ꠡꠞꠤꠅꠔꠞ ꠉꠥꠟꠣꠝꠤ ꠕꠣꠇꠤ ꠈꠣꠟꠣꠍ
৭
১ ꠔꠦ ꠅ ꠜꠣꠁ ꠅꠇꠟ,
ꠢꠎꠞꠔ ꠝꠥꠍꠣꠞ ꠡꠞꠤꠅꠔꠞ ꠛꠤꠡꠄ ꠔ ꠔꠥꠝꠞꠣꠞ ꠎꠣꠘꠣꠃ ꠀꠍꠦ।
ꠔꠣ-ꠅ ꠔꠥꠝꠞꠣ ꠛꠥꠎꠅ ꠘꠣ ꠘꠤ,
ꠡꠞꠤꠅꠔꠞ ꠖꠣꠛꠤ-ꠖꠣꠅꠀ ꠝꠣꠘꠡꠞ ꠃꠙꠞꠦ ꠛꠅꠀꠁꠟ ꠕꠣꠇꠦ,
ꠈꠣꠟꠤ ꠎꠤꠘ꠆ꠖꠣ ꠕꠣꠇꠣ ꠙꠞ꠆ꠎꠘ꠆ꠔ।
২ ꠎꠦꠟꠣ,
ꠎꠣꠝꠣꠁ ꠎꠔꠖꠤꠘ ꠎꠤꠔꠣ ꠀꠍꠦ,
ꠅꠔꠖꠤꠘ ꠔꠣꠞ ꠛꠃ ꠔꠣꠞ ꠀꠅꠔꠣꠄ ꠛꠣꠘ꠆ꠖꠣ ꠞꠄ,
ꠀꠞ ꠎꠣꠝꠣꠁꠞ ꠝꠃꠔꠞ ꠛꠣꠖꠦ ꠔꠣꠞ ꠛꠃ ꠁ ꠛꠣꠘ꠆ꠖꠘ ꠕꠣꠇꠤ ꠈꠣꠟꠣꠍ ꠙꠣꠄ।
৩ ꠀꠞ ꠎꠣꠝꠣꠁ ꠎꠤꠔꠣ ꠕꠣꠇꠔꠦ ꠛꠃ ꠎꠥꠖꠤ ꠖꠥꠍꠞꠣ ꠛꠦꠐꠣꠞ ꠉꠦꠍꠦ ꠢꠣꠋꠉꠣ ꠛꠄ,
ꠔꠣꠁꠞꠦ ꠔ ꠎꠤꠘꠣꠇꠥꠞ ꠢꠤꠡꠣꠛꠦ ꠉꠘꠣ ꠅꠄ।
ꠅꠁꠟꠦ ꠎꠣꠝꠣꠁꠞ ꠝꠃꠔꠞ ꠛꠣꠖꠦ ꠔꠣꠁ ꠎꠣꠝꠣꠁꠞ ꠛꠣꠘ꠆ꠖꠘ ꠕꠣꠇꠤ ꠀꠁꠘ ꠝꠣꠚꠤꠇ ꠈꠣꠟꠣꠍ ꠙꠣꠄ,
ꠄꠞꠛꠣꠖꠦ ꠔꠣꠁ ꠅꠁꠘ꠆ꠘ ꠎꠘꠞ ꠉꠦꠍꠦ ꠛꠤꠀ ꠛꠁꠟꠦ ꠎꠤꠘꠣꠇꠥꠞ ꠘꠣꠄ।
৪ ꠜꠣꠁꠀꠂꠘꠞꠦ,
ꠑꠤꠇ ꠅꠃ ꠟꠣꠈꠣꠘꠃ,
ꠀꠟ-ꠝꠍꠤꠞ ꠡꠞꠤꠟꠞ ꠝꠃꠔꠞ ꠝꠣꠎꠖꠤ ꠡꠞꠤꠅꠔꠞ ꠛꠣꠘ꠆ꠖꠘ ꠕꠣꠇꠤ ꠔꠥꠝꠞꠣꠞ ꠝꠃꠔ ꠅꠁꠉꠦꠍꠦ ꠇꠞꠤ,
ꠅꠈꠘ ꠔꠥꠝꠞꠣ ꠅꠁꠘ꠆ꠘ ꠎꠘꠞ ꠛꠣꠘ꠆ꠖꠘꠅ ꠎꠣꠁꠔꠣꠄ ꠙꠣꠞ,
ꠀꠞ ꠅꠃ ꠅꠁꠘ꠆ꠘ ꠎꠘ ꠅꠁꠟꠣ,
ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠅꠀ ꠢꠃ ꠁꠍꠣ ꠀꠟ-ꠝꠍꠤ,
ꠎꠣꠔꠦ ꠀꠝꠞꠣꠞ ꠎꠤꠘ꠆ꠖꠦꠉꠤꠔ ꠀꠟ꠆ꠟꠣꠞ ꠘꠣꠝꠦ ꠘꠦꠇ ꠙꠕꠞ ꠚꠟ ꠗꠞꠦ।
৫ ꠀꠉꠦ ꠎꠦꠛꠟꠣ ꠀꠝꠞꠣ ꠡꠞꠤꠟꠞ ꠝꠞ꠆ꠎꠤꠄ ꠌꠟꠔꠣꠝ,
ꠅꠃ ꠡꠝꠄ ꠡꠞꠤꠅꠔꠦ ꠀꠝꠞꠣꠞ ꠝꠣꠎꠞ ꠉꠥꠘꠣꠞ ꠛꠖ ꠈꠣꠁꠡꠞꠦ ꠈꠥꠌꠣꠁꠀ ꠢꠎꠣꠉ ꠇꠞꠔ,
ꠅꠃ ꠇꠣꠞꠘꠦ ꠀꠝꠞꠣꠞ ꠡꠞꠤꠟꠞ ꠅꠋꠉ ꠅꠇꠟꠦ ꠝꠃꠔꠞ ꠙꠕꠤ ꠉꠥꠘꠣꠞ ꠚꠟ ꠗꠞꠔ।
৬ ꠔꠦ ꠀꠉꠦ ꠀꠝꠞꠣ ꠎꠦ ꠡꠞꠤꠅꠔꠞ ꠛꠣꠘ꠆ꠖꠘꠅ ꠀꠍꠟꠣꠝ,
ꠁꠔꠣ ꠕꠣꠇꠤ ꠀꠝꠞꠣꠞ ꠝꠃꠔ ꠅꠁꠉꠦꠍꠦ,
ꠅꠈꠘ ꠀꠝꠞꠣ ꠁ ꠡꠞꠤꠅꠔꠞ ꠛꠣꠘ꠆ꠖꠘ ꠕꠣꠇꠤ ꠈꠣꠟꠣꠍ ꠙꠣꠁꠍꠤ।
ꠄꠞꠟꠣꠉꠤ ꠀꠝꠞꠣ ꠀꠞ ꠢꠤ ꠟꠤꠈꠤꠔ ꠡꠞꠤꠅꠔꠞ ꠉꠥꠟꠣꠝ ꠘꠣꠄ,
ꠈꠣꠟꠤ ꠀꠟ꠆ꠟꠣꠁ ꠙꠣꠇ ꠞꠥꠢꠦ ꠘꠄꠀ ꠎꠤꠘ꠆ꠖꠦꠉꠤꠞ ꠉꠥꠟꠣꠝꠤ ꠇꠞꠤ।
ꠡꠞꠤꠅꠔꠦ ꠉꠥꠘꠣꠞꠦ ꠢꠎꠣꠉ ꠇꠞꠦ
৭ ꠅꠈꠘ ꠀꠝꠞꠣ ꠅꠟꠣ ꠇꠁꠔꠣꠝ ꠙꠣꠞꠤ ꠘꠤ,
ꠡꠞꠤꠅꠔꠦꠃ ꠉꠥꠘꠣ ꠇꠞꠣꠄ?
ꠘꠣꠃꠎꠥꠛꠤꠟ꠆ꠟꠣ,
ꠝꠥꠐꠦꠃ ꠘꠣ!
ꠀꠍꠟ ꠇꠕꠣ ꠅꠁꠟ,
ꠡꠞꠤꠅꠔ ꠘꠣ ꠕꠣꠇꠟꠦ ꠔ ꠀꠝꠤ ꠛꠥꠎꠔꠣꠝ ꠙꠣꠞꠟꠣꠝ ꠘꠣ ꠅꠘꠦ,
ꠉꠥꠘꠣ ꠇꠤ ꠎꠤꠘꠤꠡ।
ꠡꠞꠤꠅꠔꠦ ꠎꠥꠖꠤ ꠘꠣ ꠇꠁꠔ,
ꠟꠥꠜ-ꠟꠣꠟꠌ ꠇꠞꠤꠅ ꠘꠣ,
ꠔꠦ ꠟꠣꠟꠌ ꠇꠞꠟꠦ ꠇꠤꠔꠣ ꠅꠄ,
ꠁꠔꠣ ꠀꠝꠞꠣ ꠛꠥꠎꠟꠣꠝ ꠘꠣ ꠅꠘꠦ।
৮ ꠀꠞ ꠅꠃ ꠢꠥꠇꠥꠝꠞ ꠡꠥꠎꠥꠉ ꠛꠥꠎꠤꠀ ꠀꠝꠣꠞ ꠜꠤꠔꠞꠦ ꠉꠥꠘꠣ ꠢꠣꠝꠣꠁꠀ,
ꠢꠇꠟ ꠘꠝꠥꠘꠣꠞ ꠟꠥꠜ-ꠟꠣꠟꠌ ꠎꠘꠝ ꠖꠤꠍꠦ।
ꠡꠞꠤꠅꠔ ꠘꠣ ꠕꠣꠇꠟꠦ ꠔ ꠉꠥꠘꠣꠅ ꠝꠞꠣꠞ ꠟꠣꠈꠣꠘ ꠌꠥꠙꠌꠣꠙ ꠞꠄ।
৯ ꠀꠝꠣꠞ ꠎꠤꠘ꠆ꠖꠦꠉꠤꠔ ꠡꠞꠤꠅꠔꠞꠦ ꠜꠣꠟꠣꠝꠘ꠆ꠔꠦ ꠌꠤꠘꠣꠞ ꠀꠉꠦ ꠀꠝꠤ ꠔ ꠎꠤꠔꠣ ꠀꠍꠟꠣꠝ,
ꠅꠁꠟꠦ ꠅꠃ ꠢꠥꠇꠥꠝ ꠎꠣꠘꠣꠞ ꠟꠉꠦ ꠟꠉꠦꠃ ꠉꠥꠘꠣ ꠢꠎꠣꠉ ꠅꠁꠟ,
ꠀꠞ ꠀꠝꠣꠞ ꠝꠃꠔ ꠅꠁꠟ।
১০ ꠛꠥꠎꠞꠣꠄ ꠘꠤ,
ꠎꠦ ꠡꠞꠤꠅꠔꠦ ꠀꠝꠤ ꠎꠤꠘ꠆ꠖꠦꠉꠤ ꠙꠣꠅꠀꠞ ꠇꠕꠣ,
ꠢꠃ ꠡꠞꠤꠅꠔꠦ ꠀꠝꠣꠞ ꠟꠣꠉꠤ ꠝꠞꠘ ꠟꠁꠀ ꠀꠁꠟ।
১১ ꠡꠞꠤꠅꠔꠞ ꠅꠃ ꠢꠥꠇꠥꠝꠞ ꠡꠥꠎꠥꠉ ꠙꠣꠁꠀ ꠉꠥꠘꠣꠄ ꠀꠝꠣꠞꠦ ꠐꠉꠤꠟ,
ꠅꠃ ꠢꠥꠇꠥꠝꠞ ꠛꠟꠦꠃ ꠉꠥꠘꠣꠄ ꠀꠝꠣꠞ ꠎꠣꠘ ꠇꠣꠠꠤꠀ ꠘꠤꠟ।
১২ ꠅꠁꠟꠦ ꠁꠈꠣꠘ ꠔ ꠢꠣꠍꠣ,
ꠝꠥꠍꠣ ꠘꠛꠤꠞ ꠖꠦꠅꠀ ꠡꠞꠤꠅꠔ ꠙꠛꠤꠔ꠆ꠞ,
ꠄꠞ ꠢꠥꠇꠥꠝ-ꠀꠢꠇꠣꠝꠅ ꠙꠛꠤꠔ꠆ꠞ,
ꠁꠔꠣ ꠡꠑꠤꠇ ꠀꠞ ꠜꠣꠟꠣ ꠎꠤꠘꠤꠡ।
১৩ ꠔꠦ ꠅꠃ ꠜꠣꠟꠣ ꠎꠤꠘꠤꠡꠦꠃ ꠇꠤꠔꠣ ꠀꠝꠣꠞ ꠝꠞꠘ ꠀꠘꠟ ꠘꠤ?
ꠘꠣꠃꠎꠥꠛꠤꠟ꠆ꠟꠣ,
ꠝꠥꠐꠦꠃ ꠘꠣꠄ!
ꠛꠞꠋ ꠉꠥꠘꠣꠄꠃ ꠁꠔꠣ ꠇꠞꠍꠦ,
ꠢꠦ ꠜꠣꠟꠣ ꠎꠤꠘꠤꠡ ꠖꠤꠀ ꠀꠝꠣꠞꠦ ꠝꠣꠞꠤꠀ ꠢꠣꠞꠤ ꠙꠞꠝꠣꠘ ꠖꠦꠈꠣꠁꠟ,
ꠉꠥꠘꠣ ꠔ ꠉꠥꠘꠣ।
ꠀꠞ ꠅꠃ ꠢꠥꠇꠥꠝ-ꠀꠢꠇꠣꠝꠦꠃ ꠛꠥꠎꠣ ꠎꠣꠄ,
ꠉꠥꠘꠣ ꠅꠁꠟ ꠝꠡ꠆ꠔ ꠛꠠ ꠎꠉꠁꠘ꠆ꠘ।
ꠖꠤꠟꠞ ꠟꠉꠦ ꠡꠞꠤꠟꠞ ꠟꠣꠠꠣꠁ
১৪ ꠀꠝꠞꠣ ꠔ ꠎꠣꠘꠤ,
ꠡꠞꠤꠅꠔ ꠅꠁꠟꠉꠤ ꠞꠥꠢꠣꠘꠤ ꠎꠉꠔꠞ,
ꠅꠁꠟꠦ ꠀꠝꠤ ꠅꠁꠟꠣꠝ ꠞꠇ꠆ꠔ-ꠝꠣꠋꠡꠞ ꠎꠉꠔꠞ,
ꠀꠝꠤ ꠡꠞꠤꠟꠞ ꠝꠞ꠆ꠎꠤꠞ ꠛꠣꠘ꠆ꠖꠘꠅ ꠕꠣꠇꠣꠄ ꠉꠥꠘꠣꠞ ꠉꠥꠟꠣꠝ ꠅꠁꠍꠤ।
১৫ ꠀꠝꠤ ꠘꠤꠎꠦꠃ ꠔ ꠛꠥꠎꠤ ꠘꠣ,
ꠀꠝꠤ ꠇꠤꠔꠣ ꠇꠣꠝ ꠇꠞꠤ।
ꠀꠍꠟꠦ ꠀꠝꠤ ꠎꠦꠔꠣ ꠇꠞꠔꠣꠝ ꠌꠣꠁ,
ꠁꠔꠣ ꠘꠣ ꠇꠞꠤꠀ,
ꠎꠦꠔꠣꠞꠦ ꠊꠤꠘ꠆ꠘꠣꠁ ꠅꠔꠣꠃ ꠇꠞꠤ।
১৬ ꠀꠞ ꠎꠦꠔꠣ ꠇꠞꠔꠣꠝ ꠌꠣꠁ ꠘꠣ,
ꠅꠟꠣ ꠉꠥꠘꠣꠞ ꠇꠣꠝ ꠎꠦꠛꠟꠣ ꠇꠞꠤ,
ꠔꠦ ꠀꠝꠤ ꠄꠝꠘꠦꠃ ꠡ꠆ꠛꠤꠇꠣꠞ ꠇꠞꠤꠀꠞ,
ꠡꠞꠤꠅꠔ ꠀꠍꠟꠦꠅ ꠜꠣꠟꠣ ꠎꠤꠘꠤꠡ।
১৭ ꠁꠔꠣ ꠕꠣꠇꠤ ꠛꠥꠎꠣ ꠎꠣꠄ,
ꠀꠝꠤ ꠘꠤꠎꠦ ꠁꠟꠣ ꠇꠞꠤꠀꠞ ꠘꠣ,
ꠅꠁꠟꠦ ꠀꠝꠣꠞ ꠝꠣꠎꠦ ꠎꠦ ꠉꠥꠘꠣꠄ ꠛꠡꠔ ꠇꠞꠦ,
ꠢꠦ-ꠃ ꠀꠝꠣꠞꠦ ꠖꠤꠀ ꠁꠔꠣ ꠇꠞꠣꠄ।
১৮ ꠀꠞ ꠀꠝꠤ ꠔ ꠛꠥꠎꠤꠀꠞ,
ꠀꠝꠣꠞ ꠟꠃꠞ ꠝꠣꠎꠦ,
ꠝꠣꠘꠤ ꠡꠞꠤꠟꠞ ꠈꠣꠁꠡꠞ ꠝꠣꠎꠦ ꠜꠣꠟꠣ ꠇꠥꠘꠥ ꠎꠤꠘꠤꠡꠃ ꠘꠣꠁ।
ꠀꠝꠤ ꠘꠦꠇ ꠇꠣꠝ ꠇꠞꠣꠞ ꠈꠤꠀꠟ ꠕꠣꠇꠟꠦꠅ,
ꠀꠝꠣꠞ ꠡꠣꠝꠞꠕꠄ ꠇꠥꠟꠣꠄ ꠘꠣ।
১৯ ꠇꠣꠞꠘ ꠀꠝꠤ ꠎꠦꠔꠣ ꠘꠦꠇ ꠇꠣꠝ ꠇꠞꠔꠣꠝ ꠌꠣꠁ,
ꠁꠔꠣ ꠇꠞꠔꠣꠝ ꠙꠣꠞꠤ ꠘꠣ,
ꠅꠁꠟꠦ ꠎꠦ ꠛꠖ ꠇꠣꠝ ꠇꠞꠔꠣꠝ ꠌꠣꠁ ꠘꠣ,
ꠅꠔꠣꠃ ꠇꠞꠤ।
২০ ꠔꠦ ꠎꠦꠔꠣ ꠇꠞꠔꠣꠝ ꠌꠣꠁ ꠘꠣ,
ꠅꠔꠣꠃ ꠎꠦꠛꠟꠣ ꠇꠞꠤ,
ꠄꠞ ꠝꠣꠘꠤ ꠅꠁꠟ ꠁꠔꠣ ꠀꠝꠤ ꠇꠞꠤ ꠘꠣ,
ꠛꠞꠋ ꠎꠦ ꠉꠥꠘꠣꠄ ꠀꠝꠣꠞ ꠝꠣꠎꠦ ꠛꠡꠔ ꠇꠞꠦ,
ꠢꠦ-ꠃ ꠁꠔꠣ ꠇꠞꠣꠄ।
২১ ꠅꠈꠘ ꠀꠝꠣꠞ ꠘꠤꠎꠞ ꠜꠤꠔꠞꠦꠃ ꠖꠦꠈꠤꠀꠞ,
ꠄꠇꠐꠣ ꠛꠖ ꠞꠤꠙꠥꠄ ꠇꠣꠝ ꠇꠞꠦꠞ,
ꠀꠝꠤ ꠘꠦꠇ ꠇꠣꠝ ꠇꠞꠣꠔ ꠟꠣꠉꠟꠦ,
ꠛꠖ ꠇꠣꠝ ꠄꠝꠘꠦꠃ ꠀꠁꠀ ꠀꠎꠤ ꠎꠣꠄ।
২২ ꠀꠍꠟꠦ ꠀꠝꠣꠞ ꠖꠤꠟꠞ ꠈꠣꠁꠍꠟꠔ ꠝꠣꠚꠤꠇ ꠀꠝꠤ ꠀꠟ꠆ꠟꠣꠁ ꠢꠥꠇꠥꠝ-ꠀꠢꠇꠣꠝꠦ ꠈꠥꠡꠤ ꠅꠁ।
২৩ ꠅꠁꠟꠦ ꠀꠝꠣꠞ ꠡꠞꠤꠟꠞ ꠅꠋꠉꠞ ꠝꠣꠎꠦ ꠖꠥꠍꠞꠣ ꠀꠞꠇ ꠈꠣꠁꠍꠟꠔꠦ ꠇꠣꠝ ꠇꠞꠦꠞ,
ꠀꠝꠣꠞ ꠖꠤꠟꠦ ꠘꠦꠇ ꠇꠣꠝꠞꠦ ꠙꠍꠘ꠆ꠖ ꠇꠞꠟꠦꠅ,
ꠅꠃ ꠛꠖ ꠈꠣꠁꠍꠟꠔꠦ ꠀꠝꠣꠞ ꠖꠤꠟꠞ ꠟꠉꠦ ꠎꠥꠖ꠆ꠖ ꠇꠞꠤꠀ,
ꠀꠝꠣꠞꠦ ꠔꠣꠞ ꠉꠥꠟꠣꠝꠤꠔ ꠛꠣꠘ꠆ꠖꠤꠀ ꠞꠣꠈꠦ।
২৪ ꠀꠝꠣꠞ ꠛꠠ ꠛꠖ ꠘꠍꠤꠛ!
ꠀꠝꠣꠞ ꠡꠞꠤꠟꠞ ꠅꠃ ꠛꠖ ꠈꠣꠁꠍꠟꠔ,
ꠎꠦꠉꠤꠄ ꠀꠝꠣꠞꠦ ꠝꠃꠔꠞ ꠙꠕꠦ ꠐꠣꠘꠦ,
ꠔꠣꠞ ꠀꠔ ꠕꠣꠇꠤ ꠇꠦ ꠀꠝꠣꠞꠦ ꠛꠣꠌꠣꠁꠛ?
২৫ ꠀꠟ꠆ꠟꠣꠞ ꠡꠥꠇꠥꠞ,
ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠄ ꠔꠣꠞ ꠀꠔ ꠕꠣꠇꠤ ꠀꠝꠣꠞꠦ ꠛꠣꠌꠣꠁꠍꠂꠘ!
ꠅꠈꠘ ꠘꠤꠌ꠆ꠌꠤꠔ ꠛꠥꠎꠣ ꠎꠣꠄ,
ꠖꠤꠟꠞ ꠖꠤꠇ ꠕꠣꠇꠤ ꠀꠝꠤ ꠀꠟ꠆ꠟꠣꠁ ꠡꠞꠤꠅꠔꠞ ꠉꠥꠟꠣꠝꠤ ꠇꠞꠤ,
ꠅꠁꠟꠦ ꠡꠞꠤꠟꠞ ꠝꠞ꠆ꠎꠤꠞ ꠖꠤꠇ ꠕꠣꠇꠤ ꠀꠝꠤ ꠉꠥꠘꠣꠞ ꠈꠣꠁꠍꠟꠔꠞ ꠉꠥꠟꠣꠝꠤ ꠇꠞꠤ।