ꠀꠟ-ꠝꠍꠤꠞ ꠎꠞꠤꠀꠄꠃ ꠀꠟ꠆ꠟꠣꠞ ꠖꠦꠅꠀ ꠀꠞꠣꠝ (৩:১-৪:১২)
ꠝꠥꠍꠣ ꠘꠛꠤ ꠕꠣꠇꠤ ꠢꠎꠞꠔ ꠁꠍꠣ ꠁꠎ꠆ꠎꠔꠤ
৩
১ ꠄꠞꠟꠣꠉꠤ ꠅ ꠀꠝꠣꠞ ꠙꠣꠇ-ꠙꠞꠦꠎꠉꠣꠞ ꠜꠣꠁ ꠅꠇꠟ,
ꠔꠥꠝꠞꠣ ꠎꠦꠞꠣ ꠛꠦꠢꠦꠡ꠆ꠔꠤ ꠖꠣꠅꠔꠅ ꠡꠞꠤꠇ ꠅꠁꠍ,
ꠔꠥꠝꠞꠣ ꠙꠞꠔꠦꠇꠦꠃ ꠁꠍꠣꠞ ꠛꠣꠄ ꠌꠃꠈ ꠞꠣꠈꠅ।
ꠀꠟ꠆ꠟꠣ ꠙꠣꠇꠦ ꠔꠣꠘ ꠁ ꠈꠣꠍ ꠈꠟꠤꠚꠣꠞꠦ ꠛꠦꠎꠤꠍꠂꠘ,
ꠔꠣꠁꠘꠃ ꠔ ꠢꠃ ꠙꠞꠗꠣꠘ ꠁꠝꠣꠝ,
ꠁꠈꠣꠘ ꠀꠝꠞꠣ ꠝꠣꠘꠍꠤ।
২ ꠢꠎꠞꠔ ꠝꠥꠍꠣ ꠎꠦꠟꠣ ꠀꠟ꠆ꠟꠣꠞ ꠊꠞ-ꠡꠋꠡꠣꠞꠅ ꠘꠤꠞꠜꠞ ꠇꠞꠣꠞ ꠎꠥꠇꠣ ꠀꠍꠟꠣ,
ꠅꠃ ꠟꠣꠈꠣꠘ ꠁꠍꠣꠞꠦꠅ ꠎꠦꠁꠘ ꠛꠦꠎꠤꠍꠂꠘ,
ꠅꠃ ꠀꠟ꠆ꠟꠣꠞ ꠖꠞꠛꠣꠞꠅ ꠔꠣꠁꠘ ꠀꠍꠟꠣ ꠘꠤꠞꠜꠞ ꠇꠞꠣꠞ ꠎꠥꠇꠣ।
৩ ꠔꠦ ꠊꠞ ꠛꠣꠘꠣꠅꠞꠣ ꠝꠣꠟꠤꠇꠦ ꠎꠦꠟꠣ ꠊꠞ ꠕꠣꠇꠤꠅ ꠛꠦꠡꠤ ꠁꠎ꠆ꠎꠔ ꠙꠣꠁꠘ,
ꠅꠃ ꠟꠣꠈꠣꠘ ꠀꠟ꠆ꠟꠣꠞ ꠊꠞ-ꠡꠋꠡꠣꠞꠅ ꠢꠎꠞꠔ ꠁꠍꠣꠄꠅ ꠝꠥꠍꠣ ꠘꠛꠤ ꠕꠣꠇꠤ ꠛꠦꠡꠤ ꠁꠎ꠆ꠎꠔ ꠢꠣꠍꠤꠟ ꠇꠞꠍꠂꠘ।
৪ ꠢꠇ꠆ꠇꠟ ꠊꠞꠣꠁꠘꠃ ꠔ ꠇꠥꠘꠥ ꠘꠣ ꠇꠥꠘꠥ ꠝꠣꠘꠡꠦ ꠛꠣꠘꠣꠁꠍꠂꠘ,
ꠅꠁꠟꠦ ꠎꠦꠁꠘ ꠢꠇ꠆ꠇꠟꠔꠣ ꠛꠣꠘꠣꠁꠍꠂꠘ ꠔꠣꠁꠘꠃ ꠀꠟ꠆ꠟꠣ।
৫ ꠀꠍꠟꠦ ꠍꠣꠝꠘꠞ ꠎꠝꠣꠘꠣꠞ ꠟꠣꠉꠤ ꠎꠦꠔꠣ ꠛꠣꠔꠣꠁꠟ ꠅꠁꠛ,
ꠅꠔꠣ ꠛꠦꠙꠣꠞ ꠎꠣꠘꠣꠘꠤꠞ ꠟꠣꠉꠤ,
ꠝꠥꠍꠣ ꠀꠍꠟꠣ ꠀꠟ꠆ꠟꠣꠞ ꠊꠞ-ꠡꠋꠡꠣꠞꠞ ꠇꠣꠝ-ꠇꠣꠎꠅ ꠘꠤꠞꠜꠞ ꠇꠞꠣꠞ ꠎꠥꠇꠣ ꠇꠣꠝꠟꠣꠞ ꠟꠣꠈꠣꠘ।
৬ ꠅꠁꠟꠦ ꠀꠟ-ꠝꠍꠤ ꠔ ꠀꠟ꠆ꠟꠣꠞ ꠊꠞ-ꠡꠋꠡꠣꠞꠞ ꠎꠤꠝ꠆ꠝꠣꠖꠣꠞ ꠢꠤꠡꠣꠛꠦ ꠘꠤꠞꠜꠞ ꠇꠞꠣꠞ ꠎꠥꠇꠣ ꠙꠥꠔꠞ ꠟꠣꠈꠣꠘ ꠀꠍꠟꠣ।
ꠅꠈꠘ ꠀꠝꠞꠣꠅ ꠎꠥꠖꠤ ꠎꠣꠞꠎꠤꠞ ꠖꠤꠟꠞ ꠀꠡꠣ ꠀꠞ ꠢꠤꠝ꠆ꠝꠔ ꠞꠣꠈꠤꠀ ꠝꠃꠔ ꠙꠞ꠆ꠎꠘ꠆ꠔ ꠇꠣꠁꠝ ꠞꠁ,
ꠔꠦ ꠖꠦꠈꠣ ꠎꠣꠁꠛ ꠎꠦꠘ,
ꠀꠝꠞꠣꠅ ꠀꠟ꠆ꠟꠣꠞ ꠊꠞ-ꠡꠋꠡꠣꠞꠞ ꠜꠣꠉꠤ ꠅꠁꠍꠤ।
ꠛꠦꠁꠝꠣꠘꠤꠞ ꠟꠣꠉꠤ ꠢꠥꠡꠤꠀꠞꠤ
৭ ꠄꠞꠟꠣꠉꠤꠃ ꠀꠟ꠆ꠟꠣꠞ ꠙꠣꠇ ꠞꠥꠢꠦ ꠛꠣꠔꠣꠁꠍꠂꠘ,
ꠀꠁꠎ ꠎꠥꠖꠤ ꠔꠥꠝꠞꠣ ꠔꠣꠘ ꠀꠅꠀꠎ ꠢꠥꠘꠅ,
৮ ꠔꠦ ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠟꠣꠈꠣꠘ,
ꠔꠥꠝꠞꠣꠞ ꠘꠤꠎꠞ ꠖꠤꠟꠞꠦ ꠙꠣꠡꠣꠘ ꠛꠣꠘꠣꠁꠅ ꠘꠣ।
ꠀꠟ꠆ꠟꠣꠄ ꠇꠁꠞꠣ,
ꠔꠣꠞꠣ ꠎꠦꠟꠣ ꠝꠞꠥꠜꠥꠝꠤꠞ ꠝꠣꠎꠦ,
ꠀꠝꠣꠞ ꠛꠤꠞꠥꠖ꠆ꠖꠦ ꠉꠤꠀ ꠀꠝꠣꠞꠦ ꠙꠞꠤꠇ꠆ꠇꠣ ꠇꠞꠍꠟꠣ,
ꠔꠥꠝꠞꠣ ꠁꠟꠣ ꠇꠞꠤꠅ ꠘꠣ।
৯ ꠔꠥꠝꠞꠣꠞ ꠛꠣꠚ-ꠖꠣꠖꠣꠁꠘ꠆ꠔꠦ ꠌꠣꠟ꠆ꠟꠤꠡ ꠛꠍꠞ ꠗꠞꠤ
ꠀꠝꠣꠞ ꠇꠥꠖꠞꠔꠤ ꠇꠣꠝ ꠖꠦꠈꠣꠞ ꠛꠣꠖꠦꠅ,
ꠢꠘꠅ ꠀꠝꠣꠞꠦ ꠙꠞꠤꠇ꠆ꠇꠣ ꠇꠞꠍꠂꠘ।
১০ ꠄꠞꠟꠣꠉꠤ ꠀꠝꠤ ꠔꠣꠞꠣꠞ ꠃꠙꠞꠦ ꠈꠥꠛ ꠛꠦꠎꠣꠞ ꠅꠁꠀ ꠇꠁꠟꠣꠝ,
ꠄꠞꠣꠞ ꠖꠤꠟ ꠔ ꠢꠣꠝꠦꠡꠣ ꠛꠦ-ꠙꠕꠦ ꠌꠇ꠆ꠇꠞ ꠖꠦꠞ,
ꠔꠣꠞꠣ ꠔ ꠀꠝꠣꠞ ꠙꠕ ꠌꠤꠘꠟ ꠘꠣ।
১১ ꠔꠦꠃ ꠀꠝꠤ ꠉꠥꠍꠣ ꠇꠞꠤꠀ ꠇꠍꠝ ꠈꠣꠁꠀ ꠇꠁꠍꠟꠣꠝ,
ꠀꠝꠣꠞ ꠖꠦꠅꠀ ꠢꠃ ꠀꠞꠣꠝꠞ ꠎꠣꠉꠣꠔ,
ꠄꠞꠣ ꠢꠣꠝꠣꠁꠔ ꠙꠣꠞꠔ ꠘꠣꠄ।
১২ ꠜꠣꠁꠀꠂꠘ ꠅꠇꠟ,
ꠢꠥꠡꠤꠀꠞ ꠅꠅ!
ꠔꠥꠝꠞꠣꠞ ꠖꠤꠟꠞ ꠝꠣꠎꠦ ꠎꠣꠘꠥ ꠘꠣꠚꠞꠝꠣꠘꠤ ꠀꠞ ꠛꠦꠁꠝꠣꠘꠤ ꠘꠣ ꠢꠣꠝꠣꠄ,
ꠁꠔꠣ ꠢꠣꠝꠣꠁ ꠉꠦꠟꠦ ꠎꠤꠘ꠆ꠖꠣ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠘꠤꠎꠞꠦ ꠖꠥꠞꠁ ꠢꠞꠣꠁꠟꠣꠄ।
১৩ ꠁꠔꠣꠞ ꠛꠖꠟꠣ ꠎꠔ ꠖꠤꠘꠞꠦ ꠀꠁꠎ ꠇꠁꠀ ꠒꠣꠇꠣ ꠅꠄ,
ꠅꠔ ꠖꠤꠘ ꠔꠥꠝꠞꠣ ꠄꠇꠦ-ꠅꠁꠘ꠆ꠘꠞꠦ ꠡꠣꠅꠡ ꠖꠦꠅ,
ꠎꠣꠔꠦ ꠇꠦꠃ ꠉꠥꠘꠣꠞ ꠚꠣꠘ꠆ꠖꠅ ꠙꠠꠤꠀ ꠘꠤꠎꠞ ꠖꠤꠟꠞꠦ ꠙꠣꠡꠣꠘ ꠘꠣ ꠛꠣꠘꠣꠄ।
১৪ ꠇꠣꠞꠘ ꠀꠝꠞꠣ ꠎꠥꠖꠤ ꠙꠄꠟꠣꠇꠥꠞ ꠟꠣꠈꠣꠘ ꠢꠦꠡ ꠙꠞ꠆ꠎꠘ꠆ꠔ ꠁꠝꠣꠘꠦ ꠝꠎꠛꠥꠔ ꠞꠁꠀ ꠌꠟꠤ,
ꠔꠦ ꠛꠥꠎꠣ ꠎꠣꠁꠛ ꠀꠝꠞꠣ ꠀꠟ-ꠝꠍꠤꠞ ꠟꠉꠦ ꠡꠞꠤꠇ ꠅꠁꠍꠤ।
১৫ ꠕꠥꠠꠣ ꠀꠉꠦ ꠛꠣꠔꠣꠁꠟ ꠅꠁꠍꠦ,
ꠀꠁꠎ ꠎꠥꠖꠤ ꠔꠥꠝꠞꠣ ꠔꠣꠘ ꠀꠅꠀꠎ ꠢꠥꠘꠅ,
ꠔꠦ ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠟꠣꠈꠣꠘ,
ꠔꠥꠝꠞꠣꠞ ꠘꠤꠎꠞ ꠖꠤꠟꠞꠦ ꠙꠣꠡꠣꠘ ꠛꠣꠘꠣꠁꠅ ꠘꠣ।
১৬ ꠀꠁꠌ꠆ꠍꠣ ꠇꠅ ꠌꠣꠁꠘ,
ꠀꠟ꠆ꠟꠣꠞ ꠘꠤꠎꠞ ꠎꠛꠣꠘꠞ ꠛꠥꠟꠤ ꠢꠥꠘꠣꠞ ꠛꠣꠖꠦꠅ ꠇꠦꠉꠤꠄ ꠔꠣꠘ ꠛꠤꠞꠥꠗꠤꠔꠣ ꠇꠞꠍꠤꠟ?
ꠄꠞꠣꠃ ꠘꠣꠄ ꠘꠤ,
ꠎꠦꠞꠣꠞꠦ ꠝꠥꠍꠣ ꠘꠛꠤꠄ ꠝꠤꠡꠞ ꠕꠣꠇꠤ ꠛꠣꠞ ꠇꠞꠤ ꠀꠘꠍꠤꠟꠣ?
১৭ ꠇꠅ ꠌꠣꠁꠘ,
ꠀꠟ꠆ꠟꠣꠄ ꠌꠣꠟ꠆ꠟꠤꠡ ꠛꠍꠞ ꠗꠞꠤ ꠇꠣꠞ ꠃꠙꠞꠦ ꠛꠦꠎꠣꠞ ꠀꠍꠟꠣ?
ꠄꠞꠣꠞ ꠃꠙꠞꠦꠃ ꠘꠣꠄ ꠘꠤ,
ꠎꠦꠞꠣ ꠉꠥꠘꠣ ꠇꠞꠍꠟꠣ ꠀꠞ ꠝꠞꠥꠜꠥꠝꠤꠞ ꠝꠣꠎꠦ ꠟꠣꠡ ꠅꠁꠀ ꠙꠠꠍꠟꠣ?
১৮ ꠀꠟ꠆ꠟꠣꠄ ꠇꠣꠞ ꠃꠙꠞꠦ ꠛꠦꠎꠣꠞ ꠅꠁꠀ ꠇꠍꠝ ꠈꠣꠁꠀ ꠇꠁꠍꠟꠣ,
‘ꠀꠝꠣꠞ ꠖꠦꠅꠀ ꠢꠃ ꠀꠞꠣꠝꠞ ꠎꠣꠉꠣꠔ ꠄꠞꠣ ꠢꠣꠝꠣꠁꠔ ꠙꠣꠞꠔ ꠘꠣꠄ’?
ꠅꠃ ꠄꠞꠣꠞ ꠃꠙꠞꠦꠃ ꠘꠣꠄ ꠘꠤ,
ꠎꠦꠞꠣ ꠔꠣꠘ ꠎꠛꠣꠘꠞ ꠛꠥꠟꠤ ꠢꠥꠘꠤꠀꠅ ꠘꠣꠚꠞꠝꠣꠘꠤ ꠇꠞꠍꠤꠟ?
১৯ ꠅꠔꠣ ꠕꠣꠇꠤꠃ ꠔ ꠀꠝꠞꠣ ꠛꠥꠎꠞꠣꠝ,
ꠁꠝꠣꠘ ꠘꠣ ꠀꠘꠣꠄ ꠔꠣꠞꠣ ꠀꠟ꠆ꠟꠣꠞ ꠖꠦꠅꠀ ꠢꠃ ꠀꠞꠣꠝꠞ ꠎꠣꠉꠣꠔ ꠢꠣꠝꠣꠁꠔ ꠙꠣꠞꠍꠦ ꠘꠣ।