ꠛꠦꠁꠝꠣꠘ ꠝꠦꠘꠦꠎꠣꠞꠞ ꠇꠤꠌ꠆ꠍꠣ
১৬
১ ꠛꠣꠖꠦ ꠢꠎꠞꠔ ꠁꠍꠣꠄ ꠔꠣꠘ ꠡꠣꠉꠞꠤꠖ ꠅꠇꠟꠞꠦ ꠇꠁꠟꠣ,
“ꠢꠥꠘꠅ,
ꠇꠥꠘꠥ ꠄꠇ ꠎꠝꠤꠖꠣꠞꠞ ꠄꠇ ꠝꠦꠘꠦꠎꠣꠞ ꠀꠍꠤꠟ।
ꠅꠃ ꠝꠦꠘꠦꠎꠣꠞꠞ ꠛꠖꠘꠣꠝ ꠛꠣꠞꠅꠁꠟ,
ꠢꠦ ꠛꠥꠟꠦ ꠔꠣꠞ ꠝꠥꠘꠤꠛꠞ ꠗꠘ-ꠍꠣꠝꠣꠘꠣ ꠛꠤꠘꠣꠡ ꠇꠞꠤꠟꠣꠞ।
২ ꠛꠖꠘꠣꠝ ꠢꠥꠘꠤꠀ ꠝꠥꠘꠤꠛꠦ ꠔꠣꠞꠦ ꠀꠘꠣꠁꠀ ꠇꠁꠟꠣ,
ꠔꠥꠝꠣꠞ ꠘꠣꠝꠦ ꠁꠔꠣ ꠇꠤꠔꠣ ꠢꠥꠘꠞꠣꠝ?
ꠔꠥꠝꠣꠞ ꠢꠤꠡꠣꠛ-ꠘꠤꠇꠣꠡ ꠢꠇꠟꠔꠣ ꠡꠝꠎꠣꠁ ꠖꠦꠅ।
ꠔꠥꠝꠣꠞꠦ ꠀꠞ ꠌꠣꠇꠞꠤꠔ ꠞꠣꠈꠔꠣꠝ ꠘꠣꠄ।
৩ ꠁꠈꠣꠘ ꠢꠥꠘꠤꠀ ꠝꠦꠘꠦꠎꠣꠞꠦ ꠝꠘꠦ ꠝꠘꠦ ꠇꠂꠟ,
ꠅꠈꠘ ꠀꠝꠤ ꠇꠤꠔꠣ ꠇꠞꠔꠣꠝ?
ꠝꠥꠘꠤꠛꠦ ꠔ ꠀꠝꠣꠞꠦ ꠛꠤꠖꠣꠄ ꠖꠤꠟꠣꠁꠞꠣ।
ꠀꠝꠤ ꠔ ꠝꠣꠐꠤ ꠇꠣꠝꠅ ꠇꠞꠔꠣꠝ ꠙꠣꠞꠔꠣꠝ ꠘꠣꠄ,
ꠜꠤꠇ ꠇꠞꠔꠦꠅ ꠡꠞꠝ ꠟꠣꠉꠦ।
ꠅꠈꠘ ꠈꠣꠁꠝꠥ ꠇꠤꠟꠣ?
৪ ꠀꠁꠌ꠆ꠍꠣ,
ꠄꠇ ꠇꠣꠝ ꠇꠞꠤ,
ꠎꠣꠔꠦ ꠀꠝꠣꠞ ꠝꠦꠘꠦꠎꠣꠞꠤ ꠉꠦꠟꠦꠉꠤꠅ ꠝꠣꠘꠡꠞ ꠊꠞꠅ ꠀꠡꠞꠄ ꠙꠣꠁ।
৫ ꠅꠃ ꠢꠦ ꠇꠤꠔꠣ ꠇꠞꠟ,
ꠎꠣꠞꠣꠞ ꠉꠦꠍꠦ ꠔꠣꠞ ꠝꠥꠘꠤꠛꠞ ꠙꠣꠅꠘꠣ ꠀꠍꠤꠟ,
ꠄꠇ ꠄꠇ ꠇꠞꠤ ꠄꠞꠣꠞꠦ ꠀꠘꠣꠁꠟ।
ꠀꠘꠣꠁꠀ ꠙꠄꠟꠣ ꠎꠘꠞꠦ ꠇꠂꠟ,
ꠔꠥꠝꠣꠞ ꠉꠦꠍꠦ ꠀꠝꠣꠞ ꠝꠥꠘꠤꠛꠞ ꠇꠔ ꠙꠣꠅꠘꠣ ꠀꠍꠦ?
৬ ꠢꠦꠁꠘ ꠇꠁꠟꠣ,
ꠄꠇ-ꠡ ꠝꠘ ꠔꠦꠟ।
ꠝꠦꠘꠦꠎꠣꠞꠦ ꠇꠂꠟ,
ꠎꠟꠖꠤ ꠇꠞꠤ ꠔꠥꠝꠣꠞ ꠈꠣꠔꠣ ꠛꠣꠞ ꠇꠞꠅ,
ꠀꠞ ꠄꠇ-ꠡꠞ ꠛꠖꠟꠣ ꠙꠁꠘ꠆ꠌꠣꠡ ꠝꠘ ꠟꠦꠈꠤꠟꠣꠅ।
৭ ꠛꠣꠖꠦ ꠝꠦꠘꠦꠎꠣꠞꠦ ꠖꠥꠍꠞꠣ ꠎꠘꠞꠦ ꠎꠤꠇꠣꠁꠟ,
ꠔꠥꠝꠣꠞ ꠉꠦꠍꠦ ꠇꠔ ꠙꠣꠁꠘ?
ꠢꠦꠁꠘ ꠇꠁꠟꠣ,
ꠄꠇ-ꠡ ꠚꠥꠞꠣꠞ ꠉꠝ।
ꠝꠦꠘꠦꠎꠣꠞꠦ ꠇꠂꠟ,
ꠔꠥꠝꠣꠞ ꠢꠤꠡꠣꠛꠅ ꠀꠡꠤ ꠚꠥꠞꠣꠞ ꠟꠦꠈꠤꠟꠣꠅ।
৮ ꠁꠔꠣ ꠢꠥꠘꠤꠀ ꠢꠤ ꠎꠝꠤꠖꠣꠞꠦ ꠅꠃ ꠛꠦꠁꠝꠣꠘ ꠝꠦꠘꠦꠎꠣꠞꠞ ꠔꠣꠞꠤꠚ ꠇꠞꠟꠣ।
ꠔꠣꠁꠘ ꠇꠁꠟꠣ,
ꠢꠦ ꠗꠣꠘ꠆ꠖꠣꠛꠣꠎ ꠅꠁꠟꠦꠅ ꠛꠃꠔ ꠛꠠ ꠛꠥꠖ꠆ꠖꠤꠝꠣꠘꠞ ꠇꠣꠝ ꠇꠞꠍꠦ।
ꠔꠦ ꠇꠤꠔꠣ ꠝꠘꠅ ꠇꠞꠅ,
ꠁꠔꠣꠄ ꠛꠥꠎꠣ ꠎꠣꠄ ꠘꠣ ꠘꠤ,
ꠀꠟ꠆ꠟꠣꠞꠣꠁꠀ ꠝꠣꠘꠡꠞ ꠀꠈꠟ ꠕꠣꠇꠤꠅ,
ꠁ ꠎꠝꠣꠘꠣꠞ ꠖꠥꠘꠤꠀꠛꠤ ꠝꠣꠘꠡꠞ ꠙꠦꠌ-ꠙꠣꠁꠌ꠆ꠍꠣ ꠛꠦꠡꠤ।
৯ ꠢꠥꠘꠅ,
ꠀꠝꠤ ꠇꠤꠔꠣ ꠇꠁꠞꠣꠝ,
ꠔꠥꠝꠞꠣꠅ ꠘꠣꠚꠞꠝꠣꠘ ꠅꠃ ꠎꠉꠔꠞ ꠍꠣꠝꠣꠘꠣ ꠖꠤꠀ ꠝꠣꠘꠡꠞ ꠟꠉꠦ ꠖꠥꠡ꠆ꠔꠤ ꠙꠣꠔꠣꠅ,
ꠎꠣꠔꠦ ꠁ ꠍꠣꠝꠣꠘꠣ ꠚꠥꠠꠣꠁꠉꠦꠟꠦꠅ ꠔꠥꠝꠞꠣꠞꠦ ꠛꠦꠢꠦꠡ꠆ꠔꠞ ꠛꠣꠉꠣꠘꠅ ꠚꠥꠟꠞ ꠝꠣꠟꠣ ꠖꠦꠅꠀ ꠅꠄ।
১০ “ꠎꠦ ꠝꠣꠘꠥꠡ ꠡꠣꠝꠣꠁꠘ꠆ꠘ ꠛꠦꠙꠣꠞꠦ ꠢꠇ-ꠢꠣꠟꠣꠟ ꠞꠄ,
ꠢꠦ ꠛꠠ ꠛꠦꠀꠙꠣꠞꠦꠅ ꠢꠇ-ꠢꠣꠟꠣꠟ ꠞꠄ।
ꠅꠁꠟꠦ ꠎꠦ ꠎꠘꠦ ꠡꠣꠝꠣꠁꠘ꠆ꠘ ꠛꠦꠙꠣꠞꠦ ꠛꠦꠁꠝꠣꠘꠤ ꠇꠞꠦ,
ꠢꠦ ꠛꠠ ꠛꠦꠀꠙꠣꠞꠦꠅ ꠛꠦꠁꠝꠣꠘꠤ ꠇꠞꠦ।
১১ ꠔꠦ ꠔꠥꠝꠞꠣ ꠎꠥꠖꠤ ꠖꠥꠘꠤꠀꠛꠤ ꠗꠘ-ꠍꠣꠝꠣꠘꠣꠞ ꠛꠦꠙꠣꠞꠦ ꠢꠇ ꠘꠣ ꠞꠅ,
ꠔꠣꠁꠟꠦ ꠇꠦ ꠔꠥꠝꠞꠣꠞꠦ ꠛꠤꠡ꠆ꠛꠣꠡ ꠇꠞꠤꠀ ꠀꠍꠟ ꠗꠘ ꠖꠤꠛ?
১২ ꠙꠞꠞ ꠍꠣꠝꠣꠘꠣ ꠎꠥꠖꠤ ꠔꠥꠝꠞꠣ ꠑꠤꠇ-ꠑꠣꠇ ꠝꠔ ꠛꠦꠛꠢꠣꠞ ꠇꠞꠔꠣꠄ ꠘꠣ ꠙꠣꠞ,
ꠔꠦ ꠇꠦ ꠔꠥꠝꠞꠣꠞ ꠘꠤꠎꠞ ꠍꠣꠝꠣꠘꠣ ꠔꠥꠝꠞꠣꠞ ꠀꠔꠅ ꠖꠤꠛ?
১৩ ꠇꠥꠘꠥ ꠉꠥꠟꠣꠝꠦ ꠄꠇꠟꠉꠦ ꠖꠥꠁ ꠝꠥꠘꠤꠛꠞ ꠉꠥꠟꠣꠝꠤ ꠇꠞꠔ ꠙꠣꠞꠦ ꠘꠣ।
ꠔꠦ ꠅꠁꠟꠦ ꠢꠦ ꠄꠇꠎꠘꠞꠦ ꠁꠋꠡꠣꠁꠛ,
ꠀꠞꠇ ꠎꠘꠞꠦ ꠝꠣꠄꠀ ꠇꠞꠛ।
ꠄꠇꠎꠘꠞꠦ ꠁꠎ꠆ꠎꠔ ꠖꠤꠛ ꠀꠞ ꠀꠞꠇ ꠎꠘꠞꠦ ꠄꠟꠣꠝꠤ ꠇꠞꠛ।
ꠔꠥꠝꠞꠣꠅ ꠅꠃꠟꠣ,
ꠀꠟ꠆ꠟꠣꠔꠣꠟꠣ ꠀꠞ ꠗꠘ-ꠍꠣꠝꠣꠘꠣ ꠖꠥꠁꠅꠔꠣꠞ ꠉꠥꠟꠣꠝꠤ ꠄꠇꠟꠉꠦ ꠇꠞꠔꠣꠄ ꠙꠣꠞꠔꠣꠄ ꠘꠣꠄ।”
১৪ ꠁꠈꠣꠘ ꠢꠥꠘꠤꠀ ꠚꠞꠤꠡꠤ ꠝꠎꠛꠞ ꠝꠣꠘꠥꠡꠦ ꠁꠍꠣꠞꠦ ꠟꠁꠀ ꠒꠋ-ꠔꠣꠝꠣꠡꠣ ꠟꠣꠉꠣꠁꠟꠣ,
ꠔꠣꠞꠣ ꠔ ꠐꠦꠇꠣ-ꠙꠄꠡꠣꠞꠦ ꠈꠥꠛ ꠝꠣꠄꠀ ꠇꠞꠔꠣ।
১৫ ꠁꠍꠣꠄ ꠔꠣꠞꠣꠞꠦ ꠇꠁꠟꠣ,
“ꠔꠥꠝꠞꠣꠃ ꠔ ꠝꠣꠘꠡꠞ ꠍꠣꠝꠘꠦ ꠘꠤꠎꠞ ꠙꠞꠦꠎꠉꠣꠞꠤ ꠖꠦꠈꠣꠅ,
ꠅꠁꠟꠦ ꠀꠟ꠆ꠟꠣꠄ ꠔꠥꠝꠞꠣꠞ ꠖꠤꠟꠞ ꠈꠛꠞ ꠎꠣꠘꠂꠘ।
ꠝꠣꠘꠡꠞ ꠉꠦꠍꠦ ꠎꠦꠔꠣ ꠈꠥꠛ ꠖꠣꠝꠤ,
ꠀꠟ꠆ꠟꠣꠄ ꠁꠔꠣꠞꠦ ꠊꠤꠘ꠆ꠘꠣꠁꠘ।
১৬ ꠢꠥꠘꠅ,
ꠄꠢꠤꠀ ꠘꠛꠤꠞ ꠡꠝꠄ ꠙꠞ꠆ꠎꠘ꠆ꠔ ꠝꠥꠍꠣꠞ ꠡꠞꠤꠅꠔ,
ꠀꠞ ꠘꠛꠤ ꠅꠇꠟꠞ ꠍꠢꠤꠚꠣ ꠎꠣꠞꠤ ꠀꠍꠤꠟ।
ꠅꠁꠟꠦ ꠅꠈꠘ ꠀꠟ꠆ꠟꠣꠞ ꠛꠣꠖꠡꠣꠁꠞ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠣ ꠅꠞ,
ꠀꠞ ꠝꠣꠘꠡꠦꠅ ꠖꠤꠟꠦ-ꠎꠣꠘꠦ ꠅꠘꠅ ꠖꠣꠈꠤꠟ ꠅꠁꠔꠣ ꠌꠣꠁꠞꠣ।
১৭ ꠅꠁꠟꠦ ꠁ ꠡꠞꠤꠅꠔꠞ ꠄꠇꠐꠣ ꠢꠞꠚ ꠛꠣꠔꠤꠟ ꠅꠀꠞ ꠌꠣꠁꠔꠦ,
ꠀꠍꠝꠣꠘ-ꠎꠝꠤꠘ ꠛꠤꠘꠣꠡ ꠅꠀꠈꠣꠘ ꠛꠃꠔ ꠡꠥꠎꠣ।
১৮ ꠔꠦ ꠢꠥꠘꠅ,
ꠎꠦ ꠛꠦꠐꠣꠄ ꠘꠤꠎꠞ ꠛꠃꠞꠦ ꠔꠣꠟꠣꠇ ꠖꠤꠀ ꠀꠞꠇ ꠛꠦꠐꠤꠞꠦ ꠢꠣꠋꠉꠣ ꠇꠞꠦ,
ꠢꠦ ꠎꠤꠘꠣꠇꠥꠞ।
ꠅꠃꠟꠣ ꠔꠣꠟꠣꠇ ꠙꠣꠅꠀ ꠇꠥꠘꠥ ꠛꠦꠐꠤꠞꠦ ꠎꠦꠉꠤꠄ ꠛꠤꠀ ꠇꠞꠦ,
ꠢꠦ-ꠅ ꠎꠤꠘꠣꠇꠥꠞ।”
ꠟꠣꠍꠣꠞ ꠢꠇꠤꠞ ꠀꠞ ꠄꠇ ꠗꠘꠤ ꠝꠣꠘꠥꠡ
১৯ “ꠄꠇ ꠗꠘꠤ ꠛꠦꠐꠣ ꠀꠍꠤꠟ,
ꠢꠦ ꠞꠣꠎꠣ-ꠛꠣꠖꠡꠣ ꠅꠇꠟꠞ ꠟꠣꠈꠣꠘ ꠖꠣꠝꠤ ꠖꠣꠝꠤ ꠇꠣꠙꠠ-ꠌꠥꠙꠠ ꠚꠤꠘꠔ,
ꠀꠞ ꠢꠣꠝꠦꠡꠣ ꠎꠣꠇ-ꠎꠝꠇ ꠇꠞꠤꠀ ꠚꠥꠞ꠆ꠔꠤ-ꠀꠝꠥꠖ ꠇꠞꠔ।
২০ ꠝꠣꠘꠡꠦ ꠟꠣꠍꠣꠞ ꠘꠣꠝꠞ ꠄꠇ ꠢꠇꠤꠞ ꠛꠦꠐꠣꠞꠦ ꠢꠣꠝꠦꠡꠣ ꠅꠃ ꠗꠘꠤꠞ ꠖꠥꠀꠞꠞ ꠍꠣꠝꠘꠦ ꠛꠅꠀꠁꠀ ꠕꠁꠔꠣ,
ꠔꠣꠞ ꠀꠡ꠆ꠔꠣ ꠉꠔꠞꠅ ꠙꠌꠣ-ꠊꠣ ꠀꠍꠤꠟ,
২১ ꠀꠞ ꠙꠕꠞ ꠇꠥꠔ꠆ꠔꠣꠁꠘ꠆ꠔꠦ ꠀꠁꠀ ꠔꠣꠞ ꠊꠣ ꠎꠤꠚꠞꠣꠖꠤ ꠟꠦꠁꠔꠣ।
ꠅꠃ ꠗꠘꠤꠄ ꠜꠣꠔ ꠈꠣꠁꠀ ꠢꠣꠞꠤ ꠀꠒ꠆ꠒꠤ-ꠉꠥꠒ꠆ꠒꠤ ꠉꠥꠠꠣ-ꠉꠣꠠꠣ ꠎꠦꠔꠣ ꠔꠟꠦ ꠚꠣꠟꠣꠁꠔꠣ,
ꠅꠔꠣ ꠈꠣꠅꠀꠞ ꠟꠣꠉꠤ ꠔꠣꠞ ꠈꠥꠛ ꠁꠌ꠆ꠍꠣ ꠀꠍꠤꠟ।
২২ ꠄꠇꠖꠤꠘ ꠅꠃ ꠢꠇꠤꠞ ꠛꠦꠐꠣ ꠝꠞꠤꠉꠦꠟ,
ꠝꠞꠣꠞ ꠛꠣꠖꠦ ꠀꠟ꠆ꠟꠣꠞ ꠚꠤꠞꠤꠡ꠆ꠔꠣ ꠅꠇꠟꠦ ꠔꠣꠞꠦ ꠁꠛ꠆ꠞꠣꠢꠤꠝ ꠘꠛꠤꠞ ꠇꠥꠟꠅ ꠘꠤꠀ ꠛꠅꠀꠁꠟꠣ।
ꠄꠞꠝꠣꠎꠦ ꠢꠃ ꠗꠘꠤ ꠛꠦꠐꠣꠅ ꠝꠞꠤꠉꠦꠟ,
ꠔꠣꠞꠦ ꠖꠣꠚꠘ ꠇꠞꠣ ꠅꠁꠟ।
২৩ ꠛꠣꠖꠦ ꠢꠦ ꠖꠥꠎꠈꠞ ꠀꠎꠣꠛ ꠕꠣꠇꠤ ꠀꠈꠔꠣ ꠃꠙꠞꠦꠖꠤ ꠌꠣꠁꠀ ꠖꠦꠈꠟ,
ꠖꠥꠞꠁ ꠛꠦꠢꠦꠡ꠆ꠔꠞ ꠝꠣꠎꠦ ꠁꠛ꠆ꠞꠣꠢꠤꠝ ꠘꠛꠤ ꠛꠁ ꠞꠁꠍꠂꠘ,
ꠔꠣꠘ ꠇꠥꠟꠅ ꠢꠃ ꠟꠣꠍꠣꠞ।
২৪ ꠖꠦꠈꠤꠀꠃ ꠢꠦ ꠌꠤꠟ꠆ꠟꠣꠁꠀ ꠇꠂꠟ,
ꠛꠣꠛꠣ ꠁꠛ꠆ꠞꠣꠢꠤꠝ!
ꠀꠝꠣꠞꠦ ꠞꠢꠝ ꠇꠞꠃꠇ꠆ꠇꠣ।
ꠟꠣꠍꠣꠞꠞꠦ ꠀꠝꠣꠞ ꠉꠦꠍꠦ ꠙꠣꠑꠣꠃꠇ꠆ꠇꠣ,
ꠢꠦ ꠔꠣꠞ ꠀꠋꠉꠥꠟꠞ ꠀꠉꠣꠈꠣꠘ ꠙꠣꠘꠤꠔ ꠛꠥꠠꠣꠁꠀ ꠀꠝꠣꠞ ꠎꠤꠚꠞꠣꠞꠦ ꠑꠣꠘ꠆ꠒꠣ ꠇꠞꠃꠇ।
ꠖꠥꠎꠈꠞ ꠁ ꠀꠉꠥꠘꠤꠔ ꠀꠝꠣꠞ ꠛꠠ ꠀꠎꠣꠛ ꠅꠞ।
২৫ ꠁꠛ꠆ꠞꠣꠢꠤꠝꠦ ꠇꠁꠟꠣ,
ꠛꠣꠛꠣꠞꠦ,
ꠝꠘꠅ ꠇꠞꠤꠀ ꠖꠦꠈꠅ,
ꠔꠥꠝꠣꠞ ꠡꠥꠈ ꠔꠥꠝꠤ ꠖꠥꠘꠤꠀꠔꠃ ꠇꠣꠝꠣꠁꠟꠤꠍ,
ꠀꠞ ꠟꠣꠍꠣꠞꠦ ꠛꠃꠔ ꠇꠡ꠆ꠐ ꠇꠞꠍꠦ।
ꠅꠈꠘ ꠁꠘꠅ ꠀꠁꠀ ꠢꠦ ꠀꠞꠣꠝꠦ ꠀꠍꠦ,
ꠀꠞ ꠔꠥꠝꠤ ꠀꠎꠣꠛꠅ ꠀꠍ।
২৬ ꠢꠥꠘꠅ,
ꠁꠔꠣ ꠍꠣꠠꠣꠅ ꠔꠥꠝꠞꠣꠞ ꠀꠞ ꠀꠝꠞꠣꠞ ꠝꠣꠎꠦ ꠅꠈꠘ ꠛꠃꠔ ꠛꠠ ꠚꠣꠇ ꠞꠣꠈꠣ ꠅꠁꠍꠦ।
ꠁꠘꠞ ꠇꠦꠃ ꠁꠌ꠆ꠍꠣ ꠇꠞꠟꠦꠅ ꠔꠥꠝꠞꠣꠞ ꠉꠦꠍꠦ ꠎꠣꠁꠔ ꠙꠣꠞꠔ ꠘꠣꠄ,
ꠀꠞ ꠔꠥꠝꠞꠣꠅ ꠇꠦꠃ ꠁꠌ꠆ꠍꠣ ꠇꠞꠟꠦ ꠁꠘꠅ ꠀꠁꠔꠣꠄ ꠙꠣꠞꠔꠣꠄ ꠘꠣꠄ।
২৭ ꠅꠃ ꠢꠤ ꠗꠘꠤ ꠛꠦꠐꠣꠄ ꠇꠂꠟ,
ꠛꠣꠛꠣ,
ꠔꠦ ꠖꠄꠀ ꠇꠞꠤ ꠟꠣꠍꠣꠞꠞꠦ ꠀꠝꠣꠞ ꠛꠣꠛꠣꠞ ꠛꠣꠠꠤꠈꠣꠘꠅ ꠙꠣꠑꠣꠃꠇ꠆ꠇꠣ।
২৮ ꠢꠘꠅ ꠀꠝꠣꠞ ꠀꠞꠅ ꠙꠣꠌꠉꠥ ꠜꠣꠁ ꠞꠁꠍꠂꠘ।
ꠢꠦ ꠉꠤꠀ ꠀꠝꠣꠞ ꠜꠣꠁꠀꠂꠘꠞꠦ ꠢꠥꠡꠤꠀꠞ ꠇꠞꠃꠇ,
ꠔꠣꠞꠣ ꠎꠣꠘꠥ ꠁ ꠖꠥꠎꠈꠞ ꠀꠎꠣꠛ ꠕꠣꠇꠤ ꠛꠣꠌꠂꠘ।
২৯ ꠁꠛ꠆ꠞꠣꠢꠤꠝꠦ ꠎꠥꠀꠙ ꠖꠤꠟꠣ,
ꠔꠣꠞꠣꠞ ꠉꠦꠍꠦ ꠔ ꠢꠎꠞꠔ ꠝꠥꠍꠣ ꠀꠞ ꠘꠛꠤ ꠅꠇꠟꠞ ꠃꠍꠤꠟ꠆ꠟꠣꠄ ꠛꠃꠔ ꠇꠤꠔꠣꠛ ꠛꠦꠎꠣ ꠅꠁꠍꠦ,
ꠔꠣꠞꠣ ꠅꠃ ꠔꠣꠟꠤꠝ ꠢꠥꠘꠃꠇ।
৩০ ꠢꠃ ꠗꠘꠤꠄ ꠇꠂꠟ,
ꠘꠣ,
ꠘꠣ,
ꠛꠣꠛꠣ ꠁꠛ꠆ꠞꠣꠢꠤꠝ!
ꠝꠥꠞ꠆ꠖꠣ ꠕꠣꠇꠤ ꠇꠦꠃ ꠎꠤꠘ꠆ꠖꠣ ꠅꠁꠀ ꠔꠣꠞꠣꠞ ꠉꠦꠍꠦ ꠉꠦꠟꠦꠃ,
ꠔꠣꠞꠣ ꠔꠃꠛꠣ ꠇꠞꠛꠣ।
৩১ ꠁꠛ꠆ꠞꠣꠢꠤꠝꠦ ꠇꠁꠟꠣ,
ꠔꠣꠞꠣ ꠎꠥꠖꠤ ꠢꠎꠞꠔ ꠝꠥꠍꠣ ꠀꠞ ꠘꠛꠤ ꠅꠇꠟꠞ ꠇꠕꠣ ꠘꠣ ꠢꠥꠘꠦ,
ꠔꠦ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠅꠁꠀ ꠉꠦꠟꠦꠅ ꠔꠣꠞꠣ ꠝꠣꠘꠔ ꠘꠣꠄ।”