ꠡꠔ꠆ꠔꠁꠞ ꠎꠘ ꠡꠣꠉꠞꠤꠖꠞꠦ ꠔꠛꠟꠤꠉꠅ ꠙꠣꠑꠣꠁꠟꠣ
১০
১ ꠛꠣꠖꠦ ꠢꠎꠞꠔ ꠁꠍꠣꠄ ꠀꠞꠅ ꠡꠔ꠆ꠔꠁꠞꠎꠘ ꠡꠣꠉꠞꠤꠖꠞꠦ ꠔꠛꠟꠤꠉꠅ ꠙꠣꠑꠣꠁꠔꠣ ꠇꠞꠤ ꠙꠍꠘ꠆ꠖ ꠇꠞꠟꠣ।
ꠔꠣꠁꠘ ꠘꠤꠎꠦ ꠎꠦꠔꠣ ꠐꠣꠃꠘ ꠛꠣ ꠉꠣꠃꠀꠁꠘ꠆ꠔꠅ ꠎꠣꠅꠀꠞ ꠁꠞꠣꠖꠣ ꠇꠞꠍꠤꠟꠣ,
ꠢꠘꠅ ꠎꠣꠁꠛꠣꠞ ꠀꠉꠦ ꠄꠞꠣꠞꠦ ꠖꠥꠁꠎꠘ ꠖꠥꠁꠎꠘ ꠇꠞꠤꠀ ꠙꠣꠑꠣꠁꠟꠣ।
২ ꠙꠣꠑꠣꠘꠤꠞ ꠛꠣꠟꠣ ꠄꠞꠣꠞꠦ ꠇꠁꠟꠣ,
“ꠢꠥꠘꠅ,
ꠎꠝꠤꠘꠅ ꠔ ꠚꠡꠟ ꠛꠃꠔ ꠀꠍꠦ,
ꠅꠁꠟꠦ ꠇꠣꠝꠟꠣ ꠈꠥꠛ ꠇꠝ।
ꠄꠞꠟꠣꠉꠤ ꠎꠝꠤꠘꠞ ꠝꠣꠟꠤꠇꠞ ꠉꠦꠍꠦ ꠖꠥꠀ ꠇꠞꠅ,
ꠔꠣꠘ ꠚꠡꠟ ꠔꠥꠟꠣꠞ ꠟꠣꠉꠤ ꠔꠣꠁꠘ ꠇꠣꠝꠟꠣ ꠙꠣꠑꠣꠁꠛꠣ।
৩ ꠔꠥꠝꠞꠣ ꠅꠈꠘ ꠞꠅꠀꠘꠣ ꠅꠁꠎꠣꠅ।
ꠈꠤꠀꠟ ꠞꠣꠈꠤꠅ,
ꠛꠣꠊꠞ ꠙꠣꠟꠞ ꠝꠣꠎꠦ ꠝꠦꠠꠣ-ꠛꠣꠁꠌ꠆ꠌꠣꠞ ꠟꠣꠈꠣꠘ ꠀꠝꠤ ꠔꠥꠝꠞꠣꠞꠦ ꠙꠣꠑꠣꠁꠟꠣꠝ।
৪ ꠔꠥꠝꠞꠣ ꠎꠣꠅꠀꠞ ꠇꠣꠟꠅ ꠐꠦꠇꠣꠞ ꠕꠟꠤ,
ꠉꠣꠁꠐ-ꠛꠥꠍꠇꠤ,
ꠙꠣꠅꠞ ꠎꠥꠔꠣ ꠁꠔꠣ ꠇꠥꠘ꠆ꠔꠣꠃ ꠟꠉꠦ ꠘꠤꠅ ꠘꠣ,
ꠀꠞ ꠙꠕꠞ ꠝꠣꠎꠦ ꠇꠦꠃꠞꠞꠦ ꠍꠣꠟꠣꠝꠅ ꠇꠞꠤꠅ ꠘꠣ।
৫ ꠎꠦ ꠛꠣꠠꠤꠔ ꠉꠤꠀ ꠢꠣꠝꠣꠁꠛꠣꠄ,
ꠢꠣꠝꠣꠁꠀꠃ ꠇꠁꠅ,
ꠀꠍꠍꠣꠟꠣꠝꠥ ꠀꠟꠣꠁꠇꠥꠝ।
৬ ꠍꠣꠟꠣꠝ ꠟꠅꠀꠞ ꠎꠥꠇꠣ ꠇꠦꠃ ꠢꠤꠘꠅ ꠕꠣꠇꠟꠦ,
ꠔꠥꠝꠞꠣꠞ ꠍꠣꠟꠣꠝ ꠔꠣꠞ ꠃꠙꠞꠦ ꠛꠞꠔꠤꠛ,
ꠀꠞ ꠁꠟꠣ ꠇꠦꠃ ꠘꠣ ꠕꠣꠇꠟꠦ,
ꠔꠥꠝꠞꠣꠞ ꠍꠣꠟꠣꠝ ꠔꠥꠝꠞꠣꠞ ꠉꠦꠍꠦꠃ ꠚꠤꠞꠔ ꠀꠁꠛ।
৭ ꠙꠄꠟꠣ ꠎꠦ ꠛꠣꠠꠤꠔ ꠢꠣꠝꠣꠁꠛꠣꠄ,
ꠢꠃ ꠛꠣꠠꠤꠔꠃ ꠞꠁꠅ।
ꠁ ꠛꠣꠠꠤ ꠍꠣꠠꠤꠀ ꠖꠥꠍꠞꠣ ꠛꠣꠠꠤꠔ ꠎꠣꠁꠅ ꠘꠣ।
ꠔꠣꠞꠣ ꠎꠦꠔꠣ ꠖꠦꠁꠘ ꠅꠔꠣ ꠈꠣꠁꠅ,
ꠇꠣꠞꠘ ꠇꠣꠝꠟꠣꠄ ꠔꠣꠞ ꠛꠦꠔꠘ ꠙꠣꠅꠀꠞ ꠎꠁꠉ꠆ꠉ।
৮ “ꠎꠦꠛꠟꠣ ꠇꠥꠘꠥ ꠉꠣꠃꠔ ꠎꠣꠁꠛꠣꠄ,
ꠢꠤꠘꠞ ꠝꠣꠘꠡꠦ ꠔꠥꠝꠞꠣꠞꠦ ꠇꠛꠥꠟ ꠇꠞꠤꠀ,
ꠔꠣꠞꠣ ꠎꠦꠔꠣ ꠈꠣꠁꠔꠦ ꠖꠦꠁꠘ,
ꠅꠔꠣꠃ ꠈꠣꠁꠅ।
৯ ꠔꠣꠞꠣꠞ ꠛꠦꠝꠣꠞꠤ ꠅꠇꠟꠞ ꠛꠦꠝꠣꠞ ꠜꠣꠟꠣ ꠇꠞꠤꠅ।
ꠔꠣꠞꠣꠞꠦ ꠇꠁꠅ,
ꠀꠟ꠆ꠟꠣꠞ ꠛꠣꠖꠡꠣꠁ ꠔ ꠔꠥꠝꠞꠣꠞ ꠗꠣꠞꠅ ꠀꠁꠌ꠆ꠍꠦ।
১০ ꠅꠁꠟꠦ ꠇꠥꠘꠥ ꠉꠣꠃꠔ ꠉꠦꠟꠦ ꠢꠘꠞ ꠝꠣꠘꠡꠦ ꠎꠥꠖꠤ ꠔꠥꠝꠞꠣꠞꠦ ꠇꠛꠥꠟ ꠘꠣ ꠇꠞꠂꠘ,
ꠔꠦ ꠉꠣꠃꠔ ꠀꠐꠤ ꠀꠐꠤ ꠅꠈꠣꠘ ꠇꠁꠅ,
১১ ꠢꠛꠣ,
ꠔꠥꠝꠞꠣꠞ ꠉꠣꠃꠞ ꠎꠦ ꠗꠥꠁꠟ ꠀꠝꠞꠣꠞ ꠙꠣꠅꠔ ꠟꠣꠉꠍꠦ,
ꠁꠔꠣ ꠀꠝꠞꠣ ꠚꠥꠍꠤꠀ ꠚꠣꠟꠣꠁ ꠖꠤꠞꠣꠝ,
ꠅꠃ ꠗꠥꠁꠟꠦꠃ ꠔꠥꠝꠞꠣꠞ ꠛꠤꠙꠇ꠆ꠇꠦ ꠡꠣꠇ꠆ꠇꠤ ꠖꠤꠛ।
ꠅꠁꠟꠦ ꠝꠘꠅ ꠞꠣꠈꠤꠅ,
ꠀꠟ꠆ꠟꠣꠞ ꠛꠣꠖꠡꠣꠁ ꠇꠣꠘ꠆ꠖꠣꠔ ꠀꠁꠌ꠆ꠍꠦ।
১২ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ,
ꠇꠤꠀꠝꠔꠞ ꠖꠤꠘ ꠟꠣꠘ꠆ꠘꠔꠤ ꠍꠣꠖꠥꠝ ꠐꠣꠃꠘꠞ ꠖꠡꠣ ꠕꠣꠇꠤ,
ꠢꠤ ꠉꠣꠃꠞ ꠖꠡꠣ ꠀꠞꠅ ꠇꠑꠤꠘ ꠅꠁꠛ।
১৩ “ꠢꠣꠄꠞꠦ ꠛꠣꠄꠔ-ꠍꠄꠖꠣ ꠀꠞ ꠈꠥꠞꠣꠍꠤꠘ ꠉꠣꠃ,
ꠔꠥꠝꠞꠣ ꠔ ꠟꠣꠘ꠆ꠘꠔꠤ।
ꠔꠥꠝꠞꠣꠞ ꠝꠣꠎꠦ ꠎꠦꠔꠣ ꠇꠥꠖꠞꠔꠤ ꠇꠣꠝ ꠖꠦꠈꠣꠁꠟ ꠅꠁꠍꠦ,
ꠁꠔꠣ ꠡꠥꠞ ꠀꠞ ꠍꠤꠖꠘ ꠄꠟꠣꠇꠣꠔ ꠖꠦꠈꠣꠁꠟ ꠅꠁꠟꠦ,
ꠔꠣꠞꠣ ꠇꠣꠔꠞ ꠅꠁꠀ ꠔꠃꠛꠣ ꠇꠞꠟ ꠅꠘꠦ।
১৪ ꠀꠍꠟꠦ ꠇꠤꠀꠝꠔꠞ ꠖꠤꠘ ꠡꠥꠞ ꠀꠞ ꠍꠤꠖꠘ ꠄꠟꠣꠇꠣꠞ ꠖꠡꠣ ꠕꠣꠇꠤꠅ,
ꠔꠥꠝꠞꠣꠞ ꠖꠡꠣ ꠛꠃꠔ ꠇꠑꠤꠘ ꠅꠁꠛ।
১৫ ꠀꠞ ꠅ ꠇꠚꠞꠘꠣꠃꠝ ꠐꠣꠃꠘ,
ꠔꠥꠝꠤ ꠛꠥꠟꠦ ꠃꠌꠣ ꠅꠁꠀ ꠀꠍꠝꠣꠘꠅ ꠉꠤꠀ ꠟꠣꠉꠔꠣꠄ?
ꠘꠣ,
ꠙꠣꠞꠔꠣꠄ ꠘꠣꠄ!
ꠔꠥꠝꠣꠞꠦ ꠙꠣꠔꠣꠟꠅ ꠟꠣꠝꠣꠁꠟ ꠅꠁꠛ।
১৬ “ꠔꠥꠝꠞꠣ ꠝꠘꠅ ꠞꠣꠈꠤꠅ,
ꠎꠦꠞꠣ ꠔꠥꠝꠞꠣꠞ ꠇꠕꠣ ꠝꠣꠘꠦ,
ꠔꠣꠞꠣ ꠀꠍꠟꠦ ꠀꠝꠣꠞ ꠇꠕꠣꠃ ꠝꠣꠘꠦ।
ꠀꠞ ꠎꠦꠞꠣ ꠔꠥꠝꠞꠣꠞꠦ ꠝꠣꠘꠦ ꠘꠣ,
ꠔꠣꠞꠣ ꠀꠝꠣꠞꠦꠅ ꠝꠣꠘꠦ ꠘꠣ।
ꠎꠦꠞꠣ ꠀꠝꠣꠞꠦ ꠝꠣꠘꠦ ꠘꠣ,
ꠔꠣꠞꠣ ꠀꠍꠟꠦ ꠢꠃ ꠀꠟ꠆ꠟꠣꠞꠦꠅ ꠝꠣꠘꠦ ꠘꠣ,
ꠎꠦꠁꠘ ꠀꠝꠣꠞꠦ ꠛꠦꠎꠤꠍꠂꠘ।”
১৭ ꠛꠣꠖꠦ ꠢꠤ ꠡꠔ꠆ꠔꠁꠞꠎꠘ ꠡꠣꠉꠞꠤꠖꠦ ꠔꠛꠟꠤꠉ ꠇꠞꠤꠀ ꠈꠥꠛ ꠈꠥꠡ ꠝꠤꠎꠣꠎꠦ ꠚꠤꠞꠔ ꠀꠁꠟꠣ।
ꠀꠁꠀ ꠇꠁꠟꠣ,
“ꠢꠥꠎꠥꠞ,
ꠀꠙꠘꠣꠞ ꠘꠣꠝ ꠢꠥꠘꠟꠦ ꠎꠤꠘ-ꠜꠥꠔꠦꠅ ꠀꠝꠞꠣꠞ ꠇꠕꠣ ꠝꠣꠘꠦ।”
১৮ ꠁꠍꠣꠄ ꠔꠣꠞꠣꠞꠦ ꠇꠁꠟꠣ,
“ꠢꠥꠘꠅ,
ꠀꠝꠤ ꠖꠦꠈꠍꠤ,
ꠁꠛꠟꠤꠍ-ꠡꠄꠔꠣꠘ ꠝꠦꠊꠞ ꠎꠤꠟꠇꠤꠞ ꠟꠣꠈꠣꠘ ꠛꠦꠢꠦꠡ꠆ꠔ ꠕꠣꠇꠤ ꠙꠠꠤꠎꠣꠞ।
১৯ ꠔꠦ ꠀꠝꠤ ꠔꠥꠝꠞꠣꠞꠦ ꠢꠣꠚ-ꠛꠤꠌ꠆ꠍꠥꠞ ꠃꠙꠞꠦꠖꠤ ꠀꠐꠣꠞ ꠈꠦꠝꠔꠣ ꠖꠤꠍꠤ,
ꠀꠞ ꠔꠥꠝꠞꠣꠞ ꠖꠥꠡꠝꠘ,
ꠁꠛꠟꠤꠍꠞ ꠢꠇꠟ ꠡꠇ꠆ꠔꠤꠞ ꠃꠙꠞꠦ ꠔꠥꠝꠞꠣꠞꠦ ꠈꠦꠝꠔꠣ ꠖꠤꠍꠤ।
ꠇꠥꠘꠥꠎꠣꠔ ꠇꠥꠘ꠆ꠔꠣꠄꠃ ꠔꠥꠝꠞꠣꠞ ꠈꠦꠔꠤ ꠇꠞꠔ ꠙꠣꠞꠔ ꠘꠣꠄ।
২০ ꠀꠞ ꠎꠤꠘ-ꠜꠥꠔꠦ ꠔꠥꠝꠞꠣꠞ ꠇꠕꠣ ꠢꠥꠘꠦꠞ ꠖꠦꠈꠤꠀ ꠈꠥꠡꠤ ꠘꠣ ꠅꠁꠀ,
ꠛꠞꠋ ꠛꠦꠢꠦꠡ꠆ꠔꠤ ꠈꠣꠔꠣꠔ ꠔꠥꠝꠞꠣꠞ ꠘꠣꠝ ꠟꠦꠈꠣ ꠅꠁꠍꠦ ꠇꠞꠤꠃ ꠈꠥꠡꠤ ꠇꠞꠅ।”
২১ ꠅꠃ ꠡꠝꠄ ꠁꠍꠣꠅ ꠙꠣꠇ ꠞꠥꠢꠥꠞ ꠛꠟꠦ ꠈꠥꠡꠤ ꠅꠁꠀ ꠇꠁꠟꠣ,
“ꠅ ꠉꠣꠁꠛꠤ ꠛꠣꠛꠣ,
ꠔꠥꠝꠤꠃ ꠔ ꠀꠍꠝꠣꠘ-ꠎꠝꠤꠘꠞ ꠝꠣꠟꠤꠇ।
ꠀꠝꠤ ꠔꠥꠝꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠞꠣꠝ,
ꠇꠣꠞꠘ ꠔꠥꠝꠤ ꠀꠈꠟꠖꠣꠞ-ꠛꠥꠖ꠆ꠖꠤꠝꠣꠘ ꠅꠇꠟꠞ ꠉꠦꠍꠦ ꠁꠔꠣ ꠎꠣꠁꠞ ꠘꠣ ꠇꠞꠤꠀ,
ꠛꠦꠛꠥꠎ-ꠢꠥꠞꠥꠔ꠆ꠔꠣꠞ ꠟꠣꠈꠣꠘ ꠝꠣꠘꠡꠞ ꠉꠦꠍꠦ ꠎꠣꠁꠞ ꠇꠞꠍ।
ꠛꠣꠛꠣ,
ꠀꠍꠟꠦ ꠔ ꠁꠔꠣ ꠢꠇꠟꠔꠣꠃ ꠔꠥꠝꠣꠞ ꠝꠞ꠆ꠎꠤ।
২২ ꠀꠝꠣꠞ ꠉꠣꠁꠛꠤ ꠛꠣꠛꠣꠄ ꠢꠇꠟꠔꠣꠃ ꠀꠝꠣꠞ ꠀꠔꠅ ꠡꠙꠤ ꠖꠤꠍꠂꠘ।
ꠛꠣꠚ ꠍꠣꠠꠣ ꠖꠥꠍꠞꠣ ꠇꠦꠃ ꠎꠣꠘꠦ ꠘꠣ ꠅꠃ ꠙꠥꠔ ꠇꠦ,
ꠀꠞ ꠙꠥꠔ ꠍꠣꠠꠣ ꠖꠥꠍꠞꠣ ꠇꠦꠃ ꠎꠣꠘꠦ ꠘꠣ ꠅꠃ ꠛꠣꠚ ꠇꠦ।
ꠙꠥꠔꠦ ꠛꠣꠚꠞꠦ ꠎꠣꠞ ꠉꠦꠍꠦ ꠎꠣꠁꠞ ꠇꠞꠣꠞ ꠈꠤꠀꠟ ꠅꠄ,
ꠈꠣꠟꠤ ꠢꠦ-ꠃ ꠛꠣꠚꠞ ꠙꠞꠤꠌꠄ ꠙꠣꠄ।”
২৩ ꠛꠣꠖꠦ ꠔꠣꠁꠘ ꠡꠣꠉꠞꠤꠖ ꠅꠇꠟꠞ ꠛꠣꠄ ꠚꠤꠞꠤꠀ ꠇꠣꠘꠦ ꠇꠣꠘꠦ ꠇꠁꠟꠣ,
“ꠔꠥꠝꠞꠣ ꠎꠦꠔꠣ ꠎꠦꠔꠣ ꠖꠦꠈꠍ,
ꠁꠔꠣ ꠖꠦꠈꠣꠞ ꠡꠥꠎꠥꠉ ꠎꠣꠞ ꠅꠄ,
ꠢꠦ-ꠃ ꠘꠦꠇ-ꠇꠙꠣꠟꠤ।
২৪ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ,
ꠔꠥꠝꠞꠣ ꠎꠦꠔꠣ ꠖꠦꠈꠞꠣꠄ,
ꠁꠔꠣ ꠛꠃꠔ ꠘꠛꠤꠄ ꠀꠞ ꠞꠣꠎꠣ-ꠛꠣꠖꠡꠣꠄ ꠖꠦꠈꠣꠞ ꠀꠡꠣ ꠇꠞꠟꠦꠅ,
ꠖꠦꠈꠣꠞ ꠇꠙꠣꠟ ꠅꠁꠍꠦ ꠘꠣ।
ꠔꠥꠝꠞꠣ ꠎꠦꠔꠣ ꠢꠥꠘꠞꠣꠄ,
ꠁꠔꠣ ꠔꠣꠞꠣ ꠢꠥꠘꠔꠦ ꠌꠣꠁꠟꠦꠅ ꠢꠥꠘꠣꠞ ꠇꠙꠣꠟ ꠅꠁꠍꠦ ꠘꠣ।”
ꠢꠇꠟ ꠕꠣꠇꠤ ꠛꠠ ꠢꠥꠇꠥꠝ
২৫ ꠄꠇꠛꠣꠞ ꠄꠇ ꠀꠟꠤꠝ ꠍꠣꠛ ꠁꠍꠣꠞ ꠉꠦꠍꠦ ꠀꠁꠟꠣ।
ꠀꠁꠀ ꠔꠣꠘꠞꠦ ꠙꠞꠤꠇ꠆ꠇꠣ ꠇꠞꠣꠞ ꠟꠣꠉꠤ ꠎꠤꠇꠣꠁꠟꠣ,
“ꠢꠥꠎꠥꠞ,
ꠇꠤꠔꠣ ꠇꠣꠝ ꠇꠞꠟꠦ ꠀꠝꠤ ꠛꠦꠢꠦꠡ꠆ꠔ ꠙꠣꠁꠝꠥ?”
২৬ ꠁꠍꠣꠄ ꠇꠁꠟꠣ,
“ꠝꠥꠍꠣ ꠘꠛꠤꠞ ꠇꠤꠔꠣꠛꠅ ꠇꠤꠔꠣ ꠟꠦꠈꠣ ꠀꠍꠦ?
ꠀꠙꠘꠦ ꠇꠤꠔꠣ ꠙꠣꠁꠍꠂꠘ?”
২৭ ꠀꠟꠤꠝꠦ ꠎꠥꠀꠙ ꠖꠤꠟꠣ,
“ꠟꠦꠈꠣ ꠀꠍꠦ,
ꠔꠥꠝꠤ ꠔꠥꠝꠣꠞ ꠀꠡ꠆ꠔꠣ ꠖꠤꠟ ꠖꠤꠀ,
ꠎꠣꠘ ꠖꠤꠀ,
ꠢꠇꠟ ꠛꠟ-ꠡꠇ꠆ꠔꠤ ꠖꠤꠀ,
ꠔꠥꠝꠣꠞ ꠡꠥꠟ꠆ꠟꠀꠘꠣ ꠝꠘ ꠖꠤꠀ,
ꠔꠥꠝꠣꠞ ꠝꠣꠛꠥꠖ ꠀꠟ꠆ꠟꠣꠞꠦ ꠝꠢꠛ꠆ꠛꠔ ꠇꠞꠛꠣꠄ।
ꠀꠞ,
ꠔꠥꠝꠣꠞ ꠀꠞꠤ-ꠚꠞꠤꠞꠦ ꠘꠤꠎꠞ ꠟꠣꠈꠣꠘ ꠝꠣꠄꠀ ꠇꠞꠛꠣꠄ।”
২৮ ꠁꠍꠣꠄ ꠔꠣꠘꠞꠦ ꠇꠁꠟꠣ,
“ꠀꠙꠘꠦ ꠑꠤꠇ ꠇꠕꠣ ꠇꠁꠍꠂꠘ।
ꠔꠦ ꠀꠙꠘꠦꠅ ꠅꠃꠟꠣ ꠇꠞꠃꠇ꠆ꠇꠣ,
ꠔꠦꠃ ꠛꠦꠢꠦꠡ꠆ꠔ ꠙꠣꠁꠛꠣ।”
২৯ ꠅꠃ ꠀꠟꠤꠝꠦ ꠘꠤꠎꠞ ꠖꠣꠝ ꠛꠣꠠꠣꠘꠤꠞ ꠟꠣꠉꠤ ꠁꠍꠣꠞꠦ ꠇꠁꠟꠣ,
“ꠀꠁꠌ꠆ꠍꠣ,
ꠔꠦ ꠀꠝꠣꠞ ꠀꠞꠤ-ꠚꠞꠤ ꠇꠦ?”
৩০ ꠁꠍꠣꠄ ꠇꠁꠟꠣ,
“ꠢꠥꠘꠃꠇ꠆ꠇꠣ,
ꠄꠇꠎꠘ ꠝꠣꠘꠥꠡ ꠎꠦꠞꠥꠎꠣꠟꠦꠝ ꠕꠣꠇꠤ ꠎꠤꠞꠤꠢꠅ ꠐꠣꠃꠘꠅ ꠎꠣꠅꠀꠔ ꠀꠍꠤꠟ।
ꠙꠕꠅ ꠒꠣꠇꠣꠁꠔꠦ ꠙꠣꠁꠀ ꠔꠣꠞ ꠇꠣꠙꠠ-ꠌꠥꠙꠠ ꠢꠇꠟꠔꠣ ꠇꠣꠠꠤꠀ ꠘꠤꠀ,
ꠔꠣꠞꠦ ꠝꠣꠞꠤꠀ ꠀꠗ-ꠝꠞꠣ ꠇꠞꠤ ꠚꠣꠟꠣꠁ ꠕꠁꠀ ꠉꠦꠟꠉꠤ।
৩১ ꠛꠣꠖꠦ ꠄꠇ ꠁꠝꠣꠝ-ꠍꠣꠛ ꠅꠃ ꠙꠕꠦꠖꠤ ꠎꠣꠁꠞꠣ,
ꠔꠣꠁꠘ ꠅꠃ ꠛꠦꠐꠣꠞꠦ ꠖꠦꠈꠤꠀ ꠉꠣꠟꠣꠛꠣꠄ ꠢꠞꠤꠀ ꠉꠦꠟꠣꠉꠤ।
৩২ ꠅꠃ ꠟꠣꠈꠣꠘ ꠟꠦꠛꠤꠞ ꠈꠣꠘ꠆ꠖꠣꠘꠞ ꠄꠇ ꠈꠣꠖꠤꠝ ꠍꠣꠛꠅ ꠅꠃ ꠙꠕꠦꠖꠤ ꠀꠁꠟꠣ,
ꠔꠣꠁꠘꠅ ꠄꠞꠦ ꠖꠦꠈꠤꠀ ꠉꠣꠟꠣꠛꠣꠄ ꠉꠦꠟꠣꠉꠤ।
৩৩ ꠢꠦꠡꠦ ꠡꠝꠞꠤꠀ ꠎꠣꠔꠤꠞ ꠄꠇ ꠛꠦꠐꠣ ꠅꠃ ꠙꠕꠦꠖꠤ ꠀꠁꠟ,
ꠢꠦ ꠛꠤꠗꠞ꠆ꠝꠤ ꠎꠣꠔꠤꠞ ꠅꠁꠟꠦꠅ ꠄꠞ ꠢꠣꠟꠔ ꠖꠦꠈꠤꠀ ꠔꠣꠞ ꠖꠤꠟꠅ ꠖꠞꠖ ꠢꠣꠝꠣꠁꠟ।
৩৪ ꠅꠃ ꠢꠦ ꠄꠞ ꠎꠈꠝꠞ ꠃꠙꠞꠦ ꠔꠦꠟ ꠀꠞ ꠀꠋꠉꠥꠞꠞ ꠞꠡ ꠝꠣꠟꠤꠡ ꠇꠞꠤꠀ ꠙꠐ꠆ꠐꠤ ꠛꠣꠘ꠆ꠖꠤꠀ ꠖꠤꠟ।
ꠛꠣꠖꠦ ꠔꠣꠞ ꠘꠤꠎꠞ ꠉꠣꠗꠣꠞ ꠃꠙꠞꠦ ꠔꠥꠟꠤꠀ,
ꠄꠇ ꠝꠥꠍꠣꠚꠤꠞ ꠈꠣꠘꠣꠔ ꠘꠤꠀ ꠔꠣꠞ ꠎꠔꠘ ꠇꠞꠟ।
৩৫ ꠛꠣꠖꠞ ꠖꠤꠘ ꠅꠃ ꠡꠝꠞꠤꠅ ꠛꠦꠐꠣꠄ ꠝꠥꠍꠣꠚꠤꠞ ꠈꠣꠘꠣꠞ ꠝꠣꠟꠤꠇꠞ ꠀꠔꠅ ꠖꠥꠁꠐꠣ ꠖꠤꠘꠣꠞ ꠖꠤꠀ ꠇꠂꠟ,
ꠅꠃ ꠝꠣꠘꠥꠡꠉꠥꠞ ꠎꠔꠘ ꠇꠞꠛꠣ।
ꠄꠞ ꠛꠦꠡꠤ ꠈꠞꠌ ꠅꠁꠟꠦꠅ,
ꠀꠝꠤ ꠀꠁꠀ ꠖꠤꠝꠥ।
৩৬ “ꠔꠦ ꠀꠟꠤꠝ ꠍꠣꠛ,
ꠀꠙꠘꠣꠞ ꠇꠤꠔꠣ ꠝꠘꠅ ꠅꠄ,
ꠅꠃ ꠔꠤꠘꠎꠘꠞ ꠝꠣꠎꠦ ꠇꠥꠘ ꠎꠘ,
ꠒꠣꠇꠣꠁꠔꠞ ꠀꠔꠅ ꠙꠤꠐꠣ ꠈꠣꠃꠞꠣ ꠛꠦꠐꠣꠞ ꠀꠞꠤ-ꠚꠞꠤ?”
৩৭ ꠀꠟꠤꠝꠦ ꠇꠁꠟꠣ,
“ꠎꠦ ꠝꠣꠘꠡꠦ ꠔꠣꠞꠦ ꠖꠞꠖ ꠇꠞꠟ ꠢꠦ-ꠃ ꠔ।”
ꠔꠦꠃ ꠁꠍꠣꠄ ꠇꠁꠟꠣ,
“ꠔꠦ ꠀꠙꠘꠦꠅ ꠉꠤꠀ ꠅꠃꠟꠣ ꠇꠞꠃꠇ꠆ꠇꠣ।”
ꠛꠤꠛꠤ ꠝꠣꠞꠕꠣ ꠀꠞ ꠔꠣꠘ ꠛꠁꠘ
৩৮ ꠛꠣꠖꠦ ꠁꠍꠣ ꠀꠞ ꠔꠣꠘ ꠍꠣꠢꠣꠛꠤ ꠅꠇꠟ ꠀꠐꠤ ꠀꠐꠤ ꠄꠇ ꠉꠣꠃꠔ ꠉꠦꠟꠣ।
ꠢꠃ ꠉꠣꠃꠞ ꠄꠇ ꠛꠦꠐꠤ ꠝꠣꠘꠡꠦ ꠈꠥꠡꠤ ꠅꠁꠀ ꠁꠍꠣꠞꠦ ꠔꠣꠘ ꠛꠣꠠꠤꠔ ꠘꠤꠀ ꠝꠦꠝꠣꠘꠖꠣꠞꠤ ꠇꠞꠟꠣ।
ꠅꠃ ꠛꠦꠐꠤꠞ ꠘꠣꠝ ꠝꠣꠞꠕꠣ।
৩৯ ꠛꠦꠐꠤꠞ ꠄꠇ ꠛꠁꠘꠞ ꠘꠣꠝ ꠅꠁꠟ ꠝꠞꠤꠅꠝ,
ꠄꠁꠘ ꠢꠥꠎꠥꠞꠞ ꠙꠣꠅꠞ ꠇꠣꠘ꠆ꠖꠣꠔ ꠛꠁꠀ ꠘꠍꠤꠅꠔ ꠢꠥꠘꠞꠣ।
৪০ ꠀꠞ ꠝꠣꠞꠕꠣ ꠉꠤꠀ ꠞꠣꠘ꠆ꠖꠣ-ꠛꠣꠠꠣ ꠀꠞ ꠈꠣꠔꠤꠞ-ꠎꠔꠘ ꠇꠞꠣꠔ ꠙꠦꠞꠦꠡꠣꠘꠤꠔ ꠞꠁꠟꠣ।
ꠄꠞꠝꠣꠎꠦ ꠝꠣꠞꠕꠣ ꠀꠁꠀ ꠢꠥꠎꠥꠞ ꠁꠍꠣꠞꠦ ꠇꠁꠟꠣ,
“ꠢꠥꠎꠥꠞ,
ꠖꠦꠈꠞꠣ ꠘꠤ ꠀꠝꠣꠞ ꠛꠁꠘꠦ ꠢꠇ꠆ꠇꠟ ꠇꠣꠝ-ꠇꠣꠎ ꠄꠇꠟꠣ ꠀꠝꠣꠞ ꠃꠙꠞꠦ ꠕꠁꠀ ꠅꠘꠅ ꠀꠁꠍꠦ?
ꠔꠦ ꠀꠙꠘꠦ ꠇꠃꠇ꠆ꠇꠣ,
ꠀꠝꠣꠞꠦ ꠡꠣꠁꠎ꠆ꠎ ꠇꠞꠔ।”
৪১ ꠢꠥꠎꠥꠞꠦ ꠇꠁꠟꠣ,
“ꠝꠣꠞꠕꠣ,
ꠔꠥꠝꠤ ꠛꠃꠔ ꠛꠦꠙꠣꠞꠦ ꠌꠤꠘ꠆ꠔꠣ ꠇꠞꠤꠀ ꠙꠦꠞꠦꠡꠣꠘ ꠅꠁꠉꠦꠍ।
৪২ ꠢꠥꠘꠅ,
ꠀꠍꠟꠦ ꠄꠇꠐꠣ ꠛꠦꠙꠣꠞꠃ ꠈꠣꠟꠤ ꠎꠞꠥꠞ ꠀꠍꠦ।
ꠔꠥꠝꠣꠞ ꠛꠁꠘ ꠝꠞꠤꠅꠝꠦ ꠢꠃ ꠎꠞꠥꠞꠤ ꠛꠦꠙꠣꠞꠞꠦ ꠙꠍꠘ꠆ꠖ ꠇꠞꠍꠦ।
ꠁꠔꠣ ꠔ ꠔꠣꠁꠞ ꠉꠦꠍ ꠕꠣꠇꠤ ꠇꠣꠠꠤꠀ ꠘꠦꠅꠀ ꠎꠣꠁꠔ ꠘꠣꠄ।”