ꠞꠣꠎꠣꠞ ꠍꠣꠝꠘꠦ ꠢꠎꠞꠔ ꠙꠣꠃꠟꠥꠍꠞ ꠎꠛꠣꠘꠛꠘ꠆ꠖꠤ
২৬
১ ꠁꠈꠣꠘ ꠢꠥꠘꠤꠀ ꠞꠣꠎꠣ ꠀꠉ꠆ꠞꠤꠙ꠆ꠙꠦ ꠙꠣꠃꠟꠥꠍꠞꠦ ꠇꠁꠟꠣ,
“ꠔꠥꠝꠣꠞ ꠎꠛꠣꠘꠛꠘ꠆ꠖꠤ ꠇꠅꠀꠞ ꠟꠣꠉꠤ ꠅꠘꠥꠝꠔꠤ ꠖꠤꠟꠣꠝ।”
ꠔꠦꠃ ꠙꠣꠃꠟꠥꠍꠦ ꠀꠔ ꠎꠥꠠ ꠇꠞꠤꠀ ꠘꠤꠎꠞ ꠎꠛꠣꠘꠛꠘ꠆ꠖꠤ ꠇꠁꠟꠣ,
২ “ꠝꠣꠘꠘꠤꠅ ꠞꠣꠎꠣ ꠘꠣꠝꠖꠣꠞ,
ꠁꠢꠥꠖꠤ ꠅꠇꠟꠦ ꠀꠝꠣꠞ ꠛꠤꠞꠥꠖ꠆ꠖꠦ ꠎꠦꠔꠣ ꠘꠣꠟꠤꠡ ꠖꠤꠍꠂꠘ,
ꠁꠔꠣ ꠛꠦꠙꠣꠞꠦ ꠀꠁꠎ ꠀꠙꠘꠣꠞ ꠉꠦꠍꠦ ꠀꠝꠣꠞ ꠎꠛꠣꠘꠛꠘ꠆ꠖꠤ ꠢꠥꠘꠣꠘꠤꠞ ꠡꠥꠎꠥꠉ ꠙꠣꠁꠀ,
ꠀꠝꠤ ꠘꠤꠎꠞꠦ ꠜꠣꠁꠉ꠆ꠉꠝꠣꠘ ꠝꠘꠅ ꠇꠞꠞꠣꠝ।
৩ ꠈꠣꠍ ꠇꠞꠤ,
ꠁꠢꠥꠖꠤ ꠅꠇꠟꠞ ꠢꠇꠟ ꠟꠣꠈꠣꠘ ꠌꠣꠟ-ꠌꠟꠘ ꠀꠞ ꠔꠣꠞꠣꠞ ꠚꠤꠔꠘꠣ ꠅꠇꠟ ꠀꠙꠘꠣꠞ ꠎꠣꠘꠣ ꠀꠍꠦ।
ꠄꠞꠖꠣꠄ ꠀꠞꠎ ꠇꠞꠞꠣꠝ,
ꠝꠦꠢꠦꠞꠛꠣꠘꠤ ꠇꠞꠤ ꠀꠙꠘꠦ ꠀꠝꠣꠞ ꠝꠣꠔ ꠈꠣꠘꠣꠂꠘ ꠢꠥꠘꠛꠣ।
৪ “ꠢꠥꠞꠥꠝꠣꠘ ꠕꠘꠦꠃ ꠘꠤꠎꠞ ꠄꠟꠣꠇꠣꠔ ꠀꠝꠣꠞ ꠌꠣꠟ-ꠌꠟꠘ ꠇꠤꠟꠣ ꠀꠍꠤꠟ,
ꠛꠣꠖꠦ ꠎꠦꠞꠥꠎꠣꠟꠦꠝꠅ ꠀꠁꠀ ꠇꠤꠟꠣꠈꠣꠘ ꠌꠟꠍꠤ,
ꠁꠔꠣ ꠔ ꠔꠣꠝꠣꠝ ꠁꠢꠥꠖꠤ ꠅꠇꠟꠦ ꠎꠣꠘꠂꠘ।
৫ ꠔꠣꠞꠣ ꠔ ꠛꠃꠔ ꠖꠤꠘ ꠗꠞꠤ ꠀꠝꠣꠞꠦ ꠌꠤꠘꠂꠘ ꠉꠔꠤꠇꠦ,
ꠔꠣꠞꠣ ꠈꠤꠀꠟ ꠇꠞꠟꠦ ꠁ ꠡꠣꠇ꠆ꠇꠤ ꠖꠤꠔꠣ ꠙꠣꠞꠛꠣ,
ꠀꠝꠞꠣꠞ ꠗꠞ꠆ꠝꠞ ꠝꠣꠎꠦ ꠚꠞꠤꠡꠤ ꠘꠣꠝꠞ ꠎꠦ ꠝꠃꠟꠛꠣꠖꠤ ꠖꠟ ꠀꠍꠦ,
ꠀꠝꠤ ꠅꠃ ꠚꠞꠤꠡꠤ ꠔꠞꠤꠇꠣꠄ ꠎꠤꠘ꠆ꠖꠦꠉꠤ ꠇꠣꠐꠣꠁꠔꠣꠝ।
৬ ꠀꠟ꠆ꠟꠣꠄ ꠀꠝꠞꠣꠞ ꠝꠄ-ꠝꠥꠞꠛ꠆ꠛꠤ ꠅꠇꠟꠞ ꠉꠦꠍꠦ ꠎꠦꠔꠣ ꠅꠀꠖꠣ ꠇꠞꠍꠤꠟꠣ,
ꠢꠃ ꠅꠀꠖꠣꠄ ꠀꠝꠤ ꠜꠞꠡꠣ ꠇꠞꠤ,
ꠄꠞꠟꠣꠉꠤ ꠀꠁꠎ ꠀꠝꠣꠞ ꠛꠤꠌꠣꠞ ꠅꠞ।
৭ ꠀꠝꠞꠣꠞ ꠛꠣꠞꠅ ꠈꠣꠘ꠆ꠖꠣꠘꠞ ꠝꠣꠘꠡꠦ ꠞꠣꠁꠔ-ꠖꠤꠘ ꠖꠤꠟꠦ-ꠎꠣꠘꠦ ꠄꠛꠣꠖꠔꠤ ꠇꠞꠤꠀ,
ꠢꠃ ꠅꠀꠖꠣꠞ ꠚꠟ ꠖꠦꠈꠣꠞ ꠀꠡꠣꠔ ꠀꠍꠂꠘ।
ꠞꠣꠎꠣ ꠘꠣꠝꠖꠣꠞ,
ꠢꠃ ꠀꠡꠣꠞ ꠟꠣꠉꠤꠃ ꠁꠢꠥꠖꠤ ꠅꠇꠟꠦ ꠀꠝꠣꠞꠦ ꠖꠥꠡꠤꠞꠣ।
৮ ꠀꠟ꠆ꠟꠣꠄ ꠝꠥꠞ꠆ꠖꠣꠞꠦ ꠎꠤꠘ꠆ꠖꠣ ꠇꠞꠤꠀ ꠔꠥꠟꠂꠘ,
ꠁꠈꠣꠘ ꠇꠦꠘꠦ ꠀꠙꠘꠣꠞꠣ ꠛꠤꠡ꠆ꠛꠣꠡ ꠇꠞꠔꠣ ꠙꠣꠞꠂꠘ ꠘꠣ?
৯ “ꠀꠝꠤ ꠔ ꠝꠘꠅ ꠇꠞꠔꠣꠝ,
ꠘꠣꠍꠣꠞꠔꠞ ꠁꠍꠣ ꠘꠣꠝꠞ ꠛꠤꠞꠥꠖ꠆ꠖꠦ,
ꠢꠇꠟ ꠘꠝꠥꠘꠣꠞ ꠇꠣꠝ ꠇꠞꠣ ꠀꠝꠣꠞ ꠟꠣꠉꠤ ꠚꠞꠎ।
১০ ꠀꠞ ꠎꠦꠞꠥꠎꠣꠟꠦꠝꠅ ꠀꠝꠤ ꠅꠟꠣ ꠇꠞꠍꠤꠅ।
ꠛꠠ ꠁꠝꠣꠝ ꠅꠇꠟꠞ ꠅꠘꠥꠝꠔꠤ ꠟꠁꠀ ꠁꠍꠣꠞ ꠃꠝ꠆ꠝꠔ ꠅꠇꠟꠞꠦ ꠀꠝꠤ ꠎꠦꠟꠅ ꠢꠣꠞꠣꠁꠔꠣꠝ।
ꠔꠣꠞꠣꠞꠦ ꠇꠣꠔꠟ ꠇꠞꠣꠞ ꠛꠣꠟꠣ ꠀꠝꠤ ꠔꠣꠞꠣꠞ ꠛꠤꠞꠥꠖ꠆ꠖꠦ ꠜꠥꠐ ꠖꠤꠔꠣꠝ।
১১ ꠀꠝꠤ ꠢꠇꠟ ꠝꠍꠤꠖꠣꠁꠘ꠆ꠔꠅ ꠉꠤꠀ ꠛꠣꠞꠦ ꠛꠣꠞꠦ ꠔꠣꠞꠣꠞꠦ ꠡꠣꠎꠣ ꠖꠤꠔꠣꠝ।
ꠁꠍꠣꠞ ꠔꠞꠤꠇꠣ ꠕꠣꠇꠤ ꠔꠣꠞꠣꠞꠦ ꠚꠤꠞꠣꠁꠀ,
ꠁꠍꠣꠞ ꠘꠣꠝꠦ ꠟꠣꠘ꠆ꠘꠔ ꠖꠤꠔꠣ ꠇꠞꠤ ꠔꠣꠞꠣꠞ ꠃꠙꠞꠦ ꠎꠥꠞ-ꠎꠥꠟꠥꠝ ꠇꠞꠔꠣꠝ।
ꠄꠞꠣꠞ ꠃꠙꠞꠦ ꠀꠝꠣꠞ ꠅꠔ ꠉꠥꠍꠣ ꠀꠍꠤꠟ ꠎꠦꠘ,
ꠄꠞꠣꠞꠦ ꠎꠥꠟꠥꠝ ꠇꠞꠣꠞ ꠟꠣꠉꠤ ꠀꠝꠤ ꠛꠣꠞꠣ ꠖꠦꠡꠞ ꠐꠣꠃꠘꠅ-ꠅ ꠎꠣꠁꠔꠣꠝ।
১২ “ꠅꠃꠟꠣ ꠄꠇꠛꠣꠞ ꠛꠠ ꠁꠝꠣꠝ ꠅꠇꠟꠞ ꠉꠦꠍ ꠕꠣꠇꠤ ꠈꠦꠝꠔꠣ ꠀꠞ ꠢꠥꠇꠥꠝꠎꠣꠞꠤ ꠟꠁꠀ ꠀꠝꠤ ꠖꠣꠝꠦꠡ꠆ꠇꠅ ꠎꠣꠅꠀꠔ ꠀꠍꠟꠣꠝ।
১৩ ꠀꠞ ꠞꠣꠎꠣ ꠘꠣꠝꠖꠣꠞ,
ꠅꠃ ꠡꠝꠄ ꠛꠦꠁꠟ ꠖꠥꠁꠚꠞ ꠅꠁꠉꠦꠍꠦ।
ꠀꠈꠔꠣꠃ ꠖꠦꠈꠟꠣꠝ,
ꠀꠝꠣꠞ ꠀꠞ ꠀꠝꠣꠞ ꠟꠉꠞ ꠢꠇꠟꠞ ꠌꠣꠁꠞꠅꠛꠣꠄ ꠡꠥꠞꠥꠎ ꠕꠣꠇꠤ ꠀꠞꠅ ꠛꠦꠡꠤ ꠚꠞꠀꠟꠣ ꠄꠇ ꠞꠥꠡꠘꠤ,
ꠀꠍꠝꠣꠘ ꠕꠘꠦ ꠎꠟꠤ ꠃꠑꠟ।
১৪ ꠅꠃ ꠀꠝꠞꠣ ꠢꠇꠟ ꠝꠣꠐꠤꠔ ꠙꠠꠤꠉꠦꠟꠣꠝ ꠀꠞ ꠀꠝꠤ ꠢꠥꠘꠟꠣꠝ,
ꠁꠛꠞꠣꠘꠤ ꠜꠣꠡꠣꠄ ꠇꠦꠃ ꠀꠝꠣꠞꠦ ꠇꠁꠞꠣ,
ꠡꠃꠟ,
ꠡꠃꠟ,
ꠔꠥꠝꠤ ꠇꠦꠘꠦ ꠀꠝꠣꠞ ꠃꠙꠞꠦ ꠎꠥꠟꠥꠝ ꠇꠞꠞꠣꠄ?
ꠌꠥꠈꠣ ꠚꠣꠁꠎꠘꠅ ꠟꠣꠕ ꠝꠣꠞꠤꠀ ꠘꠤꠎꠞ ꠈꠦꠔꠤ ꠇꠞꠞꠣꠄ ꠘꠣ ꠘꠤ?
১৫ ꠔꠦꠃ ꠀꠝꠤ ꠎꠤꠇꠣꠁꠟꠣꠝ,
ꠝꠥꠘꠤꠛ,
ꠀꠙꠘꠦ ꠇꠦ?
ꠝꠥꠘꠤꠛꠦ ꠎꠥꠀꠙ ꠖꠤꠟꠣ,
ꠀꠝꠤ ꠁꠍꠣ,
ꠎꠦꠘꠞꠦ ꠔꠥꠝꠤ ꠎꠥꠟꠥꠝ ꠇꠞꠞꠣꠄ।
১৬ ꠅꠈꠘ ꠃꠑꠅ,
ꠙꠣꠅꠔ ꠜꠞꠖꠤ ꠃꠛꠣꠅ।
ꠔꠥꠝꠤ ꠅꠈꠘ ꠎꠦꠔꠣ ꠖꠦꠈꠍ ꠀꠞ ꠎꠦꠔꠣ ꠔꠥꠝꠣꠞꠦ ꠖꠦꠈꠣꠁꠝꠥ,
ꠁꠔꠣ ꠢꠇꠟꠔꠣꠞ ꠡꠣꠇ꠆ꠇꠤ ꠀꠞ ꠈꠦꠎꠝꠔꠉꠣꠞ ꠛꠣꠘꠣꠘꠤꠞ ꠈꠤꠀꠟꠦ,
ꠀꠝꠤ ꠘꠤꠎꠦ ꠔꠥꠝꠣꠞꠦ ꠖꠦꠈꠣ ꠖꠤꠟꠣꠝ।
১৭ ꠀꠝꠤ ꠔꠥꠝꠣꠞꠦ ꠅ-ꠁꠢꠥꠖꠤ ꠅꠇꠟꠞ ꠉꠦꠍꠦ ꠙꠣꠑꠣꠁꠀꠞ,
ꠔꠣꠞꠣꠞ ꠀꠞ ꠔꠥꠝꠣꠞ ꠘꠤꠎꠞ ꠎꠣꠔꠤꠞ ꠀꠔ ꠕꠣꠇꠤ ꠀꠝꠤ ꠔꠥꠝꠣꠞꠦ ꠛꠣꠌꠣꠁꠝꠥ।
১৮ ꠔꠥꠝꠤ ꠔꠣꠞꠣꠞ ꠌꠃꠈ ꠈꠥꠟꠤꠀ ꠖꠤꠛꠣꠄ,
ꠔꠣꠞꠣ ꠎꠣꠘꠥ ꠀꠘ꠆ꠖꠣꠁꠞ ꠕꠣꠇꠤ ꠘꠥꠞꠞ ꠛꠣꠄ,
ꠡꠄꠔꠣꠘꠞ ꠖꠈꠟ ꠕꠣꠇꠤ ꠀꠟ꠆ꠟꠣꠞ ꠛꠣꠄ ꠚꠤꠞꠤꠀ ꠀꠁꠘ,
ꠀꠝꠣꠞ ꠃꠙꠞꠦ ꠁꠝꠣꠘ ꠀꠘꠤꠀ ꠉꠥꠘꠣꠞ ꠝꠣꠚꠤ ꠙꠣꠁꠀ,
ꠙꠞꠦꠎꠉꠣꠞ ꠛꠘ꠆ꠖꠣ ꠅꠇꠟꠞ ꠝꠣꠎꠦ ꠔꠣꠞꠣꠅ ꠖꠣꠈꠤꠟ ꠅꠁꠘ।
১৯ “ꠝꠣꠘꠘꠤꠅ ꠞꠣꠎꠣ ꠘꠣꠝꠖꠣꠞ,
ꠛꠦꠢꠦꠡ꠆ꠔꠤ ꠁ ꠖꠞꠡꠘꠞꠦ ꠀꠝꠤ ꠚꠣꠟꠣꠁꠔꠣꠝ ꠙꠣꠞꠟꠣꠝ ꠘꠣ।
২০ ꠄꠞꠖꠣꠄ ꠙꠄꠟꠣ ꠖꠣꠝꠦꠡ꠆ꠇꠞ ꠝꠣꠘꠡꠞ ꠉꠦꠍꠦ,
ꠛꠣꠖꠦ ꠎꠦꠞꠥꠎꠣꠟꠦꠝꠅ,
ꠄꠢꠥꠖꠤꠀ ꠎꠤꠟꠣꠞ ꠢꠇꠟ ꠎꠣꠉꠣꠔ ꠀꠞ ꠅ-ꠁꠢꠥꠖꠤ ꠅꠇꠟꠞ ꠉꠦꠍꠦꠅ ꠔꠛꠟꠤꠉ ꠇꠞꠟꠣꠝ।
ꠔꠣꠞꠣꠞꠦ ꠇꠁꠟꠣꠝ,
ꠔꠃꠛꠣ ꠇꠞꠤꠀ ꠀꠟ꠆ꠟꠣꠞ ꠛꠣꠄ ꠚꠤꠞꠅ,
ꠀꠞ ꠅꠃ ꠟꠣꠈꠣꠘ ꠀꠝꠟ ꠇꠞꠅ,
ꠎꠦꠔꠣ ꠖꠦꠈꠤꠀ ꠙꠞꠝꠣꠘ ꠝꠤꠟꠦ ꠔꠥꠝꠞꠣ ꠢꠣꠍꠣꠞꠞ ꠔꠃꠛꠣ ꠇꠞꠍ।
২১ ꠅꠃ ꠇꠣꠞꠘꠦ ꠁꠢꠥꠖꠤ ꠅꠇꠟꠦ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠗꠞꠤꠀ ꠀꠝꠣꠞꠦ ꠝꠣꠞꠤꠟꠤꠔꠣ ꠌꠣꠁꠍꠂꠘ।
২২ ꠅꠁꠟꠦ ꠀꠟ꠆ꠟꠣꠞ ꠡꠣꠁꠎ꠆ꠎꠄ ꠀꠝꠤ ꠅꠈꠘ ꠙꠞ꠆ꠎꠘ꠆ꠔ ꠐꠤꠇꠤꠀ ꠀꠍꠤ,
ꠀꠞ ꠢꠥꠞꠥ-ꠛꠠ ꠢꠇꠟꠞ ꠍꠣꠝꠘꠦ ꠃꠛꠣꠁꠀ ꠡꠣꠇ꠆ꠇꠤꠅ ꠖꠤꠞꠣꠝ।
ꠢꠎꠞꠔ ꠝꠥꠍꠣꠄ ꠀꠞ ꠔꠣꠝꠣꠝ ꠘꠛꠤ ꠅꠇꠟꠦ ꠎꠦꠔꠣ ꠊꠐꠤꠛ ꠇꠞꠤ ꠛꠣꠔꠣꠁꠀ ꠉꠦꠍꠂꠘ,
ꠁꠔꠣꠞ ꠛꠣꠞꠣ ꠀꠝꠤ ꠇꠥꠘ꠆ꠔꠣꠃ ꠇꠁꠞꠣꠝ ꠘꠣ।
২৩ ꠄꠞꠣ ꠇꠁꠍꠂꠘ,
ꠀꠟ-ꠝꠍꠤꠄ ꠔꠇꠟꠤꠚ ꠡꠁꠎ꠆ꠎ ꠇꠞꠛꠣ,
ꠔꠣꠁꠘꠃ ꠙꠄꠟꠣ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠅꠁꠀ ꠃꠑꠤꠀ ꠢꠣꠞꠤ ꠔꠣꠘ ꠘꠤꠎꠞ ꠎꠣꠔꠤ,
ꠀꠞ ꠅ-ꠁꠢꠥꠖꠤ ꠅꠇꠟꠞ ꠉꠦꠍꠦꠅ ꠘꠥꠞꠞ ꠔꠞꠤꠇꠣꠞ ꠇꠕꠣ ꠔꠛꠟꠤꠉ ꠇꠞꠛꠣ।”
২৪ ꠙꠣꠃꠟꠥꠍꠦ ꠎꠦꠛꠟꠣ ꠅꠃ ꠟꠣꠈꠣꠘ ꠎꠛꠣꠘꠛꠘ꠆ꠖꠤ ꠖꠤꠞꠣ,
ꠀꠈꠔꠣꠃ ꠚꠤꠡ꠆ꠔꠍꠦ ꠔꠣꠘꠞꠦ ꠎꠥꠞꠦ ꠗꠣꠝꠇꠤ ꠝꠣꠞꠤ ꠇꠁꠟꠣ,
“ꠙꠣꠃꠟꠥꠍ,
ꠔꠥꠝꠤ ꠔ ꠙꠣꠉꠟ ꠅꠁꠉꠦꠍ।
ꠔꠥꠝꠤ ꠛꠃꠔ ꠟꠦꠈꠣ-ꠙꠠꠣ ꠇꠞꠍ,
ꠅꠃ ꠟꠦꠈꠣ-ꠙꠠꠣꠄ ꠔꠥꠝꠣꠞꠦ ꠙꠣꠉꠟ ꠛꠣꠘꠣꠁꠟꠤꠍꠦ।”
২৫ ꠙꠣꠃꠟꠥꠍꠦ ꠎꠥꠀꠙ ꠖꠤꠟꠣ,
“ꠎꠤ ꠘꠣ,
ꠢꠣꠇꠤꠝ ꠍꠣꠛ,
ꠀꠝꠤ ꠙꠣꠉꠟ ꠘꠣꠄ।
ꠀꠝꠤ ꠔ ꠢꠇ ꠀꠞ ꠎꠥꠇ꠆ꠔꠤꠞ ꠝꠣꠔ ꠝꠣꠔꠞꠣꠝ।
২৬ ꠞꠣꠎꠣ ꠘꠣꠝꠖꠣꠞꠦ ꠔ ꠁꠔꠣ ꠢꠇ꠆ꠇꠟꠔꠣꠃ ꠎꠣꠘꠂꠘ,
ꠀꠞ ꠀꠝꠤ ꠢꠤꠝ꠆ꠝꠔ ꠇꠞꠤꠀ ꠔꠣꠘ ꠍꠣꠝꠘꠦ ꠈꠥꠟꠣ-ꠝꠦꠟꠣ ꠝꠣꠔꠤꠞꠣꠝ।
ꠀꠝꠤ ꠙꠥꠞꠣꠙꠥꠞ ꠎꠣꠘꠤ,
ꠁꠔꠣ ꠢꠇ꠆ꠇꠟꠔꠣꠃ ꠞꠣꠎꠣ ꠘꠣꠝꠖꠣꠞꠞ ꠝꠣꠟꠥꠝ ꠀꠍꠦ,
ꠁꠔꠣ ꠔ ꠇꠥꠘꠥ ꠀꠘ꠆ꠖꠣꠞꠤꠞ ꠝꠣꠎꠦ ꠟꠥꠇꠣꠁꠀ ꠊꠐꠍꠦ ꠘꠣ।
২৭ “ꠔꠦ ꠝꠣꠘꠘꠤꠅ ꠞꠣꠎꠣ ꠘꠣꠝꠖꠣꠞ,
ꠀꠙꠘꠦ ꠇꠤꠔꠣ ꠘꠛꠤ ꠅꠇꠟꠞꠦ ꠄꠇꠤꠘ ꠇꠞꠂꠘ ꠘꠤ?
ꠀꠝꠤ ꠔ ꠎꠣꠘꠤ,
ꠀꠙꠘꠦꠅ ꠇꠞꠂꠘ।”
২৮ ꠅꠃ ꠀꠉ꠆ꠞꠤꠙ꠆ꠙꠦ ꠇꠁꠟꠣ,
“ꠔꠥꠝꠤ ꠇꠤꠔꠣ ꠅꠔ ꠎꠟꠖꠤ ꠀꠝꠣꠞꠦꠅ ꠀꠟ-ꠝꠍꠤꠞ ꠔꠞꠤꠇꠣꠔ ꠘꠤꠔꠣꠄꠉꠤ ꠌꠣꠁꠞꠣꠄ ꠘꠤ?”
২৯ ꠙꠣꠃꠟꠥꠍꠦ ꠇꠁꠟꠣ,
“ꠀꠝꠤ ꠀꠟ꠆ꠟꠣꠞ ꠉꠦꠍꠦ ꠅꠃ ꠖꠥꠀ ꠇꠞꠞꠣꠝ,
ꠎꠟꠖꠤ ꠅꠃꠇ ꠛꠣ ꠖꠦꠞꠤꠄ ꠅꠃꠇ,
ꠈꠣꠟꠤ ꠀꠙꠘꠦ ꠘꠣꠄ,
ꠎꠔ ꠝꠣꠘꠡꠦ ꠀꠝꠣꠞ ꠀꠁꠎꠇꠥꠞ ꠁ ꠎꠛꠣꠘꠛꠘ꠆ꠖꠤ ꠢꠥꠘꠞꠣ,
ꠄꠞꠣ ꠢꠇ꠆ꠇꠟꠃ ꠀꠝꠣꠞ ꠟꠣꠈꠣꠘ ꠛꠘꠤꠎꠣꠃꠇ꠆ꠇꠣ।
ꠈꠣꠟꠤ ꠅꠃ ꠡꠤꠇꠟ ꠛꠣꠖ ꠖꠤꠀ।”