ꠀꠋꠉꠥꠞ ꠛꠣꠉꠣꠘꠞ ꠉꠤꠞꠡ꠆ꠔꠞ ꠇꠤꠌ꠆ꠍꠣ
২০
১ ꠢꠎꠞꠔ ꠁꠍꠣꠄ ꠀꠞꠅ ꠇꠁꠟꠣ,
“ꠛꠦꠢꠦꠡ꠆ꠔꠤ ꠛꠣꠖꠡꠣꠁ ꠔ ꠅꠟꠣ ꠄꠇ ꠉꠤꠞꠡ꠆ꠔꠞ ꠟꠣꠈꠣꠘ।
ꠁ ꠉꠤꠞꠡ꠆ꠔꠦ ꠔꠣꠘ ꠈꠦꠔꠞ ꠇꠣꠝꠞ ꠟꠣꠉꠤ ꠈꠥꠛ ꠛꠤꠀꠘꠦ ꠃꠑꠤꠀ ꠇꠣꠝꠟꠣ ꠔꠥꠇꠣꠘꠤꠔ ꠉꠦꠟꠣ।
২ ꠉꠤꠀ ꠇꠣꠝꠟꠣ ꠌꠣꠁꠀ ꠔꠣꠞꠣꠞꠦ ꠄꠇ-ꠡ ꠐꠦꠇꠣ ꠞꠥꠎ ꠚꠥꠞꠣꠁꠀ ꠔꠣꠘ ꠀꠋꠉꠥꠞ ꠛꠣꠉꠣꠘꠅ ꠇꠣꠝꠅ ꠟꠣꠉꠣꠁꠟꠣ।
৩ ꠇꠤꠍꠥ ꠛꠦꠁꠟ ꠅꠁꠀ ꠢꠣꠞꠟꠦ ꠔꠣꠁꠘ ꠢꠤꠞꠛꠣꠞ ꠛꠣꠞꠅꠁꠟꠣ,
ꠛꠣꠞꠅꠁꠀ ꠖꠦꠈꠟꠣ ꠀꠞꠅ ꠇꠄꠎꠘ ꠇꠣꠝꠟꠣ ꠛꠦꠇꠣꠞ ꠃꠛꠣꠁ ꠞꠁꠍꠂꠘ।
৪ ꠖꠦꠈꠤꠀ ꠇꠁꠟꠣ,
‘ꠔꠥꠝꠞꠣꠅ ꠉꠤꠀ ꠀꠝꠣꠞ ꠛꠣꠉꠣꠘꠅ ꠇꠣꠝꠅ ꠟꠣꠉꠅ,
ꠀꠝꠤ ꠔꠥꠝꠞꠣꠞꠦ ꠃꠌꠤꠔ ꠐꠦꠇꠣ ꠖꠤꠝꠥ।’
৫ ꠔꠦꠃ ꠔꠣꠞꠣ ꠉꠤꠀ ꠇꠣꠝꠅ ꠟꠣꠉꠟꠣ।
ꠅꠟꠣꠈꠣꠘ ꠛꠦꠁꠟ ꠖꠥꠁꠚꠞꠤ ꠛꠣꠟꠣ ꠀꠞ ꠎꠥꠢꠞꠞ ꠛꠣꠖꠦ ꠉꠤꠞꠡ꠆ꠔ ꠢꠤꠞꠛꠣꠞ ꠛꠣꠞꠅꠁꠀ ꠉꠤꠀ ꠀꠞꠅ ꠇꠣꠝꠟꠣꠁꠘ ꠀꠘꠤꠀ ꠇꠣꠝꠅ ꠟꠣꠉꠣꠁꠟꠣ।
৬ ꠢꠦꠡꠦ ꠛꠤꠀꠟꠤ ꠛꠣꠟꠣ ꠔꠣꠁꠘ ꠛꠣꠞꠦ ꠉꠤꠀ,
ꠀꠞꠅ ꠇꠣꠝꠟꠣꠁꠘ ꠃꠛꠣꠁ ꠞꠁꠍꠂꠘ ꠖꠦꠈꠤꠀ ꠇꠁꠟꠣ,
‘ꠔꠥꠝꠞꠣ ꠢꠣꠞꠣꠖꠤꠘ ꠗꠞꠤ ꠁꠘꠅ ꠃꠛꠣꠁ ꠞꠁꠍ ꠇꠦꠘꠦ?’
৭ ꠄꠞꠣ ꠇꠁꠟꠣ,
‘ꠍꠣꠛ,
ꠀꠝꠞꠣ ꠇꠥꠘꠥ ꠇꠣꠝ ꠙꠣꠁꠍꠤ ꠘꠣ।’
ꠉꠤꠞꠡ꠆ꠔꠦ ꠇꠁꠟꠣ,
‘ꠔꠥꠝꠞꠣꠅ ꠉꠤꠀ ꠀꠝꠣꠞ ꠛꠣꠉꠣꠘꠅ ꠇꠣꠝꠅ ꠟꠣꠉꠅ।’
৮ “ꠢꠣꠁꠘ꠆ꠎꠣꠛꠣꠟꠣ ꠉꠤꠞꠡ꠆ꠔꠦ ꠔꠣꠘ ꠘꠤꠎꠞ ꠌꠣꠇꠞꠞꠦ ꠇꠁꠟꠣ,
‘ꠅꠛꠣ,
ꠛꠣꠉꠣꠘꠞ ꠅꠃ ꠇꠣꠝꠟꠣꠁꠘ꠆ꠔꠞꠦ ꠀꠘꠤꠀ,
ꠡꠦꠡꠞ ꠎꠘ ꠕꠣꠇꠤ ꠙꠄꠟꠣ ꠎꠘ ꠙꠞ꠆ꠎꠘ꠆ꠔ ꠢꠇꠟꠞ ꠞꠥꠎ ꠖꠤꠟꠣꠅ।’
৯ ꠛꠤꠀꠟꠤ ꠛꠣꠟꠣ ꠎꠦꠞꠣ ꠇꠣꠝꠅ ꠟꠣꠉꠍꠤꠟ,
ꠔꠣꠞꠣ ꠄꠇ-ꠡ ꠇꠞꠤ ꠙꠣꠁꠟ।
১০ ꠁꠔꠣ ꠖꠦꠈꠤꠀ ꠙꠄꠟꠣ ꠎꠣꠞꠣ ꠇꠣꠝꠅ ꠟꠣꠉꠍꠤꠟ,
ꠔꠣꠞꠣ ꠝꠘꠅ ꠇꠞꠟ ꠔꠣꠞꠣ ꠀꠞꠅ ꠛꠦꠡꠤ ꠐꠦꠇꠣ ꠙꠣꠁꠛ,
ꠅꠁꠟꠦ ꠉꠤꠞꠡ꠆ꠔꠦ ꠄꠞꠣ ꠢꠇꠟꠞꠦ ꠄꠇ ꠢꠝꠣꠘ ꠞꠥꠎ ꠖꠤꠟꠣ।
১১ ꠄꠞꠖꠣꠄ ꠙꠄꠟꠣ ꠖꠟ ꠅꠃ ꠉꠤꠞꠡ꠆ꠔꠞ ꠃꠙꠞꠦ ꠛꠦꠎꠣꠞ ꠅꠁꠀ ꠇꠁꠟꠣ,
১২ ‘ꠀꠝꠞꠣ ꠢꠣꠞꠣ ꠖꠤꠘ ꠗꠞꠤ ꠞꠂꠖꠦ ꠎꠟꠤ-ꠙꠥꠠꠤ ꠇꠣꠝ ꠇꠞꠤꠀ ꠄꠇ-ꠡ ꠐꠦꠇꠣ ꠙꠣꠁꠟꠣꠝ।
ꠅꠁꠟꠦ ꠔꠣꠞꠣ ꠢꠦꠡꠦ ꠀꠁꠀ ꠕꠥꠠꠣ ꠡꠝꠄ ꠇꠣꠝ ꠇꠞꠣꠄꠅ,
ꠀꠙꠘꠦ ꠔꠣꠞꠣꠞꠦ ꠀꠝꠞꠣꠞ ꠢꠝꠣꠘ ꠐꠦꠇꠣ ꠖꠤꠟꠣ।’
১৩ “ꠔꠦꠃ ꠉꠤꠞꠡ꠆ꠔꠦ ꠔꠣꠞꠣꠞ ꠄꠇꠎꠘꠞꠦ ꠇꠁꠟꠣ,
‘ꠅꠛꠣ,
ꠀꠝꠤ ꠅꠁꠘ꠆ꠘꠣꠄ ꠇꠥꠘ꠆ꠔꠣ ꠇꠞꠍꠤ ꠘꠤ,
ꠔꠥꠝꠤ ꠘꠤꠎꠦꠃ ꠔ ꠄꠇ-ꠡ ꠐꠦꠇꠣꠄ ꠇꠣꠝ ꠇꠞꠔꠦ ꠞꠣꠎꠤ ꠅꠁꠍ ꠘꠣ ꠘꠤ?
১৪ ꠅꠈꠘ ꠔꠥꠝꠣꠞ ꠙꠣꠅꠘꠣ ꠟꠁꠀ ꠔꠥꠝꠤ ꠎꠣꠅ।
ꠀꠝꠤ ꠀꠝꠣꠞ ꠘꠤꠎꠞ ꠁꠌ꠆ꠍꠣꠄ ꠢꠇꠟꠞꠦ ꠄꠇ ꠢꠝꠣꠘ ꠖꠤꠍꠤ।
১৫ ꠀꠝꠣꠞ ꠘꠤꠎꠞ ꠍꠣꠝꠣꠘꠣ,
ꠘꠤꠎꠞ ꠁꠌ꠆ꠍꠣꠝꠔ ꠈꠞꠌ ꠇꠞꠣꠞ ꠅꠗꠤꠇꠣꠞ ꠘꠣꠁ ꠘꠤ?
ꠀꠝꠤ ꠔꠣꠞꠣꠞꠦ ꠖꠄꠀ ꠇꠞꠣꠄ ꠔꠥꠝꠣꠞ ꠌꠈꠥꠔ ꠎꠟꠦꠞ ꠘꠤ?’ ”
১৬ ꠅꠃ ꠇꠤꠌ꠆ꠍꠣ ꠢꠥꠘꠣꠘꠤꠞ ꠛꠣꠖꠦ ꠁꠍꠣꠄ ꠇꠁꠟꠣ,
“ꠛꠥꠎꠍ ꠘꠤ,
ꠎꠦꠞꠣ ꠈꠞꠞ ꠇꠣꠔꠣꠞꠅ ꠀꠍꠦ ꠔꠣꠞꠣ ꠀꠉꠦ ꠀꠁꠛ,
ꠀꠞ ꠀꠉꠞ ꠇꠣꠔꠣꠞꠞ ꠔꠣꠞꠣ ꠈꠞꠦ ꠎꠣꠁꠛ।”
ꠔꠤꠍꠞꠣ ꠛꠣꠞ ꠘꠤꠎꠞ ꠝꠃꠔꠞ ꠀꠉꠣꠝ ꠈꠛꠞ
১৭ ꠛꠣꠖꠦ ꠔꠣꠁꠘ ꠎꠦꠛꠟꠣ ꠎꠦꠞꠥꠎꠣꠟꠦꠝ ꠝꠥꠈꠣ ꠞꠅꠀꠘꠣ ꠅꠁꠎꠤꠔꠣ,
ꠅꠃ ꠡꠝꠄ ꠔꠣꠘ ꠛꠣꠞꠅꠎꠘ ꠍꠣꠢꠣꠛꠤꠞꠦ ꠀꠟꠉꠣ ꠢꠞꠣꠁꠀ ꠘꠤꠀ ꠇꠁꠟꠣ,
১৮ “ꠢꠥꠘꠅ,
ꠀꠝꠞꠣ ꠅꠈꠘ ꠎꠦꠞꠥꠎꠣꠟꠦꠝ ꠎꠣꠁꠞꠣꠝ।
ꠢꠘꠅ ꠀꠝꠤ ꠛꠤꠘ-ꠀꠖꠝꠞꠦ ꠗꠞꠤꠀ ꠛꠠ ꠁꠝꠣꠝ ꠀꠞ ꠝꠃꠟꠣꠘꠣ ꠅꠇꠟꠞ ꠀꠔꠅ ꠡꠙꠤ ꠖꠦꠅꠀ ꠅꠁꠛ।
ꠔꠣꠞꠣ ꠛꠤꠌꠣꠞ ꠇꠞꠤꠀ ꠇꠣꠔꠟ ꠇꠞꠣꠞ ꠞꠣꠄ ꠖꠤꠛꠣ।
১৯ ꠀꠝꠣꠞꠦ ꠜꠤꠘ-ꠖꠦꠡꠤ ꠅꠇꠟꠞ ꠀꠔꠅ ꠡꠝꠎꠣꠁꠛꠣ।
ꠔꠣꠞꠣ ꠀꠝꠣꠞꠦ ꠑꠣꠐ꠆ꠐꠣ-ꠝꠡꠇꠞꠣ ꠇꠞꠤꠀ,
ꠛꠦꠎꠥꠁꠔꠣ ꠌꠣꠛꠥꠇ ꠝꠣꠞꠤꠀ,
ꠟꠣꠇꠠꠤꠞ ꠍꠟꠤꠛꠅ ꠟꠐꠇꠣꠁꠀ ꠇꠣꠔꠟ ꠇꠞꠛꠣ।
ꠝꠃꠔꠞ ꠔꠤꠘ ꠖꠤꠘꠞ ꠖꠤꠘ ꠀꠝꠤ ꠢꠤꠞꠛꠣꠞ ꠎꠤꠘ꠆ꠖꠣ ꠅꠁꠀ ꠃꠑꠝꠥ।”
ꠝꠘꠔ꠆ꠞꠤ ꠅꠀꠞ ꠟꠣꠉꠤ ꠅꠘꠥꠞꠥꠗ
২০ ꠛꠣꠖꠦ ꠎꠤꠛꠥꠖꠤꠀꠞ ꠖꠥꠁꠅ ꠙꠥꠀꠞꠦ ꠟꠁꠀ ꠔꠣꠞꠣꠞ ꠝꠣʼꠄ ꠁꠍꠣꠞ ꠉꠦꠍꠦ ꠀꠁꠟꠣ।
ꠀꠁꠀ ꠇꠥꠘ꠆ꠔꠣ ꠌꠣꠅꠀꠞ ꠀꠡꠣꠄ ꠔꠣꠘ ꠙꠣꠅꠅ ꠙꠠꠟꠣ।
২১ ꠁꠍꠣꠄ ꠛꠦꠐꠤꠞꠦ ꠎꠤꠇꠣꠁꠟꠣ,
“ꠀꠙꠘꠦ ꠇꠤꠔꠣ ꠌꠣꠁꠘ?”
ꠛꠦꠐꠤꠄ ꠇꠁꠟꠣ,
“ꠢꠥꠎꠥꠞ,
ꠀꠝꠣꠞ ꠄꠉꠥ ꠙꠥꠀꠞꠦ ꠀꠙꠘꠣꠞ ꠞꠣꠎꠔ꠆ꠔꠞ ꠒꠣꠁꠘꠞ ꠉꠖꠤ,
ꠀꠞ ꠀꠞꠅꠉꠥꠞꠦ ꠛꠣꠃꠞ ꠉꠖꠤꠈꠣꠘꠅ ꠛꠁꠛꠣꠞ ꠡꠥꠎꠥꠉ ꠖꠤꠛꠣ ꠘꠤ?”
২২ ꠁꠍꠣꠄ ꠔꠣꠞꠣꠞꠦ ꠎꠥꠀꠙ ꠖꠤꠟꠣ,
“ꠔꠥꠝꠞꠣ ꠔ ꠛꠥꠎꠞꠣꠄ ꠘꠣ,
ꠔꠥꠝꠞꠣ ꠇꠤꠔꠣ ꠌꠣꠁꠞꠣꠄ।
ꠀꠝꠤ ꠎꠦ ꠖꠥꠈ-ꠝꠍꠤꠛꠔꠞ ꠙꠤꠀꠟꠣꠖꠤ ꠈꠣꠁꠝꠥ,
ꠁꠔꠣ ꠇꠥꠘꠥ ꠔꠥꠝꠞꠣ ꠈꠣꠁꠔꠣꠄ ꠙꠣꠞꠛꠣꠄ ꠘꠤ?”
ꠔꠣꠞꠣ ꠇꠁꠟꠣ,
“ꠎꠤꠅꠄ,
ꠙꠣꠞꠝꠥ।”
২৩ ꠔꠣꠁꠘ ꠇꠁꠟꠣ,
“ꠀꠁꠌ꠆ꠍꠣ,
ꠀꠝꠤ ꠎꠦ ꠙꠤꠀꠟꠣꠖꠤ ꠈꠣꠁꠝꠥ ꠔꠥꠝꠞꠣꠅ ꠅꠃ ꠙꠤꠀꠟꠣꠖꠤ ꠈꠣꠁꠛꠣꠄ,
ꠅꠁꠟꠦ ꠀꠝꠣꠞ ꠒꠣꠁꠘꠦ ꠛꠣ ꠛꠣꠃꠄ ꠛꠅꠀꠘꠤꠞ ꠄꠈꠔꠤꠀꠞ ꠔ ꠀꠝꠣꠞ ꠀꠔꠅ ꠘꠣꠄ।
ꠀꠝꠣꠞ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣꠄ ꠎꠣꠞꠣꠞ ꠟꠣꠉꠤ ꠁ ꠉꠖꠤ ꠑꠤꠇ ꠇꠞꠍꠂꠘ,
ꠈꠣꠟꠤ ꠔꠣꠞꠣꠃ ꠙꠣꠁꠛꠣ।”
২৪ ꠎꠤꠛꠥꠖꠤꠀꠞ ꠖꠥꠁꠅ ꠙꠥꠀꠞ ꠀꠞꠎꠤ ꠢꠥꠘꠤꠀ,
ꠛꠣꠇꠤ ꠖꠡꠅꠎꠘ ꠍꠣꠢꠣꠛꠤ ꠄꠞꠣꠞ ꠃꠙꠞꠦ ꠈꠥꠛ ꠛꠤꠞꠇ꠆ꠔ ꠅꠁꠟꠣ।
২৫ ꠔꠦꠃ ꠁꠍꠣꠄ ꠄꠞꠣ ꠢꠇꠟꠞꠦ ꠇꠣꠘ꠆ꠖꠣꠔ ꠀꠘꠤꠀ ꠇꠁꠟꠣ,
“ꠔꠥꠝꠞꠣ ꠔ ꠎꠣꠘꠅ,
ꠛꠤꠗꠞ꠆ꠝꠤ ꠎꠣꠔꠤꠞ ꠞꠣꠎꠣ ꠅꠇꠟ ꠔꠣꠞꠣꠞ ꠙ꠆ꠞꠎꠣꠞ ꠃꠙꠞꠦ ꠢꠥꠇꠥꠝ ꠎꠣꠞꠤ ꠇꠞꠦ,
ꠀꠞ ꠔꠣꠞꠣꠞ ꠎꠝꠤꠖꠣꠞ ꠅꠇꠟꠦ ꠉꠥꠟꠣꠝꠞ ꠃꠙꠞꠦ ꠛꠦꠐꠣꠉꠤꠞꠤ ꠇꠞꠦ।
২৬ ꠅꠁꠟꠦ ꠔꠥꠝꠞꠣꠞ ꠝꠣꠎꠦ ꠔ ꠁꠟꠣ ꠅꠀ ꠑꠤꠇ ꠘꠣꠄ।
ꠔꠥꠝꠞꠣꠞ ꠇꠦꠃ ꠖꠣꠝꠤ ꠛꠘꠔꠦ ꠌꠣꠁꠟꠦ,
ꠢꠦ ꠔꠥꠝꠞꠣꠞ ꠈꠦꠎꠝꠔ ꠇꠞꠃꠇ।
২৭ ꠀꠞ ꠇꠦꠃ ꠛꠠ ꠅꠁꠔꠦ ꠌꠣꠁꠟꠦ,
ꠢꠦ ꠢꠇꠟꠞ ꠉꠥꠟꠣꠝꠤ ꠇꠞꠃꠇ।
২৮ ꠝꠘꠅ ꠞꠣꠈꠤꠅ,
ꠀꠝꠤ ꠛꠤꠘ-ꠀꠖꠝꠦꠅ ꠈꠦꠎꠝꠔ ꠙꠣꠅꠀꠔ ꠀꠁꠍꠤ ꠘꠣ,
ꠀꠁꠍꠤ ꠔ ꠈꠦꠎꠝꠔ ꠇꠞꠣꠔ।
ꠀꠞ ꠛꠃꠔ ꠝꠣꠘꠡꠞ ꠎꠣꠘ ꠛꠣꠌꠣꠘꠤꠞ ꠟꠣꠉꠤ,
ꠘꠤꠎꠞ ꠎꠣꠘ ꠛꠤꠟꠣꠁ ꠖꠦꠅꠀꠔ ꠀꠁꠍꠤ।”
ꠢꠎꠞꠔ ꠁꠍꠣꠄ ꠖꠥꠁꠎꠘ ꠀꠘ꠆ꠖꠣꠞꠦ ꠜꠣꠟꠣ ꠇꠞꠟꠣ
২৯ ꠢꠎꠞꠔ ꠁꠍꠣꠄ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠟꠁꠀ ꠎꠤꠞꠤꠢꠅ ꠐꠣꠃꠘ ꠕꠣꠇꠤ ꠞꠅꠀꠘꠣ ꠅꠁꠉꠦꠟꠣ,
ꠅꠃ ꠡꠝꠄ ꠛꠃꠔ ꠝꠣꠘꠥꠡ ꠔꠣꠘ ꠈꠞꠦ ꠈꠞꠦ ꠉꠦꠟꠣ।
৩০ ꠎꠣꠅꠀꠞ ꠡꠝꠄ ꠙꠕꠞ ꠇꠣꠘ꠆ꠖꠣꠔ ꠖꠥꠁ ꠀꠘ꠆ꠖꠣ ꠛꠦꠐꠣ ꠛꠅꠀꠔ ꠀꠍꠤꠟ।
ꠔꠣꠁꠘ ꠅꠃ ꠙꠕꠦꠖꠤ ꠎꠣꠁꠞꠣ ꠢꠥꠘꠤꠀ ꠔꠣꠞꠣ ꠎꠥꠞꠦ ꠎꠥꠞꠦ ꠌꠤꠟ꠆ꠟꠣꠁꠀ ꠇꠂꠟ,
“ꠅ ꠢꠥꠎꠥꠞ,
ꠅ ꠖꠣꠃꠖ ꠘꠛꠤꠞ ꠀꠅꠟꠣꠖ,
ꠀꠝꠞꠣꠞꠦ ꠞꠢꠝ ꠇꠞꠂꠘ।”
৩১ ꠌꠤꠟ꠆ꠟꠣꠘꠤ ꠢꠥꠘꠤꠀ ꠅꠘꠞ ꠝꠣꠘꠡꠦ ꠔꠣꠞꠣꠞꠦ ꠗꠝꠇ ꠖꠤꠟꠣ।
ꠅꠁꠟꠦ ꠔꠣꠞꠣ ꠀꠞꠅ ꠎꠥꠞꠦ ꠎꠥꠞꠦ ꠌꠤꠟ꠆ꠟꠣꠁꠀ ꠇꠂꠟ,
“ꠅ ꠢꠥꠎꠥꠞ,
ꠅ ꠖꠣꠃꠖ ꠘꠛꠤꠞ ꠀꠅꠟꠣꠖ,
ꠀꠝꠞꠣꠞꠦ ꠞꠢꠝ ꠇꠞꠂꠘ।”
৩২ ꠄꠞꠣꠞ ꠌꠤꠟ꠆ꠟꠣꠘꠤ ꠢꠥꠘꠤꠀ ꠔꠣꠁꠘ ꠃꠛꠣꠁ ꠉꠦꠟꠣ,
ꠃꠛꠣꠁꠀ ꠅꠃ ꠖꠥꠁꠅ ꠀꠘ꠆ꠖꠣꠞꠦ ꠇꠣꠘ꠆ꠖꠣꠔ ꠀꠘꠣꠁꠀ ꠎꠤꠇꠣꠁꠟꠣ,
“ꠇꠤꠔꠣ ꠛꠣ,
ꠇꠤꠔꠣ ꠌꠣꠅ?
ꠀꠝꠤ ꠔꠥꠝꠞꠣꠞꠦ ꠇꠤꠔꠣ ꠇꠞꠔꠣꠝ?”
৩৩ ꠔꠣꠞꠣ ꠇꠂꠟ,
“ꠢꠥꠎꠥꠞ,
ꠀꠝꠞꠣꠞ ꠌꠃꠈ ꠉꠥꠁꠘ ꠜꠣꠟꠣ ꠇꠞꠤ ꠖꠦꠃꠇ꠆ꠇꠣ।”
৩৪ ꠁꠈꠣꠘ ꠢꠥꠘꠤꠀ ꠔꠣꠘ ꠖꠞꠖ ꠢꠣꠝꠣꠁ ꠉꠦꠟ।
ꠔꠣꠁꠘ ꠔꠣꠞꠣꠞ ꠌꠃꠈ ꠀꠔꠣꠁ ꠖꠤꠟꠣ,
ꠟꠉꠦ ꠟꠉꠦꠃ ꠔꠣꠞꠣꠞ ꠌꠃꠈ ꠜꠣꠟꠣ ꠅꠁꠉꠦꠟ।
ꠛꠣꠖꠦ ꠔꠣꠞꠣꠅ ꠔꠣꠘ ꠈꠞꠦ ꠈꠞꠦ ꠞꠅꠀꠘꠣ ꠅꠁꠟ।