ꠝꠣꠘꠡꠞ ꠎꠃꠛꠘ ꠀꠞ ꠙꠞꠤꠛꠣꠞꠞ ꠔꠣꠟꠤꠝ (৫:১-৭:৪০)
ꠘꠣꠚꠞꠝꠣꠘ ꠈꠛꠤꠍ ꠅꠇꠟꠞ ꠛꠤꠌꠣꠞ
৫
১ ꠀꠝꠤ ꠢꠥꠘꠞꠣꠝ,
ꠔꠥꠝꠞꠣꠞ ꠝꠣꠎꠦ ꠎꠦꠟꠣꠈꠣꠘ ꠎꠉꠁꠘ꠆ꠘ ꠎꠤꠘꠣꠞ ꠇꠣꠝ ꠌꠟꠦꠞ,
ꠁꠟꠣ ꠇꠣꠝ ꠛꠤꠗꠞ꠆ꠝꠤ ꠅꠇꠟꠦꠅ ꠇꠞꠦ ꠘꠣ।
ꠔꠥꠝꠞꠣꠞ ꠝꠣꠎꠞ ꠄꠇ ꠎꠘꠦ ꠘꠤꠎꠞ ꠢꠣꠔꠘ ꠝꠣꠞꠦꠅ ꠛꠃꠞ ꠟꠣꠈꠣꠘ ꠞꠣꠈꠍꠦ।
২ ꠄꠞꠛꠣꠖꠦꠅ ꠔꠥꠝꠞꠣ ꠛꠠꠣꠁ ꠇꠞꠅ ꠇꠤꠟꠣ?
ꠁꠔꠣꠞ ꠟꠣꠉꠤ ꠔꠥꠝꠞꠣ ꠚꠣꠘꠣ ꠝꠣꠋꠉꠣ ꠎꠞꠥꠞ ꠘꠣ ꠘꠤ?
ꠀꠞ ꠎꠦꠉꠤꠄ ꠁꠔꠣ ꠇꠞꠍꠦ,
ꠔꠣꠞꠦ ꠎꠝꠣꠔ ꠕꠣꠇꠤ ꠛꠣꠞ ꠇꠞꠤ ꠖꠦꠅꠀ ꠃꠌꠤꠔ ꠘꠣ ꠘꠤ?
৩ ꠀꠝꠤ ꠡ-ꠡꠞꠤꠟꠦ ꠔꠥꠝꠞꠣꠞ ꠝꠣꠎꠦ ꠘꠣ ꠕꠣꠇꠟꠦꠅ ꠞꠥꠢꠦ ꠔ ꠔꠥꠝꠞꠣꠞ ꠟꠉꠦ ꠀꠍꠤ,
ꠄꠞꠟꠣꠉꠤ ꠎꠦꠉꠤꠄ ꠁꠔꠣ ꠇꠞꠍꠦ,
ꠍꠣꠝꠘꠦ ꠕꠣꠇꠣ ꠛꠤꠌꠣꠞꠤꠞ ꠟꠣꠈꠣꠘ ꠀꠝꠤꠅ ꠀꠉꠦꠃ ꠔꠣꠞ ꠛꠤꠌꠣꠞ ꠇꠞꠤꠀ ꠞꠣꠈꠍꠤ।
৪ ꠀꠝꠣꠞ ꠛꠤꠌꠣꠞ ꠅꠁꠟ,
ꠔꠥꠝꠞꠣ ꠝꠣꠟꠤꠇ ꠁꠍꠣꠞ ꠘꠣꠝꠦ ꠄꠇ ꠎꠣꠉꠣꠔ ꠖꠟꠣ ꠅꠅ,
ꠅꠃ ꠡꠝꠄ ꠀꠝꠤꠅ ꠞꠥꠢꠦ ꠔꠥꠝꠞꠣꠞ ꠟꠉꠦ ꠞꠁꠝꠥ ꠀꠞ ꠝꠣꠟꠤꠇ ꠁꠍꠣꠞ ꠛꠟ-ꠡꠇ꠆ꠔꠤꠅ ꠀꠝꠞꠣꠞ ꠟꠉꠦ ꠕꠣꠇꠛ।
৫ ꠀꠞ ꠅꠃ ꠘꠣꠚꠞꠝꠣꠘꠞ ꠡꠞꠤꠟꠞꠦ ꠛꠤꠘꠣꠡ ꠇꠞꠣꠞ ꠟꠣꠉꠤ ꠡꠄꠔꠣꠘꠞ ꠀꠔꠅ ꠖꠤꠟꠣꠁꠔꠦ ꠅꠁꠛ,
ꠎꠣꠔꠦ ꠝꠣꠟꠤꠇ ꠁꠍꠣ ꠀꠁꠛꠣꠞ ꠇꠣꠟꠅ ꠔꠣꠞ ꠞꠥꠢꠦ ꠘꠣꠎꠣꠔ ꠙꠣꠄ।
৬ ꠜꠣꠁꠀꠂꠘꠞꠦ,
ꠛꠠꠣꠁ ꠇꠞꠣ ꠔꠥꠝꠞꠣꠞ ꠟꠣꠉꠤ ꠑꠤꠇ ꠘꠣꠄ।
ꠎꠣꠘꠅ ꠘꠣ ꠘꠤ,
ꠝꠄꠖꠣꠞ ꠈꠣꠁꠞ ꠛꠠ ꠉꠣꠝꠟꠣꠞꠦꠅ ꠕꠥꠠꠣ ꠈꠣꠝꠤꠞꠦ ꠚꠥꠟꠣꠁꠟꠣꠄ?
৭ ꠔꠦ ꠔꠥꠝꠞꠣꠞ ꠖꠤꠟ ꠕꠣꠇꠤꠅ ꠢꠃ ꠙꠥꠞꠣꠘ ꠈꠣꠝꠤꠞꠞ ꠜꠣꠛ ꠚꠣꠟꠣꠁ ꠖꠦꠅ,
ꠎꠣꠔꠦ ꠈꠣꠝꠤꠞ ꠍꠣꠠꠣ ꠝꠄꠖꠣꠞ ꠈꠣꠁ ꠛꠘꠅ,
ꠀꠞ ꠀꠍꠟꠦꠃ ꠔ ꠔꠥꠝꠞꠣ ꠈꠣꠝꠤꠞ ꠍꠣꠠꠣ ꠎꠘ।
ꠀꠎꠣꠖꠤ ꠁꠖꠞ ꠇꠥꠞꠛꠣꠘꠤꠞ ꠝꠦꠠꠣꠞ ꠛꠣꠁꠌ꠆ꠌꠣꠞ ꠟꠣꠈꠣꠘ ꠀꠝꠞꠣꠞ ꠟꠣꠉꠤ ꠀꠟ-ꠝꠍꠤꠞꠦꠅ ꠇꠥꠞꠛꠣꠘꠤ ꠖꠦꠅꠀ ꠅꠁꠍꠦ।
ꠎꠣꠘꠅ ꠔ,
ꠢꠃ ꠁꠖꠅ ꠢꠇꠟ ꠟꠣꠈꠣꠘ ꠈꠣꠝꠤꠞ ꠞꠣꠈꠣ ꠢꠣꠞꠣꠝ।
৮ ꠄꠞꠟꠣꠉꠤ ꠀꠅ,
ꠀꠝꠞꠣꠅ ꠢꠃ ꠙꠥꠞꠣꠘ ꠈꠣꠝꠤꠞ,
ꠝꠣꠘꠤ ꠁꠋꠡꠣ ꠀꠞ ꠈꠣꠞꠣꠙꠤꠞꠦ ꠛꠣꠖ ꠖꠤꠟꠣꠁ,
ꠄꠞ ꠛꠖꠟꠣ ꠈꠣꠝꠤꠞ ꠍꠣꠠꠣ ꠞꠥꠐꠤ,
ꠝꠣꠘꠤ ꠢꠇ ꠀꠞ ꠡꠣꠖꠣ ꠖꠤꠟꠦ ꠁꠖ ꠀꠖꠣꠄ ꠇꠞꠤ।
৯ ꠀꠝꠤ ꠀꠉꠦ ꠔꠥꠝꠞꠣꠞꠦ ꠟꠦꠈꠍꠟꠣꠝ,
ꠔꠥꠝꠞꠣ ꠘꠣꠚꠞꠝꠣꠘ ꠈꠛꠤꠍ ꠅꠇꠟꠞ ꠟꠉꠦ ꠡꠋ ꠗꠞꠤꠅ ꠘꠣ।
১০ ꠀꠝꠤ ꠇꠁꠞꠣꠝ ꠘꠣ,
ꠁ ꠎꠉꠔꠞ ꠈꠛꠤꠍ ꠝꠣꠘꠥꠡ,
ꠟꠥꠜꠤ,
ꠖꠈꠟꠛꠣꠎ ꠀꠞ ꠖꠦꠛ-ꠖꠦꠛꠤꠞ ꠙꠥꠎꠣ ꠇꠞꠞꠣꠞ ꠡꠋꠉꠅ ꠄꠇ꠆ꠇꠦꠞꠦ ꠍꠣꠠꠤ ꠖꠤꠔꠣꠄ।
ꠁꠟꠣ ꠅꠁꠟꠦ ꠔ ꠔꠥꠝꠞꠣ ꠎꠉꠔꠞ ꠛꠣꠞꠦ ꠀꠞꠅ ꠇꠥꠘꠥꠈꠣꠘꠅ ꠎꠣꠁꠔꠦꠉꠤ ꠅꠁꠛ।
১১ ꠅꠁꠟꠦ ꠀꠝꠤ ꠈꠣꠟꠤ ꠅꠈꠣꠘ ꠇꠁꠔꠣꠝ ꠌꠣꠁꠞꠣꠝ,
ꠇꠦꠃ ꠎꠥꠖꠤ ꠘꠤꠎꠞꠦ ꠝꠥꠝꠤꠘ ꠇꠁꠀ ꠖꠣꠛꠤ ꠇꠞꠦ,
ꠀꠞ ꠢꠦ ꠎꠤꠘꠣꠇꠥꠞ,
ꠟꠥꠜꠤ,
ꠖꠦꠛ-ꠖꠦꠛꠤꠞ ꠙꠥꠎꠣꠞꠤ,
ꠉꠤꠛꠔ ꠉꠣꠅꠞꠣ,
ꠝꠖꠈꠥꠞ,
ꠛꠣ ꠌꠥꠞ-ꠒꠣꠇꠣꠁꠔ ꠅꠄ,
ꠔꠦ ꠔꠣꠞ ꠡꠋ ꠗꠞꠤꠅ ꠘꠣ,
ꠔꠣꠞ ꠟꠉꠦ ꠈꠣꠘꠣ-ꠙꠤꠘꠣꠅ ꠈꠣꠁꠅ ꠘꠣ।
১২-১৩ ꠢꠥꠘꠅ,
ꠀꠝꠣꠞ ꠅꠟꠣ ꠑꠦꠇꠣ ꠙꠠꠍꠦ ꠘꠤ,
ꠁꠍꠣꠞ ꠔꠞꠤꠇꠣꠞ ꠛꠣꠁꠞꠞ ꠝꠣꠘꠡꠞ ꠛꠤꠌꠣꠞ ꠇꠞꠔꠣꠝ?
ꠁꠔꠣꠞ ꠛꠤꠌꠣꠞ ꠀꠟ꠆ꠟꠣꠄꠃ ꠇꠞꠛꠣ।
ꠅꠁꠟꠦ ꠔꠞꠤꠇꠣꠞ ꠜꠤꠔꠞꠞ ꠝꠣꠘꠡꠞ ꠛꠤꠌꠣꠞ ꠇꠞꠣ ꠔꠥꠝꠞꠣꠞ ꠇꠣꠝ ꠘꠣ ꠘꠤ?
ꠔꠃꠞꠣꠔ ꠇꠤꠔꠣꠛꠅ ꠀꠍꠦ,
“ꠢꠃ ꠘꠣꠚꠞꠝꠣꠘꠞꠦ ꠔꠥꠝꠞꠣꠞ ꠡꠝꠣꠎ ꠕꠣꠇꠤ ꠛꠣꠞ ꠇꠞꠤ ꠖꠦꠅ।”