ꠙꠛꠤꠔ꠆ꠞ ꠁꠘ꠆ꠎꠤꠟ ꠡꠞꠤꠚ ১৮ ꠘꠝ꠆ꠛꠞ ꠍꠤꠙꠣꠞꠣ
ꠀꠟ-ꠚꠤꠟꠤꠝꠘ
ꠢꠎꠞꠔ ꠙꠣꠃꠟꠥꠍꠞ ꠍꠣꠟꠣꠝ
১
১ ꠀꠝꠤ ꠙꠣꠃꠟꠥꠍ,
ꠁꠍꠣ ꠀꠟ-ꠝꠍꠤꠞ ꠟꠣꠉꠤ ꠛꠘ꠆ꠖꠤ ꠀꠍꠤ।
ꠀꠝꠤ ꠀꠞ ꠀꠝꠞꠣꠞ ꠜꠣꠁ ꠔꠤꠝꠕꠤꠄ,
ꠀꠝꠞꠣꠞ ꠟꠉꠞ ꠔꠛꠟꠤꠉ ꠇꠞꠞꠣ ꠝꠣꠄꠀꠞ ꠖꠥꠡ꠆ꠔ ꠚꠤꠟꠤꠝꠘꠞ ꠉꠦꠍꠦ ꠟꠦꠈꠞꠣꠝ।
২ ꠛꠁꠘ ꠀꠚꠤꠀ,
ꠀꠝꠞꠣꠞ ꠟꠉꠦ ꠁꠝꠣꠘꠞ ꠎꠥꠖ꠆ꠖꠣ ꠀꠞ꠆ꠈꠤꠙꠣꠍ ꠀꠞ ꠔꠥꠝꠣꠞ ꠛꠣꠠꠤꠞ ꠎꠝꠣꠔꠞ ꠢꠇꠟꠞꠦ ꠍꠣꠟꠣꠝ ꠎꠣꠘꠣꠁꠞꠣꠝ।
৩ ꠀꠝꠞꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣ ꠙꠣꠇꠦ ꠀꠞ ꠢꠎꠞꠔ ꠁꠍꠣ ꠀꠟ-ꠝꠍꠤꠄ ꠔꠥꠝꠞꠣꠞ ꠃꠙꠞꠦ ꠞꠢꠝꠔ ꠀꠞ ꠡꠣꠘ꠆ꠔꠤ ꠘꠣꠎꠤꠟ ꠇꠞꠃꠇ꠆ꠇꠣ।
ꠢꠎꠞꠔ ꠙꠣꠃꠟꠥꠍꠦ ꠚꠤꠟꠤꠝꠘꠞ ꠔꠣꠞꠤꠚ ꠇꠞꠟꠣ
৪ ꠀꠝꠤ ꠢꠣꠝꠦꠡꠣ ꠝꠥꠘꠣꠎꠣꠔꠞ ꠡꠝꠄ ꠔꠥꠝꠣꠞ ꠇꠕꠣ ꠁꠀꠖ ꠇꠞꠤꠀ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠤ।
৫ ꠇꠣꠞꠘ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠃꠙꠞꠦ ꠔꠥꠝꠣꠞ ꠁꠝꠣꠘ ꠀꠞ ꠙꠣꠇ ꠛꠘ꠆ꠖꠣ ꠅꠇꠟꠞ ꠛꠣꠄ ꠔꠥꠝꠣꠞ ꠝꠢꠛ꠆ꠛꠔꠞ ꠇꠕꠣ ꠀꠝꠤ ꠢꠥꠘꠍꠤ।
৬ ꠀꠝꠤ ꠖꠥꠀ ꠇꠞꠤ,
ꠝꠥꠝꠤꠘ ꠅꠇꠟꠞ ꠟꠉꠦ ꠔꠥꠝꠣꠞ ꠈꠣꠔꠤꠞ-ꠡꠝ꠆ꠙꠞ꠆ꠇ ꠀꠞꠅ ꠛꠣꠠꠃꠇ।
ꠔꠥꠝꠤ ꠔ ꠎꠣꠘꠅ,
ꠀꠟ-ꠝꠍꠤꠞ ꠈꠣꠔꠤꠞꠦ ꠀꠟ꠆ꠟꠣꠄ ꠀꠝꠞꠣꠞꠦ ꠇꠔ ꠜꠣꠟꠣ ꠜꠣꠟꠣ ꠘꠤꠀꠝꠔ ꠛꠤꠟꠣꠁ ꠖꠤꠍꠂꠘ।
৭ ꠜꠣꠁ,
ꠔꠥꠝꠣꠞ ꠝꠢꠛ꠆ꠛꠔ ꠖꠦꠈꠤꠀ ꠀꠝꠤ ꠈꠥꠛ ꠈꠥꠡꠤ ꠅꠁꠍꠤ ꠀꠞ ꠃꠔꠡꠣꠢ ꠙꠣꠁꠍꠤ,
ꠔꠥꠝꠤ ꠔ ꠀꠟ꠆ꠟꠣꠞ ꠙꠣꠇ ꠛꠘ꠆ꠖꠣ ꠅꠇꠟꠞ ꠖꠤꠟꠅ ꠀꠞꠣꠝ ꠖꠤꠍ।
ꠅꠘꠤꠍꠤꠝꠞꠦ ꠚꠤꠞꠔ ꠘꠦꠅꠀꠞ ꠟꠣꠉꠤ ꠅꠘꠥꠞꠥꠗ
৮ ꠔꠥꠝꠣꠞ ꠁ ꠜꠣꠛ ꠖꠦꠈꠤꠀ ꠀꠝꠤ ꠔꠥꠝꠣꠞꠦ ꠄꠇꠈꠣꠘ ꠇꠕꠣ ꠇꠁꠔꠣꠝ ꠌꠣꠁꠞꠣꠝ।
ꠀꠝꠤ ꠔ ꠀꠟ-ꠝꠍꠤꠞ ꠘꠣꠝꠦ ꠔꠥꠝꠣꠞꠦ ꠢꠥꠇꠥꠝ ꠖꠤꠔꠣꠝ ꠙꠣꠞꠟꠣꠝ ꠅꠘꠦ,
ꠔꠥꠝꠣꠞ ꠇꠣꠝ ꠙꠥꠞꠣ ꠇꠞꠣꠞ ꠟꠣꠉꠤ।
৯ ꠅꠁꠟꠦ ꠝꠢꠛ꠆ꠛꠔꠞ ꠈꠣꠔꠤꠞꠦ ꠢꠥꠇꠥꠝ ꠘꠣ ꠖꠤꠀ ꠔꠥꠝꠣꠞꠦ ꠝꠤꠘꠔ ꠇꠞꠤꠀꠞ।
ꠀꠝꠤ ꠙꠣꠃꠟꠥꠍ ꠅꠃ ꠝꠥꠞꠛ꠆ꠛꠤ ꠛꠄꠅꠡꠅ ꠀꠟ-ꠝꠍꠤꠞ ꠟꠣꠉꠤ ꠛꠘ꠆ꠖꠤ ꠢꠣꠟꠔꠦ ꠔꠥꠝꠣꠞ ꠉꠦꠍꠦ ꠁ ꠝꠤꠘꠔꠤ ꠇꠞꠞꠣꠝ।
১০ ꠀꠝꠣꠞ ꠀꠅꠟꠣꠖ ꠅꠘꠤꠍꠤꠝꠞ ꠟꠣꠉꠤ ꠀꠞꠎꠤ ꠎꠣꠘꠣꠁꠞꠣꠝ,
ꠀꠝꠤ ꠎꠦꠟꠅ ꠛꠘ꠆ꠖꠤ ꠕꠣꠇꠣ ꠢꠣꠟꠔꠦ ꠢꠦ ꠁꠝꠣꠘ ꠀꠘꠤꠀ ꠀꠝꠣꠞ ꠀꠅꠟꠣꠖ ꠛꠘꠤꠉꠦꠍꠦ।
১১ ꠄꠇ ꠡꠝꠄ ꠔꠥꠝꠣꠞ ꠉꠦꠍꠦ ꠢꠦ ꠛꠦꠇꠣꠝꠣ ꠀꠍꠤꠟ,
ꠅꠁꠟꠦ ꠅꠈꠘ ꠀꠝꠣꠞ ꠀꠞ ꠔꠥꠝꠣꠞ ꠉꠦꠍꠦ ꠢꠦ ꠛꠃꠔ ꠇꠣꠝꠣꠅꠞꠣ ꠛꠘꠤꠉꠦꠍꠦ।
১২ ꠎꠣꠁ ꠅꠃꠇ,
ꠀꠝꠣꠞ ꠎꠣꠘꠞ ꠕꠣꠇꠤ ꠛꠦꠡꠤ ꠝꠣꠄꠀꠞ ꠅꠃ ꠝꠣꠘꠡꠞꠦ ꠀꠝꠤ ꠔꠥꠝꠣꠞ ꠉꠦꠍꠦ ꠚꠤꠞꠔ ꠙꠣꠑꠣꠁꠞꠣꠝ।
১৩ ꠀꠝꠤ ꠔꠣꠞꠦ ꠀꠝꠣꠞ ꠉꠦꠍꠦ ꠞꠣꠈꠔꠣꠝ ꠌꠣꠁꠍꠟꠣꠝ,
ꠎꠣꠔꠦ ꠈꠥꠡ-ꠈꠛꠞꠤꠞ ꠖꠣꠄ ꠛꠘ꠆ꠖꠤ ꠢꠣꠟꠔꠦ ꠔꠥꠝꠣꠞ ꠅꠁꠀ ꠢꠦ ꠀꠝꠣꠞ ꠈꠦꠎꠝꠔ ꠇꠞꠔ ꠙꠣꠞꠦ।
১৪ ꠅꠁꠟꠦ ꠔꠥꠝꠣꠞ ꠁꠎꠣꠎꠔ ꠍꠣꠠꠣ ꠀꠝꠤ ꠇꠥꠘ꠆ꠔꠣ ꠇꠞꠟꠣꠝ ꠘꠣ,
ꠎꠣꠔꠦ ꠎꠥꠞ ꠇꠞꠤꠀ ꠔꠥꠝꠣꠞ ꠜꠣꠟꠣ ꠇꠣꠝ ꠀꠖꠣꠄ ꠇꠞꠣ ꠘꠣ ꠟꠣꠉꠦ।
ꠀꠝꠤ ꠌꠣꠁꠞꠣꠝ,
ꠔꠥꠝꠤ ꠘꠤꠎ ꠕꠣꠇꠤꠃ ꠅꠃ ꠇꠣꠝ ꠇꠞꠅ।
১৫ ꠔꠥꠝꠤ ꠎꠣꠔꠦ ꠌꠤꠞꠇꠣꠟꠞ ꠟꠣꠉꠤ ꠔꠣꠞꠦ ꠚꠤꠞꠤꠀ ꠙꠣꠅ,
ꠅꠁꠔ ꠙꠣꠞꠦ ꠅꠃ ꠇꠣꠞꠘꠦꠃ ꠢꠦ ꠔꠥꠝꠣꠞ ꠉꠦꠍ ꠕꠣꠇꠤ ꠕꠥꠠꠣ ꠖꠤꠘꠞ ꠟꠣꠉꠤ ꠢꠞꠤꠀ ꠀꠍꠤꠟ।
১৬ ꠅꠁꠟꠦ ꠔꠥꠝꠤ ꠅꠈꠘ ꠔꠣꠞꠦ ꠀꠞ ꠉꠥꠟꠣꠝ ꠢꠤꠡꠣꠛꠦ ꠙꠣꠁꠔꠣꠄ ꠘꠣꠄ ꠛꠞꠋ ꠉꠥꠟꠣꠝ ꠕꠣꠇꠤ ꠛꠠ,
ꠝꠣꠘꠤ ꠝꠣꠄꠀꠞ ꠜꠣꠁ ꠢꠤꠡꠣꠛꠦ ꠙꠣꠁꠛꠣꠄ।
ꠈꠣꠍ ꠇꠞꠤ ꠢꠦ ꠀꠝꠣꠞ ꠈꠥꠛ ꠝꠣꠄꠀꠞ ꠝꠣꠘꠥꠡ,
ꠅꠈꠘ ꠔꠥꠝꠣꠞ ꠉꠦꠍꠦꠅ ꠢꠦ ꠀꠞꠅ ꠝꠣꠄꠀꠞ,
ꠈꠣꠟꠤ ꠞꠇ꠆ꠔ-ꠝꠣꠋꠡꠦ ꠘꠣꠄ,
ꠁꠝꠣꠘꠖꠣꠞ ꠜꠣꠁ ꠢꠤꠡꠣꠛꠦ ꠝꠣꠄꠀꠞ।
১৭ ꠄꠞꠖꠣꠄ ꠔꠥꠝꠤ ꠎꠥꠖꠤ ꠀꠝꠣꠞꠦ ꠄꠇꠁ ꠁꠝꠣꠘꠞ ꠜꠣꠉꠤ ꠎꠣꠘꠅ,
ꠔꠦ ꠀꠝꠣꠞꠦ ꠎꠦꠟꠣ ꠇꠛꠥꠟ ꠇꠞꠣꠞ ꠇꠕꠣ,
ꠔꠣꠞꠦꠅ ꠅꠟꠣ ꠇꠛꠥꠟ ꠇꠞꠤꠅ।
১৮ ꠢꠦ ꠎꠥꠖꠤ ꠔꠥꠝꠣꠞ ꠇꠥꠘꠥ ꠈꠦꠔꠤ ꠇꠞꠤꠀ ꠕꠣꠇꠦ ꠀꠞ ꠔꠣꠞ ꠉꠦꠍꠦ ꠔꠥꠝꠣꠞ ꠇꠥꠘꠥ ꠙꠣꠅꠘꠣ ꠕꠣꠇꠦ,
ꠔꠦ ꠝꠘꠅ ꠇꠞꠤꠅ,
ꠁ ꠙꠣꠅꠘꠣ ꠔꠥꠝꠤ ꠀꠝꠣꠞ ꠉꠦꠍꠦ ꠙꠣꠅ।
১৯ ꠀꠝꠤ ꠙꠣꠃꠟꠥꠍꠦ ꠘꠤꠎꠞ ꠀꠔꠦ ꠟꠦꠈꠤꠀ ꠎꠣꠘꠣꠁꠞꠣꠝ,
ꠔꠥꠝꠣꠞ ꠙꠣꠅꠘꠣ ꠀꠝꠤ ꠖꠤꠟꠣꠁꠝꠥ।
ꠀꠍꠟꠦ ꠀꠝꠤ ꠇꠁꠔꠣꠝ ꠌꠣꠁꠞꠣꠝ ꠘꠣ ꠎꠦ,
ꠔꠥꠝꠣꠞ ꠘꠤꠎꠞ ꠎꠣꠘꠞ ꠟꠣꠉꠤꠃ ꠔꠥꠝꠤ ꠀꠝꠣꠞ ꠉꠦꠍꠦ ꠞꠤꠘꠤ ꠀꠍ।
২০ ꠜꠣꠁ ꠚꠤꠟꠤꠝꠘ,
ꠀꠟ꠆ꠟꠣꠞ ꠅꠀꠡ꠆ꠔꠦ ꠄꠇꠈꠣꠘ ꠇꠣꠝ ꠇꠞꠅ,
ꠄꠇꠎꠘ ꠁꠝꠣꠘꠖꠣꠞ ꠜꠣꠁ ꠢꠤꠡꠣꠛꠦ ꠀꠝꠣꠞ ꠎꠣꠘꠅ ꠀꠞꠣꠝ ꠖꠦꠅ।
২১ ꠔꠥꠝꠤ ꠀꠝꠣꠞ ꠇꠕꠣ ꠞꠣꠈꠛꠣꠄ ꠎꠣꠘꠤꠀꠃ,
ꠔꠥꠝꠣꠞ ꠉꠦꠍꠦ ꠅꠃ ꠌꠤꠑꠤꠈꠣꠘ ꠟꠦꠈꠟꠣꠝ।
ꠀꠝꠤ ꠝꠘꠅ ꠇꠞꠤ,
ꠀꠝꠤ ꠎꠦꠔꠣ ꠇꠞꠣꠞ ꠟꠣꠉꠤ ꠇꠁꠞꠣꠝ,
ꠄꠞ ꠕꠣꠇꠤ ꠛꠦꠡꠤ ꠔꠥꠝꠤ ꠇꠞꠛꠣꠄ।
ꠢꠎꠞꠔ ꠙꠣꠃꠟꠥꠍꠞ ꠡꠦꠡ ꠇꠕꠣ
২২ ꠢꠥꠘꠅ,
ꠀꠞꠅ ꠄꠇꠈꠣꠘ ꠇꠕꠣ ꠇꠁꠞꠣꠝ,
ꠔꠥꠝꠤ ꠀꠝꠣꠞ ꠟꠣꠉꠤ ꠝꠦꠝꠣꠘꠞ ꠇꠥꠑꠣ ꠑꠤꠇ ꠇꠞꠤꠀ ꠞꠣꠈꠤꠅ।
ꠇꠣꠞꠘ ꠀꠝꠤ ꠀꠡꠣ ꠇꠞꠞꠣꠝ,
ꠔꠥꠝꠞꠣꠞ ꠖꠥꠀꠞ ꠃꠍꠤꠟ꠆ꠟꠣꠄ ꠀꠝꠣꠞꠦ ꠔꠥꠝꠞꠣꠞ ꠉꠦꠍꠦ ꠚꠤꠞꠔ ꠖꠦꠅꠀ ꠅꠁꠛ।
২৩ ꠀꠛꠥ-ꠚꠣꠞꠣꠍꠦ ꠔꠥꠝꠣꠞꠦ ꠍꠣꠟꠣꠝ ꠖꠤꠍꠂꠘ,
ꠔꠣꠁꠘ ꠁꠍꠣ ꠀꠟ-ꠝꠍꠤꠞ ꠟꠣꠉꠤ ꠀꠝꠣꠞ ꠟꠉꠦ ꠅꠁꠀ ꠛꠘ꠆ꠖꠤ ꠀꠍꠂꠘ।
২৪ ꠀꠞ ꠀꠝꠣꠞ ꠟꠉꠞ ꠔꠛꠟꠤꠉꠇꠣꠞꠤ ꠝꠣꠞ꠆ꠇꠥꠍ,
ꠀꠞꠤꠡ꠆ꠔꠣꠇꠥꠍ,
ꠖꠤꠝꠣꠍ ꠀꠞ ꠟꠥꠇꠦꠅ ꠔꠥꠝꠣꠞꠦ ꠍꠣꠟꠣꠝ ꠎꠣꠘꠣꠁꠞꠣ।
২৫ ꠀꠝꠞꠣꠞ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠞꠢꠝꠔ ꠔꠥꠝꠞꠣꠞ ꠖꠤꠟꠅ ꠇꠣꠁꠝ ꠞꠃꠇ।
ꠀꠝꠤꠘ॥