ꠢꠎꠞꠔ ꠁꠍꠣꠞ ꠔꠤꠀꠉꠞ ꠘꠝꠥꠘꠣ
২
১ ꠀꠟ-ꠝꠍꠤꠞ ꠃꠙꠞꠦ ꠁꠝꠣꠘ ꠀꠘꠟꠦ ꠎꠦꠛꠟꠣ ꠜꠞꠡꠣ ꠝꠤꠟꠦ,
ꠔꠣꠘ ꠝꠢꠛ꠆ꠛꠔꠦ ꠎꠦꠛꠟꠣ ꠡꠣꠘ꠆ꠔꠤ ꠝꠤꠟꠦ,
ꠔꠥꠝꠞꠣꠞ ꠟꠉꠦ ꠎꠦꠛꠟꠣ ꠙꠣꠇ ꠞꠥꠢꠥꠞ ꠜꠣꠟꠣ ꠡꠝ꠆ꠙꠞ꠆ꠇ ꠀꠍꠦ,
ꠀꠞ ꠔꠥꠝꠞꠣꠞ ꠖꠤꠟꠅ ꠎꠦꠛꠟꠣ ꠝꠣꠄꠀ-ꠝꠝꠔꠣ ꠀꠍꠦ,
২ ꠔꠦ ꠔꠥꠝꠞꠣ ꠀꠝꠣꠞ ꠜꠤꠔꠞꠞ ꠈꠥꠡꠤꠈꠣꠘ ꠙꠥꠞꠣꠁꠟꠣꠅ।
ꠔꠥꠝꠞꠣ ꠢꠇꠟ ꠄꠇ ꠝꠘꠦ ꠌꠟꠅ,
ꠖꠤꠟꠦ-ꠎꠣꠘꠦ ꠄꠇ ꠅꠅ,
ꠀꠞ ꠄꠇꠦ-ꠅꠁꠘ꠆ꠘꠞꠦ ꠝꠢꠛ꠆ꠛꠔ ꠇꠞꠅ।
৩ ꠘꠤꠎꠞ ꠟꠣꠜꠞ ꠀꠡꠣ ꠛꠣ ꠛꠦꠐꠣꠉꠤꠞꠤ ꠖꠦꠈꠣꠘꠤꠞ ꠟꠣꠉꠤ ꠇꠥꠘ꠆ꠔꠣ ꠇꠞꠤꠅ ꠘꠣ,
ꠛꠞꠋ ꠘꠔ ꠅꠁꠀ ꠘꠤꠎꠞ ꠌꠣꠁꠔꠦ ꠅꠁꠘ꠆ꠘꠞꠦ ꠛꠦꠡꠤ ꠖꠣꠝ ꠖꠦꠅ।
৪ ꠈꠣꠟꠤ ꠘꠤꠎꠞ ꠡ꠆ꠛꠣꠞꠕꠞ ꠌꠤꠘ꠆ꠔꠣ ꠇꠞꠤꠅ ꠘꠣ,
ꠙꠞꠞ ꠇꠕꠣꠅ ꠌꠤꠘ꠆ꠔꠣ ꠇꠞꠤꠅ।
৫ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠝꠘ ꠎꠦꠟꠣꠈꠣꠘ ꠀꠍꠤꠟ,
ꠔꠥꠝꠞꠣꠞ ꠝꠘꠅ ꠅꠟꠣꠈꠣꠘ ꠛꠣꠘꠣꠁꠟꠣꠅ।
৬ ꠔꠣꠁꠘ ꠀꠍꠟꠦ ꠀꠟ꠆ꠟꠣꠁ ꠍꠥꠞꠔꠦ ꠞꠁꠟꠦꠅ,
ꠀꠟ꠆ꠟꠣꠁ ꠡꠤꠋꠢꠣꠡꠘ ꠗꠞꠤꠀ ꠞꠣꠈꠣꠞ ꠟꠣꠉꠤ ꠟꠣꠟꠌꠤ ꠀꠍꠟꠣ ꠘꠣ।
৭ ꠛꠞꠋ ꠉꠥꠟꠣꠝ ꠛꠘꠤꠀ ꠝꠣꠘꠥꠡ ꠢꠤꠡꠣꠛꠦ ꠎꠘꠝ ꠟꠁꠀ ꠘꠤꠎꠞꠦ ꠢꠥꠞꠥ ꠛꠣꠘꠣꠁꠟꠣ।
৮ ꠔꠣꠁꠘ ꠝꠣꠘꠥꠡ ꠍꠥꠞꠔꠦ ꠞꠁꠀ ꠝꠃꠔ ꠙꠞ꠆ꠎꠘ꠆ꠔ,
ꠖꠥꠈ-ꠇꠡ꠆ꠐꠞ ꠍꠟꠤꠛꠞ ꠃꠙꠞꠞ ꠝꠃꠔ ꠙꠞ꠆ꠎꠘ꠆ꠔ ꠛꠣꠁꠖ꠆ꠖ ꠞꠁꠀ ꠘꠤꠎꠞꠦ ꠘꠔ ꠇꠞꠟꠣ।
৯ ꠄꠞꠟꠣꠉꠤꠃ ꠀꠟ꠆ꠟꠣꠄ ꠔꠣꠘꠞꠦ ꠀꠞꠡꠦ-ꠀꠎꠤꠝꠅ ꠃꠑꠣꠁꠟꠣ ꠀꠞ ꠅꠟꠣ ꠁꠎ꠆ꠎꠔꠤ ꠄꠇ ꠘꠣꠝ ꠖꠤꠟꠣ,
ꠎꠦ ꠘꠣꠝ ꠢꠇꠟ ꠕꠣꠇꠤ ꠡꠦꠞꠣ।
১০ ꠎꠣꠔꠦ ꠅꠃ ꠘꠣꠝꠞ ꠉꠥꠘꠦ ꠀꠍꠝꠣꠘ-ꠎꠝꠤꠘ ꠀꠞ ꠙꠣꠔꠣꠟꠞ ꠔꠣꠝꠣꠝ ꠎꠣꠘꠖꠣꠞ ꠁꠍꠣꠞ ꠍꠣꠝꠘꠦ ꠘꠔ ꠅꠁꠘ,
১১ ꠀꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣ ꠙꠣꠇꠞ ꠉꠃꠞꠛꠞ ꠟꠣꠉꠤ ꠡ꠆ꠛꠤꠇꠣꠞ ꠇꠞꠂꠘ,
ꠁꠍꠣ ꠀꠟ-ꠝꠍꠤꠃ ꠝꠣꠟꠤꠇ।
ꠝꠥꠝꠤꠘ ꠅꠇꠟ ꠘꠥꠞꠞ ꠟꠣꠈꠣꠘ
১২ ꠅ ꠀꠝꠣꠞ ꠝꠣꠄꠀꠞ ꠜꠣꠁ ꠅꠇꠟ,
ꠔꠥꠝꠞꠣ ꠔ ꠢꠣꠝꠦꠡꠣꠃ ꠀꠝꠣꠞ ꠢꠥꠇꠥꠝ ꠝꠣꠘꠤꠀ ꠀꠁꠞꠣꠄ।
ꠔꠦ ꠀꠝꠤ ꠍꠣꠝꠘꠦ ꠕꠣꠇꠟꠦ ꠎꠦꠟꠣ ꠝꠣꠘꠅ,
ꠅꠈꠘ ꠀꠝꠣꠞ ꠀꠙꠞꠈꠦꠅ ꠅꠟꠣ ꠔꠥꠝꠞꠣꠞ ꠖꠤꠟꠞ ꠒꠞ-ꠈꠚꠦ ꠘꠦꠇ ꠀꠝꠟ ꠇꠞꠅ।
ꠅꠃ ꠀꠝꠟꠞ ꠝꠣꠎꠖꠤ ꠖꠦꠈꠣꠅ,
ꠔꠥꠝꠞꠣ ꠉꠥꠘꠣ ꠕꠣꠇꠤ ꠘꠣꠎꠣꠔ ꠙꠣꠁꠟꠤꠍ।
১৩ ꠛꠥꠎꠞꠣꠄ ꠘꠤ,
ꠀꠟ꠆ꠟꠣꠄ ꠔꠥꠝꠞꠣꠞ ꠖꠤꠟꠞ ꠝꠣꠎꠦ ꠅꠟꠣ ꠄꠇ ꠜꠣꠛ ꠖꠣꠘ ꠇꠞꠍꠂꠘ,
ꠁꠔꠣ ꠀꠝꠟ ꠇꠞꠟꠦ ꠔꠣꠁꠘ ꠈꠥꠡꠤ ꠅꠁꠘ,
ꠅꠃ ꠀꠝꠟ ꠇꠞꠣꠞ ꠘꠤꠅꠔ ꠀꠞ ꠔꠣꠇ꠆ꠇꠔꠅ ꠔꠣꠁꠘ ꠔꠥꠝꠞꠣꠞꠦ ꠖꠤꠍꠂꠘ।
১৪ ꠔꠥꠝꠞꠣ ꠇꠥꠘꠥꠎꠣꠔ ꠔꠞ꠆ꠇꠣ-ꠔꠞ꠆ꠇꠤ ꠛꠣ ꠇꠣꠁꠎ꠆ꠎꠣ-ꠚꠍꠣꠖ ꠘꠣ ꠇꠞꠤꠀ ꠢꠇꠟ ꠇꠣꠝ ꠇꠞꠅ।
১৫-১৬ ꠎꠣꠔꠦ ꠡꠥꠟ꠆ꠟꠀꠘꠣ ꠙꠞꠦꠎꠉꠣꠞ ꠀꠞ ꠘꠤꠈꠥꠔ ꠛꠘꠅ,
ꠀꠞ ꠁ ꠎꠝꠣꠘꠣꠞ ꠈꠛꠤꠍ ꠘꠣꠚꠞꠝꠣꠘ ꠡꠝꠣꠎꠞ ꠝꠣꠎꠦꠅ ꠔꠥꠝꠞꠣ ꠀꠟ꠆ꠟꠣꠞ ꠀꠅꠟꠣꠖ ꠢꠤꠡꠣꠛꠦ ꠞꠅ।
ꠅꠔꠣ ꠝꠣꠘꠡꠞ ꠍꠣꠝꠘꠦ ꠀꠟ꠆ꠟꠣꠞ ꠙꠣꠇ ꠇꠣꠟꠣꠝ ꠔꠛꠟꠤꠉ ꠇꠞꠤꠀ,
ꠅꠃ ꠖꠥꠘꠤꠀꠔꠃ ꠔꠥꠝꠞꠣ ꠀꠍꠝꠣꠘꠞ ꠌꠣꠘ-ꠡꠥꠞꠥꠎꠞ ꠟꠣꠈꠣꠘ ꠌꠇꠌꠇꠣ ꠛꠘꠤꠎꠣꠅ।
ꠔꠦꠃ ꠀꠟ-ꠝꠍꠤ ꠎꠦꠛꠟꠣ ꠖꠥꠍꠞꠣꠛꠣꠞ ꠔꠡꠞꠤꠚ ꠀꠘꠛꠣ,
ꠢꠃ ꠖꠤꠘ ꠀꠝꠤ ꠛꠥꠇ ꠚꠥꠟꠣꠁꠀ ꠇꠁꠔꠣꠝ ꠙꠣꠞꠝꠥ,
ꠀꠝꠣꠞ ꠅꠃ ꠝꠦꠘꠔ ꠀꠞ ꠀꠐꠘꠤ-ꠈꠣꠐꠘꠤ ꠛꠦꠇꠣꠝꠣ ꠉꠦꠍꠦ ꠘꠣ।
১৭ ꠢꠥꠘꠅ,
ꠎꠦ ꠁꠝꠣꠘꠞ ꠇꠥꠞꠛꠣꠘꠤꠞ ꠝꠣꠎꠖꠤ ꠔꠥꠝꠞꠣ ꠀꠟ꠆ꠟꠣꠞ ꠄꠛꠣꠖꠔ ꠇꠞꠞꠣꠄ,
ꠄꠞ ꠃꠙꠞꠦ ꠎꠥꠖꠤ ꠀꠝꠣꠞ ꠘꠤꠎꠞ ꠟꠃꠞꠦ ꠇꠥꠞꠛꠣꠘꠤ ꠢꠤꠡꠣꠛꠦ ꠓꠣꠟꠤ ꠖꠦꠅꠀ ꠅꠄ,
ꠔꠣ-ꠅ ꠀꠝꠤ ꠈꠥꠡ ꠀꠍꠤ,
ꠔꠥꠝꠞꠣꠞꠦ ꠟꠁꠀ ꠈꠥꠡꠤ ꠇꠞꠞꠣꠝ।
১৮ ꠑꠤꠇ ꠔꠥꠝꠞꠣꠅ ꠅꠟꠣ ꠈꠥꠡꠤ ꠅꠅ,
ꠀꠝꠣꠞ ꠟꠉꠦ ꠈꠥꠡꠤ ꠇꠞꠅ।
ꠖꠥꠁꠎꠘ ꠃꠡ꠆ꠔꠣꠖꠞꠦ ꠙꠣꠑꠣꠘꠤ
১৯ ꠀꠝꠤ ꠀꠡꠣ ꠇꠞꠤ,
ꠢꠎꠞꠔ ꠁꠍꠣꠞ ꠝꠞ꠆ꠎꠤ ꠅꠁꠟꠦ ꠀꠝꠤ ꠔꠤꠝꠕꠤꠞꠦ ꠈꠥꠛ ꠎꠟꠖꠤ ꠇꠞꠤ ꠔꠥꠝꠞꠣꠞ ꠉꠦꠍꠦ ꠙꠣꠑꠣꠁꠝꠥ,
ꠔꠦꠃ ꠔꠥꠝꠞꠣꠞ ꠢꠣꠟꠔ ꠎꠣꠘꠤꠀ ꠀꠝꠤ ꠡꠣꠘ꠆ꠔꠤ ꠅꠁꠝꠥ।
২০ ꠔꠤꠝꠕꠤꠞ ꠟꠣꠈꠣꠘ ꠁꠟꠣ ꠀꠞ ꠇꠦꠃ ꠀꠝꠣꠞ ꠉꠦꠍꠦ ꠘꠣꠁ,
ꠎꠦꠁꠘ ꠔꠥꠝꠞꠣꠞ ꠟꠣꠉꠤ ꠌꠤꠘ꠆ꠔꠣ ꠇꠞꠂꠘ।
২১ ꠛꠣꠇꠤ ꠢꠇꠟꠦꠃ ꠁꠍꠣ ꠀꠟ-ꠝꠍꠤꠞ ꠛꠦꠙꠣꠞꠦ ꠌꠤꠘ꠆ꠔꠣ ꠘꠣ ꠇꠞꠤꠀ,
ꠔꠣꠞꠣ ꠎꠣꠞꠎꠤꠞ ꠗꠣꠘ꠆ꠖꠣꠄ ꠀꠍꠂꠘ।
২২ ꠅꠁꠟꠦ ꠔꠤꠝꠕꠤꠞ ꠛꠦꠀꠙꠣꠞ ꠔ ꠔꠥꠝꠞꠣ ꠎꠣꠘꠅ,
ꠙꠥꠔꠦ ꠎꠦꠟꠣ ꠘꠤꠎꠞ ꠛꠣꠚꠞ ꠟꠉꠦ ꠇꠣꠝ ꠇꠞꠦ,
ꠔꠣꠁꠘꠅ ꠅꠟꠣ ꠀꠟ-ꠝꠍꠤꠞ ꠈꠥꠡ-ꠈꠛꠞꠤ ꠔꠛꠟꠤꠉꠞ ꠟꠣꠉꠤ ꠀꠝꠣꠞ ꠟꠉꠦ ꠝꠦꠘꠔ ꠇꠞꠍꠂꠘ।
২৩ ꠄꠞꠟꠣꠉꠤꠃ ꠀꠝꠤ ꠀꠡꠣ ꠇꠞꠤꠀꠞ,
ꠀꠝꠣꠞ ꠖꠡꠣ ꠇꠤꠔꠣ ꠅꠁꠛ,
ꠅꠈꠣꠘ ꠎꠣꠘꠣꠞ ꠛꠣꠖꠦꠃ ꠀꠝꠤ ꠔꠣꠘꠞꠦ ꠙꠣꠑꠣꠁꠔꠣꠝ।
২৪ ꠅꠁꠟꠦ ꠀꠝꠤ ꠝꠣꠟꠤꠇꠞ ꠃꠙꠞꠦ ꠜꠞꠡꠣ ꠇꠞꠤ ꠇꠁꠀꠞ,
ꠀꠝꠤ ꠘꠤꠎꠦꠅ ꠈꠥꠛ ꠎꠟꠖꠤ ꠇꠞꠤ ꠀꠁꠔꠣꠝ ꠙꠣꠞꠝꠥ।
২৫ ꠀꠞ ꠀꠝꠤ ꠝꠘꠅ ꠇꠞꠤꠀꠞ,
ꠃꠍꠣꠁꠖꠞꠦ ꠔꠥꠝꠞꠣꠞ ꠉꠦꠍꠦ ꠙꠣꠑꠣꠘꠤꠈꠣꠘ ꠈꠥꠛ ꠎꠞꠥꠞ।
ꠀꠝꠣꠞ ꠈꠦꠎꠝꠔ ꠇꠞꠣꠞ ꠟꠣꠉꠤ ꠔꠥꠝꠞꠣ ꠔꠣꠘꠞꠦ ꠀꠝꠣꠞ ꠉꠦꠍꠦ ꠙꠣꠑꠣꠁꠍꠟꠣꠄ।
ꠀꠝꠞꠣ ꠄꠇꠟꠉꠦ ꠔꠛꠟꠤꠉ ꠇꠞꠤ,
ꠁꠍꠣ ꠀꠟ-ꠝꠍꠤꠞ ꠟꠣꠉꠤ ꠎꠤꠢꠣꠖ ꠇꠞꠤ।
ꠄꠁꠘ ꠀꠝꠣꠞ ꠁꠝꠣꠘꠖꠣꠞ ꠜꠣꠁ।
২৬ ꠔꠣꠁꠘꠅ ꠔꠥꠝꠞꠣꠞ ꠟꠉꠦ ꠖꠦꠈꠣ ꠇꠞꠔꠣ ꠌꠣꠁꠞꠣ,
ꠔꠥꠝꠞꠣ ꠔꠣꠘ ꠛꠦꠝꠣꠞꠞ ꠈꠛꠞ ꠢꠥꠘꠣꠄ,
ꠔꠣꠁꠘ ꠙꠦꠞꠦꠡꠣꠘꠤꠔ ꠙꠠꠤꠉꠦꠍꠂꠘ,
ꠄꠞꠟꠣꠉꠤ ꠀꠝꠤ ꠔꠣꠘꠞꠦ ꠙꠣꠑꠣꠁꠀꠞ।
২৭ ꠀꠍꠟꠦ ꠔꠣꠁꠘ ꠈꠥꠛ ꠛꠦꠝꠣꠞ ꠀꠍꠟꠣ,
ꠛꠦꠝꠣꠞꠦ ꠔꠣꠘ ꠘꠣ-ꠛꠣꠌꠣꠞ ꠢꠣꠟꠔ ꠅꠁꠉꠦꠍꠤꠟ।
ꠅꠁꠟꠦ ꠀꠟ꠆ꠟꠣꠄ ꠔꠣꠘꠞꠦ ꠞꠢꠝ ꠇꠞꠍꠂꠘ।
ꠈꠣꠟꠤ ꠔꠣꠘꠞꠦ ꠘꠣꠄ,
ꠔꠣꠁꠘ ꠛꠣꠌꠤ ꠎꠣꠅꠀꠄ ꠀꠟ꠆ꠟꠣꠄ ꠀꠝꠣꠞꠦꠅ ꠛꠃꠔ ꠛꠠ ꠞꠢꠝ ꠇꠞꠍꠂꠘ,
ꠎꠣꠔꠦ ꠀꠝꠤ ꠄꠇ ꠇꠡ꠆ꠐꠞ ꠃꠙꠞꠦ ꠀꠞ ꠇꠥꠘꠥ ꠇꠡ꠆ꠐ ꠘꠣ ꠙꠣꠁ।
২৮ ꠄꠞꠟꠣꠉꠤ ꠀꠝꠤ ꠈꠥꠛ ꠈꠤꠀꠟꠤ ꠅꠁꠀ ꠔꠣꠘꠞꠦ ꠙꠣꠑꠣꠁꠀꠞ,
ꠎꠣꠔꠦ ꠔꠣꠘꠞꠦ ꠙꠣꠁꠀ ꠔꠥꠝꠞꠣꠅ ꠈꠥꠡꠤ ꠅꠅ,
ꠀꠞ ꠀꠝꠣꠞ ꠝꠘꠞ ꠌꠤꠘ꠆ꠔꠣꠅ ꠢꠞꠤ ꠎꠣꠄ।
২৯ ꠔꠦ ꠀꠟ꠆ꠟꠣꠞ ꠛꠘ꠆ꠖꠣ ꠢꠤꠡꠣꠛꠦ ꠙꠥꠞꠣꠙꠥꠞ ꠈꠥꠡꠤ ꠅꠁꠀ ꠔꠣꠘꠞꠦ ꠇꠛꠥꠟ ꠇꠞꠤꠅ,
ꠀꠞ ꠄꠞꠣꠞ ꠟꠣꠈꠣꠘ ꠝꠣꠘꠡꠞꠦ ꠁꠎ꠆ꠎꠔ ꠇꠞꠤꠅ।
৩০ ꠀꠟ-ꠝꠍꠤꠞ ꠔꠛꠟꠤꠉ ꠇꠞꠣꠔ ꠉꠤꠀ ꠔꠣꠁꠘ ꠝꠞꠣꠞ ꠙꠕꠤ ꠅꠁꠉꠦꠍꠟꠣ।
ꠀꠝꠣꠞ ꠍꠣꠝꠘꠦ ꠘꠣ ꠕꠣꠇꠣꠄ ꠔꠥꠝꠞꠣ ꠎꠦ ꠇꠣꠝ ꠇꠞꠔꠣꠄ ꠙꠣꠞꠍ ꠘꠣ,
ꠅꠃ ꠇꠣꠝꠞ ꠟꠣꠉꠤ ꠔꠣꠁꠘ ꠘꠤꠎꠞ ꠎꠣꠘ ꠖꠤꠔꠦꠅ ꠞꠣꠎꠤ ꠀꠍꠟꠣ।