ꠢꠎꠞꠔ ꠁꠍꠣꠞ ꠔꠣꠟ꠆ꠟꠣꠡꠦ ꠉꠘꠇ ꠅꠇꠟ
২
১ ꠞꠣꠎꠣ ꠢꠦꠞꠥꠖꠞ ꠀꠝꠟꠅ ꠄꠢꠥꠖꠤꠀ ꠎꠤꠟꠣꠞ ꠛꠦꠕꠦꠟꠢꠣꠝ ꠉꠣꠃꠔ ꠢꠎꠞꠔ ꠁꠍꠣꠞ ꠎꠘꠝ ꠅꠁꠍꠤꠟ।
ꠎꠘꠝꠞ ꠛꠣꠖꠦ ꠙꠥꠛꠞ ꠖꠦꠡꠞ ꠇꠄꠎꠘ ꠉꠘꠇ ꠎꠦꠞꠥꠎꠣꠟꠦꠝ ꠐꠣꠃꠘꠅ ꠀꠁꠀ ꠎꠤꠇꠣꠁꠟꠣ,
২ “ꠁꠢꠥꠖꠤ ꠎꠣꠔꠤꠞ ꠎꠦ ꠛꠣꠖꠡꠣꠞ ꠎꠘꠝ ꠅꠁꠍꠦ,
ꠄꠁꠘ ꠇꠥꠀꠁ?
ꠀꠝꠞꠣ ꠀꠍꠝꠣꠘꠞ ꠙꠥꠛꠦꠖꠤ ꠔꠣꠘ ꠎꠘꠝꠞ ꠔꠦꠞꠣ ꠖꠦꠈꠍꠤ,
ꠖꠦꠈꠤꠀ ꠔꠣꠘꠞꠦ ꠜꠇ꠆ꠔꠤ ꠖꠦꠅꠀꠔ ꠀꠁꠍꠤ।”
৩ ꠘꠄꠀ ꠛꠣꠖꠡꠣꠞ ꠇꠕꠣ ꠢꠥꠘꠤꠀ ꠞꠣꠎꠣ ꠢꠦꠞꠥꠖ ꠀꠞ ꠎꠦꠞꠥꠎꠣꠟꠦꠝꠞ ꠛꠣꠖ-ꠛꠣꠇꠤ ꠢꠇꠟ ꠝꠣꠘꠥꠡ ꠈꠥꠛ ꠌꠤꠘ꠆ꠔꠣꠔ ꠙꠠꠤꠉꠦꠟꠣ।
৪ ꠄꠞꠟꠣꠉꠤ ꠢꠦꠞꠥꠖꠦ ꠖꠦꠡꠞ ꠛꠠ ꠁꠝꠣꠝ ꠀꠞ ꠝꠃꠟꠣꠘꠣ ꠅꠇꠟꠞꠦ ꠄꠇꠈꠣꠘꠅ ꠖꠟꠣ ꠇꠞꠤ ꠎꠤꠇꠣꠁꠟꠣ,
“ꠀꠙꠘꠣꠞꠣ ꠎꠣꠘꠂꠘ ꠘꠤ,
ꠀꠟ-ꠝꠍꠤ ꠇꠥꠀꠁ ꠎꠘꠝ ꠟꠁꠛꠣ?”
৫ ꠄꠞꠣ ꠇꠁꠟꠣ,
“ꠔꠣꠘ ꠎꠘꠝ ꠅꠁꠛ ꠄꠢꠥꠖꠤꠀ ꠎꠤꠟꠣꠞ ꠛꠦꠕꠦꠟꠢꠣꠝ ꠉꠣꠃꠔ।
ꠀꠉꠞ ꠎꠝꠣꠘꠣꠞ ꠄꠇ ꠘꠛꠤꠞ ꠇꠤꠔꠣꠛꠅ ꠟꠦꠈꠣ ꠀꠍꠦ,
৬ ꠅ ꠄꠢꠥꠖꠤꠀ ꠎꠤꠟꠣꠞ ꠛꠦꠕꠦꠟꠢꠣꠝ,
ꠄꠢꠥꠖꠤꠀꠞ ꠘꠣꠝꠤ-ꠖꠣꠝꠤ ꠎꠣꠉꠣꠞ ꠝꠣꠎꠦ
ꠔꠥꠝꠤ ꠇꠥꠘꠥꠝꠘ꠆ꠔꠦꠃ ꠢꠥꠞꠥ ꠘꠣꠄ,
ꠔꠥꠝꠣꠞ ꠝꠣꠎ ꠕꠣꠇꠤꠃ ꠔ
ꠅꠟꠣ ꠄꠇꠎꠘ ꠛꠣꠖꠡꠣ ꠙꠄꠖꠣ ꠅꠁꠛꠣ,
ꠎꠦꠁꠘ ꠀꠝꠣꠞ ꠁꠍꠞꠣꠁꠟ ꠎꠣꠔꠤꠞꠦ ꠌꠣꠟꠣꠁꠛꠣ।”
৭ ꠔꠦꠃ ꠢꠦꠞꠥꠖꠦ ꠢꠃ ꠉꠘꠇ ꠅꠇꠟꠞꠦ ꠘꠤꠞꠣꠟꠣꠄ ꠘꠤꠀ ꠎꠤꠇꠣꠁꠀ ꠎꠣꠘꠟꠣ,
ꠑꠤꠇ ꠇꠥꠘ ꠡꠝꠄ ꠢꠃ ꠎꠘꠝꠞ ꠔꠦꠞꠣ ꠖꠦꠈꠣ ꠉꠦꠍꠤꠟ।
৮ ꠔꠣꠁꠘ ꠅꠃ ꠉꠘꠇ ꠅꠇꠟꠞꠦ ꠇꠁꠟꠣ,
“ꠀꠙꠘꠣꠞꠣ ꠛꠦꠕꠦꠟꠢꠣꠝ ꠎꠣꠃꠇ꠆ꠇꠣ,
ꠉꠤꠀ ꠜꠣꠟꠣ ꠇꠞꠤ ꠅꠃ ꠢꠥꠞꠥꠔ꠆ꠔꠣꠞ ꠔꠣꠟ꠆ꠟꠣꠡ ꠇꠞꠃꠇ꠆ꠇꠣ।
ꠔꠣꠘ ꠇꠥꠘꠥ ꠈꠛꠞ ꠙꠣꠁꠟꠦ ꠀꠝꠣꠞꠦ ꠎꠣꠘꠣꠁꠛꠣ,
ꠔꠦꠃ ꠀꠝꠤꠅ ꠉꠤꠀ ꠔꠣꠘꠞꠦ ꠜꠇ꠆ꠔꠤ ꠖꠤꠝꠥ।”
৯ ꠞꠣꠎꠣꠞ ꠢꠥꠇꠥꠝ ꠙꠣꠁꠀ ꠉꠘꠇ ꠅꠇꠟ ꠞꠅꠀꠘꠣ ꠖꠤꠟꠣ।
ꠔꠣꠞꠣ ꠙꠥꠛꠞ ꠀꠍꠝꠣꠘꠅ ꠎꠦ ꠎꠘꠝ ꠔꠦꠞꠣ ꠖꠦꠈꠍꠤꠟꠣ,
ꠅꠃ ꠔꠦꠞꠣ ꠔꠣꠞꠣꠞ ꠀꠉꠦ ꠀꠉꠦ ꠉꠦꠟ।
ꠀꠞ ꠅꠃ ꠢꠥꠞꠥꠔ꠆ꠔꠣ ꠎꠦ ꠎꠣꠉꠣꠔ ꠀꠍꠟꠣ,
ꠑꠤꠇ ꠅꠃ ꠎꠣꠉꠣꠔ ꠀꠁꠀ ꠔꠦꠞꠣ ꠕꠣꠝꠤꠉꠦꠟ।
১০ ꠔꠦꠞꠣ ꠕꠣꠝꠤꠉꠦꠍꠦ ꠖꠦꠈꠤꠀ ꠉꠘꠇ ꠅꠇꠟꠞ ꠜꠤꠔꠞꠦ ꠈꠥꠡꠤꠞ ꠓꠦꠃ ꠃꠑꠟ,
ꠈꠥꠡꠤꠞ ꠝꠣꠁꠞꠦ ꠔꠣꠞꠣ ꠊꠞꠞ ꠜꠤꠔꠞꠦ ꠢꠣꠝꠣꠁꠟꠣ।
১১ ꠊꠞꠅ ꠢꠣꠝꠣꠁꠀ ꠅꠃ ꠢꠥꠞꠥꠔ꠆ꠔꠣꠞꠦ ꠔꠣꠘ ꠝꠣ ꠝꠞꠤꠅꠝꠞ ꠇꠣꠘ꠆ꠖꠣꠔ ꠖꠦꠈꠟꠣ।
ꠖꠦꠈꠤꠀ ꠔꠣꠞꠣ ꠝꠣꠐꠤꠔ ꠙꠠꠤ ꠔꠣꠘꠞꠦ ꠜꠇ꠆ꠔꠤ ꠖꠤꠟꠣ,
ꠀꠞ ꠔꠣꠞꠣꠞ ꠛꠦꠉ ꠈꠥꠟꠤꠀ ꠖꠣꠝꠤ ꠖꠣꠝꠤ ꠃꠙꠢꠣꠞ ꠖꠤꠟꠣ।
ꠅꠃ ꠃꠙꠢꠣꠞ ꠅꠁꠟ ꠡꠥꠘꠣ,
ꠟꠥꠛꠣꠘ ꠀꠞ ꠝꠥꠞꠣ-ꠀꠔꠞ।
১২ ꠅꠁꠟꠦ ꠀꠟ꠆ꠟꠣꠄ ꠈꠥꠀꠛꠞ ꠝꠣꠎꠦ ꠔꠣꠞꠣꠞꠦ ꠢꠥꠡꠤꠀꠞ ꠇꠞꠤ ꠖꠤꠟꠣ,
ꠔꠣꠞꠣ ꠎꠣꠘꠥ ꠞꠣꠎꠣ ꠢꠦꠞꠥꠖꠞ ꠉꠦꠍꠦ ꠀꠞ ꠚꠤꠞꠤꠀ ꠘꠣ ꠎꠣꠁꠘ।
ꠔꠦꠃ ꠔꠣꠞꠣ ꠖꠥꠍꠞꠣ ꠙꠕꠦ ꠘꠤꠎꠞ ꠖꠦꠡꠅ ꠉꠦꠟꠣꠉꠤ।
ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠈꠥꠎꠦ ꠞꠣꠎꠣ ꠢꠦꠞꠥꠖ
১৩ ꠉꠘꠇ ꠅꠇꠟ ꠉꠤꠀ ꠢꠣꠞꠟꠦ ꠀꠟ꠆ꠟꠣꠞ ꠄꠇ ꠚꠤꠞꠤꠡ꠆ꠔꠣꠄ ꠈꠥꠀꠛꠞ ꠝꠣꠎꠦ ꠁꠃꠍꠥꠚꠞꠦ ꠖꠞꠡꠘ ꠖꠤꠀ ꠇꠁꠟꠣ,
“ꠅ ꠁꠃꠍꠥꠚ ꠃꠑꠅ,
ꠙꠥꠀ ꠀꠞ ꠔꠣꠘ ꠝꠣ’ꠞꠦ ꠟꠁꠀ ꠝꠤꠡꠞ ꠖꠦꠡꠅ ꠜꠣꠉꠤꠀ ꠎꠣꠅꠉꠤ,
ꠛꠣꠖꠦ ꠀꠝꠤ ꠎꠔꠖꠤꠘ ꠘꠣ ꠇꠁ,
ꠅꠔꠖꠤꠘ ꠢꠘꠅꠃ ꠞꠁꠅ।
ꠁ ꠙꠥꠀꠞꠦ ꠝꠣꠞꠤꠟꠤꠔ ꠇꠞꠤ ꠢꠦꠞꠥꠖꠦ ꠔꠥꠇꠣꠁꠛ।”
১৪ ꠔꠦꠃ ꠁꠃꠍꠥꠚ ꠃꠑꠤꠀ ꠅꠃ ꠞꠣꠁꠔꠃ ꠔꠣꠞꠣꠞꠦ ꠟꠁꠀ ꠝꠤꠡꠞꠅ ꠞꠅꠀꠘꠣ ꠖꠤꠟꠣ,
১৫ ꠀꠞ ꠞꠣꠎꠣ ꠢꠦꠞꠥꠖ ꠝꠞꠣꠞ ꠀꠉ ꠙꠞ꠆ꠎꠘ꠆ꠔ ꠢꠘꠅ ꠞꠁꠟꠣ।
ꠁꠔꠣ ꠊꠐꠤꠍꠤꠟ,
ꠎꠣꠔꠦ ꠀꠉꠞ ꠄꠇ ꠘꠛꠤꠞ ꠝꠣꠎꠖꠤ ꠝꠣꠛꠥꠖꠦ ꠎꠦꠔꠣ ꠎꠣꠘꠣꠁꠍꠟꠣ,
ꠅꠔꠣ ꠙꠥꠞꠣ ꠅꠄ।
ꠝꠣꠛꠥꠖꠦ ꠛꠣꠔꠣꠁꠍꠟꠣ,
“ꠀꠝꠤ ꠀꠝꠣꠞ ꠙꠥꠔꠞꠦ ꠝꠤꠡꠞ ꠕꠣꠇꠤ ꠒꠣꠇꠤꠀ ꠀꠘꠟꠣꠝ।”
১৬ ꠉꠘꠇ ꠅꠇꠟꠦ ꠞꠣꠎꠣ ꠢꠦꠞꠥꠖꠞꠦ ꠐꠉꠤꠍꠂꠘ ꠇꠞꠤꠀ ꠔꠣꠁꠘ ꠈꠥꠛ ꠉꠥꠍꠣ ꠇꠞꠟꠣ।
ꠄꠞꠟꠣꠉꠤ ꠉꠘꠇ ꠅꠇꠟꠞ ꠉꠦꠍ ꠕꠣꠇꠤ ꠔꠣꠁꠘ ꠎꠦ ꠡꠝꠄꠅꠞ ꠇꠕꠣ ꠢꠥꠘꠍꠟꠣ,
ꠅꠃ ꠡꠝꠄ ꠝꠣꠚꠤꠇ ꠛꠦꠕꠦꠟꠢꠣꠝ ꠉꠣꠃ ꠀꠞ ꠄꠞ ꠀꠡ-ꠙꠣꠡ ꠄꠟꠣꠇꠣꠔ ꠖꠥꠁ ꠛꠍꠞ ꠛꠣ ꠔꠣꠞ ꠇꠝ ꠛꠄꠅꠡꠤ ꠎꠔ ꠙꠥꠀꠂꠘ ꠀꠍꠟꠣ,
ꠁꠔꠣ ꠢꠇꠟꠞꠦ ꠝꠣꠞꠤꠟꠤꠛꠣꠞ ꠢꠥꠇꠥꠝ ꠖꠤꠟꠣ।
১৭ ꠄꠔꠦ ꠘꠛꠤ ꠁꠀꠞꠝꠤꠀꠞ ꠝꠣꠎꠖꠤ ꠝꠣꠛꠥꠖꠦ ꠎꠦꠔꠣ ꠎꠣꠘꠣꠁꠍꠟꠣ,
ꠅꠔꠣ ꠚꠟꠤꠉꠦꠟ।
ꠝꠣꠛꠥꠖꠦ ꠛꠣꠔꠣꠁꠍꠟꠣ,
১৮ ꠞꠣꠝꠣꠔ ꠈꠥꠛ ꠇꠣꠘ꠆ꠖꠣ-ꠇꠣꠐꠤꠞ ꠀꠅꠀꠎ ꠢꠥꠘꠣ ꠎꠣꠞ,
ꠞꠣꠢꠦꠟꠣꠄ ꠔꠣꠁꠞ ꠢꠥꠞꠥꠔ꠆ꠔꠣꠂꠘ꠆ꠔꠞ ꠟꠣꠉꠤ ꠇꠣꠘ꠆ꠖꠦꠞ,
ꠇꠥꠘꠥꠝꠘ꠆ꠔꠦꠃ ꠡꠣꠘ꠆ꠔꠤ ꠅꠞ ꠘꠣ,
ꠔꠣꠁꠞ ꠢꠥꠞꠥꠔ꠆ꠔꠣꠂꠘ ꠡꠦꠡ ꠅꠁꠉꠦꠍꠂꠘ।
১৯ ꠛꠣꠖꠦ ꠞꠣꠎꠣ ꠢꠦꠞꠥꠖ ꠝꠞꠤꠀ ꠢꠣꠞꠟꠦ ꠝꠣꠛꠥꠖꠞ ꠄꠇ ꠚꠤꠞꠤꠡ꠆ꠔꠣ ꠀꠁꠀ,
ꠝꠤꠡꠞ ꠖꠦꠡꠅ ꠁꠃꠍꠥꠚꠞꠦ ꠈꠥꠀꠛꠞ ꠝꠣꠎꠦ ꠇꠁꠟꠣ,
২০ “ꠅ ꠁꠃꠍꠥꠚ,
ꠃꠑꠅ,
ꠅꠃ ꠙꠥꠀ ꠀꠞ ꠔꠣꠘ ꠝꠣ’ꠞꠦ ꠟꠁꠀ ꠁꠍꠞꠣꠁꠟ ꠖꠦꠡꠅ ꠎꠣꠅꠉꠤ।
ꠙꠥꠀꠞꠦ ꠎꠦꠔꠣꠄ ꠝꠣꠞꠤꠟꠤꠔꠣ ꠌꠣꠁꠍꠟꠣ,
ꠁꠔꠣ ꠔ ꠝꠞꠤꠉꠦꠍꠂꠘ।”
২১ ꠔꠦꠃ ꠁꠃꠍꠥꠚ ꠃꠑꠤꠀ ꠙꠥꠀ ꠀꠞ ꠙꠥꠀꠞ ꠝꠣ’ꠞꠦ ꠟꠁꠀ ꠁꠍꠞꠣꠁꠟ ꠖꠦꠡꠞ ꠡꠤꠝꠣꠘꠣꠔ ꠀꠁꠟꠣ।
২২ ꠀꠁꠀ ꠢꠥꠘꠟꠣ,
ꠢꠃ ꠢꠦꠞꠥꠖꠞ ꠙꠥꠀ ꠀꠞ꠆ꠈꠤꠟꠣꠃꠍ ꠅꠈꠘ ꠄꠢꠥꠖꠤꠀ ꠎꠤꠟꠣꠞ ꠞꠣꠎꠣ ꠅꠁꠉꠦꠍꠦ।
ꠄꠞꠟꠣꠉꠤ ꠔꠣꠁꠘ ꠢꠤꠘꠅ ꠎꠣꠁꠔꠦ ꠒꠞꠣꠁꠟꠣ।
ꠛꠣꠖꠦ ꠈꠥꠀꠛꠦ ꠢꠥꠇꠥꠝ ꠙꠣꠁꠀ ꠉꠣꠟꠤꠟ ꠎꠤꠟꠣꠔ ꠉꠦꠟꠣꠉꠤ।
২৩ ꠉꠣꠟꠤꠟꠅ ꠉꠤꠀ ꠘꠣꠍꠣꠞꠔ ꠘꠣꠝꠞ ꠄꠇ ꠉꠣꠃꠔ ꠛꠡꠔ ꠇꠞꠟꠣ।
ꠁꠔꠣ ꠊꠐꠤꠟ,
ꠎꠣꠔꠦ ꠀꠉꠞ ꠘꠛꠤ ꠅꠇꠟꠞ ꠝꠣꠎꠖꠤ ꠎꠦꠔꠣ ꠎꠣꠘꠣꠁꠟ ꠅꠁꠍꠤꠟ,
ꠅꠔꠣ ꠅꠈꠘ ꠙꠥꠞꠣ ꠅꠄ।
ꠎꠣꠘꠣꠁꠟ ꠅꠁꠍꠤꠟ,
“ꠔꠣꠘꠞꠦ ꠘꠣꠍꠣꠞꠔꠤ ꠇꠁꠀ ꠒꠣꠇꠣ ꠅꠁꠛ।”