ꠛꠤꠀ ꠛꠣꠠꠤꠞ ꠖꠣꠅꠔꠞ ꠇꠤꠌ꠆ꠍꠣ
২২
১ ꠢꠎꠞꠔ ꠁꠍꠣꠄ ꠢꠤꠞꠛꠣꠞ ꠔꠣꠞꠣꠞꠦ ꠀꠞꠅ ꠇꠤꠌ꠆ꠍꠣ ꠢꠥꠘꠣꠁꠟꠣ।
ꠔꠣꠁꠘ ꠇꠁꠟꠣ,
২ “ꠛꠦꠢꠦꠡ꠆ꠔꠤ ꠛꠣꠖꠡꠣꠁ ꠅꠟꠣ ꠄꠇ ꠛꠣꠖꠡꠣꠞ ꠟꠣꠈꠣꠘ,
ꠎꠦ ꠛꠣꠖꠡꠣꠄ ꠔꠣꠘ ꠙꠥꠀꠞ ꠛꠤꠀꠞ ꠈꠣꠘꠤꠞ ꠛꠦꠛꠡ꠆ꠔꠣ ꠇꠞꠟꠣ।
৩ ꠀꠞ ꠖꠣꠅꠔꠤ ꠝꠦꠝꠣꠘ ꠅꠇꠟꠞꠦ ꠀꠘꠣꠞ ꠟꠣꠉꠤ ꠔꠣꠘ ꠇꠄꠎꠘ ꠌꠣꠇꠞꠞꠦ ꠙꠣꠑꠣꠁꠟꠣ,
ꠅꠁꠟꠦ ꠔꠣꠞꠣ ꠇꠦꠃ ꠀꠁꠟ ꠘꠣ।
৪ ꠛꠣꠖꠦ ꠔꠣꠘ ꠀꠞꠅ ꠌꠣꠇꠞꠞꠦ ꠅꠈꠣꠘ ꠢꠤꠇꠣꠁ ꠖꠤꠀ ꠙꠣꠑꠣꠁꠟꠣ,
ꠇꠁꠟꠣ,
‘ꠔꠥꠝꠞꠣ ꠉꠤꠀ ꠝꠦꠝꠣꠘ ꠅꠇꠟꠞꠦ ꠇꠁꠅ,
ꠀꠝꠤ ꠀꠝꠣꠞ ꠔꠣꠎꠣ ꠛꠤꠍꠣꠟ ꠀꠞ ꠒꠦꠇꠣꠁꠘ ꠎꠛꠅ ꠇꠞꠤꠀ ꠈꠣꠘꠤ ꠎꠥꠁꠔ ꠇꠞꠍꠤ।
ꠅꠈꠘ ꠈꠣꠘꠤ ꠔꠤꠀꠞ ꠅꠁꠉꠦꠍꠦ,
ꠀꠙꠘꠣꠞꠣ ꠀꠁꠀ ꠈꠣꠁꠟꠣꠃꠇ꠆ꠇꠣ।’
৫ “ꠖꠣꠅꠔꠤ ꠅꠇꠟꠦ ꠄꠞꠣꠞ ꠇꠕꠣꠅ ꠘꠣ ꠢꠥꠘꠤꠀ,
ꠇꠦꠃ ꠔꠣꠞ ꠘꠤꠎꠞ ꠈꠣꠝꠣꠞꠅ ꠀꠞ ꠇꠦꠃ ꠔꠣꠞ ꠖꠥꠇꠣꠘꠅ ꠉꠦꠟꠉꠤ।
৬ ꠀꠞ ꠛꠣꠇꠤ ꠝꠣꠘꠡꠦ ꠅꠃ ꠌꠣꠇꠞ ꠅꠇꠟꠞꠦ ꠗꠞꠤꠀ ꠛꠦꠁꠎ꠆ꠎꠔ ꠇꠞꠤꠀ ꠈꠥꠘ ꠇꠞꠤꠟ꠆ꠟ।
৭ ꠛꠣꠖꠡꠣꠄ ꠁꠔꠣ ꠢꠥꠘꠤꠀ ꠉꠥꠍꠣꠄ ꠀꠉꠥꠁꠘ ꠅꠁꠉꠦꠟꠣ।
ꠔꠣꠁꠘ ꠘꠤꠎꠞ ꠍꠤꠙꠣꠁ ꠖꠟ ꠙꠣꠑꠣꠁꠀ ꠢꠃ ꠈꠥꠘꠤ ꠅꠇꠟꠞꠦ ꠛꠤꠘꠣꠡ ꠇꠞꠟꠣ,
ꠔꠣꠞꠣꠞ ꠀꠡ꠆ꠔꠣ ꠐꠣꠃꠘ ꠀꠉꠥꠁꠘꠖꠤ ꠎꠣꠟꠣꠁꠟꠤꠟꠣ।
৮ ꠛꠣꠖꠦ ꠔꠣꠘ ꠌꠣꠇꠞ ꠅꠇꠟꠞꠦ ꠇꠁꠟꠣ,
‘ꠈꠣꠘꠤ ꠔ ꠔꠤꠀꠞ ꠅꠁꠉꠦꠍꠦ,
ꠅꠁꠟꠦ ꠎꠦꠔꠣꠞꠦ ꠖꠣꠅꠔ ꠖꠤꠍꠟꠣꠝ,
ꠁꠔꠣ ꠔ ꠁ ꠖꠣꠅꠔꠞ ꠎꠥꠇꠣ ꠘꠣꠄ।
৯ ꠔꠦ ꠢꠥꠘꠅ,
ꠔꠥꠝꠞꠣ ꠅꠈꠘ ꠞꠣꠡ꠆ꠔꠣꠞ ꠝꠥꠠꠣꠄ ꠝꠥꠠꠣꠄ ꠎꠣꠅ,
ꠉꠤꠀ ꠎꠔ ꠝꠣꠘꠡꠞꠦ ꠙꠣꠁꠛꠣꠄ,
ꠔꠣꠞꠣ ꠢꠇ꠆ꠇꠟꠞꠦ ꠛꠤꠀꠞ ꠀꠡꠞꠅ ꠟꠁꠀ ꠀꠅ।’
১০ ꠛꠣꠖꠡꠣꠞ ꠢꠥꠇꠥꠝ ꠙꠣꠁꠀ ꠔꠣꠞꠣ ꠛꠣꠞꠅꠁꠀ ꠉꠤꠀ ꠛꠣꠖ-ꠜꠣꠟꠣ ꠎꠔ ꠎꠘꠞꠦ ꠙꠣꠁꠟ,
ꠢꠇꠟꠞꠦ ꠀꠘꠟ।
ꠄꠞꠟꠣꠉꠤ ꠝꠦꠝꠣꠘꠦ ꠀꠡ꠆ꠔꠣ ꠛꠤꠀ ꠛꠣꠠꠤ ꠜꠞꠤ ꠉꠦꠟ।
১১ “ꠄꠞꠛꠣꠖꠦ ꠛꠣꠖꠡꠣꠄ ꠝꠦꠝꠣꠘꠞ ꠟꠉꠦ ꠖꠦꠈꠣ ꠇꠞꠣꠔ ꠀꠁꠟꠣ,
ꠀꠁꠀ ꠝꠎꠟꠤꠍꠞ ꠜꠤꠔꠞꠦ ꠢꠣꠝꠣꠁꠀ ꠖꠦꠈꠂꠘ,
ꠄꠇ ꠛꠦꠐꠣꠄ ꠡꠣꠗꠣꠞꠘ ꠇꠣꠙꠠ ꠚꠤꠘ꠆ꠖꠤꠀ ꠈꠣꠘꠤꠔ ꠀꠁꠌ꠆ꠍꠦ।
১২ ꠔꠣꠁꠘ ꠄꠞꠦ ꠎꠤꠇꠣꠁꠟꠣ,
‘ꠅꠛꠣ,
ꠛꠤꠀ ꠛꠣꠠꠤꠞ ꠎꠥꠇꠣ ꠇꠣꠙꠠ ꠘꠣ ꠚꠤꠘ꠆ꠖꠤꠀ ꠁꠘꠅ ꠢꠣꠝꠣꠁꠟꠦ ꠇꠤꠟꠣ?’
ꠅꠁꠟꠦ ꠢꠦ ꠇꠥꠘꠥ ꠎꠥꠀꠙ ꠖꠤꠔ ꠙꠣꠞꠟ ꠘꠣ।
১৩ ꠔꠦꠃ ꠛꠣꠖꠡꠣꠄ ꠔꠣꠘ ꠉꠥꠟꠣꠝ ꠅꠇꠟꠞꠦ ꠢꠥꠇꠥꠝ ꠖꠤꠟꠣ,
‘ꠅꠉꠥꠞ ꠀꠔ-ꠙꠣꠅ ꠛꠣꠘ꠆ꠖꠤꠀ ꠛꠣꠞꠦ ꠘꠤꠀ ꠀꠘ꠆ꠖꠣꠁꠞ ꠉꠣꠔꠅ ꠚꠣꠟꠣꠁ ꠖꠦꠅ।’
ꠢꠘꠅ ꠝꠣꠘꠡꠦ ꠇꠣꠘ꠆ꠖꠣ-ꠇꠣꠐꠤ ꠇꠞꠛꠣ ꠀꠞ ꠎꠣꠟꠣ-ꠎꠘꠔ꠆ꠞꠘꠣꠄ ꠖꠣꠔ ꠇꠤꠠꠤꠝꠤꠠꠤ ꠈꠣꠁꠛꠣ।”
১৪ ꠇꠤꠌ꠆ꠍꠣꠞ ꠛꠣꠖꠦ ꠁꠍꠣꠄ ꠇꠁꠟꠣ,
“ꠄꠞꠟꠣꠉꠤꠃ ꠀꠝꠤ ꠇꠁꠞꠣꠝ,
ꠖꠣꠅꠔ ꠙꠣꠁꠍꠂꠘ ꠛꠃꠔꠦ,
ꠅꠁꠟꠦ ꠙꠍꠘ꠆ꠖ ꠅꠁꠍꠂꠘ ꠇꠝ।”
ꠈꠣꠎꠘꠣꠞ ꠛꠦꠙꠣꠞꠦ ꠖꠥꠡꠝꠘ ꠅꠇꠟꠞ ꠙ꠆ꠞꠡꠘ
১৫ ꠅꠈꠣꠘ ꠢꠥꠘꠤꠀ ꠚꠞꠤꠡꠤ ꠖꠟꠞ ꠝꠣꠘꠥꠡ ꠁꠍꠣꠞ ꠉꠦꠍ ꠕꠣꠇꠤ ꠢꠞꠤꠀ ꠉꠦꠟꠣꠉꠤ,
ꠉꠤꠀ ꠙꠞꠣꠝꠤꠡ ꠇꠞꠟꠣ ꠔꠣꠘꠞꠦ ꠇꠤꠟꠣ ꠇꠕꠣꠞ ꠚꠣꠘ꠆ꠖꠅ ꠚꠣꠟꠣꠁꠟ ꠎꠣꠄ।
১৬ ꠔꠦꠃ ꠔꠣꠞꠣ ꠘꠤꠎꠞ ꠇꠄꠎꠘ ꠡꠣꠉꠞꠤꠖ ꠀꠞ ꠞꠣꠎꠣ ꠢꠦꠞꠥꠖꠞ ꠖꠟꠞ ꠇꠤꠍꠥ ꠝꠣꠘꠡꠞꠦ ꠁꠍꠣꠞ ꠉꠦꠍꠦ ꠙꠣꠑꠣꠁꠟꠣ।
ꠅꠔꠣꠄ ꠀꠁꠀ ꠇꠁꠟꠣ,
“ꠢꠥꠎꠥꠞ,
ꠀꠝꠞꠣ ꠔ ꠎꠣꠘꠤ,
ꠀꠙꠘꠦ ꠄꠇꠎꠘ ꠢꠇ ꠝꠣꠘꠥꠡ।
ꠢꠇ-ꠢꠣꠟꠣꠟ ꠙꠕꠦ ꠝꠣꠘꠡꠞꠦ ꠀꠟ꠆ꠟꠣꠞ ꠞꠣꠡ꠆ꠔꠣ ꠛꠣꠔꠣꠁ ꠖꠤꠞꠣ।
ꠇꠦ ꠇꠤꠔꠣ ꠝꠘꠅ ꠇꠞꠦ ꠛꠣ ꠘꠣ ꠇꠞꠦ,
ꠁꠔꠣꠄ ꠀꠙꠘꠣꠞ ꠇꠥꠘ꠆ꠔꠣꠃ ꠎꠣꠄ ꠀꠄ ꠘꠣ,
ꠀꠙꠘꠦ ꠔ ꠝꠥꠈ ꠌꠣꠁꠀ ꠇꠥꠘ꠆ꠔꠣ ꠇꠞꠂꠘ ꠘꠣ।
১৭ ꠔꠦ ꠀꠝꠞꠣꠞꠦ ꠛꠣꠔꠣꠁ ꠖꠦꠃꠇ꠆ꠇꠣ,
ꠢꠎꠞꠔ ꠝꠥꠍꠣꠞ ꠡꠞꠤꠅꠔ ꠝꠣꠚꠤꠇ ꠞꠥꠝꠣꠘ ꠛꠣꠖꠡꠣꠞꠦ ꠈꠣꠎꠘꠣ ꠖꠦꠅꠀ ꠎꠣꠁꠎ ꠘꠤ?
ꠀꠝꠞꠣ ꠔꠣꠘꠞꠦ ꠈꠣꠎꠘꠣ ꠖꠤꠔꠣꠝ ꠘꠤ,
ꠘꠣ ꠖꠤꠔꠣꠝ ꠘꠣ?”
১৮ ꠁꠔꠣꠞ ꠇꠥ-ꠙꠞꠣꠝꠤꠡ ꠔꠣꠁꠘ ꠛꠥꠎꠤꠟꠤꠟꠣ,
ꠛꠥꠎꠤꠀ ꠇꠁꠟꠣ,
“ꠅ ꠜꠘ꠆ꠒ ꠅꠇꠟ,
ꠔꠥꠝꠞꠣ ꠇꠦꠘꠦ ꠀꠝꠣꠞꠦ ꠙꠞꠤꠇ꠆ꠇꠣ ꠇꠞꠞꠣꠄ?
১৯ ꠎꠦ ꠐꠦꠇꠣꠖꠤ ꠈꠣꠎꠘꠣ ꠖꠦꠁꠘ,
ꠅꠔꠣ ꠄꠉꠥ ꠐꠦꠇꠣ ꠀꠝꠣꠞꠦ ꠖꠦꠈꠣꠅ।”
ꠅꠃ ꠔꠣꠞꠣ ꠄꠇꠐꠣ ꠖꠤꠘꠣꠞ ꠀꠘꠤꠀ ꠁꠍꠣꠞ ꠀꠔꠅ ꠖꠤꠟꠣ।
২০ ꠔꠣꠁꠘ ꠎꠤꠇꠣꠁꠟꠣ,
“ꠁ ꠙꠄꠡꠣꠞ ꠃꠙꠞꠦ ꠇꠣꠞ ꠘꠣꠝ ꠀꠞ ꠍꠛꠤ?”
২১ ꠔꠣꠞꠣ ꠇꠁꠟꠣ,
“ꠞꠥꠝꠣꠘ ꠛꠣꠖꠡꠣꠞ।”
ꠔꠣꠁꠘ ꠇꠁꠟꠣ,
“ꠔꠦ ꠢꠥꠘꠅ,
ꠛꠣꠖꠡꠣꠞ ꠎꠦꠔꠣ ꠁꠔꠣ ꠛꠣꠖꠡꠣꠞꠦ ꠖꠦꠅ,
ꠀꠞ ꠀꠟ꠆ꠟꠣꠞ ꠎꠦꠔꠣ ꠁꠔꠣ ꠀꠟ꠆ꠟꠣꠞꠦ ꠖꠦꠅ।”
২২ ꠁꠈꠣꠘ ꠢꠥꠘꠤꠀ ꠔꠣꠞꠣ ꠔꠣꠁꠎ꠆ꠎꠥꠛ ꠛꠘꠤꠀ ꠔꠣꠘ ꠉꠦꠍ ꠕꠣꠇꠤ ꠉꠦꠟꠣꠉꠤ।
ꠝꠞꠘ ꠛꠣꠖꠦ ꠎꠤꠘ꠆ꠖꠣ ꠅꠀꠞ ꠙ꠆ꠞꠡꠘ
২৩ ꠅꠃ ꠖꠤꠘ ꠍꠤꠖ꠆ꠖꠦꠇꠤꠀ ꠝꠎꠛꠞ ꠇꠄꠎꠘ ꠝꠣꠘꠥꠡ ꠁꠍꠣꠞ ꠇꠣꠘ꠆ꠖꠣꠔ ꠀꠁꠟꠣ।
ꠄꠞꠣ ꠄꠇꠤꠘ ꠇꠞꠂꠘ,
ꠝꠃꠔꠞ ꠛꠣꠖꠦ ꠇꠥꠘꠥ ꠝꠣꠘꠥꠡ ꠀꠞ ꠎꠤꠘ꠆ꠖꠣ ꠅꠁꠀ ꠃꠑꠂꠘ ꠘꠣ।
ꠄꠞꠖꠣꠄ ꠔꠣꠞꠣ ꠁꠍꠣꠞꠦ ꠚꠣꠘ꠆ꠖꠅ ꠚꠣꠟꠣꠁꠛꠣꠞ ꠟꠣꠉꠤ ꠎꠤꠇꠣꠁꠟꠣ,
২৪ “ꠢꠥꠎꠥꠞ,
ꠢꠎꠞꠔ ꠝꠥꠍꠣꠄ ꠇꠁꠍꠂꠘ,
ꠇꠦꠃ ꠎꠥꠖꠤ ꠔꠣꠞ ꠛꠃꠞꠦ ꠘꠤꠀꠅꠟꠣꠖꠤ ꠢꠣꠟꠔꠦ ꠕꠁꠀ ꠝꠣꠞꠣ ꠎꠣꠄ,
ꠔꠦ ꠔꠣꠞ ꠜꠣꠁꠄ ꠅꠃ ꠠꠣꠠꠤ ꠛꠦꠐꠤꠞꠦ ꠛꠤꠀ ꠇꠞꠤꠀ ꠔꠣꠞ ꠜꠣꠁꠞ ꠛꠋꠡ ꠛꠣꠌꠣꠁꠔꠦ ꠅꠁꠛ।
২৫ ꠔꠦ ꠀꠝꠞꠣꠞ ꠅꠘꠅ ꠄꠇ ꠙꠞꠤꠛꠣꠞꠅ ꠡꠣꠔ ꠜꠣꠁ ꠀꠍꠤꠟ।
ꠛꠠ ꠎꠘꠦ ꠛꠤꠀ ꠇꠞꠤꠀ ꠘꠤꠀꠅꠟꠣꠖꠤ ꠢꠣꠟꠔꠦ ꠝꠣꠞꠣ ꠉꠦꠟ।
২৬ ꠛꠣꠖꠦ ꠖꠥꠍꠞꠣ ꠜꠣꠁꠄ ꠔꠣꠞ ꠅꠃ ꠠꠣꠠꠤ ꠜꠣꠛꠤꠞꠦ ꠛꠤꠀ ꠇꠞꠤ ꠝꠣꠞꠣ ꠉꠦꠟ।
ꠅꠃ ꠘꠝꠥꠘꠣꠄ ꠔꠤꠍꠞꠣ ꠜꠣꠁ ꠕꠣꠇꠤ ꠡꠥꠞꠥ ꠇꠞꠤꠀ ꠡꠣꠔꠅ ꠜꠣꠁꠄ ꠅꠃ ꠛꠦꠐꠤꠞꠦ ꠛꠤꠀ ꠇꠞꠟ।
২৭ ꠢꠦꠡꠦ ꠅꠃ ꠛꠦꠐꠤꠅ ꠝꠣꠞꠣ ꠉꠦꠟ।
২৮ ꠔꠦ ꠇꠃꠇ꠆ꠇꠣ ꠌꠣꠁꠘ,
ꠝꠞꠘ ꠛꠣꠖꠦ ꠎꠦꠛꠟꠣ ꠔꠣꠞꠣ ꠎꠤꠘ꠆ꠖꠣ ꠅꠁꠀ ꠃꠑꠛꠣ,
ꠅꠃ ꠡꠝꠄ ꠁ ꠛꠦꠐꠤ,
ꠄꠞꠣ ꠇꠥꠘ ꠜꠣꠁꠞ ꠛꠃ ꠅꠁꠛ?
ꠔꠣꠞꠣ ꠢꠇꠟꠦꠃ ꠔ ꠁ ꠛꠦꠐꠤꠞꠦ ꠛꠤꠀ ꠇꠞꠍꠤꠟ।”
২৯ ꠔꠣꠁꠘ ꠎꠥꠀꠙ ꠖꠤꠟꠣ,
“ꠀꠙꠘꠣꠞꠣ ꠔ ꠀꠟ꠆ꠟꠣꠞ ꠇꠣꠟꠣꠝ ꠎꠣꠘꠂꠘ ꠘꠣ,
ꠀꠟ꠆ꠟꠣꠞ ꠇꠥꠖꠞꠔꠤ ꠛꠦꠙꠣꠞꠅ ꠛꠥꠎꠂꠘ ꠘꠣ।
ꠄꠞꠖꠣꠄ ꠀꠙꠘꠣꠞꠣ ꠁ ꠜꠥꠟ ꠇꠞꠞꠣ।
৩০ ꠢꠥꠘꠃꠇ꠆ꠇꠣ,
ꠝꠥꠞ꠆ꠖꠣ ꠅꠇꠟ ꠎꠦꠛꠟꠣ ꠎꠤꠘ꠆ꠖꠣ ꠅꠁꠀ ꠃꠑꠛꠣ,
ꠅꠃ ꠡꠝꠄ ꠔꠣꠞꠣ ꠛꠤꠀ-ꠡꠣꠖꠤ ꠇꠞꠔꠣ ꠘꠣꠄ,
ꠇꠦꠃ ꠔꠣꠞꠣꠞꠦ ꠛꠤꠀ ꠖꠤꠔ-ꠅ ꠘꠣꠄ।
ꠄꠞꠣ ꠔ ꠚꠤꠞꠤꠡ꠆ꠔꠣꠞ ꠟꠣꠈꠣꠘ ꠛꠘꠤꠎꠤꠛꠣ।
৩১ ꠝꠥꠞ꠆ꠖꠣ ꠅꠇꠟ ꠎꠤꠘ꠆ꠖꠣ ꠅꠀꠞ ꠛꠦꠙꠣꠞꠦ ꠀꠟ꠆ꠟꠣꠄ ꠇꠤꠔꠣ ꠛꠣꠔꠣꠁꠍꠂꠘ,
ꠁꠔꠣ ꠀꠙꠘꠣꠞꠣ ꠇꠤꠔꠣꠛꠅ ꠙꠠꠍꠂꠘ ꠘꠣ ꠘꠤ?
৩২ ꠇꠤꠔꠣꠛꠅ ꠟꠦꠈꠣ ꠀꠍꠦ,
‘ꠀꠝꠤ ꠁꠛ꠆ꠞꠣꠢꠤꠝꠞ ꠀꠟ꠆ꠟꠣ,
ꠁꠍꠢꠣꠇꠞ ꠀꠟ꠆ꠟꠣ ꠀꠞ ꠁꠀꠇꠥꠛꠞ ꠀꠟ꠆ꠟꠣ।’
ꠅꠈꠣꠘ ꠕꠣꠇꠤ ꠛꠥꠎꠣ ꠎꠣꠄ,
ꠅꠃ ꠘꠛꠤ ꠅꠇꠟꠞ ꠃꠚꠣꠔ ꠅꠁꠟꠦꠅ ꠄꠞꠣ ꠔ ꠀꠟ꠆ꠟꠣꠞ ꠌꠈꠥꠔ ꠅꠈꠘꠅ ꠎꠤꠘ꠆ꠖꠣ ꠀꠍꠂꠘ।
ꠀꠟ꠆ꠟꠣ ꠔ ꠝꠥꠞ꠆ꠖꠣ ꠅꠇꠟꠞ ꠝꠣꠛꠥꠖ ꠘꠣꠄ,
ꠔꠣꠁꠘ ꠎꠤꠘ꠆ꠖꠣ ꠅꠇꠟꠞ ꠝꠣꠛꠥꠖ।”
৩৩ ꠁ ꠔꠣꠟꠤꠝ ꠢꠥꠘꠤꠀ ꠔꠣꠞꠣ ꠔꠣꠁꠎ꠆ꠎꠥꠛ ꠅꠁꠉꠦꠟꠣ।
ꠢꠇꠟ ꠕꠣꠇꠤ ꠛꠠ ꠢꠥꠇꠥꠝ ꠇꠤꠔꠣ?
৩৪ ꠚꠞꠤꠡꠤ ꠅꠇꠟꠦ ꠎꠦꠛꠟꠣ ꠢꠥꠘꠟꠣ,
ꠍꠤꠖ꠆ꠖꠦꠇꠤꠀ ꠝꠎꠛꠞ ꠝꠣꠘꠡꠦ ꠁꠍꠣꠞ ꠝꠣꠔꠞ ꠇꠥꠘꠥ ꠎꠥꠀꠙ ꠖꠤꠔꠣ ꠙꠣꠞꠍꠂꠘ ꠘꠣ,
ꠔꠦꠃ ꠔꠣꠞꠣ ꠢꠇꠟ ꠄꠇꠈꠣꠘꠅ ꠅꠁꠟꠣ।
৩৫ ꠔꠣꠞꠣꠞ ꠖꠟꠞ ꠄꠇꠎꠘ ꠝꠃꠟꠣꠘꠣ ꠀꠁꠀ ꠁꠍꠣꠞꠦ ꠙꠞꠤꠇ꠆ꠇꠣ ꠇꠞꠣꠞ ꠟꠣꠉꠤ ꠎꠤꠇꠣꠁꠟꠣ,
৩৬ “ꠢꠥꠎꠥꠞ,
ꠝꠥꠍꠣꠞ ꠡꠞꠤꠅꠔꠞ ꠝꠣꠎꠦ ꠢꠇꠟ ꠕꠣꠇꠤ ꠛꠠ ꠢꠥꠇꠥꠝ ꠇꠥꠘꠐꠣ?”
৩৭-৩৮ ꠁꠍꠣꠄ ꠎꠥꠀꠙ ꠖꠤꠟꠣ,
“ꠢꠇꠟ ꠕꠣꠇꠤ ꠛꠠ ꠢꠥꠇꠥꠝ ꠅꠁꠟ,
‘ꠔꠥꠝꠞꠣꠞ ꠀꠡ꠆ꠔꠣ ꠖꠤꠟ,
ꠀꠡ꠆ꠔꠣ ꠎꠣꠘ,
ꠀꠡ꠆ꠔꠣ ꠝꠘ ꠀꠞ ꠢꠇꠟ ꠡꠇ꠆ꠔꠤ ꠖꠤꠀ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞꠦ ꠝꠢꠛ꠆ꠛꠔ ꠇꠞꠤꠅ।’
৩৯ ꠖꠥꠍꠞꠣ ꠢꠥꠇꠥꠝꠅ ꠅꠃ ꠟꠣꠈꠣꠘ,
‘ꠔꠥꠝꠞꠣꠞ ꠀꠞꠤ-ꠚꠞꠤꠞꠦ ꠘꠤꠎꠞ ꠟꠣꠈꠣꠘ ꠝꠣꠄꠀ ꠇꠞꠤꠅ।’
৪০ ꠅꠃ ꠖꠥꠁꠅ ꠢꠥꠇꠥꠝꠞ ꠃꠙꠞꠦ ꠀꠡ꠆ꠔꠣ ꠔꠃꠞꠣꠔ ꠡꠞꠤꠚ ꠀꠞ ꠀꠍꠝꠣꠘꠤ ꠇꠤꠔꠣꠛ ꠅꠇꠟ ꠘꠤꠞꠜꠞ ꠇꠞꠦ।”
ꠀꠟ-ꠝꠍꠤ ꠇꠦ?
৪১ ꠚꠞꠤꠡꠤ ꠅꠇꠟ ꠄꠇꠈꠣꠘꠅ ꠖꠟꠣ ꠞꠁꠍꠂꠘ,
ꠅꠃ ꠡꠝꠄ ꠁꠍꠣꠄ ꠔꠣꠞꠣꠞꠦ ꠎꠤꠇꠣꠁꠟꠣ,
৪২ “ꠀꠟ-ꠝꠍꠤꠞ ꠛꠦꠙꠣꠞꠦ ꠀꠙꠘꠣꠞꠣ ꠇꠤꠔꠣ ꠎꠣꠘꠂꠘ?
ꠔꠣꠁꠘ ꠇꠣꠞ ꠀꠅꠟꠣꠖ?”
ꠔꠣꠞꠣ ꠇꠂꠟ,
“ꠖꠣꠃꠖ ꠘꠛꠤꠞ ꠀꠅꠟꠣꠖ।”
৪৩ ꠔꠦꠃ ꠁꠍꠣꠄ ꠔꠣꠞꠣꠞꠦ ꠇꠁꠟꠣ,
“ꠔꠦ ꠙꠣꠇ ꠞꠥꠢꠥꠞ ꠛꠟꠦ ꠖꠣꠃꠖ ꠘꠛꠤꠄ ꠇꠤꠟꠣ ꠀꠟ-ꠝꠍꠤꠞꠦ ꠔꠣꠘ ꠘꠤꠎꠞ ꠝꠥꠘꠤꠛ ꠇꠁꠍꠂꠘ?
ꠖꠣꠃꠖꠦ ꠔ ꠇꠁꠍꠂꠘ,
৪৪ ꠝꠣꠛꠥꠖꠦ ꠀꠝꠣꠞ ꠝꠥꠘꠤꠛꠞꠦ ꠇꠁꠟꠣ,
ꠀꠝꠤ ꠎꠔ ꠡꠝꠄ ꠔꠥꠝꠣꠞ ꠖꠥꠡꠝꠘ ꠅꠇꠟꠞꠦ
ꠔꠥꠝꠣꠞ ꠙꠣꠅꠞ ꠔꠟꠣꠔ ꠘꠣ ꠚꠣꠟꠣꠁ,
ꠅꠔ ꠡꠝꠄ ꠔꠥꠝꠤ ꠀꠝꠣꠞ ꠒꠣꠁꠘꠞ ꠔꠈ꠆ꠔꠅ ꠛꠅ।
৪৫ ꠖꠣꠃꠖꠦ ꠎꠦꠛꠟꠣ ꠘꠤꠎꠦꠃ ꠀꠟ-ꠝꠍꠤꠞꠦ ꠔꠣꠘ ꠝꠥꠘꠤꠛ ꠇꠁꠍꠂꠘ,
ꠔꠦ ꠀꠟ-ꠝꠍꠤ ꠇꠦꠝꠘꠦ ꠖꠣꠃꠖꠞ ꠀꠅꠟꠣꠖ ꠅꠁꠛꠣ?”
৪৬ ꠔꠣꠞꠣ ꠄꠞ ꠇꠥꠘꠥ ꠎꠥꠀꠙ ꠖꠤꠔꠣ ꠙꠣꠞꠟꠣ ꠘꠣ,
ꠀꠞ ꠅꠃ ꠖꠤꠘ ꠕꠣꠇꠤ ꠇꠦꠃ ꠔꠣꠘꠞꠦ ꠇꠥꠘ꠆ꠔꠣ ꠎꠤꠇꠣꠘꠤꠞꠅ ꠡꠣꠅꠡ ꠙꠣꠁꠟ ꠘꠣ।