৫
১ ꠀꠝꠞꠣ ꠎꠣꠘꠤ,
ꠀꠝꠞꠣ ꠁ ꠖꠥꠘꠤꠀꠛꠤ ꠎꠦ ꠒꠦꠞꠣ-ꠊꠞꠅ ꠛꠡꠔ ꠇꠞꠤ,
ꠝꠣꠘꠤ ꠎꠦ ꠇꠝꠎꠥꠞ ꠡꠞꠤꠟ ꠟꠁꠀ ꠀꠍꠤ,
ꠁꠈꠣꠘ ꠎꠥꠖꠤ ꠛꠤꠘꠣꠡꠅ ꠅꠁꠎꠣꠄ,
ꠔꠦꠛꠃ ꠀꠟ꠆ꠟꠣꠞ ꠖꠦꠅꠀ ꠄꠇꠈꠣꠘ ꠊꠞ ꠀꠝꠞꠣꠞ ꠀꠍꠦ।
ꠁ ꠊꠞ ꠇꠥꠘꠥ ꠝꠣꠘꠡꠞ ꠀꠔꠞ ꠛꠣꠘꠣꠁꠟ ꠘꠣꠄ,
ꠁꠈꠣꠘ ꠔ ꠢꠣꠝꠦꠡꠣ ꠛꠦꠢꠦꠡ꠆ꠔꠅ ꠀꠍꠦ।
২ ꠅꠃ ꠒꠦꠞꠣ-ꠊꠞꠅ ꠛꠡꠔ ꠇꠞꠣ ꠢꠣꠟꠔꠦ ꠀꠝꠞꠣ ꠟꠣꠝ꠆ꠛꠣ ꠇꠞꠤ ꠖꠝ ꠚꠣꠟꠣꠁꠀꠞ ꠀꠞ ꠖꠤꠟꠦ-ꠎꠣꠘꠦ ꠀꠡꠣ ꠇꠞꠤꠀꠞ,
ꠎꠣꠔꠦ ꠛꠦꠢꠦꠡ꠆ꠔꠤ ꠢꠃ ꠘꠄꠀ ꠊꠞꠞ ꠝꠣꠎꠦ ꠀꠝꠞꠣꠞꠦ ꠉꠥꠞꠣ ꠅꠄ।
৩ ꠔꠣ-ꠅ ꠇꠕꠣ ꠅꠁꠟ,
ꠅꠃ ꠒꠦꠞꠣ-ꠊꠞ ꠜꠣꠋꠉꠣꠞ ꠛꠣꠖꠦ ꠀꠝꠞꠣꠞꠦ ꠎꠣꠘꠥ ꠟꠦꠝꠐꠣ ꠖꠦꠈꠣ ꠘꠣ ꠎꠣꠄ।
৪ ꠅꠃ ꠒꠦꠞꠣ-ꠊꠞꠅ ꠞꠁꠀ ꠜꠣꠞ-ꠛꠥꠏꠣ ꠛꠁꠔꠦ ꠛꠁꠔꠦ ꠀꠝꠞꠣ ꠀꠢꠣꠎꠣꠞꠤ ꠇꠞꠤꠀꠞ।
ꠄꠞꠛꠣꠖꠦꠅ ꠀꠝꠞꠣ ꠞꠇ꠆ꠔ-ꠝꠣꠋꠡꠞ ꠁ ꠒꠦꠞꠣ-ꠊꠞ ꠍꠣꠠꠔꠣꠝ ꠌꠣꠁ ꠘꠣ,
ꠔꠣ-ꠅ ꠜꠣꠟꠣ ꠊꠞꠞ ꠟꠣꠉꠤ ꠛꠣꠞ ꠌꠣꠁꠞꠣꠝ,
ꠎꠣꠔꠦ ꠅꠈꠘꠇꠥꠞ ꠅꠃ ꠝꠃꠔꠞ ꠅꠗꠤꠘ ꠒꠦꠞꠣ-ꠊꠞ ꠚꠣꠟꠣꠁꠀ,
ꠌꠤꠞꠇꠣꠟ ꠎꠤꠘ꠆ꠖꠣ ꠕꠣꠇꠣꠞ ꠎꠥꠇꠣ ꠊꠞ ꠙꠣꠁ।
৫ ꠅꠔꠣꠞ ꠟꠣꠉꠤꠃ ꠀꠟ꠆ꠟꠣꠄ ꠀꠝꠞꠣꠞꠦ ꠎꠥꠁꠔ ꠇꠞꠍꠂꠘ ꠀꠞ ꠁꠔꠣꠞ ꠛꠣꠄꠘꠣꠝꠣ ꠢꠤꠡꠣꠛꠦ ꠀꠝꠞꠣꠞꠦ ꠙꠣꠇ ꠞꠥꠢꠥ ꠖꠣꠘ ꠇꠞꠍꠂꠘ।
৬ ꠄꠞꠖꠣꠄ ꠀꠝꠞꠣꠞ ꠡꠣꠅꠡꠞ ꠇꠥꠘꠥ ꠇꠝꠔꠤ ꠘꠣꠁ।
ꠀꠝꠞꠣ ꠔ ꠛꠥꠎꠤꠟꠤꠍꠤ,
ꠎꠔꠖꠤꠘ ꠅꠃ ꠞꠇ꠆ꠔ-ꠝꠣꠋꠡꠞ ꠡꠞꠤꠟ ꠟꠁꠀ ꠛꠡꠔ ꠇꠞꠝꠥ,
ꠅꠔꠖꠤꠘ ꠀꠝꠞꠣ ꠝꠣꠟꠤꠇꠞ ꠉꠦꠍ ꠕꠣꠇꠤ ꠢꠞꠣꠁꠟ ꠞꠁꠝꠥ।
৭ ꠀꠝꠞꠣ ꠔ ꠌꠈꠥꠞ ꠖꠦꠈꠣ ꠇꠥꠘ꠆ꠔꠣꠞ ꠜꠞꠡꠣꠄ ꠌꠟꠤ ꠘꠣ,
ꠈꠣꠟꠤ ꠁꠝꠣꠘꠞ ꠛꠟꠦꠃ ꠌꠟꠤ।
৮ ꠀꠍꠟꠦ ꠀꠝꠞꠣꠞ ꠜꠤꠔꠞ ꠜꠞꠣ ꠡꠣꠅꠡ ꠀꠍꠦ,
ꠀꠞ ꠀꠝꠞꠣ ꠞꠇ꠆ꠔ-ꠝꠣꠋꠡꠞ ꠡꠞꠤꠟꠅ ꠞꠅꠀ ꠕꠣꠇꠤ ꠝꠣꠟꠤꠇꠞ ꠟꠉꠦ ꠛꠡꠔ ꠇꠞꠣꠈꠣꠘꠃ ꠜꠣꠟꠣ ꠝꠘꠅ ꠇꠞꠤ।
৯ ꠄꠞꠟꠣꠉꠤ ꠀꠝꠞꠣ ꠡꠞꠤꠟꠞ ꠝꠣꠎꠦ ꠕꠣꠇꠤ ꠛꠣ ꠘꠣ ꠕꠣꠇꠤ,
ꠀꠝꠞꠣꠞ ꠘꠤꠅꠔ ꠅꠁꠟ ꠝꠣꠟꠤꠇꠞꠦ ꠈꠥꠡꠤ ꠇꠞꠣ।
১০ ꠇꠣꠞꠘ ꠀꠟ-ꠝꠍꠤꠞ ꠀꠖꠣꠟꠔꠅ ꠀꠝꠞꠣ ꠢꠇꠟꠦꠃ ꠃꠛꠣꠘꠤ ꠟꠣꠉꠛ,
ꠎꠣꠔꠦ ꠖꠥꠘꠤꠀꠛꠤ ꠅꠃ ꠡꠞꠤꠟꠦ ꠀꠝꠞꠣ ꠎꠔ ꠘꠝꠥꠘꠣꠞ ꠛꠣꠖ-ꠜꠣꠟꠣ ꠇꠣꠝ ꠇꠞꠍꠤ,
ꠅꠃ ꠇꠣꠝꠞ ꠛꠖꠟꠣ ꠙꠣꠁ।
ꠀꠟ꠆ꠟꠣꠞ ꠟꠉꠦ ꠝꠤꠟꠘꠞ ꠈꠥꠡ-ꠈꠛꠞꠤ ꠔꠛꠟꠤꠉ
১১ ꠀꠝꠞꠣ ꠔ ꠀꠟ꠆ꠟꠣ ꠙꠣꠇꠞꠦ ꠒꠞꠣꠁꠀ ꠌꠟꠤ,
ꠄꠞꠟꠣꠉꠤ ꠝꠣꠘꠡꠞꠦ ꠛꠥꠎꠣꠘꠤꠞ ꠌꠦꠡ꠆ꠐꠣ ꠇꠞꠞꠣꠝ।
ꠀꠝꠞꠣꠞ ꠛꠦꠙꠣꠞ ꠔ ꠀꠟ꠆ꠟꠣꠞ ꠖꠞꠛꠣꠞꠅ ꠙꠞꠤꠡ꠆ꠇꠣꠞ,
ꠀꠡꠣ ꠇꠞꠤ ꠔꠥꠝꠞꠣꠞ ꠉꠦꠍꠦꠅ ꠅꠟꠣ ꠙꠞꠤꠡ꠆ꠇꠣꠞ ꠀꠍꠤ।
১২ ꠁꠈꠣꠘ ꠇꠁꠀ ꠀꠝꠞꠣ ꠢꠤꠞꠛꠣꠞ ꠘꠤꠎꠞ ꠔꠣꠞꠤꠚ ꠉꠣꠁꠞꠣꠝ ꠘꠣ,
ꠛꠞꠋ ꠀꠝꠞꠣꠞꠦ ꠟꠁꠀ ꠔꠥꠝꠞꠣꠞ ꠛꠠꠣꠁꠞ ꠇꠣꠞꠘ ꠎꠣꠘꠣꠁꠞꠣꠝ।
ꠔꠦ ꠎꠦꠔꠣ ꠝꠣꠘꠡꠦ ꠜꠤꠔꠞ ꠘꠣ ꠖꠦꠈꠤꠀ,
ꠈꠣꠟꠤ ꠝꠣꠘꠡꠞ ꠛꠣꠞꠉꠣꠟꠣ ꠟꠁꠀ ꠛꠠꠣꠁ ꠇꠞꠦ,
ꠔꠥꠝꠞꠣ ꠔꠣꠞꠣꠞꠦ ꠄꠇꠐꠣ ꠎꠥꠀꠙ ꠖꠤꠔꠣꠄ ꠙꠣꠞ।
১৩ ꠀꠝꠞꠣ ꠎꠥꠖꠤ ꠙꠣꠉꠟ ꠅꠁ,
ꠔꠦ ꠀꠟ꠆ꠟꠣꠞ ꠙꠣꠉꠟ ꠅꠁꠍꠤ,
ꠀꠞ ꠎꠥꠖꠤ ꠝꠣꠕꠣ ꠜꠣꠟꠣ ꠕꠣꠇꠦ,
ꠔꠦ ꠔꠥꠝꠞꠣꠞ ꠟꠣꠉꠤꠃ ꠜꠣꠟꠣ ꠀꠍꠦ।
১৪ ꠀꠟ-ꠝꠍꠤꠞ ꠝꠢꠛ꠆ꠛꠔꠦ ꠀꠝꠞꠣꠞꠦ ꠙꠥꠡ ꠝꠣꠘꠣꠁꠀ ꠌꠣꠟꠣꠄ।
ꠀꠝꠞꠣ ꠘꠤꠌ꠆ꠌꠤꠔ ꠛꠥꠎꠍꠤ,
ꠢꠇꠟꠞ ꠔꠞꠚ ꠕꠣꠇꠤ ꠄꠇꠎꠘꠞ ꠝꠃꠔ ꠅꠁꠍꠤꠟ,
ꠄꠞꠟꠣꠉꠤ ꠢꠇꠟꠞꠃ ꠝꠃꠔ ꠅꠁꠍꠦ।
১৫ ꠔꠣꠁꠘ ꠢꠇꠟꠞ ꠟꠣꠉꠤ ꠝꠣꠞꠣ ꠉꠦꠍꠟꠣ,
ꠎꠣꠔꠦ ꠎꠦꠞꠣ ꠎꠤꠘ꠆ꠖꠣ ꠀꠍꠂꠘ,
ꠔꠣꠞꠣ ꠎꠣꠘꠥ ꠀꠞ ꠘꠤꠎꠞ ꠟꠣꠉꠤ ꠘꠣ ꠛꠣꠌꠂꠘ।
ꠛꠞꠋ ꠔꠣꠞꠣꠞ ꠟꠣꠉꠤ ꠎꠦꠁꠘ ꠝꠣꠞꠣ ꠉꠦꠍꠟꠣ ꠀꠞ ꠢꠤꠞꠛꠣꠞ ꠎꠤꠘ꠆ꠖꠣ ꠅꠁꠍꠟꠣ,
ꠔꠣꠘ ꠟꠣꠉꠤꠃ ꠔꠣꠞꠣ ꠛꠣꠌꠂꠘ।
১৬ ꠄꠞꠟꠣꠉꠤ ꠅꠈꠘ ꠕꠣꠇꠤ ꠀꠝꠞꠣ ꠀꠞ ꠝꠣꠘꠡꠞ ꠛꠣꠁꠞꠞ ꠍꠥꠞꠔ ꠖꠦꠈꠤꠀ ꠛꠤꠌꠣꠞ ꠇꠞꠤ ꠘꠣ।
ꠀꠝꠞꠣ ꠔ ꠀꠉꠦ ꠀꠟ-ꠝꠍꠤꠞꠦ ꠅꠟꠣꠈꠣꠘ ꠝꠘꠅ ꠇꠞꠍꠟꠣꠝ,
ꠅꠁꠟꠦ ꠅꠈꠘ ꠀꠞ ꠁꠟꠣ ꠇꠞꠤ ꠘꠣ।
১৭ ꠇꠦꠃ ꠎꠥꠖꠤ ꠀꠟ-ꠝꠍꠤꠞ ꠔꠞꠤꠇꠣ ꠇꠛꠥꠟ ꠇꠞꠦ,
ꠔꠦ ꠢꠦ ꠘꠄꠀ ꠙꠄꠖꠣ ꠅꠁꠟ।
ꠔꠣꠞ ꠙꠥꠞꠣꠘ ꠢꠇꠟꠔꠣ ꠚꠥꠍꠤꠀ ꠢꠣꠞꠤ ꠄꠇ꠆ꠇꠦꠞꠦ ꠘꠄꠀ ꠛꠘꠤꠉꠦꠟ।
১৮ ꠁꠔꠣ ꠔ ꠀꠟ꠆ꠟꠣ ꠕꠣꠇꠤꠃ ꠅꠄ।
ꠔꠣꠁꠘ ꠀꠟ-ꠝꠍꠤꠞ ꠃꠍꠤꠟ꠆ꠟꠣꠄ ꠔꠣꠘ ꠟꠉꠦ ꠀꠝꠞꠣꠞ ꠝꠤꠟꠘ ꠊꠐꠣꠁꠍꠂꠘ,
ꠀꠞ ꠀꠝꠞꠣꠞꠦ ꠅꠃ ꠈꠦꠎꠝꠔꠞ ꠖꠣꠄꠁꠔ꠆ꠔ ꠖꠤꠍꠂꠘ,
ꠛꠣꠖ-ꠛꠣꠇꠤ ꠢꠇꠟ ꠝꠣꠘꠡꠞꠦ ꠔꠣꠘ ꠟꠉꠦ ꠝꠤꠟꠣꠁ ꠖꠤꠔꠣꠝ।
১৯ ꠄꠞ ꠝꠣꠘꠤ ꠅꠁꠟ,
ꠀꠟ꠆ꠟꠣꠄ ꠝꠣꠘꠡꠞ ꠉꠥꠘꠣꠞ ꠛꠣꠄ ꠘꠣ ꠌꠣꠁꠀ,
ꠀꠟ-ꠝꠍꠤꠞ ꠃꠍꠤꠟ꠆ꠟꠣꠄ ꠔꠣꠘ ꠟꠉꠦ ꠝꠣꠘꠡꠞ ꠝꠤꠟꠘ ꠊꠐꠣꠁꠍꠂꠘ।
ꠀꠞ ꠅꠃ ꠝꠤꠟꠘꠞ ꠈꠥꠡ-ꠈꠛꠞꠤ ꠔꠛꠟꠤꠉꠞ ꠖꠣꠄꠁꠔ꠆ꠔ ꠀꠝꠞꠣꠞꠦ ꠖꠤꠍꠂꠘ।
২০ ꠄꠞꠟꠣꠉꠤꠃ ꠀꠝꠞꠣ ꠀꠟ-ꠝꠍꠤꠞ ꠘꠣꠁꠛ ꠢꠤꠡꠣꠛꠦ ꠔꠣꠘ ꠙꠇ꠆ꠇꠦ ꠝꠣꠔꠤꠞꠣꠝ।
ꠀꠍꠟꠦ ꠀꠟ꠆ꠟꠣꠄꠃ ꠀꠝꠞꠣꠞ ꠝꠣꠎꠖꠤ ꠝꠣꠘꠡꠞꠦ ꠝꠤꠘꠔꠤ ꠇꠞꠞꠣ।
ꠀꠞ ꠀꠟ-ꠝꠍꠤꠞ ꠙꠇ꠆ꠇꠦ ꠀꠝꠞꠣꠅ ꠝꠤꠘꠔ ꠇꠞꠞꠣꠝ,
ꠔꠥꠝꠞꠣ ꠀꠟ꠆ꠟꠣꠞ ꠟꠉꠦ ꠝꠤꠟꠤꠔ ꠅꠅ।
২১ ꠢꠎꠞꠔ ꠁꠍꠣ ꠀꠟ-ꠝꠍꠤꠄ ꠔ ꠇꠥꠘꠥ ꠉꠥꠘꠣ-ꠘꠣꠚꠞꠝꠣꠘꠤ ꠇꠞꠍꠂꠘ ꠘꠣ।
ꠅꠁꠟꠦ ꠀꠝꠞꠣ ꠢꠇꠟꠞ ꠉꠥꠘꠣꠞ ꠡꠣꠎꠣ ꠀꠟ꠆ꠟꠣꠄ ꠔꠣꠘ ꠇꠣꠘ꠆ꠖꠅ ꠔꠥꠟꠤ ꠖꠤꠟꠣ,
ꠎꠣꠔꠦ ꠔꠣꠘ ꠃꠙꠞꠦ ꠁꠝꠣꠘ ꠀꠘꠣꠞ ꠝꠣꠎꠖꠤ ꠀꠟ꠆ꠟꠣꠁ ꠙꠛꠤꠔ꠆ꠞꠔꠣꠄ ꠀꠝꠞꠣ ꠙꠞꠦꠎꠉꠣꠞ ꠢꠤꠡꠣꠛꠦ ꠇꠛꠥꠟ ꠅꠁ।