৪
১ ꠅ ꠀꠝꠣꠞ ꠝꠣꠄꠀꠞ ꠜꠣꠁ ꠅꠇꠟ,
ꠀꠝꠤ ꠔꠥꠝꠞꠣꠞꠦ ꠖꠦꠈꠔꠣꠝ ꠌꠣꠁ।
ꠔꠥꠝꠞꠣꠃ ꠀꠝꠣꠞ ꠈꠥꠡꠤ,
ꠀꠝꠣꠞ ꠎꠂꠅꠞ ꠝꠣꠟꠣ।
ꠀꠝꠞꠣꠞ ꠝꠣꠟꠤꠇꠞ ꠟꠉꠦ ꠔꠥꠝꠞꠣ ꠝꠎꠛꠥꠔ ꠅꠁꠀ ꠟꠣꠉꠤꠀ ꠞꠅ।
ꠢꠎꠞꠔ ꠙꠣꠃꠟꠥꠍꠞ ꠙꠞꠣꠝꠤꠡ
২ ꠅ ꠀꠝꠣꠞ ꠛꠁꠘ ꠍꠣꠟꠤꠝꠣ ꠀꠞ ꠍꠣꠁꠖꠣ,
ꠀꠝꠤ ꠝꠤꠘꠔ ꠇꠞꠤ ꠇꠁꠞꠣꠝ,
ꠄꠇ ꠝꠣꠟꠤꠇꠞ ꠈꠦꠎꠝꠔꠅ ꠟꠣꠉꠣꠁꠟ ꠀꠍ ꠇꠞꠤ,
ꠔꠥꠝꠞꠣ ꠝꠤꠟꠤ-ꠝꠤꠡꠤ ꠄꠇ ꠝꠘꠦ ꠌꠟꠅ।
৩ ꠅ ꠀꠝꠣꠞ ꠟꠉꠞ ꠀꠍꠟ ꠡꠋꠉꠤ,
ꠀꠝꠤ ꠔꠥꠝꠣꠞꠦꠅ ꠝꠤꠘꠔ ꠇꠞꠞꠣꠝ,
ꠔꠥꠝꠤ ꠅꠃ ꠛꠦꠐꠤꠘ꠆ꠔꠞꠦ ꠡꠣꠁꠎ꠆ꠎ ꠇꠞꠤꠅ।
ꠀꠟ-ꠝꠍꠤꠞ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠣꠝꠅ ꠄꠞꠣ ꠀꠝꠣꠞ ꠟꠉꠦ ꠛꠃꠔ ꠇꠡ꠆ꠐ ꠇꠞꠍꠂꠘ।
ꠇꠤꠟꠤꠝꠣꠘ ꠀꠞ ꠅꠁꠘ꠆ꠘꠣꠁꠘ꠆ꠘ ꠜꠣꠁꠀꠂꠘ꠆ꠔꠞ ꠟꠉꠦꠅ ꠇꠡ꠆ꠐ ꠇꠞꠍꠂꠘ।
ꠔꠣꠞꠣꠞ ꠘꠣꠝ ꠔ ꠀꠟ꠆ꠟꠣꠞ ꠎꠤꠘ꠆ꠖꠦꠉꠤ ꠈꠣꠔꠣꠔ ꠟꠦꠈꠣ ꠀꠍꠦ।
৪ ꠝꠣꠟꠤꠇ ꠁꠍꠣꠞ ꠘꠣꠝꠦ ꠔꠥꠝꠞꠣ ꠢꠣꠝꠦꠡꠣ ꠈꠥꠡꠤ-ꠛꠣꠡꠤ ꠇꠞꠅ।
ꠀꠝꠤ ꠢꠤꠞꠛꠣꠞ ꠇꠁꠞꠣꠝ,
ꠈꠥꠡꠤ-ꠛꠣꠡꠤ ꠇꠞꠅ।
৫ ꠔꠥꠝꠞꠣꠞ ꠘꠞꠝ ꠛꠦꠛꠢꠣꠞ ꠎꠣꠘꠥ ꠢꠇꠟ ꠝꠣꠘꠡꠞ ꠌꠈꠥꠔ ꠙꠠꠦ।
ꠎꠣꠘꠅ ꠔ,
ꠀꠝꠞꠣꠞ ꠝꠣꠟꠤꠇ ꠈꠥꠛ ꠎꠟꠖꠤꠃ ꠀꠁꠞꠣ।
৬ ꠇꠥꠘꠥ ꠛꠦꠙꠣꠞꠦꠃ ꠔꠥꠝꠞꠣ ꠙꠦꠞꠦꠡꠣꠘ ꠅꠁꠅ ꠘꠣ,
ꠛꠞꠋ ꠝꠥꠘꠣꠎꠣꠔ ꠇꠞꠅ।
ꠔꠥꠝꠞꠣꠞ ꠎꠔꠔꠣ ꠌꠣꠁꠛꠣꠞ ꠀꠍꠦ,
ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠤꠀ ꠔꠣꠘ ꠉꠦꠍꠦ ꠌꠣꠅ।
৭ ꠔꠦꠃ ꠀꠟ꠆ꠟꠣꠞ ꠖꠦꠅꠀ ꠎꠦ ꠡꠣꠘ꠆ꠔꠤꠞ ꠇꠕꠣ ꠝꠣꠘꠡꠦ ꠌꠤꠘ꠆ꠔꠣꠅ ꠇꠞꠔ ꠙꠣꠞꠦ ꠘꠣ,
ꠁꠍꠣ ꠀꠟ-ꠝꠍꠤꠞ ꠝꠣꠎꠖꠤ ꠅꠃ ꠡꠣꠘ꠆ꠔꠤ ꠀꠁꠀ ꠔꠥꠝꠞꠣꠞ ꠖꠤꠟ ꠀꠞ ꠝꠘꠞꠦ ꠞꠁꠇ꠆ꠇꠣ ꠇꠞꠛ।
৮ ꠅ ꠜꠣꠁ ꠅꠇꠟ,
ꠀꠝꠤ ꠢꠦꠡ-ꠝꠦꠡ ꠇꠁꠞꠣꠝ,
ꠎꠦꠔꠣ ꠢꠣꠍꠣ,
ꠎꠦꠔꠣ ꠃꠙꠎꠥꠇ꠆ꠔ,
ꠢꠇ,
ꠈꠣꠐꠤ,
ꠡꠥꠘ꠆ꠖꠞ,
ꠀꠞ ꠁꠎ꠆ꠎꠔ ꠙꠣꠅꠀꠞ ꠎꠥꠇꠣ,
ꠝꠣꠘꠤ ꠎꠦꠔꠣ ꠜꠣꠟꠣ ꠀꠞ ꠎꠦꠔꠣꠄ ꠔꠣꠞꠤꠚ ꠅꠄ,
ꠅꠃ ꠟꠣꠈꠣꠘ ꠛꠦꠙꠣꠞꠦ ꠔꠥꠝꠞꠣ ꠈꠤꠀꠟꠤ ꠅꠅ।
৯ ꠔꠥꠝꠞꠣ ꠀꠝꠣꠞ ꠉꠦꠍ ꠕꠣꠇꠤ ꠎꠦ ꠔꠣꠟꠤꠝ ꠙꠣꠁꠍ,
ꠎꠦꠔꠣ ꠢꠥꠘꠍ,
ꠎꠦꠔꠣ ꠖꠦꠈꠍ,
ꠀꠞ ꠎꠦꠔꠣ ꠇꠛꠥꠟ ꠇꠞꠍ ꠅꠔꠣ ꠅꠈꠘ ꠀꠝꠟ ꠇꠞꠅ।
ꠔꠦꠃ ꠡꠣꠘ꠆ꠔꠤ ꠖꠦꠅꠞꠣ ꠀꠟ꠆ꠟꠣꠅ ꠔꠥꠝꠞꠣꠞ ꠟꠉꠦ ꠟꠉꠦ ꠞꠁꠛꠣ।
ꠖꠣꠘ-ꠈꠄꠞꠣꠔꠞ ꠟꠣꠉꠤ ꠗꠁꠘ꠆ꠘꠛꠣꠖ
১০ ꠝꠣꠟꠤꠇꠦ ꠀꠝꠣꠞ ꠈꠥꠡꠤ ꠀꠞꠅ ꠛꠣꠠꠣꠁ ꠖꠤꠟꠣ,
ꠛꠃꠔ ꠖꠤꠘ ꠛꠣꠖꠦ ꠔꠥꠝꠞꠣ ꠀꠝꠣꠞꠦ ꠝꠘꠅ ꠇꠞꠞꠣꠄ।
ꠀꠝꠣꠞ ꠟꠣꠉꠤ ꠔ ꠢꠣꠝꠦꠡꠣꠃ ꠔꠥꠝꠞꠣ ꠌꠤꠘ꠆ꠔꠣ ꠇꠞꠍ,
ꠅꠁꠟꠦ ꠁꠔꠣ ꠖꠦꠈꠣꠘꠤꠞ ꠡꠥꠎꠥꠉ ꠙꠣꠁꠍ ꠘꠣ।
১১ ꠇꠥꠘꠥ ꠅꠜꠣꠛꠅ ꠙꠠꠤꠀ ꠀꠝꠤ ꠁꠈꠣꠘ ꠇꠁꠞꠣꠝ ꠘꠣ,
ꠎꠦꠇꠥꠘꠥ ꠢꠣꠟꠔꠦꠃ ꠡꠘ꠆ꠔꠥꠡ꠆ꠐ ꠞꠅꠀꠈꠣꠘ ꠀꠝꠤ ꠎꠣꠘꠤ।
১২ ꠅꠜꠣꠛꠤ ꠛꠣ ꠘꠛꠣꠛꠤ ꠢꠣꠟꠔꠦ,
ꠃꠙꠣꠡꠤ ꠙꠦꠐꠦ ꠛꠣ ꠜꠞꠣ ꠙꠦꠐꠦ,
ꠗꠘꠤ ꠛꠣ ꠉꠞꠤꠛꠤꠞ ꠝꠣꠎꠦ ꠇꠤꠟꠣ ꠡꠘ꠆ꠔꠥꠡ꠆ꠐ ꠞꠅꠀ ꠎꠣꠄ,
ꠁꠔꠣ ꠔꠣꠟꠤꠝ ꠀꠝꠤ ꠙꠣꠁꠍꠤ।
১৩ ꠀꠍꠟꠦ ꠎꠦꠁꠘ ꠀꠝꠣꠞꠦ ꠛꠟ-ꠡꠇ꠆ꠔꠤ ꠎꠥꠉꠣꠁꠀ ꠖꠦꠁꠘ,
ꠔꠣꠘ ꠛꠟꠦꠃ ꠀꠝꠤ ꠢꠇ꠆ꠇꠟꠔꠣ ꠇꠞꠔꠣꠝ ꠙꠣꠞꠤ।
১৪ ꠔꠣ-ꠅ ꠔꠥꠝꠞꠣ ꠀꠝꠣꠞ ꠇꠡ꠆ꠐꠞ ꠟꠉꠦ ꠡꠞꠤꠇ ꠅꠁꠀ,
ꠈꠥꠛ ꠜꠣꠟꠣ ꠇꠣꠝ ꠇꠞꠍ।
১৫ ꠅ ꠚꠤꠟꠤꠙꠤ ꠎꠝꠣꠔꠞ ꠝꠥꠝꠤꠘ ꠅꠇꠟ,
ꠔꠥꠝꠞꠣ ꠔ ꠎꠣꠘꠅ,
ꠔꠥꠝꠞꠣ ꠙꠄꠟꠣ ꠈꠥꠡ-ꠈꠛꠞꠤ ꠙꠣꠅꠀꠞ ꠛꠣꠖꠦ ꠀꠝꠤ ꠎꠦꠛꠟꠣ ꠝꠣꠇꠤꠖꠘꠤꠀ ꠖꠦꠡ ꠕꠣꠇꠤ ꠉꠦꠍꠟꠣꠝꠉꠤ,
ꠅꠃ ꠡꠝꠄ ꠔꠥꠝꠞꠣ ꠍꠣꠠꠣ ꠀꠞ ꠇꠥꠘꠥ ꠎꠝꠣꠔꠦꠃ ꠀꠝꠣꠞ ꠟꠉꠦ ꠇꠥꠘꠥꠎꠣꠔ ꠟꠦꠘ-ꠖꠦꠘ ꠇꠞꠍꠦ ꠘꠣ।
১৬ ꠀꠝꠤ ꠎꠦꠛꠟꠣ ꠕꠤꠡꠟꠘꠤꠇꠤ ꠐꠣꠃꠘꠅ ꠀꠍꠟꠣꠝ,
ꠅꠃ ꠡꠝꠄ ꠀꠝꠣꠞ ꠅꠜꠣꠛꠞ ꠇꠣꠟꠅ ꠔꠥꠝꠞꠣ ꠇꠄꠛꠣꠞ ꠡꠣꠁꠎ꠆ꠎ ꠙꠣꠑꠣꠁꠍ।
১৭ ꠀꠝꠤ ꠔꠥꠝꠞꠣꠞ ꠉꠦꠍ ꠕꠣꠇꠤ ꠇꠥꠘꠥ ꠖꠣꠘ-ꠖꠇ꠆ꠇꠤꠘꠣ ꠌꠣꠁꠞꠣꠝ ꠘꠣ,
ꠅꠁꠟꠦ ꠔꠥꠝꠞꠣꠞ ꠟꠣꠉꠤ ꠅꠟꠣ ꠄꠇ ꠚꠟ ꠀꠡꠣ ꠇꠞꠞꠣꠝ,
ꠎꠦꠔꠣ ꠔꠥꠝꠞꠣꠞ ꠀꠝꠟ-ꠘꠝꠣꠔ ꠎꠝꠣ ꠞꠁꠛ।
১৮ ꠀꠝꠣꠞ ꠢꠇꠟ ꠙꠣꠅꠘꠣꠃ ꠀꠝꠤ ꠙꠣꠁꠟꠤꠍꠤ।
ꠀꠍꠟꠦ ꠀꠝꠣꠞ ꠎꠔꠈꠣꠘ ꠎꠞꠥꠞ,
ꠄꠞ ꠌꠣꠁꠔꠦꠅ ꠛꠦꠡꠤ ꠀꠍꠦ।
ꠃꠍꠣꠁꠖ ꠜꠣꠁꠞ ꠀꠔ ꠕꠣꠇꠤ ꠔꠥꠝꠞꠣꠞ ꠃꠙꠢꠣꠞ ꠙꠣꠁꠀ ꠅꠈꠘ ꠀꠝꠣꠞ ꠛꠃꠔ ꠅꠁꠍꠦ।
ꠅꠃ ꠃꠙꠢꠣꠞ ꠔ ꠀꠟ꠆ꠟꠣꠁ ꠈꠥꠡꠛꠄꠀꠟꠣ,
ꠀꠟ꠆ꠟꠣꠞ ꠖꠞꠛꠣꠞꠅ ꠇꠛꠥꠟ ꠅꠀꠞ ꠎꠥꠇꠣ ꠇꠥꠞꠛꠣꠘꠤ।
ꠀꠟ꠆ꠟꠣ ꠙꠣꠇ ꠁꠔꠣꠄ ꠈꠥꠡꠤ ꠅꠁꠘ।
১৯ ꠀꠝꠣꠞ ꠀꠟ꠆ꠟꠣꠄ ꠔꠣꠘ ꠘꠤꠎꠞ ꠉꠃꠞꠛꠞ ꠗꠘ ꠢꠤꠡꠣꠛꠦ,
ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠃꠍꠤꠟ꠆ꠟꠣꠄ ꠔꠥꠝꠞꠣꠞ ꠢꠇꠟ ꠅꠜꠣꠛ ꠖꠥꠞ ꠇꠞꠛꠣ।
২০ ꠎꠥꠉꠦ ꠎꠥꠉꠦ ꠢꠞ-ꠢꠣꠝꠦꠡꠣ ꠀꠝꠞꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣ ꠙꠣꠇꠞ ꠔꠣꠞꠤꠚ ꠎꠣꠞꠤ ꠞꠃꠇ।
ꠀꠝꠤꠘ।
ꠀꠈꠦꠞꠤ ꠝꠥꠘꠣꠎꠣꠔ ꠀꠞ ꠍꠣꠟꠣꠝ
২১ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠔꠞꠤꠇꠣꠞ ꠀꠟ꠆ꠟꠣꠞ ꠢꠇꠟ ꠛꠘ꠆ꠖꠣꠞꠦ ꠀꠝꠣꠞ ꠍꠣꠟꠣꠝ ꠖꠤꠅ।
ꠀꠝꠣꠞ ꠟꠉꠞ ꠢꠇꠟ ꠜꠣꠁꠀꠂꠘ꠆ꠔꠦ ꠔꠥꠝꠞꠣꠞꠦ ꠍꠣꠟꠣꠝ ꠎꠣꠘꠣꠁꠞꠣ।
২২ ꠀꠟ꠆ꠟꠣꠞ ꠎꠔ ꠙꠣꠇ ꠛꠘ꠆ꠖꠣ ꠁ ꠎꠣꠉꠣꠔ ꠀꠍꠂꠘ,
ꠈꠣꠍ ꠇꠞꠤ ꠛꠣꠖꠡꠣ ꠇꠂꠍꠞꠞ ꠛꠣꠠꠤꠞ ꠝꠥꠝꠤꠘ ꠅꠇꠟꠦ ꠍꠣꠟꠣꠝ ꠎꠣꠘꠣꠁꠞꠣ।
২৩ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠞꠢꠝꠔ ꠔꠥꠝꠞꠣꠞ ꠖꠤꠟꠅ ꠕꠣꠇꠃꠇ।
ꠀꠝꠤꠘ॥