ꠍꠣꠢꠣꠛꠤ ꠅꠇꠟꠞ ꠅꠗꠤꠇꠣꠞ
৯
১ ꠜꠣꠁꠀꠂꠘꠞꠦ,
ꠀꠝꠤ ꠇꠤꠔꠣ ꠡ꠆ꠛꠣꠗꠤꠘ ꠘꠣꠄ ꠘꠤ?
ꠀꠝꠤ ꠇꠥꠘꠥ ꠍꠣꠢꠣꠛꠤ ꠘꠣꠄ ꠘꠤ?
ꠀꠝꠤ ꠇꠥꠘꠥ ꠀꠝꠞꠣꠞ ꠝꠣꠟꠤꠇ ꠁꠍꠣꠞꠦ ꠖꠦꠈꠍꠤ ꠘꠣ ꠘꠤ?
ꠝꠣꠟꠤꠇꠞ ꠟꠣꠉꠤ ꠀꠝꠤ ꠎꠦ ꠔꠛꠟꠤꠉ ꠇꠣꠝ ꠇꠞꠍꠤ,
ꠁꠔꠣꠞ ꠚꠟ ꠔꠥꠝꠞꠣ ꠘꠣꠄ ꠘꠤ?
২ ꠅꠁꠘ꠆ꠘ ꠇꠦꠃ ꠀꠝꠣꠞꠦ ꠍꠣꠢꠣꠛꠤ ꠇꠁꠀ ꠘꠣ ꠝꠣꠘꠟꠦꠅ ꠔꠥꠝꠞꠣ ꠔ ꠝꠣꠘꠛꠣꠄ,
ꠀꠝꠣꠞ ꠍꠣꠢꠣꠛꠤ ꠇꠣꠝꠞ ꠡꠤꠟ-ꠌꠣꠙ꠆ꠙꠠ ꠔꠥꠝꠞꠣꠞꠃ,
ꠇꠣꠞꠘ ꠀꠝꠣꠞ ꠝꠣꠎꠖꠤ ꠔꠥꠝꠞꠣ ꠔꠣꠘ ꠃꠝ꠆ꠝꠔ ꠅꠁꠍ।
৩ ꠔꠦ ꠀꠝꠣꠞ ꠍꠣꠢꠣꠛꠤ ꠙꠖ ꠟꠁꠀ ꠎꠦꠞꠣ ꠡꠘ꠆ꠖꠄ ꠇꠞꠂꠘ,
ꠔꠣꠞꠣ ꠀꠝꠣꠞ ꠅꠃ ꠎꠥꠀꠙ ꠢꠥꠘꠃꠇ꠆ꠇꠣ।
৪ ꠀꠝꠤ ꠀꠞ ꠍꠣꠢꠣꠛꠤ ꠛꠣꠞꠘꠣꠛꠣꠍꠦ ꠇꠤꠔꠣ ꠈꠣꠘꠣ-ꠙꠤꠘꠣꠞ ꠛꠦꠔꠘ ꠙꠣꠁꠛꠣꠞ ꠅꠗꠤꠇꠣꠞ ꠘꠣꠁ ꠘꠤ?
৫ ꠝꠥꠝꠤꠘ ꠇꠥꠘꠥ ꠛꠁꠘꠞꠦ ꠡꠣꠖꠤ ꠇꠞꠣꠞ ꠅꠗꠤꠇꠣꠞ ꠀꠝꠞꠣꠞ ꠘꠣꠄ ꠘꠤ?
ꠅꠁꠘ꠆ꠘ ꠍꠣꠢꠣꠛꠤ ꠅꠇꠟꠦ,
ꠝꠣꠟꠤꠇ ꠁꠍꠣꠞ ꠜꠣꠁꠀꠂꠘ꠆ꠔꠦ ꠀꠞ ꠍꠣꠢꠣꠛꠤ ꠙꠤꠔꠞꠦ ꠎꠦꠟꠣ ꠎꠣꠞꠎꠤꠞ ꠛꠤꠛꠤꠞꠦ ꠟꠁꠀ ꠍꠚꠞꠅ ꠎꠣꠁꠘ,
ꠀꠝꠞꠣꠅ ꠅꠟꠣ ꠙꠣꠞꠤ ꠘꠣ ꠘꠤ?
৬ ꠈꠣꠟꠤ ꠀꠝꠤ ꠀꠞ ꠛꠣꠞꠘꠣꠛꠣꠍꠦꠃ ꠘꠤꠎꠞ ꠀꠔꠦ ꠇꠣꠝꠣꠁ ꠇꠞꠤꠀ ꠈꠣꠁꠔꠣꠝ ꠘꠤ?
৭ ꠘꠤꠎꠞ ꠉꠣꠐ꠆ꠐꠤꠞ ꠐꠦꠇꠣ ꠜꠣꠋꠉꠤꠀ ꠇꠦꠃ ꠍꠤꠙꠣꠁꠞ ꠌꠣꠇꠞꠤ ꠇꠞꠦ ꠘꠤ?
ꠎꠦ ꠉꠤꠞꠡ꠆ꠔꠦ ꠚꠟꠞ ꠛꠣꠉꠣꠘ ꠇꠞꠦ,
ꠢꠦ ꠁꠔꠣꠞ ꠚꠟ ꠈꠣꠄ ꠘꠣ ꠘꠤ?
ꠎꠦ ꠞꠣꠈꠣꠟꠦ ꠙꠡꠥ ꠙꠣꠟ ꠞꠣꠈꠦ,
ꠢꠦ ꠁꠔꠣꠞ ꠖꠥꠗ ꠈꠣꠄ ꠘꠣ ꠘꠤ?
৮ ꠀꠝꠤ ꠔ ꠈꠣꠟꠤ ꠝꠣꠘꠥꠡ ꠀꠈꠟꠦ ꠝꠣꠔꠤꠀꠞ ꠘꠣ,
ꠝꠥꠍꠣ ꠘꠛꠤꠞ ꠡꠞꠤꠅꠔꠦꠅ ꠅꠟꠣ ꠇꠁꠍꠦ।
৯ ꠡꠞꠤꠅꠔꠅ ꠀꠍꠦ,
“ꠗꠣꠘ ꠝꠣꠠꠣ ꠖꠦꠅꠀꠞ ꠡꠝꠄ ꠉꠞꠥꠞ ꠝꠥꠈꠅ ꠢꠥꠚꠤ ꠟꠣꠉꠣꠁꠅ ꠘꠣ।”
ꠔꠦ ꠀꠟ꠆ꠟꠣꠄ ꠈꠣꠟꠤ ꠉꠞꠥꠞ ꠇꠕꠣꠃ ꠌꠤꠘ꠆ꠔꠣ ꠇꠞꠂꠘ ꠘꠤ?
১০ ꠔꠣꠁꠘ ꠀꠍꠟꠦ ꠀꠝꠞꠣꠞ ꠇꠕꠣꠃ ꠇꠁꠍꠂꠘ,
ꠁꠈꠣꠘ ꠢꠣꠍꠣ ꠘꠣꠄ ꠘꠤ?
ꠘꠤꠌ꠆ꠌꠄ,
ꠁꠔꠣ ꠀꠝꠞꠣꠞ ꠟꠣꠉꠤꠃ ꠟꠦꠈꠣ ꠅꠁꠍꠤꠟ,
ꠇꠣꠞꠘ ꠎꠦꠁꠘ ꠈꠦꠔ ꠇꠞꠂꠘ ꠀꠞ ꠎꠦꠁꠘ ꠗꠣꠘ ꠝꠣꠠꠣ ꠖꠦꠁꠘ,
ꠚꠡꠟꠞ ꠛꠣꠐ ꠙꠣꠅꠀꠞ ꠀꠡꠣꠄꠃ ꠔꠣꠞꠣꠞ ꠁꠔꠣ ꠇꠞꠣ ꠃꠌꠤꠔ।
১১ ꠔꠦ ꠀꠝꠞꠣ ꠎꠦꠟꠣ ꠔꠥꠝꠞꠣꠞ ꠝꠣꠎꠦ ꠞꠥꠢꠣꠘꠤꠇ ꠛꠤꠌꠤ ꠞꠥꠁꠍꠤ,
ꠅꠃꠟꠣ ꠎꠥꠖꠤ ꠔꠥꠝꠞꠣꠞ ꠉꠦꠍ ꠕꠣꠇꠤ ꠖꠥꠘꠤꠀꠛꠤ ꠈꠣꠘꠤ-ꠙꠣꠘꠤ ꠎꠥꠉꠣꠁ,
ꠔꠦ ꠛꠦꠡꠤ ꠇꠥꠘ꠆ꠔꠣ ꠘꠤꠞꠣꠝ ꠘꠤ?
১২ ꠀꠞ ꠅꠃ ꠛꠦꠙꠣꠞꠦ ꠎꠥꠖꠤ ꠔꠥꠝꠞꠣꠞ ꠃꠙꠞꠦ ꠅꠁꠘ꠆ꠘ ꠝꠣꠘꠡꠞ ꠖꠣꠛꠤ ꠈꠣꠐꠦ,
ꠔꠦ ꠀꠝꠞꠣ ꠀꠞꠅ ꠛꠦꠡꠤ ꠖꠣꠛꠤ ꠈꠣꠐꠣꠁꠔꠣꠝ ꠙꠣꠞꠤ ꠘꠣ ꠘꠤ?
ꠅꠁꠟꠦ ꠀꠝꠞꠣ ꠁꠟꠣ ꠖꠣꠛꠤ ꠘꠣ ꠈꠣꠐꠣꠁꠀ ꠡꠁꠎ꠆ꠎ ꠇꠞꠤꠀꠞ,
ꠎꠣꠔꠦ ꠀꠟ-ꠝꠍꠤꠞ ꠛꠦꠙꠣꠞꠦ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠣꠝꠅ ꠀꠝꠞꠣ ꠇꠦꠃꠞꠞ ꠙꠕꠞ ꠇꠣꠐꠣ ꠘꠣ ꠅꠁ।
১৩ ꠔꠥꠝꠞꠣ ꠎꠣꠘꠅ ꠘꠣ ꠘꠤ,
ꠙꠛꠤꠔ꠆ꠞ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠎꠦꠞꠣ ꠇꠣꠝ ꠇꠞꠂꠘ,
ꠔꠣꠞꠣ ꠅꠈꠣꠘ ꠕꠣꠇꠤꠃ ꠈꠣꠘꠣ-ꠙꠤꠘꠣ ꠙꠣꠁꠘ,
ꠀꠞ ꠇꠥꠞꠛꠣꠘꠤ ꠈꠣꠘꠣꠔ ꠎꠦꠞꠣ ꠇꠣꠝ ꠇꠞꠂꠘ,
ꠔꠣꠞꠣ ꠅꠃ ꠇꠥꠞꠛꠣꠘꠤꠞ ꠝꠣꠟ ꠕꠣꠇꠤ ꠛꠣꠐ ꠙꠣꠁꠘ।
১৪ ꠑꠤꠇ ꠅꠟꠣꠈꠣꠘ ꠝꠣꠟꠤꠇ ꠁꠍꠣꠞ ꠢꠥꠇꠥꠝ ꠀꠍꠦ,
ꠎꠣꠞꠣ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠂꠘ,
ꠔꠣꠞꠣ ꠎꠣꠘꠥ ꠅꠃ ꠇꠣꠝꠞ ꠃꠍꠤꠟ꠆ꠟꠣꠄ ꠈꠣꠅꠀ-ꠚꠤꠘ꠆ꠖꠣ ꠙꠣꠁꠘ।
১৫ ꠅꠁꠟꠦ ꠀꠝꠤ ꠔ ꠄꠞ ꠇꠥꠘ꠆ꠔꠣꠃ ꠘꠤꠍꠤ ꠘꠣ।
ꠀꠞ ꠅꠈꠘ ꠔꠥꠝꠞꠣꠞꠦꠅ ꠁꠔꠣ ꠟꠦꠈꠤꠀꠞ ꠘꠣ,
ꠀꠝꠣꠞ ꠟꠣꠉꠤ ꠅꠔꠣꠞ ꠛꠦꠛꠡ꠆ꠔꠣ ꠇꠞꠔꠣꠄ ꠇꠞꠤ।
ꠅꠈꠘ ꠀꠝꠣꠞ ꠅꠃ ꠛꠠꠣꠁꠞꠦ ꠎꠥꠖꠤ ꠇꠦꠃ ꠛꠦꠇꠣꠝꠣ ꠛꠣꠘꠣꠁꠟꠣꠄ,
ꠔꠦ ꠀꠝꠣꠞ ꠝꠞꠤ ꠎꠣꠅꠀꠃ ꠜꠣꠟꠣ।
১৬ ꠀꠝꠤ ꠎꠦ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠤꠀꠞ,
ꠄꠔꠦ ꠀꠝꠣꠞ ꠛꠠꠣꠁ ꠖꠦꠈꠣꠘꠤꠞ ꠇꠥꠘ꠆ꠔꠣ ꠘꠣꠄ,
ꠁꠔꠣ ꠀꠝꠣꠞ ꠟꠣꠉꠤ ꠚꠞꠎ।
ꠔꠛꠟꠤꠉ ꠘꠣ ꠇꠞꠟꠦ ꠀꠝꠣꠞ ꠃꠙꠞꠦ ꠟꠣꠘ꠆ꠘꠔ ꠙꠠꠃꠇ!
১৭ ꠅꠁꠟꠦ ꠀꠝꠤ ꠎꠥꠖꠤ ꠈꠥꠡꠤ ꠝꠘꠦ ꠔꠛꠟꠤꠉ ꠇꠞꠤ,
ꠔꠦ ꠔ ꠀꠝꠣꠞ ꠙꠥꠞꠥꠡ꠆ꠇꠣꠞ ꠀꠍꠦ,
ꠀꠞ ꠎꠥꠖꠤ ꠘꠤꠎꠞ ꠈꠥꠡꠤꠄ ꠘꠣ-ꠅ ꠇꠞꠤ,
ꠔꠦ ꠝꠣꠟꠤꠇꠞ ꠖꠦꠅꠀ ꠎꠤꠝ꠆ꠝꠣꠖꠣꠞ ꠢꠤꠡꠣꠛꠦ ꠔ ꠇꠞꠤꠀꠞ।
১৮ ꠅꠈꠘ ꠀꠝꠣꠞ ꠁ ꠇꠣꠝꠞ ꠙꠥꠞꠥꠡ꠆ꠇꠣꠞ ꠇꠤꠔꠣ?
ꠁ ꠙꠥꠞꠥꠡ꠆ꠇꠣꠞ ꠅꠁꠟ,
ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠤꠀ ꠢꠣꠞꠤ ꠙꠣꠅꠘꠣ ꠛꠦꠔꠘ ꠘꠦꠁ ꠘꠣ,
ꠛꠤꠘꠣ ꠙꠄꠡꠣꠄ ꠔꠛꠟꠤꠉ ꠇꠞꠣꠃ ꠀꠝꠣꠞ ꠛꠦꠔꠘ।
১৯ ꠀꠝꠤ ꠎꠥꠖꠤꠅ ꠇꠥꠘꠥ ꠛꠦꠐꠣꠞ ꠉꠥꠟꠣꠝ ꠘꠣꠄ,
ꠔꠦꠛꠃ ꠛꠃꠔ ꠝꠣꠘꠡꠞ ꠎꠣꠘ ꠛꠣꠌꠣꠘꠤꠞ ꠟꠣꠉꠤ ꠘꠤꠎꠞꠦ ꠢꠇꠟꠞ ꠉꠥꠟꠣꠝ ꠛꠣꠘꠣꠁꠀ ꠞꠣꠈꠍꠤ।
২০ ꠁꠢꠥꠖꠤ ꠅꠇꠟꠞ ꠝꠘ ꠎꠂ ꠇꠞꠣꠞ ꠟꠣꠉꠤ ꠁꠢꠥꠖꠤ ꠡꠝꠣꠎꠅ ꠀꠝꠤ ꠁꠢꠥꠖꠤꠞ ꠟꠣꠈꠣꠘ ꠅꠁꠍꠤ।
ꠀꠝꠤ ꠔ ꠝꠥꠍꠣ ꠘꠛꠤꠞ ꠡꠞꠤꠅꠔꠞ ꠅꠗꠤꠘꠦ ꠘꠣꠄ,
ꠅꠁꠟꠦ ꠎꠣꠞꠣ ꠔꠣꠘ ꠡꠞꠤꠅꠔ ꠝꠣꠘꠦ,
ꠔꠣꠞꠣꠞꠦ ꠎꠂ ꠇꠞꠣꠞ ꠟꠣꠉꠤ ꠀꠝꠤ ꠔꠣꠞꠣꠞ ꠟꠣꠈꠣꠘ ꠅꠁꠍꠤ।
২১ ꠀꠞ ꠎꠣꠞꠣ ꠡꠞꠤꠅꠔꠞ ꠛꠣꠁꠞꠣ,
ꠔꠣꠞꠣꠞꠦ ꠎꠂ ꠇꠞꠣꠞ ꠟꠣꠉꠤ ꠀꠝꠤ ꠡꠞꠤꠅꠔꠞ ꠛꠣꠁꠞꠣ ꠝꠣꠘꠡꠞ ꠟꠣꠈꠣꠘ ꠅꠁꠍꠤ।
ꠀꠍꠟꠦ ꠀꠝꠤ ꠀꠟ꠆ꠟꠣꠞ ꠖꠦꠅꠀ ꠡꠞꠤꠅꠔꠞ ꠛꠣꠞꠦ ꠘꠣꠄ,
ꠀꠟ-ꠝꠍꠤꠞ ꠡꠞꠤꠅꠔꠞ ꠅꠗꠤꠘꠦ ꠀꠍꠤ।
২২ ꠎꠦꠞꠣ ꠇꠝꠎꠥꠞ,
ꠔꠣꠞꠣꠞ ꠉꠦꠍꠦ ꠀꠝꠤ ꠇꠝꠎꠥꠞꠞ ꠟꠣꠈꠣꠘ ꠅꠁꠍꠤ,
ꠔꠣꠞꠣꠞꠦꠅ ꠎꠂ ꠇꠞꠣꠞ ꠟꠣꠉꠤ।
ꠛꠦꠙꠣꠞ ꠅꠁꠟ,
ꠎꠦꠇꠥꠘꠥ ꠝꠘ꠆ꠔꠦ ꠇꠤꠍꠥ ꠝꠣꠘꠡꠞ ꠎꠣꠘ ꠛꠣꠌꠣꠘꠤꠞ ꠟꠣꠉꠤ ꠀꠝꠤ ꠢꠇꠟ ꠡꠝꠣꠎꠞ ꠝꠘ ꠎꠥꠉꠣꠁ ꠌꠟꠤꠀꠞ।
২৩ ꠈꠣꠟꠤ ꠈꠥꠡ-ꠈꠛꠞꠤꠞ ꠟꠣꠉꠤꠃ ꠀꠝꠤ ꠁꠔꠣ ꠇꠞꠤꠀꠞ,
ꠎꠣꠔꠦ ꠄꠞ ꠞꠢꠝꠔꠞ ꠜꠣꠉꠤ ꠅꠁ।
২৪ ꠔꠥꠝꠞꠣ ꠎꠣꠘꠅ ꠘꠣ ꠘꠤ,
ꠖꠃꠠꠞ ꠈꠦꠟꠣꠔ ꠃꠑꠤꠀ ꠢꠇꠟꠦꠃ ꠖꠃꠠꠣꠄ,
ꠅꠁꠟꠦ ꠙꠥꠞꠥꠡ꠆ꠇꠣꠞ ꠈꠣꠟꠤ ꠄꠇꠎꠘꠦꠃ ꠙꠣꠄ।
ꠅꠈꠘ ꠔꠥꠝꠞꠣꠅ ꠅꠃꠟꠣ ꠖꠃꠠꠣꠅ ꠎꠣꠔꠦ ꠙꠥꠞꠥꠡ꠆ꠇꠣꠞ ꠙꠣꠅ।
২৫ ꠖꠃꠠꠞ ꠈꠦꠟꠣꠔ ꠖꠃꠠꠣꠁꠀ ꠢꠣꠞꠤ ꠝꠣꠘꠡꠦ ꠅꠟꠣ ꠄꠇ ꠝꠣꠟꠣ ꠙꠣꠄ,
ꠎꠦ ꠝꠣꠟꠣ ꠛꠣꠖꠦ ꠘꠡ꠆ꠐ ꠅꠁꠎꠣꠄ,
ꠀꠞ ꠅꠃ ꠝꠣꠟꠣ ꠙꠣꠅꠀꠞ ꠟꠣꠉꠤ ꠄꠞꠣ ꠛꠃꠔ ꠇꠑꠤꠘ ꠘꠤꠅꠝ-ꠇꠣꠘꠥꠘꠅ ꠝꠣꠘꠦ।
ꠅꠁꠟꠦ ꠀꠝꠞꠣ ꠔ ꠀꠍꠟ ꠅꠇ꠆ꠇꠄ ꠝꠣꠟꠣ ꠙꠣꠅꠀꠞ ꠟꠣꠉꠤ ꠁꠔꠣ ꠇꠞꠞꠣꠝ।
২৬ ꠄꠞꠟꠣꠉꠤ ꠃꠖ꠆ꠖꠦꠡ꠆ꠡ ꠍꠣꠠꠣ ꠀꠝꠤ ꠖꠃꠠꠣꠁꠞꠣꠝ ꠘꠣ।
ꠎꠦꠔꠣ ꠛꠦꠐꠣꠁꠘ꠆ꠔꠦ ꠛꠣꠔꠣꠡꠞ ꠟꠉꠦ ꠇꠤꠟꠣ-ꠇꠤꠟꠤ ꠇꠞꠂꠘ,
ꠀꠝꠤ ꠔ ꠁꠔꠣꠞ ꠟꠣꠈꠣꠘ ꠘꠣꠄ।
২৭ ꠛꠞꠋ ꠀꠝꠤ ꠘꠤꠎꠞ ꠡꠞꠤꠟꠞꠦ ꠇꠡ꠆ꠐ ꠖꠤꠀ ꠉꠥꠟꠣꠝꠞ ꠟꠣꠈꠣꠘ ꠞꠣꠈꠍꠤ,
ꠎꠣꠔꠦ ꠅꠁꠘ꠆ꠘꠞ ꠉꠦꠍꠦ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠤꠀ ꠢꠣꠞꠤ,
ꠙꠥꠞꠥꠡ꠆ꠇꠣꠞ ꠕꠣꠇꠤ ꠘꠤꠎꠦ ꠛꠣꠖ ꠘꠣ ꠙꠠꠤ।