ꠘꠦꠔꠣ ꠅꠇꠟꠞꠦ ꠢꠎꠞꠔ ꠁꠍꠣꠞ ꠢꠥꠡꠤꠀꠞꠤ (২৩:১-২৫:৪৬)
ꠝꠃꠟꠣꠘꠣ ꠅꠇꠟꠞ ꠟꠣꠉꠤ ꠀꠚꠍꠥꠍ
২৩
১ ꠢꠎꠞꠔ ꠁꠍꠣꠄ ꠔꠣꠘ ꠟꠉꠞ ꠝꠣꠘꠡꠞꠦ ꠀꠞ ꠍꠣꠢꠣꠛꠤ ꠅꠇꠟꠞꠦ ꠇꠁꠟꠣ,
২ “ꠝꠥꠍꠣ ꠘꠛꠤꠞ ꠡꠞꠤꠅꠔ ꠔꠣꠟꠤꠝ ꠖꠤꠛꠣꠞ ꠄꠈꠔꠤꠀꠞ ꠔ ꠝꠃꠟꠣꠘꠣ ꠀꠞ ꠚꠞꠤꠡꠤ ꠅꠇꠟꠞ ꠀꠔꠅ।
৩ ꠄꠞꠟꠣꠉꠤ ꠔꠣꠞꠣ ꠎꠦꠔꠣ ꠇꠂꠘ,
ꠅꠔꠣ ꠝꠣꠘꠤꠅ,
ꠀꠞ ꠎꠦꠔꠣ ꠀꠝꠟ ꠇꠞꠣꠞ ꠢꠥꠇꠥꠝ ꠖꠦꠁꠘ,
ꠅꠔꠣ ꠀꠝꠟ ꠇꠞꠤꠅ।
ꠅꠁꠟꠦ ꠔꠣꠞꠣ ꠘꠤꠎꠦ ꠎꠦꠔꠣ ꠇꠞꠂꠘ,
ꠔꠥꠝꠞꠣ ꠁꠔꠣ ꠇꠞꠤꠅ ꠘꠣ।
ꠇꠣꠞꠘ,
ꠔꠣꠞꠣ ꠝꠥꠈ ꠖꠤꠀ ꠎꠦꠟꠣ ꠇꠂꠘ,
ꠁꠟꠣ ꠇꠣꠝ ꠇꠞꠂꠘ ꠘꠣ।
৪ ꠔꠣꠞꠣ ꠀꠝ ꠝꠣꠘꠡꠞ ꠇꠣꠘ꠆ꠖꠅ ꠛꠠ ꠛꠠ ꠉꠣꠁꠐ ꠔꠥꠟꠤꠀ ꠖꠦꠁꠘ,
ꠅꠁꠟꠦ ꠡꠣꠁꠎ꠆ꠎꠞ ꠟꠣꠉꠤ ꠔꠣꠞꠣ ꠄꠇꠐꠣ ꠀꠋꠉꠥꠟꠅ ꠟꠣꠠꠣꠁꠘ ꠘꠣ।
৫ ꠔꠣꠞꠣ ꠈꠣꠟꠤ ꠝꠣꠘꠡꠞꠦ ꠖꠦꠈꠣꠘꠤꠞ ꠟꠣꠉꠤ ꠢꠇꠟꠔꠣ ꠇꠞꠂꠘ।
ꠀꠟ꠆ꠟꠣꠞ ꠇꠣꠟꠣꠝꠞ ꠀꠄꠀꠔ ꠖꠤꠀ ꠛꠠ ꠛꠠ ꠔꠣꠛꠤꠎ ꠛꠣꠘ꠆ꠖꠂꠘ ꠀꠞ ꠘꠤꠎꠞ ꠙꠞꠦꠎꠉꠣꠞꠤ ꠖꠦꠈꠣꠘꠤꠞ ꠟꠣꠉꠤ ꠟꠣꠝ꠆ꠛꠣ ꠟꠣꠝ꠆ꠛꠣ ꠙꠣꠃꠉꠠꠤ ꠛꠣꠘ꠆ꠖꠂꠘ।
৬ ꠔꠣꠞꠣ ꠈꠣꠘꠤꠞ ꠝꠎꠟꠤꠍꠅ ꠜꠣꠟꠣ ꠜꠣꠟꠣ ꠎꠣꠉꠣ ꠔꠥꠇꠣꠁꠘ ꠀꠞ ꠝꠍꠤꠖꠅ ꠢꠣꠝꠣꠁꠀ ꠍꠣꠝꠘꠞ ꠇꠣꠔꠣꠞꠅ ꠛꠁꠔꠣ ꠌꠣꠁꠘ।
৭ ꠛꠣꠎꠣꠞ-ꠀꠐꠅ ꠉꠤꠀ ꠍꠣꠟꠣꠝ ꠙꠣꠁꠔꠦ ꠈꠥꠛ ꠙꠍꠘ꠆ꠖ ꠇꠞꠂꠘ,
ꠀꠞ ꠌꠣꠁꠘ ꠝꠣꠘꠡꠦ ꠔꠣꠞꠣꠞꠦ ꠢꠥꠎꠥꠞ ꠢꠥꠎꠥꠞ ꠇꠞꠃꠇ।
৮ “ꠅꠁꠟꠦ ꠔꠥꠝꠞꠣꠞꠦ ꠇꠦꠃ ꠢꠥꠎꠥꠞ ꠢꠥꠎꠥꠞ ꠇꠞꠃꠇ,
ꠁꠔꠣ ꠀꠡꠣ ꠇꠞꠤꠅ ꠘꠣ।
ꠔꠥꠝꠞꠣꠞ ꠀꠍꠟ ꠢꠥꠎꠥꠞ ꠔ ꠈꠣꠟꠤ ꠄꠇꠎꠘꠃ ꠀꠍꠂꠘ,
ꠔꠥꠝꠞꠣ ꠈꠣꠟꠤ ꠜꠣꠁ ꠜꠣꠁ ꠞꠁꠅ।
৯ ꠁ ꠖꠥꠘꠤꠀꠔ ꠇꠦꠃꠞꠞꠦ ꠛꠣꠛꠣ ꠇꠁꠀ ꠒꠣꠇꠤꠅ ꠘꠣ,
ꠇꠣꠞꠘ ꠔꠥꠝꠞꠣꠞ ꠛꠣꠔꠥꠘꠤ ꠛꠣꠚ ꠔ ꠄꠇꠎꠘꠃ,
ꠔꠣꠁꠘ ꠛꠦꠢꠦꠡ꠆ꠔꠅ ꠀꠍꠂꠘ।
১০ ꠇꠦꠃ ꠔꠥꠝꠞꠣꠞꠦ ꠘꠦꠔꠣ ꠇꠁꠀ ꠒꠣꠇꠃꠇ,
ꠁꠔꠣ ꠀꠡꠣ ꠇꠞꠤꠅ ꠘꠣ।
ꠔꠥꠝꠞꠣꠞ ꠘꠦꠔꠣ ꠔ ꠄꠇꠎꠘꠃ,
ꠔꠣꠁꠘ ꠅꠁꠟꠣ ꠀꠟ-ꠝꠍꠤ।
১১ “ꠔꠥꠝꠞꠣꠞ ꠝꠣꠎꠦ ꠎꠦꠁꠘ ꠢꠇꠟ ꠕꠣꠇꠤ ꠛꠠ,
ꠄꠁꠘ ꠔꠥꠝꠞꠣꠞ ꠈꠦꠎꠝꠔ ꠇꠞꠃꠇ।
১২ ꠎꠦ ꠎꠘꠦ ꠘꠤꠎꠞꠦ ꠛꠠ ꠝꠘꠅ ꠇꠞꠦ,
ꠔꠣꠞꠦ ꠢꠥꠞꠥ ꠇꠞꠣ ꠅꠁꠛ।
ꠀꠞ ꠎꠦ ꠘꠤꠎꠞꠦ ꠢꠥꠞꠥ ꠝꠘꠅ ꠇꠞꠦ,
ꠔꠣꠞꠦ ꠛꠠ ꠇꠞꠣ ꠅꠁꠛ।
১৩ “ꠢꠣꠄꠞꠦ ꠝꠃꠟꠣꠘꠣ ꠀꠞ ꠚꠞꠤꠡꠤꠞ ꠖꠟ,
ꠀꠚꠍꠥꠍ ꠔꠥꠝꠞꠣꠞ ꠟꠣꠉꠤ,
ꠔꠥꠝꠞꠣ ꠜꠘ꠆ꠒ!
ꠔꠥꠝꠞꠣ ꠝꠣꠘꠡꠞ ꠍꠣꠝꠘꠦ ꠛꠦꠢꠦꠡ꠆ꠔꠤ ꠛꠣꠖꠡꠣꠁꠞ ꠖꠥꠀꠞ ꠛꠘ꠆ꠖ ꠇꠞꠤ ꠕꠁꠍ।
ꠔꠥꠝꠞꠣ ꠘꠤꠎꠦꠅ ꠅꠘꠅ ꠢꠣꠝꠣꠁꠞꠣꠄ ꠘꠣ,
ꠝꠣꠘꠡꠞꠦꠅ ꠢꠣꠝꠣꠁꠔꠦ ꠖꠤꠞꠣꠄ ꠘꠣ।
১৪ ꠢꠣꠄꠞꠦ ꠜꠘ꠆ꠒ ꠝꠃꠟꠣꠘꠣ ꠀꠞ ꠚꠞꠤꠡꠤꠞ ꠖꠟ,
ꠝꠣꠘꠡꠞꠦ ꠖꠦꠈꠣꠘꠤꠞ ꠟꠣꠉꠤ ꠔꠥꠝꠞꠣ ꠟꠣꠝ꠆ꠛꠣ ꠟꠣꠝ꠆ꠛꠣ ꠖꠥꠀ ꠇꠞꠅ,
ꠢꠤꠞꠛꠣꠞ ꠠꠣꠠꠤ ꠛꠦꠐꠤꠘ꠆ꠔꠞ ꠎꠣꠉꠣ-ꠝꠤꠞꠣꠡꠅ ꠖꠈꠟ ꠇꠞꠅ।
ꠄꠞꠟꠣꠉꠤ ꠔꠥꠝꠞꠣꠞ ꠇꠑꠤꠘ ꠡꠣꠎꠣ ꠅꠁꠛ।
১৫ ꠢꠣꠄꠞꠦ ꠜꠘ꠆ꠒ ꠝꠃꠟꠣꠘꠣ ꠀꠞ ꠚꠞꠤꠡꠤꠞ ꠖꠟ!
ꠄꠇꠎꠘ ꠝꠣꠘꠡꠞꠦ ꠔꠥꠝꠞꠣꠞ ꠖꠟꠅ ꠘꠤꠛꠣꠞ ꠟꠣꠉꠤ ꠡꠣꠔ ꠡꠝꠥꠖ꠆ꠞ ꠔꠦꠞꠅ ꠘꠖꠤ ꠙꠣꠞꠅꠁꠀ ꠔꠥꠝꠞꠣ ꠖꠃꠠꠣꠅ।
ꠅꠁꠟꠦ ꠢꠦ ꠔꠥꠝꠞꠣꠞ ꠖꠟꠅ ꠢꠣꠝꠣꠁꠀ ꠢꠣꠞꠟꠦ,
ꠔꠣꠞꠦ ꠔꠥꠝꠞꠣ ꠕꠣꠇꠤ ꠀꠞꠅ ꠛꠠ ꠖꠥꠎꠈꠤ ꠛꠣꠘꠣꠅ।
১৬ “ꠢꠣꠄꠞꠦ ꠀꠘ꠆ꠖꠣ ꠙꠕ ꠖꠦꠈꠣꠅꠞꠣ!
ꠔꠥꠝꠞꠣ ꠘꠤꠎꠦ ꠀꠘ꠆ꠖꠣ ꠅꠁꠀ ꠅꠁꠘ꠆ꠘꠞꠦ ꠇꠤꠟꠣ ꠙꠕ ꠖꠦꠈꠣꠅ?
ꠔꠥꠝꠞꠣ ꠔ ꠇꠅ,
ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠘꠣꠝꠦ ꠇꠍꠝ ꠈꠣꠁꠟꠦ ꠇꠥꠘ꠆ꠔꠣ ꠅꠄ ꠘꠣ,
ꠅꠁꠟꠦ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠡꠥꠘꠣꠞ ꠘꠣꠝꠦ ꠇꠍꠝ ꠈꠣꠁꠟꠦ ꠝꠣꠘꠔꠦ ꠅꠁꠛ।
১৭ ꠢꠣꠄꠞꠦ ꠀꠘ꠆ꠖꠣ ꠛꠦꠀꠈꠟꠞ ꠖꠟ,
ꠇꠥꠘꠈꠣꠘ ꠛꠠ?
ꠛꠣꠄꠔꠥꠟ-ꠝꠥꠇꠣꠖ꠆ꠖꠍ,
ꠘꠣ ꠡꠥꠘꠣ?
ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠦꠃ ꠔ ꠅꠃ ꠡꠥꠘꠣꠞꠦ ꠙꠣꠇ-ꠙꠛꠤꠔ꠆ꠞ ꠇꠞꠦ।
১৮ ꠢꠤꠞꠛꠣꠞ ꠔꠥꠝꠞꠣ ꠇꠅ,
ꠇꠥꠞꠛꠣꠘꠤ ꠈꠣꠘꠣꠞ ꠘꠣꠝꠦ ꠇꠦꠃ ꠇꠍꠝ ꠇꠞꠟꠦ ꠇꠥꠘ꠆ꠔꠣ ꠅꠄ ꠘꠣ,
ꠅꠁꠟꠦ ꠇꠥꠞꠛꠣꠘꠤꠞ ꠌꠤꠎꠞ ꠘꠣꠝꠦ ꠇꠍꠝ ꠇꠞꠟꠦ ꠝꠣꠘꠔꠦ ꠅꠁꠛ।
১৯ ꠅ ꠀꠘ꠆ꠖꠣ ꠅꠇꠟ,
ꠇꠥꠘꠈꠣꠘ ꠛꠠ?
ꠇꠥꠞꠛꠣꠘꠤ ꠈꠣꠘꠣ,
ꠘꠣ ꠇꠥꠞꠛꠣꠘꠤꠞ ꠌꠤꠎ?
ꠅꠃ ꠇꠥꠞꠛꠣꠘꠤ ꠈꠣꠘꠣꠄꠃ ꠅꠃ ꠌꠤꠎꠞꠦ ꠙꠣꠇ-ꠙꠛꠤꠔ꠆ꠞ ꠇꠞꠦ ꠘꠣ ꠘꠤ?
২০ ꠄꠞꠟꠣꠉꠤ ꠎꠦ ꠎꠘꠦ ꠇꠥꠞꠛꠣꠘꠤ ꠈꠣꠘꠣꠞ ꠘꠣꠝꠦ ꠇꠍꠝ ꠇꠞꠦ,
ꠢꠦ ꠇꠥꠞꠛꠣꠘꠤ ꠈꠣꠘꠣ ꠀꠞ ꠇꠥꠞꠛꠣꠘꠤꠞ ꠌꠤꠎ,
ꠁ ꠖꠥꠁꠅꠔꠣꠞ ꠘꠣꠝꠦꠃ ꠇꠍꠝ ꠇꠞꠦ।
২১ ꠅꠟꠣꠃ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠘꠣꠝꠦ ꠎꠦ ꠎꠘꠦ ꠇꠍꠝ ꠇꠞꠦ,
ꠢꠦ-ꠅ ꠛꠣꠄꠔꠥꠟ-ꠝꠥꠇꠣꠖ꠆ꠖꠍ ꠀꠞ ꠄꠞ ꠜꠤꠔꠞꠦ ꠎꠦꠁꠘ ꠕꠣꠇꠂꠘ,
ꠔꠣꠘ ꠘꠣꠝꠦꠃ ꠇꠍꠝ ꠇꠞꠦ।
২২ ꠎꠦ ꠎꠘꠦ ꠛꠦꠢꠦꠡ꠆ꠔꠞ ꠘꠣꠝꠦ ꠇꠍꠝ ꠇꠞꠦ,
ꠢꠦ ꠀꠟ꠆ꠟꠣꠞ ꠀꠞꠡ ꠀꠞ ꠀꠞꠡꠅ ꠎꠦꠁꠘ ꠀꠍꠂꠘ,
ꠔꠣꠘ ꠘꠣꠝꠦꠃ ꠇꠍꠝ ꠇꠞꠦ।
২৩ “ꠢꠣꠄꠞꠦ ꠜꠘ꠆ꠒ ꠝꠃꠟꠣꠘꠣ ꠀꠞ ꠚꠞꠤꠡꠤꠞ ꠖꠟ!
ꠔꠥꠝꠞꠣ ꠉꠥꠀꠝꠥꠞꠤ,
ꠙꠖꠤꠘꠣ ꠙꠣꠔꠣ,
ꠀꠞ ꠎꠤꠞꠣꠞ ꠖꠡ ꠛꠣꠐꠞ ꠄꠇ ꠛꠣꠐ ꠀꠟ꠆ꠟꠣꠞ ꠅꠀꠡ꠆ꠔꠦ ꠎꠇꠣꠔ ꠖꠤꠞꠣꠄ,
ꠅꠁꠟꠦ ꠝꠥꠍꠣ ꠘꠛꠤꠞ ꠡꠞꠤꠅꠔꠞ ꠢꠥꠇꠥꠝ ꠝꠣꠚꠤꠇ ꠀꠞꠅ ꠎꠞꠥꠞꠤ ꠛꠦꠙꠣꠞ,
ꠝꠣꠘꠤ ꠢꠇ ꠁꠘꠍꠣꠚ,
ꠖꠄꠀ ꠀꠞ ꠀꠟ꠆ꠟꠣꠞ ꠝꠢꠛ꠆ꠛꠔ ꠔꠥꠝꠞꠣ ꠛꠣꠖ ꠖꠤꠟꠣꠁꠍ।
ꠔꠦ ꠙꠄꠟꠣ ꠢꠥꠇꠥꠝ ꠀꠝꠟ ꠇꠞꠣꠞ ꠟꠉꠦ ꠟꠉꠦ ꠛꠣꠖꠞꠔꠣꠅ ꠀꠝꠟ ꠇꠞꠣ ꠎꠞꠥꠞ।
২৪ ꠔꠥꠝꠞꠣ ꠘꠤꠎꠦꠃ ꠀꠘ꠆ꠖꠣ,
ꠅꠕꠌ ꠀꠞꠇ ꠎꠘꠞꠦ ꠙꠕ ꠖꠦꠈꠣꠁꠞꠣꠄ।
ꠔꠥꠝꠞꠣ ꠄꠉꠥ ꠝꠡꠣꠅ ꠍꠣꠇꠤꠀ ꠔꠥꠟꠅ,
ꠅꠁꠟꠦ ꠃꠐꠞꠦ ꠉꠤꠟꠤꠟꠣꠅ।
২৫ “ꠢꠣꠄꠞꠦ ꠜꠘ꠆ꠒ ꠝꠃꠟꠣꠘꠣ ꠀꠞ ꠚꠞꠤꠡꠤꠞ ꠖꠟ!
ꠔꠥꠝꠞꠣ ꠔ ꠛꠣꠡꠘ-ꠛꠞ꠆ꠔꠘꠞ ꠛꠣꠞꠉꠣꠟꠣ ꠜꠣꠟꠣ ꠇꠞꠤ ꠍꠣꠚ ꠇꠞꠅ,
ꠅꠁꠟꠦ ꠁꠔꠣꠞ ꠜꠤꠔꠞ ꠉꠣꠟꠣ ꠎꠥꠟꠥꠝ ꠀꠞ ꠟꠥꠜ-ꠟꠣꠟꠌꠦ ꠜꠞꠣ।
২৬ ꠢꠣꠄꠞꠦ ꠀꠘ꠆ꠖꠣ ꠚꠞꠤꠡꠤꠞ ꠖꠟ,
ꠔꠥꠝꠞꠣ ꠙꠄꠟꠣ ꠅꠔꠣꠞ ꠜꠤꠔꠞ ꠍꠣꠚ ꠇꠞꠅ,
ꠔꠦꠃ ꠛꠣꠞꠉꠣꠟꠣ ꠄꠝꠘꠦꠃ ꠍꠣꠚ ꠅꠁꠛ।
২৭ “ꠢꠣꠄꠞꠦ ꠜꠘ꠆ꠒ ꠝꠃꠟꠣꠘꠣ ꠀꠞ ꠚꠞꠤꠡꠤꠞ ꠖꠟ!
ꠔꠥꠝꠞꠣ ꠅꠁꠟꠣꠄ ꠌꠥꠘ-ꠇꠣꠝ ꠇꠞꠣ ꠇꠄꠛꠞꠞ ꠟꠣꠈꠣꠘ,
ꠄꠞ ꠛꠣꠞꠉꠣꠟꠣ ꠌꠇꠌꠇꠣ ꠅꠁꠟꠦꠅ ꠜꠤꠔꠞꠦ ꠔ ꠈꠣꠟꠤ ꠝꠞꠣ ꠝꠣꠘꠡꠞ ꠀꠒ꠆ꠒꠤ-ꠉꠥꠒ꠆ꠒꠤ ꠀꠞ ꠈꠣꠍꠞꠣꠄ ꠜꠞꠣ।
২৮ ꠑꠤꠇ ꠅꠃ ꠟꠣꠈꠣꠘ,
ꠝꠣꠘꠡꠦ ꠝꠘꠅ ꠇꠞꠂꠘ ꠔꠥꠝꠞꠣ ꠈꠥꠛ ꠙꠞꠦꠎꠉꠣꠞ,
ꠀꠍꠟꠦ ꠔꠥꠝꠞꠣꠞ ꠖꠤꠟ ꠔ ꠜꠘ꠆ꠒꠣꠝꠤ ꠀꠞ ꠘꠣꠚꠞꠝꠣꠘꠤꠄ ꠜꠞꠣ।
২৯ “ꠢꠣꠄꠞꠦ ꠜꠘ꠆ꠒ ꠝꠃꠟꠣꠘꠣ ꠀꠞ ꠚꠞꠤꠡꠤꠞ ꠖꠟ!
ꠔꠥꠝꠞꠣ ꠘꠛꠤ ꠅꠇꠟꠞ ꠞꠅꠎꠣꠞꠦ ꠡꠥꠘ꠆ꠖꠞ ꠇꠞꠤ ꠙꠣꠇ꠆ꠇꠣ ꠇꠞꠅ,
ꠀꠞ ꠅꠟꠤ-ꠀꠃꠟꠤꠀꠞ ꠝꠣꠎꠣꠞꠞꠦ ꠌꠇꠌꠇꠣ ꠇꠞꠤ ꠢꠣꠎꠣꠅ।
৩০ ꠀꠞ ꠔꠥꠝꠞꠣ ꠇꠅ,
‘ꠁꠡ,
ꠀꠝꠞꠣ ꠎꠥꠖꠤ ꠀꠝꠞꠣꠞ ꠛꠣꠚ-ꠖꠣꠖꠣꠞ ꠎꠝꠣꠘꠣꠔ ꠖꠥꠘꠤꠀꠔ ꠀꠁꠔꠣꠝ,
ꠔꠦ ꠘꠛꠤ ꠅꠇꠟꠞꠦ ꠇꠣꠔꠟ ꠇꠞꠣꠞ ꠛꠣꠟꠣ ꠛꠣꠚ-ꠖꠣꠖꠣꠞ ꠟꠉꠦ ꠉꠦꠟꠣꠝ ꠘꠣ ꠅꠘꠦ।’
৩১ ꠅꠃ ꠝꠣꠔꠦ ꠔꠥꠝꠞꠣ ꠙꠞꠝꠣꠘ ꠖꠤꠞꠣꠄ,
ꠘꠛꠤ ꠅꠇꠟꠞꠦ ꠎꠦꠔꠣꠄ ꠇꠣꠔꠟ ꠇꠞꠍꠟꠣ,
ꠅꠔꠣꠞ ꠛꠋꠡꠗꠞꠃ ꠔꠥꠝꠞꠣ।
৩২ ꠔꠦ ꠔꠥꠝꠞꠣꠞ ꠛꠣꠚ-ꠖꠣꠖꠣꠁꠘ꠆ꠔꠦ ꠎꠦꠔꠣ ꠡꠥꠞꠥ ꠇꠞꠤꠀ ꠉꠦꠍꠂꠘ,
ꠔꠥꠝꠞꠣ ꠅꠔꠣꠞ ꠛꠣꠇꠤ ꠉꠣꠟꠣ ꠙꠥꠞꠣ ꠇꠞꠞꠣꠄ।
৩৩ “ꠅ ꠢꠣꠚꠞ ꠛꠣꠁꠌ꠆ꠌꠣꠁꠘ,
ꠖꠥꠎꠈꠞ ꠀꠎꠣꠛ ꠕꠣꠇꠤ ꠔꠥꠝꠞꠣ ꠇꠤꠟꠣ ꠛꠣꠌꠔꠣꠄ?
৩৪ ꠄꠞꠟꠣꠉꠤ ꠀꠝꠤ ꠔꠥꠝꠞꠣꠞ ꠉꠦꠍꠦ ꠘꠛꠤ-ꠞꠍꠥꠟ,
ꠀꠞ ꠀꠟꠤꠝ-ꠃꠟꠣꠝꠣ ꠙꠣꠑꠣꠁꠀꠞ।
ꠄꠞꠣꠞ ꠝꠣꠎꠞ ꠇꠄꠎꠘꠞꠦ ꠔꠥꠝꠞꠣ ꠇꠣꠔꠟ ꠇꠞꠛꠣꠄ,
ꠇꠄꠎꠘꠞꠦ ꠖꠥꠈ-ꠇꠡ꠆ꠐꠞ ꠍꠟꠤꠛꠅ ꠟꠐꠇꠣꠁꠀ ꠝꠣꠞꠛꠣꠄ।
ꠀꠞ ꠇꠄꠎꠘꠞꠦ ꠔꠥꠝꠞꠣꠞ ꠝꠍꠤꠖꠅ ꠢꠣꠞꠣꠁꠀ ꠌꠣꠛꠥꠇ ꠝꠣꠞꠤꠀ,
ꠄꠇ ꠉꠣꠃ ꠕꠣꠇꠤ ꠀꠞꠇ ꠉꠣꠃꠔ ꠈꠦꠖꠣꠁꠀ ꠘꠤꠛꠣꠄ।
৩৫ ꠄꠞꠖꠣꠄꠃ ꠘꠤꠞ꠆ꠖꠥꠡꠤ ꠢꠃ ꠢꠣꠛꠤꠟꠞ ꠟꠃ ꠕꠣꠇꠤ ꠛꠣꠞꠣꠈꠤꠀꠞ ꠙꠥꠔ ꠎꠣꠇꠣꠞꠤꠀꠞꠦ ꠇꠣꠔꠟ ꠇꠞꠣ ꠙꠞ꠆ꠎꠘ꠆ꠔ,
ꠖꠥꠘꠤꠀꠔ ꠎꠔ ꠈꠥꠘ-ꠈꠣꠞꠣꠙꠤ ꠅꠁꠍꠦ,
ꠁꠔꠣ ꠢꠇꠟ ꠈꠥꠘꠞ ꠖꠣꠄꠁ ꠅꠁꠛꠣꠄ ꠔꠥꠝꠞꠣ।
ꠅꠃ ꠎꠣꠇꠣꠞꠤꠀꠞꠦ ꠔ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠜꠤꠔꠞꠞ ꠇꠥꠞꠛꠣꠘꠤ ꠈꠣꠘꠣ ꠀꠞ ꠈꠣꠍ ꠙꠣꠇ ꠎꠣꠉꠣꠞ ꠝꠣꠎꠈꠣꠘꠅ ꠇꠣꠔꠟ ꠇꠞꠣ ꠅꠁꠍꠤꠟ।
৩৬ ꠀꠝꠤ ꠔꠥꠝꠞꠣꠞꠦ ꠢꠣꠍꠣ ꠇꠕꠣ ꠇꠁꠞꠣꠝ,
ꠅꠃ ꠔꠣꠝꠣꠝ ꠈꠥꠘꠞ ꠖꠣꠄꠁ ꠅꠁꠛꠣꠄ ꠁ ꠎꠝꠣꠘꠣꠞ ꠝꠣꠘꠥꠡ।
ꠎꠦꠞꠥꠎꠣꠟꠦꠝꠞ ꠟꠣꠉꠤ ꠀꠚꠍꠥꠍ
৩৭ “ꠎꠦꠞꠥꠎꠣꠟꠦꠝ!
ꠢꠣꠄꠞꠦ ꠎꠦꠞꠥꠎꠣꠟꠦꠝ ꠐꠣꠃꠘ!
ꠔꠥꠝꠤ ꠘꠛꠤ ꠅꠇꠟꠞꠦ ꠇꠣꠔꠟ ꠇꠞꠅ,
ꠔꠥꠝꠣꠞ ꠉꠦꠍꠦ ꠎꠣꠞꠣꠞꠦ ꠙꠣꠑꠣꠁꠟ ꠅꠄ,
ꠔꠥꠝꠤ ꠔꠣꠞꠣꠞꠦ ꠙꠣꠔ꠆ꠔꠞ ꠝꠣꠞꠅ।
ꠝꠥꠞꠉꠤꠄ ꠎꠦꠟꠣ ꠔꠣꠁꠞ ꠛꠣꠁꠌ꠆ꠌꠣꠞꠦ ꠒꠣꠈꠘꠣꠞ ꠔꠟꠦ ꠀꠡꠞꠄ ꠖꠦꠄ,
ꠀꠝꠤꠅ ꠅꠃꠟꠣ ꠔꠥꠝꠣꠞ ꠝꠣꠘꠡꠞꠦ ꠀꠡꠞꠄ ꠖꠤꠔꠣꠝ ꠌꠣꠁꠍꠤ,
ꠅꠁꠟꠦ ꠔꠣꠞꠣ ꠢꠥꠘꠟꠣ ꠘꠣ।
৩৮ ꠅ ꠎꠦꠞꠥꠎꠣꠟꠦꠝꠞ ꠛꠣꠡꠤꠘ꠆ꠖꠣ ꠅꠇꠟ,
ꠔꠥꠝꠞꠣꠞ ꠌꠈꠥꠞ ꠍꠣꠝꠘꠦꠃ ꠔꠥꠝꠞꠣꠞ ꠛꠡꠔ ꠈꠣꠘꠣ ꠈꠣꠟꠤ ꠛꠣꠠꠤ ꠅꠁꠛ।
৩৯ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ,
ꠎꠔꠖꠤꠘ ꠔꠥꠝꠞꠣ ꠁꠈꠣꠘ ꠘꠣ ꠇꠁꠛꠣꠄ,
‘ꠝꠥꠛꠣꠞꠇ ꠔꠣꠁꠘꠃ,
ꠀꠟ꠆ꠟꠣꠞ ꠘꠣꠝ ꠟꠁꠀ ꠎꠦꠁꠘ ꠀꠁꠞꠣ,’
ꠅꠔ ꠖꠤꠘ ꠔꠥꠝꠞꠣ ꠀꠞ ꠀꠝꠣꠞꠦ ꠖꠦꠈꠔꠣꠄ ꠘꠣꠄ।”