ꠢꠎꠞꠔ ꠁꠍꠣ ꠝꠃꠔꠞ ꠛꠣꠖꠦ ꠎꠤꠘ꠆ꠖꠣ ꠅꠁꠟꠣ
২৮
১ ꠎꠥꠝ꠆ꠝꠣꠛꠣꠞ ꠡꠦꠡ ꠅꠁꠀ ꠢꠣꠙ꠆ꠔꠣꠞ ꠙꠄꠟꠣ ꠖꠤꠘ ꠚꠎꠞ ꠅꠈꠔꠅ,
ꠝꠉꠖꠤꠟꠤꠘꠤ ꠝꠞꠤꠅꠝ ꠀꠞ ꠅꠁꠘ꠆ꠘ ꠝꠞꠤꠅꠝꠦ ꠢꠎꠞꠔ ꠁꠍꠣꠞ ꠇꠄꠛꠞ ꠖꠦꠈꠣꠔ ꠉꠦꠟꠣ।
২ ꠅꠃ ꠡꠝꠄ ꠀꠈꠔꠣꠃ ꠛꠠ ꠄꠇ ꠜꠂꠍꠣꠟ ꠅꠁꠟ ꠀꠞ ꠀꠍꠝꠣꠘ ꠕꠣꠇꠤ ꠀꠟ꠆ꠟꠣꠞ ꠄꠇ ꠚꠤꠞꠤꠡ꠆ꠔꠣ ꠟꠣꠝꠤꠀ ꠀꠁꠟꠣ।
ꠀꠁꠀ ꠔꠣꠁꠘ ꠇꠄꠛꠞꠞ ꠝꠥꠈꠞ ꠙꠣꠔ꠆ꠔꠞꠐꠣ ꠢꠞꠣꠁꠀ,
ꠄꠞ ꠃꠙꠞꠦ ꠛꠁꠟꠣ।
৩ ꠔꠣꠘ ꠍꠥꠞꠔ ꠀꠍꠤꠟ ꠈꠥꠛ ꠘꠥꠞꠣꠘꠤ ꠀꠞ ꠚꠤꠘ꠆ꠘꠞ ꠇꠣꠙꠠ ꠀꠍꠤꠟ ꠗꠟꠣ ꠌꠇꠌꠇꠣ।
৪ ꠔꠣꠘꠞꠦ ꠖꠦꠈꠤꠀ ꠙꠣꠞꠣꠖꠣꠞ ꠅꠇꠟꠦ ꠒꠞꠣꠁꠀ ꠇꠣꠙꠣ ꠗꠞꠟꠣ ꠀꠞ ꠔꠣꠞꠣ ꠛꠦꠃꠡ ꠅꠁꠀ ꠙꠠꠤ ꠞꠁꠟꠣ।
৫ ꠚꠤꠞꠤꠡ꠆ꠔꠣꠄ ꠅꠃ ꠛꠦꠐꠤꠘ꠆ꠔꠞꠦ ꠇꠁꠟꠣ,
“ꠒꠞꠣꠁꠅ ꠘꠣ ꠉ।
ꠀꠝꠤ ꠎꠣꠘꠤ,
ꠍꠟꠤꠛꠅ ꠟꠐꠇꠣꠁꠀ ꠎꠣꠞꠦ ꠇꠣꠔꠟ ꠇꠞꠣ ꠅꠁꠍꠦ,
ꠔꠥꠝꠞꠣ ꠢꠃ ꠁꠍꠣꠞꠦꠃ ꠔꠥꠇꠣꠁꠞꠣꠄ।
৬ ꠅꠁꠟꠦ ꠔꠣꠁꠘ ꠔ ꠁꠘꠅ ꠘꠣꠄ।
ꠔꠣꠁꠘ ꠎꠦꠟꠣ ꠇꠁꠍꠟꠣ,
ꠅꠟꠣꠃ ꠎꠤꠘ꠆ꠖꠣ ꠅꠁꠀ ꠃꠑꠤ ꠉꠦꠍꠂꠘ।
ꠀꠅ,
ꠔꠣꠘꠞꠦ ꠎꠦ ꠎꠣꠉꠣꠔ ꠢꠥꠔꠣꠁꠀ ꠞꠣꠈꠣ ꠅꠁꠍꠤꠟ,
ꠅꠈꠣꠘ ꠀꠁꠀ ꠖꠦꠈꠅ।
৭ ꠀꠞ ꠔꠥꠝꠞꠣ ꠎꠟꠖꠤ ꠎꠣꠅ,
ꠉꠤꠀ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠇꠅ,
ꠔꠣꠁꠘ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠅꠁꠀ ꠔꠣꠞꠣꠞ ꠀꠉꠦ ꠅꠁꠀ ꠉꠣꠟꠤꠟꠅ ꠎꠣꠁꠞꠣꠉꠤ।
ꠢꠘꠅꠃ ꠔꠣꠘ ꠟꠉꠦ ꠔꠣꠞꠣꠞ ꠖꠦꠈꠣ ꠅꠁꠛ।
ꠢꠥꠘꠅ,
ꠀꠝꠤ ꠀꠉꠦꠃ ꠔꠥꠝꠞꠣꠞꠦ ꠁꠈꠣꠘ ꠎꠣꠘꠣꠁ ꠖꠤꠟꠣꠝ।”
৮ ꠛꠦꠐꠤꠘ꠆ꠔꠦ ꠎꠥꠖꠤꠅ ꠒꠞꠣꠁꠍꠟꠣ,
ꠔꠦꠛꠃ ꠔꠣꠞꠣ ꠈꠥꠡꠤꠞ ꠌꠥꠐꠦ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠁ ꠈꠛꠞ ꠎꠣꠘꠣꠘꠤꠞ ꠟꠣꠉꠤ ꠖꠃꠠꠣꠁꠀ ꠞꠅꠀꠘꠣ ꠅꠁꠟꠣ।
৯ ꠅꠃ ꠡꠝꠄ ꠀꠈꠔꠣꠃ ꠢꠎꠞꠔ ꠁꠍꠣ ꠀꠁꠀ ꠄꠞꠣꠞꠦ ꠍꠣꠟꠣꠝ ꠖꠤꠟꠣ।
ꠟꠉꠦ ꠟꠉꠦ ꠔꠣꠞꠣ ꠔꠣꠘ ꠍꠣꠝꠘꠦ ꠀꠁꠀ ꠙꠣꠅꠔ ꠗꠞꠤꠀ ꠇꠖꠝꠛꠥꠍꠤ ꠇꠞꠟꠣ।
১০ ꠁꠍꠣꠄ ꠔꠣꠞꠣꠞꠦ ꠇꠁꠟꠣ,
“ꠒꠞꠣꠁꠅ ꠘꠣ ꠉ।
ꠔꠥꠝꠞꠣ ꠉꠤꠀ ꠀꠝꠣꠞ ꠜꠣꠁꠀꠂꠘꠞꠦ ꠇꠅ,
ꠔꠣꠞꠣ ꠉꠣꠟꠤꠟꠅ ꠎꠣꠁꠔꠣꠉꠤ।
ꠢꠘꠅ ꠔꠣꠞꠣꠞ ꠟꠉꠦ ꠀꠝꠣꠞ ꠖꠦꠈꠣ ꠅꠁꠛ।”
১১ ꠁꠍꠣꠞ ꠟꠉꠞ ꠛꠣꠔꠌꠤꠔ ꠡꠦꠡ ꠇꠞꠤꠀ ꠔꠣꠞꠣ ꠎꠦꠛꠟꠣ ꠎꠣꠁꠞꠣꠉꠤ,
ꠅꠃ ꠡꠝꠄ ꠢꠃ ꠙꠣꠞꠣꠖꠣꠞꠞ ꠇꠄꠎꠘꠦ ꠐꠣꠃꠘꠅ ꠉꠤꠀ ꠛꠠ ꠁꠝꠣꠝ ꠅꠇꠟꠞꠦ ꠁꠔꠣ ꠢꠇ꠆ꠇꠟꠔꠣ ꠎꠣꠘꠣꠁꠟꠣ।
১২ ꠔꠦꠃ ꠛꠠ ꠁꠝꠣꠝ ꠀꠞ ꠝꠥꠞꠛ꠆ꠛꠤ ꠅꠇꠟ ꠄꠇꠈꠣꠘꠅ ꠖꠟꠣ ꠅꠁꠀ ꠙꠞꠣꠝꠤꠡ ꠇꠞꠟꠣ,
ꠅꠃ ꠙꠣꠞꠣꠖꠣꠞ ꠍꠤꠙꠣꠁ ꠅꠇꠟꠞꠦ ꠛꠃꠔ ꠐꠦꠇꠣ ꠖꠤꠛꠣꠞ ꠟꠣꠉꠤ।
১৩ ꠔꠣꠞꠣ ꠍꠤꠙꠣꠁ ꠅꠇꠟꠞꠦ ꠇꠁꠟꠣ,
“ꠔꠥꠝꠞꠣ ꠇꠁꠅ,
‘ꠀꠝꠞꠣ ꠎꠦꠛꠟꠣ ꠊꠥꠝꠅ ꠀꠍꠟꠣꠝ,
ꠅꠃ ꠡꠝꠄ ꠡꠣꠉꠞꠤꠖ ꠅꠇꠟꠦ ꠀꠁꠀ ꠔꠣꠘ ꠟꠣꠡ ꠌꠥꠞꠤ ꠇꠞꠤ ꠘꠤꠍꠂꠘꠉꠤ।’
১৪ ꠁꠈꠣꠘ ꠎꠥꠖꠤ ꠖꠦꠡꠞ ꠙꠞꠗꠣꠘ ꠢꠣꠇꠤꠝ ꠍꠣꠛꠦ ꠢꠥꠘꠤꠟꠣꠁꠘ,
ꠔꠦ ꠀꠝꠞꠣ ꠔꠣꠘꠞꠦ ꠛꠥꠎ ꠖꠤꠝꠥ,
ꠔꠣꠘ ꠀꠔ ꠕꠣꠇꠤ ꠔꠥꠝꠞꠣꠞꠦ ꠛꠣꠌꠣꠁꠝꠥ।”
১৫ ꠔꠦꠃ ꠙꠣꠞꠣꠖꠣꠞ ꠅꠇꠟꠦ ꠅꠃ ꠐꠦꠇꠣ ꠘꠤꠟꠣ,
ꠀꠞ ꠔꠣꠞꠣꠞꠦ ꠎꠦꠟꠣ ꠢꠤꠇꠣꠁꠟ ꠅꠁꠍꠤꠟ,
ꠅꠟꠣ ꠇꠁꠟꠣ।
ꠅꠈꠘ ꠙꠞ꠆ꠎꠘ꠆ꠔ ꠁ ꠝꠤꠍꠣ ꠇꠕꠣ ꠁꠢꠥꠖꠤ ꠡꠝꠣꠎꠅ ꠞꠐꠣꠁꠟ ꠀꠍꠦ।
ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠀꠈꠦꠞꠤ ꠢꠥꠇꠥꠝ
১৬ ꠁꠍꠣꠄ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠉꠣꠟꠤꠟꠞ ꠎꠦ ꠙꠣꠠꠅ ꠎꠣꠅꠀꠞ ꠇꠕꠣ ꠇꠁꠍꠟꠣ,
ꠢꠃ ꠄꠉꠣꠞꠅꠅ ꠎꠘ ꠍꠣꠢꠣꠛꠤ ꠅꠃ ꠙꠣꠠꠅ ꠀꠁꠟꠣ।
১৭ ꠀꠁꠀ ꠁꠍꠣꠞꠦ ꠖꠦꠈꠤꠀ ꠔꠣꠞꠣ ꠍꠁꠎꠖꠣ ꠇꠞꠟꠣ,
ꠄꠞꠝꠣꠎꠦ ꠇꠄꠎꠘꠞ ꠜꠤꠔꠞꠦ ꠡꠘ꠆ꠖꠄ ꠀꠍꠤꠟ।
১৮ ꠅꠃ ꠡꠝꠄ ꠁꠍꠣ ꠔꠣꠞꠣꠞ ꠇꠣꠘ꠆ꠖꠣꠔ ꠀꠁꠀ ꠇꠁꠟꠣ,
“ꠛꠦꠢꠦꠡ꠆ꠔ ꠀꠞ ꠖꠥꠘꠤꠀꠞ ꠢꠇ꠆ꠇꠟ ꠈꠦꠝꠔꠣ ꠀꠝꠣꠞꠦ ꠖꠦꠅꠀ ꠅꠁꠍꠦ।
১৯ ꠄꠞꠟꠣꠉꠤ ꠔꠥꠝꠞꠣ ꠉꠤꠀ ꠔꠣꠝꠣꠝ ꠎꠣꠔꠤꠞ ꠝꠣꠘꠡꠞꠦ ꠀꠝꠣꠞ ꠃꠝ꠆ꠝꠔ ꠛꠣꠘꠣꠅ।
ꠛꠦꠢꠦꠡ꠆ꠔꠤ ꠛꠣꠛꠣ ꠀꠟ꠆ꠟꠣ ꠙꠣꠇ,
ꠔꠣꠘ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣ,
ꠀꠞ ꠙꠣꠇ ꠞꠥꠢꠥꠞ ꠘꠣꠝꠦ ꠝꠣꠘꠡꠞꠦ ꠔꠞꠤꠇꠣꠞ ꠉꠥꠍꠟ ꠇꠞꠣꠅ।
২০ ꠀꠝꠤ ꠔꠥꠝꠞꠣꠞꠦ ꠎꠦꠔꠣ ꠢꠥꠇꠥꠝ ꠖꠤꠍꠤ,
ꠅꠔꠣ ꠀꠝꠟ ꠇꠞꠣꠞ ꠟꠣꠉꠤ ꠔꠣꠞꠣꠞꠦ ꠔꠣꠟꠤꠝ ꠖꠦꠅ।
ꠝꠘꠅ ꠞꠣꠈꠤꠅ,
ꠇꠤꠀꠝꠔꠞ ꠀꠉ ꠙꠞ꠆ꠎꠘ꠆ꠔ ꠡꠛ ꠡꠝꠄ ꠀꠝꠤ ꠔꠥꠝꠞꠣꠞ ꠟꠉꠦ ꠟꠉꠦ ꠀꠍꠤ।”
ꠀꠝꠤꠘ॥