ꠙꠣꠠꠞ ꠙꠦꠐꠅ ꠢꠎꠞꠔ ꠁꠍꠣꠞ ꠔꠣꠟꠤꠝ (৫:১-৭:২৯)
ꠇꠥꠘ ꠇꠥꠘ ꠝꠣꠘꠥꠡ ꠘꠦꠇ-ꠇꠙꠣꠟꠤ
৫
১ ꠛꠃꠔ ꠝꠣꠘꠥꠡ ꠀꠁꠍꠂꠘ ꠖꠦꠈꠤꠀ ꠁꠍꠣ ꠉꠤꠀ ꠄꠇ ꠙꠣꠠꠞ ꠃꠙꠞꠦ ꠃꠑꠤꠟꠣ।
ꠃꠑꠤꠀ ꠛꠅꠀꠞ ꠛꠣꠖꠦ ꠔꠣꠘ ꠡꠣꠉꠞꠤꠖ ꠅꠇꠟ ꠇꠣꠘ꠆ꠖꠣꠔ ꠀꠁꠟꠣ।
২ ꠡꠣꠉꠞꠤꠖ ꠅꠇꠟꠞꠦ ꠖꠦꠈꠤꠀ ꠔꠣꠁꠘ ꠅꠃ ꠔꠣꠟꠤꠝ ꠖꠤꠟꠣ,
ꠇꠁꠟꠣ,
৩ “ꠘꠦꠇ-ꠇꠙꠣꠟꠤ ꠅꠃ ꠝꠣꠘꠥꠡꠃ,
ꠎꠣꠞꠣ ꠖꠤꠟ ꠕꠣꠇꠤ ꠘꠤꠎꠞꠦ ꠉꠞꠤꠛ ꠝꠘꠅ ꠇꠞꠦ,
ꠛꠦꠢꠦꠡ꠆ꠔꠤ ꠛꠣꠖꠡꠣꠁ ꠔ ꠔꠣꠞꠣꠃ ꠙꠣꠁꠛꠣ।
৪ ꠔꠣꠞꠣꠃ ꠇꠙꠣꠟꠤ,
ꠎꠣꠞꠣꠞ ꠝꠘꠅ ꠅꠈꠘ ꠖꠥꠈ ꠀꠍꠦ,
ꠔꠣꠞꠣꠃ ꠔ ꠡꠥꠈ ꠙꠣꠁꠛꠣ।
৫ ꠔꠣꠞꠣꠃ ꠇꠙꠣꠟꠤ,
ꠎꠣꠞꠣꠞ ꠌꠣꠟ-ꠌꠟꠘ ꠘꠞꠝ,
ꠁ ꠖꠥꠘꠤꠀ ꠔ ꠔꠣꠞꠣꠞꠃ ꠅꠁꠛ।
৬ ꠔꠣꠞꠣꠃ ꠇꠙꠣꠟꠤ,
ꠎꠦꠞꠣ ꠖꠤꠟꠦ-ꠎꠣꠘꠦ ꠙꠣꠇ-ꠙꠞꠦꠎꠉꠣꠞꠤꠞ ꠟꠣꠉꠤ ꠇꠣꠘ꠆ꠖꠦ,
ꠔꠣꠞꠣꠞ ꠅꠃ ꠀꠡꠣ ꠙꠥꠞꠣ ꠅꠁꠛ।
৭ ꠔꠣꠞꠣꠃ ꠇꠙꠣꠟꠤ,
ꠎꠣꠞꠣ ꠝꠣꠘꠡꠞꠦ ꠖꠄꠀ ꠇꠞꠦ,
ꠔꠣꠞꠣꠃ ꠔ ꠖꠄꠀ ꠙꠣꠁꠛꠣ।
৮ ꠔꠣꠞꠣꠃ ꠇꠙꠣꠟꠤ,
ꠎꠣꠞꠣꠞ ꠖꠤꠟ ꠈꠣꠐꠤ,
ꠇꠣꠞꠘ ꠔꠣꠞꠣꠃ ꠀꠟ꠆ꠟꠣꠞ ꠖꠤꠖꠣꠞ ꠙꠣꠁꠛꠣ।
৯ ꠔꠣꠞꠣꠃ ꠇꠙꠣꠟꠤ,
ꠎꠣꠞꠣ ꠝꠣꠘꠡꠞꠦ ꠡꠣꠘ꠆ꠔꠤꠄ ꠞꠣꠈꠣꠞ ꠟꠣꠉꠤ ꠝꠦꠘꠔ ꠇꠞꠦ,
ꠀꠟ꠆ꠟꠣꠄ ꠔꠣꠞꠣꠞꠦ ꠔꠣꠘ ꠀꠙꠘ ꠀꠅꠟꠣꠖ ꠇꠁꠀ ꠒꠣꠇꠤꠛꠣ।
১০ ꠔꠣꠞꠣꠃ ꠇꠙꠣꠟꠤ,
ꠎꠣꠞꠣ ꠀꠟ꠆ꠟꠣꠞ ꠢꠥꠇꠥꠝ ꠝꠣꠚꠤꠇ ꠌꠟꠣꠔ ꠉꠤꠀ
ꠎꠥꠟꠥꠝ-ꠝꠍꠤꠛꠔ ꠡꠁꠎ꠆ꠎ ꠇꠞꠦ,
ꠛꠦꠢꠦꠡ꠆ꠔꠤ ꠛꠣꠖꠡꠣꠁ ꠔ ꠔꠣꠞꠣꠃ ꠙꠣꠁꠛꠣ।
১১ “ꠀꠞ ꠔꠥꠝꠞꠣꠃ ꠇꠙꠣꠟꠤ,
ꠎꠣꠞꠣꠞꠦ ꠀꠝꠣꠞ ꠟꠣꠉꠤ ꠝꠣꠘꠡꠦ ꠊꠤꠘ꠆ꠘꠣꠄ,
ꠝꠣꠘꠡꠦ ꠔꠥꠝꠞꠣꠞꠦ ꠎꠥꠟꠥꠝ ꠇꠞꠦ ꠀꠞ ꠘꠣꠘꠣꠘ ꠘꠝꠥꠘꠣꠞ ꠝꠤꠍꠣ ꠛꠖꠘꠣꠝ ꠉꠣꠄ।
১২ ꠁꠟꠣ ꠅꠁꠟꠦ ꠝꠘꠅ ꠞꠣꠈꠤꠅ,
ꠔꠥꠝꠞꠣꠞ ꠀꠉꠦ ꠎꠦ ꠘꠛꠤ ꠅꠇꠟ ꠀꠁꠍꠟꠣ,
ꠁꠔꠣ ꠝꠣꠘꠡꠦ ꠅꠃ ꠘꠛꠤꠞ ꠃꠙꠞꠦꠅ ꠅꠟꠣ ꠎꠥꠟꠥꠝ ꠇꠞꠔꠣ।
ꠔꠦ ꠔꠥꠝꠞꠣ ꠈꠥꠡꠤ-ꠛꠣꠡꠤ ꠀꠞ ꠚꠥꠞ꠆ꠔꠤ ꠇꠞꠤꠅ,
ꠇꠣꠞꠘ ꠔꠥꠝꠞꠣꠅ ꠅꠃ ꠘꠛꠤ ꠅꠇꠟꠞ ꠟꠣꠈꠣꠘ ꠛꠦꠢꠦꠡ꠆ꠔꠅ ꠛꠃꠔ ꠛꠠ ꠙꠥꠞꠥꠡ꠆ꠇꠣꠞ ꠙꠣꠁꠛꠣꠄ।
ꠝꠥꠝꠤꠘ ꠅꠇꠟ ꠖꠥꠘꠤꠀꠞ ꠛꠣꠔ꠆ꠔꠤ ꠀꠞ ꠘꠥꠘ
১৩ “ꠔꠥꠝꠞꠣ ꠅꠁꠟꠣꠄ ꠖꠥꠘꠤꠀꠞ ꠘꠥꠘ,
ꠅꠁꠟꠦ ꠘꠥꠘꠞ ꠉꠥꠘ ꠎꠥꠖꠤ ꠘꠡ꠆ꠐ ꠅꠁꠎꠣꠄ,
ꠔꠦ ꠀꠞ ꠘꠥꠘꠔꠣ ꠇꠞꠣ ꠎꠣꠄ ꠘꠤ?
ꠁ ꠘꠥꠘ ꠔ ꠀꠞ ꠇꠥꠘꠥ ꠇꠣꠝꠅ ꠟꠣꠉꠦ ꠘꠣ।
ꠝꠣꠘꠡꠦ ꠁꠔꠣ ꠛꠣꠞꠦ ꠚꠣꠟꠣꠁ ꠖꠦꠁꠘ ꠀꠞ ꠁꠔꠣꠞ ꠃꠙꠞꠦꠖꠤ ꠀꠐꠂꠘ।
১৪ “ꠢꠥꠘꠅ,
ꠔꠥꠝꠞꠣ ꠅꠁꠟꠣꠄ ꠖꠥꠘꠤꠀꠞ ꠛꠣꠔ꠆ꠔꠤ।
ꠙꠣꠠꠞ ꠃꠙꠞꠞ ꠇꠥꠘꠥ ꠐꠣꠃꠘ ꠔ ꠟꠥꠇꠣꠁꠟ ꠞꠣꠈꠣ ꠎꠣꠄ ꠘꠣ।
১৫ ꠀꠞ ꠇꠥꠘꠥ ꠝꠣꠘꠡꠦ ꠟꠦꠝ ꠎꠣꠟꠣꠁꠀ ꠐꠥꠇꠞꠤꠞ ꠔꠟꠦ ꠕꠄ ꠘꠣ,
ꠁꠇꠐꠣ ꠟꠦꠝ-ꠖꠣꠘꠤꠞ ꠃꠙꠞꠦꠃ ꠕꠄ,
ꠎꠣꠔꠦ ꠊꠞꠞ ꠢꠇꠟꠦ ꠚꠞ ꠖꠦꠈꠂꠘ।
১৬ ꠅꠃ ꠟꠣꠈꠣꠘ ꠔꠥꠝꠞꠣꠞ ꠚꠞꠅ ꠝꠣꠘꠡꠞ ꠍꠣꠝꠘꠦ ꠎꠟꠃꠇ,
ꠎꠣꠔꠦ ꠔꠥꠝꠞꠣꠞ ꠜꠣꠟꠣ ꠇꠣꠝ ꠖꠦꠈꠤꠀ ꠝꠣꠘꠡꠦ ꠔꠥꠝꠞꠣꠞ ꠛꠦꠢꠦꠡ꠆ꠔꠤ ꠛꠣꠚ,
ꠀꠟ꠆ꠟꠣ ꠙꠣꠇꠞ ꠔꠣꠞꠤꠚ ꠇꠞꠂꠘ।
ꠡꠞꠤꠅꠔꠞ ꠛꠦꠙꠣꠞꠦ ꠔꠣꠟꠤꠝ
১৭ “ꠔꠥꠝꠞꠣ ꠁꠈꠣꠘ ꠝꠘꠅ ꠇꠞꠤꠅ ꠘꠣ,
ꠀꠝꠤ ꠔꠃꠞꠣꠔ ꠇꠤꠔꠣꠛ ꠀꠞ ꠘꠛꠤ ꠅꠇꠟꠞ ꠍꠢꠤꠚꠣ ꠛꠣꠔꠤꠟ ꠇꠞꠣꠔ ꠀꠁꠍꠤ।
ꠀꠝꠤ ꠔ ꠁꠔꠣ ꠛꠣꠔꠤꠟ ꠇꠞꠣꠔ ꠘꠣꠄ,
ꠛꠞꠋ ꠙꠥꠞꠣ ꠇꠞꠣꠔ ꠀꠁꠍꠤ।
১৮ ꠀꠝꠤ ꠢꠣꠍꠣ ꠇꠕꠣ ꠇꠁꠞꠣꠝ,
ꠔꠃꠞꠣꠔ ꠇꠤꠔꠣꠛꠞ ꠢꠇꠟ ꠇꠕꠣ ꠎꠔꠖꠤꠘ ꠘꠣ ꠚꠟꠤꠍꠦ,
ꠅꠔ ꠖꠤꠘ ꠁ ꠇꠤꠔꠣꠛꠞ ꠄꠇꠐꠣ ꠢꠞꠚ ꠛꠣ ꠎꠦꠞ-ꠎꠛꠞꠅ ꠛꠣꠔꠤꠟ ꠅꠁꠔ ꠘꠣꠄ।
ꠀꠍꠝꠣꠘ-ꠎꠝꠤꠘ ꠇ꠆ꠇꠄ ꠘꠣ ꠅꠀ ꠙꠞ꠆ꠎꠘ꠆ꠔ,
ꠁꠈꠣꠘ ꠛꠣꠔꠤꠟ ꠅꠁꠔ ꠘꠣꠄ।
১৯ ꠔꠃꠞꠣꠔ ꠇꠤꠔꠣꠛꠞ ꠇꠥꠘꠥ ꠢꠥꠞꠥ-ꠝꠥꠞꠥ ꠢꠥꠇꠥꠝꠅ ꠎꠥꠖꠤ ꠇꠦꠃ ꠘꠣ ꠝꠣꠘꠦ,
ꠛꠣ ꠁ ꠢꠥꠇꠥꠝ ꠘꠣ ꠝꠣꠘꠣꠞ ꠟꠣꠉꠤ ꠝꠣꠘꠡꠞꠦ ꠙꠞꠣꠝꠤꠡ ꠖꠦꠄ,
ꠔꠦ ꠛꠦꠢꠦꠡ꠆ꠔꠤ ꠛꠣꠖꠡꠣꠁꠔ ꠔꠣꠞꠦꠅ ꠢꠇꠟ ꠕꠣꠇꠤ ꠢꠥꠞꠥ ꠇꠅꠀ ꠅꠁꠛ।
ꠅꠁꠟꠦ ꠎꠦ ꠎꠘꠦ ꠁ ꠢꠥꠇꠥꠝ-ꠀꠢꠇꠣꠝ ꠀꠝꠟ ꠇꠞꠦ ꠀꠞ ꠝꠣꠘꠡꠞꠦꠅ ꠢꠤꠇꠣꠄ,
ꠛꠦꠢꠦꠡ꠆ꠔꠤ ꠛꠣꠖꠡꠣꠁꠔ ꠔꠣꠞꠦ ꠛꠃꠔ ꠖꠣꠝ ꠖꠦꠅꠀ ꠅꠁꠛ।
২০ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ,
ꠀꠟꠤꠝ-ꠃꠟꠣꠝꠣ ꠀꠞ ꠚꠞꠤꠡꠤ ꠅꠇꠟꠞ ꠀꠝꠟ ꠕꠣꠇꠤꠅ,
ꠔꠥꠝꠞꠣꠞ ꠀꠝꠟ ꠎꠥꠖꠤ ꠀꠞꠅ ꠜꠣꠟꠣ ꠘꠣ ꠅꠄ,
ꠔꠦ ꠇꠥꠘꠥꠝꠘ꠆ꠔꠦꠃ ꠛꠦꠢꠦꠡ꠆ꠔꠤ ꠛꠣꠖꠡꠣꠁꠔ ꠢꠣꠝꠣꠁꠔꠣꠄ ꠙꠣꠞꠔꠣꠄ ꠘꠣꠄ।
ꠞꠣꠉ-ꠉꠥꠍꠣꠞ ꠛꠦꠙꠣꠞꠦ ꠢꠥꠡꠤꠀꠞꠤ
২১ “ꠔꠥꠝꠞꠣ ꠢꠥꠘꠍ,
ꠀꠉꠞ ꠀꠝꠟꠞ ꠝꠣꠘꠡꠞ ꠉꠦꠍꠦ ꠇꠅꠀ ꠅꠁꠍꠦ,
‘ꠈꠥꠘ ꠇꠞꠤꠅ ꠘꠣ,
ꠎꠦꠉꠤꠄ ꠈꠥꠘ ꠇꠞꠛ,
ꠢꠦ ꠁ ꠈꠥꠘꠞ ꠖꠣꠠꠅ ꠙꠠꠛ।’
২২ ꠅꠁꠟꠦ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ,
ꠎꠦ ꠝꠣꠘꠡꠦ ꠔꠣꠞ ꠜꠣꠁ-ꠛꠤꠞꠣꠖꠞꠞ ꠟꠉꠦ ꠞꠣꠉ-ꠉꠥꠍꠣ ꠇꠞꠦ,
ꠢꠦ ꠛꠤꠌꠣꠞꠞ ꠖꠣꠠꠅ ꠙꠠꠛ।
ꠢꠦ ꠎꠥꠖꠤ ꠔꠣꠞ ꠜꠣꠁꠞꠦ ꠇꠄ,
‘ꠔꠥꠝꠤ ꠔ ꠛꠦꠀꠈꠟ’ ꠔꠦ ꠀꠞꠅ ꠛꠠ ꠛꠤꠌꠣꠞꠞ ꠖꠣꠠꠅ ꠙꠠꠛ।
ꠀꠞ ꠎꠦ ꠎꠘꠦ ꠔꠣꠞ ꠜꠣꠁꠞꠦ ꠇꠄ,
‘ꠔꠥꠝꠤ ꠛꠦꠅꠇꠥꠚ,’
ꠢꠦ ꠖꠥꠎꠈꠞ ꠀꠉꠥꠁꠘꠅ ꠎꠟꠛ।
২৩ “ꠄꠞꠖꠣꠄ ꠇꠥꠞꠛꠣꠘꠤ ꠈꠣꠘꠣꠔ ꠉꠤꠀ ꠀꠟ꠆ꠟꠣꠞ ꠘꠣꠝꠦ ꠟꠤꠟ꠆ꠟꠣ-ꠍꠖꠉꠣ ꠖꠤꠛꠣꠞ ꠡꠝꠄ ꠎꠥꠖꠤ ꠔꠥꠝꠣꠞ ꠝꠘꠅ ꠅꠁꠎꠣꠄ,
ꠔꠥꠝꠣꠞ ꠟꠉꠦ ꠔꠥꠝꠣꠞ ꠇꠥꠘꠥ ꠜꠣꠁꠞ ꠛꠤꠛꠣꠖ ꠀꠍꠦ,
২৪ ꠔꠦ ꠔꠥꠝꠣꠞ ꠟꠤꠟ꠆ꠟꠣ-ꠍꠖꠉꠣ ꠅꠃ ꠎꠣꠉꠣꠔ ꠕꠁꠀ,
ꠀꠉꠦ ꠉꠤꠀ ꠔꠥꠝꠣꠞ ꠜꠣꠁꠞ ꠟꠉꠦ ꠝꠤꠐ-ꠝꠣꠐ ꠇꠞꠅ,
ꠛꠣꠖꠦ ꠉꠤꠀ ꠔꠥꠝꠣꠞ ꠇꠥꠞꠛꠣꠘꠤ ꠖꠦꠅ।
২৫ “ꠇꠦꠃ ꠔꠥꠝꠣꠞ ꠛꠤꠞꠥꠖ꠆ꠖꠦ ꠇꠥꠘꠥ ꠝꠣꠝꠟꠣ ꠇꠞꠟꠦ ꠀꠖꠣꠟꠔꠅ ꠎꠣꠅꠀꠞ ꠀꠉꠦꠃ ꠔꠣꠞ ꠟꠉꠦ ꠎꠟꠖꠤ ꠝꠤꠐ-ꠝꠣꠐ ꠇꠞꠤꠟꠤꠅ।
ꠁꠟꠣ ꠘꠣ ꠇꠞꠟꠦ,
ꠢꠦ ꠔꠥꠝꠣꠞꠦ ꠢꠣꠇꠤꠝꠞ ꠀꠔꠅ ꠖꠤꠛ,
ꠢꠣꠇꠤꠝꠦ ꠔꠥꠝꠣꠞꠦ ꠙꠥꠟꠤꠡꠞ ꠢꠣꠅꠟꠣ ꠇꠞꠛꠣ,
ꠀꠞ ꠙꠥꠟꠤꠡꠦ ꠔꠥꠝꠣꠞꠦ ꠎꠦꠟꠅ ꠢꠣꠞꠣꠁꠛꠣ।
২৬ ꠢꠦꠡꠦ ꠔꠣꠞ ꠡꠥꠟ꠆ꠟꠀꠘꠣ ꠙꠣꠅꠘꠣ ꠀꠖꠣꠄ ꠘꠣ ꠇꠞꠣ ꠙꠞ꠆ꠎꠘ꠆ꠔ,
ꠔꠥꠝꠤ ꠇꠥꠘꠥꠝꠘ꠆ꠔꠦꠃ ꠍꠣꠠꠣ ꠙꠣꠁꠔꠣꠄ ꠘꠣꠄ।
ꠀꠝꠤ ꠔꠥꠝꠞꠣꠞꠦ ꠀꠍꠟ ꠇꠕꠣ ꠇꠁꠟꠣꠝ।
ꠎꠤꠘꠣ ꠀꠞ ꠇꠍꠝꠞ ꠛꠦꠙꠣꠞꠦ ꠢꠥꠡꠤꠀꠞꠤ
২৭ “ꠔꠥꠝꠞꠣ ꠢꠥꠘꠍ,
ꠀꠉꠦ ꠛꠣꠔꠣꠁꠟ ꠅꠁꠍꠦ,
‘ꠎꠤꠘꠣ ꠇꠞꠤꠅ ꠘꠣ।’
২৮ ꠅꠁꠟꠦ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ,
ꠇꠥꠘꠥ ꠛꠦꠐꠣꠄ ꠎꠥꠖꠤ ꠇꠥꠘꠥ ꠛꠦꠐꠤ ꠝꠣꠘꠡꠞ ꠛꠣꠄ ꠇꠥ-ꠘꠎꠞꠦ ꠌꠣꠄ,
ꠔꠦ ꠢꠦ ꠅꠃ ꠡꠝꠄ ꠝꠘꠦ ꠝꠘꠦ ꠔꠣꠁꠞ ꠟꠉꠦ ꠎꠤꠘꠣ ꠇꠞꠟ।
২৯ “ꠔꠥꠝꠣꠞ ꠒꠣꠁꠘ ꠌꠃꠈꠦ ꠎꠥꠖꠤ ꠔꠥꠝꠣꠞꠦ ꠉꠥꠘꠣꠞ ꠙꠕꠦ ꠐꠣꠘꠦ,
ꠔꠦ ꠁ ꠌꠃꠈ ꠔꠥꠟꠤꠀ ꠚꠣꠟꠣꠁ ꠖꠦꠅ।
ꠀꠡ꠆ꠔꠣ ꠡꠞꠤꠟ ꠟꠁꠀ ꠖꠥꠎꠈꠅ ꠎꠣꠅꠀ ꠕꠣꠇꠤ,
ꠄꠇꠐꠣ ꠅꠋꠉ ꠛꠤꠘꠣꠡ ꠇꠞꠤꠟꠣꠅꠀ ꠔꠥꠝꠣꠞ ꠟꠣꠉꠤ ꠜꠣꠟꠣ।
৩০ ꠔꠥꠝꠣꠞ ꠒꠣꠁꠘ ꠀꠔꠦ ꠎꠥꠖꠤ ꠔꠥꠝꠣꠞꠦ ꠉꠥꠘꠣꠞ ꠙꠕꠦ ꠐꠣꠘꠦ,
ꠁ ꠀꠔ ꠇꠣꠐꠤꠀ ꠚꠣꠟꠣꠁ ꠖꠦꠅ।
ꠀꠡ꠆ꠔꠣ ꠡꠞꠤꠟ ꠟꠁꠀ ꠖꠥꠎꠈꠅ ꠎꠣꠅꠀ ꠕꠣꠇꠤ,
ꠄꠇꠐꠣ ꠅꠋꠉ ꠛꠤꠘꠣꠡ ꠇꠞꠤꠟꠣꠅꠀ ꠔꠥꠝꠣꠞ ꠟꠣꠉꠤ ꠜꠣꠟꠣ।
৩১ “ꠀꠞꠅ ꠇꠅꠀ ꠅꠁꠍꠦ,
‘ꠎꠦ ꠝꠣꠘꠡꠦ ꠔꠣꠞ ꠛꠃꠞꠦ ꠔꠣꠟꠣꠇ ꠖꠦꠄ,
ꠢꠦ ꠛꠃꠞꠦ ꠔꠣꠟꠣꠇ ꠘꠣꠝꠣ ꠖꠦꠃꠇ।’
৩২ ꠅꠁꠟꠦ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ,
ꠎꠦ ꠝꠣꠘꠡꠦ ꠎꠤꠘꠣ ꠍꠣꠠꠣ ꠅꠁꠘ꠆ꠘ ꠇꠥꠘꠥ ꠇꠣꠞꠘꠦ ꠘꠤꠎꠞ ꠛꠃꠞꠦ ꠔꠣꠟꠣꠇ ꠖꠦꠄ,
ꠢꠦ ꠔ ꠔꠣꠞ ꠛꠃꠞꠦ ꠎꠤꠘꠣꠇꠥꠞ ꠛꠣꠘꠣꠄ।
ꠀꠞ ꠔꠣꠟꠣꠇ ꠙꠣꠅꠀ ꠛꠦꠐꠤꠞꠦ ꠎꠦꠉꠤꠄ ꠛꠤꠀ ꠇꠞꠦ,
ꠢꠦ-ꠅ ꠎꠤꠘꠣꠇꠥꠞ ꠛꠘꠦ।
৩৩ “ꠔꠥꠝꠞꠣ ꠔ ꠎꠣꠘꠅ,
ꠀꠉꠞ ꠎꠝꠣꠘꠣꠞ ꠝꠣꠘꠡꠞ ꠉꠦꠍꠦ ꠛꠣꠔꠣꠁꠟ ꠅꠁꠍꠦ,
‘ꠝꠤꠍꠣ ꠇꠥꠘꠥ ꠇꠍꠝ ꠇꠞꠤꠅ ꠘꠣ,
ꠀꠞ ꠎꠦꠇꠥꠘꠥ ꠇꠍꠝ ꠇꠞꠟꠦ ꠁꠐꠣ ꠀꠟ꠆ꠟꠣꠞ ꠘꠣꠝꠦ ꠀꠖꠣꠄ ꠇꠞꠤꠅ।’
৩৪ ꠅꠁꠟꠦ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ,
ꠇꠥꠘꠥꠎꠣꠔ ꠇꠍꠝ ꠇꠞꠤꠅ ꠘꠣ।
ꠛꠦꠢꠦꠡ꠆ꠔꠞ ꠘꠣꠝꠦ ꠇꠍꠝ ꠇꠞꠤꠅ ꠘꠣ,
ꠁꠈꠣꠘ ꠔ ꠀꠟ꠆ꠟꠣꠞ ꠀꠞꠡ।
৩৫ ꠖꠥꠘꠤꠀꠞ ꠘꠣꠝꠦ ꠇꠞꠤꠅ ꠘꠣ,
ꠁꠈꠣꠘ ꠔ ꠀꠟ꠆ꠟꠣꠞ ꠇꠖꠝ ꠝꠥꠛꠣꠞꠇ ꠕꠅꠀꠞ ꠎꠣꠉꠣ।
ꠎꠦꠞꠥꠎꠣꠟꠦꠝꠞ ꠘꠣꠝꠦꠅ ꠇꠍꠝ ꠇꠞꠤꠅ ꠘꠣ,
ꠁꠈꠣꠘ ꠅꠁꠟ ꠝꠢꠣꠘ ꠛꠣꠖꠡꠣ ꠀꠟ꠆ꠟꠣꠞ ꠐꠣꠃꠘ।
৩৬ ꠔꠥꠝꠣꠞ ꠘꠤꠎꠞ ꠝꠣꠕꠣꠞ ꠘꠣꠝꠦ ꠇꠍꠝ ꠇꠞꠤꠅ ꠘꠣ,
ꠁ ꠝꠣꠕꠣꠞ ꠄꠇꠍꠣ ꠌꠥꠟꠞꠦ ꠗꠟꠣ ꠛꠣ ꠇꠣꠟꠣ ꠇꠞꠣꠞ ꠈꠦꠝꠔꠣ ꠔ ꠔꠥꠝꠣꠞ ꠘꠣꠁ।
৩৭ ꠔꠥꠝꠞꠣꠞ ꠝꠣꠔꠞ ꠅꠄ ꠈꠣꠘ ꠅꠄ,
ꠀꠞ ꠘꠣ ꠈꠣꠘ ꠘꠣ ꠅꠃꠇ।
ꠢꠥꠘꠅ,
ꠁꠔꠣꠞ ꠛꠣꠞꠦ ꠀꠞ ꠎꠔꠔꠣꠃ ꠅꠄ,
ꠁꠔꠣ ꠁꠛꠟꠤꠍ ꠕꠣꠇꠤ ꠀꠄ।
ꠛꠖꠟꠣ ꠟꠅꠀꠞ ꠛꠦꠙꠣꠞꠦ ꠔꠣꠟꠤꠝ
৩৮ “ꠔꠥꠝꠞꠣ ꠔ ꠢꠥꠘꠍ,
ꠀꠉꠦ ꠛꠣꠔꠣꠁꠟ ꠅꠁꠍꠦ,
ꠎꠦ ꠙꠞꠤꠝꠣꠘꠦ ꠈꠦꠔꠤ ꠅꠁꠍꠦ,
ꠅꠃ ꠙꠞꠤꠝꠣꠘꠦ ꠡꠣꠎꠣ ꠖꠤꠅ,
‘ꠌꠃꠈꠞ ꠛꠖꠟꠣ ꠌꠃꠈ ꠀꠞ ꠖꠣꠔꠞ ꠛꠖꠟꠣ ꠖꠣꠔ।’
৩৯ ꠅꠁꠟꠦ ꠀꠝꠤ ꠇꠁꠞꠣꠝ,
ꠇꠦꠃ ꠎꠥꠖꠤ ꠔꠥꠝꠞꠣꠞ ꠟꠉꠦ ꠈꠣꠞꠣꠙ ꠛꠦꠛꠢꠣꠞ ꠇꠞꠦ,
ꠔꠦ ꠔꠥꠝꠞꠣ ꠄꠞ ꠛꠖꠟꠣ ꠟꠁꠅ ꠘꠣ,
ꠛꠞꠋ ꠇꠥꠘꠥ ꠝꠣꠘꠡꠦ ꠔꠥꠝꠣꠞ ꠒꠣꠁꠘ ꠉꠣꠟꠅ ꠌꠠ ꠝꠣꠞꠟꠦ,
ꠔꠣꠞꠦ ꠛꠣꠃ ꠉꠣꠟꠅ ꠙꠣꠔꠤꠀ ꠖꠤꠟꠣꠁꠅ।
৪০ ꠇꠦꠃ ꠎꠥꠖꠤ ꠝꠣꠝꠟꠣ-ꠝꠇꠖ꠆ꠖꠝꠣ ꠇꠞꠤꠀ ꠔꠥꠝꠣꠞ ꠇꠥꠞ꠆ꠔꠣ ꠘꠤꠔꠉꠤ ꠌꠣꠄ,
ꠔꠦ ꠔꠥꠝꠣꠞ ꠌꠣꠖ꠆ꠖꠞꠅ ꠖꠤꠟꠣꠁꠅ।
৪১ ꠇꠦꠃ ꠎꠥꠖꠤ ꠔꠥꠝꠣꠞꠦ ꠇꠄ,
ꠔꠣꠞ ꠉꠣꠁꠐ ꠛꠁꠀ ꠟꠁꠀ ꠄꠇ ꠝꠣꠁꠟ ꠎꠣꠁꠔꠣꠄ,
ꠔꠦ ꠔꠥꠝꠤ ꠔꠣꠞ ꠟꠉꠦ ꠖꠥꠁ ꠝꠣꠁꠟ ꠎꠣꠁꠅꠉꠤ।
৪২ ꠇꠦꠃ ꠔꠥꠝꠣꠞ ꠉꠦꠍꠦ ꠇꠥꠘ꠆ꠔꠣ ꠈꠥꠎꠤꠟꠦ ꠔꠣꠞꠦ ꠖꠤꠅ।
ꠇꠦꠃ ꠀꠅꠟꠣꠔ ꠌꠣꠁꠟꠦ,
ꠔꠣꠞꠦ ꠚꠤꠞꠣꠁ ꠖꠤꠅ ꠘꠣ।
ꠖꠥꠡꠝꠘꠞꠦ ꠝꠢꠛ꠆ꠛꠔ ꠇꠞꠅ
৪৩ “ꠔꠥꠝꠞꠣ ꠎꠣꠘꠅ,
ꠀꠉꠦ ꠔ ꠛꠣꠔꠣꠁꠟ ꠅꠁꠍꠤꠟ,
‘ꠔꠥꠝꠣꠞ ꠀꠞꠤ-ꠚꠞꠤꠞꠦ ꠝꠣꠄꠀ ꠇꠞꠤꠅ ꠀꠞ ꠖꠥꠡꠝꠘꠞꠦ ꠊꠤꠘ꠆ꠘꠣꠁꠅ।’
৪৪ ꠅꠁꠟꠦ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ,
ꠔꠥꠝꠞꠣꠞ ꠖꠥꠡꠝꠘꠞꠦꠅ ꠝꠣꠄꠀ ꠇꠞꠤꠅ।
ꠎꠦꠞꠣ ꠔꠥꠝꠞꠣꠞꠦ ꠎꠥꠟꠥꠝ ꠇꠞꠦ,
ꠔꠣꠞꠣꠞ ꠟꠣꠉꠤ ꠖꠥꠀ ꠇꠞꠤꠅ।
৪৫ ꠁꠔꠣ ꠖꠦꠈꠤꠀ ꠝꠣꠘꠡꠦ ꠛꠥꠎꠛꠣ,
ꠔꠥꠝꠞꠣ ꠢꠣꠍꠣꠃ ꠔꠥꠝꠞꠣꠞ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣ ꠙꠣꠇꠞ ꠝꠣꠄꠀꠞ ꠀꠅꠟꠣꠖ ꠛꠘꠤꠉꠦꠍ।
ꠔꠣꠁꠘ ꠔ ꠜꠣꠟꠣ-ꠛꠥꠞꠣ ꠢꠇꠟꠞ ꠃꠙꠞꠦ ꠔꠣꠘ ꠡꠥꠞꠥꠎ ꠃꠑꠣꠁꠘ,
ꠖꠤꠘꠖꠣꠞ ꠀꠞ ꠘꠣꠚꠞꠝꠣꠘ ꠢꠇꠟꠞ ꠃꠙꠞꠦꠃ ꠝꠦꠊ-ꠙꠣꠘꠤ ꠖꠦꠁꠘ।
৪৬ ꠎꠣꠞꠣ ꠔꠥꠝꠞꠣꠞꠦ ꠝꠢꠛ꠆ꠛꠔ ꠇꠞꠦ,
ꠔꠥꠝꠞꠣ ꠎꠥꠖꠤ ꠈꠣꠟꠤ ꠔꠣꠞꠣꠞꠦꠃ ꠝꠢꠛ꠆ꠛꠔ ꠇꠞꠅ,
ꠔꠦ ꠔꠥꠝꠞꠣ ꠇꠤꠔꠣ ꠙꠥꠞꠥꠡ꠆ꠇꠣꠞ ꠙꠣꠁꠛꠣꠄ?
ꠊꠥꠡꠈꠥꠞ ꠔꠡꠤꠟꠖꠣꠞ ꠅꠇꠟꠦꠅ ꠁꠟꠣ ꠇꠞꠦ ꠘꠣ ꠘꠤ?
৪৭ ꠔꠥꠝꠞꠣ ꠎꠥꠖꠤ ꠈꠣꠟꠤ ꠘꠤꠎꠞ ꠜꠣꠁꠞꠦ ꠍꠣꠟꠣꠝ ꠖꠦꠅ,
ꠔꠦ ꠅꠁꠘ꠆ꠘ ꠝꠣꠘꠥꠡ ꠕꠣꠇꠤ ꠛꠦꠡꠤ ꠀꠞ ꠇꠤꠔꠣ ꠇꠞꠞꠣꠄ?
ꠛꠤꠗꠞ꠆ꠝꠤ ꠅꠇꠟꠦꠅ ꠁꠟꠣ ꠇꠞꠂꠘ ꠘꠣ ꠘꠤ?
৪৮ ꠄꠞꠟꠣꠉꠤ ꠀꠝꠤ ꠇꠁꠞꠣꠝ,
ꠔꠥꠝꠞꠣꠞ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣ ꠙꠣꠇ ꠎꠦꠟꠣ ꠈꠣꠐꠤ,
ꠔꠥꠝꠞꠣꠅ ꠅꠟꠣ ꠈꠣꠐꠤ ꠅꠅ।