ꠢꠎꠞꠔ ꠡ꠆ꠔꠤꠚꠣꠘꠞ ꠀꠈꠦꠞꠤ ꠛꠄꠀꠘ
৭
১ ꠔꠦꠃ ꠙꠞꠗꠣꠘ ꠁꠝꠣꠝꠦ ꠡ꠆ꠔꠤꠚꠣꠘꠞꠦ ꠎꠤꠇꠣꠁꠟꠣ,
“ꠁꠔꠣ ꠇꠤꠔꠣ ꠢꠣꠍꠣꠃ ꠘꠤ?”
২ ꠡ꠆ꠔꠤꠚꠣꠘꠦ ꠎꠥꠀꠙ ꠖꠤꠟꠣ,
“ꠅ ꠜꠣꠁ ꠅꠇꠟ,
ꠛꠣꠛꠣ ꠅꠇꠟ,
ꠢꠥꠘꠃꠇ꠆ꠇꠣ,
ꠀꠝꠞꠣꠞ ꠝꠥꠟ ꠛꠣꠚ ꠁꠛ꠆ꠞꠣꠢꠤꠝ ꠎꠦꠛꠟꠣ ꠢꠣꠞꠣꠘ ꠡꠢꠞꠅ ꠞꠅꠀꠞ ꠀꠉꠦ ꠝꠦꠡꠙꠔꠣꠝꠤꠀꠔ ꠀꠍꠟꠣ,
ꠢꠃ ꠡꠝꠄ ꠀꠟ꠆ꠟꠣꠄ ꠔꠣꠘꠞꠦ ꠖꠤꠖꠣꠞ ꠖꠤꠀ ꠇꠁꠍꠟꠣ,
৩ ‘ꠔꠥꠝꠤ ꠔꠥꠝꠣꠞ ꠖꠦꠡ ꠀꠞ ꠈꠦꠡ-ꠇꠥꠐꠥꠝ ꠍꠣꠠꠤꠀ ꠞꠅꠀꠘꠣ ꠖꠦꠅ,
ꠀꠝꠤ ꠔꠥꠝꠣꠞꠦ ꠎꠦ ꠖꠦꠡ ꠖꠦꠈꠣꠁꠝꠥ ꠢꠃ ꠖꠦꠡꠅ ꠎꠣꠅ।’
৪ ꠅꠃ ꠔꠣꠁꠘ ꠇꠟꠖꠤꠅ ꠅꠇꠟꠞ ꠛꠣꠛꠤꠟ ꠖꠦꠡ ꠕꠣꠇꠤ ꠛꠣꠞꠅꠁꠀ,
ꠢꠣꠞꠣꠘ ꠡꠢꠞꠅ ꠛꠡꠔ ꠇꠞꠟꠣ;
ꠀꠞ ꠔꠣꠘ ꠛꠣꠚꠞ ꠝꠃꠔꠞ ꠛꠣꠖꠦ ꠀꠟ꠆ꠟꠣꠄ ꠔꠣꠘꠞꠦ ꠢꠘ ꠕꠣꠇꠤ ꠁ ꠖꠦꠡꠅ ꠀꠘꠍꠂꠘ,
ꠎꠦꠈꠣꠘꠅ ꠀꠙꠘꠣꠞꠣ ꠅꠈꠘ ꠛꠡꠔ ꠇꠞꠞꠣ।
৫ ꠔꠣ-ꠅ ꠀꠟ꠆ꠟꠣꠄ ꠁꠘꠅ ꠁꠛ꠆ꠞꠣꠢꠤꠝꠞꠦ ꠔꠣꠘ ꠘꠤꠎꠞ ꠛꠟꠔꠦ ꠇꠥꠘ꠆ꠔꠣꠃ ꠖꠤꠟꠣ ꠘꠣ,
ꠙꠣꠅ ꠕꠁꠛꠣꠞ ꠎꠣꠉꠣ ꠈꠣꠘꠅ ꠘꠣ,
ꠅꠁꠟꠦ ꠀꠟ꠆ꠟꠣꠄ ꠔꠣꠘ ꠟꠉꠦ ꠅꠀꠖꠣ ꠇꠞꠟꠣ,
ꠔꠣꠘꠞꠦ ꠀꠞ ꠔꠣꠘ ꠅꠀꠞꠤꠡ ꠅꠇꠟꠞꠦ ꠅꠃ ꠎꠝꠤꠘꠞ ꠝꠣꠟꠤꠇꠣꠘꠣ ꠖꠤꠛꠣ,
ꠎꠥꠖꠤꠅ ꠁ ꠡꠝꠄ ꠁꠛ꠆ꠞꠣꠢꠤꠝꠞ ꠇꠥꠘꠥ ꠀꠅꠟꠣꠖ ꠅꠁꠍꠂꠘ ꠘꠣ।
৬ ꠀꠟ꠆ꠟꠣꠄ ꠔꠣꠘꠞꠦ ꠇꠁꠟꠣ,
‘ꠔꠥꠝꠣꠞ ꠀꠅꠟꠣꠖ ꠅꠇꠟ ꠛꠤꠖꠦꠡꠅ ꠝꠥꠍꠣꠚꠤꠞ ꠞꠁꠛꠣ,
ꠝꠣꠘꠡꠦ ꠔꠣꠞꠣꠞꠦꠖꠤ ꠉꠥꠟꠣꠝꠤ ꠇꠞꠣꠁꠛꠣ,
ꠀꠞ ꠌꠣꠁꠞꠡ ꠛꠞꠍ ꠔꠣꠞꠣꠞ ꠃꠙꠞꠦ ꠎꠥꠟꠥꠝ ꠌꠟꠛ।’
৭ ꠀꠟ꠆ꠟꠣꠄ ꠄꠅꠈꠣꠘꠅ ꠇꠁꠟꠣ,
‘ꠎꠦ ꠎꠣꠔꠤꠄ ꠔꠣꠞꠣꠞꠦꠖꠤ ꠉꠥꠟꠣꠝꠤ ꠇꠞꠣꠁꠛꠣ,
ꠀꠝꠤ ꠢꠤ ꠎꠣꠔꠤꠞ ꠛꠤꠌꠣꠞ ꠚꠄꠍꠣꠟꠣ ꠇꠞꠝꠥ;
ꠛꠣꠖꠦ ꠔꠣꠞꠣ ꠢꠤ ꠖꠦꠡ ꠕꠣꠇꠤ ꠛꠣꠞꠅꠁꠀ ꠀꠁꠀ,
ꠅꠃ ꠎꠣꠉꠣꠔ ꠀꠝꠣꠞ ꠄꠛꠣꠖꠔ ꠇꠞꠛꠣ।’
৮ ꠀꠟ꠆ꠟꠣꠄ ꠔꠣꠘꠞꠦ ꠝꠍꠟꠝꠣꠘꠤ ꠇꠞꠣꠞ ꠢꠥꠇꠥꠝ ꠖꠤꠟꠣ;
ꠢꠦꠡꠦ ꠁꠛ꠆ꠞꠣꠢꠤꠝꠞ ꠙꠥꠀ ꠁꠍꠢꠣꠇꠞ ꠎꠘꠝ ꠅꠁꠟ,
ꠀꠞ ꠔꠣꠁꠘ ꠀꠐ ꠖꠤꠘꠞ ꠖꠤꠘ ꠔꠣꠞ ꠝꠍꠟꠝꠣꠘꠤ ꠇꠞꠣꠁꠟꠣ।
ꠛꠣꠖꠦ ꠁꠍꠢꠣꠇꠦ ꠁꠀꠇꠥꠛꠞꠦ,
ꠀꠞ ꠁꠀꠇꠥꠛꠦ ꠔꠣꠘ ꠙꠥꠀꠂꠘ ꠛꠣꠞꠅ ꠈꠣꠘ꠆ꠖꠣꠘꠞ ꠛꠣꠞꠅꠎꠘ ꠛꠣꠚꠞ ꠝꠍꠟꠝꠣꠘꠤ ꠇꠞꠣꠁꠟꠣ।
৯ “ꠢꠃ ꠈꠣꠘ꠆ꠖꠣꠘꠞ ꠛꠣꠚ ꠅꠇꠟꠦ ꠁꠋꠡꠣ ꠇꠞꠤꠀ ꠁꠃꠍꠥꠚꠞꠦ ꠛꠦꠌꠤꠟꠣꠁꠟꠦ,
ꠔꠣꠘꠞꠦ ꠝꠤꠡꠞ ꠖꠦꠡꠅ ꠘꠦꠅꠀ ꠅꠁꠟ।
ꠅꠁꠟꠦ ꠀꠟ꠆ꠟꠣ ꠁꠃꠍꠥꠚꠞ ꠟꠉꠦ ꠟꠉꠦ ꠀꠍꠟꠣ,
১০ ꠔꠣꠁꠘ ꠁꠃꠍꠥꠚꠞꠦ ꠢꠇꠟ ꠔꠇꠟꠤꠚ ꠕꠣꠇꠤ ꠢꠦꠚꠣꠎꠔ ꠇꠞꠟꠣ,
ꠝꠤꠡꠞꠞ ꠛꠣꠖꠡꠣ ꠚꠦꠞꠣꠃꠘꠞ ꠘꠎꠞꠅ ꠖꠄꠀ ꠀꠞ ꠇꠣꠝꠤꠀꠛꠤ ꠖꠣꠘ ꠇꠞꠟꠣ;
ꠔꠦꠃ ꠚꠦꠞꠣꠃꠘꠦ ꠔꠣꠘꠞꠦ ꠝꠤꠡꠞꠞ ꠢꠣꠇꠤꠝ ꠀꠞ ꠀꠡ꠆ꠔꠣ ꠞꠣꠎꠛꠣꠠꠤꠞ ꠖꠦꠈꠣ-ꠢꠥꠘꠣꠞ ꠜꠣꠞ ꠖꠤꠟꠣ।
১১ ꠛꠣꠖꠦ ꠙꠥꠞꠣ ꠝꠤꠡꠞ ꠀꠞ ꠇꠦꠘꠣꠘ ꠖꠦꠡꠅ ꠘꠤꠖꠣꠘ ꠖꠦꠈꠣ ꠖꠤꠟ ꠄꠞꠟꠣꠉꠤ ꠝꠣꠘꠡꠞ ꠈꠥꠛ ꠖꠥꠞ꠆ꠉꠔꠤ ꠅꠁꠍꠤꠟ,
ꠀꠞ ꠀꠝꠞꠣꠞ ꠛꠣꠚ-ꠖꠣꠖꠣ ꠅꠇꠟꠅ ꠈꠣꠘꠤꠞ ꠅꠜꠣꠛꠅ ꠙꠠꠟꠣ।
১২ ꠅꠁꠟꠦ ꠝꠤꠡꠞꠅ ꠚꠡꠟ ꠀꠍꠦ ꠢꠥꠘꠤꠀ,
ꠁꠀꠇꠥꠛꠦ ꠀꠝꠞꠣꠞ ꠛꠣꠚ-ꠖꠣꠖꠣ ꠅꠇꠟꠞꠦ ꠙꠄꠟꠣ ꠛꠣꠞ ꠢꠤꠈꠣꠘꠅ ꠙꠣꠑꠣꠁꠟꠣ।
১৩ ꠛꠣꠖꠦ ꠖꠥꠍꠞꠣꠛꠣꠞꠞ ꠛꠣꠟꠣ ꠁꠃꠍꠥꠚꠦ ꠔꠣꠘ ꠜꠣꠁꠀꠂꠘꠞꠦ ꠎꠣꠘꠣꠁꠟꠣ ꠔꠣꠁꠘ ꠇꠦ,
ꠀꠞ ꠚꠦꠞꠣꠃꠘꠦ ꠁꠃꠍꠥꠚꠞ ꠙꠞꠤꠛꠣꠞꠞꠦ ꠌꠤꠘ ꠙꠣꠁꠟꠣ।
১৪ ꠁꠃꠍꠥꠚꠦ ꠔꠣꠘ ꠛꠣꠛꠣ ꠁꠀꠇꠥꠛ ꠀꠞ ꠘꠤꠎꠞ ꠈꠦꠡ-ꠇꠥꠐꠥꠝ ꠝꠤꠟꠣꠁꠀ ꠢꠇ꠆ꠇꠟꠔꠣꠄ ꠙꠌꠔ꠆ꠔꠁꠞ ꠎꠘꠞꠦ ꠈꠛꠞꠖꠤ ꠀꠘꠣꠁꠟꠣ।
১৫ ꠁꠀꠇꠥꠛ ꠝꠤꠡꠞꠅ ꠀꠁꠟꠣ,
ꠢꠦꠡꠦ ꠔꠣꠁꠘ ꠀꠞ ꠀꠝꠞꠣꠞ ꠛꠣꠚ-ꠖꠣꠖꠣ ꠅꠇꠟꠅ ꠝꠣꠞꠣ ꠉꠦꠟꠣ।
১৬ ꠔꠣꠞꠣꠞ ꠟꠣꠡ ꠡꠤꠈꠤꠝꠅ ꠀꠘꠤꠀ ꠇꠄꠛꠞ ꠖꠦꠅꠀ ꠅꠁꠟ,
ꠁ ꠇꠛꠞꠡ꠆ꠕꠣꠘ ꠁꠛ꠆ꠞꠣꠢꠤꠝꠦ ꠡꠤꠈꠤꠝ ꠡꠢꠞꠞ ꠢꠝꠥꠞꠞ ꠈꠣꠘ꠆ꠖꠣꠘꠞ ꠉꠦꠍ ꠕꠣꠇꠤ ꠞꠥꠙꠣꠞ ꠐꠦꠇꠣ ꠖꠤꠀ ꠈꠞꠤꠖ ꠇꠞꠍꠟꠣ।
১৭ “ꠁꠛ꠆ꠞꠣꠢꠤꠝꠞ ꠉꠦꠍꠦ ꠀꠟ꠆ꠟꠣꠄ ꠎꠦꠔꠣ ꠅꠀꠖꠣ ꠇꠞꠍꠤꠟꠣ,
ꠢꠤ ꠅꠀꠖꠣ ꠙꠥꠞꠘ ꠅꠀꠞ ꠡꠝꠄ ꠎꠦꠛꠟꠣ ꠇꠣꠍꠣꠁ ꠉꠦꠟ,
ꠁ ꠡꠝꠄ ꠝꠤꠡꠞꠅ ꠀꠝꠞꠣꠞ ꠝꠣꠘꠡꠞ ꠙꠞꠤꠝꠣꠘ ꠛꠃꠔ ꠅꠁꠉꠦꠍꠦ।
১৮ ꠢꠦꠡꠦ ꠝꠤꠡꠞꠅ ꠄꠇ ꠘꠄꠀ ꠛꠣꠖꠡꠣ ꠅꠁꠟꠣ,
ꠄꠁꠘ ꠁꠃꠍꠥꠚꠞ ꠛꠦꠙꠣꠞꠦ ꠇꠥꠘ꠆ꠔꠣ ꠎꠣꠘꠔꠣ ꠘꠣ।
১৯ ꠢꠤ ꠛꠣꠖꠡꠣꠄ ꠀꠝꠞꠣꠞ ꠝꠣꠘꠡꠞꠦ ꠐꠉꠣꠁꠔꠣ ꠀꠞ ꠀꠝꠞꠣꠞ ꠛꠣꠚ-ꠖꠣꠖꠣ ꠅꠇꠟꠞ ꠃꠙꠞꠦ ꠈꠥꠛ ꠎꠥꠟꠥꠝ ꠇꠞꠔꠣ,
ꠔꠣꠘ ꠘꠤꠅꠔ ꠀꠍꠤꠟ ꠄꠞꠣꠞ ꠢꠥꠞꠥꠔ꠆ꠔꠣꠂꠘ ꠎꠘꠝꠞ ꠛꠣꠖꠦꠃ ꠎꠣꠔꠦ ꠛꠣꠞꠦ ꠚꠣꠟꠣꠁ ꠖꠦꠅꠀ ꠅꠄ,
ꠀꠞ ꠔꠣꠞꠣ ꠝꠞꠤ ꠎꠣꠁꠘ।
২০ ꠢꠃ ꠡꠝꠄ ꠢꠎꠞꠔ ꠝꠥꠍꠣꠞ ꠎꠘꠝ ꠅꠁꠟ,
ꠀꠟ꠆ꠟꠣꠞ ꠘꠎꠞꠅ ꠔꠣꠁꠘ ꠈꠥꠛ ꠡꠥꠘ꠆ꠖꠞ ꠀꠍꠟꠣ।
ꠔꠤꠘ ꠝꠣꠡ ꠙꠞ꠆ꠎꠘ꠆ꠔ ꠔꠣꠁꠘ ꠔꠣꠘ ꠝꠣ-ꠛꠣꠚꠞ ꠛꠣꠠꠤꠔ ꠀꠍꠟꠣ।
২১ ꠛꠣꠖꠦ ꠔꠣꠘꠞꠦ ꠛꠣꠞꠦ ꠚꠣꠟꠣꠁ ꠖꠦꠅꠀ ꠅꠁꠟꠦ,
ꠚꠦꠞꠣꠃꠘꠞ ꠙꠥꠠꠤꠄ ꠔꠣꠘꠞꠦ ꠘꠤꠀ ꠘꠤꠎꠞ ꠙꠥꠀ ꠛꠣꠘꠣꠁꠀ ꠙꠣꠟꠤꠀ ꠛꠠ ꠇꠞꠟꠣ।
২২ ꠝꠥꠍꠣ ꠝꠤꠡꠞꠤꠄ ꠁꠟꠤꠝ ꠀꠞ ꠀꠖꠛ-ꠈꠣꠁꠍꠟꠔꠦ ꠛꠠ ꠅꠁꠟꠣ,
ꠔꠣꠁꠘ ꠇꠕꠣꠄ ꠀꠞ ꠇꠣꠝꠦ ꠢꠤꠝ꠆ꠝꠔꠤ ꠀꠍꠟꠣ।
২৩ ꠛꠣꠖꠦ ꠝꠥꠍꠣꠞ ꠛꠄꠅꠡ ꠎꠦꠛꠟꠣ ꠌꠣꠟ꠆ꠟꠤꠡ ꠛꠞꠍ ꠅꠁꠟ,
ꠅꠃ ꠔꠣꠘ ꠖꠤꠟꠞ ꠝꠣꠎꠦ ꠘꠤꠎꠞ ꠛꠘꠤ ꠁꠍꠞꠣꠁꠟꠤ ꠜꠣꠁ ꠅꠇꠟꠞꠦ ꠖꠦꠈꠣ-ꠢꠥꠘꠣ ꠇꠞꠣꠞ ꠈꠤꠀꠟ ꠅꠁꠟ।
২৪ ꠔꠣꠁꠘ ꠛꠣꠞꠅꠁꠀ ꠖꠦꠈꠟꠣ,
ꠄꠇꠎꠘ ꠝꠤꠡꠞꠤꠄ ꠄꠇ ꠁꠍꠞꠣꠁꠟꠤꠞ ꠃꠙꠞꠦ ꠎꠥꠟꠥꠝ ꠇꠞꠦꠞ,
ꠔꠣꠁꠘ ꠢꠃ ꠁꠍꠞꠣꠁꠟꠤꠞꠦ ꠡꠣꠁꠎ꠆ꠎ ꠇꠞꠣꠔ ꠉꠦꠟꠣ,
ꠀꠞ ꠝꠤꠡꠞꠤꠞꠦ ꠇꠣꠔꠟ ꠇꠞꠤꠀ ꠄꠞ ꠛꠖꠟꠣ ꠟꠁꠟꠣ।
২৫ ꠝꠥꠍꠣꠄ ꠝꠘꠦ ꠇꠞꠍꠤꠟꠣ ꠔꠣꠘ ꠎꠣꠔꠤꠞ ꠝꠣꠘꠡꠦ ꠛꠥꠎꠛꠣ ꠎꠦꠘ,
ꠀꠟ꠆ꠟꠣꠄ ꠔꠣꠘꠞꠦ ꠖꠤꠀꠃ ꠔꠣꠞꠣꠞꠦ ꠃꠖ꠆ꠖꠣꠞ ꠇꠞꠛꠣ;
ꠅꠁꠟꠦ ꠔꠣꠞꠣ ꠁꠔꠣ ꠛꠥꠎꠟꠣ ꠘꠣ।
২৬ ꠛꠣꠖꠞ ꠖꠤꠘ ꠝꠥꠍꠣꠄ ꠖꠥꠁꠎꠘ ꠁꠍꠞꠣꠁꠟꠤꠞꠦ ꠝꠣꠁꠞ ꠇꠞꠣꠔ ꠖꠦꠈꠤꠀ,
ꠔꠣꠞꠣꠞꠦ ꠝꠤꠟ-ꠝꠤꠡ ꠇꠞꠣꠞ ꠘꠤꠅꠔꠦ ꠇꠁꠟꠣ,
‘ꠅꠂ ꠔꠥꠝꠞꠣ ꠔ ꠜꠣꠁ ꠜꠣꠁ,
ꠔꠦ ꠔꠥꠝꠞꠣ ꠇꠦꠘꠦ ꠄꠇꠎꠘ ꠀꠞꠇ ꠎꠘꠞ ꠟꠉꠦ ꠝꠣꠞꠣ-ꠝꠣꠞꠤ ꠇꠞꠞꠣꠄ?’
২৭ ꠅꠁꠟꠦ ꠎꠦ ꠝꠣꠘꠡꠦ ꠛꠣꠖ ꠛꠦꠛꠢꠣꠞ ꠇꠞꠣꠔ ꠀꠍꠤꠟ,
ꠢꠦ ꠝꠥꠍꠣꠞꠦ ꠑꠦꠟꠣ ꠝꠣꠞꠤ ꠚꠣꠟꠣꠁꠀ ꠇꠂꠟ,
‘ꠅꠛꠣ,
ꠔꠥꠝꠣꠞꠦ ꠇꠦꠉꠤꠄ ꠀꠝꠞꠣꠞ ꠃꠙꠞꠦ ꠡꠣꠟꠤꠡ ꠀꠞ ꠢꠣꠇꠤꠝ ꠛꠣꠘꠣꠁꠍꠦ?
২৮ ꠇꠣꠁꠟ ꠎꠦꠟꠣ ꠢꠃ ꠝꠤꠡꠞꠤꠞꠦ ꠈꠥꠘ ꠇꠞꠍ,
ꠀꠝꠣꠞꠦꠅ ꠅꠟꠣ ꠇꠞꠔꠣꠄ ꠌꠣꠅ ꠘꠤ?’
২৯ ꠁꠈꠣꠘ ꠢꠥꠘꠤꠀꠃ ꠝꠥꠍꠣꠄ ꠜꠣꠉꠤꠀ ꠝꠣꠖꠤꠀꠘ ꠖꠦꠡꠅ ꠉꠦꠟꠣꠉꠤ,
ꠀꠞ ꠢꠤꠈꠣꠘꠅ ꠔꠣꠘ ꠖꠥꠁ ꠙꠥꠀꠞ ꠎꠘꠝ ꠅꠁꠟ।
৩০ “ꠛꠣꠖꠦ ꠀꠞꠅ ꠌꠣꠟ꠆ꠟꠤꠡ ꠛꠞꠍ ꠉꠥꠎꠞꠤ ꠉꠦꠟꠦ,
ꠔꠥꠞ ꠙꠣꠠꠞ ꠇꠣꠘ꠆ꠖꠣꠔ ꠝꠞꠥꠜꠥꠝꠤꠔ,
ꠀꠉꠥꠁꠘ ꠎꠣꠟꠣꠁꠟ ꠎꠋꠟꠣꠞ ꠝꠣꠎ ꠕꠘꠦ ꠄꠇ ꠚꠤꠞꠤꠡ꠆ꠔꠣꠄ ꠝꠥꠍꠣꠞꠦ ꠖꠞꠡꠘ ꠖꠤꠟꠣ।
৩১ ꠝꠥꠍꠣꠄ ꠁꠔꠣ ꠖꠦꠈꠤꠀ ꠄꠇ꠆ꠇꠦꠞꠦ ꠔꠣꠁꠎ꠆ꠎꠥꠛ ꠛꠘꠤꠉꠦꠟꠣ,
ꠀꠞ ꠜꠣꠟꠣ ꠇꠞꠤ ꠖꠦꠈꠣꠞ ꠘꠤꠅꠔꠦ ꠇꠣꠘ꠆ꠖꠣꠔ ꠎꠣꠁꠞꠣ,
ꠅꠃ ꠡꠝꠄ ꠝꠣꠛꠥꠖꠞ ꠀꠅꠀꠎ ꠢꠥꠘꠟꠣ,
৩২ ‘ꠀꠝꠤ ꠔꠥꠝꠣꠞ ꠛꠣꠚ-ꠖꠣꠖꠣꠞ ꠀꠟ꠆ꠟꠣ,
ꠁꠛ꠆ꠞꠣꠢꠤꠝ,
ꠁꠍꠢꠣꠇ ꠀꠞ ꠁꠀꠇꠥꠛꠞ ꠀꠟ꠆ꠟꠣ।’
ꠔꠦꠃ ꠝꠥꠍꠣꠄ ꠒꠞꠣꠁꠀ ꠇꠣꠙꠣ ꠡꠥꠞꠥ ꠇꠞꠟꠣ,
ꠀꠞ ꠜꠣꠟꠣ ꠇꠞꠤ ꠖꠦꠈꠣꠞ ꠡꠣꠅꠡ ꠙꠣꠁꠟꠣ ꠘꠣ।
৩৩ ꠝꠣꠛꠥꠖꠦ ꠔꠣꠘꠞꠦ ꠇꠁꠟꠣ,
‘ꠔꠥꠝꠣꠞ ꠙꠣꠅꠞ ꠎꠥꠔꠣ ꠈꠥꠟꠤꠟꠣꠅ,
ꠇꠣꠞꠘ ꠔꠥꠝꠤ ꠎꠦꠘꠅ ꠃꠛꠣꠁꠍ ꠁꠈꠣꠘ ꠙꠣꠇ ꠎꠣꠉꠣ।
৩৪ ꠢꠥꠘꠅ,
ꠀꠝꠤ ꠝꠤꠡꠞ ꠖꠦꠡꠅ ꠀꠝꠣꠞ ꠙ꠆ꠞꠎꠣ ꠅꠇꠟꠞ ꠔꠇꠟꠤꠚ ꠖꠦꠈꠍꠤ,
ꠀꠝꠤ ꠔꠣꠞꠣꠞ ꠀꠢꠣꠎꠣꠞꠤ ꠢꠥꠘꠍꠤ,
ꠔꠣꠞꠣꠞꠦ ꠃꠖ꠆ꠖꠣꠞ ꠇꠞꠣꠞ ꠟꠣꠉꠤ ꠟꠣꠝꠤꠀ ꠀꠁꠍꠤ,
ꠅꠈꠘ ꠀꠝꠤ ꠔꠥꠝꠣꠞꠦ ꠝꠤꠡꠞ ꠖꠦꠡꠅ ꠚꠤꠞꠔ ꠙꠣꠑꠣꠁꠝꠥ।’
৩৫ “ꠄꠁꠘ ꠢꠃ ꠝꠥꠍꠣ,
ꠎꠣꠞꠦ ꠁꠍꠞꠣꠁꠟꠤ ꠅꠇꠟꠦ ꠅꠃ ꠇꠕꠣ ꠇꠁꠀ ꠚꠤꠞꠔ ꠖꠤꠍꠤꠟ,
ꠇꠦ ꠔꠥꠝꠣꠞꠦ ꠡꠣꠟꠤꠡ ꠀꠞ ꠢꠣꠇꠤꠝ ꠛꠣꠘꠣꠁꠍꠦ?
ꠔꠣꠘꠞꠦꠃ ꠀꠟ꠆ꠟꠣꠞ ꠎꠦ ꠚꠤꠞꠤꠡ꠆ꠔꠣꠄ ꠎꠋꠟꠣꠞ ꠝꠣꠎꠦ ꠖꠦꠈꠣ ꠖꠤꠍꠟꠣ,
ꠢꠃ ꠚꠤꠞꠤꠡ꠆ꠔꠣꠞ ꠀꠔꠣꠘꠦ ꠛꠘꠤ ꠁꠍꠞꠣꠁꠟꠞ ꠡꠣꠟꠤꠡ ꠀꠞ ꠔꠞꠣꠘꠦꠀꠟꠣ ꠛꠣꠘꠣꠁꠀ ꠙꠣꠑꠣꠁꠟꠣ।
৩৬ ꠀꠞ ꠅꠃ ꠝꠥꠍꠣꠄꠃ ꠝꠤꠡꠞꠞ ꠘꠤꠟ ꠖꠞꠤꠀ ꠀꠞ ꠝꠞꠥꠜꠥꠝꠤꠔ ꠌꠣꠟ꠆ꠟꠤꠡ ꠛꠞꠍ ꠛꠃꠔ ꠇꠦꠞꠣꠝꠔꠤ ꠀꠞ ꠝꠥꠎꠦꠎꠣ ꠇꠣꠝ ꠇꠞꠤꠀ,
ꠝꠤꠡꠞ ꠖꠦꠡ ꠕꠣꠇꠤ ꠁꠍꠞꠣꠁꠟꠤ ꠅꠇꠟꠞꠦ ꠛꠣꠞ ꠇꠞꠤ ꠀꠘꠍꠟꠣ।
৩৭ “ꠄꠁꠘ ꠢꠃ ꠝꠥꠍꠣ,
ꠎꠦꠁꠘ ꠛꠘꠤ ꠁꠍꠞꠣꠁꠟꠞꠦ ꠇꠁꠍꠟꠣ,
ꠀꠟ꠆ꠟꠣꠄ ꠔꠥꠝꠞꠣꠞ ꠟꠣꠉꠤ ꠔꠥꠝꠞꠣꠞ ꠘꠤꠎꠞ ꠝꠣꠘꠥꠡ ꠕꠣꠇꠤ,
ꠀꠝꠣꠞ ꠟꠣꠈꠣꠘ ꠄꠇꠎꠘ ꠘꠛꠤꠞꠦ ꠛꠦꠎꠤꠛꠣ।
৩৮ ꠅꠃ ꠝꠥꠍꠣꠃ ꠔ ꠝꠞꠥꠜꠥꠝꠤꠔ ꠀꠝꠞꠣꠞ ꠛꠣꠚ-ꠖꠣꠖꠣ ꠛꠘꠤ ꠁꠍꠞꠣꠁꠟꠞ ꠟꠉꠦ ꠀꠍꠟꠣ।
ꠀꠞ ꠎꠦ ꠚꠤꠞꠤꠡ꠆ꠔꠣꠄ ꠔꠥꠞ ꠙꠣꠠꠅ ꠛꠣꠔꠌꠤꠔ ꠇꠞꠍꠤꠟꠣ,
ꠅꠃ ꠝꠥꠍꠣꠞ ꠟꠉꠦꠃ ꠔꠣꠁꠘ ꠝꠣꠔꠤꠍꠟꠣ।
ꠀꠞ ꠀꠝꠞꠣꠞꠦ ꠖꠤꠛꠣꠞ ꠟꠣꠉꠤ ꠎꠤꠘ꠆ꠖꠣ-ꠇꠣꠟꠣꠝ ꠅꠃ ꠝꠥꠍꠣꠞ ꠉꠦꠍꠦꠃ ꠖꠦꠅꠀ ꠅꠁꠍꠤꠟ।
৩৯ “ꠅꠁꠟꠦ ꠀꠝꠞꠣꠞ ꠛꠣꠚ-ꠖꠣꠖꠣ ꠅꠇꠟꠦ ꠝꠥꠍꠣꠞ ꠢꠥꠇꠥꠝ ꠝꠣꠘꠔꠣ ꠌꠣꠁꠟꠣ ꠘꠣ,
ꠔꠣꠞꠣ ꠝꠥꠍꠣꠞꠦ ꠢꠞꠣꠁ ꠕꠁꠀ ꠝꠘꠦ ꠝꠘꠦ ꠢꠤꠞꠛꠣꠞ ꠝꠤꠡꠞꠞ ꠛꠣꠄ ꠘꠤꠅꠔ ꠇꠞꠤꠀ ꠢꠣꠞꠥꠘꠞꠦ ꠇꠁꠟꠣ,
৪০ ‘ꠀꠝꠞꠣꠞꠦ ꠙꠕ ꠌꠤꠘꠣꠁꠀ ꠟꠁꠀ ꠎꠣꠅꠀꠞ ꠟꠣꠉꠤ ꠖꠦꠛꠔꠣ ꠛꠣꠘꠣꠁ ꠖꠦꠃꠇ꠆ꠇꠣ।
ꠇꠣꠞꠘ ꠎꠦ ꠝꠥꠍꠣꠄ ꠝꠤꠡꠞ ꠖꠦꠡ ꠕꠣꠇꠤ ꠀꠝꠞꠣꠞꠦ ꠛꠣꠞ ꠇꠞꠤ ꠀꠘꠍꠂꠘ,
ꠔꠣꠘ ꠖꠡꠣ ꠇꠤꠔꠣ ꠅꠁꠍꠦ,
ꠀꠝꠞꠣ ꠔ ꠎꠣꠘꠤ ꠘꠣ।’
৪১ ꠅꠃ ꠡꠝꠄ ꠔꠣꠞꠣ ꠉꠞꠥꠞ ꠛꠣꠍꠥꠞꠞ ꠟꠣꠈꠣꠘ ꠄꠇ ꠝꠥꠞ꠆ꠔꠤ ꠛꠣꠘꠣꠁꠟꠣ,
ꠀꠞ ꠅꠃ ꠝꠥꠞ꠆ꠔꠤꠞ ꠘꠣꠝꠦ ꠛꠟꠤ ꠖꠤꠟꠣ,
ꠘꠤꠎꠞ ꠀꠔꠞ ꠛꠣꠘꠣꠁꠟ ꠝꠥꠞ꠆ꠔꠤꠞꠦ ꠟꠁꠀ ꠔꠣꠞꠣ ꠚꠥꠞ꠆ꠔꠤ-ꠀꠝꠥꠖ ꠇꠞꠟꠣ।
৪২ ꠅꠁꠟꠦ ꠀꠟ꠆ꠟꠣꠄ ꠘꠣꠞꠣꠎ ꠅꠁꠀ ꠔꠣꠞꠣꠞ ꠟꠉ ꠍꠣꠠꠤ ꠖꠤꠟꠣ,
ꠀꠞ ꠔꠣꠞꠣꠞꠦ ꠀꠍꠝꠣꠘꠞ ꠌꠣꠘ-ꠡꠥꠞꠥꠎ,
ꠔꠦꠞꠣꠞ ꠙꠥꠎꠣꠔ ꠛꠥꠠꠣꠁ ꠕꠁꠟꠣ;
ꠎꠦꠟꠣ ꠘꠛꠤ ꠅꠇꠟꠞ ꠇꠤꠔꠣꠛꠅ ꠟꠦꠈꠍꠂꠘ:
ꠅ ꠁꠍꠞꠣꠁꠟ ꠎꠣꠔꠤ,
ꠝꠞꠥꠜꠥꠝꠤꠔ ꠢꠤ ꠌꠣꠟ꠆ꠟꠤꠡ ꠛꠞꠍ,
ꠔꠥꠝꠞꠣ ꠀꠝꠣꠞ ꠘꠣꠝꠦ ꠇꠥꠘꠥ ꠙꠡꠥ ꠇꠥꠞꠛꠣꠘꠤ ꠖꠤꠍꠟꠣꠄ ꠘꠤ?
৪৩ ꠘꠣ,
ꠔꠥꠝꠞꠣ ꠔ ꠝꠥꠟꠇ ꠖꠦꠛꠔꠣꠞ ꠝꠥꠞ꠆ꠔꠤ,
ꠀꠞ ꠞꠤꠚꠘ ꠖꠦꠛꠔꠣꠞ ꠔꠦꠞꠣ ꠛꠣꠘꠣꠁ ꠇꠣꠘ꠆ꠖꠅ ꠟꠁꠀ ꠊꠥꠞꠍ।
ꠢꠃ ꠖꠥꠁꠅ ꠙꠥꠔꠥꠟ ꠔ ꠙꠥꠎꠣ ꠇꠞꠣꠞ ꠘꠤꠅꠔꠦ ꠛꠣꠘꠣꠁꠍꠟꠣꠄ,
ꠄꠞꠟꠣꠉꠤ ꠀꠝꠤ ꠔꠥꠝꠞꠣꠞꠦ ꠛꠣꠛꠤꠟ ꠖꠦꠡꠞ ꠢꠙꠣꠞꠅ ꠛꠘꠛꠣꠡ ꠖꠤꠝꠥ।
৪৪ ꠔꠦ ꠡꠣꠢꠣꠖꠔ ꠔꠣꠝ꠆ꠛꠥꠞ ꠇꠣꠛꠣ ꠡꠞꠤꠚ ꠝꠞꠥꠜꠥꠝꠤꠔ ꠀꠝꠞꠣꠞ ꠛꠣꠚ-ꠖꠣꠖꠣꠁꠘ꠆ꠔꠞ ꠉꠦꠍꠦ ꠀꠍꠤꠟ।
ꠔꠣꠁꠘ ꠝꠥꠍꠣꠞꠦ ꠢꠥꠇꠥꠝ ꠖꠤꠍꠟꠣ,
ꠔꠥꠝꠤ ꠎꠦꠟꠣꠈꠣꠘ ꠘꠇꠡꠣ ꠖꠦꠈꠟꠣꠄ,
ꠅꠃ ꠟꠣꠈꠣꠘ ꠇꠞꠤ ꠁꠐꠣ ꠔꠤꠀꠞ ꠇꠞꠅ।
৪৫ ꠀꠝꠞꠣꠞ ꠛꠣꠚ-ꠖꠣꠖꠣ ꠅꠇꠟꠦ ꠢꠤ ꠇꠣꠛꠣ ꠡꠞꠤꠚ ꠙꠣꠁꠀ,
ꠔꠣꠞꠣꠞ ꠀꠝꠤꠃ ꠁꠃꠍꠣꠞ ꠀꠔꠣꠘꠦ ꠘꠤꠎꠞ ꠟꠉꠦ ꠇꠞꠤ ꠀꠝꠞꠣꠞ ꠁ ꠖꠦꠡꠅ ꠀꠘꠍꠤꠟꠣ,
ꠔꠣꠞꠣ ꠎꠦꠛꠟꠣ ꠢꠤ ꠖꠦꠡꠅ ꠢꠣꠝꠣꠁꠍꠤꠟ ꠁ ꠡꠝꠄ ꠀꠟ꠆ꠟꠣꠄ ꠔꠣꠞꠣꠞ ꠍꠣꠝꠘ ꠕꠣꠇꠤ ꠢꠤꠘꠞ ꠝꠣꠘꠡꠞꠦ ꠈꠦꠖꠣꠁ ꠖꠤꠍꠟꠣ।
ꠢꠤ ꠔꠣꠝ꠆ꠛꠥ ꠢꠎꠞꠔ ꠖꠣꠃꠖꠞ ꠀꠝꠟ ꠙꠞ꠆ꠎꠘ꠆ꠔ ꠅꠃ ꠖꠦꠡꠅ ꠀꠍꠤꠟ।
৪৬ “ꠖꠣꠃꠖꠦ ꠀꠟ꠆ꠟꠣꠞ ꠞꠢꠝꠔ ꠢꠣꠍꠤꠟ ꠇꠞꠍꠤꠟꠣ,
ꠀꠞ ꠁꠀꠇꠥꠛꠞ ꠀꠟ꠆ꠟꠣꠞ ꠘꠣꠝꠦ ꠄꠇꠈꠣꠘ ꠊꠞ ꠛꠣꠘꠣꠁꠛꠣꠞ ꠀꠞꠎꠤ ꠇꠞꠍꠟꠣ।
৪৭ ꠅꠁꠟꠦ ꠢꠎꠞꠔ ꠍꠥꠟꠣꠁꠝꠣꠘꠦ ꠔꠣꠘ ꠟꠣꠉꠤ ꠢꠤ ꠊꠞ ꠛꠣꠘꠣꠁꠍꠟꠣ।
৪৮ ꠔꠣ-ꠅ ꠀꠟ꠆ꠟꠣꠔꠣꠟꠣ ꠔ ꠝꠣꠘꠡꠞ ꠀꠔꠞ ꠛꠣꠘꠣꠁꠟ ꠊꠞꠅ ꠛꠡꠔ ꠇꠞꠂꠘ ꠘꠣ;
ꠎꠦꠟꠣ ꠘꠛꠤꠄ ꠇꠁꠍꠂꠘ,
৪৯ ꠝꠣꠛꠥꠖꠦ ꠇꠂꠘ,
ꠛꠦꠢꠦꠡ꠆ꠔ ꠀꠝꠣꠞ ꠔꠈ꠆ꠔ,
ꠖꠥꠘꠤꠀ ꠀꠝꠣꠞ ꠙꠣꠅ ꠕꠁꠛꠣꠞ ꠎꠣꠉꠣ,
ꠔꠥꠝꠞꠣ ꠀꠝꠣꠞ ꠟꠣꠉꠤ ꠇꠤꠎꠣꠔ ꠊꠞ ꠛꠣꠘꠣꠁꠛꠣꠄ?
ꠀꠝꠣꠞ ꠎꠤꠞꠣꠘꠤꠞ ꠎꠣꠉꠣ ꠇꠥꠀꠁ?
৫০ ꠁ ꠢꠇ꠆ꠇꠟꠔꠣ ꠇꠤꠔꠣ ꠀꠝꠣꠞ ꠘꠤꠎꠞ ꠀꠔꠦ
ꠛꠣꠘꠣꠁꠍꠤ ꠘꠣ ꠘꠤ?
৫১ “ꠅ ꠉꠣꠠꠔꠦꠠꠣꠞ ꠎꠣꠔ!
ꠇꠣꠘ ꠀꠞ ꠖꠤꠟꠞ ꠝꠍꠟꠝꠣꠘꠤ ꠘꠣ ꠇꠞꠣꠁꠟ ꠎꠣꠔ!
ꠔꠥꠝꠞꠣ ꠢꠣꠝꠦꠡꠣ ꠙꠣꠇ ꠞꠥꠢꠥꠞ ꠖꠥꠀꠞ ꠛꠘ꠆ꠖ ꠇꠞꠤ ꠕꠅ।
ꠔꠥꠝꠞꠣꠞ ꠛꠣꠚ-ꠖꠣꠖꠣꠁꠘ ꠎꠦꠟꠣ ꠀꠍꠟꠣ,
ꠔꠥꠝꠞꠣꠅ ꠅꠃꠟꠣ ꠅꠁꠍ।
৫২ ꠔꠥꠝꠞꠣꠞ ꠛꠣꠚ-ꠖꠣꠖꠣꠁꠘ꠆ꠔꠦ ꠇꠥꠘ ꠘꠛꠤꠞ ꠃꠙꠞꠦ ꠎꠥꠟꠥꠝ ꠇꠞꠍꠂꠘ ꠘꠣ?
ꠔꠣꠞꠣ ꠔ ꠢꠃ ꠘꠛꠤ ꠅꠇꠟꠞꠦ ꠇꠣꠔꠟꠅ ꠇꠞꠍꠦ,
ꠎꠦꠞꠣ ꠀꠉꠦ ꠁ ꠖꠤꠘꠖꠣꠞ ꠎꠘ ꠀꠁꠛꠣꠞ ꠇꠕꠣ ꠄꠟꠣꠘ ꠇꠞꠍꠂꠘ।
ꠅꠃ ꠖꠤꠘꠖꠣꠞ ꠎꠘꠞꠦ ꠅꠈꠘ ꠔꠥꠝꠞꠣꠅ ꠖꠥꠡꠝꠘꠞ ꠀꠔꠅ ꠡꠙꠤꠀ ꠇꠣꠔꠟ ꠇꠞꠣꠁꠍ।
৫৩ ꠚꠤꠞꠤꠡ꠆ꠔꠣ ꠅꠇꠟꠞ ꠝꠣꠎꠖꠤ ꠘꠣꠎꠤꠟ ꠅꠀ ꠡꠞꠤꠅꠔ ꠔꠥꠝꠞꠣꠞꠦ ꠖꠦꠅꠀ ꠅꠁꠍꠤꠟ,
ꠅꠁꠟꠦ ꠁꠔꠣ ꠀꠝꠟ ꠇꠞꠍ ꠘꠣ।”
ꠙꠄꠟꠣ ꠡꠢꠤꠖ ꠢꠎꠞꠔ ꠡ꠆ꠔꠤꠚꠣꠘ
৫৪ ꠁꠔꠣ ꠢꠥꠘꠤꠀꠃ ꠔꠣꠞꠣ ꠉꠥꠍꠣꠄ ꠀꠉꠥꠁꠘ ꠅꠁꠉꠦꠟꠣ,
ꠀꠞ ꠖꠣꠔ ꠇꠤꠠꠤ-ꠝꠤꠠꠤ ꠇꠞꠣ ꠗꠞꠟꠣ।
৫৫ ꠅꠁꠟꠦ ꠡ꠆ꠔꠤꠚꠣꠘꠦ ꠙꠣꠇ ꠞꠥꠢꠦ ꠇꠣꠝꠤꠟ ꠅꠁꠀ ꠛꠦꠢꠦꠡ꠆ꠔꠞ ꠛꠣꠄ ꠗꠤꠀꠘ ꠗꠞꠤ ꠌꠣꠁꠀ ꠀꠟ꠆ꠟꠣꠞ ꠡꠣꠘ-ꠔꠎꠟ꠆ꠟꠤ ꠖꠦꠈꠟꠣ,
ꠀꠞ ꠁꠍꠣꠞꠦ ꠀꠟ꠆ꠟꠣꠞ ꠒꠣꠁꠘ ꠛꠣꠎꠥꠔ ꠃꠛꠣ ꠖꠦꠈꠟꠣ।
৫৬ ꠔꠦꠃ ꠔꠣꠁꠘ ꠇꠁꠟꠣ “ꠖꠦꠈꠃꠇ꠆ꠇꠣ,
ꠀꠝꠤ ꠖꠦꠈꠞꠣꠝ ꠛꠦꠢꠦꠡ꠆ꠔ ꠈꠥꠟꠣ ꠀꠍꠦ,
ꠀꠞ ꠁꠍꠣ ꠛꠤꠘ-ꠀꠖꠝ ꠀꠟ꠆ꠟꠣꠞ ꠒꠣꠁꠘꠦ ꠃꠛꠣꠁ ꠞꠁꠍꠂꠘ।”
৫৭ ꠀꠞ ꠔꠣꠞꠣ ꠇꠣꠘꠅ ꠀꠋꠉꠥꠟ ꠖꠤꠀ ꠄꠇꠟꠉꠦ ꠌꠤꠟ꠆ꠟꠣꠁꠀ ꠡ꠆ꠔꠤꠚꠣꠘꠞ ꠃꠙꠞꠦ ꠃꠠꠤꠀ ꠉꠤꠀ ꠙꠠꠟꠣ।
৫৮ ꠔꠣꠘꠞꠦ ꠐꠣꠘꠤꠀ ꠡꠢꠞꠞ ꠛꠣꠞꠦ ꠘꠤꠀ ꠙꠣꠔ꠆ꠔꠞ ꠝꠣꠞꠣꠔ ꠟꠣꠉꠟꠣ;
ꠀꠞ ꠛꠣꠖꠤ ꠅꠇꠟꠦ ꠎꠣꠞꠎꠤꠞ ꠇꠣꠙꠠ ꠈꠥꠟꠤꠀ ꠡꠃꠟ ꠘꠣꠝꠞ ꠄꠇ ꠎꠥꠀꠘꠞ ꠙꠣꠅꠞ ꠇꠣꠘ꠆ꠖꠣꠔ ꠕꠁꠟꠣ।
৫৯ ꠝꠣꠘꠡꠦ ꠎꠦꠛꠟꠣ ꠡ꠆ꠔꠤꠚꠣꠘꠞꠦ ꠙꠣꠔ꠆ꠔꠞ ꠝꠣꠞꠞꠣ,
ꠅꠃ ꠡꠝꠄ ꠔꠣꠁꠘ ꠖꠥꠀ ꠇꠞꠤꠀ ꠇꠁꠟꠣ,
“ꠅ ꠝꠣꠟꠤꠇ ꠁꠍꠣ,
ꠀꠝꠣꠞ ꠞꠥꠢꠥꠞꠦ ꠇꠛꠥꠟ ꠇꠞꠃꠇ꠆ꠇꠣ।”
৬০ ꠇꠁꠀꠃ ꠔꠣꠁꠘ ꠀꠐꠥ ꠉꠣꠟꠣ ꠖꠤꠀ ꠎꠥꠞꠦ ꠌꠤꠟ꠆ꠟꠣꠁꠀ ꠇꠁꠟꠣ,
“ꠝꠣꠟꠤꠇ,
ꠄꠞꠣꠞ ꠁ ꠉꠥꠘꠣꠞꠦ ꠀꠝꠟꠅ ꠗꠞꠤꠅ ꠘꠣ।”
ꠅꠈꠣꠘ ꠇꠁꠀꠃ ꠔꠣꠁꠘ ꠀꠈꠦꠞꠤ ꠖꠝ ꠍꠣꠠꠤ ꠖꠤꠟꠣ।
ꠀꠞ ꠇꠞꠟꠦ ꠢꠘꠅ ꠡ꠆ꠔꠤꠚꠣꠘꠞ ꠈꠥꠘꠞ ꠢꠥꠇꠥꠝꠞ ꠟꠉꠦ ꠡꠣꠄ ꠖꠤꠟꠣ।