ꠇꠤꠀꠝꠔꠞ ꠀꠟꠣꠝꠔ
১৩
১ ꠢꠎꠞꠔ ꠁꠍꠣ ꠛꠣꠄꠔꠥꠟ-ꠝꠥꠇꠣꠖ꠆ꠖꠍ ꠕꠣꠇꠤ ꠛꠣꠞꠅꠁꠀ ꠎꠣꠅꠀꠞ ꠛꠣꠟꠣ ꠔꠣꠘ ꠄꠇꠎꠘ ꠍꠣꠢꠣꠛꠤꠄ ꠇꠁꠟꠣ,
“ꠢꠥꠎꠥꠞ,
ꠅꠃ ꠖꠦꠈꠃꠇ꠆ꠇꠣ,
ꠇꠔ ꠛꠠ ꠛꠠ ꠙꠣꠔ꠆ꠔꠞꠞ ꠅꠀꠟ ꠀꠞ ꠡꠥꠘ꠆ꠖꠞ ꠡꠥꠘ꠆ꠖꠞ ꠖꠟꠣꠘ।”
২ ꠔꠣꠁꠘ ꠇꠁꠟꠣ,
“ꠔꠥꠝꠤ ꠅꠃ ꠎꠦꠔꠣ ꠛꠠ ꠛꠠ ꠖꠟꠣꠘ ꠖꠦꠈꠞꠣꠄ,
ꠁꠔꠣꠞ ꠖꠥꠁ ꠙꠣꠔ꠆ꠔꠞ ꠄꠇꠈꠣꠘꠅ ꠟꠣꠉꠣꠁꠟ ꠞꠁꠔ ꠘꠣꠄ,
ꠢꠇꠟꠔꠣ ꠜꠣꠋꠉꠣ ꠅꠁꠎꠤꠛ।”
৩ ꠛꠣꠖꠦ ꠔꠣꠁꠘ ꠎꠦꠛꠟꠣ ꠎꠄꠔꠥꠘ ꠙꠣꠠꠞ ꠃꠙꠞꠦ ꠛꠣꠄꠔꠥꠟ-ꠝꠥꠇꠣꠖ꠆ꠖꠍ ꠇꠣꠛꠣ ꠡꠞꠤꠚ ꠝꠥꠈꠣ ꠛꠅꠀꠔ ꠀꠍꠟꠣ,
ꠅꠃ ꠡꠝꠄ ꠍꠣꠢꠣꠛꠤ ꠙꠤꠔꠞ,
ꠁꠀꠇꠥꠛ,
ꠢꠣꠘ꠆ꠘꠣꠘ ꠀꠞ ꠀꠘ꠆ꠖ꠆ꠞꠤꠀꠍꠦ ꠔꠣꠘꠞꠦ ꠘꠤꠞꠣꠟꠣꠄ ꠎꠤꠇꠣꠁꠟꠣ,
৪ “ꠢꠥꠎꠥꠞ,
ꠀꠝꠞꠣꠞꠦ ꠎꠣꠘꠣꠃꠇ꠆ꠇꠣ,
ꠁꠔꠣ ꠇꠥꠘ ꠡꠝꠄ ꠅꠁꠛ?
ꠇꠥꠘ ꠀꠟꠣꠝꠔ ꠖꠦꠈꠤꠀ ꠀꠝꠞꠣ ꠛꠥꠎꠝꠥ,
ꠁꠔꠣ ꠛꠤꠘꠣꠡ ꠅꠀꠞ ꠡꠝꠄ ꠀꠁꠌ꠆ꠍꠦ?”
৫ ꠔꠣꠁꠘ ꠇꠁꠟꠣ,
“ꠖꠦꠈꠤꠅ,
ꠇꠦꠃ ꠎꠣꠘꠥ ꠔꠥꠝꠞꠣꠞꠦ ꠘꠣ ꠐꠉꠦ।
৬ ꠛꠃꠔ ꠎꠘꠦ ꠀꠝꠣꠞ ꠘꠣꠝ ꠗꠞꠤꠀ ꠀꠁꠀ ꠇꠁꠛ,
ꠀꠝꠤꠃ ꠢꠦꠁꠘ,
ꠇꠁꠀ ꠛꠃꠔꠞꠦ ꠐꠉꠤꠛ।
৭ ꠅꠁꠟꠦ ꠎꠥꠖ꠆ꠖꠞ ꠀꠅꠀꠎ ꠀꠞ ꠟꠣꠠꠣꠁꠞ ꠈꠛꠞ ꠢꠥꠘꠤꠀ ꠔꠥꠝꠞꠣ ꠒꠞꠣꠁꠅ ꠘꠣ।
ꠁꠔꠣ ꠘꠤꠌꠄ ꠊꠐꠛ,
ꠊꠐꠟꠦꠅ ꠁꠔꠣ ꠔ ꠡꠦꠡ ꠘꠣꠄ।
৮ ꠄꠇ ꠎꠣꠔꠤꠄ ꠀꠞꠇ ꠎꠣꠔꠤꠞ ꠟꠉꠦ,
ꠄꠇ ꠖꠦꠡꠦ ꠀꠞꠇ ꠖꠦꠡꠞ ꠟꠉꠦ ꠟꠣꠠꠣꠁ ꠇꠞꠛ।
ꠛꠃꠔ ꠎꠣꠉꠣꠔ ꠜꠂꠍꠣꠟ ꠀꠞ ꠘꠤꠖꠣꠘ ꠖꠦꠈꠣ ꠖꠤꠛ।
ꠅꠁꠟꠦ ꠁꠔꠣ ꠔ ꠈꠣꠟꠤ ꠝꠍꠤꠛꠔꠞ ꠡꠥꠞꠥ।
৯ “ꠔꠥꠝꠞꠣ ꠘꠤꠎꠞ ꠛꠦꠙꠣꠞꠦ ꠢꠥꠡꠤꠀꠞ ꠞꠁꠅ।
ꠝꠣꠘꠡꠦ ꠔꠥꠝꠞꠣꠞꠦ ꠗꠞꠤꠀ ꠛꠤꠌꠣꠞꠞ ꠀꠖꠣꠟꠔꠅ ꠡꠝꠎꠣꠁꠛ।
ꠝꠍꠤꠖꠞ ꠜꠤꠔꠞꠦ ꠔꠥꠝꠞꠣꠞꠦ ꠍꠤꠋꠟꠣꠖꠤ ꠝꠣꠞꠣ ꠅꠁꠛ।
ꠀꠝꠣꠞ ꠟꠣꠉꠤ ꠔꠥꠝꠞꠣꠞꠦ ꠖꠦꠡꠞ ꠞꠣꠎꠣ-ꠛꠣꠖꠡꠣꠞ ꠍꠣꠝꠘꠦ ꠘꠦꠅꠀ ꠅꠁꠛ।
ꠔꠥꠝꠞꠣ ꠄꠞꠣꠞ ꠍꠣꠝꠘꠦ ꠀꠝꠣꠞ ꠛꠦꠙꠣꠞꠦ ꠡꠣꠇ꠆ꠇꠤ ꠖꠤꠛꠣꠄ।
১০ ꠙꠄꠟꠣ ꠖꠥꠘꠤꠀꠞ ꠔꠣꠝꠣꠝ ꠎꠣꠔꠤꠞ ꠉꠦꠍꠦ ꠀꠟ꠆ꠟꠣꠞ ꠖꠦꠅꠀ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠣ ꠎꠞꠥꠞ।
১১ ꠔꠥꠝꠞꠣꠞꠦ ꠗꠞꠤꠀ ꠎꠦꠛꠟꠣ ꠛꠤꠌꠣꠞꠅ ꠘꠦꠅꠀ ꠅꠁꠛ,
ꠅꠃ ꠡꠝꠄ ꠇꠤꠔꠣ ꠎꠥꠀꠙ ꠖꠤꠔꠣꠄ,
ꠁꠔꠣ ꠟꠁꠀ ꠀꠉꠦ ꠇꠥꠘꠥ ꠌꠤꠘ꠆ꠔꠣ ꠇꠞꠤꠅ ꠘꠣ।
ꠢꠃ ꠡꠝꠄ ꠔꠥꠝꠞꠣꠞꠦ ꠎꠦꠔꠣ ꠢꠤꠇꠣꠁꠀ ꠖꠦꠅꠀ ꠅꠁꠛ,
ꠔꠥꠝꠞꠣ ꠅꠔꠣꠃ ꠇꠁꠅ।
ꠀꠍꠟꠦ ꠔꠥꠝꠞꠣ ꠔ ꠢꠤꠘꠅ ꠝꠣꠔꠔꠣꠄ ꠘꠣꠄ,
ꠙꠣꠇ ꠞꠥꠢꠦꠃ ꠝꠣꠔꠤꠛꠣ।
১২ ꠜꠣꠁꠄ ꠜꠣꠁꠞꠦ,
ꠛꠣꠚꠦ ꠙꠥꠀꠞꠦ ꠎꠣꠘꠦ ꠝꠣꠞꠣꠞ ꠟꠣꠉꠤ ꠗꠞꠣꠁ ꠖꠤꠛ।
ꠙꠥꠀ-ꠙꠥꠠꠤꠄ ꠀꠙꠘ ꠝꠣ-ꠛꠣꠚꠞ ꠛꠤꠞꠥꠖ꠆ꠖꠦ ꠉꠤꠀ,
ꠝꠣ-ꠛꠣꠚꠞꠦ ꠈꠥꠘ ꠇꠞꠣꠁꠛ।
১৩ ꠀꠞ ꠀꠝꠣꠞ ꠟꠣꠉꠤ ꠢꠇꠟꠦ ꠔꠥꠝꠞꠣꠞꠦ ꠊꠤꠘ꠆ꠘꠣꠁꠛ,
ꠅꠁꠟꠦ ꠢꠦꠡ ꠙꠞ꠆ꠎꠘ꠆ꠔ ꠎꠦ ꠐꠤꠇꠤꠀ ꠞꠁꠛ,
ꠢꠦ ꠞꠦꠢꠣꠁ ꠙꠣꠁꠛ।
১৪ “ꠎꠦ ꠔꠤꠟꠣꠅꠔ ꠇꠞꠦꠞ ꠢꠦ ꠛꠥꠎꠃꠇ,
ꠛꠦꠎꠥꠁꠔꠣ ꠝꠍꠤꠛꠔꠞ ꠊꠤꠘ꠆ꠘꠣꠞ ꠁ ꠌꠤꠎ ꠎꠦ ꠎꠣꠉꠣꠔ ꠀꠅꠀꠞ ꠇꠕꠣ ꠘꠣꠄ,
ꠁ ꠌꠤꠎꠞꠦ ꠎꠦꠛꠟꠣ ꠅꠘꠅ ꠖꠦꠈꠛꠣꠄ,
ꠅꠃ ꠡꠝꠄ ꠎꠦꠞꠣ ꠄꠢꠥꠖꠤꠀ ꠎꠤꠟꠣꠔ ꠀꠍꠂꠘ,
ꠔꠣꠞꠣ ꠜꠣꠉꠤꠀ ꠙꠣꠠꠤꠀ ꠄꠟꠣꠇꠣꠔ ꠎꠣꠃꠇ।
১৫ ꠍꠣꠔꠞ ꠃꠙꠞꠦ ꠎꠦꠞꠣ ꠞꠁꠛꠣ,
ꠔꠣꠞꠣ ꠟꠣꠝꠣꠔ ꠟꠣꠝꠤꠀ ꠇꠥꠘ꠆ꠔꠣ ꠘꠦꠅꠀꠞ ꠟꠣꠉꠤ ꠊꠞꠞ ꠜꠤꠔꠞꠦ ꠀꠞ ꠘꠣ ꠢꠣꠝꠣꠃꠇ।
১৬ ꠈꠦꠔꠞ ꠝꠣꠎꠦ ꠎꠦꠞꠣ ꠞꠁꠛꠣ,
ꠔꠣꠞꠣꠞ ꠉꠔꠞꠞ ꠌꠣꠖ꠆ꠖꠞ ꠘꠦꠅꠀꠞ ꠟꠣꠉꠤ ꠛꠣꠠꠤꠔ ꠘꠣ ꠀꠃꠇ।
১৭ ꠅꠃ ꠡꠝꠄ ꠎꠦꠔꠣ ꠛꠦꠐꠤꠘ꠆ꠔꠞ ꠢꠥꠞꠥꠔ꠆ꠔꠣ ꠅꠁꠔꠣ,
ꠀꠞ ꠎꠦꠞꠣ ꠢꠥꠞꠥꠔ꠆ꠔꠣꠞꠦ ꠛꠥꠇꠥꠞ ꠖꠥꠗ ꠈꠣꠅꠀꠁꠞꠣ,
ꠔꠣꠞꠣꠞ ꠛꠠ ꠎꠛꠞ ꠝꠍꠤꠛꠔ ꠅꠁꠛ।
১৮ ꠔꠥꠝꠞꠣ ꠖꠥꠀ ꠇꠞꠅ,
ꠁꠔꠣ ꠎꠣꠘꠥ ꠡꠤꠔꠞ ꠖꠤꠘꠅ ꠘꠣ ꠅꠄ।
১৯ ꠅꠃ ꠡꠝꠄ ꠔ ꠅꠔ ꠛꠦꠎꠥꠁꠔꠣ ꠇꠡ꠆ꠐ ꠅꠁꠛ,
ꠎꠦꠔꠣ ꠖꠥꠘꠤꠀꠞ ꠙꠄꠟꠣ ꠕꠘꠦ ꠀꠁꠎ ꠙꠞ꠆ꠎꠘ꠆ꠔ ꠇꠥꠘꠥꠖꠤꠘ ꠅꠁꠍꠦ ꠘꠣ,
ꠀꠞ ꠇꠥꠘꠥꠖꠤꠘ ꠅꠁꠔ-ꠅ ꠘꠣꠄ।
২০ ꠝꠣꠛꠥꠖꠦ ꠎꠥꠖꠤ ꠁ ꠡꠝꠄꠞꠦ ꠇꠝꠣꠁꠀ ꠘꠣ ꠖꠤꠔꠣ,
ꠔꠦ ꠇꠦꠃ ꠎꠤꠘ꠆ꠖꠣ ꠞꠁꠟ ꠘꠣ ꠅꠘꠦ।
ꠅꠁꠟꠦ ꠀꠟ꠆ꠟꠣꠄ ꠔꠣꠘ ꠙꠍꠘ꠆ꠖ ꠇꠞꠣ ꠛꠘ꠆ꠖꠣ ꠅꠇꠟꠞ ꠟꠣꠉꠤ ꠁ ꠡꠝꠄ ꠇꠝꠣꠁ ꠖꠤꠍꠂꠘ।
২১ ꠢꠤ ꠡꠝꠄ ꠇꠦꠃ ꠎꠥꠖꠤ ꠔꠥꠝꠞꠣꠞꠦ ꠇꠄ,
ꠢꠥꠘꠍ ꠘꠤ,
ꠀꠟ-ꠝꠍꠤ ꠅꠘꠅ ꠀꠁꠍꠂꠘ,
ꠛꠣ ꠖꠦꠈꠅ,
ꠅꠃꠘꠥ ꠔꠣꠁꠘ,
ꠔꠦ ꠔꠥꠝꠞꠣ ꠁꠔꠣ ꠄꠇꠤꠘ ꠇꠞꠤꠅ ꠘꠣ।
২২ ꠇꠣꠞꠘ ꠛꠃꠔ ꠜꠘ꠆ꠒꠄ ꠀꠁꠀ ꠇꠁꠛ,
ꠀꠝꠤꠃ ꠀꠟ-ꠝꠍꠤ,
ꠀꠞ ꠛꠃꠔ ꠜꠘ꠆ꠒ ꠘꠛꠤꠅ ꠀꠁꠛꠣ।
ꠡꠝ꠆ꠛꠛ ꠅꠁꠟꠦ ꠔꠣꠞꠣ ꠀꠟ꠆ꠟꠣꠞ ꠙꠍꠘ꠆ꠖ ꠇꠞꠣ ꠛꠘ꠆ꠖꠣ ꠅꠇꠟꠞꠦꠅ ꠗꠥꠇꠣ ꠖꠤꠀ ꠛꠦ-ꠙꠕꠦ ꠘꠤꠔꠣ ꠇꠞꠤ ꠛꠃꠔ ꠇꠦꠞꠣꠝꠔꠤ-ꠝꠥꠎꠦꠎꠣ ꠖꠦꠈꠣꠁꠛꠣ।
২৩ ꠅꠁꠟꠦ ꠔꠥꠝꠞꠣ ꠢꠥꠡꠤꠀꠞ ꠞꠁꠅ,
ꠀꠝꠤ ꠔ ꠔꠥꠝꠞꠣꠞꠦ ꠀꠉꠦꠃ ꠁꠔꠣ ꠢꠣꠟ-ꠢꠇꠤꠇꠔ ꠎꠣꠘꠣꠁ ꠖꠤꠟꠣꠝ।
২৪ “ꠅꠃ ꠝꠍꠤꠛꠔꠞ ꠡꠝꠄ ꠙꠣꠞꠘꠤꠞ ꠛꠣꠖꠦ,
ꠡꠥꠞꠥꠎ ꠀꠘ꠆ꠖꠣꠁꠞ ꠅꠁꠎꠤꠛ,
ꠌꠣꠘ꠆ꠖꠦ ꠀꠞ ꠚꠞ ꠖꠤꠔ ꠘꠣꠄ।
২৫ ꠔꠦꠞꠣ ꠅꠇꠟ ꠀꠍꠝꠣꠘ ꠕꠣꠇꠤ ꠈꠥꠟꠤꠀ ꠙꠠꠤꠎꠤꠛ,
ꠀꠍꠝꠣꠘꠞ ꠇꠥꠘꠥ ꠡꠇ꠆ꠔꠤꠀꠟꠣ ꠌꠤꠎꠃ
ꠑꠤꠇ-ꠑꠣꠇ ꠞꠁꠔ ꠘꠣꠄ।
২৬ ꠅꠃ ꠡꠝꠄ ꠝꠣꠘꠡꠦ ꠖꠦꠈꠛꠣ,
ꠛꠤꠘ-ꠀꠖꠝꠦ ꠀꠟ꠆ꠟꠣꠞ ꠇꠥꠖꠞꠔꠤ ꠎꠣꠟꠣꠟ ꠀꠞ ꠡꠣꠘ-ꠔꠎꠟ꠆ꠟꠤꠄ,
ꠝꠦꠊꠞ ꠐꠥꠇꠞꠣꠔ ꠅꠁꠀ ꠖꠥꠘꠤꠀꠔ ꠔꠡꠞꠤꠚ ꠀꠘꠞꠣ।
২৭ ꠔꠣꠁꠘ ꠚꠤꠞꠤꠡ꠆ꠔꠣ ꠅꠇꠟꠞꠦ ꠖꠥꠘꠤꠀꠞ ꠄꠇ ꠝꠣꠕꠣ ꠕꠣꠇꠤ ꠀꠞꠇ ꠝꠣꠕꠣꠔ ꠙꠣꠑꠣꠁꠀ,
ꠀꠟ꠆ꠟꠣꠞ ꠙꠍꠘ꠆ꠖ ꠇꠞꠣ ꠛꠘ꠆ꠖꠣ ꠅꠇꠟꠞꠦ ꠌꠣꠁꠞꠅꠛꠣꠄ ꠕꠘꠦ ꠖꠟꠣ ꠇꠞꠛꠣ।
২৮ “ꠒꠥꠝꠥꠞ ꠉꠣꠍꠞ ꠛꠣꠄ ꠌꠣꠁꠀ ꠁꠟꠤꠝ ꠇꠣꠝꠣꠁ ꠇꠞꠅ।
ꠉꠣꠍꠞ ꠒꠣꠟ-ꠙꠣꠟꠣ ꠘꠞꠝ ꠅꠁꠀ ꠎꠦꠛꠟꠣ ꠘꠄꠀ ꠇꠥꠠꠤ ꠛꠣꠞꠅꠄ,
ꠅꠃ ꠡꠝꠄ ꠔꠥꠝꠞꠣ ꠛꠥꠎꠤꠟꠣꠅ ꠉꠞꠝꠞ ꠖꠤꠘ ꠀꠁꠌ꠆ꠍꠦ।
২৯ ꠔꠦ ꠅꠃ ꠟꠣꠈꠣꠘ ꠔꠥꠝꠞꠣ ꠎꠦꠛꠟꠣ ꠖꠦꠈꠛꠣꠄ ꠁꠔꠣ ꠢꠇꠟꠔꠣ ꠊꠐꠦꠞ,
ꠖꠦꠈꠤꠀ ꠛꠥꠎꠤꠟꠤꠅ,
ꠛꠤꠘ-ꠀꠖꠝꠅ ꠗꠣꠞꠅ ꠀꠁꠌ꠆ꠍꠂꠘ।
ꠈꠣꠟꠤ ꠗꠣꠞꠅ ꠘꠣꠄ,
ꠔꠣꠁꠘ ꠀꠁꠀ ꠖꠥꠀꠞꠅ ꠑꠥꠇꠣꠁꠞꠣ।
৩০ ꠀꠝꠤ ꠔꠥꠝꠞꠣꠞꠦ ꠢꠇ ꠇꠕꠣ ꠇꠁꠞꠣꠝ,
ꠁꠔꠣ ꠘꠣ ꠊꠐꠣ ꠙꠞ꠆ꠎꠘ꠆ꠔ ꠁ ꠎꠝꠣꠘꠣꠞ ꠝꠣꠘꠥꠡ ꠚꠥꠠꠣꠁꠔꠣ ꠘꠣꠄ।
৩১ ꠀꠍꠝꠣꠘ-ꠎꠝꠤꠘ ꠢꠇꠟꠔꠣ ꠛꠤꠘꠣꠡ ꠅꠁꠎꠤꠛ,
ꠅꠁꠟꠦ ꠀꠝꠣꠞ ꠇꠣꠟꠣꠝ ꠢꠣꠝꠦꠡꠣ ꠇꠣꠁꠝ ꠞꠁꠛ।
৩২ “ꠢꠃ ꠖꠤꠘ ꠀꠞ ꠢꠤ ꠡꠝꠄꠅꠞ ꠛꠦꠙꠣꠞꠦ ꠈꠣꠟꠤ ꠀꠝꠣꠞ ꠉꠣꠁꠛꠤ ꠛꠣꠚ ꠛꠣꠖꠦ ꠀꠞ ꠇꠦꠃ ꠎꠣꠘꠂꠘ ꠘꠣ।
ꠀꠍꠝꠣꠘꠤ ꠚꠤꠞꠤꠡ꠆ꠔꠣ ꠛꠣ ꠈꠣꠍ ꠝꠣꠄꠀꠞ ꠎꠘꠦꠅ ꠎꠣꠘꠂꠘ ꠘꠣ।
৩৩ ꠔꠥꠝꠞꠣ ꠢꠥꠡꠤꠀꠞ ꠅꠅ,
ꠈꠤꠀꠟ ꠇꠞꠤ ꠌꠟꠅ ꠀꠞ ꠖꠥꠀ ꠇꠞꠅ।
ꠢꠤ ꠖꠤꠘ ꠇꠥꠘ ꠡꠝꠄ ꠀꠁꠛ,
ꠔꠥꠝꠞꠣ ꠇꠦꠃ ꠔ ꠎꠣꠘꠅ ꠘꠣ।
৩৪ ꠅꠟꠣ ꠄꠇ ꠝꠣꠘꠡꠞ ꠟꠣꠈꠣꠘ ꠢꠤ ꠖꠤꠘ ꠀꠁꠛ,
ꠎꠦꠁꠘ ꠛꠤꠖꠦꠡ ꠎꠣꠅꠀꠞ ꠡꠝꠄ ꠔꠣꠘ ꠉꠥꠟꠣꠝ ꠅꠇꠟꠞ ꠀꠔꠅ ꠢꠇꠟꠔꠣ ꠡꠝꠎꠣꠁ ꠖꠤꠀ ꠎꠣꠞꠎꠤꠞ ꠇꠣꠝ ꠛꠥꠎꠣꠁ ꠖꠤꠟꠣ।
ꠀꠞ ꠌꠇꠤꠖꠣꠞꠞꠦ ꠇꠁꠟꠣ ꠢꠎꠣꠉ ꠞꠁꠔ।
৩৫ ꠔꠥꠝꠞꠣꠅ ꠅꠃꠟꠣ ꠢꠎꠣꠉ ꠞꠁꠅ।
ꠛꠣꠠꠤꠞ ꠝꠣꠟꠤꠇ ꠇꠥꠘ ꠡꠝꠄ ꠀꠁꠛꠣ,
ꠢꠣꠁꠘ꠆ꠎꠣꠛꠣꠟꠣ,
ꠝꠣꠎ ꠞꠣꠁꠔꠦ,
ꠙꠔꠣꠛꠣꠟꠣ ꠘꠣ ꠚꠎꠞꠦ ꠀꠁꠛꠣ,
ꠁꠈꠣꠘ ꠔ ꠔꠥꠝꠞꠣ ꠇꠦꠃ ꠎꠣꠘꠅ ꠘꠣ।
৩৬ ꠔꠣꠁꠘ ꠀꠈꠔꠣ ꠀꠁꠟꠦ ꠎꠣꠘꠥ ꠘꠣ ꠖꠦꠈꠂꠘ,
ꠔꠥꠝꠞꠣ ꠊꠥꠝꠣꠁ ꠞꠁꠍ।
৩৭ ꠀꠝꠤ ꠔꠥꠝꠞꠣꠞꠦ ꠎꠦꠟꠣ ꠇꠁꠟꠣꠝ,
ꠢꠇꠟꠞꠦꠃ ꠅꠃꠟꠣ ꠇꠁꠞꠣꠝ,
ꠢꠎꠣꠉ ꠞꠅ।”