ꠢꠎꠞꠔ ꠁꠍꠣꠞ ꠌꠤꠞꠇꠣꠟꠤꠘ ꠇꠥꠞꠛꠣꠘꠤ
১০
১ ꠡꠞꠤꠅꠔ ꠅꠁꠟꠉꠤ ꠈꠣꠟꠤ ꠄꠇ ꠘꠤꠡꠣꠘꠣ,
ꠁꠔꠣꠄ ꠜꠛꠤꠡꠔꠞ ꠘꠤꠀꠝꠔꠞ ꠇꠕꠣ ꠛꠣꠔꠣꠁ ꠖꠦꠄ,
ꠁꠔꠣ ꠔ ꠀꠍꠟ ꠇꠥꠘꠥ ꠛꠦꠙꠣꠞ ꠘꠣꠄ।
ꠄꠞꠟꠣꠉꠤꠃ ꠎꠦꠞꠣ ꠀꠟ꠆ꠟꠣꠞ ꠄꠛꠣꠖꠔ ꠇꠞꠣꠞ ꠈꠤꠀꠟꠤ ꠅꠄ,
ꠡꠞꠤꠅꠔꠞ ꠘꠤꠅꠝꠦ ꠔꠣꠞꠣ ꠛꠍꠞ ꠛꠍꠞ ꠄꠇꠁ ꠟꠣꠈꠣꠘ ꠇꠥꠞꠛꠣꠘꠤ ꠖꠤꠀ ꠔ ꠇꠥꠘꠥꠝꠘ꠆ꠔꠦꠃ ꠇꠣꠝꠤꠟ ꠅꠁꠔ ꠙꠣꠞꠦ ꠘꠣ।
২ ꠡꠞꠤꠅꠔꠦ ꠎꠥꠖꠤ ꠔꠣꠞꠣꠞꠦ ꠙꠥꠞꠣꠙꠥꠞ ꠇꠣꠝꠤꠟ ꠛꠣꠘꠣꠁꠟꠤꠔ,
ꠔꠦ ꠔ ꠙꠡꠥ ꠇꠥꠞꠛꠣꠘꠤ ꠖꠦꠅꠀ ꠄꠇꠛꠣꠞꠦꠃ ꠛꠘ꠆ꠖ ꠅꠁꠉꠦꠟ ꠅꠘꠦ।
ꠄꠛꠣꠖꠔ ꠇꠞꠞꠣ ꠅꠇꠟ ꠎꠥꠖꠤ ꠄꠇꠛꠣꠞꠦꠃ ꠙꠣꠇ-ꠍꠣꠚ ꠛꠘꠤꠎꠤꠔ,
ꠔꠦ ꠄꠞꠣ ꠘꠤꠎꠞꠦ ꠀꠞ ꠉꠥꠘꠣꠉꠣꠞ ꠝꠘꠅ ꠇꠞꠟ ꠘꠣ ꠅꠘꠦ।
৩ ꠅꠁꠟꠦ ꠅꠃ ꠙꠡꠥ ꠇꠥꠞꠛꠣꠘꠤꠄ ꠔꠣꠞꠣꠞꠦ ꠙꠞꠔꠦꠇ ꠛꠍꠞ ꠁꠀꠖ ꠇꠞꠣꠁꠀ ꠖꠦꠄ ꠎꠦꠘ,
ꠔꠣꠞꠣ ꠀꠍꠟꠦ ꠉꠥꠘꠣꠉꠣꠞ।
৪ ꠝꠥꠟꠔ,
ꠍꠣꠉꠟ ꠛꠣ ꠛꠤꠍꠣꠟꠞ ꠟꠃꠄ ꠝꠣꠘꠡꠞ ꠉꠥꠘꠣꠞꠦ ꠇꠥꠘꠥ ꠟꠣꠈꠣꠘꠃ ꠍꠣꠚ ꠇꠞꠔ ꠙꠣꠞꠦ ꠘꠣ।
৫ ꠄꠞꠟꠣꠉꠤꠃ ꠀꠟ-ꠝꠍꠤꠄ ꠖꠥꠘꠤꠀꠔ ꠔꠡꠞꠤꠚ ꠀꠘꠣꠞ ꠇꠣꠟꠅ ꠀꠟ꠆ꠟꠣꠞ ꠖꠞꠛꠣꠞꠅ ꠇꠁꠍꠂꠘ,
ꠙꠡꠥ ꠇꠥꠞꠛꠣꠘꠤ ꠛꠣ ꠖꠣꠘ-ꠍꠖꠉꠣ ꠔ ꠀꠍꠟꠦ ꠔꠥꠝꠤ ꠌꠣꠅ ꠘꠣ,
ꠅꠁꠟꠦ ꠀꠝꠣꠞꠦ ꠄꠇꠈꠣꠘ ꠇꠣꠄꠀ ꠖꠤꠍ ꠛꠤꠟꠣꠁ ꠖꠤꠛꠣꠞ ꠟꠣꠉꠤ।
৬ ꠎꠣꠟꠣꠁꠟ ꠇꠥꠞꠛꠣꠘꠤ ꠛꠣ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠄ
ꠔꠥꠝꠤ ꠔ ꠈꠥꠡꠤ ꠅꠁꠍ ꠘꠣ।
৭ ꠔꠦꠃ ꠀꠝꠤ ꠇꠁꠟꠣꠝ,
ꠅ ꠀꠟ꠆ꠟꠣ,
ꠖꠦꠈꠃꠇ꠆ꠇꠣ,
ꠀꠝꠤ ꠔ ꠅꠘꠅ ꠀꠁꠍꠤ;
ꠔꠥꠝꠣꠞ ꠇꠣꠟꠣꠝ ꠡꠞꠤꠚꠅ ꠎꠦꠟꠣ ꠀꠍꠦ,
ꠀꠝꠣꠞ ꠎꠘꠝ ꠅꠁꠛ ꠅꠃ ꠎꠉꠔꠅ,
ꠔꠥꠝꠣꠞ ꠝꠥꠘꠡꠣꠞꠦ ꠇꠣꠁꠝ ꠇꠞꠣꠞ ꠟꠣꠉꠤ,
ꠀꠞ ꠢꠣꠍꠣꠃ ꠀꠝꠤ ꠀꠁꠍꠤ।
৮ ꠃꠙꠞꠞ ꠀꠄꠀꠔ ꠅꠇꠟꠞ ꠝꠣꠎꠦ ꠀꠟ-ꠝꠍꠤꠄ ꠙꠄꠟꠣ ꠇꠁꠞꠣ,
“ꠙꠡꠥ ꠇꠥꠞꠛꠣꠘꠤ ꠛꠣ ꠖꠣꠘ-ꠍꠖꠉꠣ ꠔ ꠀꠍꠟꠦ ꠔꠥꠝꠤ ꠌꠣꠅ ꠘꠣ,
ꠎꠣꠟꠣꠁꠟ ꠇꠥꠞꠛꠣꠘꠤ ꠛꠣ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠄ ꠔꠥꠝꠤ ꠔ ꠈꠥꠡꠤ ꠅꠁꠍ ꠘꠣ।”
ꠡꠞꠤꠅꠔꠞ ꠢꠥꠇꠥꠝ ꠝꠣꠚꠤꠇ ꠅꠃ ꠇꠥꠞꠛꠣꠘꠤ ꠅꠇꠟ ꠀꠖꠣꠄ ꠇꠞꠣ ꠅꠁꠟꠦꠅ,
ꠀꠟ-ꠝꠍꠤꠄ ꠅꠟꠣ ꠇꠁꠟꠣ।
৯ ꠛꠣꠖꠞ ꠀꠄꠀꠔꠅ ꠔꠣꠁꠘ ꠢꠤꠞꠛꠣꠞ ꠇꠁꠟꠣ,
“ꠖꠦꠈꠃꠇ꠆ꠇꠣ,
ꠀꠝꠤ ꠔ ꠅꠘꠅ ꠀꠁꠍꠤ,
ꠔꠥꠝꠣꠞ ꠝꠥꠘꠡꠣꠞꠦ ꠇꠣꠁꠝ ꠇꠞꠣꠞ ꠟꠣꠉꠤ।”
ꠔꠦ ꠛꠥꠎꠣ ꠎꠣꠄ,
ꠖꠥꠍꠞꠣ ꠃꠍꠤꠟ꠆ꠟꠣꠞꠦ ꠇꠣꠁꠝ ꠇꠞꠣꠞ ꠘꠤꠅꠔꠦ,
ꠔꠣꠁꠘ ꠙꠄꠟꠣ ꠃꠍꠤꠟ꠆ꠟꠣꠞꠦ ꠛꠣꠔꠤꠟ ꠇꠞꠤꠟꠤꠟꠣ।
১০ ꠄꠞꠟꠣꠉꠤ ꠀꠟ꠆ꠟꠣ ꠙꠣꠇꠞ ꠢꠃ ꠝꠥꠘꠡꠣ ꠝꠣꠚꠤꠇ ꠁꠍꠣ ꠀꠟ-ꠝꠍꠤꠞ ꠇꠣꠄꠀꠞꠦ ꠈꠣꠟꠤ ꠄꠇꠛꠣꠞꠃ ꠇꠥꠞꠛꠣꠘꠤ ꠖꠦꠅꠀ ꠅꠁꠍꠤꠟ,
ꠅꠃ ꠇꠥꠞꠛꠣꠘꠤꠞ ꠛꠟꠦ ꠀꠟ꠆ꠟꠣꠞ ꠖꠞꠛꠣꠞꠅ ꠀꠝꠞꠣꠞꠦ ꠙꠣꠇ-ꠍꠣꠚ ꠇꠞꠣ ꠅꠁꠍꠦ।
১১ ꠙꠞꠔꠦꠇ ꠁꠝꠣꠝ ꠍꠣꠛꠦ ꠙꠞꠔꠤꠖꠤꠘ ꠀꠎꠤꠞ ꠅꠁꠀ ꠀꠟ꠆ꠟꠣꠞ ꠄꠛꠣꠖꠔꠤ ꠇꠞꠂꠘ ꠀꠞ ꠛꠣꠞꠦ ꠛꠣꠞꠦ ꠇꠥꠞꠛꠣꠘꠤ ꠀꠖꠣꠄ ꠇꠞꠂꠘ,
ꠔꠣ-ꠅ ꠅꠃ ꠟꠣꠈꠣꠘ ꠇꠥꠞꠛꠣꠘꠤꠄ ꠇꠥꠘꠥꠖꠤꠘꠃ ꠉꠥꠘꠣꠞꠦ ꠗꠁꠀ ꠍꠣꠚ ꠇꠞꠔ ꠙꠣꠞꠦ ꠘꠣ।
১২ ꠅꠁꠟꠦ ꠀꠟ-ꠝꠍꠤꠄ ꠔ ꠌꠤꠞꠇꠣꠟꠞ ꠉꠥꠘꠣꠞ ꠝꠣꠚꠤꠞ ꠟꠣꠉꠤ ꠈꠣꠟꠤ ꠄꠇꠛꠣꠞꠃ ꠇꠥꠞꠛꠣꠘꠤ ꠅꠁꠀ,
ꠀꠞꠡꠦ-ꠀꠎꠤꠝꠅ ꠀꠟ꠆ꠟꠣꠞ ꠒꠣꠁꠘꠞ ꠔꠈ꠆ꠔꠅ ꠔꠡꠞꠤꠚ ꠞꠣꠈꠍꠂꠘ।
১৩ ꠀꠞ ꠢꠃ ꠡꠝꠄ ꠕꠣꠇꠤ ꠔꠣꠁꠘ ꠛꠣꠞ ꠌꠣꠁꠞꠣ,
ꠎꠔꠖꠤꠘ ꠙꠞ꠆ꠎꠘ꠆ꠔ ꠔꠣꠘ ꠖꠥꠡꠝꠘ ꠅꠇꠟꠞꠦ ꠔꠣꠘ ꠙꠣꠅꠞ ꠔꠟꠣꠔ ꠚꠣꠟꠣꠁꠀ ꠌꠥꠞꠝꠣꠞ ꠇꠞꠣ ꠘꠣ ꠅꠄ,
ꠅꠔꠖꠤꠘ ꠛꠣꠞ ꠌꠣꠁꠛꠣ।
১৪ ꠇꠣꠞꠘ ꠔꠣꠘ ꠅꠃ ꠄꠇꠛꠣꠞꠞ ꠇꠥꠞꠛꠣꠘꠤꠞ ꠃꠍꠤꠟ꠆ꠟꠣꠄ ꠎꠦꠞꠣꠞꠦ ꠙꠣꠇ-ꠍꠣꠚ ꠇꠞꠣ ꠅꠁꠍꠦ,
ꠄꠞꠣꠞꠦ ꠌꠤꠞꠇꠣꠟꠞ ꠟꠣꠉꠤꠃ ꠔꠣꠁꠘ ꠙꠥꠞꠣꠙꠥꠞ ꠇꠣꠝꠤꠟ ꠇꠞꠍꠂꠘ।
১৫ ꠅꠃ ꠛꠦꠙꠣꠞꠦ ꠀꠟ꠆ꠟꠣꠞ ꠙꠣꠇ ꠞꠥꠢꠦꠅ ꠀꠝꠞꠣꠞ ꠉꠦꠍꠦ ꠡꠣꠇ꠆ꠇꠤ ꠖꠤꠞꠣ,
ꠔꠣꠁꠘ ꠙꠄꠟꠣ ꠇꠁꠍꠂꠘ,
১৬ ꠀꠝꠤ ꠝꠣꠛꠥꠖꠦ ꠇꠁꠞꠣꠝ,
ꠁ ꠎꠝꠣꠘꠣꠞ ꠛꠣꠖꠦ ꠀꠝꠤ ꠛꠘꠤ ꠁꠍꠞꠣꠁꠟꠞ ꠟꠉꠦ,
ꠀꠝꠣꠞ ꠘꠄꠀ ꠅꠃ ꠃꠍꠤꠟ꠆ꠟꠣ ꠇꠣꠁꠝ ꠇꠞꠝꠥ,
ꠀꠝꠣꠞ ꠡꠞꠤꠅꠔ ꠔꠣꠞꠣꠞ ꠖꠤꠟꠞ ꠝꠣꠎꠦ ꠖꠤꠝꠥ,
ꠔꠣꠞꠣꠞ ꠅꠘ꠆ꠔꠞꠞ ꠝꠣꠎꠦ ꠀꠝꠤ ꠟꠦꠈꠤꠀ ꠖꠤꠝꠥ।
১৭ ꠛꠣꠖꠦ ꠢꠤꠞꠛꠣꠞ ꠇꠁꠞꠣ,
ꠀꠝꠤ ꠔꠣꠞꠣꠞ ꠘꠣꠚꠞꠝꠣꠘꠤ ꠀꠞ ꠉꠥꠘꠣꠞꠦ
ꠀꠞ ꠇꠥꠘꠥꠖꠤꠘꠃ ꠝꠘꠅ ꠞꠣꠈꠔꠣꠝ ꠘꠣꠄ।
১৮ ꠔꠦ ꠛꠥꠎꠞꠣꠄ ꠘꠤ,
ꠀꠟ꠆ꠟꠣꠄ ꠎꠦꠛꠟꠣ ꠉꠥꠘꠣ ꠀꠞ ꠘꠣꠚꠞꠝꠣꠘꠤꠞꠦ ꠝꠣꠚꠤ ꠖꠤꠟꠣꠁꠘ,
ꠄꠞꠛꠣꠖꠦ ꠔ ꠉꠥꠘꠣꠞ ꠟꠣꠉꠤ ꠇꠥꠘꠥꠎꠣꠔ ꠇꠥꠞꠛꠣꠘꠤꠞꠃ ꠎꠞꠥꠞ ꠘꠣꠁ।
ꠁꠝꠣꠘꠦ ꠝꠎꠛꠥꠔ ꠞꠅꠀꠞ ꠙꠞꠣꠝꠤꠡ
১৯ ꠄꠞꠟꠣꠉꠤꠃ ꠅ ꠜꠣꠁ ꠅꠇꠟ,
ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠟꠃꠞ ꠎꠞꠤꠀꠄ,
ꠀꠝꠞꠣ ꠛꠦꠢꠦꠡ꠆ꠔꠤ ꠈꠣꠍ ꠙꠣꠇ ꠎꠣꠉꠣꠔ ꠢꠣꠝꠣꠘꠤꠞ ꠡꠣꠅꠡ ꠙꠣꠁꠍꠤ।
২০ ꠀꠟ-ꠝꠍꠤꠄ ꠀꠝꠞꠣꠞ ꠟꠣꠉꠤ ꠘꠄꠀ ꠀꠞ ꠎꠤꠘ꠆ꠖꠣ ꠄꠇ ꠔꠞꠤꠇꠣ ꠈꠥꠟꠍꠂꠘ,
ꠔꠣꠘ ꠡꠞꠤꠟ ꠇꠥꠞꠛꠣꠘꠤꠞ ꠃꠍꠤꠟ꠆ꠟꠣꠄ ꠀꠝꠞꠣ ꠎꠣꠘꠥ ꠈꠣꠍ ꠙꠣꠇ ꠎꠣꠉꠣꠞ ꠖꠥꠀꠞꠞ ꠙꠞ꠆ꠖꠣ ꠙꠣꠞꠅꠁꠀ,
ꠀꠟ꠆ꠟꠣꠞ ꠍꠣꠝꠘꠦ ꠀꠎꠤꠞ ꠅꠁꠔꠣꠝ ꠙꠣꠞꠤ।
২১ ꠔꠦ ꠀꠝꠞꠣꠞ ꠄꠇꠎꠘ ꠙꠞꠗꠣꠘ ꠁꠝꠣꠝꠅ ꠀꠍꠂꠘ,
ꠀꠟ꠆ꠟꠣꠞ ꠙꠞꠤꠛꠣꠞꠞ ꠔꠣꠝꠣꠝ ꠝꠣꠘꠡꠞ ꠎꠤꠝ꠆ꠝꠣ ꠔ ꠔꠣꠘ ꠀꠔꠅ ꠖꠦꠅꠀ ꠅꠁꠍꠦ।
২২ ꠄꠞꠟꠣꠉꠤ ꠀꠅ,
ꠁꠝꠣꠘꠞ ꠝꠣꠎꠖꠤ ꠀꠝꠞꠣ ꠙꠥꠞꠣꠙꠥꠞ ꠘꠤꠌ꠆ꠌꠤꠔ ꠛꠘꠤꠀ ꠈꠣꠐꠤ ꠖꠤꠟꠦ ꠀꠟ꠆ꠟꠣꠞ ꠖꠞꠛꠣꠞꠅ ꠀꠎꠤ ꠅꠁ;
ꠇꠣꠞꠘ ꠖꠥꠡꠤ ꠛꠤꠛꠦꠇꠞ ꠀꠔ ꠕꠣꠇꠤ ꠀꠝꠞꠣꠞ ꠖꠤꠟꠞꠦ ꠀꠟ-ꠝꠍꠤꠞ ꠟꠃꠄ ꠙꠣꠇ-ꠍꠣꠚ ꠛꠣꠘꠣꠁꠍꠦ,
ꠀꠞ ꠙꠞꠤꠡ꠆ꠇꠣꠞ ꠙꠣꠘꠤ ꠖꠤꠀ ꠀꠝꠞꠣꠞꠦ ꠘꠣꠅꠀꠁꠟ ꠅꠁꠍꠦ।
২৩ ꠝꠥꠝꠤꠘ ꠢꠤꠡꠣꠛꠦ ꠀꠝꠞꠣꠞ ꠖꠤꠟꠅ ꠎꠦ ꠜꠞꠡꠣ ꠀꠍꠦ ꠇꠁꠀ ꠡ꠆ꠛꠤꠇꠣꠞ ꠇꠞꠤ,
ꠀꠅ,
ꠅꠃ ꠜꠞꠡꠣꠄ ꠙꠥꠞꠣꠙꠥꠞ ꠝꠎꠛꠥꠔ ꠞꠁꠀ ꠔꠣꠘ ꠔꠞꠤꠇꠣꠄ ꠌꠟꠤ,
ꠇꠣꠞꠘ ꠎꠦꠁꠘ ꠅꠀꠖꠣ ꠇꠞꠍꠂꠘ ꠄꠁꠘ ꠔ ꠡꠥꠟ꠆ꠟꠀꠘꠣ ꠢꠇ-ꠢꠣꠟꠣꠟꠤ।
২৪ ꠀꠝꠞꠣ ꠄꠇꠦ-ꠅꠁꠘ꠆ꠘꠞ ꠟꠣꠉꠤ ꠈꠤꠀꠟ ꠇꠞꠤ,
ꠝꠢꠛ꠆ꠛꠔ ꠀꠞ ꠘꠦꠇ ꠇꠣꠝ ꠇꠞꠣꠞ ꠟꠣꠉꠤ ꠄꠇꠦ-ꠅꠁꠘ꠆ꠘꠞꠦ ꠡꠣꠅꠡ-ꠙꠞꠣꠝꠤꠡ ꠖꠦꠁ।
২৫ ꠇꠥꠘꠥ ꠇꠥꠘꠥ ꠎꠘꠞ ꠡ꠆ꠛꠜꠣꠛ ꠅꠁꠟ,
ꠔꠣꠞꠣ ꠎꠝꠣꠔꠅ ꠀꠁꠀ ꠡꠞꠤꠇ ꠅꠄ ꠘꠣ,
ꠅꠁꠟꠦ ꠀꠝꠞꠣ ꠎꠣꠘꠥ ꠅꠃ ꠟꠣꠈꠣꠘ ꠘꠣ ꠅꠁ।
ꠀꠟ-ꠝꠍꠤꠄ ꠖꠥꠍꠞꠣꠛꠣꠞ ꠔꠡꠞꠤꠚ ꠀꠘꠣꠞ ꠅꠇ꠆ꠔ ꠎꠔ ꠊꠘꠣꠁꠀ ꠀꠁꠅꠞ,
ꠀꠝꠞꠣ ꠅꠔ ꠛꠦꠡꠤ ꠇꠞꠤ ꠄꠇꠦ-ꠅꠁꠘ꠆ꠘꠞꠦ ꠡꠣꠅꠡ-ꠙꠞꠣꠝꠤꠡ ꠖꠦꠅꠀꠔ ꠞꠁ।
২৬ ꠀꠟ꠆ꠟꠣ ꠙꠣꠇꠞ ꠢꠇ ꠔꠞꠤꠇꠣ ꠎꠣꠘꠣꠞ ꠛꠣꠖꠦꠅ ꠎꠥꠖꠤ ꠀꠝꠞꠣ ꠎꠣꠘꠤꠀ-ꠢꠥꠘꠤꠀ ꠉꠥꠘꠣ ꠇꠞꠣꠔ ꠞꠁ,
ꠔꠦ ꠁ ꠉꠥꠘꠣꠞ ꠇꠚꠞꠣꠞ ꠟꠣꠉꠤ ꠇꠥꠘꠥꠎꠣꠔꠞ ꠇꠥꠞꠛꠣꠘꠤ ꠘꠣꠁ।
২৭ ꠀꠍꠦ ꠈꠣꠟꠤ ꠢꠣꠡꠞꠞ ꠝꠄꠖꠣꠘꠅ ꠇꠑꠤꠘ ꠛꠤꠌꠣꠞꠞ ꠟꠣꠉꠤ ꠒꠞꠣꠁ ꠒꠞꠣꠁ ꠛꠣꠞ ꠌꠣꠅꠀ,
ꠀꠞ ꠀꠟ꠆ꠟꠣꠞ ꠖꠥꠡꠝꠘ ꠅꠇꠟꠞꠦ ꠎꠣꠟꠣꠁꠀ ꠍꠣꠟꠤ ꠇꠞꠣꠞ ꠉꠎꠛꠞ ꠒꠞ।
২৮ ꠇꠥꠘꠥ ꠎꠘꠦ ꠝꠥꠍꠣꠞ ꠡꠞꠤꠅꠔꠞ ꠢꠥꠇꠥꠝ-ꠀꠢꠇꠣꠝꠞ ꠛꠞꠈꠦꠟꠣꠚ ꠇꠞꠟꠦ,
ꠄꠞꠦ ꠇꠥꠘꠥ ꠝꠣꠄꠀ-ꠝꠝꠔꠣ ꠘꠣ ꠇꠞꠤꠀ ꠖꠥꠁ ꠛꠣ ꠔꠤꠘꠎꠘꠞ ꠡꠣꠇ꠆ꠇꠤ ꠟꠁꠀ ꠇꠣꠔꠟ ꠇꠞꠤꠟꠔꠦ ꠅꠄ।
২৯ ꠔꠦ ꠌꠤꠘ꠆ꠔꠣ ꠇꠞꠃꠇ꠆ꠇꠣ,
ꠎꠦ ꠎꠘꠦ ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣꠞꠦ ꠊꠤꠘ ꠇꠞꠦ,
ꠢꠦ ꠀꠞꠅ ꠇꠔ ꠛꠠ ꠀꠎꠣꠛꠞ ꠜꠣꠉꠤ ꠅꠁꠍꠦ!
ꠎꠦ ꠟꠃꠞ ꠃꠍꠤꠟ꠆ꠟꠣꠄ ꠢꠦ ꠙꠣꠇ-ꠍꠣꠚ ꠅꠁꠍꠦ,
ꠀꠟ꠆ꠟꠣꠁ ꠢꠃ ꠃꠍꠤꠟ꠆ꠟꠣꠞ ꠟꠃꠞꠦ ꠢꠦ ꠄꠟꠣꠝꠤ ꠇꠞꠍꠦ,
ꠀꠞ ꠎꠦ ꠙꠣꠇ ꠞꠥꠢꠦ ꠞꠢꠝꠔ ꠛꠈꠡꠤꠀ ꠖꠦꠁꠘ,
ꠢꠃ ꠞꠥꠢꠞꠦꠅ ꠛꠦꠁꠎ꠆ꠎꠔ ꠇꠞꠍꠦ।
৩০ ꠀꠍꠟꠦ ꠀꠝꠞꠣ ꠔ ꠔꠣꠘꠞꠦ ꠌꠤꠘꠤꠃ,
ꠎꠦꠁꠘ ꠚꠞꠝꠣꠁꠍꠂꠘ,
ꠛꠖꠟꠣ ꠟꠅꠀ ꠀꠝꠣꠞ ꠇꠣꠝ,
ꠀꠝꠤ ꠙꠞꠔꠦꠇ ꠎꠘꠞ ꠀꠝꠟꠞ ꠛꠖꠟꠣ ꠖꠤꠝꠥ।
ꠀꠞꠇ ꠀꠄꠀꠔꠅ ꠔꠣꠁꠘ ꠇꠁꠍꠂꠘ,
ꠝꠣꠛꠥꠖꠦ ꠔꠣꠘ ꠛꠘ꠆ꠖꠣ ꠅꠇꠟꠞ ꠛꠤꠌꠣꠞ ꠇꠞꠛꠣ।
৩১ ꠛꠥꠎꠞꠣꠄ ꠘꠤ,
ꠎꠤꠘ꠆ꠖꠣ ꠀꠟ꠆ꠟꠣꠞ ꠍꠣꠝꠘꠦ ꠀꠎꠤꠞꠣ ꠖꠦꠅꠀ ꠇꠔ ꠛꠠ ꠝꠍꠤꠛꠔꠞ ꠛꠦꠙꠣꠞ!
৩২ ꠔꠥꠝꠞꠣ ꠢꠃ ꠖꠤꠘꠞ ꠇꠕꠣ ꠁꠀꠖ ꠇꠞꠅ,
ꠎꠦꠛꠟꠣ ꠁꠍꠣꠞ ꠔꠞꠤꠇꠣꠞ ꠘꠥꠞꠞ ꠙꠕ ꠙꠣꠁꠀ ꠢꠣꠞꠤ,
ꠛꠃꠔ ꠘꠝꠥꠘꠣꠞ ꠎꠥꠟꠥꠝ-ꠝꠍꠤꠛꠔꠞ ꠝꠣꠎꠦꠅ ꠝꠎꠛꠥꠔ ꠞꠁꠍꠟꠣꠄ।
৩৩ ꠇꠥꠘꠥ ꠇꠥꠘꠥ ꠡꠝꠄ ꠡꠝꠣꠎꠞ ꠍꠣꠝꠘꠦ ꠛꠦꠁꠎ꠆ꠎꠔꠤ,
ꠎꠥꠟꠥꠝ-ꠐꠤꠐꠇꠣꠞꠤ,
ꠐꠣꠐ꠆ꠐꠣ-ꠝꠡꠇꠞꠣ ꠢꠥꠘꠤꠀꠅ ꠔꠥꠝꠞꠣ ꠘꠤꠎꠦ ꠇꠡ꠆ꠐ ꠡꠁꠎ꠆ꠎ ꠇꠞꠍꠟꠣꠄ।
ꠀꠞ ꠇꠥꠘꠥ ꠇꠥꠘꠥ ꠡꠝꠄ ꠅꠁꠘ꠆ꠘꠞ ꠃꠙꠞꠦ ꠅꠃ ꠟꠣꠈꠣꠘ ꠇꠡ꠆ꠐ ꠀꠁꠍꠦ ꠢꠥꠘꠤꠀ,
ꠔꠣꠞꠣꠞ ꠟꠉꠦ ꠔꠥꠝꠞꠣꠅ ꠖꠥꠈꠤꠔ ꠅꠁꠍꠟꠣꠄ।
৩৪ ꠔꠥꠝꠞꠣꠞ ꠝꠣꠎꠞ ꠎꠦꠞꠣ ꠎꠦꠟ ꠈꠣꠐꠤꠍꠟꠣ,
ꠔꠣꠞꠣꠞ ꠖꠥꠈꠦ ꠔꠥꠝꠞꠣꠅ ꠖꠥꠈꠤ ꠅꠁꠍꠟꠣꠄ।
ꠔꠥꠝꠞꠣꠞ ꠗꠘ-ꠍꠣꠝꠣꠘꠣ ꠟꠥꠐ-ꠙꠣꠐ ꠇꠞꠣ ꠅꠁꠟꠦꠅ ꠈꠥꠡꠤ ꠀꠍꠟꠣꠄ,
ꠀꠍꠟꠦ ꠛꠥꠎꠔꠣꠄ ꠙꠣꠞꠍꠟꠣꠄ,
ꠔꠥꠝꠞꠣꠞ ꠟꠣꠉꠤ ꠀꠞꠅ ꠛꠃꠔ ꠜꠣꠟꠣ ꠜꠣꠟꠣ ꠍꠣꠝꠣꠘꠣ ꠎꠝꠣ ꠀꠍꠦ,
ꠎꠦ ꠍꠣꠝꠣꠘꠣ ꠌꠤꠞꠇꠣꠟ ꠞꠁꠛ।
৩৫ ꠔꠦ ꠅꠈꠘ ꠔꠥꠝꠞꠣꠞ ꠢꠤ ꠝꠘꠅꠛꠟ ꠈꠥꠀꠁꠅ ꠘꠣ,
ꠄꠞ ꠝꠣꠎꠦ ꠔ ꠛꠃꠔ ꠖꠣꠝꠤ ꠙꠥꠞꠥꠡ꠆ꠇꠣꠞ ꠀꠍꠦ।
৩৬ ꠔꠥꠝꠞꠣ ꠝꠎꠛꠥꠔ ꠞꠅꠀ ꠖꠞꠇꠣꠞ,
ꠎꠣꠔꠦ ꠀꠟ꠆ꠟꠣꠄ ꠎꠦ ꠙꠥꠞꠥꠡ꠆ꠇꠣꠞ ꠖꠤꠛꠣ ꠇꠞꠤ ꠅꠀꠖꠣ ꠇꠞꠍꠂꠘ,
ꠔꠣꠘ ꠝꠞ꠆ꠎꠤ ꠝꠣꠚꠤꠇ ꠌꠟꠤꠀ ꠔꠥꠝꠞꠣꠅ ꠢꠃ ꠙꠥꠞꠥꠡ꠆ꠇꠣꠞ ꠙꠣꠅ।
৩৭ ꠀꠟ꠆ꠟꠣꠄ ꠔ ꠇꠁꠍꠂꠘ,
ꠀꠞ ꠕꠥꠠꠣ ꠇꠄꠈꠣꠘ ꠖꠤꠘ ꠛꠣꠇꠤ ꠀꠍꠦ,
ꠎꠦꠁꠘ ꠔꠡꠞꠤꠚ ꠀꠘꠣꠞ ꠇꠕꠣ,
ꠔꠣꠁꠘ ꠔꠡꠞꠤꠚ ꠀꠘꠤꠟꠤꠛꠣ,
ꠛꠦꠡꠤ ꠖꠦꠞꠤ ꠇꠞꠔꠣ ꠘꠣꠄ।
৩৮ ꠀꠝꠣꠞ ꠖꠤꠘꠖꠣꠞ ꠛꠘ꠆ꠖꠣꠄ,
ꠁꠝꠣꠘꠞ ꠛꠟꠦꠃ ꠀꠈꠦꠞ ꠙꠣꠁꠛ,
ꠅꠁꠟꠦ ꠇꠦꠃ ꠈꠞꠦꠖꠤ ꠙꠤꠍꠟꠤ ꠉꠦꠟꠦ ꠔꠣꠞ ꠃꠙꠞꠦ ꠀꠝꠤ ꠈꠥꠡꠤ ꠞꠁꠔꠣꠝ ꠘꠣꠄ।
৩৯ ꠅꠁꠟꠦ ꠀꠝꠞꠣ ꠔ ꠈꠞꠦꠖꠤ ꠙꠤꠍꠟꠤꠀ ꠛꠤꠘꠣꠡ ꠅꠀꠞ ꠝꠣꠘꠥꠡ ꠘꠣꠄ,
ꠎꠦꠞꠣ ꠁꠝꠣꠘ ꠀꠘꠤꠀ ꠘꠣꠎꠣꠔ ꠢꠣꠍꠤꠟ ꠇꠞꠦ,
ꠀꠝꠞꠣ ꠅꠁꠟꠣꠝ ꠢꠃ ꠖꠟꠞ ꠝꠣꠘꠥꠡ।