১ ꠝꠣꠛꠥꠖ ꠀꠟ꠆ꠟꠣꠞ ꠙꠄꠖꠣ ꠇꠞꠣ ꠎꠝꠤꠘꠞ ꠢꠇꠟ ꠎꠣꠘꠖꠣꠞꠞ ꠝꠣꠎꠦ ꠢꠣꠚ ꠅꠁꠟ ꠢꠇꠟ ꠕꠣꠇꠤ ꠚꠘ꠆ꠖꠤꠛꠣꠎ। ꠅꠃ ꠢꠣꠚꠦ ꠄꠇ ꠖꠤꠘ ꠢꠤ ꠛꠦꠐꠤ ꠝꠣꠘꠡꠞꠦ ꠇꠂꠟ, “ꠀꠟ꠆ꠟꠣꠄ ꠢꠣꠍꠣꠃ ꠔꠥꠝꠣꠔꠣꠘꠞꠦ ꠇꠁꠍꠂꠘ ꠘꠤ, ꠛꠣꠉꠣꠘꠞ ꠢꠇꠟ ꠉꠣꠍꠞ ꠚꠟ ꠔꠥꠝꠞꠣ ꠈꠣꠁꠔꠣꠄ ꠙꠣꠞꠔꠣꠄ ꠘꠣꠄ?” ২ ꠛꠦꠐꠤꠄ ꠇꠁꠟꠣ, “ꠛꠣꠉꠣꠘꠞ ꠎꠦꠇꠥꠘꠥ ꠉꠣꠍꠞ ꠚꠟ ꠀꠝꠞꠣ ꠈꠣꠁꠔꠣꠝ ꠙꠣꠞꠤ, ৩ ꠈꠣꠟꠤ ꠛꠣꠉꠣꠘꠞ ꠝꠣꠎꠈꠣꠘꠅ ꠎꠦ ꠉꠣꠍꠐꠣ ꠀꠍꠦ, ꠀꠟ꠆ꠟꠣꠄ ꠇꠁꠍꠂꠘ, ꠔꠥꠝꠞꠣ ꠄꠞ ꠚꠟ ꠈꠣꠁꠅ ꠘꠣ, ꠍꠁꠅ-ꠅ ꠘꠣ, ꠍꠁꠟꠦꠃ ꠝꠞꠛꠣꠄ।” ৪ ꠅꠃ ꠢꠣꠚꠦ ꠔꠣꠘꠞꠦ ꠇꠂꠟ, “ꠘꠣ, ꠇꠥꠘꠥꠝꠘ꠆ꠔꠦꠃ ꠝꠞꠔꠣꠄ ꠘꠣꠄ। ৫ ꠀꠟ꠆ꠟꠣꠄ ꠔ ꠎꠣꠘꠂꠘ, ꠎꠦꠖꠤꠘ ꠔꠥꠝꠞꠣ ꠁ ꠉꠣꠍꠞ ꠚꠟ ꠈꠣꠁꠟꠤꠛꠣꠄ ꠁꠖꠤꠘ ꠔꠥꠝꠞꠣꠞ ꠌꠃꠈ ꠈꠥꠟꠤꠎꠤꠛ, ꠀꠞ ꠘꠦꠇꠤ-ꠛꠖꠤꠞ ꠀꠈꠟ ꠙꠣꠁꠀ ꠔꠥꠝꠞꠣ ꠀꠟ꠆ꠟꠣꠞ ꠟꠣꠈꠣꠘ ꠅꠁꠎꠤꠛꠣꠄ।” ৬ ꠛꠦꠐꠤꠄ ꠎꠦꠛꠟꠣ ꠛꠥꠎꠟꠣ, ꠅꠃ ꠉꠣꠍꠞ ꠚꠟ ꠈꠣꠁꠔꠦ ꠝꠎꠣ ꠅꠁꠛ, ꠖꠦꠈꠔꠦꠅ ꠡꠥꠘ꠆ꠖꠞ, ꠀꠞ ꠀꠈꠟꠖꠣꠞꠅ ꠅꠁꠎꠤꠝꠥ, ꠅꠃ ꠔꠣꠁꠘ ꠚꠟ ꠙꠣꠠꠤꠀ ꠈꠣꠁꠟꠣ, ꠀꠞ ꠔꠣꠘ ꠎꠣꠝꠣꠁꠞꠦꠅ ꠖꠤꠟꠣ ꠀꠞ ꠎꠣꠝꠣꠁꠄꠅ ꠈꠣꠁꠟꠤꠟꠣ। ৭ ꠟꠉꠦ ꠟꠉꠦ ꠔꠣꠞꠣ ꠖꠥꠁꠅ ꠎꠘꠞ ꠌꠃꠈ ꠈꠥꠟꠤꠉꠦꠟ, ꠀꠞ ꠛꠥꠎꠟꠣ ꠔꠣꠁꠘ-ꠔꠣꠁꠘ ꠟꠦꠝꠐꠣ। ꠅꠃ ꠔꠣꠞꠣ ꠒꠥꠝꠥꠞ ꠉꠣꠍꠞ ꠇꠄꠐꠣ ꠙꠣꠔꠣ ꠍꠤꠠꠤꠀ ꠡꠤꠟꠣꠁ ꠇꠞꠤ ꠟꠦꠝꠐꠤ ꠛꠣꠘꠣꠁꠟꠣ।

৮ ꠢꠣꠁꠘ꠆ꠎꠣꠛꠣꠟꠣ ꠔꠣꠞꠣ ꠝꠣꠛꠥꠖ ꠀꠟ꠆ꠟꠣꠞ ꠀꠅꠀꠎ ꠢꠥꠘꠟꠣ, ꠔꠣꠁꠘ ꠛꠣꠉꠣꠘꠞ ꠝꠣꠎꠦ ꠚꠣꠈꠣꠘꠤꠔ ꠀꠁꠞꠣ। ꠔꠦꠃ ꠀꠖꠝ ꠀꠞ ꠔꠣꠘ ꠛꠃ ꠝꠣꠛꠥꠖ ꠀꠟ꠆ꠟꠣꠞ ꠍꠣꠝꠘꠦ ꠘꠣ ꠙꠠꠣꠞ ꠟꠣꠉꠤ ꠛꠣꠉꠣꠘꠞ ꠉꠣꠍꠞ ꠀꠅꠠꠦ ꠟꠥꠇꠣꠁꠟꠣ। ৯ ꠝꠣꠛꠥꠖ ꠀꠟ꠆ꠟꠣꠄ ꠀꠖꠝꠞꠦ ꠒꠣꠇ ꠖꠤꠀ ꠎꠤꠇꠣꠁꠟꠣ, “ꠔꠥꠝꠤ ꠇꠥꠀꠁ?” ১০ ꠔꠣꠁꠘ ꠇꠁꠟꠣ, “ꠛꠣꠉꠣꠘꠞ ꠝꠣꠎꠦ ꠀꠝꠤ ꠔꠥꠝꠣꠞ ꠀꠅꠀꠎ ꠢꠥꠘꠍꠤ। ꠀꠝꠤ ꠔ ꠟꠦꠝꠐꠣ, ꠄꠞꠟꠣꠉꠤ ꠒꠞꠣꠁꠀ ꠟꠥꠇꠣꠁ ꠞꠁꠍꠤ।” ১১ ꠔꠦꠃ ꠝꠣꠛꠥꠖ ꠀꠟ꠆ꠟꠣꠄ ꠎꠤꠇꠣꠁꠟꠣ, “ꠔꠥꠝꠤ ꠎꠦ ꠟꠦꠝꠐꠣ ꠇꠦ ꠇꠂꠟ? ꠎꠦ ꠉꠣꠍꠞ ꠚꠟ ꠈꠣꠁꠔꠦ ꠔꠥꠝꠣꠞꠦ ꠘꠣ ꠇꠞꠍꠤꠟꠣꠝ, ꠈꠣꠁꠟꠤꠍ ꠘꠣ ꠇꠤꠔꠣ?” ১২ ꠀꠖꠝꠦ ꠇꠁꠟꠣ, “ꠎꠦ ꠛꠦꠐꠤꠝꠣꠘꠥꠡ ꠔꠥꠝꠤ ꠀꠝꠣꠞ ꠟꠉꠦ ꠖꠤꠍ, ꠔꠣꠁ ꠅꠃ ꠉꠣꠍꠞ ꠚꠟ ꠀꠝꠣꠞꠦ ꠈꠣꠅꠀꠁꠍꠦ।” ১৩ ꠅꠃ ꠝꠣꠛꠥꠖ ꠀꠟ꠆ꠟꠣꠄ ꠛꠦꠐꠤꠞꠦ ꠎꠤꠇꠣꠁꠟꠣ, “ꠔꠥꠝꠤ ꠁꠔꠣ ꠇꠤꠔꠣ ꠇꠞꠟꠣꠄ?” ꠔꠣꠁꠘ ꠇꠁꠟꠣ, “ꠢꠣꠚꠦ ꠀꠝꠣꠞꠦ ꠍꠣꠟ꠆ꠟꠣ ꠖꠤꠀ ꠈꠣꠅꠀꠁꠍꠦ।”