ꠀꠖꠣꠟꠔꠅ ꠢꠎꠞꠔ ꠙꠣꠃꠟꠥꠍꠞ ꠀꠙꠤꠟ
২৫
১ ꠁ ꠖꠦꠡꠅ ꠀꠅꠀꠞ ꠔꠤꠘ ꠖꠤꠘ ꠛꠣꠖꠦ ꠚꠤꠡ꠆ꠔꠍ ꠇꠂꠍꠞꠤꠀ ꠕꠣꠇꠤ ꠎꠦꠞꠥꠎꠣꠟꠦꠝꠅ ꠉꠦꠟꠣ।
২ ꠅꠃ ꠡꠝꠄ ꠛꠠ ꠁꠝꠣꠝ ꠀꠞ ꠁꠢꠥꠖꠤ ꠘꠦꠔꠣ ꠅꠇꠟꠦ ꠔꠣꠘ ꠉꠦꠍꠦ ꠀꠁꠀ ꠙꠣꠃꠟꠥꠍꠞ ꠛꠦꠙꠣꠞꠦ ꠘꠣꠟꠤꠡ ꠖꠤꠟꠣ।
ꠔꠣꠞꠣ ꠚꠤꠡ꠆ꠔꠍꠞ ꠉꠦꠍꠦ ꠈꠥꠛ ꠝꠤꠘꠔ-ꠇꠣꠎ꠆ꠎꠤ ꠇꠞꠤ ꠇꠁꠟꠣ,
৩ ꠔꠣꠁꠘ ꠎꠣꠘꠥ ꠝꠦꠢꠦꠞꠛꠣꠘꠤ ꠇꠞꠤ ꠙꠣꠃꠟꠥꠍꠞꠦ ꠎꠦꠞꠥꠎꠣꠟꠦꠝꠅ ꠀꠘꠣꠁꠘ।
ꠔꠣꠞꠣꠞ ꠝꠔꠟꠛ ꠀꠍꠤꠟ,
ꠙꠣꠃꠟꠥꠍꠞꠦ ꠀꠘꠣꠞ ꠡꠝꠄ ꠙꠕꠞ ꠝꠣꠎꠦ ꠟꠥꠇꠣꠁꠀ ꠞꠁꠀ ꠝꠣꠞꠤꠟꠤꠔꠣ।
৪ ꠢꠣꠇꠤꠝ ꠚꠤꠡ꠆ꠔꠍꠦ ꠔꠣꠞꠣꠞꠦ ꠇꠁꠟꠣ,
“ꠙꠣꠃꠟꠥꠍꠞꠦ ꠔ ꠇꠂꠍꠞꠤꠀꠔ ꠀꠐꠇ ꠞꠣꠈꠣ ꠅꠁꠍꠦ,
ꠀꠞ ꠀꠝꠤꠅ ꠈꠥꠛ ꠔꠣꠉꠖꠣ ꠇꠞꠤ ꠢꠤꠈꠣꠘꠅ ꠎꠣꠁꠞꠣꠝ।
৫ ꠔꠦ ꠔꠥꠝꠞꠣꠞ ꠝꠣꠎ ꠕꠣꠇꠤ ꠛꠥꠎꠖꠣꠞ ꠇꠄꠎꠘ ꠀꠝꠣꠞ ꠟꠉꠦ ꠀꠁꠅ,
ꠢꠦ ꠇꠥꠘꠥ ꠖꠥꠡ ꠇꠞꠟꠦ ꠄꠞ ꠘꠣꠟꠤꠡ ꠖꠤꠛꠣꠄ।”
৬ ꠚꠤꠡ꠆ꠔꠍ ꠔꠣꠞꠣꠞ ꠟꠉꠦ ꠀꠐ-ꠖꠡ ꠖꠤꠘ ꠞꠁꠀ ꠢꠣꠞꠟꠦ ꠇꠂꠍꠞꠤꠀꠔ ꠉꠦꠟꠣꠉꠤ।
ꠉꠤꠀ ꠛꠣꠖꠞ ꠖꠤꠘ ꠔꠣꠁꠘ ꠀꠖꠣꠟꠔꠅ ꠛꠁꠀ,
ꠙꠣꠃꠟꠥꠍꠞꠦ ꠔꠣꠘ ꠍꠣꠝꠘꠦ ꠀꠎꠤꠞ ꠇꠞꠣꠞ ꠢꠥꠇꠥꠝ ꠖꠤꠟꠣ।
৭ ꠎꠦꠔꠣ ꠁꠢꠥꠖꠤ ꠅꠇꠟ ꠎꠦꠞꠥꠎꠣꠟꠦꠝ ꠕꠣꠇꠤ ꠀꠁꠍꠟꠣ,
ꠙꠣꠃꠟꠥꠍ ꠢꠤꠘꠅ ꠀꠎꠤꠞ ꠅꠀꠞ ꠛꠣꠖꠦ ꠔꠣꠞꠣ ꠔꠣꠘꠞꠦ ꠌꠣꠁꠞꠅꠛꠣꠄ ꠛꠦꠞꠤꠀ ꠃꠛꠣꠁꠀ ꠈꠥꠛ ꠖꠥꠡꠣ-ꠖꠥꠡꠤ ꠇꠞꠟꠣ,
ꠅꠁꠟꠦ ꠁꠔꠣꠞ ꠇꠥꠘꠥ ꠙꠞꠝꠣꠘ ꠖꠤꠔꠣ ꠙꠣꠞꠟꠣ ꠘꠣ।
৮ ꠅꠃ ꠙꠣꠃꠟꠥꠍꠦ ꠘꠤꠎꠞ ꠎꠛꠣꠘꠛꠘ꠆ꠖꠤ ꠖꠤꠟꠣ,
“ꠀꠝꠤ ꠔ ꠁꠢꠥꠖꠤ ꠅꠇꠟꠞ ꠡꠞꠤꠅꠔ,
ꠛꠣꠄꠔꠥꠟ-ꠝꠥꠇꠣꠖ꠆ꠖꠍ,
ꠛꠣ ꠞꠥꠝꠣꠘ ꠛꠣꠖꠡꠣ ꠇꠂꠍꠞꠞ ꠛꠤꠞꠥꠖ꠆ꠖꠦ ꠇꠥꠘꠥ ꠖꠥꠡ ꠇꠞꠍꠤ ꠘꠣ।”
৯ ꠅꠁꠟꠦ ꠚꠤꠡ꠆ꠔꠍꠦ ꠁꠢꠥꠖꠤ ꠅꠇꠟꠞꠦ ꠈꠥꠡꠤ ꠇꠞꠣꠞ ꠈꠤꠀꠟ ꠅꠀꠄ ꠔꠣꠁꠘ ꠙꠣꠃꠟꠥꠍꠞꠦ ꠎꠤꠇꠣꠁꠟꠣ,
“ꠅꠃ ꠝꠣꠝꠟꠣꠞ ꠛꠤꠌꠣꠞ ꠀꠝꠤ ꠎꠦꠞꠥꠎꠣꠟꠦꠝꠅ ꠇꠞꠔꠣꠝ ꠌꠣꠁꠞꠣꠝ,
ꠔꠥꠝꠤ ꠢꠤꠈꠣꠘꠅ ꠎꠣꠁꠔꠦ ꠞꠣꠎꠤ ꠀꠍ ꠘꠤ?”
১০ ꠙꠣꠃꠟꠥꠍꠦ ꠎꠥꠀꠙ ꠖꠤꠟꠣ,
“ꠀꠝꠤ ꠔ ꠞꠥꠝꠣꠘ ꠀꠖꠣꠟꠔꠞ ꠍꠣꠝꠘꠦ ꠀꠎꠤꠞ ꠅꠁꠍꠤ,
ꠀꠞ ꠅꠃ ꠀꠖꠣꠟꠔꠅꠃ ꠀꠝꠣꠞ ꠛꠤꠌꠣꠞ ꠅꠀꠈꠣꠘ ꠎꠞꠥꠞ।
ꠀꠙꠘꠦ ꠘꠤꠎꠦꠅ ꠜꠣꠟꠣ ꠇꠞꠤ ꠎꠣꠘꠂꠘ,
ꠀꠝꠤ ꠁꠢꠥꠖꠤ ꠅꠇꠟꠞ ꠟꠉꠦ ꠇꠥꠘꠥ ꠅꠁꠘ꠆ꠘꠣꠄ ꠇꠞꠍꠤ ꠘꠣ।
১১ ꠔꠣ-ꠅ ꠀꠝꠣꠞ ꠇꠥꠘꠥ ꠇꠍꠥꠞ ꠅꠁꠟꠦ,
ꠝꠃꠔꠞ ꠡꠣꠎꠣ ꠙꠣꠅꠀꠞ ꠎꠥꠇꠣ ꠇꠥꠘꠥ ꠖꠥꠡ ꠙꠣꠁꠟꠦ,
ꠀꠝꠤ ꠝꠞꠔꠦ ꠞꠣꠎꠤ ꠀꠍꠤ।
ꠅꠁꠟꠦ ꠄꠞꠣ ꠀꠝꠣꠞ ꠛꠤꠞꠥꠖ꠆ꠖꠦ ꠎꠦꠔꠣ ꠖꠥꠡ ꠖꠤꠞꠣ,
ꠁꠔꠣ ꠎꠥꠖꠤ ꠢꠣꠍꠣ ꠘꠣ ꠅꠄ,
ꠔꠦ ꠀꠝꠣꠞꠦ ꠔꠣꠞꠣꠞ ꠀꠔꠅ ꠍꠣꠠꠤ ꠖꠦꠅꠀꠞ ꠄꠈꠔꠤꠀꠞ ꠇꠦꠃꠞꠞ ꠘꠣꠁ।
ꠄꠞꠖꠣꠄ ꠀꠝꠤ ꠛꠣꠖꠡꠣ ꠇꠂꠍꠞꠞ ꠉꠦꠍꠦ ꠀꠙꠤꠟ ꠇꠞꠞꠣꠝ।”
১২ ꠁꠈꠣꠘ ꠢꠥꠘꠤꠀ ꠚꠤꠡ꠆ꠔꠍꠦ ꠔꠣꠘ ꠃꠎꠤꠞ-ꠘꠣꠎꠤꠞꠞ ꠟꠉꠦ ꠙꠞꠣꠝꠤꠡ ꠇꠞꠤ ꠇꠁꠟꠣ,
“ꠔꠥꠝꠤ ꠎꠦꠛꠟꠣ ꠛꠣꠖꠡꠣꠞ ꠉꠦꠍꠦ ꠀꠙꠤꠟ ꠇꠞꠟꠣꠄ,
ꠔꠦ ꠛꠣꠖꠡꠣꠞ ꠉꠦꠍꠦꠃ ꠎꠣꠁꠛꠣꠄ।”
ꠞꠣꠎꠣ ꠀꠉ꠆ꠞꠤꠙ꠆ꠙꠞ ꠉꠦꠍꠦ ꠢꠎꠞꠔ ꠙꠣꠃꠟꠥꠍꠞ ꠎꠛꠣꠘꠛꠘ꠆ꠖꠤ
১৩ ꠇꠄꠖꠤꠘ ꠛꠣꠖꠦ ꠁꠢꠥꠖꠤ ꠅꠇꠟꠞ ꠞꠣꠎꠣ ꠀꠉ꠆ꠞꠤꠙ꠆ꠙ ꠀꠞ ꠔꠣꠘ ꠛꠁꠘ ꠞꠣꠘꠤ ꠛꠞꠘꠤꠇꠤꠄ,
ꠘꠄꠀ ꠢꠣꠇꠤꠝ ꠚꠤꠡ꠆ꠔꠍꠞꠦ ꠍꠣꠟꠣꠝ ꠎꠣꠘꠣꠘꠤꠞ ꠟꠣꠉꠤ ꠇꠂꠍꠞꠤꠀꠔ ꠀꠁꠟꠣ।
১৪ ꠔꠣꠞꠣ ꠁꠈꠣꠘꠅ ꠇꠄꠖꠤꠘ ꠞꠁꠛꠣ ꠉꠔꠤꠇꠦ,
ꠚꠤꠡ꠆ꠔꠍꠦ ꠙꠣꠃꠟꠥꠍꠞ ꠝꠣꠝꠟꠣꠞ ꠇꠕꠣ ꠞꠣꠎꠣꠞꠦ ꠎꠣꠘꠣꠁꠟꠣ।
ꠔꠣꠁꠘ ꠇꠁꠟꠣ,
“ꠚꠤꠟꠤꠇ꠆ꠡꠦ ꠄꠇꠎꠘ ꠝꠣꠘꠡꠞꠦ ꠎꠦꠟꠅ ꠕꠁꠀ ꠉꠦꠍꠂꠘ।
১৫ ꠀꠝꠤ ꠎꠦꠛꠟꠣ ꠎꠦꠞꠥꠎꠣꠟꠦꠝꠅ ꠉꠦꠍꠟꠣꠝ,
ꠅꠃ ꠡꠝꠄ ꠢꠘꠞ ꠛꠠ ꠁꠝꠣꠝ ꠀꠞ ꠁꠢꠥꠖꠤ ꠝꠥꠞꠛ꠆ꠛꠤ ꠅꠇꠟꠦ ꠅꠃ ꠛꠦꠐꠣꠞ ꠛꠤꠞꠥꠖ꠆ꠖꠦ ꠘꠣꠟꠤꠡ ꠖꠤꠀ ꠔꠣꠞ ꠡꠣꠎꠣ ꠌꠣꠁꠍꠂꠘ।
১৬ ꠀꠝꠤ ꠔꠣꠞꠣꠞꠦ ꠇꠁꠍꠟꠣꠝ,
ꠎꠣꠞ ꠛꠤꠞꠥꠖ꠆ꠖꠦ ꠘꠣꠟꠤꠡ ꠖꠦꠅꠀ ꠅꠄ,
ꠀꠞ ꠎꠦꠞꠣ ꠁ ꠘꠣꠟꠤꠡ ꠖꠦꠁꠘ,
ꠢꠤ ꠛꠣꠖꠤ-ꠛꠤꠛꠣꠖꠤꠞ ꠝꠥꠈꠣ-ꠝꠥꠈꠤ ꠎꠛꠣꠘꠛꠘ꠆ꠖꠤ ꠀꠞ ꠎꠦꠞꠣ ꠘꠣ ꠅꠁꠟꠦ,
ꠀꠡꠣꠝꠤꠞꠦ ꠇꠥꠘꠥ ꠡꠣꠎꠣ ꠖꠦꠅꠀꠞ ꠄꠈꠔꠤꠀꠞ ꠞꠥꠝꠣꠘ ꠀꠁꠘꠅ ꠘꠣꠁ।
১৭ ꠔꠦꠃ ꠔꠣꠞꠣ ꠢꠇꠟ ꠅꠘꠅ ꠀꠁꠀ ꠢꠣꠞꠟꠦ,
ꠀꠝꠤ ꠛꠣꠖꠞ ꠖꠤꠘꠃ ꠀꠖꠣꠟꠔꠅ ꠛꠁꠀ ꠢꠃ ꠀꠡꠣꠝꠤꠞꠦ ꠍꠣꠝꠘꠦ ꠀꠘꠣꠞ ꠢꠥꠇꠥꠝ ꠖꠤꠟꠣꠝ।
১৮ ꠎꠦꠞꠣ ꠔꠣꠞ ꠛꠤꠞꠥꠖ꠆ꠖꠦ ꠘꠣꠟꠤꠡ ꠖꠤꠍꠟꠣ ꠔꠣꠞꠣꠞ ꠎꠛꠣꠘꠛꠘ꠆ꠖꠤ ꠢꠥꠘꠟꠣꠝ,
ꠅꠁꠟꠦ ꠀꠝꠤ ꠎꠦꠟꠣ ꠅꠘꠥꠝꠣꠘ ꠇꠞꠍꠟꠣꠝ,
ꠁꠟꠣ ꠇꠥꠘꠥ ꠘꠣꠟꠤꠡ ꠔꠣꠞꠣ ꠖꠤꠍꠂꠘ ꠘꠣ।
১৯ ꠈꠣꠟꠤ ꠔꠣꠞꠣꠞ ꠘꠤꠎꠞ ꠗꠞ꠆ꠝꠞ ꠇꠕꠣ,
ꠀꠞ ꠁꠍꠣ ꠘꠣꠝꠞ ꠇꠥꠘꠥ ꠄꠇꠎꠘ ꠝꠞꠣ ꠝꠣꠘꠡꠞ ꠇꠕꠣ,
ꠙꠣꠃꠟꠥꠍꠦ ꠄꠘꠞꠦ ꠎꠤꠘ꠆ꠖꠣ ꠇꠁꠀ ꠖꠣꠛꠤ ꠇꠞꠦꠞ,
ꠅꠔꠣ ꠟꠁꠀ ꠔꠣꠞꠣ ꠀꠖꠣꠟꠔꠅ ꠘꠣꠟꠤꠡ ꠖꠤꠍꠦ।
২০ ꠀꠞ ꠁꠔꠣ ꠇꠤꠟꠣ ꠔꠣꠟ꠆ꠟꠣꠡ ꠇꠞꠔꠣꠝ,
ꠁꠈꠣꠘ ꠝꠣꠟꠥꠝ ꠘꠣ ꠅꠀꠄ ꠀꠝꠤ ꠔꠣꠞꠦ ꠎꠤꠇꠣꠁꠟꠣꠝ,
ꠢꠦ ꠎꠦꠞꠥꠎꠣꠟꠦꠝꠅ ꠉꠤꠀ ꠁ ꠝꠣꠝꠟꠣꠞ ꠚꠄꠍꠣꠟꠣ ꠇꠞꠔꠦ ꠞꠣꠎꠤ ꠀꠍꠦ ꠘꠤ।
২১ ꠢꠦ ꠞꠣꠎꠤ ꠘꠣ ꠅꠁꠀ,
ꠀꠙꠤꠟ ꠇꠞꠤꠀ ꠛꠣꠖꠡꠣꠞ ꠞꠣꠄꠞ ꠟꠣꠉꠤ ꠛꠣꠞ ꠌꠣꠅꠀꠄ,
ꠀꠝꠤ ꠔꠣꠞꠦ ꠛꠣꠖꠡꠣ ꠇꠂꠍꠞꠞ ꠉꠦꠍꠦ ꠙꠣꠑꠣꠘꠤꠞ ꠀꠉ ꠙꠞ꠆ꠎꠘ꠆ꠔ ꠀꠐꠇ ꠞꠣꠈꠣꠞ ꠢꠥꠇꠥꠝ ꠖꠤꠍꠤ।”
২২ ꠅꠃ ꠞꠣꠎꠣ ꠀꠉ꠆ꠞꠤꠙ꠆ꠙꠦ ꠚꠤꠡ꠆ꠔꠍꠞꠦ ꠇꠁꠟꠣ,
“ꠀꠝꠤ ꠘꠤꠎꠦ ꠔꠣꠞ ꠎꠛꠣꠘꠛꠘ꠆ꠖꠤ ꠢꠥꠘꠔꠣꠝ ꠌꠣꠁ।”
ꠚꠤꠡ꠆ꠔꠍꠦ ꠎꠥꠀꠙ ꠖꠤꠟꠣ,
“ꠔꠦ ꠇꠣꠁꠟ ꠢꠥꠘꠛꠣꠘꠦ।”
২৩ ꠛꠣꠖꠞ ꠖꠤꠘ ꠞꠣꠎꠣ ꠀꠉ꠆ꠞꠤꠙ꠆ꠙ ꠀꠞ ꠞꠣꠘꠤ ꠛꠞꠘꠤꠇꠤ ꠛꠃꠔ ꠗꠥꠝꠗꠣꠝ ꠇꠞꠤ ꠀꠁꠟꠣ,
ꠔꠣꠁꠘ ꠍꠤꠙꠣꠁꠞ ꠙꠞꠗꠣꠘ ꠅꠚꠤꠡꠣꠞ ꠅꠇꠟ,
ꠐꠣꠃꠘꠞ ꠉꠁꠘ꠆ꠘ-ꠝꠣꠁꠘ꠆ꠘ ꠝꠣꠘꠡꠞꠦ ꠟꠁꠀ ꠀꠖꠣꠟꠔꠅ ꠢꠣꠝꠣꠁꠟꠣ।
ꠚꠤꠡ꠆ꠔꠍꠦ ꠢꠥꠇꠥꠝ ꠖꠤꠀ ꠙꠣꠃꠟꠥꠍꠞꠦꠅ ꠅꠘꠅ ꠀꠘꠣꠁꠟꠣ।
২৪ ꠛꠣꠖꠦ ꠚꠤꠡ꠆ꠔꠍꠦ ꠇꠁꠟꠣ,
“ꠝꠢꠣꠘ ꠞꠣꠎꠣ ꠀꠉ꠆ꠞꠤꠙ꠆ꠙ,
ꠀꠞ ꠀꠖꠣꠟꠔꠅ ꠀꠎꠤꠞ ꠉꠁꠘ꠆ꠘ-ꠝꠣꠁꠘ꠆ꠘ ꠍꠣꠛ ꠅꠇꠟ,
ꠀꠙꠘꠣꠞꠣ ꠢꠇꠟꠦ ꠅꠃ ꠛꠦꠌꠣꠠꠣꠞꠦ ꠖꠦꠈꠞꠣ।
ꠢꠇꠟ ꠁꠢꠥꠖꠤꠄ ꠝꠤꠟꠤꠀ ꠎꠦꠞꠥꠎꠣꠟꠦꠝ ꠀꠞ ꠇꠂꠍꠞꠤꠀꠔ ꠀꠝꠣꠞ ꠉꠦꠍꠦ ꠔꠣꠞ ꠛꠤꠌꠣꠞ ꠌꠣꠁꠀ ꠝꠤꠍꠤꠟ ꠖꠤꠀ ꠇꠁꠍꠂꠘ,
ꠔꠣꠞꠦ ꠈꠔꠝ ꠇꠞꠅ।
২৫ ꠅꠁꠟꠦ ꠀꠝꠤ ꠖꠦꠈꠟꠣꠝ,
ꠝꠃꠔꠞ ꠡꠣꠎꠣ ꠖꠦꠅꠀꠞ ꠎꠥꠇꠣ ꠇꠥꠘꠥ ꠖꠥꠡ ꠔꠣꠞ ꠘꠣꠁ।
ꠔꠣ-ꠅ ꠢꠦ ꠘꠤꠎꠦ ꠛꠣꠖꠡꠣꠞ ꠉꠦꠍꠦ ꠀꠙꠤꠟ ꠇꠞꠣꠄ,
ꠀꠝꠤ ꠔꠣꠞꠦ ꠔꠣꠘ ꠉꠦꠍꠦ ꠙꠣꠑꠣꠘꠤꠞ ꠈꠤꠀꠟ ꠇꠞꠍꠤ।
২৬ ꠅꠁꠟꠦ ꠝꠢꠣꠘ ꠛꠣꠖꠡꠣꠞ ꠉꠦꠍꠦ ꠟꠦꠈꠔꠣꠝ,
ꠁꠟꠣ ꠇꠥꠘꠥ ꠖꠥꠡ ꠙꠣꠁꠞꠣꠝ ꠘꠣ ꠉꠔꠤꠇꠦ,
ꠀꠝꠤ ꠡ꠆ꠞꠖ꠆ꠖꠦꠅ ꠞꠣꠎꠣ ꠀꠉ꠆ꠞꠤꠙ꠆ꠙ ꠀꠞ ꠀꠙꠘꠣꠞꠣ ꠢꠇꠟꠞ ꠍꠣꠝꠘꠦ ꠔꠣꠞꠦ ꠀꠎꠤꠞ ꠇꠞꠍꠤ।
ꠀꠙꠘꠣꠞꠣ ꠎꠦꠞꠣ ꠇꠞꠟꠦ ꠟꠦꠈꠣꠞ ꠎꠥꠇꠣ ꠇꠥꠘ꠆ꠔꠣ ꠙꠣꠁꠝꠥ ꠇꠞꠤ ꠝꠘꠅ ꠇꠞꠞꠣꠝ।
২৭ ꠇꠣꠞꠘ ꠀꠝꠤ ꠝꠘꠅ ꠇꠞꠤ,
ꠇꠥꠘꠥ ꠛꠘ꠆ꠖꠤꠞꠦ ꠌꠣꠟꠣꠘ ꠖꠦꠅꠀꠞ ꠛꠣꠟꠣ ꠔꠣꠞ ꠖꠥꠡ ꠅꠇꠟ ꠎꠣꠘꠣꠘꠤꠈꠣꠘ ꠎꠞꠥꠞ।”