ꠀꠖꠣꠟꠔꠅ ꠢꠎꠞꠔ ꠙꠣꠃꠟꠥꠍ
২৪
১ ꠙꠣꠌ ꠖꠤꠘ ꠛꠣꠖꠦ ꠙꠞꠗꠣꠘ ꠁꠝꠣꠝ ꠅꠘꠘꠤꠅꠄ ꠇꠄꠎꠘ ꠁꠢꠥꠖꠤ ꠝꠥꠞꠛ꠆ꠛꠤ ꠀꠞ ꠔꠞ꠆ꠔꠥꠟ꠆ꠟ ꠘꠣꠝꠞ ꠄꠇꠎꠘ ꠃꠇꠤꠟꠞꠦ ꠟꠁꠀ ꠇꠂꠍꠞꠤꠀꠔ ꠉꠦꠟꠣ,
ꠉꠤꠀ ꠙꠞꠗꠣꠘ ꠢꠣꠇꠤꠝꠞ ꠀꠖꠣꠟꠔꠅ ꠢꠎꠞꠔ ꠙꠣꠃꠟꠥꠍꠞ ꠛꠤꠞꠥꠖ꠆ꠖꠦ ꠘꠣꠟꠤꠡ ꠖꠣꠈꠤꠟ ꠇꠞꠟꠣ।
২ ꠙꠣꠃꠟꠥꠍꠞꠦ ꠀꠘꠤꠀ ꠀꠖꠣꠟꠔꠅ ꠀꠎꠤꠞ ꠇꠞꠣ ꠅꠁꠟ।
ꠛꠣꠖꠦ ꠃꠇꠤꠟ ꠔꠞ꠆ꠔꠥꠟ꠆ꠟꠄ ꠅꠃ ꠘꠣꠟꠤꠡ ꠉꠣꠁꠟꠣ,
“ꠝꠣꠘꠘꠤꠅ ꠢꠣꠇꠤꠝ ꠍꠣꠛ,
ꠀꠙꠘꠣꠞ ꠡꠣꠡꠘꠅ ꠞꠁꠀ ꠀꠝꠞꠣ ꠛꠃꠔ ꠖꠤꠘ ꠕꠣꠇꠤ ꠛꠠ ꠡꠣꠘ꠆ꠔꠤꠄ ꠀꠍꠤ।
ꠀꠙꠘꠦ ꠀꠙꠘꠣꠞ ꠀꠈꠟ-ꠢꠦꠇꠝꠔ ꠖꠤꠀ ꠁ ꠎꠣꠔꠤꠞ ꠛꠃꠔ ꠜꠣꠟꠣꠁ ꠇꠞꠞꠣ।
৩ ꠄꠞꠟꠣꠉꠤ ꠀꠝꠞꠣ ꠢꠣꠝꠦꠡꠣ ꠢꠇꠟ ꠎꠣꠉꠣꠔ ꠀꠙꠘꠣꠞ ꠉꠥꠘꠉꠣꠘ ꠉꠣꠁ।
৪ ꠀꠝꠞꠣ ꠀꠙꠘꠣꠞ ꠝꠥꠟ꠆ꠟꠛꠣꠘ ꠡꠝꠄ ꠘꠡ꠆ꠐ ꠇꠞꠔꠣꠝ ꠌꠣꠁꠞꠣꠝ ꠘꠣ,
ꠝꠦꠢꠦꠞꠛꠣꠘꠤ ꠇꠞꠤꠀ ꠢꠥꠘꠟꠦ,
ꠀꠝꠞꠣꠞ ꠘꠣꠟꠤꠡ ꠈꠣꠘ ꠖꠥꠁ-ꠌꠣꠁꠞ ꠇꠕꠣꠄ ꠇꠁꠟꠤꠝꠥ।
৫ ꠍꠣꠛ,
ꠀꠝꠞꠣ ꠖꠦꠈꠍꠤ,
ꠅꠃ ꠝꠣꠘꠥꠡꠉꠥ ꠛꠠ ꠄꠇ ꠀꠙꠖ ꠅꠁꠀ ꠀꠎꠤꠍꠦ।
ꠢꠦ ꠘꠣꠍꠣꠞꠣ ꠘꠣꠝꠞ ꠄꠇ ꠛꠤꠗꠞ꠆ꠝꠤ ꠖꠟꠞ ꠃꠡ꠆ꠔꠣꠖ।
ꠢꠣꠝꠦꠡꠣ ꠈꠣꠟꠤ ꠢꠣꠋꠉꠣꠝꠣ ꠟꠣꠉꠣꠄ,
ꠖꠥꠘꠤꠀꠞ ꠢꠇꠟ ꠁꠢꠥꠖꠤꠞ ꠝꠣꠎꠦ ꠖꠟꠣꠖꠟꠤ ꠟꠣꠉꠣꠘꠤꠃ ꠔꠣꠞ ꠇꠣꠝ।
৬-৭ ꠢꠦ ꠀꠝꠞꠣꠞ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞꠦꠅ ꠘꠣꠙꠣꠇ ꠛꠣꠘꠣꠁꠔ ꠌꠣꠁꠍꠤꠟ,
ꠄꠞꠖꠣꠄ ꠀꠝꠞꠣ ꠔꠣꠞꠦ ꠀꠐꠇ ꠇꠞꠍꠤ।
৮ ꠀꠞ ꠅꠃ ꠎꠦꠔꠣ ꠘꠣꠟꠤꠡ ꠖꠤꠟꠣꠝ,
ꠀꠙꠘꠦ ꠘꠤꠎꠦ ꠔꠣꠞꠦ ꠎꠦꠞꠣ ꠇꠞꠟꠦꠃ ꠁꠔꠣ ꠢꠇꠟꠔꠣ ꠛꠣꠞꠅꠁꠎꠤꠛ।”
৯ ꠃꠇꠤꠟꠞ ꠟꠉꠦ ꠅꠁꠀ ꠁꠢꠥꠖꠤ ꠅꠇꠟꠦꠅ ꠁꠔꠣ ꠢꠇ꠆ꠇꠟꠔꠣ ꠢꠣꠍꠣ ꠇꠁꠀ ꠡꠣꠄ ꠖꠤꠟꠣ।
১০ ꠔꠦꠃ ꠙꠞꠗꠣꠘ ꠢꠣꠇꠤꠝ ꠍꠣꠛꠦ ꠙꠣꠃꠟꠥꠍꠞꠦ ꠁꠡꠣꠞꠣ ꠖꠤꠟꠣ,
ꠙꠣꠃꠟꠥꠍꠦ ꠇꠁꠟꠣ,
“ꠍꠣꠛ,
ꠀꠙꠘꠦ ꠛꠃꠔ ꠛꠞꠍ ꠗꠞꠤ ꠁ ꠁꠢꠥꠖꠤ ꠎꠣꠔꠤꠞ ꠛꠤꠌꠣꠞ ꠇꠞꠤꠀ ꠀꠁꠞꠣ,
ꠁꠐꠣ ꠢꠥꠘꠤꠀ ꠀꠝꠤ ꠈꠥꠛ ꠈꠥꠡꠤ ꠅꠁꠀ ꠀꠝꠣꠞ ꠎꠛꠣꠘꠛꠘ꠆ꠖꠤ ꠖꠤꠞꠣꠝ।
১১ ꠀꠙꠘꠦ ꠔꠣꠟ꠆ꠟꠣꠡ ꠇꠞꠟꠦꠃ ꠎꠣꠘꠤꠟꠤꠛꠣ,
ꠅꠈꠘꠅ ꠛꠣꠞꠅ ꠖꠤꠘ ꠅꠁꠍꠦ ꠘꠣ,
ꠀꠝꠤ ꠄꠛꠣꠖꠔ ꠇꠞꠣꠞ ꠟꠣꠉꠤ ꠎꠦꠞꠥꠎꠣꠟꠦꠝꠅ ꠉꠦꠍꠟꠣꠝ।
১২ ꠅꠃ ꠎꠦꠞꠣ ꠀꠝꠣꠞ ꠛꠦꠙꠣꠞꠦ ꠘꠣꠟꠤꠡ ꠖꠤꠞꠣ,
ꠔꠣꠞꠣ ꠇꠦꠃ ꠀꠝꠣꠞꠦ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠇꠥꠘꠥ ꠝꠣꠘꠡꠞ ꠟꠉꠦ ꠢꠣꠋꠉꠣꠝꠣ ꠇꠞꠣꠔ ꠖꠦꠈꠍꠂꠘ ꠘꠣ।
ꠐꠣꠃꠘꠞ ꠇꠥꠘꠥꠈꠣꠘꠅ ꠛꠣ ꠇꠥꠘꠥ ꠝꠍꠤꠖꠅ-ꠅ ꠝꠣꠘꠡꠞꠦ ꠃꠍꠇꠣꠁꠀ ꠖꠦꠅꠀꠔ ꠀꠝꠣꠞꠦ ꠙꠣꠁꠍꠂꠘ ꠘꠣ।
১৩ ꠅꠈꠘ ꠔꠣꠞꠣ ꠀꠝꠣꠞ ꠎꠦꠔꠣ ꠖꠥꠡ ꠖꠦꠈꠣꠁꠞꠣ,
ꠁꠔꠣꠞ ꠇꠥꠘꠥ ꠙꠞꠝꠣꠘꠅ ꠔꠣꠞꠣ ꠖꠤꠔꠣ ꠙꠣꠞꠔꠣ ꠘꠣꠄ।
১৪ ꠅꠁꠟꠦ ꠀꠝꠤ ꠀꠙꠘꠣꠞ ꠉꠦꠍꠦ ꠡ꠆ꠛꠤꠇꠣꠞ ꠇꠞꠞꠣꠝ,
ꠄꠞꠣ ꠎꠦꠇꠐꠣꠞꠦ ꠛꠤꠗꠞ꠆ꠝꠤ ꠖꠟ ꠇꠁꠞꠣ,
ꠢꠃ ꠁꠍꠣ ꠀꠟ-ꠝꠍꠤꠞ ꠔꠞꠤꠇꠣꠄ ꠀꠝꠤ ꠀꠝꠣꠞ ꠝꠄ-ꠝꠥꠞꠛ꠆ꠛꠤ ꠅꠇꠟꠞ ꠀꠟ꠆ꠟꠣꠞ ꠄꠛꠣꠖꠔ ꠇꠞꠤ।
ꠔꠃꠞꠣꠔ ꠇꠤꠔꠣꠛꠞ ꠛꠣꠔꠣꠁꠟ ꠢꠇꠟ ꠢꠥꠇꠥꠝ-ꠀꠢꠇꠣꠝ ꠀꠞ ꠔꠣꠝꠣꠝ ꠘꠛꠤ ꠅꠇꠟꠞ ꠇꠤꠔꠣꠛꠞꠦ ꠀꠝꠤ ꠄꠇꠤꠘ ꠇꠞꠤ।
১৫ ꠀꠞ ꠄꠞꠣ ꠎꠦꠟꠣꠘ ꠄꠇꠤꠘ ꠇꠞꠂꠘ,
ꠀꠝꠤꠅ ꠅꠃꠟꠣ ꠀꠟ꠆ꠟꠣꠞ ꠃꠙꠞꠦ ꠄꠇꠤꠘ ꠇꠞꠤ,
ꠙꠞꠦꠎꠉꠣꠞ ꠛꠣ ꠉꠥꠘꠣꠉꠣꠞ ꠢꠇꠟꠞꠦꠃ ꠝꠞꠣꠞ ꠛꠣꠖꠦ ꠢꠤꠞꠛꠣꠞ ꠎꠤꠘ꠆ꠖꠣ ꠇꠞꠣ ꠅꠁꠛ।
১৬ ꠄꠞꠖꠣꠄ ꠀꠝꠤ ꠀꠟ꠆ꠟꠣꠞ ꠉꠦꠍꠦ ꠀꠞ ꠝꠣꠘꠡꠞ ꠉꠦꠍꠦꠅ ꠢꠣꠝꠦꠡꠣ ꠀꠝꠣꠞ ꠛꠤꠛꠦꠇ ꠙꠞꠤꠡ꠆ꠇꠣꠞ ꠞꠣꠈꠔꠣꠝ ꠌꠣꠁ।
১৭ ꠛꠃꠔ ꠛꠞꠍ ꠛꠣꠖꠦ ꠀꠝꠤ ꠎꠦꠞꠥꠎꠣꠟꠦꠝꠅ ꠉꠦꠍꠟꠣꠝ,
ꠇꠥꠞꠛꠣꠘꠤ ꠖꠤꠔꠣꠝ ꠀꠞ ꠀꠝꠣꠞ ꠘꠤꠎꠞ ꠎꠣꠔꠤꠞ ꠉꠞꠤꠛ ꠅꠇꠟꠞꠦ ꠖꠣꠘ-ꠈꠄꠞꠣꠔ ꠛꠤꠟꠣꠁꠔꠣꠝ ꠇꠞꠤ।
১৮ ꠔꠦ ꠀꠝꠤ ꠙꠣꠇ-ꠍꠣꠚ ꠅꠁꠀ ꠎꠦꠛꠟꠣ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠢꠣꠝꠣꠁꠟꠣꠝ,
ꠅꠃ ꠡꠝꠄ ꠔꠣꠞꠣ ꠀꠝꠣꠞꠦ ꠖꠦꠈꠍꠂꠘ।
ꠀꠝꠣꠞ ꠉꠦꠍꠦ ꠇꠥꠘꠥ ꠜꠤꠠꠅ ꠅꠁꠍꠦ ꠘꠣ,
ꠛꠣ ꠇꠥꠘꠥ ꠉꠘ꠆ꠒꠉꠥꠟꠅ ꠅꠁꠍꠦ ꠘꠣ।
১৯ ꠈꠣꠟꠤ ꠀꠍꠤꠀ ꠖꠦꠡꠞ ꠇꠄꠎꠘ ꠁꠢꠥꠖꠤ ꠢꠘꠅ ꠀꠍꠟꠣ।
ꠀꠝꠣꠞ ꠃꠙꠞꠦ ꠇꠥꠘꠥ ꠘꠣꠟꠤꠡ ꠕꠣꠇꠟꠦ ꠢꠃ ꠁꠢꠥꠖꠤ ꠅꠇꠟꠦ ꠀꠙꠘꠣꠞ ꠉꠦꠍꠦ ꠀꠁꠀ ꠘꠣꠟꠤꠡ ꠖꠤꠔꠣ ꠀꠍꠤꠟ।
২০ ꠀꠞꠘꠣꠄ ꠅꠘꠅ ꠎꠦꠞꠣ ꠀꠁꠍꠂꠘ ꠄꠞꠣꠃ ꠇꠃꠇ꠆ꠇꠣ,
ꠀꠝꠤ ꠎꠦꠛꠟꠣ ꠚꠔꠥꠀ ꠇꠝꠤꠐꠤꠞ ꠍꠣꠝꠘꠦ ꠃꠛꠣꠁꠍꠟꠣꠝ,
ꠅꠃ ꠡꠝꠄ ꠔꠣꠞꠣ ꠀꠝꠣꠞ ꠇꠤꠔꠣ ꠖꠥꠡ ꠙꠣꠁꠍꠟꠣ?
২১ ꠇꠥꠘ꠆ꠔꠣꠃ ꠘꠣ,
ꠈꠣꠟꠤ ꠄꠇꠈꠣꠘ ꠝꠣꠔ ꠀꠝꠤ ꠎꠥꠞꠦ ꠎꠥꠞꠦ ꠝꠣꠔꠤꠍꠟꠣꠝ ꠎꠦꠘ,
ꠝꠥꠞ꠆ꠖꠣ ꠅꠇꠟ ꠢꠤꠞꠛꠣꠞ ꠎꠤꠘ꠆ꠖꠣ ꠅꠁꠀ ꠃꠑꠣꠞ ꠝꠥꠍꠟꠣ ꠟꠁꠀ ꠀꠁꠎ ꠀꠙꠘꠣꠁꠘ꠆ꠔꠞ ꠍꠣꠝꠘꠦ ꠀꠝꠣꠞ ꠛꠤꠌꠣꠞ ꠇꠞꠣ ꠅꠞ।”
২২ ꠢꠣꠇꠤꠝ ꠚꠤꠟꠤꠇ꠆ꠡꠦ ꠢꠎꠞꠔ ꠁꠍꠣꠞ ꠔꠞꠤꠇꠣꠞ ꠛꠦꠙꠣꠞꠦ ꠈꠥꠛ ꠜꠣꠟꠣ ꠇꠞꠤ ꠎꠣꠘꠔꠣ,
ꠄꠞꠖꠣꠄ ꠔꠣꠁꠘ ꠛꠤꠌꠣꠞ ꠛꠘ꠆ꠖ ꠇꠞꠤꠀ ꠇꠁꠟꠣ,
“ꠍꠤꠙꠣꠁꠞ ꠙꠞꠗꠣꠘ ꠅꠚꠤꠡꠣꠞ ꠟꠥꠍꠤꠀꠍ ꠀꠁꠀ ꠢꠣꠞꠟꠦ ꠀꠝꠤ ꠔꠥꠝꠞꠣꠞ ꠛꠤꠌꠣꠞꠞ ꠚꠄꠍꠣꠟꠣ ꠇꠞꠝꠥ।”
২৩ ꠔꠣꠁꠘ ꠡ-ꠍꠤꠙꠣꠁꠞ ꠍꠥꠛꠦꠖꠣꠞꠞꠦ ꠢꠥꠇꠥꠝ ꠖꠤꠟꠣ,
“ꠙꠣꠃꠟꠥꠍꠞꠦ ꠀꠐꠇ ꠞꠣꠈꠅ,
ꠅꠁꠟꠦ ꠔꠣꠞꠦ ꠝꠣꠄꠀꠞ ꠘꠎꠞꠦ ꠞꠣꠈꠤꠅ,
ꠔꠣꠞ ꠈꠦꠡ-ꠇꠥꠐꠥꠝꠦ ꠔꠣꠞ ꠈꠦꠎꠝꠔ ꠇꠞꠣꠔ ꠀꠁꠟꠦ ꠛꠣꠗꠣ ꠖꠤꠅ ꠘꠣ।”
২৪ ꠇꠄꠖꠤꠘ ꠛꠣꠖꠦ ꠚꠤꠟꠤꠇ꠆ꠡꠦ ꠔꠣꠘ ꠁꠢꠥꠖꠤ ꠛꠃ ꠖ꠆ꠞꠥꠡꠤꠟ꠆ꠟꠣꠞꠦ ꠟꠉꠦ ꠟꠁꠀ ꠀꠁꠀ ꠙꠣꠃꠟꠥꠍꠞꠦ ꠈꠛꠞꠖꠤ ꠀꠘꠣꠁꠟꠣ,
ꠀꠞ ꠙꠣꠃꠟꠥꠍꠞ ꠝꠥꠈ ꠕꠣꠇꠤ ꠁꠍꠣ ꠀꠟ-ꠝꠍꠤꠞ ꠃꠙꠞꠦ ꠁꠝꠣꠘ ꠀꠘꠣꠞ ꠛꠄꠀꠘꠤ ꠢꠥꠘꠟꠣ।
২৫ ꠙꠣꠃꠟꠥꠍꠦ ꠎꠦꠛꠟꠣ ꠢꠇ ꠙꠕꠦ ꠌꠟꠣ,
ꠘꠤꠎꠞꠦ ꠖꠝꠣꠁꠀ ꠞꠣꠈꠣ,
ꠀꠞ ꠢꠣꠡꠞꠞ ꠛꠤꠌꠣꠞꠞ ꠇꠕꠣ ꠛꠄꠀꠘ ꠇꠞꠟꠣ,
ꠚꠤꠟꠤꠇ꠆ꠡꠦ ꠁꠔꠣ ꠢꠥꠘꠤꠀ ꠒꠞꠣꠁꠉꠦꠟꠣ।
ꠒꠞꠣꠁꠀ ꠇꠁꠟꠣ,
“ꠔꠥꠝꠤ ꠅꠈꠘ ꠎꠣꠅꠉꠤ,
ꠡꠝꠄ ꠡꠥꠎꠥꠉ ꠅꠁꠟꠦ ꠀꠝꠤ ꠔꠥꠝꠣꠞꠦ ꠈꠛꠞꠖꠤ ꠀꠘꠣꠁꠝꠥ।”
২৬ ꠔꠣꠘ ꠝꠘꠦ ꠝꠘꠦ ꠀꠍꠤꠟ,
ꠙꠣꠃꠟꠥꠍꠦ ꠔꠣꠘꠞꠦ ꠇꠤꠍꠥ ꠊꠥꠡ ꠖꠤꠛꠣ,
ꠄꠞꠟꠣꠉꠤ ꠔꠣꠁꠘ ꠛꠣꠞꠦ ꠛꠣꠞꠦ ꠙꠣꠃꠟꠥꠍꠞꠦ ꠀꠘꠣꠁꠀ ꠉꠚ ꠇꠞꠔꠣ।
২৭ ꠖꠥꠁ ꠛꠞꠍ ꠙꠣꠞꠅꠘꠤꠞ ꠛꠣꠖꠦ ꠙꠞ꠆ꠇꠤꠅ ꠚꠤꠡ꠆ꠔꠍ ꠀꠁꠀ ꠚꠤꠟꠤꠇ꠆ꠡꠞ ꠉꠖꠤꠔ ꠛꠁꠟꠣ।
ꠚꠤꠟꠤꠇ꠆ꠡꠦ ꠁꠢꠥꠖꠤ ꠅꠇꠟꠞꠦ ꠈꠥꠡꠤ ꠇꠞꠔꠣ ꠇꠞꠤ ꠙꠣꠃꠟꠥꠍꠞꠦ ꠎꠦꠟꠅ ꠕꠁꠀ ꠉꠦꠟꠣꠉꠤ।