ꠢꠎꠞꠔ ꠄꠢꠤꠀ ꠘꠛꠤꠞ ꠝꠃꠔ
১৪
১ ꠅꠃ ꠡꠝꠄ ꠉꠣꠟꠤꠟ ꠎꠤꠟꠣꠞ ꠞꠣꠎꠣ ꠢꠦꠞꠥꠖꠦ ꠁꠍꠣꠞ ꠛꠦꠙꠣꠞꠦ ꠢꠥꠘꠟꠣ,
২ ꠢꠥꠘꠤꠀ ꠔꠣꠘ ꠃꠎꠤꠞ-ꠘꠣꠎꠤꠞꠞꠦ ꠇꠁꠟꠣ,
“ꠄꠁꠘ ꠔ ꠔꠃꠛꠣꠞ ꠉꠥꠍꠟ ꠇꠞꠣꠅꠞꠣ ꠄꠢꠤꠀ।
ꠄꠁꠘ ꠝꠞꠣ ꠕꠣꠇꠤ ꠎꠤꠘ꠆ꠖꠣ ꠅꠁꠀ ꠃꠑꠣꠄ ꠅꠃ ꠇꠦꠞꠣꠝꠔꠤ ꠖꠦꠈꠣꠁꠞꠣ।”
৩ ꠅꠃ ꠢꠦꠞꠥꠖꠦ ꠔꠣꠞ ꠜꠣꠁ ꠚꠤꠟꠤꠚꠞ ꠛꠃ ꠢꠦꠞꠥꠖꠤꠀꠞꠦ ꠢꠣꠋꠉꠣ ꠇꠞꠍꠤꠟ।
ꠔꠣꠁꠞ ꠝꠘ ꠎꠥꠉꠣꠘꠤꠞ ꠟꠣꠉꠤ ꠢꠦ ꠄꠢꠤꠀ ꠘꠛꠤꠞꠦ ꠎꠦꠟꠅ ꠛꠘ꠆ꠖꠤ ꠇꠞꠤꠀ ꠕꠁꠍꠤꠟ,
৪ ꠇꠣꠞꠘ ꠄꠢꠤꠀꠄ ꠢꠦꠞꠥꠖꠞꠦ ꠇꠁꠔꠣ,
“ꠔꠣꠁꠞꠦ ꠢꠣꠋꠉꠣ ꠇꠞꠣ ꠔ ꠔꠥꠝꠣꠞ ꠑꠤꠇ ꠅꠁꠍꠦ ꠘꠣ।”
৫ ꠄꠞꠟꠣꠉꠤ ꠢꠦ ꠄꠢꠤꠀ ꠘꠛꠤꠞꠦ ꠝꠣꠞꠤꠟꠤꠔ ꠌꠣꠁꠟ,
ꠅꠁꠟꠦ ꠝꠣꠘꠡꠞ ꠒꠞꠦ ꠝꠣꠞꠔ ꠙꠣꠞꠟ ꠘꠣ,
ꠝꠣꠘꠡꠦ ꠎꠣꠘꠔꠣ ꠄꠁꠘ ꠄꠇꠎꠘ ꠘꠛꠤ।
৬ ꠛꠣꠖꠦ ꠞꠣꠎꠣ ꠢꠦꠞꠥꠖꠞ ꠎꠘꠝ ꠖꠤꠘꠞ ꠅꠘꠥꠡ꠆ꠑꠣꠘꠅ ꠢꠦꠞꠥꠖꠤꠀꠞ ꠙꠥꠠꠤꠄ ꠘꠣꠌꠤꠀ ꠞꠣꠎꠣꠞꠦ ꠈꠥꠡꠤ ꠇꠞꠟ।
৭ ꠄꠞꠖꠣꠄ ꠞꠣꠎꠣꠄ ꠇꠍꠝ ꠈꠣꠁꠀ ꠇꠂꠟ,
“ꠅꠃ ꠙꠥꠠꠤꠄ ꠎꠦꠔꠣ ꠌꠣꠁꠛ,
ꠅꠔꠣ ꠖꠤꠝꠥ।”
৮ ꠙꠥꠠꠤꠄ ꠔꠣꠁꠞ ꠝꠣʼꠞ ꠟꠉꠦ ꠙꠞꠣꠝꠤꠡ ꠇꠞꠤ ꠇꠂꠟ,
“ꠔꠃꠛꠣꠞ ꠉꠥꠍꠟ ꠇꠞꠣꠅꠞꠣ ꠄꠢꠤꠀꠞ ꠇꠟ꠆ꠟꠣ ꠇꠣꠐꠤꠀ ꠄꠇꠈꠣꠘ ꠕꠣꠟꠅ ꠇꠞꠤ,
ꠅꠈꠘ ꠀꠘꠤꠀ ꠀꠝꠣꠞꠦ ꠖꠦꠃꠇ꠆ꠇꠣ।”
৯ ꠁꠈꠣꠘ ꠢꠥꠘꠤꠀ ꠞꠣꠎꠣꠞ ꠝꠘ ꠈꠥꠛ ꠛꠦꠎꠣꠞ ꠅꠁꠉꠦꠟ।
ꠅꠁꠟꠦ ꠔꠣꠞ ꠟꠉꠦ ꠛꠅꠀ ꠝꠦꠝꠣꠘ-ꠝꠥꠍꠣꠚꠤꠞꠞ ꠍꠣꠝꠘꠦ ꠘꠤꠎꠦ ꠇꠍꠝ ꠇꠞꠍꠦ,
ꠄꠞꠟꠣꠉꠤ ꠢꠦ ꠅꠃ ꠇꠟ꠆ꠟꠣ ꠇꠣꠐꠤꠛꠣꠞ ꠢꠥꠇꠥꠝ ꠖꠤꠟ।
১০ ꠔꠣꠞ ꠎꠟ꠆ꠟꠣꠖ ꠙꠣꠑꠣꠁꠀ ꠎꠦꠟꠞ ꠜꠤꠔꠞꠦ ꠄꠢꠤꠀ ꠘꠛꠤꠞ ꠇꠟ꠆ꠟꠣ ꠇꠣꠐꠣꠁꠟ।
১১ ꠛꠣꠖꠦ ꠅꠃ ꠇꠟ꠆ꠟꠣ ꠄꠇ ꠕꠣꠟꠅ ꠇꠞꠤ ꠀꠘꠤꠀ ꠅꠃ ꠙꠥꠠꠤꠞꠦ ꠖꠦꠅꠀ ꠅꠁꠟ,
ꠙꠥꠠꠤꠄ ꠘꠤꠀ ꠔꠣꠁꠞ ꠝꠣʼꠞ ꠉꠦꠍꠦ ꠖꠤꠟ।
১২ ꠄꠞꠛꠣꠖꠦ ꠄꠢꠤꠀ ꠘꠛꠤꠞ ꠃꠝ꠆ꠝꠔ ꠅꠇꠟꠦ ꠔꠣꠘ ꠟꠣꠡ ꠘꠤꠀ ꠖꠣꠚꠘ ꠇꠞꠟꠣ,
ꠀꠞ ꠢꠎꠞꠔ ꠁꠍꠣꠞ ꠉꠦꠍꠦ ꠉꠤꠀ ꠅꠃ ꠈꠛꠞ ꠎꠣꠘꠣꠁꠟꠣ।
ꠙꠣꠌ ꠀꠎꠣꠞ ꠝꠣꠘꠡꠞ ꠉꠣꠁꠛꠤ ꠈꠣꠘꠤ
১৩ ꠄꠢꠤꠀꠞ ꠝꠃꠔꠞ ꠈꠛꠞ ꠢꠥꠘꠤꠀ ꠁꠍꠣꠄ ꠄꠇꠈꠣꠘ ꠘꠣꠅꠔ ꠃꠑꠤꠀ ꠘꠤꠞꠣꠁ ꠄꠇ ꠎꠣꠉꠣꠔ ꠉꠦꠟꠣꠉꠤ।
ꠔꠣꠁꠘ ꠉꠦꠍꠂꠘꠉꠤ ꠢꠥꠘꠤꠀ,
ꠘꠣꠘꠣꠘ ꠎꠣꠉꠣꠞ ꠝꠣꠘꠥꠡ ꠢꠥꠇꠘꠣ ꠛꠣꠄ ꠀꠐꠤ ꠀꠐꠤ ꠔꠣꠘ ꠈꠞꠦ ꠞꠅꠀꠘꠣ ꠅꠁꠟꠣ।
১৪ ꠔꠣꠁꠘ ꠘꠣꠅ ꠕꠘꠦ ꠟꠣꠝꠣꠞ ꠛꠣꠖꠦ ꠝꠣꠘꠡꠞ ꠜꠤꠠ ꠖꠦꠈꠤꠀ ꠔꠣꠘ ꠜꠤꠔꠞꠦ ꠖꠄꠀ ꠢꠣꠝꠣꠁꠉꠦꠟ।
ꠄꠞꠖꠣꠄ ꠔꠣꠞꠣꠞ ꠝꠣꠎꠦ ꠎꠔ ꠛꠦꠝꠣꠞꠤ ꠀꠍꠟꠣ,
ꠔꠣꠁꠘ ꠄꠞꠣꠞꠦ ꠜꠣꠟꠣ ꠇꠞꠟꠣ।
১৫ ꠛꠤꠀꠟꠤ ꠛꠣꠟꠣ ꠍꠣꠢꠣꠛꠤ ꠅꠇꠟ ꠇꠣꠘ꠆ꠖꠣꠔ ꠀꠁꠀ ꠇꠁꠟꠣ,
“ꠢꠥꠎꠥꠞ,
ꠁꠈꠣꠘ ꠔ ꠈꠥꠛ ꠘꠤꠞꠣꠁ ꠎꠣꠉꠣ,
ꠀꠞ ꠛꠦꠁꠟꠅ ꠎꠣꠞꠉꠤ।
ꠔꠦ ꠅꠔꠣ ꠝꠣꠘꠡꠞꠦ ꠛꠤꠖꠣꠄ ꠖꠤꠟꠣꠃꠇ꠆ꠇꠣ,
ꠄꠞꠣ ꠇꠣꠘ꠆ꠖꠣ-ꠇꠣꠍꠣꠞ ꠉꠣꠃꠀꠁꠘ꠆ꠔꠅ ꠉꠤꠀ ꠔꠣꠞꠣꠞ ꠈꠣꠘꠤ-ꠈꠥꠞꠣꠇꠤ ꠟꠃꠇ।”
১৬ ꠁꠍꠣꠄ ꠇꠁꠟꠣ,
“ꠘꠣ,
ꠔꠣꠞꠣ ꠎꠣꠅꠀꠞ ꠖꠞꠇꠣꠞ ꠘꠣꠁ,
ꠔꠥꠝꠞꠣꠃ ꠄꠞꠣꠞꠦ ꠈꠣꠘꠤ ꠖꠦꠅ।”
১৭ ꠍꠣꠢꠣꠛꠤ ꠅꠇꠟꠦ ꠇꠁꠟꠣ,
“ꠀꠝꠞꠣꠞ ꠉꠦꠍꠦ ꠔ ꠈꠣꠟꠤ ꠙꠣꠌꠈꠣꠘ ꠞꠥꠐꠤ ꠀꠞ ꠖꠥꠁꠐꠣ ꠛꠤꠞꠣꠘ ꠝꠣꠍ ꠍꠣꠠꠣ ꠀꠞ ꠇꠥꠘ꠆ꠔꠣꠃ ꠘꠣꠁ।”
১৮ ꠔꠣꠁꠘ ꠇꠁꠟꠣ,
“ꠅꠈꠘꠣꠁꠘ ꠀꠝꠣꠞ ꠉꠦꠍꠦ ꠀꠘꠅ।”
১৯ ꠛꠣꠖꠦ ꠔꠣꠁꠘ ꠝꠣꠘꠡꠞꠦ ꠇꠁꠟꠣ,
ꠊꠣꠡꠞ ꠃꠙꠞꠦ ꠛꠁꠎꠤꠔꠣ।
ꠔꠣꠁꠘ ꠢꠃ ꠙꠣꠌꠈꠣꠘ ꠞꠥꠐꠤ ꠀꠞ ꠖꠥꠁꠐꠣ ꠛꠤꠞꠣꠘ ꠝꠣꠍ ꠀꠔꠅ ꠟꠁꠟꠣ,
ꠀꠞ ꠀꠍꠝꠣꠘꠦꠖꠤ ꠌꠣꠁꠀ ꠡꠥꠇꠞꠤꠀ ꠀꠖꠣꠄ ꠇꠞꠟꠣ।
ꠛꠣꠖꠦ ꠅꠃ ꠞꠥꠐꠤ ꠐꠥꠇꠞꠣꠁꠀ ꠍꠣꠢꠣꠛꠤ ꠅꠇꠟꠞ ꠀꠔꠅ ꠖꠤꠟꠦ,
ꠄꠞꠣ ꠛꠣꠐꠤꠀ ꠖꠤꠟꠣꠁꠟꠣ।
২০ ꠅꠔꠣꠖꠤ ꠢꠇꠟ ꠝꠣꠘꠡꠦ ꠙꠦꠐ ꠜꠞꠤ ꠈꠣꠁꠟꠣ।
ꠈꠣꠁꠀ ꠢꠣꠞꠟꠦ ꠛꠣꠠꠔꠤ ꠎꠦꠔꠣ ꠞꠁꠟ,
ꠅꠈꠘꠣꠁꠘ ꠖꠟꠣ ꠇꠞꠟꠦ ꠛꠣꠞꠅ ꠐꠥꠇꠞꠤ ꠜꠞꠤꠉꠦꠟ।
২১ ꠅꠘꠥꠝꠣꠘ ꠙꠣꠌ ꠀꠎꠣꠞ ꠛꠦꠐꠣ ꠝꠣꠘꠡꠦ ꠅꠃ ꠈꠣꠘꠣ ꠈꠣꠁꠟꠣ,
ꠄꠞꠣꠞ ꠟꠉꠦ ꠛꠦꠐꠤꠘ ꠀꠞ ꠢꠥꠞꠥꠔ꠆ꠔꠣꠂꠘꠅ ꠀꠍꠟꠣ।
ꠙꠣꠘꠤꠞ ꠃꠙꠞꠦꠖꠤ ꠀꠐꠣ
২২ ꠈꠣꠘꠤꠞ ꠛꠣꠖꠦꠃ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠢꠥꠇꠥꠝ ꠖꠤꠟꠣ,
ꠔꠣꠁꠘ ꠎꠣꠁꠛꠣꠞ ꠀꠉꠦ ꠔꠣꠞꠣ ꠘꠣꠅꠅ ꠃꠑꠤꠀ ꠀꠅꠞꠞ ꠢꠙꠣꠞꠅ ꠎꠣꠁꠔꠣꠉꠤ।
ꠇꠁꠀ ꠔꠣꠁꠘ ꠅꠘꠞ ꠝꠣꠘꠡꠞꠦ ꠛꠤꠖꠣꠄ ꠖꠤꠟꠣꠁꠟꠣ।
২৩ ꠄꠞꠣ ꠉꠤꠀ ꠢꠣꠞꠟꠦ ꠔꠣꠁꠘ ꠖꠥꠀ ꠇꠞꠣꠞ ꠟꠣꠉꠤ ꠙꠣꠠꠞ ꠃꠙꠞꠦ ꠃꠑꠤꠟꠣ।
ꠢꠣꠁꠘ꠆ꠎꠣ ꠛꠣꠖ ꠙꠞ꠆ꠎꠘ꠆ꠔ ꠢꠘꠅ ꠄꠇꠟꠣ ꠞꠁꠟꠣ।
২৪ ꠅꠃ ꠡꠝꠄ ꠍꠣꠢꠣꠛꠤ ꠅꠇꠟꠞ ꠘꠣꠅ ꠀꠅꠞꠞ ꠝꠣꠎꠈꠣꠘꠅ ꠉꠦꠍꠦꠉꠤ,
ꠀꠞ ꠃꠚꠔꠣ ꠛꠣꠔꠣꠡꠞ ꠓꠦꠃꠄ ꠘꠣꠅ ꠈꠥꠛ ꠁꠟꠇꠣꠘꠤ ꠗꠞꠟ।
২৫ ꠙꠔꠣꠛꠣꠟꠣ ꠢꠎꠞꠔ ꠁꠍꠣ ꠀꠅꠞꠞ ꠙꠣꠘꠤꠞ ꠃꠙꠞꠦꠖꠤ ꠀꠐꠤꠀ ꠍꠣꠢꠣꠛꠤ ꠅꠇꠟꠞ ꠇꠣꠘ꠆ꠖꠣꠔ ꠀꠁꠞꠣ।
২৬ ꠅꠃ ꠡꠝꠄ ꠍꠣꠢꠣꠛꠤ ꠅꠇꠟꠦ ꠔꠣꠘꠞꠦ ꠖꠦꠈꠤꠀ ꠈꠥꠛ ꠒꠞꠣꠁꠟꠣ,
ꠔꠣꠞꠣ ꠜꠥꠔ ꠝꠘꠅ ꠇꠞꠤꠀ ꠜꠥꠔ,
ꠜꠥꠔ ꠇꠁꠀ ꠌꠤꠟ꠆ꠟꠣꠁꠀ ꠃꠑꠟꠣ।
২৭ ꠅꠃ ꠔꠣꠁꠘ ꠇꠁꠟꠣ,
“ꠒꠞꠣꠁꠅ ꠘꠣ,
ꠡꠣꠅꠡ ꠇꠞꠅ,
ꠁ ꠔ ꠀꠝꠤ।”
২৮ ꠔꠦꠃ ꠍꠣꠢꠣꠛꠤ ꠙꠤꠔꠞꠦ ꠇꠁꠟꠣ,
“ꠢꠥꠎꠥꠞ,
ꠀꠙꠘꠦꠃ ꠎꠥꠖꠤ ꠅꠁꠘ,
ꠔꠦ ꠀꠝꠣꠞꠦ ꠁꠎꠣꠎꠔ ꠖꠦꠃꠇ꠆ꠇꠣ,
ꠀꠝꠤꠅ ꠙꠣꠘꠤꠞ ꠃꠙꠞꠦꠖꠤ ꠀꠐꠤꠀ ꠀꠙꠘꠣꠞ ꠉꠦꠍꠦ ꠀꠁꠔꠣꠝ।”
২৯ ꠁꠍꠣꠄ ꠇꠁꠟꠣ,
“ꠀꠅ।”
ꠔꠦꠃ ꠙꠤꠔꠞ ꠘꠣꠅ ꠕꠣꠇꠤ ꠟꠣꠝꠤꠀ ꠙꠣꠘꠤꠞ ꠃꠙꠞꠦꠖꠤ ꠀꠐꠣ ꠗꠞꠟꠣ।
৩০ ꠅꠁꠟꠦ ꠛꠣꠔꠣꠡꠞ ꠎꠥꠞ ꠖꠦꠈꠤꠀ ꠔꠣꠁꠘ ꠒꠞꠣꠁ ꠉꠦꠟꠣ,
ꠀꠞ ꠛꠥꠠꠤꠎꠤꠞꠣ ꠖꠦꠈꠤꠀ ꠎꠥꠞꠦ ꠎꠥꠞꠦ ꠁꠍꠣꠞꠦ ꠒꠣꠇ ꠖꠤꠟꠣ,
“ꠢꠥꠎꠥꠞ,
ꠢꠥꠎꠥꠞ,
ꠀꠝꠣꠞꠦ ꠛꠣꠌꠣꠃꠇ꠆ꠇꠣ।”
৩১ ꠟꠉꠦ ꠟꠉꠦ ꠁꠍꠣꠄ ꠀꠔ ꠛꠣꠠꠣꠁꠀ ꠔꠣꠘꠞꠦ ꠗꠞꠤꠀ ꠇꠁꠟꠣ,
“ꠅꠃꠘꠤ ꠔꠥꠝꠣꠞ ꠁꠝꠣꠘ?
ꠝꠘꠅ ꠡꠘ꠆ꠖꠄ ꠀꠘꠟꠣꠄ ꠇꠦꠘꠦ?”
৩২ ꠛꠣꠖꠦ ꠁꠍꠣ ꠀꠞ ꠙꠤꠔꠞ ꠘꠣꠅꠅ ꠃꠑꠔꠦꠃ ꠛꠣꠔꠣꠡ ꠕꠣꠝꠤꠉꠦꠟ।
৩৩ ꠔꠦꠃ ꠘꠣꠅꠞ ꠢꠇꠟꠦ ꠔꠣꠘꠞꠦ ꠍꠁꠎꠖꠣ ꠇꠞꠤꠀ ꠇꠁꠟꠣ,
“ꠢꠥꠎꠥꠞ,
ꠀꠍꠟꠦꠃ ꠀꠙꠘꠦ ꠀꠟ꠆ꠟꠣ ꠙꠣꠇꠞ ꠈꠣꠍ ꠝꠣꠄꠀꠞ ꠎꠘ,
ꠁꠛꠘꠥꠟ꠆ꠟꠣ।”