ꠞꠣꠎꠣꠞ ꠢꠥꠇꠥꠝ ꠝꠣꠘꠤꠀ ꠌꠟꠅ
১৩
১ ꠙꠞꠔꠦꠇ ꠝꠣꠘꠡꠦ ꠖꠦꠡꠞ ꠞꠣꠎꠣꠞꠦ ꠝꠣꠘꠤꠀ ꠌꠟꠃꠇ,
ꠇꠣꠞꠘ ꠀꠟ꠆ꠟꠣꠞ ꠝꠞ꠆ꠎꠤ ꠍꠣꠠꠣ ꠇꠦꠃ ꠞꠣꠎꠔ꠆ꠔ ꠙꠣꠄ ꠘꠣ,
ꠞꠣꠎꠣ ꠅꠇꠟꠞꠦ ꠔ ꠀꠟ꠆ꠟꠣꠄꠃ ꠉꠖꠤꠔ ꠛꠅꠀꠁꠘ।
২ ꠄꠞꠟꠣꠉꠤ ꠎꠦ ꠝꠣꠘꠡꠦ ꠖꠦꠡꠞ ꠞꠣꠎꠣꠞ ꠖꠥꠡꠝꠘꠤ ꠇꠞꠦ,
ꠢꠦ ꠀꠍꠟꠦ ꠀꠟ꠆ꠟꠣꠁ ꠢꠥꠇꠥꠝꠞ ꠖꠥꠡꠝꠘꠤ ꠇꠞꠦ।
ꠁꠟꠣ ꠇꠣꠝ ꠎꠦꠔꠣꠄ ꠇꠞꠂꠘ,
ꠔꠣꠞꠣ ꠔ ꠘꠤꠎꠞ ꠃꠙꠞꠦ ꠉꠎꠛ ꠒꠣꠇꠤꠀ ꠀꠘꠂꠘ।
৩ ꠀꠞ ꠜꠣꠟꠣ ꠇꠣꠝ ꠇꠞꠞꠣ ꠎꠘꠦ ꠔ ꠞꠣꠎꠣꠞꠦ ꠒꠞꠣꠘꠤꠞ ꠇꠥꠘ꠆ꠔꠣ ꠘꠣꠁ,
ꠅꠁꠟꠦ ꠇꠥ-ꠇꠣꠝ ꠇꠞꠞꠣ ꠎꠘꠞ ꠟꠣꠉꠤ ꠇꠑꠤꠘ ꠛꠤꠙꠖ।
ꠔꠦ ꠔꠥꠝꠞꠣ ꠇꠤꠔꠣ ꠘꠤꠞꠜꠄꠄ ꠞꠁꠔꠣꠄ ꠌꠣꠅ ꠘꠤ?
ꠔꠣꠁꠟꠦ ꠜꠣꠟꠣ ꠙꠕꠦ ꠀꠐꠅ,
ꠔꠦꠃ ꠞꠣꠎꠣꠄ ꠔꠥꠝꠞꠣꠞ ꠔꠣꠞꠤꠚ ꠇꠞꠛꠣ।
৪ ꠞꠣꠎꠣꠄ ꠔ ꠔꠥꠝꠞꠣꠞ ꠜꠣꠟꠣꠁꠞ ꠟꠣꠉꠤꠃ ꠀꠟ꠆ꠟꠣꠞ ꠈꠣꠖꠤꠝ ꠢꠤꠡꠣꠛꠦ ꠇꠣꠝ ꠇꠞꠂꠘ।
ꠅꠁꠟꠦ ꠔꠥꠝꠞꠣ ꠎꠦꠞꠣ ꠇꠥ-ꠇꠣꠝ ꠇꠞꠅ,
ꠔꠥꠝꠞꠣꠞ ꠟꠣꠉꠤ ꠛꠤꠙꠖ ꠀꠍꠦ।
ꠔꠣꠁꠘ ꠈꠣꠝꠈꠣ ꠇꠦꠃꠞꠞꠦ ꠝꠣꠞꠂꠘ ꠘꠣ,
ꠅꠁꠟꠦ ꠇꠥ-ꠇꠣꠝ ꠇꠞꠞꠣꠞꠦ ꠀꠟ꠆ꠟꠣꠞ ꠈꠣꠖꠤꠝ ꠢꠤꠡꠣꠛꠦ ꠑꠤꠇꠃ ꠡꠣꠎꠣ ꠖꠦꠁꠘ।
৫ ꠔꠦ ꠈꠣꠟꠤ ꠡꠣꠎꠣꠞ ꠒꠞꠦ ꠘꠣꠄ,
ꠛꠞꠋ ꠎꠣꠞꠎꠤꠞ ꠛꠤꠛꠦꠇꠞ ꠛꠤꠌꠣꠞꠦꠅ ꠞꠣꠎꠣꠞ ꠢꠥꠇꠥꠝ ꠝꠣꠘꠣ ꠎꠞꠥꠞ।
৬ ꠅꠔꠣꠞ ꠟꠣꠉꠤꠃ ꠔ ꠔꠥꠝꠞꠣ ꠈꠣꠎꠘꠣ ꠖꠦꠅ,
ꠇꠣꠞꠘ ꠈꠣꠎꠘꠣ ꠔꠥꠟꠤꠀ ꠈꠞꠌ ꠇꠞꠣꠞ ꠝꠣꠎꠖꠤ ꠔꠣꠞꠣ ꠀꠟ꠆ꠟꠣꠞ ꠈꠦꠎꠝꠔ ꠇꠞꠞꠣ।
৭ ꠅꠈꠘ ꠎꠣꠞ ꠎꠦꠟꠣ ꠙꠣꠅꠘꠣ,
ꠔꠣꠞꠦ ꠅꠟꠣ ꠖꠦꠅ।
ꠎꠦꠘꠞꠦ ꠈꠣꠎꠘꠣ ꠖꠤꠛꠣꠞ ꠇꠕꠣ,
ꠄꠘꠞꠦ ꠈꠣꠎꠘꠣ ꠖꠦꠅ;
ꠎꠦꠘꠞꠦ ꠝꠣꠡꠥꠟ ꠖꠤꠛꠣꠞ ꠇꠕꠣ,
ꠄꠘꠞꠦ ꠝꠣꠡꠥꠟ ꠖꠦꠅ;
ꠎꠦꠘꠞꠦ ꠁꠎ꠆ꠎꠔ ꠇꠞꠣꠞ ꠇꠕꠣ,
ꠄꠘꠦ ꠁꠎ꠆ꠎꠔ ꠇꠞꠅ;
ꠎꠦꠘꠞꠦ ꠔꠣꠎꠤꠝ ꠇꠞꠣꠞ ꠇꠕꠣ,
ꠄꠘꠦ ꠔꠣꠎꠤꠝ ꠇꠞꠅ।
ꠄꠇꠦ-ꠅꠁꠘ꠆ꠘꠦ ꠝꠣꠄꠀ ꠇꠞꠅ
৮ ꠈꠣꠟꠤ ꠝꠣꠄꠀꠞ ꠞꠤꠘ ꠍꠣꠠꠣ ꠖꠥꠍꠞꠣ ꠇꠥꠘꠥ ꠛꠦꠙꠣꠞꠦ ꠇꠦꠃꠞꠞ ꠉꠦꠍꠦ ꠞꠤꠘꠤ ꠅꠁꠅ ꠘꠣ।
ꠎꠣꠘꠅ ꠘꠤ,
ꠎꠦ ꠝꠣꠘꠡꠦ ꠅꠁꠘ꠆ꠘ ꠎꠘꠞꠦ ꠝꠣꠄꠀ ꠇꠞꠦ,
ꠢꠦ ꠔ ꠡꠞꠤꠅꠔꠞ ꠢꠥꠇꠥꠝ-ꠀꠢꠇꠣꠝ ꠡꠥꠟ꠆ꠟꠀꠘꠣ ꠀꠖꠣꠄ ꠇꠞꠍꠦ।
৯ ꠎꠦꠟꠣ ꠡꠞꠤꠅꠔꠞ ꠢꠥꠇꠥꠝ ꠀꠍꠦ,
“ꠎꠤꠘꠣ ꠇꠞꠤꠅ ꠘꠣ,
ꠈꠥꠘ ꠇꠞꠤꠅ ꠘꠣ,
ꠌꠥꠞꠤ ꠇꠞꠤꠅ ꠘꠣ,
ꠟꠥꠜ-ꠟꠣꠟꠌ ꠇꠞꠤꠅ ꠘꠣ,”
ꠛꠣ ꠁ ꠟꠣꠈꠣꠘ ꠀꠞꠅ ꠎꠔ ꠢꠥꠇꠥꠝ ꠀꠍꠦ,
ꠁ ꠢꠇꠟ ꠢꠥꠇꠥꠝꠞꠦ ꠄꠇꠈꠣꠘꠅ ꠇꠞꠤ ꠇꠅꠀ ꠅꠁꠍꠦ,
“ꠔꠥꠝꠣꠞ ꠀꠞꠤ-ꠚꠞꠤꠞꠦ ꠘꠤꠎꠞ ꠟꠣꠈꠣꠘ ꠝꠣꠄꠀ ꠇꠞꠅ।”
১০ ꠀꠞ ꠝꠣꠄꠀ ꠕꠣꠇꠟꠦ ꠇꠦꠃ ꠀꠞꠤ-ꠚꠞꠤꠞ ꠈꠦꠔꠤ ꠇꠞꠔ ꠙꠣꠞꠦ ꠘꠣ,
ꠄꠞꠟꠣꠉꠤ ꠝꠣꠄꠀ ꠇꠞꠟꠦ ꠙꠥꠞꠣꠙꠥꠞ ꠡꠞꠤꠅꠔꠞ ꠝꠣꠘꠣ ꠅꠁꠎꠣꠄ।
১১ ꠔꠦ ꠜꠣꠁ ꠅꠇꠟ,
ꠅꠈꠘꠇꠥꠞ ꠎꠝꠣꠘꠣꠞ ꠢꠣꠟꠔ ꠔ ꠔꠥꠝꠞꠣ ꠎꠣꠘꠅꠃ,
ꠄꠞꠟꠣꠉꠤ ꠛꠥꠎꠤ-ꠢꠥꠘꠤ ꠌꠟꠅ।
ꠔꠥꠝꠞꠣ ꠊꠥꠝ ꠕꠣꠇꠤ ꠢꠎꠣꠉ ꠅꠀꠞ ꠡꠝꠄ ꠅꠁꠉꠦꠍꠦ,
ꠇꠣꠞꠘ ꠀꠝꠞꠣ ꠎꠦ ꠡꠝꠄ ꠁꠝꠣꠘ ꠀꠘꠍꠤꠟꠣꠝ,
ꠢꠃ ꠢꠣꠟꠔ ꠕꠣꠇꠤꠅ ꠀꠝꠞꠣꠞ ꠘꠣꠎꠣꠔ ꠅꠈꠘ ꠀꠞꠅ ꠗꠣꠞꠅ ꠀꠁꠌ꠆ꠍꠦ।
১২ ꠞꠣꠁꠔ ꠙꠥꠀꠁꠀ ꠢꠣꠞꠤ ꠛꠤꠀꠘ ꠅꠁꠎꠣꠞ;
ꠅꠈꠘ ꠎꠟꠖꠤ ꠀꠅ,
ꠀꠝꠞꠣ ꠀꠘ꠆ꠖꠣꠞꠤꠞ ꠛꠖ ꠇꠣꠝ ꠍꠣꠠꠤꠀ ꠘꠥꠞꠞ ꠟꠦꠛꠣꠍ ꠟꠣꠉꠣꠁ,
ꠀꠟ꠆ꠟꠣꠁ ꠀꠔꠤꠀꠞ ꠚꠤꠘ꠆ꠖꠤꠟꠣꠁ।
১৩ ꠢꠂ-ꠢꠥꠟ꠆ꠟꠣ ꠇꠞꠤ ꠝꠖ ꠈꠣꠁꠀ ꠐꠣꠟ ꠅꠀ,
ꠎꠤꠘꠣ-ꠛꠖꠝꠣꠁꠡꠤ ꠛꠣ ꠝꠘꠉꠠꠣ ꠌꠟꠣ,
ꠁꠋꠡꠣ ꠀꠞ ꠇꠣꠁꠎ꠆ꠎꠣ-ꠚꠍꠣꠖ ꠛꠣꠖ ꠖꠤꠀ,
ꠀꠅ,
ꠀꠝꠞꠣ ꠖꠤꠘꠞ ꠚꠞꠦ ꠌꠟꠞꠣ ꠝꠣꠘꠡꠞ ꠟꠣꠈꠣꠘ ꠌꠟꠤ।
১৪ ꠚꠤꠘ꠆ꠘꠞ ꠟꠦꠛꠣꠍꠞ ꠟꠣꠈꠣꠘ ꠔꠥꠝꠞꠣ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞꠦ ꠙꠥꠞꠣꠙꠥꠞ ꠚꠤꠘ꠆ꠖꠤꠟꠣꠅ।
ꠡꠞꠤꠟꠞ ꠛꠖ ꠈꠣꠁꠡ ꠝꠤꠐꠣꠘꠤꠞ ꠌꠤꠘ꠆ꠔꠣ ꠄꠇ꠆ꠇꠦꠞꠦ ꠛꠣꠖ ꠖꠦꠅ।