꠅꠁꠉꠦꠟ। ২২ ꠝꠣꠐꠤꠞ ꠃꠙꠞꠦ ꠎꠔ ꠞꠇꠝꠞ ꠎꠔ ꠎꠣꠘꠖꠣꠞ ꠖꠝ ꠚꠣꠟꠣꠁꠀ ꠛꠣꠌꠦ ꠁꠔꠣ ꠢꠇꠟꠔꠣꠃ ꠝꠞꠤꠉꠦꠟ। ২৩ ꠀꠟ꠆ꠟꠣꠄ ꠅꠃ ꠘꠝꠥꠘꠣꠄ ꠎꠝꠤꠘꠞ ꠢꠇꠟ ꠎꠣꠘꠖꠣꠞ ꠖꠥꠘꠤꠀꠁꠞ ꠃꠙꠞ ꠕꠣꠇꠤ ꠚꠥꠍꠤꠟꠣꠁꠟꠣ। ꠄꠔꠦ ꠝꠣꠘꠥꠡ, ꠎꠣꠘꠥꠀꠞ, ꠛꠥꠇꠦ ꠌꠟꠞꠣ ꠎꠣꠘꠖꠣꠞ ꠀꠞ ꠀꠍꠝꠣꠘꠞ ꠙꠣꠈꠤ ꠖꠥꠘꠤꠀꠁ ꠕꠣꠇꠤ ꠍꠣꠚ ꠅꠁꠉꠦꠟ। ꠈꠣꠟꠤ ꠘꠥꠢ ꠀꠞ ꠔꠣꠘ ꠟꠉꠦ ꠎꠣꠞꠣ ꠀꠍꠤꠟ, ꠔꠣꠞꠣꠃ ꠛꠣꠌꠤꠀ ꠞꠁꠟꠣ। ২৪ ꠖꠥꠘꠤꠀ ꠖꠦꠠꠡ ꠖꠤꠘ ꠙꠣꠘꠤꠔ ꠛꠥꠠꠣꠁꠟ ꠞꠁꠟ।

১ ꠎꠣꠎꠅ ꠘꠥꠢ ꠀꠞ ꠔꠣꠘ ꠟꠉꠦ ꠎꠔ ꠎꠣꠘꠖꠣꠞ ꠀꠞ ꠙꠣꠟꠣ ꠢꠦꠝꠣꠘ ꠀꠍꠤꠟ, ꠀꠟ꠆ꠟꠣꠄ ꠔꠣꠞꠣꠞ ꠇꠕꠣꠅ ꠚꠣꠃꠞꠤꠟꠣ ꠘꠣ। ꠔꠣꠁꠘ ꠖꠥꠘꠤꠀꠁꠔ ꠛꠣꠔꠣꠡ ꠌꠣꠟꠣꠁꠟꠦ ꠙꠣꠘꠤ ꠇꠝꠣ ꠡꠥꠞꠥ ꠅꠁꠟ। ২ ꠝꠣꠐꠤꠞ ꠔꠟ ꠕꠣꠇꠤ ꠙꠣꠘꠤ ꠛꠣꠞꠅꠘꠤ ꠀꠞ ꠀꠍꠝꠣꠘ ꠕꠘꠦ ꠝꠦꠊ ꠙꠠꠣꠞ ꠚꠣꠐꠣ ꠛꠘ꠆ꠖ ꠅꠁꠉꠦꠟ, ꠀꠞ ꠝꠦꠊꠅ ꠖꠝ ꠟꠁꠟ। ৩ ꠝꠣꠐꠤꠞ ꠃꠙꠞꠞ ꠙꠣꠘꠤ ꠢꠞꠤꠉꠦꠟ, ꠀꠞ ꠖꠦꠠꠡ ꠖꠤꠘ ꠛꠣꠖꠦ ꠖꠦꠈꠣ ꠉꠦꠟ ꠙꠣꠘꠤ ꠛꠃꠔ ꠇꠝꠍꠦ। ৪ ꠡꠣꠔ ꠘꠝ꠆ꠛꠞ ꠝꠣꠡꠞ ꠡꠔꠞ ꠔꠣꠞꠤꠈ ꠎꠣꠎꠈꠣꠘ ꠀꠞꠣꠞꠣꠔꠞ ꠙꠣꠠꠤ ꠄꠟꠣꠇꠣꠔ ꠉꠤꠀ ꠀꠐꠇꠤꠟ। ৫ ꠄꠞꠛꠣꠖꠦꠅ ꠙꠣꠘꠤ ꠇꠝꠣꠔ ꠕꠣꠇꠟ, ꠀꠞ ꠖꠡ ꠘꠝ꠆ꠛꠞ ꠝꠣꠡꠞ ꠙꠄꠟꠣ ꠖꠤꠘ ꠙꠣꠠ ꠅꠇꠟꠞ ꠝꠣꠕꠣ ꠖꠦꠈꠣ ꠉꠦꠟ।

৬ ꠄꠞ ꠌꠣꠟ꠆ꠟꠤꠡ ꠖꠤꠘ ꠛꠣꠖꠦ ꠘꠥꠢꠦ ꠎꠣꠎꠞ ꠈꠤꠠꠇꠤ ꠈꠥꠟꠟꠣ। ৭ ꠀꠞ ꠈꠤꠠꠇꠤꠛꠣꠄ ꠄꠇ ꠇꠣꠃꠀ ꠍꠣꠠꠟꠣ। ꠝꠣꠐꠤ ꠕꠣꠇꠤ ꠙꠣꠘꠤ ꠘꠣ ꠢꠥꠇꠣꠘꠤ ꠙꠞ꠆ꠎꠘ꠆ꠔ ꠇꠣꠃꠀꠐꠣ ꠀꠅꠀ-ꠎꠣꠅꠀꠔ ꠞꠁꠟ। ৮ ꠝꠣꠐꠤꠞ ꠃꠙꠞ ꠕꠘꠦ ꠙꠣꠘꠤ ꠇꠝꠍꠦ ꠇꠤ ꠘꠣ ꠖꠦꠈꠣꠞ ꠟꠣꠉꠤ ꠘꠥꠢꠦ ꠛꠣꠖꠦ ꠄꠇꠐꠣ ꠙꠣꠞꠅ ꠍꠣꠠꠟꠣ। ৯ ꠁ ꠡꠝꠄꠅ ꠀꠡ꠆ꠔꠣ ꠖꠥꠘꠤꠀꠁꠔ ꠙꠣꠘꠤ ꠀꠍꠤꠟ ꠇꠞꠤ ꠙꠣꠅ ꠕꠁꠛꠣꠞ ꠎꠣꠉꠣ ꠘꠣ ꠙꠣꠁꠀ ꠙꠣꠞꠅꠐꠣ ꠢꠤꠞꠛꠣꠞ ꠚꠤꠞꠤꠀ ꠀꠁꠟ। ꠔꠣꠁꠘ ꠀꠔ ꠛꠣꠠꠣꠁꠀ ꠔꠣꠞꠦ ꠜꠤꠔꠞꠦ ꠀꠘꠟꠣ। ১০ ꠢꠦꠡꠦ ꠔꠣꠁꠘ ꠀꠞꠅ ꠡꠣꠔ ꠖꠤꠘ ꠛꠣꠞ ꠌꠣꠁꠀ ꠢꠤꠞꠛꠣꠞ ꠔꠣꠞꠦ ꠍꠣꠠꠟꠣ। ১১ ꠢꠣꠁꠘ꠆ꠎꠣꠛꠣꠟꠣ ꠢꠦ ꠔꠣꠘ ꠉꠦꠍꠦ ꠚꠤꠞꠤꠀ ꠀꠁꠟ, ꠀꠞ ꠔꠣꠞ ꠑꠥꠐꠅ ꠀꠍꠤꠟ ꠎꠄꠔꠥꠘ ꠉꠣꠍꠞ ꠢꠣꠎꠝꠣ ꠙꠣꠔꠣ, ꠔꠣꠁꠘ ꠛꠥꠎꠟꠣ ꠝꠣꠐꠤꠞ ꠃꠙꠞ ꠕꠣꠇꠤ ꠙꠣꠘꠤ ꠇꠝꠤꠉꠦꠍꠦ। ১২ ꠀꠞꠅ ꠡꠣꠔ ꠖꠤꠘ ꠛꠣꠖꠦ ꠔꠣꠁꠘ ꠢꠤꠞꠛꠣꠞ ꠙꠣꠞꠅꠐꠣ ꠍꠣꠠꠟꠣ, ꠁꠇꠐꠣ ꠀꠞ ꠚꠤꠞꠤꠀ ꠀꠁꠟ ꠘꠣ।

১৩ ꠘꠥꠢꠞ ꠛꠄꠅꠡ ꠍꠄꠡ ꠄꠇ ꠛꠍꠞꠞ ꠡꠝꠄ ꠙꠄꠟꠣ ꠝꠣꠡꠞ ꠙꠄꠟꠣ ꠖꠤꠘ ꠝꠣꠐꠤꠞ ꠃꠙꠞ ꠕꠣꠇꠤ ꠙꠣꠘꠤ ꠢꠞꠤꠉꠦꠟ, ꠀꠞ ꠘꠥꠢꠦ ꠎꠣꠎꠞ ꠌꠣꠟ ꠈꠥꠟꠤꠀ ꠌꠣꠁꠀ ꠖꠦꠈꠟꠣ, ꠝꠣꠐꠤ ꠢꠥꠇꠣꠘꠤ ꠗꠞꠍꠦ। ১৪ ꠖꠥꠍꠞꠣ ꠝꠣꠡꠞ ꠡꠣꠔꠣꠁꠡ ꠖꠤꠘꠞ ꠖꠤꠘ ꠝꠣꠐꠤ ꠄꠇꠁꠛꠣꠞꠦ ꠢꠥꠇꠣꠁ ꠉꠦꠟ। ১৫ ꠀꠟ꠆ꠟꠣꠄ ꠔꠣꠘꠞꠦ ꠇꠁꠟꠣ, ১৬ “ꠔꠥꠝꠤ ꠔꠥꠝꠣꠞ ꠛꠤꠛꠤ, ꠔꠥꠝꠣꠞ ꠙꠥꠀꠂꠘ ꠀꠞ ꠔꠥꠝꠣꠞ ꠙꠥꠀꠂꠘ꠆ꠔꠞ ꠛꠃꠞꠦ ꠟꠁꠀ ꠎꠣꠎ ꠕꠣꠇꠤ ꠛꠣꠞ ꠅꠁꠀ ꠀꠅ। ১৭ ꠀꠞ ꠔꠥꠝꠣꠞ ꠟꠉꠦ ꠎꠔ ꠎꠣꠔꠞ ꠎꠣꠘꠖꠣꠞ ꠀꠍꠦ—ꠙꠣꠈꠤ, ꠎꠣꠘꠥꠀꠞ ꠀꠞ ꠝꠣꠐꠤꠞ ꠝꠣꠎꠦ ꠛꠥꠇꠦ ꠌꠟꠞꠣ ꠎꠣꠘꠖꠣꠞ—ꠔꠣꠞꠣꠞꠦꠅ ꠛꠣꠞ ꠇꠞꠤ ꠟꠁꠀ ꠀꠅ, ꠎꠦꠘꠥ ꠢꠣꠞꠣ ꠖꠥꠘꠤꠀꠁ ꠎꠥꠠꠤ ꠔꠣꠞꠣ ꠍꠤꠔ꠆ꠞꠤꠀ ꠉꠤꠀ ꠚꠟꠀꠟꠣ ꠅꠁꠀ ꠛꠣꠠꠦ।” ১৮ ꠔꠦꠃ ꠘꠥꠢꠦ ꠔꠣꠘ ꠛꠤꠛꠤ, ꠔꠣꠘ ꠙꠥꠀꠂꠘ ꠀꠞ ꠔꠣꠞꠣꠞ ꠛꠃꠞꠦ ꠟꠁꠀ ꠎꠣꠎ ꠕꠣꠇꠤ ꠛꠣꠞ ꠅꠁꠟꠣ। ১৯ ꠔꠣꠞꠣꠞ ꠟꠉꠦ ꠖꠥꠘꠤꠀꠁꠞ ꠢꠇꠟ ꠎꠣꠘꠥꠀꠞ, ꠙꠥꠇ-ꠎꠥꠇ ꠀꠞ ꠙꠣꠈꠤ, ꠄꠇ ꠇꠕꠣꠄ ꠖꠥꠘꠤꠀꠁꠔ ꠌꠟꠞꠣ ꠢꠇꠟ ꠎꠣꠘꠖꠣꠞ, ꠎꠣꠞꠎꠤꠞ ꠎꠣꠔꠝꠔ ꠛꠣꠞ ꠅꠁꠟ।

২০ ꠛꠣꠖꠦ ꠘꠥꠢꠦ ꠝꠣꠛꠥꠖꠞ ꠘꠣꠝꠦ ꠄꠇꠈꠣꠘ ꠇꠥꠞꠛꠣꠘꠤ ꠈꠣꠘꠣ ꠛꠣꠘꠣꠁꠟꠣ, ꠀꠞ ꠙꠞꠔꠦꠇ ꠎꠣꠔꠞ ꠢꠣꠟꠣꠟ ꠙꠡꠥ-ꠙꠣꠈꠤ ꠕꠣꠇꠤ ꠄꠇ ꠄꠇꠐꠣ ꠟꠁꠀ ꠎꠛꠅ ꠇꠞꠤꠀ, ꠎꠣꠟꠣꠁꠀ ꠇꠥꠞꠛꠣꠘꠤ ꠖꠤꠟꠣ। ২১ ꠝꠣꠛꠥꠖ ꠁ ꠇꠥꠞꠛꠣꠘꠤꠞ ꠗꠥꠝꠣꠞ ꠈꠥꠡꠛꠥꠄ ꠈꠥꠡꠤ ꠅꠁꠟꠣ, ꠀꠞ ꠔꠣꠁꠘ ꠇꠁꠟꠣ, “ꠝꠣꠘꠡꠞ ꠟꠣꠉꠤ ꠀꠝꠤ ꠀꠞ ꠇꠥꠘꠥ ꠡꠝꠄꠅ ꠝꠣꠐꠤꠞꠦ ꠟꠣꠘ꠆ꠘꠔ ꠖꠤꠔꠣꠝ ꠘꠣꠄ, ꠎꠥꠖꠤꠅ ꠢꠥꠞꠥꠛꠣꠟꠣ ꠕꠣꠇꠤꠃ ꠝꠣꠘꠡꠞ ꠝꠘꠞ ꠈꠤꠀꠟ ꠈꠣꠞꠣꠙꠤꠞ ꠛꠣꠄ ꠕꠣꠇꠦ। ꠁꠚꠤꠞꠣ ꠎꠦꠟꠣ ꠢꠇꠟ ꠎꠣꠘꠖꠣꠞꠞꠦ ꠝꠣꠞꠍꠤ, ꠁꠟꠣꠈꠣꠘ ꠀꠞ ꠇꠥꠘꠥꠖꠤꠘꠃ ꠝꠣꠞꠔꠣꠝ ꠘꠣꠄ। ২২ ꠎꠔꠖꠤꠘ ꠁ ꠖꠥꠘꠤꠀꠁ ꠕꠣꠇꠛ, ꠅꠔꠖꠤꠘ ꠘꠤꠅꠝꠝꠔ ꠛꠤꠌ ꠚꠣꠟꠣꠘꠤ ꠀꠞ ꠚꠡꠟ ꠇꠣꠐꠣ, ꠑꠣꠘ꠆ꠒꠣ ꠀꠞ ꠉꠞꠝ, ꠛꠣꠞꠤꠡꠣ ꠀꠞ ꠄꠅꠔ, ꠖꠤꠘ ꠀꠞ ꠞꠣꠁꠔ ꠌꠟꠔꠦꠃ ꠕꠣꠇꠛ।”

১ ꠀꠟ꠆ꠟꠣꠄ ꠘꠥꠢ ꠀꠞ ꠔꠣꠘ ꠙꠥꠀꠂꠘ꠆ꠔꠞꠦ ꠛꠞꠇꠔ ꠖꠤꠀ ꠇꠁꠟꠣ, “ꠔꠥꠝꠤꠔꠣꠁꠘ ꠚꠟꠀꠟꠣ ꠅꠁꠀ ꠛꠣꠠꠤꠀ ꠖꠥꠘꠤꠀꠁ ꠜꠞꠤ ꠎꠣꠅ। ২ ꠖꠥꠘꠤꠀꠁꠞ ꠎꠣꠘꠥꠀꠞ, ꠀꠍꠝꠣꠘꠞ ꠙꠣꠈꠤ, ꠝꠣꠐꠤꠞ ꠝꠣꠎꠦ ꠛꠥꠇꠦ ꠌꠟꠞꠣ ꠎꠣꠘꠖꠣꠞ ꠀꠞ ꠖꠞꠤꠀꠞ ꠝꠣꠍ, ꠢꠇꠟꠦꠃ ꠔꠥꠝꠞꠣꠞꠦ ꠒꠞ-ꠜꠄ ꠇꠞꠤ ꠌꠟꠛ। ꠁꠔꠣꠞꠦ ꠔꠥꠝꠞꠣꠞ ꠀꠔꠅ ꠖꠦꠅꠀ ꠅꠁꠟ। ৩ ꠎꠦꠟꠣ ꠔꠥꠝꠞꠣꠞꠦ ꠈꠦꠔꠞ ꠚꠟ-ꠚꠡꠟ ꠀꠞ ꠔꠞꠤ-ꠔꠞꠇꠣꠞꠤ ꠖꠤꠍꠟꠣꠝ, ꠅꠃꠟꠣ ꠅꠈꠘ ꠎꠤꠔꠣ ꠎꠣꠘꠖꠣꠞ ꠢꠇꠟꠞꠦꠅ ꠔꠥꠝꠞꠣꠞ ꠈꠣꠘꠤꠞ ꠟꠣꠉꠤ ꠖꠤꠟꠣꠝ। ৪ ꠈꠣꠟꠤ ꠟꠃ-ꠡꠢ ꠉꠥꠡ꠆ꠔ ꠔꠥꠝꠞꠣ ꠈꠣꠁꠅ ꠘꠣ, ꠟꠃ ꠅꠁꠟꠉꠤ ꠎꠣꠘ। ৫ ꠇꠦꠃ ꠎꠥꠖꠤ ꠝꠣꠘꠡꠞꠦ ꠈꠥꠘ ꠇꠞꠦ ꠔꠦ ꠀꠝꠤ ꠅꠛꠡ꠆ꠡꠃ ꠔꠣꠞ ꠈꠥꠘꠞ ꠛꠖꠟꠣ ꠟꠁꠝꠥ। ꠢꠦ ꠎꠣꠘꠥꠀꠞ ꠅꠃꠇ ꠛꠣ ꠝꠣꠘꠥꠡ ꠅꠃꠇ, ꠝꠣꠘꠡꠞ ꠎꠣꠘ ꠎꠦ ꠘꠦꠄ, ꠔꠣꠞ ꠎꠣꠘꠅ ꠖꠦꠅꠘ ꠟꠣꠉꠛ। ৬ ꠝꠣꠘꠡꠞ ꠟꠃ ꠎꠦ ꠛꠣꠞ ꠇꠞꠦ, ꠝꠣꠘꠡꠦꠅ ꠔꠣꠞ ꠟꠃ ꠛꠣꠞ ꠇꠞꠛ, ꠇꠣꠞꠘ ꠀꠟ꠆ꠟꠣꠄ ꠝꠣꠘꠡꠞꠦ ꠘꠤꠎꠞ ꠍꠥꠞꠔꠦ ꠛꠣꠘꠣꠁꠍꠂꠘ। ৭ ꠔꠥꠝꠤꠔꠣꠁꠘ ꠛꠦꠡꠇꠞꠤ ꠚꠟꠀꠟꠣ ꠅꠁꠀ ꠛꠣꠠꠅ ꠀꠞ ꠖꠥꠘꠤꠀꠁꠔ ꠍꠤꠔ꠆ꠞꠤꠀ ꠎꠣꠅ।”

৮ ꠛꠣꠖꠦ ꠀꠟ꠆ꠟꠣꠄ ꠘꠥꠢ ꠀꠞ ꠔꠣꠘ ꠙꠥꠀꠂꠘ꠆ꠔꠞꠦ ꠇꠁꠟꠣ, ৯ “ꠢꠥꠘꠅ, ꠀꠝꠤ ꠎꠛꠣꠘ ꠖꠤꠀꠞ, ꠔꠥꠝꠞꠣ ꠀꠞ ꠔꠥꠝꠞꠣꠞ ꠛꠣꠖꠞ ꠢꠇꠟ ꠝꠣꠘꠡꠞꠦ, ১০ ꠀꠞ ꠙꠣꠈꠤ, ꠙꠣꠟꠣ ꠢꠦꠝꠣꠘ ꠀꠞ ꠖꠥꠘꠤꠀꠁꠞ ꠎꠔ ꠎꠣꠘꠥꠀꠞ ꠔꠥꠝꠞꠣꠞ ꠟꠉꠦ ꠎꠣꠎ ꠕꠣꠇꠤ ꠛꠣꠞ ꠅꠁꠍꠦ, ꠔꠣꠞꠣꠞꠦꠅ। ১১ ꠎꠛꠣꠘꠐꠣ ꠅꠁꠟ, ꠛꠣꠘꠞ ꠙꠣꠘꠤ ꠖꠤꠀ ꠀꠞ ꠇꠥꠘꠥ ꠡꠝꠄꠃ ꠢꠇ꠆ꠇꠟ ꠎꠣꠘꠖꠣꠞꠞꠦ ꠝꠣꠞꠣ ꠅꠁꠔ ꠘꠣꠄ, ꠀꠞ ꠔꠣꠝꠣꠝ ꠖꠥꠘꠤꠀꠁ ꠍꠣꠚ ꠇꠞꠣꠞ ꠟꠣꠉꠤ ꠁꠟꠣ ꠇꠥꠘꠥ ꠛꠣꠘꠅ ꠅꠁꠔ ꠘꠣꠄ।” ১২ ꠀꠟ꠆ꠟꠣꠄ ꠀꠞꠅ ꠇꠁꠟꠣ, “ꠎꠦ ꠎꠛꠣꠘ ꠀꠝꠤ ꠔꠥꠝꠞꠣꠞꠦ ꠀꠞ ꠔꠥꠝꠞꠣꠞ ꠟꠉꠞ ꠎꠣꠘꠖꠣꠞ ꠅꠇꠟꠞꠦ ꠖꠤꠟꠣꠝ, ꠁꠇꠐꠣ ꠇꠤꠀꠝꠔ ꠙꠞ꠆ꠎꠘ꠆ꠔ ꠛꠅꠀꠟ ꠞꠁꠛ। ১৩ ꠀꠞ ꠝꠦꠊꠞ ꠇꠣꠟꠘꠤꠞ ꠝꠣꠎꠦ ꠀꠝꠣꠞ ꠞꠋꠗꠦꠘꠥ ꠖꠤꠟꠣꠝ, ꠁꠇꠐꠣ ꠅꠁꠟ ꠖꠥꠘꠤꠀꠁꠔ ꠀꠝꠣꠞ ꠎꠛꠣꠘꠞ ꠘꠤꠡꠣꠘꠣ। ১৪ ꠎꠦꠛꠟꠣ ꠀꠝꠤ ꠖꠥꠘꠤꠀꠁꠞ ꠃꠙꠞꠦ ꠇꠣꠟꠘꠤ ꠖꠤꠝꠥ, ꠁ ꠡꠝꠄ ꠅꠃ ꠞꠋꠗꠦꠘꠥ ꠖꠦꠈꠛꠣꠄ। ১৫ ꠀꠞ ꠅꠃ ꠡꠝꠄꠃ ꠀꠝꠤ ꠔꠥꠝꠞꠣꠞ ꠀꠞ ꠢꠇꠟ ꠎꠣꠘꠖꠣꠞꠞ ꠟꠉꠦ ꠀꠝꠣꠞ ꠎꠛꠣꠘꠞ ꠇꠕꠣ ꠁꠀꠖ ꠇꠞꠝꠥ। ꠀꠞ ꠇꠥꠘꠥ ꠡꠝꠄꠃ ꠛꠁꠘ꠆ꠘꠣ ꠅꠁꠀ ꠢꠇꠟ ꠎꠣꠘꠖꠣꠞꠞꠦ ꠙꠣꠘꠤ ꠖꠤꠀ ꠗꠁꠀ ꠘꠤꠔ ꠘꠣꠄ। ১৬ ꠇꠣꠟꠘꠤꠞ ꠝꠣꠎꠦ ꠎꠦꠛꠟꠣ ꠢꠤ ꠞꠋꠗꠦꠘꠥ ꠖꠦꠈꠣ ꠎꠣꠁꠛ ꠅꠃ ꠡꠝꠄ ꠀꠝꠤ ꠖꠥꠘꠤꠀꠁꠞ ꠢꠇꠟ ꠎꠣꠘꠖꠣꠞꠞ ꠟꠉꠦ ꠀꠝꠣꠞ ꠁ ꠢꠣꠝꠦꠡꠣꠇꠥꠞ ꠎꠛꠣꠘꠞ ꠇꠕꠣ ꠁꠀꠖ ꠇꠞꠝꠥ।” ১৭ ꠢꠦꠡꠦ ꠀꠟ꠆ꠟꠣꠄ ꠘꠥꠢꠞꠦ ꠇꠁꠟꠣ, “ꠖꠥꠘꠤꠀꠁꠞ ꠢꠇꠟ ꠎꠣꠘꠖꠣꠞꠞ ꠟꠉꠦ ꠀꠝꠤ ꠎꠦ ꠎꠛꠣꠘ ꠖꠤꠍꠤ, ꠁꠇꠐꠣ ꠅꠁꠟ ꠔꠣꠞ ꠘꠤꠡꠣꠘꠣ।”