ꠅꠘꠘꠤꠅ ꠀꠞ ꠡꠣꠚꠤꠞꠣꠞ ꠛꠦꠁꠝꠣꠘꠤꠞ ꠚꠟ
৫
১ ꠅꠃ ꠡꠝꠄ ꠅꠘꠘꠤꠅ ꠘꠣꠝꠦ ꠄꠇꠎꠘ ꠝꠣꠘꠥꠡ ꠀꠞ ꠔꠣꠞ ꠛꠃ ꠡꠣꠚꠤꠞꠣꠄ ꠔꠣꠞꠣꠞꠅ ꠄꠇꠎꠞꠣ ꠎꠝꠤꠘ ꠛꠦꠌꠤꠟꠣ,
২ ꠛꠦꠌꠤꠀ ꠔꠣꠞ ꠛꠃꠞ ꠎꠣꠘꠣ ꠝꠘ꠆ꠔꠦꠃ ꠎꠝꠤꠘꠞ ꠇꠤꠍꠥ ꠐꠦꠇꠣ ꠘꠤꠎꠞ ꠟꠣꠉꠤ ꠟꠥꠇꠣꠁꠀ,
ꠛꠣꠇꠤ ꠐꠦꠇꠣ ꠍꠣꠢꠣꠛꠤ ꠅꠇꠟꠞ ꠙꠣꠅꠔ ꠖꠤꠟꠣ।
৩ ꠔꠦꠃ ꠙꠤꠔꠞꠦ ꠇꠁꠟꠣ,
“ꠅꠘꠘꠤꠅ,
ꠡꠄꠔꠣꠘꠦ ꠇꠦꠝꠘꠦ ꠔꠥꠝꠣꠞ ꠖꠤꠟꠞꠦ ꠖꠈꠟ ꠇꠞꠟ,
ꠔꠥꠝꠤ ꠙꠣꠇ ꠞꠥꠢꠥꠞ ꠉꠦꠍꠦ ꠇꠤꠟꠣ ꠝꠤꠍꠣ ꠝꠣꠔꠟꠣꠄ,
ꠀꠞ ꠎꠝꠤꠘ ꠛꠦꠌꠣꠞ ꠐꠦꠇꠣ ꠇꠤꠍꠥ ꠟꠥꠇꠣꠁ ꠞꠣꠈꠟꠣꠄ?
৪ ꠛꠦꠌꠣꠞ ꠀꠉꠦ ꠎꠝꠤꠘꠈꠣꠘ ꠇꠤꠔꠣ ꠔꠥꠝꠣꠞ ꠀꠍꠤꠟ ꠘꠣ ꠘꠤ?
ꠀꠞ ꠛꠦꠌꠣꠞ ꠛꠣꠖꠦꠅ ꠔ ꠁ ꠐꠦꠇꠣ ꠔꠥꠝꠣꠞ ꠄꠈꠔꠤꠀꠞꠅ ꠀꠍꠤꠟ,
ꠔꠦ ꠇꠦꠘꠦ ꠔꠥꠝꠣꠞ ꠜꠤꠔꠞꠦ ꠁꠔꠣ ꠢꠣꠝꠣꠁꠟ?
ꠔꠥꠝꠤ ꠔ ꠝꠣꠘꠡꠞ ꠉꠦꠍꠦ ꠝꠤꠍꠣ ꠝꠣꠔꠍ ꠘꠣ,
ꠀꠟ꠆ꠟꠣꠞ ꠉꠦꠍꠦꠃ ꠝꠤꠍꠣ ꠝꠣꠔꠟꠣꠄ।”
৫ ꠁꠔꠣ ꠢꠥꠘꠣꠞ ꠟꠉꠦ ꠟꠉꠦꠃ ꠅꠘꠘꠤꠅ ꠝꠣꠐꠤꠔ ꠙꠠꠤꠀ ꠝꠞꠤꠉꠦꠟ।
ꠀꠞ ꠎꠦꠞꠣ ꠁ ꠊꠐꠘꠣ ꠢꠥꠘꠟ ꠔꠣꠞꠣ ꠢꠇꠟꠦꠃ ꠈꠥꠛ ꠒꠞꠣꠁꠉꠦꠟ।
৬ ꠛꠣꠖꠦ ꠎꠥꠀꠘ ꠅꠇꠟꠦ ꠀꠁꠀ ꠔꠣꠞꠦ ꠇꠣꠚꠘ ꠚꠤꠘ꠆ꠖꠣꠁꠀ ꠛꠣꠞꠦ ꠘꠤꠀ ꠝꠣꠐꠤ ꠖꠤꠟꠣ।
৭ ꠅꠘꠥꠝꠣꠘ ꠔꠤꠘ ꠊꠘ꠆ꠐꠣ ꠛꠣꠖꠦ ꠔꠣꠞ ꠛꠃꠅ ꠢꠘꠅ ꠀꠁꠟ,
ꠅꠁꠟꠦ ꠀꠉꠦ ꠇꠤꠔꠣ ꠊꠐꠍꠦ ꠔꠣꠁ ꠎꠣꠘꠔ ꠘꠣ।
৮ ꠔꠦꠃ ꠙꠤꠔꠞꠦ ꠔꠣꠁꠞꠦ ꠎꠤꠇꠣꠁꠟꠣ,
“ꠀꠝꠣꠞꠦ ꠇꠅ ꠌꠣꠁꠘ,
ꠔꠥꠝꠞꠣ ꠁ ꠎꠝꠤꠘ ꠅꠔ ꠐꠦꠇꠣꠄ ꠛꠦꠌꠤꠍꠟꠣꠄ ꠘꠤ?”
ꠔꠣꠁ ꠇꠂꠟ,
“ꠎꠤꠅꠄ ꠅꠔ ꠐꠦꠇꠣꠄꠃ।”
৯ ꠅꠃ ꠙꠤꠔꠞꠦ ꠇꠁꠟꠣ,
“ꠝꠣꠛꠥꠖꠞ ꠞꠥꠢꠥꠞꠦ ꠙꠞꠤꠇ꠆ꠇꠣ ꠇꠞꠣꠞ ꠟꠣꠉꠤ ꠔꠥꠝꠞꠣ ꠇꠦꠘꠦ ꠄꠇꠝꠔ ꠅꠁꠟꠣꠄ?
ꠖꠦꠈꠅ,
ꠎꠦꠞꠣ ꠔꠥꠝꠣꠞ ꠎꠣꠝꠣꠁꠞꠦ ꠖꠣꠚꠘ ꠇꠞꠍꠦ ꠔꠣꠞꠣ ꠅꠈꠘ ꠖꠞꠎꠣꠞ ꠍꠣꠝꠘꠦ ꠀꠁꠅꠞ,
ꠔꠣꠞꠣ ꠔꠥꠝꠣꠞꠦꠅ ꠛꠣꠞꠦ ꠟꠁꠀ ꠎꠣꠁꠛ।”
১০ ꠟꠉꠦ ꠟꠉꠦꠃ ꠡꠣꠚꠤꠞꠣ ꠙꠤꠔꠞꠞ ꠙꠣꠅꠔ ꠙꠠꠤꠀ ꠝꠞꠤꠉꠦꠟ,
ꠀꠞ ꠅꠃ ꠎꠥꠀꠘ ꠅꠇꠟꠦ ꠊꠞꠅ ꠀꠁꠀ ꠔꠣꠁꠞꠦ ꠝꠞꠣ ꠖꠦꠈꠤꠀ ꠛꠣꠞꠦ ꠘꠤꠀ ꠎꠣꠝꠣꠁꠞ ꠇꠣꠘ꠆ꠖꠣꠔ ꠝꠣꠐꠤ ꠖꠤꠟꠣ।
১১ ꠔꠦꠃ ꠢꠇ꠆ꠇꠟ ꠎꠝꠣꠔ,
ꠀꠞ ꠎꠔ ꠝꠣꠘꠡꠦ ꠁꠔꠣ ꠢꠥꠘꠟ,
ꠢꠇꠟꠦꠃ ꠈꠥꠛ ꠒꠞꠣꠁꠟ।
ꠍꠣꠢꠣꠛꠤ ꠅꠇꠟꠞ ꠇꠦꠞꠣꠝꠔꠤ ꠇꠣꠝ
১২ ꠍꠣꠢꠣꠛꠤ ꠅꠇꠟꠞ ꠀꠔꠣꠘꠦ ꠝꠣꠘꠡꠞ ꠝꠣꠎꠦ ꠛꠃꠔ ꠝꠥꠎꠦꠎꠣ ꠀꠞ ꠇꠦꠞꠣꠝꠔꠤ ꠘꠤꠡꠣꠘꠣ ꠎꠣꠁꠞ ꠅꠁꠔ,
ꠔꠣꠞꠣ ꠢꠇꠟꠦ ꠄꠇ ꠖꠤꠟ ꠅꠁꠀ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠍꠥꠟꠣꠁꠝꠣꠘꠞ ꠛꠣꠞꠤꠘ꠆ꠖꠣꠔ ꠖꠟꠣ ꠅꠁꠔꠣ।
১৩ ꠎꠥꠖꠤꠅ ꠝꠣꠘꠡꠦ ꠔꠣꠞꠣꠞꠦ ꠁꠎ꠆ꠎꠔ ꠇꠞꠔꠣ,
ꠔꠣ-ꠅ ꠀꠞ ꠇꠦꠃ ꠔꠣꠞꠣꠞ ꠟꠉꠦ ꠝꠤꠡꠔꠦ ꠡꠣꠅꠡ ꠇꠞꠟ ꠘꠣ।
১৪ ꠀꠞ ꠖꠤꠘꠦ ꠖꠤꠘꠦ ꠛꠃꠔ ꠛꠦꠐꠣꠁꠘ-ꠛꠦꠐꠤꠘ꠆ꠔꠦ ꠁꠝꠣꠘ ꠀꠘꠤꠀ ꠀꠟ꠆ꠟꠣꠞ ꠖꠟꠅ ꠢꠣꠝꠣꠘꠤꠔ ꠟꠣꠉꠟꠣ।
১৫ ꠀꠞ ꠝꠣꠘꠡꠦ ꠛꠦꠝꠣꠞꠤ ꠅꠇꠟꠞꠦ ꠛꠣꠞꠦ ꠀꠘꠤꠀ ꠙꠕꠞ ꠇꠣꠘ꠆ꠖꠣꠄ ꠇꠣꠘ꠆ꠖꠣꠄ ꠢꠥꠔꠣꠁꠀ ꠀꠞ ꠛꠤꠍꠘꠣ ꠙꠣꠔꠤꠀ ꠛꠅꠀꠁꠀ ꠕꠁꠔꠣ,
ꠎꠣꠔꠦ ꠙꠤꠔꠞꠦ ꠌꠟꠣ-ꠚꠤꠞꠣꠞ ꠡꠝꠄ ꠅꠘ꠆ꠔꠔ ꠔꠣꠘ ꠍꠦꠛꠣ ꠈꠣꠘꠅ ꠔꠣꠞꠣ ꠇꠦꠃꠞꠞ ꠃꠙꠞꠦ ꠙꠠꠦ।
১৬ ꠀꠞ ꠎꠦꠞꠥꠎꠣꠟꠦꠝꠞ ꠇꠣꠘ꠆ꠖꠣ-ꠇꠣꠍꠣꠞ ꠉꠣꠃꠀꠁꠘ ꠕꠣꠇꠤ ꠝꠣꠘꠡꠦ ꠔꠣꠞꠣꠞ ꠛꠦꠝꠣꠞꠤ ꠅꠇꠟꠞꠦ ꠀꠞ ꠎꠤꠘꠞ ꠀꠍꠞ ꠀꠟꠣ ꠝꠣꠘꠡꠞꠦ ꠟꠁꠀ ꠀꠁꠀ ꠜꠤꠠ ꠎꠝꠣꠁꠔ,
ꠔꠣꠞꠣ ꠢꠇ꠆ꠇꠟꠃ ꠜꠣꠟꠣ ꠅꠁꠔ।
ꠢꠇ꠆ꠇꠟ ꠍꠣꠢꠣꠛꠤꠞꠦ ꠀꠐꠇ ꠇꠞꠣ
১৭ ꠁꠔꠣ ꠖꠦꠈꠤꠀ ꠙꠞꠗꠣꠘ ꠁꠝꠣꠝ ꠀꠞ ꠔꠣꠘ ꠟꠉꠞ ꠍꠤꠖ꠆ꠖꠦꠇꠤꠀ ꠅꠇꠟ ꠁꠋꠡꠣꠄ ꠎꠟꠤ-ꠙꠥꠠꠤ ꠃꠑꠟꠣ,
১৮ ꠀꠞ ꠍꠣꠢꠣꠛꠤ ꠅꠇꠟꠞꠦ ꠗꠞꠤꠀ ꠡꠞꠇꠣꠞꠤ ꠎꠦꠟꠅ ꠢꠣꠞꠣꠁꠟꠣ।
১৯ ꠅꠁꠟꠦ ꠞꠣꠁꠔꠇꠥ ꠝꠣꠛꠥꠖꠞ ꠄꠇꠎꠘ ꠚꠤꠞꠤꠡ꠆ꠔꠣꠄ ꠎꠦꠟꠞ ꠖꠥꠀꠞ ꠈꠥꠟꠤꠀ ꠔꠣꠞꠣꠞꠦ ꠛꠣꠞꠦ ꠀꠘꠤꠀ ꠇꠁꠟꠣ,
২০ “ꠔꠥꠝꠞꠣ ꠎꠣꠅ,
ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠃꠛꠣꠁꠀ ꠝꠣꠘꠡꠞ ꠉꠦꠍꠦ ꠘꠄꠀ ꠎꠤꠘ꠆ꠖꠦꠉꠤꠞ ꠇꠕꠣ ꠇꠅ।”
২১ ꠁꠔꠣ ꠢꠥꠘꠤꠀ ꠔꠣꠞꠣ ꠈꠥꠛ ꠡꠇꠣꠟꠦ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠢꠣꠝꠣꠁꠀ ꠝꠣꠘꠡꠞꠦ ꠘꠍꠤꠅꠔ ꠇꠞꠣꠔ ꠟꠣꠉꠟꠣ।
ꠁꠛꠣꠄ ꠙꠞꠗꠣꠘ ꠁꠝꠣꠝ ꠀꠞ ꠔꠣꠘ ꠟꠉꠞ ꠢꠇꠟꠦ ꠀꠁꠀ ꠖꠦꠡꠞ ꠚꠔꠥꠀ ꠇꠝꠤꠐꠤꠞꠦ ꠀꠞ ꠛꠘꠤ ꠁꠍꠞꠣꠁꠟꠞ ꠝꠥꠞꠛ꠆ꠛꠤ ꠅꠇꠟꠞꠦ ꠄꠇꠈꠣꠘꠅ ꠖꠟꠣ ꠇꠞꠟꠣ,
ꠀꠞ ꠍꠣꠢꠣꠛꠤ ꠅꠇꠟꠞꠦ ꠀꠘꠣꠞ ꠟꠣꠉꠤ ꠎꠦꠟ ꠈꠣꠘꠣꠔ ꠝꠣꠘꠥꠡ ꠙꠣꠑꠣꠁꠟꠣ।
২২ ꠅꠁꠟꠦ ꠔꠣꠞꠣ ꠉꠤꠀ ꠄꠞꠣꠞꠦ ꠎꠦꠟ ꠈꠣꠘꠣꠔ ꠙꠣꠁꠟꠣ ꠘꠣ।
ꠅꠃ ꠔꠣꠞꠣ ꠚꠤꠞꠤꠀ ꠀꠁꠀ ꠈꠛꠞ ꠇꠁꠟꠣ,
২৩ “ꠀꠝꠞꠣ ꠖꠦꠈꠍꠤ,
ꠎꠦꠟꠞ ꠖꠞꠎꠣ ꠡꠇ꠆ꠔ ꠇꠞꠤ ꠟꠣꠉꠣꠁꠟ,
ꠀꠞ ꠖꠥꠀꠞꠅ ꠖꠥꠀꠞꠅ ꠙꠣꠞꠣꠖꠣꠞ ꠃꠛꠣꠁ ꠞꠁꠍꠂꠘ,
ꠅꠁꠟꠦ ꠖꠥꠀꠞ ꠈꠥꠟꠤꠀ ꠜꠤꠔꠞꠦ ꠇꠦꠃꠞꠞꠦ ꠙꠣꠁꠟꠣꠝ ꠘꠣ।”
২৪ ꠁꠔꠣ ꠢꠥꠘꠤꠀ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠛꠠ ꠖꠣꠞꠉꠣꠄ ꠀꠞ ꠛꠠ ꠁꠝꠣꠝ ꠅꠇꠟꠦ ꠛꠦꠅꠇꠥꠚ ꠅꠁꠀ ꠌꠤꠘ꠆ꠔꠣꠔ ꠙꠠꠟꠣ,
ꠄꠞ ꠚꠟ ꠇꠤꠔꠣ ꠅꠁꠛ।
২৫ ꠄꠞꠝꠣꠎꠦ ꠇꠥꠘꠥ ꠄꠇꠎꠘꠦ ꠀꠁꠀ ꠔꠣꠞꠣꠞꠦ ꠈꠛꠞ ꠖꠤꠟ,
“ꠖꠦꠈꠃꠇ꠆ꠇꠣ,
ꠀꠙꠘꠣꠞꠣ ꠎꠦ ꠝꠣꠘꠡꠞꠦ ꠎꠦꠟꠅ ꠢꠣꠞꠣꠁꠍꠟꠣ,
ꠔꠣꠞꠣ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠃꠛꠣꠁꠀ ꠝꠣꠘꠡꠞꠦ ꠘꠍꠤꠅꠔ ꠇꠞꠦꠞ।”
২৬ ꠔꠦꠃ ꠛꠠ ꠖꠣꠞꠉꠣꠄ ꠔꠣꠘ ꠍꠤꠙꠣꠁ ꠖꠟꠞꠦ ꠟꠁꠀ ꠢꠘꠅ ꠉꠤꠀ ꠍꠣꠢꠣꠛꠤ ꠅꠇꠟꠞꠦ ꠗꠞꠤꠀ ꠀꠘꠟꠣ,
ꠅꠁꠟꠦ ꠎꠥꠞ-ꠎꠛꠞꠖꠡ꠆ꠔꠤ ꠇꠞꠟꠣ ꠘꠣ ꠇꠣꠞꠘ ꠔꠣꠞꠣ ꠒꠞꠣꠁꠉꠦꠟꠣ,
ꠝꠣꠘꠡꠦ ꠔꠣꠞꠣꠞꠦ ꠙꠣꠔ꠆ꠔꠞꠖꠤ ꠝꠣꠞꠔꠣ ꠙꠣꠞꠂꠘ।
২৭ ꠛꠣꠖꠦ ꠍꠣꠢꠣꠛꠤ ꠅꠇꠟꠞꠦ ꠀꠘꠤꠀ ꠔꠣꠞꠣ ꠚꠔꠥꠀ ꠇꠝꠤꠐꠤꠞ ꠍꠣꠝꠘꠦ ꠃꠛꠣ ꠇꠞꠣꠁꠟꠣ,
ꠀꠞ ꠙꠞꠗꠣꠘ ꠁꠝꠣꠝꠦ ꠄꠞꠣꠞꠦ ꠎꠤꠇꠣꠁꠟꠣ,
২৮ “ꠀꠝꠞꠣ ꠔꠥꠝꠞꠣꠞꠦ ꠖꠠꠣꠁꠀ ꠢꠥꠇꠥꠝ ꠖꠤꠍꠟꠣꠝ,
ꠁ ꠘꠣꠝꠦ ꠇꠥꠘꠥ ꠘꠍꠤꠅꠔ ꠘꠣ ꠇꠞꠣꠞ ꠟꠣꠉꠤ,
ꠔꠣ-ꠅ ꠀꠡ꠆ꠔꠣ ꠎꠦꠞꠥꠎꠣꠟꠦꠝ ꠎꠥꠠꠤ ꠔꠥꠝꠞꠣꠞ ꠔꠣꠟꠤꠝꠦ ꠜꠞꠤꠟꠤꠍ,
ꠀꠞ ꠅꠃ ꠎꠘꠞ ꠈꠥꠘꠞ ꠜꠣꠞ ꠀꠝꠞꠣꠞ ꠃꠙꠞꠦ ꠚꠣꠟꠣꠁꠔꠣꠄ ꠌꠣꠁꠞꠣꠄ।”
২৯ ꠔꠦꠃ ꠙꠤꠔꠞ ꠀꠞ ꠔꠣꠘ ꠟꠉꠞ ꠍꠣꠢꠣꠛꠤ ꠅꠇꠟꠦ ꠎꠥꠀꠙ ꠖꠤꠟꠣ,
“ꠝꠣꠘꠡꠞ ꠢꠥꠇꠥꠝ ꠝꠣꠘꠣꠞ ꠌꠣꠁꠔꠦ ꠀꠟ꠆ꠟꠣꠞ ꠢꠥꠇꠥꠝ ꠝꠣꠘꠣ ꠔ ꠚꠞꠎ।
৩০ ꠀꠝꠞꠣꠞ ꠛꠣꠚ-ꠖꠣꠖꠣꠞ ꠀꠟ꠆ꠟꠣꠄ ꠢꠃ ꠁꠍꠣꠞꠦ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠇꠞꠍꠂꠘ,
ꠎꠦꠘꠞꠦ ꠀꠙꠘꠣꠞꠣ ꠉꠣꠍꠅ ꠟꠐꠇꠣꠁꠀ ꠇꠣꠔꠟ ꠇꠞꠍꠟꠣ,
৩১ ꠀꠟ꠆ꠟꠣꠄ ꠔꠣꠘꠞꠦꠃ ꠔꠞꠣꠘꠦꠀꠟꠣ ꠀꠞ ꠛꠣꠖꠡꠣ ꠛꠣꠘꠣꠁꠀ ꠘꠤꠎꠞ ꠒꠣꠁꠘ ꠉꠣꠟꠣꠔ ꠛꠁꠛꠣꠞ ꠁꠎ꠆ꠎꠔ ꠖꠣꠘ ꠇꠞꠍꠂꠘ,
ꠎꠣꠔꠦ ꠔꠣꠁꠘ ꠛꠘꠤ ꠁꠍꠞꠣꠁꠟ ꠅꠇꠟꠞꠦ ꠔꠃꠛꠣ ꠇꠞꠣꠞ ꠡꠥꠎꠥꠉ,
ꠀꠞ ꠉꠥꠘꠣꠞ ꠝꠣꠚꠤ ꠖꠤꠔꠣ ꠙꠣꠞꠂꠘ।
৩২ ꠀꠝꠞꠣ ꠁ ꠢꠇꠟꠔꠣꠞ ꠡꠣꠇ꠆ꠇꠤ,
ꠀꠞ ꠀꠟ꠆ꠟꠣꠄ ꠔꠣꠘ ꠘꠤꠎꠞ ꠢꠥꠇꠥꠝ ꠝꠣꠘꠞꠣ ꠛꠘ꠆ꠖꠣ ꠅꠇꠟꠞꠦ ꠎꠦ ꠙꠣꠇ ꠞꠥꠢꠥ ꠖꠤꠍꠂꠘ,
ꠢꠃ ꠙꠣꠇ ꠞꠥꠢꠅ ꠄꠞ ꠡꠣꠇ꠆ꠇꠤ।”
৩৩ ꠁꠔꠣ ꠢꠥꠘꠤꠀ ꠔꠣꠞꠣ ꠉꠥꠍꠣꠄ ꠀꠉꠥꠁꠘ ꠅꠁꠉꠦꠟꠣ,
ꠀꠞ ꠍꠣꠢꠣꠛꠤ ꠅꠇꠟꠞꠦ ꠎꠣꠘꠦ ꠝꠣꠞꠣꠞ ꠟꠣꠉꠤ ꠘꠤꠅꠔ ꠇꠞꠟꠣ।
৩৪ ꠅꠁꠟꠦ ꠅꠃ ꠝꠎꠟꠤꠍ ꠕꠣꠇꠤ ꠉꠝꠟꠤꠄꠟ ꠘꠣꠝꠦ ꠚꠞꠤꠡꠤ ꠝꠎꠛꠞ ꠄꠇꠎꠘ ꠝꠣꠘꠥꠡ ꠃꠛꠣꠁꠟꠣ,
ꠔꠣꠁꠘ ꠄꠇꠎꠘ ꠘꠣꠝꠇꠞꠣ ꠝꠃꠟꠣꠘꠣ ꠀꠍꠟꠣ,
ꠢꠇ꠆ꠇꠟꠦ ꠔꠣꠘꠞꠦ ꠁꠎ꠆ꠎꠔ ꠇꠞꠔ,
ꠔꠣꠁꠘ ꠍꠣꠢꠣꠛꠤ ꠅꠇꠟꠞꠦ ꠕꠥꠠꠣ ꠛꠣꠞꠦ ꠘꠦꠅꠀꠞ ꠢꠥꠇꠥꠝ ꠖꠤꠟꠣ।
৩৫ ꠛꠣꠖꠦ ꠔꠣꠁꠘ ꠚꠔꠥꠀ ꠇꠝꠤꠐꠤꠞ ꠝꠣꠘꠡꠞꠦ ꠇꠁꠟꠣ,
“ꠅ ꠛꠘꠤ ꠁꠍꠞꠣꠁꠟ ꠅꠇꠟ,
ꠁ ꠝꠣꠘꠥꠡ ꠅꠇꠟꠞꠦ ꠔꠥꠝꠞꠣ ꠎꠦꠔꠣ ꠇꠞꠔꠣꠄ ꠌꠣꠁꠞꠣꠄ ꠁ ꠛꠦꠙꠣꠞꠦ ꠢꠥꠡꠤꠀꠞ ꠅꠅ।
৩৬ ꠢꠥꠘꠅ,
ꠅꠃ ꠇꠄꠖꠤꠘ ꠀꠉꠦ ꠕꠥꠖꠣ ꠘꠣꠝꠦ ꠄꠇꠎꠘ ꠝꠣꠘꠥꠡ ꠀꠁꠀ ꠈꠥꠛ ꠛꠠ-ꠝꠣꠘꠡꠤ ꠖꠦꠈꠣꠁꠍꠤꠟ,
ꠀꠞ ꠅꠘꠥꠝꠣꠘ ꠌꠣꠁꠞꠡ ꠝꠣꠘꠥꠡ ꠔꠣꠞ ꠖꠟꠅ ꠢꠣꠝꠣꠁꠍꠤꠟ।
ꠔꠣꠞꠦ ꠈꠥꠘ ꠇꠞꠣ ꠅꠁꠟ,
ꠀꠞ ꠔꠣꠞ ꠖꠟꠞ ꠢꠇꠟ ꠝꠣꠘꠥꠡ ꠌꠣꠁꠞꠅꠛꠣꠄ ꠍꠤꠔ꠆ꠞꠤꠉꠦꠍꠦ,
ꠇꠦꠃ ꠖꠟꠅ ꠞꠁꠍꠦ ꠘꠣ।
৩৭ ꠛꠣꠖꠦ ꠉꠣꠟꠤꠟꠞ ꠄꠢꠥꠖꠣ ꠀꠁꠀ ꠖꠦꠡꠞ ꠝꠣꠘꠥꠡ ꠉꠘꠘꠣꠞ ꠛꠍꠞ,
ꠄꠇꠖꠟ ꠝꠣꠘꠡꠞꠦ ꠔꠣꠞ ꠖꠟꠅ ꠢꠣꠞꠣꠁꠀ ꠚꠤꠔꠘꠣ ꠈꠣꠠꠣ ꠇꠞꠟ,
ꠢꠦ-ꠅ ꠝꠞꠤꠉꠦꠟ,
ꠀꠞ ꠔꠣꠞ ꠟꠉꠞ ꠢꠇ꠆ꠇꠟꠅ ꠍꠤꠔ꠆ꠞꠤꠉꠦꠍꠦ।
৩৮ ꠁꠔꠣ ꠖꠦꠈꠤꠀ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ,
ꠔꠥꠝꠞꠣ ꠁ ꠝꠣꠘꠥꠡ ꠅꠇꠟꠞꠦ ꠇꠥꠘ꠆ꠔꠣ ꠇꠞꠤꠅ ꠘꠣ,
ꠔꠣꠞꠣꠞꠦ ꠍꠣꠠꠤ ꠖꠦꠅ,
ꠔꠣꠞꠣꠞ ꠇꠣꠝ-ꠇꠣꠎ ꠀꠞ ꠘꠤꠅꠔ ꠎꠥꠖꠤ ꠝꠣꠘꠥꠡ ꠕꠣꠇꠤ ꠅꠄ,
ꠔꠦ ꠁꠔꠣ ꠄꠝꠘꠦꠃ ꠛꠤꠘꠣꠡ ꠅꠁꠎꠤꠛ।
৩৯ ꠀꠞ ꠎꠥꠖꠤ ꠀꠟ꠆ꠟꠣ ꠕꠣꠇꠤ ꠅꠄ,
ꠔꠦ ꠔꠥꠝꠞꠣ ꠔꠣꠞꠣꠞꠦ ꠕꠣꠝꠣꠁꠔꠣꠄ ꠙꠣꠞꠔꠣꠄ ꠘꠣꠄ,
ꠇꠤ ꠎꠣꠘꠤ ꠢꠦꠡꠦ ꠖꠦꠈꠣ ꠎꠣꠁꠛ ꠎꠦꠘ,
ꠔꠥꠝꠞꠣꠃ ꠀꠟ꠆ꠟꠣꠞ ꠛꠤꠞꠥꠖ꠆ꠖꠦ ꠎꠤꠢꠣꠖ ꠇꠞꠞꠣꠄ।”
ꠉꠝꠟꠤꠄꠟꠞ ꠝꠣꠔꠦ ꠘꠦꠔꠣ ꠅꠇꠟ ꠞꠣꠎꠤ ꠅꠁꠟꠣ,
৪০ ꠔꠣꠞꠣ ꠍꠣꠢꠣꠛꠤ ꠅꠇꠟꠞꠦ ꠇꠣꠍꠣꠔ ꠀꠘꠣꠁꠀ ꠍꠤꠋꠟꠣꠖꠤ ꠝꠣꠞꠟꠣ ꠀꠞ ꠇꠁꠟꠣ,
“ꠔꠥꠝꠞꠣ ꠁꠍꠣꠞ ꠘꠣꠝꠦ ꠇꠥꠘ꠆ꠔꠣ ꠝꠣꠔꠤꠅ ꠘꠣ।”
ꠢꠦꠡꠦ ꠔꠣꠞꠣꠞꠦ ꠍꠣꠠꠤ ꠖꠤꠟꠣ।