১৪ ꠔꠦꠃ ꠝꠣꠛꠥꠖ ꠀꠟ꠆ꠟꠣꠄ ꠢꠣꠚꠞꠦ ꠇꠁꠟꠣ, “ꠔꠥꠝꠣꠞ ꠁ ꠇꠣꠝꠞ ꠟꠣꠉꠤ ꠢꠇꠟ ꠙꠣꠟꠣ ꠢꠦꠝꠣꠘ ꠀꠞ ꠢꠇꠟ ꠎꠋꠟꠤ ꠎꠣꠘꠥꠀꠞꠞ ꠝꠣꠎꠦ ꠔꠥꠝꠤꠃ ꠟꠣꠘ꠆ꠘꠔꠤ ꠅꠁꠟꠣꠄ। ꠔꠥꠝꠤ ꠎꠤꠘ꠆ꠖꠦꠉꠤꠜꠞ ꠙꠦꠐꠅ ꠜꠞꠖꠤ ꠌꠟꠛꠣꠄ ꠀꠞ ꠗꠥꠟꠣ-ꠛꠣꠟꠥ ꠈꠣꠁꠛꠣꠄ। ১৫ ꠀꠝꠤ ꠔꠥꠝꠣꠞ ꠀꠞ ꠛꠦꠐꠤꠞ ꠝꠣꠎꠦ, ꠔꠥꠝꠣꠞ ꠛꠋꠡ ꠀꠞ ꠛꠦꠐꠤ ꠝꠣꠘꠡꠞ ꠛꠋꠡꠞ ꠝꠣꠎꠦ ꠖꠥꠡꠝꠘꠤ ꠙꠄꠖꠣ ꠇꠞꠝꠥ। ꠢꠤ ꠛꠋꠡꠦ ꠔꠥꠝꠣꠞ ꠇꠟ꠆ꠟꠣ ꠉꠥꠠꠣ ꠇꠞꠛ, ꠀꠞ ꠔꠥꠝꠤ ꠔꠣꠞ ꠙꠣꠅꠞ ꠝꠥꠞꠣꠔ ꠇꠣꠝꠠꠣꠁꠛꠣꠄ।” ১৬ ꠀꠞ ꠔꠣꠁꠘ ꠛꠦꠐꠤꠞꠦ ꠇꠁꠟꠣ, “ꠔꠥꠝꠣꠞ ꠢꠥꠞꠥꠔ꠆ꠔꠣ ꠅꠁꠛꠣꠞ ꠡꠝꠄ ꠔꠥꠝꠣꠞ ꠝꠍꠤꠛꠔ ꠈꠥꠛ ꠛꠣꠠꠣꠁ ꠖꠤꠝꠥ, ꠔꠥꠝꠤ ꠈꠥꠛ ꠇꠡ꠆ꠐ ꠇꠞꠤꠀ ꠢꠥꠞꠥꠔ꠆ꠔꠣ ꠙꠄꠖꠣ ꠇꠞꠛꠣꠄ। ꠎꠣꠝꠣꠁꠞ ꠛꠣꠄ ꠔꠥꠝꠣꠞ ꠈꠥꠛ ꠈꠣꠁꠡ ꠕꠣꠇꠛ, ꠀꠞ ꠢꠦ ꠔꠥꠝꠣꠞ ꠃꠙꠞꠦ ꠛꠦꠐꠣꠉꠤꠞꠤ ꠇꠞꠛ।” ১৭ ꠔꠣꠁꠘ ꠀꠖꠝꠞꠦ ꠇꠁꠟꠣ, “ꠎꠦ ꠉꠣꠍꠞ ꠚꠟ ꠀꠝꠤ ꠢꠣꠞꠣꠝ ꠇꠞꠤꠀ ꠖꠤꠍꠟꠣꠝ, ꠔꠥꠝꠤ ꠔꠥꠝꠣꠞ ꠛꠃꠞ ꠇꠕꠣ ꠢꠥꠘꠤꠀ ꠁꠔꠣ ꠈꠣꠁꠍ, ꠅꠃ ꠇꠣꠞꠘꠦ ꠎꠝꠤꠘꠞꠦ ꠟꠣꠘ꠆ꠘꠔꠤ ꠇꠞꠣ ꠅꠁꠟ। ꠎꠤꠘ꠆ꠖꠦꠉꠤꠜꠞ ꠎꠛꠞ ꠔꠇꠟꠤꠚ ꠇꠞꠤꠀ ꠔꠥꠝꠤ ꠎꠝꠤꠘꠞ ꠚꠡꠟ ꠈꠣꠁꠛꠣꠄ। ১৮ ꠔꠥꠝꠣꠞ ꠟꠣꠉꠤ ꠝꠣꠐꠤꠞ ꠝꠣꠎꠦ ꠇꠣꠐꠣ-ꠉꠍꠣ ꠀꠞ ꠛꠤꠡꠀꠟꠣ ꠎꠋꠉꠟ ꠎꠘꠝꠣꠁꠛ, ꠀꠞ ꠔꠥꠝꠣꠞ ꠈꠣꠘꠤ ꠅꠁꠛ ꠅꠃ ꠝꠣꠐꠤꠞ ꠚꠄ-ꠚꠡꠟ। ১৯ ꠎꠦ ꠝꠣꠐꠤ ꠕꠣꠇꠤ ꠔꠥꠝꠣꠞꠦ ꠙꠄꠖꠣ ꠇꠞꠍꠟꠣꠝ, ꠢꠃ ꠝꠣꠐꠤꠔ ꠚꠤꠞꠤꠀ ꠘꠣ ꠎꠣꠅꠀ ꠙꠞ꠆ꠎꠘ꠆ꠔ ꠔꠥꠝꠣꠞ ꠝꠣꠕꠣꠞ ꠊꠣꠝ ꠙꠣꠅꠔ ꠚꠣꠟꠣꠁꠀ ꠈꠣꠘꠤ ꠈꠣꠁꠛꠣꠄ। ꠔꠥꠝꠣꠞ ꠝꠣꠐꠤꠞ ꠡꠞꠤꠟ, ꠝꠣꠐꠤꠔꠃ ꠝꠤꠡꠎꠤꠛ।”

২০ ꠀꠖꠝꠦ ꠔꠣꠘ ꠛꠤꠛꠤꠞ ꠘꠣꠝ ꠞꠣꠈꠟꠣ ꠢꠣꠅꠀ [ꠝꠣꠘꠤ, ꠎꠤꠘ꠆ꠖꠦꠉꠤ-ꠖꠦꠅꠞꠣ], ꠇꠣꠞꠘ ꠔꠣꠁꠘ ꠢꠇꠟ ꠎꠤꠘ꠆ꠖꠣ ꠝꠣꠘꠡꠞ ꠝꠣ ꠅꠁꠛꠣ। ২১ ꠀꠖꠝ ꠀꠞ ꠔꠣꠘ ꠛꠤꠛꠤꠞ ꠟꠣꠉꠤ ꠝꠣꠛꠥꠖ ꠀꠟ꠆ꠟꠣꠄ ꠎꠣꠘꠥꠀꠞꠞ ꠌꠣꠝꠠꠣꠖꠤ ꠟꠦꠛꠣꠍ ꠛꠣꠘꠣꠁꠀ ꠚꠤꠘ꠆ꠖꠣꠁꠟꠣ।

২২ ꠄꠞꠛꠣꠖꠦ ꠝꠣꠛꠥꠖ ꠀꠟ꠆ꠟꠣꠄ ꠇꠁꠟꠣ, “ꠖꠦꠈꠅ, ꠘꠦꠇꠤ-ꠛꠖꠤꠞ ꠀꠈꠟ ꠙꠣꠁꠀ ꠝꠣꠘꠥꠡ ꠀꠝꠞꠣꠞ ꠟꠣꠈꠣꠘ ꠅꠁꠉꠦꠍꠦ, ꠅꠈꠘ ꠢꠦ ꠎꠣꠔꠦ ꠀꠔ ꠛꠣꠠꠣꠁꠀ ꠎꠤꠘ꠆ꠖꠦꠉꠤ-ꠉꠣꠍꠞ ꠚꠟ ꠈꠣꠁꠀ ꠢꠣꠝꠦꠡꠣ ꠎꠤꠘ꠆ꠖꠣ ꠘꠣ ꠞꠄ।” ২৩ ꠅꠃ ꠇꠕꠣ ꠇꠁꠀ ꠝꠣꠛꠥꠖ ꠀꠟ꠆ꠟꠣꠄ ꠎꠦ ꠝꠣꠐꠤ ꠖꠤꠀ ꠝꠣꠘꠡꠞꠦ ꠙꠄꠖꠣ ꠇꠞꠍꠟꠣ, ꠢꠃ ꠝꠣꠐꠤꠔ ꠈꠦꠔ-ꠈꠣꠝꠣꠞ ꠇꠞꠣꠞ ꠟꠣꠉꠤ ꠔꠣꠞꠦ ꠀꠖꠘ ꠛꠣꠉꠣꠘ ꠕꠣꠇꠤ ꠈꠦꠖꠣꠁ ꠖꠤꠟꠣ। ২৪ ꠈꠦꠖꠣꠁ ꠖꠤꠀ ꠔꠣꠁꠘ ꠎꠤꠘ꠆ꠖꠦꠉꠤ-ꠉꠣꠍꠞ ꠉꠦꠍꠦ ꠎꠣꠅꠀꠞ ꠙꠕ ꠙꠣꠞꠣ ꠖꠦꠅꠀꠞ ꠟꠣꠉꠤ ꠀꠖꠘ ꠛꠣꠉꠣꠘꠞ ꠙꠥꠛꠦꠖꠤ ꠇꠣꠞꠥꠛꠤ ꠚꠤꠞꠤꠡ꠆ꠔꠣ ꠅꠇꠟ ꠞꠣꠈꠟꠣ ꠀꠞ ꠀꠉꠥꠁꠘꠞ ꠔꠟꠥꠀꠞꠅ ꠊꠥꠞꠣꠘꠤꠔ ꠞꠣꠈꠟꠣ।