ꠖꠥꠁꠎꠘ ꠡꠣꠇ꠆ꠇꠤ
১১
১ ꠛꠣꠖꠦ ꠝꠣꠙꠤꠛꠣꠞ ꠟꠣꠉꠤ ꠟꠣꠑꠤꠞ ꠟꠣꠈꠣꠘ ꠄꠇꠐꠣ ꠘꠟ ꠀꠝꠣꠞ ꠀꠔꠅ ꠖꠦꠅꠀ ꠅꠁꠟ,
ꠀꠞ ꠄꠇꠎꠘꠦ ꠇꠁꠟꠣ,
“ꠢꠥꠘꠅ,
ꠙꠛꠤꠔ꠆ꠞ ꠛꠣꠄꠔꠥꠟ-ꠝꠥꠇꠣꠖ꠆ꠖꠍ ꠇꠣꠛꠣ ꠡꠞꠤꠚ ꠀꠞ ꠇꠥꠞꠛꠣꠘꠤ ꠈꠣꠘꠣꠞꠦ ꠝꠣꠙꠅ।
ꠝꠣꠙꠤꠀ ꠢꠘꠅ ꠎꠦꠞꠣ ꠄꠛꠣꠖꠔ ꠇꠞꠦ ꠔꠣꠞꠣꠞ ꠙꠞꠤꠝꠣꠘ ꠉꠘꠅ।
২ ꠅꠁꠟꠦ ꠅꠃ ꠇꠣꠛꠣ ꠊꠞꠞ ꠃꠑꠣꠘꠞꠦ ꠝꠣꠙꠤꠅ ꠘꠣ,
ꠁꠈꠣꠘ ꠛꠣꠖ ꠖꠦꠅ,
ꠁꠈꠣꠘ ꠔ ꠛꠤꠗꠞ꠆ꠝꠤ ꠅꠇꠟꠞꠦ ꠖꠦꠅꠀ ꠅꠁꠍꠦ।
ꠔꠣꠞꠣ ꠛꠦꠀꠟ꠆ꠟꠤꠡ ꠝꠣꠡ ꠗꠞꠤ ꠁ ꠙꠛꠤꠔ꠆ꠞ ꠎꠣꠉꠣꠈꠣꠘꠞꠦ ꠙꠣꠅꠖꠤ ꠇꠌꠟꠣꠁꠛ।
৩ ꠀꠞ ꠀꠝꠤ ꠀꠝꠣꠞ ꠖꠥꠁꠎꠘ ꠡꠣꠇ꠆ꠇꠤꠞꠦ ꠅꠟꠣ ꠈꠦꠝꠔꠣ ꠖꠤꠝꠥ,
ꠁ ꠈꠦꠝꠔꠣ ꠙꠣꠁꠀ ꠄꠞꠣ ꠇꠣꠔꠞ ꠅꠁꠀ ꠍꠟꠣꠞ ꠌꠐ ꠚꠤꠘ꠆ꠖꠤꠀ,
ꠄꠇ ꠀꠎꠣꠞ ꠖꠥꠁꠡ ꠡꠣꠁꠐ ꠖꠤꠘ ꠘꠛꠤꠞ ꠟꠣꠈꠣꠘ ꠅꠢꠤ ꠛꠣꠔꠣꠁꠛꠣ।”
৪ ꠄꠞꠣ ꠅꠁꠟꠣ ꠢꠃ ꠎꠄꠔꠥꠘ ꠉꠣꠍ ꠎꠥꠠꠣ,
ꠀꠞ ꠢꠃ ꠌꠦꠞꠣꠉꠖꠣꠘꠤ ꠎꠥꠠꠣ,
ꠔꠣꠞꠣ ꠔ ꠖꠤꠘ-ꠖꠥꠘꠤꠀꠞ ꠝꠣꠟꠤꠇꠞ ꠍꠣꠝꠘꠦ ꠃꠛꠣꠔ ꠀꠍꠂꠘ।
৫ ꠇꠦꠃ ꠔꠣꠞꠣꠞ ꠈꠦꠔꠤ ꠇꠞꠔꠦ ꠌꠣꠁꠟꠦ,
ꠔꠣꠞꠣꠞ ꠝꠥꠈ ꠕꠣꠇꠤ ꠀꠉꠥꠁꠘ ꠛꠣꠞꠅꠁꠀ ꠢꠤ ꠖꠥꠡꠝꠘ ꠅꠇꠟꠞꠦ ꠎꠣꠟꠣꠁꠟꠤꠛ।
ꠎꠦꠇꠥꠘꠥ ꠎꠘꠦ ꠔꠣꠞꠣꠞ ꠈꠦꠔꠤ ꠇꠞꠣꠔ ꠟꠣꠉꠟꠦ ꠅꠃ ꠖꠡꠣꠄ ꠝꠃꠔ ꠅꠁꠛ।
৬ ꠄꠞꠣ ꠎꠔꠖꠤꠘ ꠘꠛꠤ ꠢꠣꠟꠔꠦ ꠅꠢꠤ ꠛꠣꠔꠣꠁꠛꠣ,
ꠅꠔ ꠖꠤꠘ ꠎꠣꠔꠦ ꠇꠥꠘꠥ ꠝꠦꠊ ꠘꠣ ꠅꠄ ꠄꠞꠟꠣꠉꠤ ꠀꠍꠝꠣꠘꠞ ꠖꠥꠀꠞ ꠛꠘ꠆ꠖ ꠇꠞꠤ ꠖꠤꠛꠣꠞ ꠈꠦꠝꠔꠣ ꠔꠣꠞꠣꠞ ꠀꠍꠦ।
ꠙꠣꠘꠤꠞꠦ ꠟꠃ ꠛꠣꠘꠣꠘꠤ,
ꠀꠞ ꠎꠔꠛꠣꠞ ꠈꠥꠡꠤ ꠅꠔꠛꠣꠞ ꠎꠦꠇꠥꠘꠥ ꠉꠎꠛ ꠓꠣꠟꠤꠀ ꠎꠉꠔꠞ ꠈꠦꠔꠤ ꠇꠞꠣꠞ ꠈꠦꠝꠔꠣꠅ ꠔꠣꠞꠣꠞ ꠀꠍꠦ।
৭ ꠔꠣꠞꠣꠞ ꠎꠛꠣꠘꠛꠘ꠆ꠖꠤ ꠖꠦꠅꠀ ꠡꠦꠡ ꠅꠁꠉꠦꠟꠦ ꠢꠣꠛꠤꠀ ꠖꠥꠎꠈ ꠕꠣꠇꠤ ꠢꠃ ꠎꠣꠘꠥꠀꠞ ꠃꠑꠤꠀ ꠀꠁꠀ ꠔꠣꠞꠣꠞ ꠟꠉꠦ ꠟꠣꠠꠣꠁ ꠇꠞꠤꠀ,
ꠔꠣꠞꠣꠞꠦ ꠀꠞꠣꠁꠀ ꠈꠥꠘ ꠇꠞꠛ।
৮ ꠀꠞ ꠔꠣꠞꠣꠞ ꠟꠣꠡ ꠢꠃ ꠝꠢꠣꠘ ꠐꠣꠃꠘꠞ ꠞꠣꠡ꠆ꠔꠣꠞ ꠝꠣꠎꠦ ꠙꠠꠤ ꠞꠁꠛ,
ꠎꠦ ꠐꠣꠃꠘꠅ ꠔꠣꠞꠣꠞ ꠝꠣꠟꠤꠇꠞꠦ ꠍꠟꠤꠛꠞ ꠃꠙꠞꠦ ꠟꠐꠇꠣꠁꠀ ꠈꠥꠘ ꠇꠞꠣ ꠅꠁꠍꠤꠟ।
ꠁ ꠐꠣꠃꠘꠞ ꠘꠣꠝ ꠑꠤꠇ ꠍꠣꠖꠥꠝ ꠛꠣ ꠝꠤꠡꠞ ꠘꠣ ꠅꠁꠟꠦꠅ ꠄꠇꠁ ꠟꠣꠈꠣꠘꠃ ꠈꠣꠞꠣꠙ।
৯-১০ ꠢꠃ ꠡꠝꠄ ꠢꠇꠟ ꠖꠦꠡ,
ꠈꠣꠘ꠆ꠖꠣꠘ,
ꠢꠇꠟ ꠎꠣꠔꠞ ꠛꠥꠟꠤꠄ ꠝꠣꠔꠞꠣ ꠝꠣꠘꠡꠦ ꠀꠞ ꠢꠇꠟ ꠎꠣꠔꠤꠞ ꠝꠣꠘꠡꠦ ꠡꠣꠠꠦ ꠔꠤꠘ ꠖꠤꠘ ꠗꠞꠤ ꠅꠃ ꠟꠣꠡꠉꠥꠁꠘ ꠖꠦꠈꠛꠣ।
ꠀꠞ ꠄꠞꠣ ꠝꠣꠞꠣ ꠉꠦꠍꠂꠘ ꠇꠞꠤ ꠎꠉꠔꠞ ꠖꠥꠘꠤꠀꠛꠤ ꠝꠣꠘꠡꠦ ꠈꠥꠡꠤꠄ ꠚꠥꠞ꠆ꠔꠤ-ꠀꠝꠥꠖ ꠇꠞꠛꠣ,
ꠄꠇꠦ-ꠅꠁꠘ꠆ꠘꠞꠦ ꠃꠙꠢꠣꠞ ꠖꠤꠛꠣ।
ꠀꠞ ꠁ ꠟꠣꠡ ꠖꠣꠚꠘ ꠇꠞꠣꠞ ꠙꠣꠞꠝꠤꠡꠘ ꠖꠤꠔꠣ ꠘꠣꠄ,
ꠇꠣꠞꠘ ꠅꠃ ꠖꠥꠁꠅ ꠘꠛꠤꠞ ꠟꠣꠉꠤ ꠖꠥꠘꠤꠀꠖꠣꠞꠤ ꠝꠣꠘꠡꠞ ꠇꠡ꠆ꠐ ꠅꠁꠍꠤꠟ।
১১ ꠛꠣꠖꠦ ꠢꠃ ꠡꠣꠠꠦ ꠔꠤꠘ ꠖꠤꠘ ꠙꠣꠞꠁꠀ ꠢꠣꠞꠟꠦ ꠀꠟ꠆ꠟꠣꠞ ꠖꠦꠅꠀ ꠎꠣꠘ ꠄꠞꠣꠞ ꠜꠤꠔꠞꠦ ꠢꠣꠝꠣꠁꠟ,
ꠔꠦꠃ ꠄꠞꠣ ꠙꠣꠅꠅ ꠜꠞꠖꠤ ꠃꠛꠣꠁꠟꠣ।
ꠀꠞ ꠎꠔ ꠎꠘꠦ ꠄꠞꠣꠞꠦ ꠖꠦꠈꠟꠣ,
ꠢꠇꠟꠦꠃ ꠒꠞꠣꠁꠀ ꠇꠣꠙꠤꠟꠣ।
১২ ꠛꠣꠖꠦ ꠄꠞꠣ ꠢꠥꠘꠟꠣ,
ꠛꠦꠢꠦꠡ꠆ꠔ ꠕꠣꠇꠤ ꠒꠣꠇꠤꠀ ꠎꠥꠞꠦ ꠎꠥꠞꠦ ꠇꠅꠀ ꠅꠞ,
“ꠔꠥꠝꠞꠣ ꠅꠘꠅ ꠃꠑꠤꠀ ꠀꠁꠅ।”
ꠔꠦꠃ ꠄꠞꠣ ꠘꠤꠎꠞ ꠖꠥꠡꠝꠘꠞ ꠍꠣꠝꠘꠦ ꠄꠇ ꠝꠦꠊꠞ ꠌꠣꠇꠣꠔ ꠅꠁꠀ ꠛꠦꠢꠦꠡ꠆ꠔꠅ ꠉꠦꠟꠣꠉꠤ।
১৩ ꠅꠃ ꠡꠝꠄ ꠈꠥꠛ ꠛꠠ ꠜꠂꠍꠣꠟ ꠅꠁꠟ,
ꠀꠞ ꠢꠤ ꠐꠣꠃꠘꠞ ꠖꠡ ꠛꠣꠐꠞ ꠄꠇ ꠛꠣꠐ ꠜꠣꠋꠉꠤ ꠉꠦꠟ।
ꠜꠂꠍꠣꠟꠦ ꠡꠣꠔ ꠀꠎꠣꠞ ꠝꠣꠘꠥꠡ ꠝꠞꠟꠣ।
ꠁꠔꠣ ꠖꠦꠈꠤꠀ ꠛꠣꠖ-ꠛꠣꠇꠤ ꠢꠇꠟꠦ ꠒꠞꠣꠁꠀ ꠛꠦꠢꠦꠡ꠆ꠔꠞ ꠀꠟ꠆ꠟꠣꠞ ꠔꠣꠞꠤꠚ ꠇꠞꠣꠔ ꠟꠣꠉꠟꠣ।
১৪ ꠅꠃ ꠘꠝꠥꠘꠣꠄ ꠖꠥꠍꠞꠣ ꠉꠎꠛ ꠙꠣꠞꠅꠁꠟ,
ꠅꠁꠟꠦ ꠢꠥꠘꠅ,
ꠔꠤꠘ ꠘꠝ꠆ꠛꠞ ꠉꠎꠛ ꠈꠥꠛ ꠎꠟꠖꠤ ꠀꠁꠀ ꠀꠎꠤꠛ।
ꠡꠣꠔ ꠘꠝ꠆ꠛꠞ ꠡꠤꠋꠉꠣ ꠚꠥꠇꠤꠟꠣ
১৫ ꠛꠣꠖꠦ ꠡꠣꠔ ꠘꠝ꠆ꠛꠞ ꠚꠤꠞꠤꠡ꠆ꠔꠣꠄ ꠔꠣꠘ ꠡꠤꠋꠉꠣ ꠚꠥꠇꠤꠟꠣ।
ꠔꠦꠃ ꠛꠦꠢꠦꠡ꠆ꠔꠞ ꠝꠣꠎꠦ ꠎꠥꠞꠦ ꠎꠥꠞꠦ ꠄꠟꠣꠘ ꠇꠞꠣ ꠅꠁꠟ,
“ꠅꠈꠘ ꠔ ꠖꠥꠘꠤꠀꠞ ꠛꠣꠖꠡꠣꠁ ꠀꠝꠞꠣꠞ ꠝꠣꠛꠥꠖ ꠀꠞ ꠔꠣꠘ ꠝꠍꠤꠞ ꠢꠥꠇꠥꠝꠅ ꠀꠁꠍꠦ।
ꠔꠣꠁꠘ ꠎꠥꠉ ꠎꠥꠉ ꠗꠞꠤ ꠌꠤꠞꠇꠣꠟ ꠛꠣꠖꠡꠣꠁ ꠇꠞꠛꠣ।”
১৬ ꠛꠣꠖꠦ ꠢꠃ ꠌꠛ꠆ꠛꠤꠡꠎꠘ ꠝꠥꠞꠛ꠆ꠛꠤ ꠘꠦꠔꠣ,
ꠎꠦꠞꠣ ꠀꠟ꠆ꠟꠣꠞ ꠍꠣꠝꠘꠦ ꠎꠣꠞꠎꠤꠞ ꠔꠈ꠆ꠔꠅ ꠛꠅꠀꠔ ꠀꠍꠟꠣ,
ꠄꠞꠣ ꠀꠟ꠆ꠟꠣꠞꠦ ꠍꠁꠎꠖꠣ ꠇꠞꠤꠀ ꠇꠁꠟꠣ,
১৭ “ꠅ ꠡꠞꠛ-ꠡꠇ꠆ꠔꠤꠝꠣꠘ ꠝꠣꠛꠥꠖ ꠀꠟ꠆ꠟꠣ,
ꠔꠥꠝꠤ ꠀꠉꠦꠅ ꠀꠍꠟꠣꠄ ꠀꠞ ꠅꠈꠘꠅ ꠀꠍ।
ꠀꠝꠞꠣ ꠔꠥꠝꠣꠞ ꠡꠥꠇꠥꠞ-ꠉꠥꠎꠣꠞ ꠇꠞꠞꠣꠝ,
ꠔꠥꠝꠤ ꠔ ꠔꠥꠝꠣꠞ ꠝꠢꠣ ꠈꠦꠝꠔꠣ ꠀꠔꠅ ꠟꠁꠀ ꠅꠈꠘ ꠛꠣꠖꠡꠣꠁ ꠇꠞꠞꠣꠄ।
১৮ ꠢꠇ꠆ꠇꠟ ꠎꠣꠔꠤꠄ ꠉꠥꠍꠣ ꠇꠞꠤꠀ ꠌꠤꠟ꠆ꠟꠣꠁꠍꠦ,
ꠔꠦ ꠅꠈꠘ ꠔꠥꠝꠣꠞ ꠉꠎꠛ ꠓꠣꠟꠤꠛꠣꠞ ꠡꠝꠄ ꠅꠁꠉꠦꠍꠦ।
ꠝꠥꠞ꠆ꠖꠣ ꠅꠇꠟꠞ ꠛꠤꠌꠣꠞꠞ ꠡꠝꠄ ꠀꠁꠍꠦ,
ꠀꠞ ꠔꠥꠝꠣꠞ ꠀꠙꠘ ꠉꠥꠟꠣꠝ ꠘꠛꠤ ꠅꠇꠟꠞ,
ꠔꠥꠝꠣꠞ ꠙꠣꠇ ꠛꠘ꠆ꠖꠣ ꠅꠇꠟꠞ,
ꠢꠥꠞꠥ-ꠛꠠ ꠎꠔꠎꠘꠦ ꠔꠥꠝꠣꠞꠦ ꠒꠞꠣꠁꠘ,
ꠔꠣꠞꠣꠞꠦ ꠙꠥꠞꠥꠡ꠆ꠇꠣꠞ ꠖꠤꠛꠣꠞ ꠡꠝꠄ ꠀꠁꠍꠦ।
ꠀꠞ ꠎꠦꠞꠣ ꠖꠥꠘꠤꠀꠞ ꠈꠦꠔꠤ ꠇꠞꠍꠦ,
ꠔꠣꠞꠣꠞꠦ ꠛꠤꠘꠣꠡ ꠇꠞꠣꠞ ꠡꠝꠄꠅ ꠀꠁꠍꠦ।”
১৯ ꠛꠣꠖꠦ ꠀꠟ꠆ꠟꠣꠞ ꠛꠦꠢꠦꠡ꠆ꠔꠞ ꠄꠛꠣꠖꠔ ꠈꠣꠘꠣꠞ ꠖꠥꠀꠞ ꠈꠥꠟꠣ ꠅꠁꠟ,
ꠀꠞ ꠄꠞ ꠜꠤꠔꠞꠦ ꠀꠟ꠆ꠟꠣꠁ ꠡꠣꠢꠣꠖꠔ ꠡꠘ꠆ꠖꠥꠇ ꠖꠦꠈꠣ ꠉꠦꠟ।
ꠅꠃ ꠡꠝꠄ ꠝꠦꠊꠞ ꠎꠤꠟꠇꠣꠘꠤ,
ꠉꠥꠠ-ꠉꠥꠠꠤ ꠒꠣꠇ,
ꠑꠣꠐꠣ ꠙꠠꠣ,
ꠜꠂꠍꠣꠟ ꠀꠞ ꠈꠥꠛ ꠛꠦꠡꠤ ꠢꠤꠟ-ꠝꠦꠊ ꠅꠁꠟ।