ꠛꠘ꠆ꠖꠤ ꠙꠣꠃꠟꠥꠍꠞ ꠅꠍꠤꠅꠔ
৪
১ ꠀꠝꠤ ꠀꠟ꠆ꠟꠣ ꠙꠣꠇꠞꠦ ꠡꠣꠇ꠆ꠇꠤ ꠞꠣꠈꠤꠀ,
ꠀꠞ ꠎꠦꠁꠘ ꠔꠣꠝꠣꠝ ꠎꠤꠘ꠆ꠖꠣ-ꠝꠥꠞ꠆ꠖꠣꠞ ꠛꠤꠌꠣꠞ ꠇꠞꠛꠣ,
ꠢꠃ ꠀꠟ-ꠝꠍꠤꠞꠦ ꠡꠣꠇ꠆ꠇꠤ ꠞꠣꠈꠤꠀ,
ꠖꠥꠘꠤꠀꠔ ꠔꠣꠘ ꠖꠥꠍꠞꠣꠛꠣꠞꠞ ꠔꠡꠞꠤꠚ ꠀꠘꠣ ꠀꠞ ꠔꠣꠘ ꠛꠣꠖꠡꠣꠁꠞ ꠖꠥꠀꠁ ꠖꠤꠀ ꠔꠥꠝꠣꠞꠦ ꠅꠃ ꠇꠠꠣ ꠢꠥꠇꠥꠝ ꠖꠤꠀꠞ।
২ ꠔꠥꠝꠤ ꠀꠟ꠆ꠟꠣꠞ ꠇꠣꠟꠣꠝ ꠔꠛꠟꠤꠉ ꠇꠞꠅ,
ꠡꠝꠄ-ꠅꠡꠝꠄ ꠇꠥꠘ꠆ꠔꠣ ꠘꠣꠁ,
ꠢꠣꠝꠦꠡꠣ ꠔꠛꠟꠤꠉ ꠇꠞꠅ,
ꠈꠥꠛ ꠛꠦꠡꠤ ꠗꠂꠎ꠆ꠎ ꠗꠞꠤꠀ ꠔꠣꠟꠤꠝ ꠖꠦꠅ ꠀꠞ ꠝꠣꠘꠡꠞ ꠅꠙꠞꠣꠗ ꠖꠦꠈꠣꠁ ꠖꠦꠅ,
ꠔꠣꠞꠣꠞꠦ ꠢꠥꠡꠤꠀꠞ ꠇꠞꠅ ꠀꠞ ꠛꠥꠎꠣꠅ।
৩ ꠀꠉꠦꠖꠤ ꠅꠟꠣ ꠡꠝꠄ ꠀꠁꠛ,
ꠎꠦꠛꠟꠣ ꠢꠣꠍꠣ ꠔꠣꠟꠤꠝ ꠝꠣꠘꠡꠞ ꠡꠁꠎ꠆ꠎ ꠅꠁꠔ ꠘꠣꠄ,
ꠛꠞꠋ ꠘꠤꠎꠞ ꠝꠘꠞ ꠈꠣꠁꠡ ꠙꠥꠞꠣꠁꠔꠣ ꠇꠞꠤ ꠔꠣꠞꠣ ꠅꠟꠣꠈꠣꠘ ꠃꠡ꠆ꠔꠣꠖ ꠗꠞꠛꠣ,
ꠎꠦꠔꠣꠄ ꠔꠣꠞꠣꠞ ꠝꠘ ꠎꠥꠉꠣꠁꠀ ꠝꠘꠉꠠꠣ ꠔꠣꠟꠤꠝ ꠖꠤꠛꠣ।
৪ ꠔꠣꠞꠣ ꠢꠇ ꠔꠣꠟꠤꠝ ꠕꠣꠇꠤ ꠝꠥꠈ ꠚꠤꠞꠣꠁꠀ,
ꠝꠘꠉꠠꠣ ꠇꠤꠌ꠆ꠍꠣ-ꠇꠣꠢꠤꠘꠤꠞ ꠈꠞꠦ ꠖꠃꠠꠣꠁꠛꠣ।
৫ ꠅꠁꠟꠦ ꠔꠥꠝꠤ ꠢꠇꠟ ꠛꠦꠙꠣꠞꠦ ꠘꠤꠎꠞꠦ ꠡꠣꠝꠟꠣꠁꠀ ꠞꠣꠈꠅ,
ꠖꠥꠈ-ꠇꠡ꠆ꠐ ꠡꠁꠎ꠆ꠎ ꠇꠞꠅ,
ꠀꠟ-ꠝꠍꠤꠞ ꠛꠦꠙꠣꠞꠦ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠣꠔ ꠞꠅ,
ꠀꠟ꠆ꠟꠣꠞ ꠖꠦꠅꠀ ꠖꠣꠄꠁꠔ꠆ꠔ ꠀꠖꠣꠄ ꠇꠞꠅ।
৬ ꠀꠝꠣꠞ ꠝꠃꠔꠞ ꠖꠤꠘ ꠀꠁꠀ ꠀꠎꠤ ꠉꠦꠍꠦ,
ꠀꠝꠣꠞ ꠘꠤꠎꠞ ꠟꠃꠞꠦ ꠇꠥꠞꠛꠣꠘꠤ ꠢꠤꠡꠣꠛꠦ ꠓꠣꠟꠤ ꠖꠦꠅꠀ ꠅꠞ।
৭ ꠀꠝꠤ ꠔ ꠀꠟ-ꠝꠍꠤꠞ ꠟꠣꠉꠤ ꠎꠣꠘꠦ-ꠙꠞꠣꠘꠦ ꠟꠣꠠꠣꠁ ꠇꠞꠍꠤ,
ꠀꠝꠣꠞꠦ ꠛꠣꠔꠣꠁ ꠖꠦꠅꠀ ꠙꠕꠞ ꠢꠦꠡ ꠝꠣꠕꠣ ꠙꠞ꠆ꠎꠘ꠆ꠔ ꠖꠃꠠꠣꠁꠍꠤ,
ꠀꠝꠣꠞ ꠁꠝꠣꠘ ꠐꠤꠇꠣꠁꠀ ꠞꠣꠈꠍꠤ।
৮ ꠔꠦ ꠀꠝꠣꠞ ꠙꠞꠦꠎꠉꠣꠞꠤꠞ ꠙꠥꠞꠥꠡ꠆ꠇꠣꠞ ꠔ ꠎꠝꠣ ꠀꠍꠦ,
ꠢꠃ ꠢꠇ-ꠁꠘꠍꠣꠚꠇꠣꠞꠤ ꠝꠣꠟꠤꠇꠦ ꠞꠥꠎ ꠢꠣꠡꠞꠞ ꠖꠤꠘ ꠀꠝꠣꠞꠦ ꠎꠂꠅꠞ ꠝꠣꠟꠣ ꠙꠥꠞꠥꠡ꠆ꠇꠣꠞ ꠖꠤꠛꠣ।
ꠁꠔꠣ ꠈꠣꠟꠤ ꠀꠝꠣꠞꠦ ꠘꠣꠄ,
ꠎꠔ ꠝꠣꠘꠥꠡ ꠀꠡꠤꠇ ꠅꠁꠀ ꠔꠣꠘ ꠟꠣꠉꠤ ꠛꠣꠞ ꠌꠣꠁꠞꠣ,
ꠔꠣꠞꠣ ꠢꠇꠟꠞꠦꠃ ꠖꠤꠛꠣ।
ꠀꠖꠣꠟꠔꠞ ꠝꠣꠎꠦ ꠡꠣꠁꠎ꠆ꠎ
৯ ꠅ ꠔꠤꠝꠕꠤ,
ꠔꠥꠝꠤ ꠌꠦꠡ꠆ꠐꠣ ꠌꠣꠟꠣꠁꠀ ꠎꠔ ꠎꠟꠖꠤ ꠙꠣꠞ ꠀꠝꠣꠞ ꠉꠦꠍꠦ ꠀꠅ।
১০ ꠇꠣꠞꠘ ꠇꠤꠞꠤꠍꠇꠦꠘ ꠜꠣꠁ ꠉꠣꠟꠣꠔꠤꠀ ꠖꠦꠡꠅ,
ꠔꠤꠔꠣꠍ ꠜꠣꠁ ꠖꠣꠟꠝꠣꠔꠤꠀ ꠖꠦꠡꠅ ꠉꠦꠍꠂꠘ।
ꠀꠞ ꠖꠤꠝꠣꠍ ꠜꠣꠁ ꠖꠥꠘꠤꠀꠛꠤ ꠝꠣꠄꠀꠞ ꠗꠣꠘ꠆ꠖꠣꠔ ꠙꠠꠤꠀ,
ꠀꠝꠣꠞꠦ ꠍꠣꠠꠤꠀ ꠕꠤꠡꠟꠘꠤꠇꠤ ꠐꠣꠃꠘꠅ ꠉꠦꠍꠂꠘꠉꠤ।
১১ ꠈꠣꠟꠤ ꠟꠥꠇ ꠜꠣꠁ ꠀꠝꠣꠞ ꠉꠦꠍꠦ ꠀꠍꠂꠘ।
ꠄꠞꠟꠣꠉꠤ ꠝꠣꠞ꠆ꠇꠥꠍ ꠜꠣꠁꠞꠦ ꠟꠁꠀ ꠔꠥꠝꠤ ꠎꠟꠖꠤ ꠀꠅ,
ꠀꠝꠣꠞ ꠇꠣꠝ-ꠇꠣꠎꠅ ꠔꠣꠁꠘ ꠛꠃꠔ ꠡꠣꠁꠎ꠆ꠎ ꠇꠞꠂꠘ।
১২ ꠔꠥꠈꠤꠇ ꠜꠣꠁꠞꠦ ꠀꠝꠤ ꠁꠚꠤꠍꠅ ꠙꠣꠑꠣꠁꠍꠤ।
১৩ ꠀꠝꠤ ꠀꠁꠛꠣꠞ ꠡꠝꠄ ꠔꠞꠥꠀꠍ ꠐꠣꠃꠘꠞ ꠇꠣꠞꠚꠥꠍ ꠜꠣꠁꠞ ꠉꠦꠍꠦ,
ꠀꠝꠣꠞ ꠄꠇꠈꠣꠘ ꠌꠣꠖ꠆ꠖꠞ ꠕꠁꠀ ꠀꠁꠍꠤ,
ꠔꠥꠝꠤ ꠀꠁꠛꠣꠞ ꠙꠕꠦ ꠅꠈꠣꠘꠔꠣ ꠀꠘꠤꠅ,
ꠀꠞ ꠀꠝꠣꠞ ꠇꠤꠔꠣꠛꠈꠣꠘꠣꠂꠘ,
ꠈꠣꠍ ꠇꠞꠤ ꠌꠣꠝꠠꠣꠞ ꠃꠙꠞꠦ ꠟꠦꠈꠣ ꠇꠤꠔꠣꠛꠈꠣꠘꠣꠂꠘꠅ ꠀꠘꠤꠅ।
১৪ ꠢꠥꠘꠅ,
ꠔꠣꠝꠣ-ꠙꠤꠔꠟꠞ ꠇꠣꠝ ꠇꠞꠦ ꠎꠦ ꠍꠤꠇꠘ꠆ꠖꠞ,
ꠅꠉꠤꠄ ꠀꠝꠣꠞ ꠛꠃꠔ ꠈꠦꠔꠤ ꠇꠞꠍꠦ,
ꠅꠁꠟꠦ ꠝꠣꠟꠤꠇ ꠁꠍꠣꠄ ꠔꠣꠞꠦ ꠃꠙꠎꠥꠇ꠆ꠔ ꠛꠖꠟꠣ ꠖꠤꠛꠣ।
১৫ ꠔꠦ ꠔꠣꠞ ꠛꠦꠙꠣꠞꠦ ꠔꠥꠝꠤ ꠢꠥꠡꠤꠀꠞ ꠞꠁꠅ,
ꠢꠦ ꠇꠝꠞ ꠛꠣꠘ꠆ꠖꠤꠀ ꠀꠝꠞꠣꠞ ꠔꠛꠟꠤꠉ ꠇꠣꠝꠞ ꠛꠤꠞꠥꠗꠤꠔꠣ ꠇꠞꠍꠤꠟ।
১৬ ꠎꠣꠘꠅ ꠘꠤ,
ꠀꠝꠣꠞꠦ ꠙꠄꠟꠣ ꠛꠣꠞ ꠎꠦꠛꠟꠣ ꠀꠖꠣꠟꠔꠅ ꠘꠦꠅꠀ ꠅꠁꠟ,
ꠅꠃ ꠡꠝꠄ ꠇꠦꠃ ꠀꠝꠣꠞꠦ ꠡꠣꠁꠎ꠆ꠎ ꠇꠞꠍꠦ ꠘꠣ,
ꠢꠇꠟꠦꠃ ꠀꠝꠣꠞꠦ ꠍꠣꠠꠤꠀ ꠜꠣꠉꠤꠍꠦ।
ꠔꠣ-ꠅ ꠀꠟ꠆ꠟꠣꠄ ꠎꠣꠘꠥ ꠔꠣꠞꠣꠞ ꠁ ꠛꠤꠡꠄꠇꠈꠣꠘ ꠢꠤꠡꠣꠛꠅ ꠘꠣ ꠗꠞꠂꠘ।
১৭ ꠈꠣꠟꠤ ꠝꠣꠟꠤꠇ ꠁꠍꠣ ꠀꠝꠣꠞ ꠙꠇ꠆ꠇꠦ ꠃꠛꠣꠁꠟꠣ,
ꠔꠣꠁꠘ ꠀꠝꠣꠞꠦ ꠛꠟ ꠎꠥꠉꠣꠁꠟꠣ।
ꠄꠞꠟꠣꠉꠤ ꠀꠝꠤ ꠜꠤꠘ ꠎꠣꠔꠤꠞ ꠍꠣꠝꠘꠦ ꠡꠥꠟ꠆ꠟꠀꠘꠣ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠣꠞ ꠡꠥꠎꠥꠉ ꠙꠣꠁꠍꠤ,
ꠔꠣꠞꠣ ꠢꠇꠟꠦ ꠁꠔꠣ ꠢꠥꠘꠍꠦ।
ꠅꠃ ꠛꠤꠌꠣꠞꠅ ꠔꠣꠞꠣꠞ ꠡꠤꠋꠢꠞ ꠝꠥꠈꠞ ꠈꠥꠞꠣꠇ ꠅꠀ ꠕꠣꠇꠤ ꠀꠟ꠆ꠟꠣꠄ ꠀꠝꠣꠞꠦ ꠛꠣꠌꠣꠁꠍꠂꠘ।
১৮ ꠅꠃ ꠝꠣꠟꠤꠇ ꠁꠍꠣꠄ ꠢꠇꠟ ꠘꠝꠥꠘꠣꠞ ꠛꠖ ꠇꠣꠝ ꠕꠣꠇꠤꠅ ꠀꠝꠣꠞꠦ ꠢꠦꠚꠣꠎꠔꠦ ꠞꠣꠈꠛꠣ ꠀꠞ ꠍꠢꠤ-ꠍꠣꠟꠣꠝꠔꠦ ꠛꠦꠢꠦꠡ꠆ꠔꠤ ꠛꠣꠖꠡꠣꠁꠔ ꠙꠣꠞ ꠇꠞꠛꠣ।
ꠎꠥꠉꠦ ꠎꠥꠉꠦ ꠌꠤꠞꠇꠣꠟ ꠔꠣꠘ ꠔꠣꠞꠤꠚ ꠅꠃꠇ।
ꠀꠝꠤꠘ।
ꠛꠤꠖꠣꠄꠁ ꠍꠣꠟꠣꠝ
১৯ ꠀꠝꠞꠣꠞ ꠝꠥꠝꠤꠘ ꠜꠣꠁ ꠀꠇꠤꠟꠞꠦ,
ꠔꠣꠘ ꠛꠤꠛꠤ ꠚꠤꠍꠇꠤꠟꠣ ꠀꠞ ꠀꠘꠤꠍ ꠜꠣꠁꠞ ꠙꠞꠤꠛꠣꠞꠞꠦ ꠀꠝꠣꠞ ꠍꠣꠟꠣꠝ ꠎꠣꠘꠣꠁꠅ।
২০ ꠁꠞꠣꠡ꠆ꠔꠣꠍ ꠜꠣꠁ ꠇꠞꠤꠘ꠆ꠔ ꠐꠣꠃꠘꠅ ꠞꠁꠍꠂꠘ,
ꠀꠞ ꠔꠚꠤꠝꠞꠦ ꠛꠦꠝꠣꠞ ꠢꠣꠟꠔꠦ ꠀꠝꠤ ꠝꠤꠟꠤꠔꠣ ꠛꠘ꠆ꠖꠞꠅ ꠕꠁꠀ ꠀꠁꠍꠤ।
২১ ꠔꠦ ꠔꠥꠝꠤ ꠈꠥꠛ ꠌꠦꠡ꠆ꠐꠣ ꠌꠣꠟꠣꠅ,
ꠡꠤꠔꠞ ꠀꠉꠦ ꠀꠁꠛꠣꠞ ꠟꠣꠉꠤ।
ꠜꠣꠁ ꠀꠛꠥꠟ,
ꠛꠖꠤꠍ,
ꠅꠟꠤꠘꠤꠍ,
ꠛꠁꠘ ꠇꠥꠟꠥꠖꠤꠀ ꠡꠢ ꠀꠞꠅ ꠢꠇꠟ ꠜꠣꠁ-ꠛꠁꠘꠦ ꠔꠥꠝꠣꠞꠦ ꠍꠣꠟꠣꠝ ꠖꠤꠍꠂꠘ।
২২ ꠝꠣꠟꠤꠇ ꠁꠍꠣ ꠔꠥꠝꠣꠞ ꠟꠉꠦ ꠟꠉꠦ ꠞꠃꠇ꠆ꠇꠣ।
ꠀꠟ꠆ꠟꠣꠞ ꠞꠢꠝꠔ ꠔꠥꠝꠞꠣꠞ ꠟꠉꠦ ꠕꠣꠇꠃꠇ।
ꠀꠝꠤꠘ॥