১ ꠁꠝꠣꠝ ꠢꠣꠞꠥꠘꠞ ꠖꠥꠁ ꠙꠥꠀꠄ ꠘꠣꠚꠞꠝꠣꠘꠤ ꠇꠞꠤꠀ ꠝꠣꠛꠥꠖꠞ ꠍꠣꠝꠘꠦ ꠙꠠꠤꠀ ꠝꠞꠣꠞ ꠛꠣꠖꠦ, ꠝꠣꠛꠥꠖꠦ ꠝꠥꠍꠣ ꠘꠛꠤꠞ ꠟꠉꠦ ꠛꠣꠔꠌꠤꠔ ꠇꠞꠟꠣ। ২ ꠔꠣꠁꠘ ꠇꠁꠟꠣ, “ꠔꠥꠝꠣꠞ ꠜꠣꠁ ꠢꠣꠞꠥꠘꠞꠦ ꠇꠅ, ꠀꠝꠣꠞ ꠊꠞꠞ ꠜꠤꠔꠞꠦ ꠙꠞ꠆ꠖꠣꠞ ꠈꠞꠞ ꠢꠦꠞꠦꠝ ꠡꠞꠤꠚꠞ ꠡꠣꠢꠣꠖꠔ ꠡꠘ꠆ꠖꠥꠇꠞ ꠍꠣꠘꠤꠞ ꠉꠦꠍꠦ ꠢꠦ ꠎꠣꠘꠥ ꠎꠦꠛꠟꠣ ꠝꠘꠦ ꠌꠣꠄ ꠄꠛꠟꠣ ꠘꠣ ꠢꠣꠝꠣꠄ, ꠀꠞꠘꠣꠄ ꠢꠦ ꠝꠞꠛ। ꠎꠣꠘꠅ ꠔ, ꠅꠃ ꠍꠣꠘꠤꠞ ꠃꠙꠞꠞ ꠝꠦꠊꠞ ꠈꠥꠐꠤꠞ ꠝꠣꠎꠦ ꠀꠝꠤ ꠘꠤꠎꠦ ꠀꠎꠤꠞ ꠞꠁ।

৩ “ꠁꠘꠅ ꠢꠣꠝꠣꠘꠤꠞ ꠀꠉꠦ ꠢꠦ ꠎꠣꠘꠥ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠣꠉꠤ ꠄꠉꠥ ꠛꠤꠍꠣꠟ ꠀꠞ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠟꠣꠉꠤ ꠄꠉꠥ ꠝꠦꠠꠣ ꠟꠁꠀ ꠀꠁꠀ ꠢꠣꠝꠣꠄ। ৪ ꠀꠞ ꠢꠦ ꠡꠥꠔꠤ ꠇꠣꠙꠠꠞ ꠙꠛꠤꠔ꠆ꠞ ꠀꠟꠈꠦꠟ꠆ꠟꠣ, ꠄꠞꠟꠉꠦ ꠡꠥꠔꠤꠞ ꠢꠣꠚ ꠙꠦꠘ꠆ꠐ ꠚꠤꠘ꠆ꠖꠤꠀ ꠜꠤꠔꠞꠦ ꠢꠣꠝꠣꠁꠛ। ꠔꠣꠞ ꠇꠝꠞꠅ ꠛꠣꠘ꠆ꠖꠣꠞ ꠡꠥꠔꠤ ꠇꠣꠙꠠ ꠛꠣꠘ꠆ꠖꠤꠛ ꠀꠞ ꠝꠣꠕꠣꠔ ꠡꠥꠔꠤ ꠇꠣꠙꠠꠞ ꠙꠣꠃꠉꠠꠤ ꠟꠣꠉꠣꠁꠛ, ꠁꠔꠣ ꠔ ꠙꠣꠇ-ꠙꠛꠤꠔ꠆ꠞ ꠟꠦꠛꠣꠍ, ꠁꠔꠣ ꠚꠤꠘ꠆ꠖꠤꠛꠣꠞ ꠀꠉꠦ ꠢꠦ ꠙꠣꠘꠤꠖꠤ ꠘꠣꠁꠛ। ৫ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠣꠉꠤ ꠢꠦ ꠛꠘꠤ ꠁꠍꠞꠣꠁꠟꠞ ꠉꠦꠍ ꠕꠣꠇꠤ ꠖꠥꠁꠐꠣ ꠍꠣꠉꠟ ꠀꠞ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠟꠣꠉꠤ ꠄꠉꠥ ꠝꠦꠠꠣ ꠘꠤꠛ। ৬ ꠁꠝꠣꠝ ꠢꠣꠞꠥꠘꠦ ꠔꠣꠞ ꠘꠤꠎꠞ ꠀꠞ ꠔꠣꠞ ꠀꠅꠟꠣꠖ ꠅꠇꠟꠞ ꠉꠥꠘꠣꠞ ꠝꠣꠚꠤꠞ ꠟꠣꠉꠤ, ꠉꠥꠘꠣꠞ ꠇꠚꠞꠣꠞ ꠛꠤꠍꠣꠟꠞꠦ ꠇꠥꠞꠛꠣꠘꠤ ꠖꠤꠛ। ৭ ꠖꠤꠀ ꠢꠃ ꠍꠣꠉꠟ ꠖꠥꠁꠅꠐꠣ ꠟꠁꠀ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠉꠦꠍꠦ ꠝꠣꠛꠥꠖꠞ ꠍꠣꠝꠘꠦ ꠀꠎꠤꠞ ꠅꠁꠛ। ৮ ꠄꠞꠝꠣꠎꠦ ꠢꠦ ꠟꠐꠣꠞꠤ ꠝꠣꠞꠤꠀ ꠖꠦꠈꠛ, ꠇꠥꠘ ꠍꠣꠉꠟ ꠝꠣꠛꠥꠖꠞ ꠟꠣꠉꠤ ꠀꠞ ꠇꠥꠘꠐꠣ ꠀꠎꠣꠎꠤꠟꠞ ꠟꠣꠉꠤ। ৯ ꠟꠐꠣꠞꠤꠔ ꠝꠣꠛꠥꠖꠞ ꠘꠣꠝꠦ ꠎꠦ ꠍꠣꠉꠟ ꠃꠑꠛ, ꠢꠣꠞꠥꠘꠦ ꠅꠉꠥꠖꠤ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ ꠀꠖꠣꠄ ꠇꠞꠛ। ১০ ꠀꠞ ꠀꠎꠣꠎꠤꠟꠞ ꠘꠣꠝꠦ ꠎꠦ ꠍꠣꠉꠟ ꠃꠑꠛ, ꠅꠉꠥꠞꠦ ꠎꠤꠔꠣ ꠢꠣꠟꠔꠦ ꠝꠣꠛꠥꠖꠞ ꠍꠣꠝꠘꠦ ꠕꠁꠛ, ꠎꠣꠔꠦ ꠛꠣꠖꠦ ꠅꠉꠥꠞꠦ ꠝꠞꠥꠜꠥꠝꠤꠔ ꠘꠤꠀ ꠀꠎꠣꠎꠤꠟꠞ ꠘꠤꠅꠔꠦ ꠀꠃꠞꠤ ꠍꠣꠠꠤ ꠖꠦꠅꠀ ꠅꠄ। ꠅꠃ ꠘꠝꠥꠘꠣꠄ ꠉꠥꠘꠣꠞ ꠇꠚꠞꠣ ꠙꠥꠞꠘ ꠅꠁꠛ।

১১ “ꠁꠝꠣꠝ ꠢꠣꠞꠥꠘꠦ ꠔꠣꠞ ꠘꠤꠎꠞ ꠀꠞ ꠔꠣꠞ ꠀꠅꠟꠣꠖ ꠅꠇꠟꠞ ꠉꠥꠘꠣꠞ ꠇꠚꠞꠣꠞ ꠟꠣꠉꠤ, ꠔꠣꠞ ꠘꠤꠎꠞ ꠀꠘꠣ ꠢꠃ ꠛꠤꠍꠣꠟꠞꠦ ꠎꠛꠅ ꠇꠞꠛ। ১২ ꠝꠣꠛꠥꠖꠞ ꠍꠣꠝꠘꠞ ꠇꠥꠞꠛꠣꠘꠤ ꠈꠣꠘꠣ ꠕꠣꠇꠤ ꠀꠋꠞꠣ ꠕꠅꠀꠞ ꠙꠣꠔꠤꠟꠞ ꠝꠣꠎꠦ ꠢꠦ ꠎꠣꠟꠣꠁꠟ ꠀꠋꠞꠣ ꠜꠞꠛ, ꠀꠞ ꠖꠥꠁ ꠝꠥꠁꠐ ꠀꠉꠞ-ꠈꠥꠡꠛꠄꠞ ꠉꠥꠠꠣꠅ ꠟꠁꠛ, ꠟꠁꠀ ꠅꠔꠣ ꠢꠦ ꠙꠞ꠆ꠖꠣꠞ ꠈꠞꠦ ꠢꠦꠞꠦꠝ ꠡꠞꠤꠚꠅ ꠢꠣꠝꠣꠁꠛ। ১৩ ꠢꠣꠝꠣꠁꠀ ꠅꠃ ꠀꠋꠉꠞꠣꠞ ꠙꠣꠔꠤꠟꠞ ꠃꠙꠞꠦ ꠀꠉꠞ-ꠈꠥꠡꠛꠄ ꠖꠤꠀ ꠝꠣꠛꠥꠖꠞ ꠍꠣꠝꠘꠦ ꠎꠣꠟꠣꠁꠛ, ꠔꠦꠃ ꠅꠔꠣꠞ ꠗꠥꠝꠣꠄ ꠡꠣꠢꠣꠖꠔ ꠡꠘ꠆ꠖꠥꠇꠞ ꠍꠣꠘꠤꠞ ꠃꠙꠞ ꠀꠘ꠆ꠖꠣꠁꠞ ꠅꠁꠎꠤꠛ, ꠄꠞꠟꠣꠉꠤ ꠢꠦ ꠝꠣꠛꠥꠖꠞ ꠍꠣꠝꠘꠦ ꠝꠞꠔ ꠘꠣꠄ। ১৪ ꠛꠣꠖꠦ ꠢꠦ ꠇꠥꠞꠛꠣꠘꠤꠞ ꠢꠃ ꠛꠤꠍꠣꠟꠞ ꠕꠥꠠꠣ ꠟꠃ ꠘꠤꠀ ꠀꠔꠞ ꠀꠋꠉꠥꠁꠟ ꠖꠤꠀ ꠍꠣꠘꠤꠞ ꠍꠣꠝꠘꠞ ꠉꠣꠟꠣꠛꠣꠄ ꠍꠤꠐꠣꠁ ꠖꠤꠛ। ꠄꠞꠛꠣꠖꠦ ꠀꠋꠉꠥꠟꠤꠞ ꠝꠣꠎꠦ ꠀꠞꠅ ꠕꠥꠠꠣ ꠟꠃ ꠟꠣꠉꠣꠁꠀ ꠍꠣꠘꠤꠞ ꠍꠣꠝꠘꠦ ꠡꠣꠔ ꠛꠣꠞ ꠍꠤꠐꠣꠁꠀ ꠖꠤꠛ।

১৫ “ꠀꠞ ꠢꠦ ꠝꠣꠘꠡꠞ ꠉꠥꠘꠣꠞ ꠇꠚꠞꠣꠞ ꠘꠤꠅꠔꠦ ꠀꠘꠣ ꠍꠣꠉꠟꠐꠣꠞꠦ ꠎꠛꠅ ꠇꠞꠛ, ꠇꠞꠤꠀ ꠅꠉꠥꠞ ꠟꠃ ꠘꠤꠀ ꠙꠞ꠆ꠖꠣꠞ ꠈꠞꠞ ꠢꠦꠞꠦꠝ ꠡꠞꠤꠚꠅ ꠉꠤꠀ, ꠛꠤꠍꠣꠟꠞ ꠟꠃꠖꠤ ꠎꠦꠟꠣ ꠇꠞꠣ ꠅꠁꠍꠤꠟ, ꠅꠉꠥꠞ ꠟꠃꠖꠤꠅ ꠅꠟꠣ ꠇꠞꠔꠦ ꠅꠁꠛ। ꠡꠘ꠆ꠖꠥꠇꠞ ꠍꠣꠘꠤꠞ ꠃꠙꠞꠦ ꠀꠞ ꠍꠣꠝꠘꠦ ꠅꠃ ꠟꠃ ꠍꠤꠐꠣꠁꠔꠦ ꠅꠁꠛ। ১৬ ꠛꠘꠤ ꠁꠍꠞꠣꠁꠟꠞ ꠉꠥꠘꠣ, ꠘꠣꠙꠣꠇꠤ, ꠀꠞ ꠘꠣꠚꠞꠝꠣꠘꠤꠄ ꠢꠦꠞꠦꠝ ꠡꠞꠤꠚꠞꠦꠅ ꠘꠣꠙꠣꠇ ꠇꠞꠤꠟꠣꠄ, ꠄꠞꠟꠣꠉꠤ ꠔꠣꠞꠣꠞ ꠝꠣꠎꠦ ꠎꠦ ꠝꠤꠟꠘ-ꠔꠣꠝ꠆ꠛꠥ ꠀꠍꠦ, ꠅꠈꠣꠘꠞ ꠘꠣꠙꠣꠇꠤ ꠢꠞꠣꠘꠤꠞ ꠘꠤꠅꠔꠦ ꠁꠝꠣꠝ ꠢꠣꠞꠥꠘꠦ ꠅꠃ ꠘꠝꠥꠘꠣꠄ ꠉꠥꠘꠣꠞ ꠇꠚꠞꠣ ꠀꠖꠣꠄ ꠇꠞꠛꠣ। ১৭ ꠢꠦꠞꠦꠝ ꠡꠞꠤꠚꠞ ꠜꠤꠔꠞꠦ ꠢꠣꠝꠣꠁꠀ ꠢꠣꠞꠤ ꠢꠣꠞꠥꠘꠦ ꠔꠣꠘ ꠘꠤꠎꠞ, ꠔꠣꠘ ꠀꠅꠟꠣꠖ ꠅꠇꠟꠞ ꠀꠞ ꠀꠡ꠆ꠔꠣ ꠡꠝꠣꠎꠞ ꠉꠥꠘꠣꠞ ꠇꠚꠞꠣꠞ ꠇꠣꠝ ꠡꠦꠡ ꠇꠞꠤꠀ ꠎꠔꠛꠤꠟ ꠘꠣ ꠛꠣꠞ ꠅꠁꠀ ꠀꠁꠘ, ꠅꠔꠛꠤꠟ ꠖꠥꠍꠞꠣ ꠇꠥꠘꠥ ꠝꠣꠘꠥꠡ ꠝꠤꠟꠘ-ꠔꠣꠝ꠆ꠛꠥꠞ ꠜꠤꠔꠞꠦ ꠢꠣꠝꠣꠘꠤ ꠘꠤꠡꠦꠗ। ১৮ ꠅꠈꠣꠘ ꠕꠣꠇꠤ ꠛꠣꠞ ꠅꠁꠀ ꠀꠁꠀ ꠢꠣꠞꠥꠘꠦ ꠝꠣꠛꠥꠖꠞ ꠍꠣꠝꠘꠦ ꠎꠦ ꠇꠥꠞꠛꠣꠘꠤ ꠈꠣꠘꠣ ꠀꠍꠦ, ꠢꠘꠅ ꠉꠤꠀ ꠢꠃ ꠇꠥꠞꠛꠣꠘꠤ ꠈꠣꠘꠣꠞ ꠟꠣꠉꠤꠅ ꠇꠚꠞꠣ ꠖꠤꠀ ꠙꠣꠇ-ꠙꠛꠤꠔ꠆ꠞ ꠇꠞꠛꠣ। ꠢꠃ ꠛꠤꠍꠣꠟ ꠀꠞ ꠍꠣꠉꠟꠞ ꠕꠥꠠꠣ ꠟꠃ ꠘꠤꠀ ꠔꠣꠁꠘ ꠇꠥꠞꠛꠣꠘꠤ ꠈꠣꠘꠣꠞ ꠢꠤꠋꠉꠞ ꠝꠣꠎꠦ ꠟꠣꠉꠣꠁꠛꠣ। ১৯ ꠇꠥꠞꠛꠣꠘꠤ ꠈꠣꠘꠣꠞꠦ ꠙꠣꠇ-ꠍꠣꠚ ꠇꠞꠣꠞ ꠘꠤꠅꠔꠦ, ꠀꠞ ꠅꠈꠣꠘꠞ ꠃꠍꠤꠟ꠆ꠟꠣꠄ ꠀꠡ꠆ꠔꠣ ꠛꠘꠤ ꠁꠍꠞꠣꠁꠟꠞ ꠘꠣꠙꠣꠇꠤꠞꠦ ꠙꠣꠇ-ꠍꠣꠚ ꠇꠞꠣꠞ ꠈꠤꠀꠟꠦ ꠢꠦ ꠔꠣꠞ ꠀꠔꠞ ꠀꠋꠉꠥꠁꠟ ꠖꠤꠀ ꠅꠈꠣꠘꠞ ꠃꠙꠞꠦ ꠡꠣꠔ ꠛꠣꠞ ꠟꠃ ꠍꠤꠐꠣꠁꠛ।

২০ “ꠢꠦꠞꠦꠝ ꠡꠞꠤꠚ, ꠙꠛꠤꠔ꠆ꠞ ꠇꠣꠛꠣ ꠊꠞ, ꠀꠞ ꠇꠥꠞꠛꠣꠘꠤ ꠈꠣꠘꠣꠞ ꠘꠣꠙꠣꠇꠤ ꠢꠞꠣꠘꠤꠞ ꠇꠚꠞꠣꠞ ꠇꠣꠝ ꠡꠦꠡ ꠇꠞꠤꠀ ꠢꠣꠞꠟꠦ ꠢꠣꠞꠥꠘꠦ ꠀꠎꠣꠎꠤꠟꠞ ꠘꠣꠝꠞ ꠢꠃ ꠎꠤꠔꠣ ꠍꠣꠉꠟ ꠟꠁꠀ ꠀꠁꠛꠣ। ২১ ꠀꠁꠀ ꠅꠃ ꠍꠣꠉꠟꠞ ꠇꠟ꠆ꠟꠣꠞ ꠃꠙꠞꠦ ꠔꠣꠞ ꠖꠥꠁꠅ ꠀꠔ ꠕꠁꠀ, ꠛꠘꠤ ꠁꠍꠞꠣꠁꠟꠞ ꠢꠇꠟ ꠉꠥꠘꠣ-ꠘꠣꠚꠞꠝꠣꠘꠤ ꠀꠞ ꠛꠖ ꠇꠣꠝꠞ ꠇꠕꠣ ꠡ꠆ꠛꠤꠇꠣꠞ ꠇꠞꠤꠀ ꠍꠣꠉꠟꠞ ꠇꠟ꠆ꠟꠣꠞ ꠃꠙꠞꠦ ꠅꠔꠣ ꠛꠞ꠆ꠔꠣꠁ ꠖꠤꠛ। ꠛꠣꠖꠦ ꠀꠉ ꠕꠣꠇꠤ ꠎꠥꠁꠔ ꠅꠀ ꠄꠇ ꠛꠦꠐꠣꠞꠦ ꠖꠤꠀ ꠅꠃ ꠍꠣꠉꠟꠞꠦ ꠢꠦ ꠝꠞꠥꠜꠥꠝꠤꠔ ꠙꠣꠑꠣꠁ ꠖꠤꠛ। ২২ ꠢꠃ ꠛꠦꠐꠣꠄ ꠘꠤꠀ ꠅꠉꠥꠞꠦ ꠝꠞꠥꠜꠥꠝꠤꠔ ꠍꠣꠠꠤꠀ ꠀꠁꠛ। ꠔꠣꠞꠣꠞ ꠢꠇꠟ ꠘꠣꠚꠞꠝꠣꠘꠤꠞꠦ ꠅꠃ ꠍꠣꠉꠟꠦ ꠘꠤꠞꠣꠁ-ꠘꠤꠞ꠆ꠎꠘ ꠝꠞꠥꠜꠥꠝꠤꠔ ꠟꠁꠀ ꠊꠥꠞꠤꠀ।

২৩ “ꠀꠞ ꠢꠦꠞꠦꠝ ꠡꠞꠤꠚꠅ ꠢꠣꠝꠣꠁꠛꠣꠞ ꠇꠣꠟꠅ ꠢꠣꠞꠥꠘꠦ ꠡꠥꠔꠤ ꠇꠣꠙꠠꠞ ꠎꠔ ꠟꠦꠛꠣꠍ ꠚꠤꠘ꠆ꠖꠁꠍꠟꠣ, ꠔꠣꠁꠘ ꠝꠤꠟꠘ-ꠔꠣꠝ꠆ꠛꠥꠔ ꠚꠤꠞꠤꠀ ꠀꠁꠀ ꠁꠔꠣ ꠈꠥꠟꠤꠀ ꠕꠁ ꠖꠤꠛꠣ। ২৪ ꠈꠥꠟꠤꠀ ꠔꠣꠁꠘ ꠇꠣꠛꠣ ꠊꠞꠞ ꠡꠤꠝꠣꠘꠣꠞ ꠜꠤꠔꠞꠦ ꠙꠣꠘꠤꠖꠤ ꠘꠣꠁꠀ ꠔꠣꠘ ꠘꠤꠎꠞ ꠟꠦꠛꠣꠍ ꠚꠤꠘ꠆ꠖꠤꠛꠣ। ꠛꠣꠖꠦ ꠔꠣꠁꠘ ꠛꠣꠞꠦ ꠀꠁꠀ ꠔꠣꠘ ꠘꠤꠎꠞ ꠀꠞ ꠝꠣꠘꠡꠞ ꠟꠣꠉꠤ ꠄꠉꠥ ꠇꠞꠤ ꠎꠣꠟꠣꠁꠟ ꠇꠥꠞꠛꠣꠘꠤ ꠀꠖꠣꠄ ꠇꠞꠤꠀ, ꠔꠣꠘ ꠘꠤꠎꠞ ꠀꠞ ꠝꠣꠘꠡꠞ ꠉꠥꠘꠣꠞ ꠇꠚꠞꠣꠅ ꠀꠖꠣꠄ ꠇꠞꠛꠣ। ২৫ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠌꠞ꠆ꠛꠤꠞꠦ ꠔꠣꠁꠘ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠎꠣꠟꠣꠁꠟꠤꠛꠣ। ২৬ ꠎꠦ ꠛꠦꠐꠣꠄ ꠀꠎꠣꠎꠤꠟꠞ ꠘꠣꠝꠞ ꠍꠣꠉꠟꠞꠦ ꠝꠞꠥꠜꠥꠝꠤꠔ ꠍꠣꠠꠤꠀ ꠀꠁꠛ, ꠢꠦ-ꠅ ꠔꠣꠞ ꠇꠣꠙꠠ-ꠌꠥꠙꠠ ꠗꠁꠀ ꠢꠣꠞꠤ ꠙꠣꠘꠤ ꠖꠤꠀ ꠘꠣꠁꠀ ꠛꠣꠖꠦ ꠇꠦꠝ꠆ꠙꠞ ꠜꠤꠔꠞꠦ ꠢꠣꠝꠣꠁꠔ ꠙꠣꠞꠛ। ২৭ ꠉꠥꠘꠣ ꠝꠣꠚꠤꠞ ꠟꠣꠉꠤ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠎꠦ ꠛꠤꠍꠣꠟ ꠀꠞ ꠍꠣꠉꠟꠞ ꠟꠃꠞꠦ ꠢꠦꠞꠦꠝ ꠡꠞꠤꠚꠅ ꠘꠤꠛꠣꠞ ꠢꠥꠇꠥꠝ ꠖꠦꠅꠀ ꠅꠁꠍꠦ, ꠅꠔꠣꠞ ꠢꠇꠟ ꠉꠥꠡ꠆ꠔ, ꠈꠣꠟ, ꠉꠥꠚꠞ ꠀꠞ ꠢꠇꠟꠔꠣꠞꠦ ꠇꠦꠝ꠆ꠙꠞ ꠛꠣꠞꠦ ꠘꠤꠀ ꠄꠇꠎꠘꠦ ꠎꠣꠟꠣꠁꠟꠤꠅ। ২৮ ꠎꠦ ꠎꠘꠦ ꠁꠔꠣ ꠢꠇꠟꠔꠣ ꠛꠣꠞꠦ ꠘꠤꠀ ꠎꠣꠟꠣꠁꠛ, ꠢꠦ-ꠅ ꠔꠣꠞ ꠇꠣꠙꠠ-ꠌꠥꠙꠠ ꠗꠁꠀ, ꠙꠣꠘꠤꠖꠤ ꠘꠣꠁꠀ ꠢꠣꠞꠤ ꠛꠣꠖꠦ ꠀꠁꠀ ꠇꠦꠝ꠆ꠙꠞ ꠜꠤꠔꠞꠦ ꠢꠣꠝꠣꠁꠔ ꠙꠣꠞꠛ।

২৯ “ꠄꠞꠛꠣꠖꠦ ꠀꠝꠤ ꠎꠦꠔꠣ ꠇꠁꠞꠣꠝ, ꠁꠔꠣ ꠅꠁꠟ ꠔꠥꠝꠞꠣꠞ ꠟꠣꠉꠤ ꠢꠞ-ꠢꠣꠝꠦꠡꠣꠇꠥꠞ ꠘꠤꠅꠝ। ꠙꠞꠔꠦꠇ ꠛꠍꠞꠞ ꠡꠣꠔ ꠘꠝ꠆ꠛꠞ ꠌꠣꠘ꠆ꠖꠞ ꠖꠡ ꠘꠝ꠆ꠛꠞ ꠖꠤꠘ, ꠔꠥꠝꠞꠣꠞ ꠙꠞꠔꠦꠇ ꠎꠘꠦ ꠖꠤꠟꠦ-ꠎꠣꠘꠦ ꠇꠣꠔꠞ ꠅꠁꠀ, ꠢꠇꠟ ꠎꠣꠔꠞ ꠇꠣꠝ-ꠇꠣꠎ, ꠞꠥꠎꠤ-ꠞꠥꠎꠉꠣꠞ ꠛꠣꠖ ꠖꠤꠀ ꠀꠟ꠆ꠟꠣꠞ ꠖꠞꠛꠣꠞꠅ ꠇꠣꠘ꠆ꠖꠣ-ꠇꠣꠐꠤ ꠇꠞꠛꠣꠄ। ꠛꠘꠤ ꠁꠍꠞꠣꠁꠟ ꠛꠣ ꠔꠥꠝꠞꠣꠞ ꠟꠉꠦ ꠛꠡꠔ ꠇꠞꠞꠣ ꠜꠤꠘ-ꠖꠦꠡꠤ ꠢꠇꠟ ꠎꠘꠦ ꠁꠔꠣ ꠝꠣꠘꠔꠦ ꠅꠁꠛ। ৩০ ꠇꠣꠞꠘ ꠅꠃꠖꠤꠘ ꠔꠥꠝꠞꠣꠞ ꠉꠥꠘꠣ ꠝꠣꠚꠤꠞ ꠟꠣꠉꠤ ꠉꠥꠘꠣꠞ ꠇꠚꠞꠣ ꠀꠖꠣꠄ ꠇꠞꠣ ꠅꠁꠛ, ꠔꠦꠃ ꠔꠥꠝꠞꠣ ꠝꠣꠛꠥꠖꠞ ꠍꠣꠝꠘꠦ ꠢꠇꠟ ꠘꠝꠥꠘꠣꠞ ꠉꠥꠘꠣ ꠕꠣꠇꠤ ꠙꠣꠇ-ꠍꠣꠚ ꠅꠁꠛꠣꠄ। ৩১ ꠅꠃꠖꠤꠘ ꠔꠥꠝꠞꠣ ꠢꠇꠟ ꠘꠝꠥꠘꠣꠞ ꠇꠣꠝ-ꠇꠣꠎ ꠛꠣꠖ ꠖꠤꠀ ꠀꠞꠣꠝ ꠇꠞꠛꠣꠄ, ꠙꠞꠔꠦꠇꠦ ꠎꠣꠞꠎꠤꠞ ꠖꠤꠟ ꠡꠙꠤꠀ ꠇꠣꠔꠞ ꠅꠁꠀ ꠀꠟ꠆ꠟꠣꠞ ꠖꠞꠛꠣꠞꠅ ꠚꠣꠘꠣ ꠝꠣꠋꠉꠤꠛꠣꠄ। ꠁꠐꠣ ꠅꠁꠟ ꠔꠥꠝꠞꠣꠞ ꠟꠣꠉꠤ ꠌꠤꠞꠇꠣꠟꠤꠘ ꠘꠤꠅꠝ। ৩২ ꠎꠦꠇꠥꠘꠥ ꠁꠝꠣꠝꠞꠦ ꠎꠦꠛꠟꠣ ꠙꠞꠗꠣꠘ ꠁꠝꠣꠝ ꠢꠤꠡꠣꠛꠦ ꠔꠣꠞ ꠛꠣꠚꠞ ꠎꠣꠉꠣꠔ ꠛꠅꠀꠁꠟ ꠇꠞꠣ ꠅꠁꠛ, ꠢꠦ-ꠅ ꠅꠟꠣ ꠡꠥꠔꠤ ꠇꠣꠙꠠꠞ ꠙꠛꠤꠔ꠆ꠞ ꠟꠦꠛꠣꠍ ꠚꠤꠘ꠆ꠖꠤꠀ ꠅꠃ ꠘꠝꠥꠘꠣꠄ ꠉꠥꠘꠣꠞ ꠇꠚꠞꠣ ꠀꠖꠣꠄ ꠇꠞꠛ। ৩৩ ꠄꠞꠟꠉꠦ ꠢꠦꠞꠦꠝ ꠡꠞꠤꠚ, ꠙꠛꠤꠔ꠆ꠞ ꠇꠣꠛꠣ ꠊꠞ, ꠇꠥꠞꠛꠣꠘꠤ ꠈꠣꠘꠣ, ꠛꠣꠇꠤ ꠁꠝꠣꠝ ꠅꠇꠟ, ꠀꠞ ꠀꠡ꠆ꠔꠣ ꠛꠘꠤ ꠁꠍꠞꠣꠁꠟꠞ ꠉꠥꠘꠣ-ꠘꠣꠚꠞꠝꠣꠘꠤꠞ ꠇꠚꠞꠣ ꠀꠖꠣꠄ ꠇꠞꠛ। ৩৪ ꠁꠐꠣ ꠅꠁꠟ ꠔꠥꠝꠞꠣꠞ ꠟꠣꠉꠤ ꠢꠞ-ꠢꠣꠝꠦꠡꠣꠇꠥꠞ ꠘꠤꠅꠝ। ꠙꠞꠔꠦꠇ ꠛꠍꠞ ꠄꠇꠛꠣꠞ ꠢꠇꠟ ꠛꠘꠤ ꠁꠍꠞꠣꠁꠟꠞ ꠉꠥꠘꠣꠞ ꠇꠚꠞꠣ ꠅꠟꠣ ꠀꠖꠣꠄ ꠇꠞꠔꠦ ꠅꠁꠛ।”

ꠔꠦꠃ ꠝꠣꠛꠥꠖꠦ ꠝꠥꠍꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠑꠤꠇ ꠅꠃ ꠟꠣꠈꠣꠘ ꠢꠇꠟꠔꠣ ꠇꠞꠣ ꠅꠁꠟ।