ꠢꠎꠞꠔ ꠁꠍꠣꠞ ꠖꠥꠈ-ꠇꠡ꠆ꠐ ꠀꠞ ꠝꠃꠔ (১৪:১-১৫:৪৭)
ꠢꠎꠞꠔ ꠁꠍꠣꠞꠦ ꠢꠣꠎꠣꠘꠤꠞ ꠜꠦꠖ
১৪
১ ꠀꠎꠣꠖꠤ ꠁꠖ ꠀꠞ ꠈꠣꠝꠤꠞ ꠍꠣꠠꠣ ꠞꠥꠐꠤꠞ ꠁꠖꠞ ꠈꠣꠟꠤ ꠖꠥꠁ ꠖꠤꠘ ꠛꠣꠇꠤ ꠞꠁꠍꠦ।
ꠛꠠ ꠁꠝꠣꠝ ꠀꠞ ꠝꠃꠟꠣꠘꠣ ꠅꠇꠟꠦ,
ꠢꠎꠞꠔ ꠁꠍꠣꠞꠦ ꠝꠣꠘꠡꠞ ꠀꠚꠞꠈꠦ ꠗꠞꠤꠀ ꠇꠣꠔꠟ ꠇꠞꠣꠞ ꠗꠣꠘ꠆ꠖꠣ ꠟꠣꠉꠣꠁꠟꠣ।
২ ꠔꠣꠞꠣ ꠇꠁꠟꠣ,
“ꠁꠖꠞ ꠡꠝꠄ ꠔꠣꠞꠦ ꠗꠞꠔꠣꠝ ꠘꠣꠄ।
ꠗꠞꠟꠦ ꠝꠣꠘꠡꠦ ꠉꠘ꠆ꠒꠉꠥꠟ ꠟꠣꠉꠣꠁ ꠖꠤꠔ ꠙꠣꠞꠦ।”
৩ ꠁꠍꠣ ꠅꠃ ꠡꠝꠄ ꠛꠣꠄꠔ-ꠀꠘꠤꠀ ꠉꠣꠃꠞ ꠙꠌꠣ-ꠇꠥꠡ꠆ꠑ ꠛꠦꠝꠣꠞꠤ ꠍꠣꠁꠝꠘꠞ ꠛꠣꠠꠤꠔ ꠀꠍꠟꠣ।
ꠅꠘꠅ ꠛꠁꠀ ꠔꠣꠁꠘ ꠈꠣꠘꠣ ꠈꠣꠁꠞꠣ,
ꠀꠈꠔꠣꠃ ꠄꠇ ꠛꠦꠐꠤ ꠝꠣꠘꠡꠦ ꠌꠤꠘꠞ ꠄꠇ ꠛꠥꠔꠟꠅ ꠇꠞꠤ ꠈꠥꠛ ꠖꠣꠝꠤ ꠈꠣꠐꠤ ꠀꠔꠞ ꠟꠁꠀ ꠀꠁꠀ,
ꠛꠥꠔꠟ ꠜꠣꠋꠉꠤꠀ ꠢꠇꠟ ꠀꠔꠞ ꠔꠣꠘ ꠝꠣꠕꠣꠔ ꠓꠣꠟꠤ ꠖꠤꠟ।
৪ ꠁꠔꠣ ꠖꠦꠈꠤꠀ ꠢꠤꠘꠅ ꠀꠎꠤꠞ ꠇꠥꠘꠥ ꠇꠥꠘꠥ ꠎꠘꠦ ꠘꠣ-ꠈꠥꠡ ꠅꠁꠀ ꠄꠇꠦ-ꠅꠁꠘ꠆ꠘꠦ ꠇꠂꠟ,
“ꠁ ꠀꠔꠞ ꠚꠥꠐꠣꠁꠘ ꠇꠦꠘꠦ ꠛꠞꠛꠣꠖ ꠇꠞꠣ ꠅꠁꠟ?
৫ ꠁ ꠚꠥꠐꠤꠘ ꠛꠦꠌꠤꠟꠦ ꠔ ꠔꠤꠘꠡ ꠖꠤꠘꠣꠞ ꠙꠣꠁꠀ ꠉꠞꠤꠛ ꠅꠇꠟꠞꠦ ꠛꠤꠟꠣꠁ ꠖꠦꠅꠀ ꠉꠦꠟ ꠅꠘꠦ।”
ꠅꠔꠣꠞ ꠟꠣꠉꠤ ꠔꠣꠞꠣ ꠛꠦꠐꠤꠞꠦ ꠛꠇꠣ-ꠎꠇꠣ ꠇꠞꠟꠣ।
৬ ꠅꠁꠟꠦ ꠁꠍꠣꠄ ꠇꠁꠟꠣ,
“ꠅꠁꠍꠦ,
ꠔꠣꠘꠞꠦ ꠀꠞ ꠇꠥꠘ꠆ꠔꠣ ꠇꠁꠅ ꠘꠣ।
ꠔꠣꠁꠘ ꠔ ꠀꠝꠣꠞ ꠟꠣꠉꠤ ꠈꠥꠛ ꠡꠥꠘ꠆ꠖꠞ ꠇꠣꠝ ꠇꠞꠍꠂꠘ।
৭ ꠉꠞꠤꠛ ꠅꠇꠟ ꠔ ꠢꠣꠝꠦꠡꠣꠃ ꠔꠥꠝꠞꠣꠞ ꠟꠉꠦ ꠞꠁꠛꠣ।
ꠔꠥꠝꠞꠣꠞ ꠎꠦꠛꠟꠣ ꠝꠘꠦ ꠌꠣꠄ ꠔꠣꠞꠣꠞꠦ ꠡꠣꠁꠎ꠆ꠎ ꠇꠞꠔꠣꠄ ꠙꠣꠞꠛꠣꠄ।
ꠅꠁꠟꠦ ꠀꠝꠣꠞꠦ ꠔ ꠢꠣꠝꠦꠡꠣ ꠙꠣꠁꠔꠣꠄ ꠘꠣꠄ।
৮ ꠛꠦꠌꠣꠞꠤꠄ ꠎꠦꠈꠣꠘ ꠙꠣꠞꠍꠂꠘ ꠅꠈꠣꠘꠃ ꠇꠞꠍꠂꠘ।
ꠄꠁꠘ ꠀꠁꠀ ꠀꠝꠣꠞ ꠉꠔꠞꠅ ꠀꠔꠞ ꠓꠣꠟꠤꠀ,
ꠖꠣꠚꠘ-ꠇꠣꠚꠘꠞ ꠟꠣꠉꠤ ꠀꠝꠣꠞꠦ ꠀꠉꠦꠃ ꠎꠥꠁꠔ ꠇꠞꠍꠂꠘ।
৯ ꠀꠝꠤ ꠔꠥꠝꠞꠣꠞꠦ ꠢꠇ ꠇꠕꠣ ꠇꠁꠀꠞ,
ꠖꠥꠘꠤꠀꠞ ꠎꠦꠇꠥꠘꠥ ꠎꠣꠉꠣꠔ ꠀꠟ꠆ꠟꠣꠞ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠣꠞ ꠡꠝꠄ,
ꠅꠃ ꠛꠦꠌꠣꠞꠤꠞꠦ ꠝꠘꠅ ꠇꠞꠣꠞ ꠟꠣꠉꠤ,
ꠔꠣꠘ ꠁ ꠇꠣꠝꠞ ꠇꠕꠣ ꠈꠣꠘꠅ ꠇꠅꠀ ꠎꠣꠁꠛ।”
১০ ꠛꠣꠖꠦ ꠔꠣꠘ ꠛꠣꠞꠅꠎꠘ ꠍꠣꠢꠣꠛꠤꠞ ꠝꠣꠎꠞ ꠄꠇꠎꠘ,
ꠄꠘ ꠘꠣꠝ ꠁꠢꠥꠖꠣ ꠁꠡ꠆ꠇꠣꠞꠤꠀꠔ,
ꠄꠁꠘ ꠁꠍꠣꠞꠦ ꠗꠞꠣꠁꠀ ꠖꠦꠅꠀꠞ ꠟꠣꠉꠤ ꠛꠠ ꠁꠝꠣꠝ ꠅꠇꠟꠞ ꠉꠦꠍꠦ ꠉꠦꠟꠣ।
১১ ꠁꠝꠣꠝ ꠅꠇꠟꠦ ꠢꠥꠘꠤꠀ ꠈꠥꠛ ꠈꠥꠡꠤ ꠅꠁꠀ ꠇꠁꠟꠣ,
“ꠔꠣꠞꠦ ꠗꠞꠣꠁꠀ ꠖꠤꠟꠦ ꠔꠥꠝꠣꠞꠦ ꠐꠦꠇꠣ ꠖꠤꠝꠥ।”
ꠔꠦꠃ ꠁꠢꠥꠖꠣꠄ ꠔꠣꠘꠞꠦ ꠗꠞꠣꠁ ꠖꠦꠅꠀꠞ ꠡꠥꠎꠥꠉ ꠔꠥꠇꠣꠘꠤꠔ ꠞꠁꠟ।
ꠢꠎꠞꠔ ꠁꠍꠣꠞ ꠀꠈꠦꠞꠤ ꠁꠖ
১২ ꠈꠣꠝꠤꠞ ꠍꠣꠠꠣ ꠞꠥꠐꠤꠞ ꠁꠖꠞ ꠙꠄꠟꠣ ꠖꠤꠘ,
ꠀꠎꠣꠖꠤ ꠁꠖꠞ ꠟꠣꠉꠤ ꠝꠦꠠꠣꠞ ꠛꠣꠁꠌ꠆ꠌꠣ ꠎꠛꠅ ꠇꠞꠣ ꠅꠁꠔ।
ꠄꠞꠖꠣꠄ ꠍꠣꠢꠣꠛꠤ ꠅꠇꠟꠦ ꠁꠍꠣꠞꠦ ꠎꠤꠇꠣꠁꠟꠣ,
“ꠢꠥꠎꠥꠞ,
ꠀꠝꠞꠣ ꠇꠥꠘ ꠎꠣꠉꠣꠔ ꠉꠤꠀ ꠀꠙꠘꠣꠞ ꠟꠣꠉꠤ ꠁꠖꠞ ꠈꠣꠘꠣ ꠔꠤꠀꠞ ꠇꠞꠔꠣꠝ?”
১৩ ꠅꠃ ꠁꠍꠣꠄ ꠔꠣꠘ ꠖꠥꠁꠎꠘ ꠍꠣꠢꠣꠛꠤꠞꠦ ꠇꠁꠟꠣ,
“ꠔꠥꠝꠞꠣ ꠐꠣꠃꠘꠅ ꠎꠣꠅ।
ꠉꠤꠀ ꠖꠦꠈꠛꠣꠄ ꠢꠘꠅ ꠄꠇ ꠛꠦꠐꠣ ꠝꠣꠘꠡꠦ ꠈꠂꠟꠣꠖꠤ ꠙꠣꠘꠤ ꠜꠞꠤꠀ ꠘꠤꠞꠣ।
ꠔꠥꠝꠞꠣ ꠔꠣꠘ ꠈꠞꠦ ꠈꠞꠦ ꠎꠣꠁꠅ।
১৪ ꠔꠣꠁꠘ ꠎꠦ ꠛꠣꠠꠤꠔ ꠉꠤꠀ ꠢꠣꠝꠣꠁꠛꠣ,
ꠢꠃ ꠛꠣꠠꠤꠞ ꠝꠣꠟꠤꠇꠞꠦ ꠔꠥꠝꠞꠣ ꠇꠁꠅ,
‘ꠍꠣꠛ,
ꠝꠥꠞꠡꠤꠖꠦ ꠇꠁꠍꠂꠘ,
ꠍꠣꠢꠣꠛꠤ ꠅꠇꠟꠞꠦ ꠟꠁꠀ ꠀꠝꠤ ꠎꠦꠈꠣꠘꠅ ꠀꠎꠣꠖꠤ ꠁꠖꠞ ꠈꠣꠘꠣ ꠈꠣꠁꠔꠣꠝ,
ꠢꠃ ꠝꠥꠍꠣꠚꠤꠞꠈꠣꠘꠣ ꠈꠣꠘ ꠖꠦꠈꠣꠁ ꠖꠦꠃꠇ꠆ꠇꠣ।’
১৫ ꠔꠣꠁꠘ ꠔꠥꠝꠞꠣꠞꠦ ꠃꠙꠞ ꠔꠣꠟꠣꠔ ꠢꠣꠎꠣꠁꠟ-ꠙꠣꠠꠣꠁꠟ ꠄꠇ ꠛꠠ ꠇꠥꠑꠣ ꠖꠦꠈꠣꠁ ꠖꠤꠛꠣ।
ꠔꠥꠝꠞꠣ ꠅꠘꠅ ꠢꠇꠟꠔꠣ ꠔꠤꠀꠞ ꠇꠞꠤꠅ।”
১৬ ꠔꠦꠃ ꠍꠣꠢꠣꠛꠤ ꠅꠇꠟ ꠉꠤꠀ ꠐꠣꠃꠘꠅ ꠢꠣꠝꠣꠁꠟꠣ।
ꠢꠣꠝꠣꠁꠀ ꠁꠍꠣꠄ ꠎꠦꠟꠣꠈꠣꠘ ꠇꠁꠍꠟꠣ,
ꠑꠤꠇ ꠅꠃ ꠟꠣꠈꠣꠘ ꠢꠇꠟꠔꠣ ꠙꠣꠁꠟꠣ ꠀꠞ ꠁꠖꠞ ꠈꠣꠘꠣ ꠔꠤꠀꠞ ꠇꠞꠟꠣ।
১৭ ꠢꠣꠁꠘ꠆ꠎꠣꠛꠣꠟꠣ ꠁꠍꠣꠄ ꠔꠣꠘ ꠛꠣꠞꠅꠎꠘ ꠍꠣꠢꠣꠛꠤꠞꠦ ꠟꠁꠀ ꠅꠘꠅ ꠀꠁꠟꠣ।
১৮ ꠀꠁꠀ ꠈꠣꠘꠤ ꠈꠣꠅꠀꠞ ꠡꠝꠄ ꠔꠣꠁꠘ ꠇꠁꠟꠣ,
“ꠀꠝꠤ ꠔꠥꠝꠞꠣꠞꠦ ꠢꠇ ꠇꠕꠣ ꠇꠁꠞꠣꠝ,
ꠔꠥꠝꠞꠣꠞ ꠝꠣꠎꠞ ꠄꠇ ꠎꠘꠦꠃ ꠛꠦꠁꠝꠣꠘꠤ ꠇꠞꠤꠀ ꠀꠝꠣꠞꠦ ꠗꠞꠣꠁ ꠖꠤꠛ,
ꠢꠦ ꠅꠈꠘ ꠀꠝꠣꠞ ꠟꠉꠦ ꠛꠁꠀ ꠈꠣꠞ।”
১৯ ꠁꠈꠣꠘ ꠢꠥꠘꠤꠀ ꠔꠣꠞꠣ ꠈꠥꠛ ꠛꠦꠎꠣꠞ ꠅꠁꠉꠦꠟꠣ।
ꠀꠞ ꠄꠇ ꠄꠇ ꠇꠞꠤ ꠎꠤꠇꠣꠁꠟꠣ,
“ꠢꠥꠎꠥꠞ,
ꠁ ꠎꠘ ꠇꠤꠔꠣ ꠀꠝꠤ ꠘꠤ?”
২০ ꠔꠣꠁꠘ ꠇꠁꠟꠣ,
“ꠢꠦ ꠅꠃ ꠛꠣꠞꠅꠎꠘꠞ ꠝꠣꠎꠞꠃ ꠄꠇꠎꠘ।
ꠢꠦ ꠅꠈꠘ ꠀꠝꠣꠞ ꠟꠉꠦ ꠕꠣꠟꠅ ꠀꠔ ꠢꠣꠞꠣꠞ।
২১ ꠛꠤꠘ-ꠀꠖꠝꠞ ꠝꠃꠔꠞ ꠛꠦꠙꠣꠞꠦ ꠀꠍꠝꠣꠘꠤ ꠇꠤꠔꠣꠛꠅ ꠎꠦꠟꠣ ꠟꠦꠈꠣ ꠀꠍꠦ,
ꠔꠣꠘ ꠝꠃꠔ ꠔ ꠅꠃꠟꠣꠃ ꠅꠁꠛ,
ꠅꠁꠟꠦ ꠀꠚꠍꠥꠍ ꠢꠃ ꠝꠣꠘꠡꠞ ꠟꠣꠉꠤ,
ꠎꠦ ꠔꠣꠘꠞꠦ ꠗꠞꠣꠁꠀ ꠖꠤꠛ।
ꠖꠥꠘꠤꠀꠔ ꠔꠣꠞ ꠎꠘꠝ ꠘꠣ ꠅꠀꠃ,
ꠔꠣꠞ ꠟꠣꠉꠤ ꠛꠃꠔ ꠜꠣꠟꠣ ꠀꠍꠤꠟ।”
২২ ꠈꠣꠘꠣꠔ ꠞꠁꠍꠂꠘ,
ꠅꠃ ꠡꠝꠄ ꠁꠍꠣꠄ ꠞꠥꠐꠤ ꠀꠔꠅ ꠟꠁꠀ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠤꠀ,
ꠍꠤꠠꠤꠀ ꠐꠥꠇꠞꠣ ꠐꠥꠇꠞꠣ ꠇꠞꠤ ꠍꠣꠢꠣꠛꠤ ꠅꠇꠟꠞ ꠀꠔꠅ ꠖꠤꠀ ꠇꠁꠟꠣ,
“ꠅꠃ ꠘꠦꠅ,
ꠝꠘꠅ ꠇꠞꠅ ꠁꠔꠣ ꠀꠝꠣꠞ ꠡꠞꠤꠟ।”
২৩ ꠛꠣꠖꠦ ꠔꠣꠁꠘ ꠀꠋꠉꠥꠞꠞ ꠡꠞꠛꠔꠞ ꠙꠤꠀꠟꠣ ꠟꠁꠀ ꠀꠟ꠆ꠟꠣꠞ ꠡꠥꠇꠞꠤꠀ ꠎꠣꠘꠣꠁꠀ ꠄꠞꠣꠞꠦ ꠖꠤꠟꠣ।
ꠄꠞꠣ ꠢꠇꠟꠦ ꠅꠃ ꠙꠤꠀꠟꠣ ꠕꠣꠇꠤ ꠡꠞꠛꠔ ꠈꠣꠁꠟꠣ।
২৪ ꠁꠍꠣꠄ ꠇꠁꠟꠣ,
“ꠈꠣꠅ,
ꠝꠘꠅ ꠇꠞꠅ ꠁꠔꠣ ꠀꠝꠣꠞ ꠟꠃ।
ꠅꠃ ꠟꠃꠞ ꠎꠞꠤꠀꠄ ꠀꠖꠝ ꠎꠣꠔꠤꠞ ꠛꠃꠔꠞ ꠛꠣꠌꠤꠛꠣꠞ ꠟꠣꠉꠤ ꠘꠄꠀ ꠃꠍꠤꠟ꠆ꠟꠣ ꠇꠣꠁꠝ ꠇꠞꠣ ꠅꠁꠛ।
২৫ ꠀꠝꠤ ꠢꠣꠍꠣ ꠇꠕꠣ ꠇꠁꠞꠣꠝ,
ꠎꠦꠁ ꠙꠞ꠆ꠎꠘ꠆ꠔ ꠀꠟ꠆ꠟꠣꠞ ꠛꠣꠖꠡꠣꠁꠔ ꠖꠣꠈꠤꠟ ꠅꠁꠀ ꠀꠝꠤ ꠀꠋꠉꠥꠞꠞ ꠡꠞꠛꠔ ꠘꠣ ꠈꠣꠁꠍꠤ,
ꠅꠔ ꠖꠤꠘ ꠁ ꠟꠣꠈꠣꠘ ꠡꠞꠛꠔ ꠀꠞ ꠈꠣꠁꠔꠣꠝ ꠘꠣꠄ।”
২৬ ꠢꠦꠡꠦ ꠢꠇꠟꠦ ꠝꠤꠟꠤ ꠄꠇ ꠉꠎꠟ ꠉꠣꠁꠀ,
ꠊꠞ ꠕꠣꠇꠤ ꠛꠣꠞꠅꠁꠀ ꠎꠄꠔꠥꠘ ꠙꠣꠠꠅ ꠉꠦꠟꠣꠉꠤ।
ꠢꠎꠞꠔ ꠙꠤꠔꠞꠦ ꠅꠡ꠆ꠛꠤꠇꠣꠞ ꠇꠞꠣꠞ ꠀꠉꠣꠝ ꠁꠡꠣꠞꠣ
২৭ ꠙꠣꠠꠅ ꠉꠤꠀ ꠁꠍꠣꠄ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠇꠁꠟꠣ,
“ꠔꠥꠝꠞꠣ ꠢꠇꠟꠦꠃ ꠔ ꠀꠝꠣꠞꠦ ꠚꠣꠟꠣꠁꠀ ꠜꠣꠉꠤꠛꠣꠄ।
ꠀꠟ꠆ꠟꠣꠞ ꠇꠣꠟꠣꠝꠅ ꠀꠍꠦ,
‘ꠀꠝꠤ ꠙꠣꠟꠞ ꠞꠣꠈꠣꠟꠞꠦ ꠝꠣꠞꠤꠟꠤꠝꠥ,
ꠔꠦꠃ ꠙꠣꠟꠞ ꠝꠦꠠꠣꠁꠘ ꠌꠣꠁꠞꠅꠛꠣꠄ ꠍꠤꠔ꠆ꠞꠤꠎꠤꠛꠣ।’
২৮ ꠅꠁꠟꠦ ꠀꠝꠣꠞꠦ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠇꠞꠣꠞ ꠛꠣꠖꠦ,
ꠔꠥꠝꠞꠣꠞ ꠀꠉꠦꠃ ꠀꠝꠤ ꠉꠣꠟꠤꠟꠅ ꠎꠣꠁꠝꠥꠉꠤ।”
২৯ ꠙꠤꠔꠞꠦ ꠔꠣꠘꠞꠦ ꠇꠁꠟꠣ,
“ꠢꠥꠎꠥꠞ,
ꠢꠇꠟ ꠜꠣꠉꠤ ꠉꠦꠟꠦꠅ ꠀꠝꠤ ꠜꠣꠉꠤꠔꠣꠝ ꠘꠣꠄ।”
৩০ ꠁꠍꠣꠄ ꠇꠁꠟꠣ,
“ꠔꠦ ꠢꠥꠘꠅ,
ꠀꠝꠤ ꠔꠥꠝꠣꠞꠦ ꠇꠁꠞꠣꠝ,
ꠀꠁꠎ ꠙꠔꠣꠛꠣꠟꠣ ꠝꠥꠞꠉꠣꠄ ꠖꠥꠁꠛꠣꠞ ꠛꠣꠋ ꠖꠤꠛꠣꠞ ꠀꠉꠦꠃ,
ꠔꠥꠝꠤ ꠔꠤꠘꠛꠣꠞ ꠇꠁꠛꠣꠄ,
ꠔꠥꠝꠤ ꠀꠝꠣꠞꠦ ꠌꠤꠘꠅ ꠘꠣ।”
৩১ ꠅꠁꠟꠦ ꠙꠤꠔꠞꠦ ꠀꠞꠅ ꠛꠠ ꠉꠟꠣꠄ ꠇꠁꠟꠣ,
“ꠢꠥꠎꠥꠞ ꠅꠃ ꠇꠤꠔꠣ ꠇꠂꠘ,
ꠀꠙꠘꠣꠞ ꠟꠉꠦ ꠎꠥꠖꠤ ꠀꠝꠣꠞ ꠝꠞꠘꠅ ꠅꠄ,
ꠔꠣ-ꠅ ꠀꠝꠤ ꠇꠥꠘꠥꠝꠘ꠆ꠔꠦꠃ ꠇꠁꠔꠣꠝ ꠘꠣꠄ ꠀꠝꠤ ꠀꠙꠘꠣꠞꠦ ꠌꠤꠘꠤ ꠘꠣ।”
ꠢꠇꠟ ꠍꠣꠢꠣꠛꠤꠄꠅ ꠅꠃ ꠟꠣꠈꠣꠘ ꠇꠁꠟꠣ।
ꠉꠦꠔꠡꠤꠝꠣꠘꠤ ꠛꠣꠉꠣꠘꠅ ꠢꠎꠞꠔ ꠁꠍꠣ
৩২ ꠛꠣꠖꠦ ꠢꠎꠞꠔ ꠁꠍꠣꠄ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠟꠁꠀ ꠉꠦꠔꠡꠤꠝꠣꠘꠤ ꠘꠣꠝꠞ ꠄꠇ ꠛꠣꠉꠣꠘꠅ ꠀꠁꠟꠣ।
ꠀꠁꠀ ꠔꠣꠁꠘ ꠄꠞꠣꠞꠦ ꠇꠁꠟꠣ,
“ꠀꠝꠤ ꠎꠔ ꠡꠝꠄ ꠗꠞꠤ ꠖꠥꠀ ꠇꠞꠝꠥ,
ꠅꠔ ꠡꠝꠄ ꠔꠥꠝꠞꠣ ꠅꠘꠅ ꠛꠅꠀꠔ ꠞꠁꠅ।”
৩৩ ꠅꠈꠣꠘ ꠇꠁꠀ ꠔꠣꠁꠘ ꠙꠤꠔꠞ,
ꠁꠀꠇꠥꠛ ꠀꠞ ꠢꠣꠘ꠆ꠘꠣꠘꠞꠦ ꠔꠣꠘ ꠟꠉꠦ ꠞꠣꠈꠟꠣ,
ꠝꠘꠞ ꠖꠥꠈ ꠀꠞ ꠎꠣꠟꠣꠄ ꠔꠣꠁꠘ ꠛꠠ ꠔꠇꠟꠤꠚ ꠙꠣꠁꠟꠣ।
৩৪ ꠔꠣꠁꠘ ꠄꠞꠣꠞꠦ ꠇꠁꠟꠣ,
“ꠖꠥꠈꠦ ꠀꠝꠣꠞ ꠎꠣꠘ ꠛꠣꠞꠅꠁ ꠎꠣꠞꠉꠤ।
ꠔꠥꠝꠞꠣ ꠢꠇꠟ ꠅꠘꠅ ꠞꠅ ꠀꠞ ꠢꠎꠣꠉ ꠕꠣꠇꠅ।”
৩৫ ꠇꠁꠀ ꠕꠥꠠꠣ ꠢꠞꠤꠀ ꠉꠤꠀ ꠔꠣꠁꠘ ꠝꠣꠐꠤꠔ ꠍꠁꠎꠖꠣꠔ ꠙꠠꠤꠀ ꠀꠞꠎ ꠇꠞꠟꠣ,
ꠡꠝ꠆ꠛꠛ ꠅꠁꠟꠦ ꠁ ꠝꠍꠤꠛꠔꠞ ꠅꠇ꠆ꠔꠈꠣꠘ ꠢꠞꠤꠎꠤꠛꠣꠞ ꠟꠣꠉꠤ।
৩৬ ꠔꠣꠁꠘ ꠇꠁꠟꠣ,
“ꠅ ꠀꠛ꠆ꠛꠣ,
ꠀꠝꠣꠞ ꠅꠟꠤ,
ꠔꠥꠝꠤ ꠔ ꠢꠇꠟꠔꠣꠃ ꠇꠞꠔꠣꠄ ꠙꠣꠞ।
ꠔꠥꠝꠤ ꠀꠝꠣꠞ ꠃꠙꠞ ꠕꠣꠇꠤ ꠀꠘꠦꠅꠀꠟꠣ ꠅꠃ ꠝꠍꠤꠛꠔ ꠈꠣꠘ ꠢꠞꠣꠁꠟꠣꠅ।
ꠅꠁꠟꠦ ꠁꠔꠣ ꠀꠝꠣꠞ ꠁꠌ꠆ꠍꠣꠄ ꠘꠣꠄ,
ꠔꠥꠝꠣꠞ ꠝꠞ꠆ꠎꠤ ꠝꠣꠚꠤꠇꠃ ꠅꠃꠇ।”
৩৭ ꠍꠁꠎꠖꠣ ꠕꠣꠇꠤ ꠃꠑꠤꠀ ꠔꠣꠁꠘ ꠍꠣꠢꠣꠛꠤ ꠅꠇꠟꠞ ꠉꠦꠍꠦ ꠀꠁꠀ ꠖꠦꠈꠟꠣ,
ꠄꠞꠣ ꠊꠥꠝꠣꠁ ꠉꠦꠍꠂꠘ।
ꠅꠃ ꠔꠣꠁꠘ ꠙꠤꠔꠞꠞꠦ ꠢꠎꠣꠉ ꠇꠞꠤ ꠇꠁꠟꠣ,
“ꠍꠣꠁꠝꠘ,
ꠔꠥꠝꠤ ꠊꠥꠝꠣꠁ ꠉꠦꠟꠣꠄ ꠘꠤ?
ꠄꠇꠈꠣꠘ ꠊꠘ꠆ꠐꠣꠅ ꠢꠎꠣꠉ ꠞꠁꠔꠣꠄ ꠙꠣꠞꠟꠣꠄ ꠘꠣ ꠘꠤ?
৩৮ ꠢꠎꠣꠉ ꠞꠅ,
ꠙꠞꠤꠇ꠆ꠇꠣ ꠕꠣꠇꠤ ꠛꠣꠌꠔꠣꠄ ꠇꠞꠤ ꠖꠥꠀ ꠇꠞꠅ।
ꠖꠤꠟꠞ ꠝꠣꠎꠦ ꠘꠤꠌꠄ ꠈꠤꠀꠟ ꠀꠍꠦ,
ꠅꠁꠟꠦ ꠇꠣꠄꠀ ꠔ ꠇꠝꠎꠥꠞ।”
৩৯ ꠛꠣꠖꠦ ꠔꠣꠁꠘ ꠢꠤꠞꠛꠣꠞ ꠉꠤꠀ ꠢꠃ ꠄꠇꠁ ꠖꠥꠀ ꠇꠞꠟꠣ।
৪০ ꠚꠤꠞꠤꠀ ꠀꠁꠀ ꠖꠦꠈꠟꠣ,
ꠄꠞꠣ ꠢꠤꠞꠛꠣꠞ ꠊꠥꠝꠣꠁ ꠉꠦꠍꠂꠘ,
ꠊꠥꠝꠦ ꠔꠣꠞꠣꠞ ꠌꠃꠈ ꠚꠣꠟꠣꠁ ꠖꠦꠞ।
ꠔꠣꠞꠣ ꠁꠍꠣꠞꠦ ꠇꠤꠔꠣ ꠎꠥꠀꠙ ꠖꠤꠔꠣ,
ꠇꠥꠘ꠆ꠔꠣ ꠛꠥꠎꠟꠣ ꠘꠣ।
৪১ ꠔꠤꠘ ꠘꠝ꠆ꠛꠞ ꠛꠣꠞ ꠔꠣꠁꠘ ꠀꠁꠀ ꠄꠞꠣꠞꠦ ꠇꠁꠟꠣ,
“ꠔꠥꠝꠞꠣ ꠖꠦꠈꠤ ꠅꠈꠘꠅ ꠀꠞꠣꠝꠦ ꠊꠥꠝꠣꠁꠞꠣꠄ।
ꠀꠁꠌ꠆ꠍꠣ ꠅꠁꠍꠦ,
ꠡꠝꠄ ꠀꠁꠌ꠆ꠍꠦ ꠔ।
ꠖꠦꠈꠞꠣꠄ ꠘꠤ,
ꠛꠤꠘ-ꠀꠖꠝꠞꠦ ꠉꠥꠘꠣꠉꠣꠞ ꠅꠇꠟꠞ ꠀꠔꠅ ꠡꠝꠎꠣꠁ ꠖꠦꠅꠀ ꠅꠞ।
৪২ ꠃꠑꠅ,
ꠀꠝꠞꠣ ꠞꠅꠀꠘꠣ ꠖꠦꠁ।
ꠀꠝꠣꠞꠦ ꠎꠦꠉꠤꠄ ꠖꠥꠡꠝꠘꠞ ꠀꠔꠅ ꠗꠞꠣꠁ ꠖꠤꠛ,
ꠢꠦ ꠀꠁꠀ ꠀꠎꠤꠉꠦꠍꠦ।”
ꠢꠎꠞꠔ ꠁꠍꠣ ꠀꠟ-ꠝꠍꠤ ꠖꠥꠡꠝꠘꠞ ꠀꠔꠅ ꠛꠘ꠆ꠖꠤ
৪৩ ꠔꠣꠁꠘ ꠄꠞꠣꠞ ꠟꠉꠦ ꠝꠣꠔꠅ ꠞꠁꠍꠂꠘ,
ꠅꠃ ꠡꠝꠄ ꠁꠢꠥꠖꠣ ꠢꠘꠅ ꠀꠁꠟ।
ꠢꠦ ꠀꠍꠤꠟ ꠛꠣꠞꠅꠎꠘ ꠍꠣꠢꠣꠛꠤꠞ ꠝꠣꠎꠞ ꠄꠇꠎꠘ।
ꠔꠣꠞ ꠟꠉꠦ ꠅꠁꠀ ꠀꠞꠅ ꠛꠃꠔꠦ ꠟꠣꠑꠤ-ꠍꠐꠣ-ꠔꠟꠥꠀꠞ ꠟꠁꠀ ꠀꠁꠟ।
ꠛꠠ ꠁꠝꠣꠝ,
ꠝꠃꠟꠣꠘꠣ ꠀꠞ ꠝꠥꠞꠛ꠆ꠛꠤ ꠅꠇꠟꠦ ꠄꠞꠣꠞꠦ ꠙꠣꠑꠣꠁꠍꠂꠘ।
৪৪ ꠔꠣꠘꠞꠦ ꠎꠦꠉꠤꠄ ꠗꠞꠣꠁꠀ ꠖꠤꠔ,
ꠢꠦ ꠔꠣꠞ ꠟꠉꠞ ꠄꠞꠣꠞꠦ ꠀꠉꠦ ꠢꠤꠇꠣꠁꠀ ꠖꠤꠍꠤꠟ,
“ꠀꠝꠤ ꠉꠤꠀ ꠎꠦꠘ ꠉꠣꠟꠅ ꠢꠥꠋꠉꠣ ꠖꠤꠝꠥ,
ꠄꠁꠘꠃ ꠢꠃ ꠎꠘ।
ꠔꠥꠝꠞꠣ ꠄꠘꠞꠦ ꠛꠘ꠆ꠖꠤ ꠇꠞꠤꠀ ꠈꠥꠛ ꠡꠣꠛꠗꠣꠘꠦ ꠟꠁꠀ ꠎꠣꠁꠅ।”
৪৫ ꠔꠦꠃ ꠁꠢꠥꠖꠣꠄ ꠡꠥꠎꠣ-ꠡꠥꠎꠤ ꠁꠍꠣꠞ ꠉꠦꠍꠦ ꠉꠤꠀ ꠇꠂꠟ,
“ꠢꠥꠎꠥꠞ!”
ꠇꠁꠀ ꠢꠦ ꠔꠣꠘꠞꠦ ꠢꠥꠋꠉꠣ ꠖꠤꠟ।
৪৬ ꠟꠉꠦ ꠟꠉꠦ ꠔꠣꠞꠣ ꠀꠁꠀ ꠁꠍꠣꠞꠦ ꠗꠞꠤꠟꠤꠟ।
৪৭ ꠔꠣꠘ ꠇꠣꠘ꠆ꠖꠣꠔ ꠎꠦꠞꠣ ꠃꠛꠣꠔ ꠀꠍꠟꠣ,
ꠄꠞꠣ ꠄꠇꠎꠘꠦ ꠘꠤꠎꠞ ꠔꠟꠥꠀꠞ ꠛꠣꠞ ꠇꠞꠤꠀ ꠙꠞꠗꠣꠘ ꠁꠝꠣꠝꠞ ꠉꠥꠟꠣꠝꠞꠦ ꠍꠦꠖ ꠝꠣꠞꠟꠣ,
ꠍꠦꠖꠞ ꠟꠉꠦ ꠔꠣꠞ ꠄꠇ ꠇꠣꠘ ꠇꠣꠐꠤꠀ ꠙꠠꠤꠉꠦꠟ।
৪৮ ꠁꠍꠣꠄ ꠅꠔꠣ ꠝꠣꠘꠡꠞꠦ ꠇꠁꠟꠣ,
“ꠇꠤꠔꠣ ꠛꠣ,
ꠀꠝꠤ ꠇꠥꠘꠥ ꠌꠥꠞ-ꠒꠣꠇꠣꠁꠔ ꠘꠤ,
ꠔꠥꠝꠞꠣ ꠖꠦꠈꠤ ꠟꠣꠑꠤ-ꠍꠐꠣ-ꠔꠟꠥꠀꠞ ꠟꠁꠀ ꠀꠝꠣꠞꠦ ꠗꠞꠣꠔ ꠀꠁꠍ?
৪৯ ꠀꠝꠤ ꠔ ꠙꠞꠔꠦꠇ ꠖꠤꠘ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠉꠤꠀ ꠔꠥꠝꠞꠣꠞ ꠍꠣꠝꠘꠦꠃ ꠔꠣꠟꠤꠝ ꠖꠤꠔꠣꠝ।
ꠅꠃ ꠡꠝꠄ ꠔ ꠔꠥꠝꠞꠣ ꠀꠝꠣꠞꠦ ꠗꠞꠟꠣꠄ ꠘꠣ।
ꠘꠤꠌꠄ ꠀꠟ꠆ꠟꠣꠞ ꠇꠣꠟꠣꠝꠞ ꠀꠄꠀꠔ ꠔ ꠚꠟꠤꠔꠦ ꠅꠁꠛ।”
৫০ ꠔꠣꠘꠞꠦ ꠛꠘ꠆ꠖꠤ ꠇꠞꠔꠦꠃ ꠔꠣꠘ ꠢꠇꠟ ꠍꠣꠢꠣꠛꠤ ꠔꠣꠘꠦ ꠕꠁꠀ ꠜꠣꠉꠤ ꠉꠦꠟꠣ।
৫১ ꠈꠣꠟꠤ ꠄꠇꠎꠘ ꠎꠥꠀꠘꠦ ꠄꠇꠈꠣꠘ ꠟꠋꠉꠤ ꠚꠤꠘ꠆ꠖꠤꠀ ꠔꠣꠘ ꠈꠞꠦ ꠈꠞꠦ ꠉꠦꠟ।
ꠅꠁꠟꠦ ꠝꠣꠘꠡꠦ ꠎꠦꠛꠟꠣ ꠔꠣꠞꠦꠅ ꠗꠞꠔꠣ ꠌꠣꠁꠟꠣ,
৫২ ꠢꠦ ꠔꠣꠞ ꠟꠋꠉꠤ ꠚꠣꠟꠣꠁꠀ ꠟꠦꠝꠐꠣ ꠅꠁꠀ ꠖꠃꠠꠣꠁꠀ ꠜꠣꠉꠤꠟ।
ꠚꠔꠥꠀ ꠇꠝꠤꠐꠤꠞ ꠖꠞꠛꠣꠞꠅ ꠛꠤꠌꠣꠞ
৫৩ ꠅꠃ ꠝꠣꠘꠡꠦ ꠢꠎꠞꠔ ꠁꠍꠣꠞꠦ ꠗꠞꠤꠀ ꠢꠣꠞꠤ ꠙꠞꠗꠣꠘ ꠁꠝꠣꠝꠞ ꠉꠦꠍꠦ ꠟꠁꠀ ꠉꠦꠟ।
ꠢꠘꠅ ꠛꠠ ꠁꠝꠣꠝ ꠅꠇꠟ,
ꠝꠥꠞꠛ꠆ꠛꠤ ꠀꠞ ꠝꠃꠟꠣꠘꠣ ꠅꠇꠟꠅ ꠄꠇꠈꠣꠘꠅ ꠖꠟꠣ ꠅꠁꠟꠣ।
৫৪ ꠍꠣꠢꠣꠛꠤ ꠙꠤꠔꠞ ꠁꠍꠣꠞ ꠉꠦꠍ ꠕꠘꠦ ꠖꠥꠞꠁ ꠢꠞꠤ ꠢꠞꠤ ꠞꠁꠀ ꠔꠣꠘ ꠈꠞꠦ ꠈꠞꠦ ꠉꠤꠀ ꠙꠞꠗꠣꠘ ꠁꠝꠣꠝꠞ ꠛꠣꠠꠤꠞ ꠃꠑꠣꠘꠅ ꠉꠦꠟꠣ।
ꠉꠤꠀ ꠢꠘꠅ ꠙꠣꠞꠣꠖꠣꠞ ꠅꠇꠟꠞ ꠟꠉꠦ ꠝꠤꠟꠤꠀ ꠀꠉꠥꠁꠘ ꠔꠣꠛꠣꠘꠤꠔ ꠛꠁꠟꠣ।
৫৫ ꠛꠠ ꠁꠝꠣꠝ ꠅꠇꠟꠦ ꠀꠞ ꠚꠔꠥꠀ ꠇꠝꠤꠐꠤꠞ ꠢꠇꠟ ꠝꠣꠘꠡꠦ ꠁꠍꠣꠞꠦ ꠇꠣꠔꠟ ꠇꠞꠣꠞ ꠟꠣꠉꠤ ꠇꠥꠘꠥ ꠘꠣꠟꠤꠡ ꠔꠥꠇꠣꠁꠟꠣ,
ꠅꠁꠟꠦ ꠙꠣꠁꠟꠣ ꠘꠣ।
৫৬ ꠝꠎꠟꠤꠍꠅ ꠁꠍꠣꠞ ꠛꠤꠞꠥꠖ꠆ꠖꠦ ꠛꠃꠔꠦ ꠝꠤꠍꠣ ꠡꠣꠇ꠆ꠇꠤ ꠖꠤꠟꠦꠅ,
ꠔꠣꠞꠣꠞ ꠡꠣꠇ꠆ꠇꠤꠞ ꠝꠤꠟ ꠅꠁꠟ ꠘꠣ।
৫৭ ꠔꠦꠃ ꠀꠞꠅ ꠇꠄꠎꠘꠦ ꠔꠣꠘ ꠛꠤꠞꠥꠖ꠆ꠖꠦ ꠅꠃ ꠝꠤꠍꠣ ꠡꠣꠇ꠆ꠇꠤ ꠖꠤꠟ।
ꠔꠣꠞꠣ ꠇꠂꠟ,
৫৮ “ꠀꠝꠞꠣ ꠢꠥꠘꠍꠤ,
ꠢꠦ ꠇꠁꠍꠦ,
ꠝꠣꠘꠡꠞ ꠀꠔꠞ ꠛꠣꠘꠣꠁꠟ ꠎꠦꠞꠥꠎꠣꠟꠦꠝꠞ ꠅꠃ ꠇꠣꠛꠣ ꠡꠞꠤꠚ,
ꠀꠝꠤ ꠜꠣꠋꠉꠤꠟꠤꠝꠥ,
ꠀꠞ ꠔꠤꠘ ꠖꠤꠘꠞ ꠝꠣꠎꠦ ꠇꠥꠘꠥ ꠝꠣꠘꠡꠞ ꠀꠔ ꠘꠣ ꠟꠣꠉꠣꠁꠀ ꠀꠝꠤ ꠀꠞꠇꠈꠣꠘ ꠛꠣꠘꠣꠁꠝꠥ।”
৫৯ ꠅꠁꠟꠦ ꠄꠞꠣꠞ ꠡꠣꠇ꠆ꠇꠤꠅ ꠝꠤꠟꠟ ꠘꠣ।
৬০ ꠢꠦꠡꠦ ꠙꠞꠗꠣꠘ ꠁꠝꠣꠝ ꠃꠛꠣꠁꠀ ꠢꠇꠟꠞ ꠍꠣꠝꠘꠦ ꠁꠍꠣꠞꠦ ꠎꠤꠇꠣꠁꠟꠣ,
“ꠅꠛꠣ,
ꠔꠥꠝꠤ ꠇꠥꠘꠥ ꠝꠣꠔꠞ ꠎꠥꠀꠙ ꠖꠤꠔꠣꠄ ꠘꠣ ꠘꠤ?
ꠁꠔꠣ ꠝꠣꠘꠡꠦ ꠔꠥꠝꠣꠞ ꠛꠦꠙꠣꠞꠦ ꠇꠤꠔꠣ ꠡꠣꠇ꠆ꠇꠤ ꠖꠤꠞꠣ,
ꠢꠥꠘꠞꠣꠄ ꠘꠤ?”
৬১ ꠅꠁꠟꠦ ꠔꠣꠁꠘ ꠇꠥꠘꠥ ꠎꠥꠀꠙ ꠘꠣ ꠖꠤꠀ ꠘꠤꠞꠣꠁ ꠞꠁꠟꠣ।
ꠙꠞꠗꠣꠘ ꠁꠝꠣꠝꠦ ꠔꠣꠘꠞꠦ ꠢꠤꠞꠛꠣꠞ ꠎꠤꠇꠣꠁꠟꠣ,
“ꠔꠥꠝꠤ ꠇꠤꠔꠣ ꠀꠟ꠆ꠟꠣꠔꠣꠟꠣꠞ ꠅꠀꠖꠣ ꠇꠞꠣ ꠢꠃ ꠀꠟ-ꠝꠍꠤ ꠘꠤ,
ꠔꠣꠘ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣ ꠘꠤ?”
৬২ ꠔꠣꠁꠘ ꠎꠥꠀꠙ ꠖꠤꠟꠣ,
“ꠎꠤꠅꠄ,
ꠀꠝꠤꠃ ꠢꠦꠁꠘ।
ꠀꠙꠘꠣꠞꠣ ꠖꠦꠈꠛꠣ,
ꠀꠝꠤ ꠛꠤꠘ-ꠀꠖꠝ ꠀꠞꠡꠦ-ꠀꠎꠤꠝꠅ ꠀꠟ꠆ꠟꠣ ꠞꠣꠛ꠆ꠛꠥꠟ ꠀꠟꠣꠝꠤꠘꠞ ꠒꠣꠁꠘꠞ ꠔꠈ꠆ꠔꠅ ꠛꠅꠀꠔ ꠀꠍꠤ।
ꠀꠞ ꠖꠦꠈꠛꠣ,
ꠀꠝꠤ ꠛꠦꠢꠦꠡ꠆ꠔꠤ ꠝꠦꠊꠞ ꠌꠣꠇꠣꠔ ꠅꠁꠀ ꠖꠥꠘꠤꠀꠔ ꠔꠡꠞꠤꠚ ꠀꠘꠤꠀꠞ।”
৬৩ ꠁꠈꠣꠘ ꠢꠥꠘꠤꠀꠃ ꠙꠞꠗꠣꠘ ꠁꠝꠣꠝꠦ ꠘꠤꠎꠞ ꠚꠤꠘ꠆ꠘꠞ ꠇꠣꠙꠠ ꠍꠤꠠꠤꠀ ꠇꠁꠟꠣ,
“ꠀꠞ ꠇꠥꠘꠥ ꠡꠣꠇ꠆ꠇꠤꠞ ꠎꠞꠥꠞ ꠀꠍꠦ ꠘꠤ?
৬৪ ꠀꠙꠘꠣꠞꠣ ꠘꠤꠎꠞ ꠇꠣꠘꠦꠃ ꠔ ꠢꠥꠘꠟꠣ,
ꠢꠦ ꠡꠤꠞꠤꠇꠤ ꠇꠞꠟ।
ꠔꠦ ꠅꠈꠘ ꠀꠙꠘꠣꠞꠣ ꠇꠤꠔꠣ ꠞꠣꠄ ꠖꠤꠛꠣ?”
ꠅꠃ ꠔꠣꠞꠣ ꠢꠇꠟꠦ ꠔꠣꠘꠦ ꠖꠥꠡꠤ ꠡꠣꠁꠛꠡ꠆ꠔ ꠇꠞꠤꠀ,
ꠇꠣꠔꠟ ꠇꠞꠣꠞ ꠢꠥꠇꠥꠝ ꠖꠤꠟ।
৬৫ ꠇꠦꠃ ꠇꠦꠃ ꠔꠣꠘ ꠃꠙꠞꠦ ꠍꠦꠚ ꠖꠤꠟ।
ꠔꠣꠘ ꠝꠥꠈ ꠛꠣꠘ꠆ꠖꠤꠀ ꠊꠥꠡꠤ ꠝꠣꠞꠤꠀ ꠇꠂꠟ,
“ꠢꠂ,
ꠔꠥꠁꠘ ꠛꠥꠟꠦ ꠘꠛꠤ,
ꠔꠦ ꠅꠈꠘ ꠅꠢꠤ ꠇꠍ ꠘꠣ।”
ꠛꠣꠖꠦ ꠍꠤꠙꠣꠁ ꠅꠇꠟꠦꠅ ꠔꠣꠘꠦ ꠘꠤꠀ ꠝꠣꠁꠞ-ꠗꠁꠞ ꠇꠞꠟ।
ꠢꠎꠞꠔ ꠙꠤꠔꠞꠦ ꠔꠤꠘꠛꠣꠞ ꠅꠡ꠆ꠛꠤꠇꠣꠞ ꠇꠞꠟꠣ
৬৬ ꠙꠤꠔꠞ ꠎꠦꠛꠟꠣ ꠟꠣꠝꠣꠔ ꠃꠑꠣꠘꠅ ꠀꠍꠟꠣ,
ꠅꠃ ꠡꠝꠄ ꠙꠞꠗꠣꠘ ꠁꠝꠣꠝꠞ ꠄꠇ ꠛꠣꠘ꠆ꠖꠤ ꠛꠦꠐꠤ ꠔꠣꠘ ꠇꠣꠘ꠆ꠖꠣꠔ ꠉꠦꠟ।
৬৭ ꠉꠤꠀ ꠔꠣꠘꠞꠦ ꠀꠉꠥꠁꠘ ꠔꠣꠛꠣꠘꠤꠔ ꠖꠦꠈꠤꠀ,
ꠜꠣꠟꠣ ꠇꠞꠤ ꠔꠣꠘ ꠛꠣꠄ ꠌꠣꠁꠀ ꠢꠣꠞꠤ ꠇꠂꠟ,
“ꠀꠙꠘꠦꠅ ꠔ ꠅꠃ ꠘꠣꠍꠣꠞꠔꠞ ꠁꠍꠣꠞ ꠟꠉꠦ ꠀꠍꠟꠣ।”
৬৮ ꠙꠤꠔꠞꠦ ꠅꠡ꠆ꠛꠤꠇꠣꠞ ꠇꠞꠤꠀ ꠇꠁꠟꠣ,
“ꠘꠣ ꠉ,
ꠔꠥꠝꠤ ꠅꠃ ꠇꠤꠔꠣ ꠇꠁꠞꠣꠄ?
ꠀꠝꠤ ꠁꠔꠣ ꠇꠥꠘ꠆ꠔꠣꠃ ꠎꠣꠘꠤ ꠘꠣ,
ꠛꠥꠎꠤꠅ ꠘꠣ।”
ꠅꠈꠣꠘ ꠇꠁꠀ ꠙꠤꠔꠞ ꠉꠦꠁꠐꠞ ꠗꠣꠞꠅ ꠉꠦꠟꠣ,
ꠀꠞ ꠅꠃ ꠡꠝꠄ ꠝꠥꠞꠉꠣꠄ ꠛꠣꠋ ꠖꠤꠟꠣꠁꠟ।
৬৯ ꠛꠣꠘ꠆ꠖꠤ ꠛꠦꠐꠤꠄ ꠎꠦꠛꠟꠣ ꠖꠦꠈꠟ,
ꠙꠤꠔꠞ ꠅꠘꠅ ꠉꠤꠀ ꠃꠛꠣꠁꠍꠂꠘ,
ꠅꠃ ꠔꠣꠘ ꠇꠣꠍꠣꠔ ꠃꠛꠣ ꠝꠣꠘꠡꠞꠦ ꠉꠤꠀ ꠔꠣꠁ ꠇꠂꠟ,
“ꠅꠃ ꠛꠦꠐꠣꠅ ꠄꠞꠣꠞ ꠟꠉꠞ ꠄꠇꠎꠘ।”
৭০ ꠙꠤꠔꠞꠦ ꠢꠤꠞꠛꠣꠞ ꠘꠣ ꠇꠞꠟꠣ।
ꠅꠁꠟꠦ ꠔꠣꠘ ꠇꠣꠘ꠆ꠖꠣꠔ ꠎꠦꠞꠣ ꠃꠛꠣ ꠀꠍꠤꠟ,
ꠕꠥꠠꠣ ꠛꠣꠖꠦ ꠔꠣꠞꠣ ꠇꠁꠟꠣ,
“ꠔꠥꠝꠤ ꠘꠤꠌ꠆ꠌꠄ ꠄꠞꠣꠞ ꠟꠉꠞ,
ꠔꠥꠝꠣꠞ ꠛꠣꠠꠤꠅ ꠔ ꠉꠣꠟꠤꠟ ꠎꠤꠟꠣꠔ।”
৭১ ꠙꠤꠔꠞꠦ ꠇꠁꠟꠣ,
“ꠀꠟ꠆ꠟꠣꠞ ꠉꠎꠛ ꠙꠠꠃꠇ,
ꠀꠝꠤ ꠇꠍꠝ ꠈꠣꠁꠀ ꠇꠁꠀꠞ,
ꠔꠥꠝꠞꠣ ꠅꠃ ꠎꠣꠞ ꠇꠕꠣ ꠇꠁꠞꠣꠄ,
ꠔꠣꠞꠦ ꠀꠝꠤ ꠌꠤꠘꠤꠅ ꠘꠣ।”
৭২ ꠅꠈꠣꠘ ꠇꠁꠔꠦꠃ ꠝꠥꠞꠉꠣꠄ ꠖꠥꠀꠞꠣ ꠛꠣꠋ ꠖꠤꠟ।
ꠛꠣꠋ ꠢꠥꠘꠤꠀꠃ ꠙꠤꠔꠞꠞ ꠝꠘꠅ ꠅꠁꠉꠦꠟ,
ꠁꠍꠣꠄ ꠇꠁꠍꠟꠣ,
“ꠝꠥꠞꠉꠣꠄ ꠖꠥꠁꠛꠣꠞ ꠛꠣꠋ ꠖꠤꠛꠣꠞ ꠀꠉꠦꠃ ꠔꠥꠝꠤ ꠔꠤꠘꠛꠣꠞ ꠇꠁꠛꠣꠄ,
ꠔꠥꠝꠤ ꠀꠝꠣꠞꠦ ꠌꠤꠘꠅ ꠘꠣ।”
ꠅꠈꠣꠘ ꠝꠘꠅ ꠅꠁꠔꠦꠃ ꠔꠣꠁꠘ ꠀꠃ ꠀꠃ ꠇꠞꠤ ꠇꠣꠘ꠆ꠖꠘ ꠗꠞꠟꠣ।