ꠘꠣꠝꠇꠞꠣ ꠛꠣꠛꠤꠟ ꠐꠣꠃꠘꠞ ꠛꠤꠘꠣꠡ
১৮
১ ꠁꠔꠣꠞ ꠛꠣꠖꠦ ꠀꠝꠤ ꠀꠞꠇ ꠎꠘ ꠚꠤꠞꠤꠡ꠆ꠔꠣꠞꠦ ꠖꠦꠈꠟꠣꠝ,
ꠔꠣꠁꠘ ꠛꠦꠢꠦꠡ꠆ꠔ ꠕꠣꠇꠤ ꠟꠣꠝꠤꠀ ꠀꠁꠞꠣ।
ꠔꠣꠘ ꠛꠃꠔ ꠛꠠ ꠈꠦꠝꠔꠣ ꠀꠍꠦ,
ꠔꠣꠘ ꠝꠢꠤꠝꠣꠞ ꠛꠟꠦ ꠀꠡ꠆ꠔꠣ ꠖꠥꠘꠤꠀꠄ ꠏꠟꠝꠟ ꠇꠞꠟ।
২ ꠔꠣꠁꠘ ꠎꠥꠞꠦ ꠎꠥꠞꠦ ꠇꠁꠟꠣ,
“ꠛꠤꠘꠣꠡ ꠅꠁꠉꠦꠍꠦ,
ꠛꠤꠘꠣꠡ ꠅꠁꠉꠦꠍꠦ,
ꠢꠃ ꠘꠣꠝꠇꠞꠣ ꠛꠣꠛꠤꠟ ꠐꠣꠃꠘ।
ꠁꠈꠣꠘ ꠅꠈꠘ ꠜꠥꠔꠞ ꠀꠈꠠꠣ ꠅꠁꠍꠦ,
ꠢꠇ꠆ꠇꠟ ꠘꠝꠥꠘꠣꠞ ꠜꠥꠔ-ꠚꠦꠞꠔꠞ ꠀꠈꠠꠣ,
ꠘꠣꠙꠣꠇ ꠀꠞ ꠎꠉꠁꠘ꠆ꠘ ꠙꠣꠈꠤꠘ꠆ꠔꠞ ꠛꠡꠔ ꠈꠣꠘꠣ ꠅꠁꠍꠦ।
৩ ꠇꠣꠞꠘ ꠁꠈꠣꠘꠦ ꠔꠣꠁꠞ ꠎꠤꠘꠣꠞ ꠇꠣꠝꠞ ꠛꠦꠎꠥꠁꠔꠣ ꠘꠤꠡꠣ-ꠙꠣꠘꠤ ꠖꠥꠘꠤꠀꠞ ꠢꠇꠟ ꠎꠣꠔꠤꠞꠦ ꠈꠣꠛꠣꠁꠍꠦ।
ꠎꠉꠔꠞ ꠞꠣꠎꠣ ꠅꠇꠟꠦ ꠔꠣꠁꠞ ꠟꠉꠦ ꠎꠤꠘꠣ ꠇꠞꠍꠦ,
ꠎꠉꠔꠞ ꠛꠦꠙꠣꠞꠤ ꠡꠖꠣꠉꠞ ꠅꠇꠟꠦ ꠅꠈꠣꠘꠞ ꠔꠣꠟꠦ ꠔꠣꠟꠦ ꠟꠣꠉꠣꠝ-ꠍꠣꠠꠣ ꠘꠤꠡꠣꠄ ꠗꠘꠤ ꠛꠘꠍꠦ।”
৪ ꠛꠣꠖꠦ ꠀꠝꠤ ꠢꠥꠘꠟꠣꠝ,
ꠛꠦꠢꠦꠡ꠆ꠔ ꠕꠣꠇꠤ ꠀꠞꠇ ꠎꠘꠦ ꠇꠁꠞꠣ,
“ꠅ ꠀꠝꠣꠞ ꠛꠘ꠆ꠖꠣ ꠅꠇꠟ,
ꠔꠥꠝꠞꠣ ꠛꠣꠛꠤꠟ ꠐꠣꠃꠘ ꠕꠣꠇꠤ ꠛꠣꠞꠅꠁꠀ ꠀꠅ,
ꠎꠣꠔꠦ ꠔꠥꠝꠞꠣ ꠔꠣꠁꠞ ꠉꠥꠘꠣꠞ ꠜꠣꠉꠤ ꠘꠣ ꠅꠅ।
ꠀꠞ ꠔꠣꠁꠞ ꠃꠙꠞꠦ ꠎꠦꠔꠣ ꠉꠎꠛ ꠘꠣꠎꠤꠟ ꠅꠁꠛ,
ꠁꠔꠣ ꠉꠎꠛꠦ ꠔꠥꠝꠞꠣꠞꠦ ꠘꠣ ꠙꠣꠄ।
৫ ꠔꠣꠁꠞ ꠉꠥꠘꠣ ꠉꠤꠀ ꠔ ꠀꠍꠝꠣꠘꠅ ꠟꠣꠉꠤꠉꠦꠍꠦ,
ꠔꠣꠁꠞ ꠘꠣꠚꠞꠝꠣꠘꠤꠞ ꠛꠣꠄ ꠀꠟ꠆ꠟꠣꠄ ꠈꠤꠀꠟ ꠇꠞꠍꠂꠘ।
৬ ꠅꠁꠘ꠆ꠘ ꠎꠘꠞ ꠟꠉꠦ ꠔꠣꠁ ꠎꠦꠟꠣ ꠇꠞꠍꠦ,
ꠔꠥꠝꠞꠣꠅ ꠔꠣꠁꠞ ꠟꠉꠦ ꠅꠟꠣ ꠇꠞꠅ,
ꠔꠣꠁꠞ ꠇꠣꠝꠞ ꠙꠥꠞꠣꠙꠥꠞ ꠙꠣꠅꠘꠣ ꠔꠣꠁꠞꠦ ꠖꠦꠅ।
ꠎꠦ ꠙꠤꠀꠟꠣꠞ ꠝꠣꠎꠦ ꠔꠣꠁ ꠅꠁꠘ꠆ꠘꠞ ꠟꠣꠉꠤ ꠘꠣꠚꠞꠝꠣꠘꠤ ꠉꠥꠟꠣꠁꠔ,
ꠅꠃ ꠙꠤꠀꠟꠣꠔ ꠔꠣꠁꠞ ꠙꠥꠞꠣꠙꠥꠞ ꠡꠣꠎꠣ,
ꠡꠥꠟ꠆ꠟꠀꠘꠣ ꠡꠣꠎꠣ ꠉꠥꠟꠤꠀ ꠔꠣꠁꠞꠦ ꠈꠣꠛꠣꠅ।
৭ ꠔꠣꠁ ꠘꠤꠎꠞꠦ ꠟꠁꠀ ꠎꠔꠈꠣꠘ ꠛꠠꠣꠁ ꠇꠞꠍꠦ,
ꠎꠔ ꠛꠦꠡꠤ ꠛꠤꠟꠣꠡꠤꠔꠣꠞ ꠝꠣꠎꠦ ꠎꠤꠘ꠆ꠖꠦꠉꠤ ꠇꠣꠐꠣꠁꠍꠦ,
ꠑꠤꠇ ꠅꠔꠈꠣꠘ ꠎꠘꠔ꠆ꠞꠘꠣ ꠀꠞ ꠖꠥꠈ ꠔꠣꠁꠞꠦ ꠖꠦꠅ।
ꠔꠣꠁ ꠔ ꠝꠘꠦ ꠝꠘꠦ ꠇꠄ,
ꠀꠝꠤ ꠇꠥꠘꠥ ꠠꠣꠠꠤ ꠛꠦꠐꠤ ꠘꠤ?
ꠀꠝꠤ ꠔ ꠞꠣꠘꠤꠞ ꠀꠡꠘꠅ ꠛꠁꠍꠤ,
ꠀꠝꠤ ꠇꠥꠘꠥꠝꠘ꠆ꠔꠦꠃ ꠖꠥꠈ-ꠝꠍꠤꠛꠔꠅ ꠙꠠꠔꠣꠝ ꠘꠣꠄ।
৮ ꠄꠞꠟꠣꠉꠤ ꠔꠣꠁꠞ ꠃꠙꠞꠦ ꠄꠇꠖꠤꠘꠦꠃ ꠢꠇꠟ ꠉꠎꠛ ꠙꠠꠛ।
ꠁ ꠉꠎꠛ ꠅꠁꠟ,
ꠝꠃꠔ,
ꠛꠤꠟꠣꠙ-ꠀꠢꠣꠎꠣꠞꠤ,
ꠀꠞ ꠘꠤꠖꠣꠘ।
ꠔꠣꠁꠞꠦ ꠀꠉꠥꠁꠘꠖꠤ ꠎꠣꠟꠣꠁꠟ ꠅꠁꠛ, ꠇꠣꠞꠘ ꠎꠦꠁꠘ ꠔꠣꠁꠞ ꠛꠤꠌꠣꠞ ꠇꠞꠛꠣ, ꠁ ꠀꠟ꠆ꠟꠣ ꠝꠣꠛꠥꠖ ꠈꠥꠛ ꠛꠟꠛꠣꠘ।”
৯ ꠎꠉꠔꠞ ꠎꠔ ꠞꠣꠎꠣ ꠅꠇꠟꠦ ꠅꠉꠥꠞ ꠟꠉꠦ ꠎꠤꠘꠣ ꠇꠞꠍꠦ,
ꠔꠣꠁꠞ ꠟꠉꠦ ꠢꠂ-ꠢꠥꠟ꠆ꠟꠣ ꠇꠞꠤ ꠛꠤꠟꠣꠡꠤ ꠖꠤꠘ ꠇꠣꠐꠣꠁꠍꠦ,
ꠔꠣꠁꠞꠦ ꠎꠣꠟꠣꠘꠤꠞ ꠛꠣꠟꠣ ꠔꠣꠁꠞ ꠗꠥꠝꠣ ꠖꠦꠈꠤꠀ ꠅꠔꠣꠄ ꠇꠣꠘ꠆ꠖꠤꠛꠣ,
ꠔꠣꠁꠞ ꠟꠣꠉꠤ ꠀꠢꠣꠎꠣꠞꠤ ꠇꠞꠛꠣ।
১০ ꠔꠣꠁꠞ ꠎꠘꠔ꠆ꠞꠘꠣ ꠖꠦꠈꠤꠀ ꠔꠣꠞꠣ ꠒꠞꠣꠁꠀ ꠖꠥꠞꠁ ꠃꠛꠣꠁꠀ ꠇꠁꠛꠣ,
“ꠢꠣꠄꠞꠦ ꠛꠣꠛꠤꠟ,
ꠢꠣꠄꠞꠦ ꠢꠣꠄ!
ꠅꠔ ꠘꠣꠝꠇꠞꠣ ꠐꠣꠃꠘ,
ꠅꠔ ꠈꠦꠝꠔꠣꠀꠟꠣ ꠐꠣꠃꠘ!
ꠅꠟꠣ ꠎꠟꠖꠤ ꠔꠥꠝꠣꠞ ꠃꠙꠞꠦ ꠉꠎꠛ ꠀꠁꠟ ꠘꠤ?”
১১ ꠎꠉꠔꠞ ꠛꠦꠙꠣꠞꠤ ꠡꠖꠣꠉꠞ ꠅꠇꠟꠦꠅ ꠔꠣꠁꠞ ꠟꠣꠉꠤ ꠇꠣꠘ꠆ꠖꠤꠛꠣ ꠀꠞ ꠀꠢꠣꠎꠣꠞꠤ ꠇꠞꠛꠣ,
ꠇꠣꠞꠘ ꠔꠣꠞꠣꠞ ꠝꠣꠟ-ꠍꠣꠝꠣꠘꠣ ꠅꠈꠘ ꠇꠥꠘꠥ ꠝꠣꠘꠡꠦ ꠟꠁꠔ ꠘꠣꠄ।
১২ ꠔꠣꠞꠣꠞ ꠁꠔꠣ ꠝꠣꠟ-ꠍꠣꠝꠣꠘꠣ ꠅꠁꠟ,
ꠡꠥꠘꠣ,
ꠞꠥꠙꠣ,
ꠖꠣꠝꠤ ꠖꠣꠝꠤ ꠝꠘꠤ-ꠝꠥꠇ꠆ꠔꠣ,
ꠖꠣꠝꠤ ꠖꠣꠝꠤ ꠇꠣꠙꠠ,
ꠛꠣꠁꠋꠉꠘꠤ ꠞꠋꠉꠞ ꠛꠣꠖꠡꠣꠁ ꠇꠣꠙꠠ,
ꠞꠦꠡꠝꠤ ꠀꠞ ꠟꠣꠟ ꠇꠣꠙꠠ,
ꠘꠣꠘꠣꠘ ꠘꠝꠥꠘꠣꠞ ꠈꠥꠡꠛꠄ ꠀꠟꠣ ꠟꠣꠇꠠꠤ,
ꠀꠔ꠆ꠔꠤꠞ ꠖꠣꠔꠖꠤ ꠛꠣꠘꠣꠁꠟ ꠘꠣꠘꠣꠘ ꠌꠤꠎ,
ꠖꠣꠝꠤ ꠟꠣꠇꠠꠤꠖꠤ ꠛꠣꠘꠣꠁꠟ ꠌꠤꠎ,
ꠙꠤꠔꠟ,
ꠟꠥꠀ ꠀꠞ ꠝꠣꠞꠛꠦꠟ ꠙꠣꠔ꠆ꠔꠞꠖꠤ ꠛꠣꠘꠣꠁꠟ ꠘꠣꠘꠣꠘ ꠍꠣꠝꠣꠘꠣ,
১৩ ꠒꠣꠁꠟꠌꠤꠘꠤ,
ꠄꠟꠣꠁꠌ,
ꠀꠉꠞ-ꠈꠥꠡꠛꠄ,
ꠝꠥꠞꠣ-ꠀꠔꠞ,
ꠟꠥꠛꠣꠘ,
ꠀꠋꠉꠥꠞꠞ ꠞꠡ,
ꠎꠄꠔꠥꠘꠞ ꠔꠦꠟ,
ꠝꠄꠖꠣ-ꠉꠝ,
ꠉꠞꠥ-ꠝꠦꠠꠣ,
ꠊꠥꠠꠣ ꠀꠞ ꠊꠥꠠꠣꠞ ꠉꠣꠠꠤ,
ꠄꠞꠟꠉꠦ ꠈꠞꠤꠖꠣ ꠉꠥꠟꠣꠝ-ꠛꠣꠘ꠆ꠖꠤ ꠅꠇꠟ।
১৪ ꠢꠃ ꠡꠖꠣꠉꠞ ꠅꠇꠟꠦ ꠇꠁꠛꠣ,
“ꠅ ꠛꠣꠛꠤꠟ,
ꠔꠥꠝꠤ ꠎꠦ ꠀꠞꠣꠝ-ꠀꠄꠄꠡ ꠙꠣꠁꠔꠣꠄ ꠌꠣꠁꠍꠟꠣꠄ,
ꠁꠔꠣ ꠔ ꠔꠥꠝꠣꠞ ꠉꠦꠍ ꠕꠣꠇꠤ ꠢꠞꠤꠉꠦꠍꠦ।
ꠔꠥꠝꠣꠞ ꠢꠇꠟ ꠗꠘ-ꠍꠣꠝꠣꠘꠣ,
ꠎꠣꠇ-ꠎꠝꠇ ꠛꠤꠘꠣꠡ ꠅꠁꠉꠦꠍꠦ।
ꠁꠔꠣ ꠔ ꠀꠞ ꠇꠥꠘꠥꠖꠤꠘꠃ ꠚꠤꠞꠔ ꠙꠣꠅꠀ ꠎꠣꠁꠔ ꠘꠣꠄ।”
১৫ ꠎꠦꠔꠣ ꠡꠖꠣꠉꠞ ꠅꠇꠟꠦ ꠅꠔꠣ ꠝꠣꠟꠞ ꠛꠦꠛꠡꠣ ꠇꠞꠤꠀ ꠗꠘꠤ ꠅꠁꠍꠟꠣ,
ꠔꠣꠁꠞ ꠎꠘꠔ꠆ꠞꠘꠣ ꠖꠦꠈꠤꠀ ꠢꠃ ꠛꠦꠙꠣꠞꠤ ꠅꠇꠟꠦ ꠒꠞꠣꠁꠀ ꠖꠥꠞꠁ ꠃꠛꠣꠁ ꠞꠁꠛꠣ।
ꠔꠣꠞꠣ ꠇꠣꠘ꠆ꠖꠤ ꠇꠣꠘ꠆ꠖꠤ ꠝꠣꠔ꠆ꠔꠝ ꠇꠞꠤꠀ ꠇꠁꠛꠣ,
১৬ “ꠁꠡ,
ꠢꠣꠄꠞꠦ ꠢꠣꠄ,
ꠖꠣꠝꠤ ꠖꠣꠝꠤ ꠝꠍꠟꠤꠘ ꠇꠣꠙꠠ,
ꠛꠣꠁꠋꠉꠘꠤ ꠀꠞ ꠟꠣꠟ ꠞꠋꠉꠞ ꠛꠣꠖꠡꠣꠁ ꠇꠣꠙꠠ ꠚꠤꠘ꠆ꠖꠣ ꠛꠣꠛꠤꠟ ꠐꠣꠃꠘ,
ꠡꠥꠘꠣ ꠀꠞ ꠖꠣꠝꠤ ꠖꠣꠝꠤ ꠝꠘꠤ-ꠝꠥꠇ꠆ꠔꠣ ꠖꠤꠀ ꠢꠣꠎꠣꠁꠟ-ꠙꠣꠠꠣꠁꠟ ꠅꠔ ꠘꠣꠝꠇꠞꠣ ꠐꠣꠃꠘ!
১৭ ꠅꠔ ꠎꠟꠖꠤ ꠔꠥꠝꠣꠞ ꠅꠔ ꠗꠘ-ꠍꠣꠝꠣꠘꠣꠞ ꠜꠣꠘ꠆ꠒꠣꠞ ꠛꠤꠘꠣꠡ ꠅꠁꠉꠦꠟ ꠘꠤ?”
ꠡꠖꠣꠉꠞꠤ ꠎꠣꠎꠞ ꠡꠣꠞꠋ ꠀꠞ ꠇꠣꠙ꠆ꠔꠣꠘ ꠅꠇꠟꠦ,
ꠘꠣꠁꠀ ꠅꠇꠟꠦ,
ꠎꠣꠎ ꠀꠞ ꠙꠣꠟꠞ ꠘꠣꠁꠀ ꠇꠣꠞꠛꠣꠞꠤ ꠅꠇꠟꠦ ꠖꠥꠞꠁ ꠃꠛꠣꠁꠀ ꠁꠔꠣ ꠖꠦꠈꠛꠣ।
১৮ ꠔꠣꠁꠞꠦ ꠎꠣꠟꠣꠘꠤꠞ ꠡꠝꠄ ꠔꠣꠁꠞ ꠗꠥꠝꠣ ꠖꠦꠈꠤꠀ ꠔꠣꠞꠣ ꠌꠤꠟ꠆ꠟꠣꠁꠀ ꠇꠁꠛꠣ,
“ꠁ ꠐꠣꠃꠘꠞ ꠟꠣꠈꠣꠘ ꠘꠣꠝꠇꠞꠣ,
ꠎꠉꠔꠞ ꠀꠞ ꠇꠥꠘꠥ ꠐꠣꠃꠘ ꠀꠍꠤꠟ ꠘꠤ?”
১৯ ꠔꠣꠞꠣ ꠘꠤꠎꠞ ꠝꠣꠕꠣꠔ ꠗꠥꠁꠟ ꠝꠣꠈꠣꠁꠀ ꠌꠤꠟ꠆ꠟꠣ-ꠌꠤꠟ꠆ꠟꠤ ꠇꠞꠛꠣ ꠀꠞ ꠇꠣꠘ꠆ꠖꠤ ꠇꠣꠘ꠆ꠖꠤ ꠝꠣꠔ꠆ꠔꠝ ꠇꠞꠤꠀ ꠇꠁꠛꠣ,
“ꠢꠣꠄꠞꠦ ꠢꠣꠄ,
ꠢꠃ ꠘꠣꠝꠇꠞꠣ ꠛꠣꠛꠤꠟ ꠐꠣꠃꠘ,
ꠢꠣꠄꠞꠦ ꠢꠣꠄ!
ꠖꠞꠤꠀꠞ ꠝꠣꠎꠦ ꠎꠦꠞꠣꠞ ꠎꠣꠎ ꠌꠟꠣꠌꠟ ꠇꠞꠦ,
ꠔꠣꠞꠣ ꠔ ꠎꠣꠎꠞ ꠇꠣꠝꠣꠁ ꠖꠤꠀ ꠛꠠꠟꠥꠇ ꠅꠁꠍꠟꠣ,
ꠅꠈꠘ ꠖꠦꠈꠞꠣꠄ ꠘꠤ,
ꠅꠔ ꠎꠟꠖꠤ ꠇꠤꠟꠣ ꠢꠇꠟꠔꠣ ꠛꠤꠘꠣꠡ ꠅꠁꠉꠦꠟ!”
২০ ꠅꠃ ꠡꠝꠄ ꠢꠃ ꠚꠤꠞꠤꠡ꠆ꠔꠣꠄ ꠇꠁꠟꠣ,
“ꠅ ꠛꠦꠢꠦꠡ꠆ꠔ,
ꠔꠥꠝꠤ ꠚꠥꠞ꠆ꠔꠤ ꠇꠞꠅ,
ꠅꠃ ꠐꠣꠃꠘꠞꠦ ꠛꠤꠘꠣꠡ ꠇꠞꠣꠄ ꠈꠥꠡꠤ ꠇꠞꠅ।
ꠅ ꠀꠟ꠆ꠟꠣꠞ ꠙꠣꠇ ꠛꠘ꠆ꠖꠣ ꠅꠇꠟ,
ꠘꠛꠤ-ꠞꠍꠥꠟ ꠅꠇꠟ ꠀꠞ ꠍꠣꠢꠣꠛꠤ ꠅꠇꠟ,
ꠚꠥꠞ꠆ꠔꠤ ꠇꠞꠅ।
ꠅꠉꠤꠄ ꠔꠥꠝꠞꠣꠞ ꠛꠤꠞꠥꠖ꠆ꠖꠦ ꠎꠔꠔꠣ ꠇꠞꠍꠤꠟ,
ꠅꠈꠘ ꠀꠟ꠆ꠟꠣꠄ ꠔꠣꠁꠞ ꠛꠤꠌꠣꠞ ꠇꠞꠍꠂꠘ।”
২১ ꠛꠣꠖꠦ ꠈꠥꠛ ꠡꠇ꠆ꠔꠤꠀꠟꠣ ꠄꠇ ꠚꠤꠞꠤꠡ꠆ꠔꠣꠄ ꠛꠤꠞꠣꠐ ꠄꠇ ꠙꠣꠔ꠆ꠔꠞ ꠀꠘꠤꠀ ꠖꠞꠤꠀꠔ ꠚꠣꠟꠣꠁꠀ ꠇꠁꠟꠣ,
“ꠢꠥꠘꠅ,
ꠅꠃ ꠘꠣꠝꠇꠞꠣ ꠛꠣꠛꠤꠟ ꠐꠣꠃꠘꠞꠦꠅ ꠅꠟꠣ ꠒꠦꠇ꠆ꠇꠣ ꠝꠣꠞꠤ ꠚꠣꠟꠣꠁ ꠖꠦꠅꠀ ꠅꠁꠛ,
ꠔꠣꠁꠞꠦ ꠀꠞ ꠇꠥꠘꠥꠖꠤꠘ ꠙꠣꠅꠀ ꠎꠣꠁꠔ ꠘꠣꠄ।
২২ ꠎꠦꠞꠣ ꠡꠣꠞꠤꠘ꠆ꠖꠣ ꠛꠣꠎꠣꠄ,
ꠉꠣꠘ ꠉꠣꠄ ꠀꠞ ꠛꠣꠡꠤ ꠛꠣ ꠡꠤꠋꠉꠣ ꠛꠣꠎꠣꠄ,
ꠔꠣꠞꠣꠞ ꠀꠅꠀꠎ ꠀꠞ ꠇꠥꠘꠥꠖꠤꠘ ꠔꠥꠝꠣꠞ ꠝꠣꠎꠦ ꠢꠥꠘꠣ ꠎꠣꠁꠔ ꠘꠣꠄ।
ꠀꠞ ꠇꠥꠘꠥꠖꠤꠘꠃ ꠔꠥꠝꠣꠞ ꠝꠣꠎꠦ ꠇꠥꠘꠥꠎꠣꠔ ꠝꠦꠡ꠆ꠔꠞꠤ ꠝꠤꠟꠔ ꠘꠣꠄ।
ꠇꠥꠘꠥ ꠝꠡꠟꠣ ꠙꠤꠡꠣꠞ ꠙꠣꠐꠣꠞ ꠀꠅꠀꠎ ꠇꠥꠘꠥꠖꠤꠘ ꠢꠥꠘꠣ ꠎꠣꠁꠔ ꠘꠣꠄ।
২৩ ꠔꠥꠝꠣꠞ ꠝꠣꠎꠦ ꠇꠥꠘꠥꠖꠤꠘ ꠇꠥꠘꠥ ꠛꠣꠔ꠆ꠔꠤꠞ ꠚꠞ ꠎꠟꠔ ꠘꠣꠄ।
ꠖꠣꠝꠣꠘ-ꠇꠁꠘꠣꠞ ꠉꠟꠣꠞ ꠀꠅꠀꠎ ꠀꠞ ꠇꠥꠘꠥꠖꠤꠘ ꠔꠥꠝꠣꠞ ꠝꠣꠎꠦ ꠢꠥꠘꠣ ꠎꠣꠁꠔ ꠘꠣꠄ।
ꠇꠣꠞꠘ ꠀꠡ꠆ꠔꠣ ꠎꠉꠔꠞ ꠝꠣꠎꠦ ꠔꠥꠝꠣꠞ ꠡꠖꠣꠉꠞ ꠅꠇꠟ ꠘꠣꠝꠇꠞꠣ ꠀꠍꠤꠟ,
ꠎꠉꠔꠞ ꠢꠇꠟ ꠎꠣꠔꠤ ꠔꠥꠝꠣꠞ ꠍꠟ-ꠌꠔꠥꠞꠤꠞ ꠎꠣꠖꠥꠄ ꠙꠣꠉꠟ ꠅꠁꠎꠤꠔ।
২৪ ꠀꠞ ꠘꠛꠤ-ꠞꠍꠥꠟ ꠅꠇꠟꠞꠦ,
ꠀꠟ꠆ꠟꠣꠞ ꠙꠣꠇ ꠛꠘ꠆ꠖꠣ ꠅꠇꠟꠞꠦ,
ꠀꠞ ꠎꠔ ꠝꠣꠘꠡꠞꠦ ꠁ ꠎꠉꠔꠅ ꠈꠥꠘ ꠇꠞꠣ ꠅꠁꠍꠦ,
ꠔꠣꠞꠣꠞ ꠟꠃ ꠔ ꠔꠥꠝꠣꠞ ꠅꠃ ꠛꠣꠛꠤꠟ ꠐꠣꠃꠘꠅ ꠝꠤꠟꠍꠦ।”