ꠡꠄꠔꠣꠘ ꠖꠣꠘꠛꠞ ꠟꠉꠦ ꠀꠟ꠆ꠟꠣꠞ ꠈꠣꠍ ꠛꠘ꠆ꠖꠣꠞ ꠎꠥꠖ꠆ꠖ (১২:১-১৪:৫)
ꠢꠃ ꠛꠦꠐꠤ ꠀꠞ ꠖꠂꠔ꠆ꠔ-ꠖꠣꠘꠛ
১২
১ ꠛꠣꠖꠦ ꠀꠍꠝꠣꠘꠞ ꠝꠣꠎꠦ ꠄꠇ ꠇꠥꠖꠞꠔꠤ ꠇꠣꠞꠛꠣꠞ ꠖꠦꠈꠣ ꠉꠦꠟ,
ꠄꠇꠎꠘ ꠛꠦꠐꠤ ꠝꠣꠘꠥꠡ ꠀꠍꠂꠘ,
ꠔꠣꠘ ꠚꠤꠘ꠆ꠘꠅ ꠀꠍꠤꠟ ꠡꠥꠞꠥꠎ ꠀꠞ ꠙꠣꠅꠞ ꠔꠟꠦ ꠌꠣꠘ꠆ꠖ,
ꠄꠘ ꠝꠣꠕꠣꠔ ꠀꠍꠦ ꠛꠣꠞꠅꠐꠣ ꠔꠦꠞꠣ ꠖꠤꠀ ꠉꠣꠕꠣ ꠄꠇꠐꠣ ꠔꠣꠎ।
২ ꠛꠦꠐꠤꠞ ꠊꠞꠅ ꠢꠥꠞꠥꠔ꠆ꠔꠣ ꠅꠁꠔꠣ,
ꠄꠞꠟꠣꠉꠤ ꠢꠥꠞꠥꠔ꠆ꠔꠣ ꠅꠀꠞ ꠛꠦꠖꠘꠣꠄ ꠛꠦꠐꠤꠄ ꠈꠣꠟꠤ ꠌꠤꠟ꠆ꠟꠣꠁꠞꠣ।
৩ ꠄꠞꠛꠣꠖꠦ ꠀꠍꠝꠣꠘꠅ ꠀꠞꠇ ꠇꠣꠞꠛꠣꠞ ꠖꠦꠈꠣ ꠉꠦꠟ,
ꠀꠉꠥꠘꠤꠞ ꠟꠣꠈꠣꠘ ꠟꠣꠟ ꠄꠇ ꠛꠤꠞꠣꠐ ꠖꠣꠘꠛ।
ꠔꠣꠞ ꠡꠣꠔꠐꠣ ꠝꠣꠕꠣ ꠀꠞ ꠖꠡꠐꠣ ꠢꠤꠋ,
ꠡꠣꠔꠅ ꠝꠣꠕꠣꠔ ꠡꠣꠔꠐꠣ ꠔꠣꠎ ꠟꠣꠉꠣꠁꠟ।
৪ ꠔꠣꠞ ꠟꠦꠁꠘ꠆ꠎꠥꠠꠖꠤ ꠛꠣꠠꠤꠀꠁꠀ ꠀꠍꠝꠣꠘꠞ ꠔꠤꠘ ꠛꠣꠐꠞ ꠄꠇ ꠛꠣꠐ ꠔꠦꠞꠣꠞꠦ ꠖꠥꠘꠤꠀꠔ ꠚꠣꠟꠣꠁ ꠖꠤꠟ।
ꠀꠞ ꠎꠦ ꠛꠦꠐꠤꠞ ꠊꠞꠅ ꠢꠥꠞꠥꠔ꠆ꠔꠣ ꠅꠁꠔꠣ,
ꠅꠃ ꠖꠣꠘꠛ ꠀꠁꠀ ꠛꠦꠐꠤꠞ ꠍꠣꠝꠘꠦ ꠅꠃ ꠘꠝꠥꠘꠣꠄ ꠃꠛꠣꠔ ꠀꠍꠤꠟ ꠎꠦꠘ,
ꠛꠦꠐꠤꠞ ꠊꠞꠅ ꠢꠥꠞꠥꠔ꠆ꠔꠣ ꠅꠁꠔꠦꠃ ꠢꠦ ꠈꠣꠁꠟꠤꠔ।
৫ ꠛꠦꠐꠤꠞ ꠊꠞꠅ ꠄꠇ ꠙꠥꠀ ꠙꠄꠖꠣ ꠅꠁꠟ,
ꠅꠃ ꠙꠥꠀꠄ ꠢꠇ꠆ꠇꠟ ꠎꠣꠔꠤꠞꠦ ꠟꠥꠀꠞ ꠟꠣꠑꠤ ꠖꠤꠀ ꠡꠣꠡꠘ ꠇꠞꠛꠣ।
ꠅꠃ ꠢꠥꠞꠥꠔ꠆ꠔꠣꠞꠦ ꠀꠟ꠆ꠟꠣ ꠀꠞ ꠔꠣꠘ ꠔꠈ꠆ꠔꠞ ꠉꠦꠍꠦ ꠌꠥ ꠝꠣꠞꠤ ꠔꠥꠟꠤꠀ ꠘꠦꠅꠀ ꠅꠁꠟ।
৬ ꠀꠞ ꠅꠃ ꠛꠦꠐꠤ ꠝꠣꠘꠥꠡ ꠝꠞꠥꠜꠥꠝꠤꠞ ꠛꠣꠄ ꠜꠣꠉꠤꠀ ꠉꠦꠟꠣꠉꠤ।
ꠀꠟ꠆ꠟꠣꠄ ꠢꠤ ꠝꠞꠥꠜꠥꠝꠤꠞ ꠝꠣꠎꠦ ꠛꠦꠐꠤꠞ ꠟꠣꠉꠤ ꠄꠇꠈꠣꠘ ꠎꠣꠉꠣ ꠎꠥꠁꠔ ꠇꠞꠍꠤꠟꠣ,
ꠄꠁꠘ ꠢꠘꠅ ꠄꠇ ꠀꠎꠣꠞ ꠖꠥꠁꠡ ꠡꠣꠁꠐ ꠖꠤꠘ ꠟꠣꠟꠘ-ꠙꠣꠟꠘ ꠙꠣꠁꠛꠣ।
৭ ꠛꠣꠖꠦ ꠛꠦꠢꠦꠡ꠆ꠔꠅ ꠎꠥꠖ꠆ꠖ ꠟꠣꠉꠤꠉꠦꠟ।
ꠚꠤꠞꠤꠡ꠆ꠔꠣ ꠝꠤꠇꠣꠁꠟ ꠀꠞ ꠔꠣꠘ ꠅꠗꠤꠘꠞ ꠚꠤꠞꠤꠡ꠆ꠔꠣ ꠅꠇꠟꠦ ꠢꠃ ꠖꠣꠘꠛꠞ ꠟꠉꠦ ꠟꠣꠠꠣꠁ ꠇꠞꠟꠣ,
ꠀꠞ ꠢꠃ ꠖꠣꠘꠛꠦꠅ ꠔꠣꠞ ꠌꠦꠟꠣ-ꠌꠣꠝꠌꠣꠞꠦ ꠟꠁꠀ ꠄꠞꠣꠞ ꠟꠉꠦ ꠟꠣꠠꠣꠁ ꠇꠞꠟ।
৮ ꠟꠣꠠꠣꠁꠔ ꠢꠤ ꠖꠣꠘꠛ ꠀꠞꠤꠉꠦꠟ,
ꠀꠞ ꠔꠣꠞꠣꠞꠦ ꠛꠦꠢꠦꠡ꠆ꠔ ꠕꠣꠇꠤ ꠛꠣꠞ ꠇꠞꠤ ꠖꠦꠅꠀ ꠅꠁꠟ।
৯ ꠢꠃ ꠖꠣꠘꠛꠞꠦ ꠀꠞ ꠔꠣꠞ ꠌꠦꠟꠣ-ꠌꠣꠝꠌꠣ ꠅꠇꠟꠞꠦ ꠖꠥꠘꠤꠀꠔ ꠚꠣꠟꠣꠁ ꠖꠦꠅꠀ ꠅꠁꠟ।
ꠅꠃ ꠖꠣꠘꠛ ꠅꠁꠟ ꠢꠃ ꠙꠥꠞꠣꠘꠣ ꠢꠣꠚ,
ꠎꠦꠉꠥꠞ ꠘꠣꠝ ꠁꠛꠟꠤꠍ-ꠡꠄꠔꠣꠘ,
ꠢꠦ ꠖꠥꠘꠤꠀꠞ ꠢꠇꠟ ꠝꠣꠘꠡꠞꠦ ꠛꠦ-ꠙꠕꠤ ꠛꠣꠘꠣꠄ।
১০ ꠛꠣꠖꠦ ꠀꠝꠤ ꠢꠥꠘꠟꠣꠝ,
ꠛꠦꠢꠦꠡ꠆ꠔ ꠕꠣꠇꠤ ꠄꠇꠎꠘꠦ ꠎꠥꠞꠦ ꠎꠥꠞꠦ ꠇꠁꠞꠣ,
“ꠅꠈꠘ ꠔ ꠀꠝꠞꠣꠞ ꠀꠟ꠆ꠟꠣꠞ ꠘꠣꠎꠣꠔ,
ꠔꠣꠘ ꠛꠟ-ꠡꠇ꠆ꠔꠤ,
ꠔꠣꠘ ꠛꠣꠖꠡꠣꠁ ꠀꠞ ꠔꠣꠘ ꠝꠍꠤꠞ ꠈꠦꠝꠔꠣ ꠀꠎꠤꠞ ꠅꠁꠉꠦꠍꠦ।
ꠇꠣꠞꠘ ꠎꠦꠉꠤꠄ ꠀꠝꠞꠣꠞ ꠜꠣꠁꠀꠂꠘ꠆ꠔꠞꠦ ꠖꠥꠡꠤ ꠛꠣꠘꠣꠁꠔ,
ꠔꠣꠞꠦ ꠔ ꠛꠦꠢꠦꠡ꠆ꠔ ꠕꠣꠇꠤ ꠚꠣꠟꠣꠁ ꠖꠦꠅꠀ ꠅꠁꠍꠦ।
ꠢꠦ ꠖꠤꠘ-ꠞꠣꠁꠔ ꠢꠣꠝꠦꠡꠣ ꠀꠝꠞꠣꠞ ꠀꠟ꠆ꠟꠣꠞ ꠉꠦꠍꠦ ꠔꠣꠞꠣꠞ ꠘꠣꠝꠦ ꠘꠣꠟꠤꠡ ꠖꠤꠔ।
১১ ꠝꠦꠠꠣꠞ ꠛꠣꠁꠌ꠆ꠌꠣꠞ ꠟꠃ ꠀꠞ ꠎꠣꠞꠎꠤꠞ ꠔꠛꠟꠤꠉꠤ ꠎꠛꠣꠘꠛꠘ꠆ꠖꠤꠞ ꠛꠟꠦ ꠔꠣꠞꠣ ꠁꠛꠟꠤꠍꠞꠦ ꠀꠞꠣꠁꠍꠂꠘ।
ꠔꠣꠞꠣ ꠘꠤꠎꠞ ꠇꠣꠄꠀꠞꠦ ꠛꠦꠡꠤ ꠝꠣꠄꠀ ꠘꠣ ꠇꠞꠤꠀ,
ꠎꠣꠘ ꠖꠤꠔꠦꠅ ꠎꠥꠁꠔ ꠀꠍꠟꠣ।
১২ “ꠄꠞꠟꠣꠉꠤꠃ ꠅ ꠛꠦꠢꠦꠡ꠆ꠔ,
ꠔꠥꠝꠤ ꠈꠥꠡꠤ ꠇꠞꠅ।
ꠔꠥꠝꠞꠣ ꠎꠦꠞꠣ ꠛꠦꠢꠦꠡ꠆ꠔꠛꠣꠡꠤ,
ꠔꠥꠝꠞꠣꠅ ꠚꠥꠞ꠆ꠔꠤ ꠇꠞꠅ।
ꠅꠁꠟꠦ ꠀꠚꠍꠥꠍ ꠖꠥꠘꠤꠀ ꠀꠞ ꠖꠞꠤꠀꠞ ꠟꠣꠉꠤ,
ꠁꠛꠟꠤꠍ ꠔ ꠔꠣꠞꠣꠞ ꠉꠦꠍꠦ ꠟꠣꠝꠤꠉꠦꠍꠦ।
ꠢꠦ ꠉꠥꠍꠣꠄ ꠚꠥꠡ-ꠙꠣꠇ ꠇꠞꠦꠞ,
ꠢꠦ ꠔ ꠎꠣꠘꠦꠃ,
ꠔꠣꠞ ꠡꠝꠄ ꠀꠞ ꠛꠦꠡꠤ ꠘꠣꠁ।”
১৩ ꠢꠃ ꠖꠣꠘꠛꠦ ꠎꠦꠛꠟꠣ ꠖꠦꠈꠟ ꠔꠣꠞꠦ ꠖꠥꠘꠤꠀꠔ ꠚꠣꠟꠣꠁ ꠖꠦꠅꠀ ꠅꠁꠍꠦ,
ꠖꠦꠈꠤꠀ ꠢꠃ ꠎꠦ ꠛꠦꠐꠤꠞ ꠊꠞꠅ ꠙꠥꠀ ꠙꠄꠖꠣ ꠅꠁꠍꠤꠟ,
ꠢꠦ ꠅꠃ ꠛꠦꠐꠤꠞ ꠈꠞꠦ ꠟꠣꠉꠟ।
১৪ ꠄꠞꠟꠣꠉꠤ ꠅꠃ ꠛꠦꠐꠤꠞꠦ ꠈꠥꠛ ꠛꠠ ꠄꠇ ꠌꠤꠟ ꠙꠣꠈꠤꠞ ꠖꠥꠈꠣꠘ ꠒꠣꠈꠘꠣ ꠖꠦꠅꠀ ꠅꠁꠟ,
ꠛꠦꠐꠤꠄ ꠅꠃ ꠒꠣꠈꠘꠣꠖꠤ ꠃꠠꠣꠟ ꠖꠤꠀ ꠝꠞꠥꠜꠥꠝꠤꠔ ꠘꠤꠎꠞ ꠎꠣꠉꠣꠔ ꠎꠣꠁꠔꠣ ꠙꠣꠞꠛꠣ।
ꠢꠘꠅ ꠢꠃ ꠖꠣꠘꠛ-ꠢꠣꠚꠞ ꠌꠃꠈꠞ ꠀꠅꠠꠦ ꠡꠣꠠꠦ ꠔꠤꠘ ꠛꠍꠞ ꠔꠣꠘꠞꠦ ꠟꠣꠟꠘ-ꠙꠣꠟꠘ ꠇꠞꠣ ꠅꠁꠛ।
১৫ ꠔꠦꠃ ꠢꠤ ꠢꠣꠚꠦ ꠔꠣꠞ ꠝꠥꠈ ꠕꠣꠇꠤ ꠙꠣꠘꠤ ꠛꠣꠞ ꠇꠞꠤꠀ ꠄꠇ ꠉꠣꠋ ꠛꠣꠘꠣꠁꠟꠤꠟ,
ꠉꠣꠋꠉꠞ ꠚꠥꠔꠦ ꠛꠦꠐꠤꠞꠦ ꠜꠣꠡꠣꠁ ꠘꠤꠔꠉꠤ ꠇꠞꠤ।
১৬ ꠅꠁꠟꠦ ꠖꠥꠘꠤꠀꠄ ꠛꠦꠐꠤꠞꠦ ꠡꠣꠁꠎ꠆ꠎ ꠇꠞꠟ,
ꠁ ꠢꠣꠚꠦ ꠎꠦ ꠙꠣꠘꠤ ꠛꠣꠞ ꠇꠞꠟ,
ꠖꠥꠘꠤꠀꠄ ꠝꠣꠐꠤꠄ ꠀ ꠇꠞꠤꠀ ꠁ ꠙꠣꠘꠤꠞꠦ ꠈꠣꠁꠟꠤꠟ।
১৭ ꠄꠞꠟꠣꠉꠤ ꠁ ꠖꠣꠘꠛ-ꠢꠣꠚꠦ ꠛꠦꠐꠤꠞ ꠛꠣꠄ ꠀꠞꠅ ꠛꠦꠡꠤ ꠉꠥꠍꠣ ꠇꠞꠟ,
ꠢꠦ ꠛꠦꠐꠤꠞ ꠅꠁꠘ꠆ꠘ ꠀꠅꠟꠣꠖ ꠅꠇꠟꠞꠦ,
ꠝꠣꠘꠤ ꠎꠦꠞꠣ ꠀꠟ꠆ꠟꠣꠞ ꠢꠥꠇꠥꠝꠦ ꠌꠟꠦ ꠀꠞ ꠢꠎꠞꠔ ꠁꠍꠣꠞ ꠙꠇ꠆ꠇꠦ ꠎꠛꠣꠘꠛꠘ꠆ꠖꠤ ꠖꠦꠄ,
ꠔꠣꠞꠣꠞ ꠟꠉꠦ ꠎꠥꠖ꠆ꠖ ꠇꠞꠣꠔ ꠉꠦꠟ।
১৮ ꠉꠤꠀ ꠢꠦ ꠖꠞꠤꠀꠞ ꠌꠞꠞ ꠛꠣꠟꠥꠞ ꠃꠙꠞꠦ ꠃꠛꠣꠁ ꠞꠁꠟ।