ꠙꠛꠤꠔ꠆ꠞ ꠁꠘ꠆ꠎꠤꠟ ꠡꠞꠤꠚ ১৫ ꠘꠝ꠆ꠛꠞ ꠍꠤꠙꠣꠞꠣ
ꠙꠄꠟꠣ ꠔꠤꠝꠕꠤ
১
১ ꠀꠝꠤ ꠙꠣꠃꠟꠥꠍ ꠔ ꠀꠝꠞꠣꠞ ꠔꠞꠣꠘꠦꠀꠟꠣ ꠀꠟ꠆ꠟꠣ ꠙꠣꠇ ꠀꠞ ꠀꠝꠞꠣꠞ ꠀꠡꠣ-ꠜꠞꠡꠣ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠢꠥꠇꠥꠝꠦ ꠔꠣꠘ ꠍꠣꠢꠣꠛꠤ ꠅꠁꠍꠤ।
২ ꠝꠥꠝꠤꠘ ꠢꠤꠡꠣꠛꠦ ꠀꠝꠣꠞ ꠈꠣꠍ ꠀꠅꠟꠣꠖ,
ꠔꠤꠝꠕꠤꠞ ꠉꠦꠍꠦ ꠟꠦꠈꠞꠣꠝ।
ꠉꠣꠁꠛꠤ ꠛꠣꠚ ꠀꠟ꠆ꠟꠣ ꠙꠣꠇꠦ ꠀꠞ ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠄ ꠔꠥꠝꠣꠞꠦ ꠞꠢꠝꠔ,
ꠝꠦꠢꠦꠞꠛꠣꠘꠤ ꠀꠞ ꠡꠣꠘ꠆ꠔꠤ ꠖꠣꠘ ꠇꠞꠃꠇ꠆ꠇꠣ।
ꠜꠘ꠆ꠒ ꠝꠥꠟ꠆ꠟꠣꠁꠘ꠆ꠔꠞ ꠛꠦꠙꠣꠞꠦ ꠢꠥꠡꠤꠀꠞꠤ
৩ ꠅ ꠔꠤꠝꠕꠤ,
ꠀꠝꠤ ꠝꠣꠇꠤꠖꠘꠤꠀ ꠖꠦꠡꠅ ꠎꠣꠅꠀꠞ ꠛꠣꠟꠣ ꠔꠥꠝꠣꠞꠦ ꠇꠁꠍꠟꠣꠝ,
ꠅꠈꠘ ꠢꠤꠞꠛꠣꠞ ꠝꠤꠘꠔꠤ ꠇꠞꠤ ꠇꠁꠞꠣꠝ,
ꠢꠥꠘꠅ,
ꠔꠥꠝꠤ ꠁꠚꠤꠍ ꠐꠣꠃꠘꠅꠃ ꠞꠅ,
ꠞꠁꠀ ꠅꠘꠞ ꠅꠟꠣ ꠇꠤꠍꠥ ꠝꠥꠟ꠆ꠟꠣꠁꠘ꠆ꠔꠞꠦ ꠢꠥꠇꠥꠝ ꠖꠦꠅ,
ꠔꠣꠞꠣ ꠎꠣꠘꠥ ꠝꠣꠘꠡꠞꠦ ꠀꠞ ꠜꠥꠟ ꠔꠣꠟꠤꠝ ꠘꠣ ꠖꠦꠄ।
৪ ꠔꠣꠞꠣꠞꠦ ꠇꠁꠅ,
ꠔꠣꠞꠣ ꠎꠣꠔꠦ ꠛꠣꠘꠥꠀꠐ ꠇꠤꠌ꠆ꠍꠣ ꠀꠞ ꠟꠣꠝ꠆ꠛꠣ ꠟꠣꠝ꠆ꠛꠣ ꠈꠣꠘ꠆ꠖꠣꠘꠞ ꠟꠤꠡ꠆ꠐꠞ ꠛꠣꠄ ꠈꠤꠀꠟꠤ ꠘꠣ ꠅꠁꠘ।
ꠁꠔꠣꠄ ꠔ ꠘꠣꠘꠣꠘ ꠘꠝꠥꠘꠣꠞ ꠖꠟꠣꠖꠟꠤꠞ ꠎꠘꠝ ꠖꠦꠄ,
ꠀꠟ꠆ꠟꠣꠞ ꠇꠣꠝꠞ ꠇꠥꠘꠥ ꠚꠣꠄꠖꠣ ꠅꠄ ꠘꠣ,
ꠀꠟ꠆ꠟꠣꠁ ꠚꠣꠄꠖꠣ ꠝꠤꠟꠦ ꠈꠣꠟꠤ ꠁꠝꠣꠘꠞ ꠝꠣꠎꠖꠤ।
৫ ꠛꠞꠋ ꠡꠑꠤꠇ ꠔꠣꠟꠤꠝꠞ ꠚꠟ ꠅꠁꠟ,
ꠝꠣꠄꠀ-ꠝꠢꠛ꠆ꠛꠔ,
ꠁꠔꠣ ꠔ ꠈꠣꠐꠤ ꠖꠤꠟ,
ꠙꠞꠤꠡ꠆ꠇꠣꠞ ꠛꠤꠛꠦꠇ ꠀꠞ ꠢꠣꠍꠣꠞꠞ ꠁꠝꠣꠘ ꠕꠣꠇꠤ ꠙꠄꠖꠣ ꠅꠄ।
৬ ꠅꠁꠟꠦ ꠇꠤꠍꠥ ꠝꠣꠘꠡꠦ ꠁꠔꠣ ꠛꠣꠖ ꠖꠤꠀ ꠛꠣꠘꠥꠀꠐ ꠝꠣꠔ-ꠇꠕꠣꠞ ꠛꠣꠄ ꠝꠘ ꠖꠤꠟꠣꠁꠍꠦ।
৭ ꠔꠣꠞꠣ ꠎꠥꠖꠤꠅ ꠘꠤꠎꠦꠃ ꠘꠤꠎꠞ ꠝꠣꠔꠞ ꠝꠣꠘꠤ ꠛꠥꠎꠦ ꠘꠣ,
ꠀꠞ ꠎꠦ ꠛꠦꠙꠣꠞ ꠟꠁꠀ ꠛꠠ ꠉꠟꠣꠄ ꠝꠣꠔꠦꠞ,
ꠁ ꠛꠦꠙꠣꠞꠦꠅ ꠜꠣꠟꠣꠝꠘ꠆ꠔꠦ ꠎꠣꠘꠦ ꠘꠣ,
ꠔꠦꠛꠃ ꠔꠣꠞꠣ ꠝꠥꠍꠣ ꠘꠛꠤꠞ ꠛꠣꠔꠣꠁꠟ ꠡꠞꠤꠅꠔꠞ ꠃꠡ꠆ꠔꠣꠖ ꠅꠁꠔ ꠌꠣꠄ।
৮ ꠀꠝꠞꠣ ꠎꠣꠘꠤ,
ꠡꠞꠤꠅꠔ ꠜꠣꠟꠣ ꠎꠤꠘꠤꠡ,
ꠇꠦꠃ ꠎꠥꠖꠤ ꠑꠤꠇ ꠝꠔ ꠁꠔꠣ ꠇꠣꠝꠅ ꠟꠣꠉꠣꠄ।
৯ ꠀꠝꠞꠣ ꠔ ꠎꠣꠘꠤ,
ꠁ ꠡꠞꠤꠅꠔ ꠇꠥꠘꠥ ꠙꠞꠦꠎꠉꠣꠞ ꠝꠣꠘꠡꠞ ꠟꠣꠉꠤ ꠖꠦꠅꠀ ꠅꠁꠍꠦ ꠘꠣ।
ꠁꠈꠣꠘ ꠖꠦꠅꠀ ꠅꠁꠍꠦ,
ꠎꠦꠔꠣꠄ ꠀꠟ꠆ꠟꠣꠞ ꠀꠁꠘ ꠝꠣꠘꠂꠘ ꠘꠣ,
ꠀꠟ꠆ꠟꠣꠞꠦ ꠒꠞꠣꠁꠘ ꠘꠣ,
ꠘꠣꠚꠞꠝꠣꠘꠤ ꠇꠞꠂꠘ,
ꠉꠥꠘꠣꠉꠣꠞ,
ꠈꠥꠘꠤ,
ꠘꠣꠙꠣꠇ ꠀꠞ ꠛꠦ-ꠖꠤꠘ,
ꠝꠣ-ꠛꠣꠚꠞ ꠈꠥꠘꠤ,
১০-১১ ꠎꠤꠘꠣꠇꠥꠞ,
ꠡꠝꠇꠣꠝꠤ,
ꠛꠣꠘ꠆ꠖꠤ-ꠉꠥꠟꠣꠝꠞ ꠇꠣꠞꠛꠣꠞꠤ,
ꠝꠤꠍꠣ ꠝꠣꠔꠞꠣ,
ꠝꠤꠍꠣ ꠡꠣꠇ꠆ꠇꠤ ꠖꠦꠅꠞꠣ,
ꠄꠇ ꠇꠕꠣꠄ ꠉꠥꠘꠉꠣꠘꠦ ꠗꠘꠤ ꠀꠟ꠆ꠟꠣ ꠙꠣꠇꠞ ꠝꠢꠣꠘ ꠈꠥꠡ-ꠈꠛꠞꠤꠞ ꠔꠣꠟꠤꠝꠞ ꠛꠤꠞꠥꠗꠤ ꠎꠦꠔꠣ ꠝꠣꠘꠥꠡ,
ꠅꠔꠣꠞ ꠟꠣꠉꠤꠃ ꠁ ꠡꠞꠤꠅꠔ ꠖꠦꠅꠀ ꠅꠁꠍꠦ।
ꠀꠞ ꠅꠃ ꠝꠢꠣꠘ ꠈꠥꠡ-ꠈꠛꠞꠤ ꠔꠛꠟꠤꠉꠞ ꠜꠣꠞ ꠔꠣꠁꠘ ꠀꠝꠣꠞꠦ ꠖꠣꠘ ꠇꠞꠍꠂꠘ।
ꠝꠦꠢꠦꠞꠛꠣꠘꠤꠞ ꠟꠣꠉꠤ ꠡꠥꠇꠞꠤꠀ
১২ ꠢꠎꠞꠔ ꠁꠍꠣ ꠀꠟ-ꠝꠍꠤ,
ꠎꠦꠁꠘ ꠀꠝꠞꠣꠞ ꠝꠣꠟꠤꠇ,
ꠔꠣꠁꠘ ꠀꠝꠣꠞꠦ ꠛꠟ ꠎꠥꠉꠣꠁꠍꠂꠘ,
ꠀꠝꠣꠞꠦ ꠢꠇ-ꠢꠣꠟꠣꠟ ꠝꠘꠅ ꠇꠞꠤꠀ ꠔꠣꠘ ꠇꠣꠝꠅ ꠛꠅꠀꠁꠟ ꠇꠞꠍꠂꠘ,
ꠄꠞꠟꠣꠉꠤ ꠀꠝꠤ ꠔꠣꠘ ꠖꠞꠛꠣꠞꠅ ꠡꠥꠇꠞꠤꠀ ꠎꠣꠘꠣꠁꠞꠣꠝ।
১৩ ꠎꠥꠖꠤꠅ ꠀꠝꠤ ꠀꠉꠦ ꠀꠟ-ꠝꠍꠤꠞ ꠛꠖꠘꠣꠝ ꠉꠣꠁꠔꠣꠝ,
ꠔꠣꠘ ꠝꠣꠘꠡꠞ ꠃꠙꠞꠦ ꠎꠥꠟꠥꠝ ꠇꠞꠔꠣꠝ,
ꠛꠖ-ꠝꠤꠎꠣꠎ ꠖꠦꠈꠣꠁꠔꠣꠝ।
ꠔꠣ-ꠅ ꠔꠣꠁꠘ ꠀꠝꠣꠞꠦ ꠞꠢꠝꠔ ꠖꠣꠘ ꠇꠞꠍꠂꠘ,
ꠇꠣꠞꠘ ꠢꠃ ꠡꠝꠄ ꠀꠝꠤ ꠁꠝꠣꠘ ꠀꠘꠍꠤꠟꠣꠝ ꠘꠣ।
১৪ ꠀꠝꠞꠣꠞ ꠝꠥꠘꠤꠛꠦ ꠀꠝꠣꠞꠦ ꠇꠔ ꠛꠠ ꠝꠦꠢꠦꠞꠛꠣꠘꠤ ꠇꠞꠍꠂꠘ,
ꠁꠍꠣ ꠀꠟ-ꠝꠍꠤꠞ ꠔꠞꠤꠇꠣ ꠇꠛꠥꠟ ꠇꠞꠟꠦ ꠎꠦ ꠁꠝꠣꠘ ꠀꠞ ꠝꠢꠛ꠆ꠛꠔ ꠙꠄꠖꠣ ꠅꠄ,
ꠁꠔꠣ ꠔ ꠀꠝꠣꠞꠦ ꠙꠥꠞꠣꠙꠥꠞ ꠖꠣꠘ ꠇꠞꠍꠂꠘ।
১৫ ꠀꠍꠟꠦ ꠁ ꠇꠕꠣ ꠔ ꠢꠇ-ꠈꠣꠐꠤ ꠀꠞ ꠡꠥꠟ꠆ꠟꠀꠘꠣ ꠝꠣꠘꠣꠞ ꠟꠣꠈ,
ꠉꠥꠘꠣꠉꠣꠞ ꠅꠇꠟꠞ ꠎꠣꠘ ꠛꠣꠌꠣꠘꠤꠞ ꠟꠣꠉꠤꠃ ꠁꠍꠣ ꠀꠟ-ꠝꠍꠤꠄ ꠁ ꠖꠥꠘꠤꠀꠔ ꠔꠡꠞꠤꠚ ꠀꠘꠍꠤꠟꠣ।
ꠅꠃ ꠉꠥꠘꠣꠉꠣꠞꠞ ꠝꠣꠎꠦ ꠀꠝꠤꠃ ꠙꠞꠗꠣꠘ।
১৬ ꠅꠔꠣꠞ ꠟꠣꠉꠤꠃ ꠀꠟ꠆ꠟꠣꠄ ꠀꠝꠣꠞꠦ ꠖꠄꠀ ꠇꠞꠍꠂꠘ,
ꠎꠣꠔꠦ ꠀꠝꠣꠞ ꠝꠔ ꠙꠞꠗꠣꠘ ꠉꠥꠘꠣꠉꠣꠞꠞ ꠝꠣꠎꠖꠤ ꠁꠍꠣ ꠀꠟ-ꠝꠍꠤꠄ ꠔꠣꠘ ꠡꠤꠝꠣ ꠍꠣꠠꠣ ꠍꠛꠞꠉꠣꠞꠤ ꠖꠦꠈꠣꠁꠔꠣ ꠙꠣꠞꠂꠘ,
ꠀꠞ ꠔꠣꠘ ꠃꠙꠞꠦ ꠁꠝꠣꠘ ꠀꠘꠣꠄ ꠎꠦꠞꠣ ꠀꠈꠦꠞꠤ ꠎꠤꠘ꠆ꠖꠦꠉꠤ ꠙꠣꠁꠛꠣ,
ꠔꠣꠞꠣ ꠎꠣꠘꠥ ꠀꠝꠣꠞꠦ ꠖꠦꠈꠤꠀ ꠀꠟ꠆ꠟꠣꠁ ꠙꠕ ꠛꠥꠎꠂꠘ।
১৭ ꠎꠦꠁꠘ ꠌꠤꠞꠇꠣꠟꠤꠘ ꠛꠣꠖꠡꠣ,
ꠎꠦꠁꠘ ꠘꠤꠞꠣꠇꠣꠞ,
ꠄꠇꠝꠣꠔ꠆ꠞ ꠀꠟ꠆ꠟꠣ,
ꠎꠣꠘ ꠇꠥꠘꠥ ꠈꠄ ꠘꠣꠁ,
ꠔꠣꠘ ꠁꠎ꠆ꠎꠔ ꠀꠞ ꠉꠃꠞꠛ ꠢꠞ-ꠢꠣꠝꠦꠡꠣ ꠎꠣꠞꠤ ꠞꠃꠇ।
ꠀꠝꠤꠘ।
১৮ ꠅ ꠝꠣꠄꠀꠞ ꠙꠥꠔ ꠔꠤꠝꠕꠤ,
ꠔꠥꠝꠣꠞ ꠛꠦꠙꠣꠞꠦ ꠀꠉꠦ ꠎꠦꠔꠣ ꠛꠣꠔꠥꠘꠤ ꠝꠣꠔ ꠝꠣꠔꠣ ꠅꠁꠍꠤꠟ,
ꠅꠃ ꠝꠣꠚꠤꠇ ꠀꠝꠤ ꠔꠥꠝꠣꠞꠦ ꠝꠤꠘꠔ ꠇꠞꠤ ꠇꠁꠞꠣꠝ,
ꠔꠥꠝꠤ ꠁꠔꠣ ꠝꠘꠅ ꠞꠣꠈꠤꠀ ꠀꠟ-ꠝꠍꠤꠞ ꠟꠣꠉꠤ ꠖꠤꠟꠦ-ꠎꠣꠘꠦ ꠟꠣꠠꠣꠁ ꠇꠞꠣꠔ ꠞꠅ।
১৯ ꠄꠞꠟꠉꠦ ꠘꠤꠎꠞ ꠁꠝꠣꠘ ꠀꠞ ꠙꠞꠤꠡ꠆ꠇꠣꠞ ꠛꠤꠛꠦꠇꠞꠦ ꠛꠣꠌꠣꠁꠅ।
ꠇꠥꠘꠥ ꠇꠥꠘꠥ ꠝꠣꠘꠡꠦ ꠛꠤꠛꠦꠇꠞ ꠛꠥꠟꠤ ꠘꠣ ꠝꠣꠘꠤꠀ,
ꠘꠤꠎꠞ ꠁꠝꠣꠘꠞꠦ ꠘꠡ꠆ꠐ ꠇꠞꠤꠟꠤꠍꠦ।
২০ ꠁ ꠖꠟꠅ ꠀꠍꠂꠘ,
ꠢꠥꠝꠤꠘꠣꠍ ꠀꠞ ꠍꠤꠇꠘ꠆ꠖꠞ।
ꠄꠞꠟꠣꠉꠤ ꠀꠝꠤ ꠁꠔꠣꠞꠦ ꠁꠛꠟꠤꠍꠞ ꠀꠔꠅ ꠡꠙꠤ ꠖꠤꠍꠤ,
ꠎꠣꠔꠦ ꠔꠣꠞꠣ ꠛꠥꠎꠔꠣ ꠙꠣꠞꠂꠘ,
ꠇꠥꠚꠥꠞꠤ ꠝꠣꠔ ꠝꠣꠔꠣ ꠑꠤꠇ ꠘꠣꠄ।