ꠢꠎꠞꠔ ꠁꠍꠣ ꠞꠥꠢꠥꠟ꠆ꠟꠣꠞ ꠘꠥꠞꠣꠘꠤ ꠍꠥꠞꠔ
১৭
১ ꠄꠞ ꠍꠄꠖꠤꠘ ꠛꠣꠖꠦ ꠢꠎꠞꠔ ꠁꠍꠣꠄ ꠈꠣꠟꠤ ꠙꠤꠔꠞ,
ꠁꠀꠇꠥꠛ ꠀꠞ ꠁꠀꠇꠥꠛꠞ ꠜꠣꠁ ꠢꠣꠘ꠆ꠘꠣꠘꠞꠦ ꠟꠁꠀ ꠃꠌꠣ ꠄꠇ ꠙꠣꠠꠞ ꠃꠙꠞꠦ ꠃꠑꠟꠣ।
২ ꠃꠑꠤꠀ ꠢꠣꠞꠟꠦ ꠄꠞꠣꠞ ꠌꠃꠈꠞ ꠍꠣꠝꠘꠦ ꠔꠣꠘ ꠘꠤꠎꠞ ꠍꠥꠞꠔ ꠛꠖꠟꠤ ꠉꠦꠟ।
ꠔꠣꠘ ꠝꠥꠈ ꠅꠁꠉꠦꠟ ꠡꠥꠞꠥꠎꠞ ꠟꠣꠈꠣꠘ ꠏꠟꠝꠟ,
ꠀꠞ ꠚꠤꠘ꠆ꠘꠞ ꠟꠦꠛꠣꠍ ꠅꠁꠟ ꠗꠟꠣ ꠌꠇꠌꠇꠣ।
৩ ꠍꠣꠢꠣꠛꠤ ꠅꠇꠟꠦ ꠖꠦꠈꠟꠣ,
ꠢꠎꠞꠔ ꠝꠥꠍꠣ ꠀꠞ ꠁꠟꠤꠀꠍ ꠘꠛꠤꠄ ꠀꠁꠀ ꠔꠣꠘ ꠟꠉꠦ ꠛꠣꠔꠌꠤꠔ ꠇꠞꠞꠣ।
৪ ꠅꠃ ꠡꠝꠄ ꠙꠤꠔꠞꠦ ꠇꠁꠟꠣ,
“ꠢꠥꠎꠥꠞ,
ꠀꠝꠞꠣ ꠔ ꠅꠘꠅ ꠀꠍꠤ,
ꠈꠥꠛ ꠜꠣꠟꠣ ꠅꠁꠍꠦ।
ꠀꠙꠘꠦ ꠌꠣꠁꠟꠦ ꠀꠝꠤ ꠔꠤꠘꠈꠣꠘ ꠒꠦꠞꠣ-ꠊꠞ ꠛꠣꠘꠣꠁꠟꠣꠁ,
ꠄꠇꠈꠣꠘ ꠀꠙꠘꠣꠞ,
ꠄꠇꠈꠣꠘ ꠝꠥꠍꠣ ꠘꠛꠤꠞ ꠀꠞ ꠄꠇꠈꠣꠘ ꠁꠟꠤꠀꠍ ꠘꠛꠤꠞ ꠟꠣꠉꠤ।”
৫ ꠔꠣꠁꠘ ꠁꠍꠣꠞ ꠟꠉꠦ ꠝꠣꠔꠤꠞꠣ,
ꠀꠈꠔꠣꠃ ꠗꠟꠣ ꠗꠛꠗꠛꠣ ꠝꠦꠊꠞ ꠄꠇ ꠐꠥꠇꠞꠣꠄ ꠀꠁꠀ ꠄꠞꠣꠞꠦ ꠉꠥꠞꠤꠟꠤꠟ,
ꠀꠞ ꠅꠃ ꠐꠥꠇꠞꠣ ꠕꠣꠇꠤ ꠉꠣꠁꠛꠤ ꠀꠅꠀꠎ ꠀꠁꠟ,
“ꠄꠁꠘꠃ ꠀꠝꠣꠞ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣ,
ꠄꠘ ꠃꠙꠞꠦ ꠀꠝꠤ ꠈꠥꠛ ꠈꠥꠡꠤ,
ꠔꠥꠝꠞꠣ ꠄꠘ ꠘꠍꠤꠅꠔ ꠢꠥꠘꠅ।”
৬ ꠁꠈꠣꠘ ꠢꠥꠘꠤꠀ ꠍꠣꠢꠣꠛꠤ ꠅꠇꠟ ꠈꠥꠛ ꠒꠞꠣꠁꠟꠣ,
ꠒꠞꠣꠁꠀ ꠝꠣꠐꠤꠔ ꠙꠠꠤꠉꠦꠟꠣ।
৭ ꠅꠃ ꠡꠝꠄ ꠁꠍꠣ ꠀꠁꠀ ꠔꠣꠞꠣꠞꠦ ꠍꠁꠀ ꠇꠁꠟꠣ,
“ꠃꠑꠅ,
ꠒꠞꠣꠁꠅ ꠘꠣ।”
৮ ꠔꠦꠃ ꠔꠣꠞꠣ ꠌꠃꠈ ꠔꠥꠟꠤ ꠌꠣꠁꠟꠣ,
ꠌꠣꠁꠀ ꠈꠣꠟꠤ ꠁꠍꠣ ꠍꠣꠠꠣ ꠀꠞ ꠇꠦꠃꠞꠞꠦ ꠁꠘꠅ ꠖꠦꠈꠟꠣ ꠘꠣ।
৯ ꠙꠣꠠ ꠕꠣꠇꠤ ꠟꠣꠝꠤꠀ ꠀꠅꠀꠞ ꠛꠣꠟꠣ ꠁꠍꠣꠄ ꠄꠞꠣꠞꠦ ꠢꠥꠇꠥꠝ ꠖꠤꠟꠣ,
“ꠀꠁꠎ ꠎꠦꠔꠣ ꠖꠦꠈꠟꠣꠄ,
ꠀꠝꠤ ꠛꠤꠘ-ꠀꠖꠝ ꠝꠞꠣ ꠕꠣꠇꠤ ꠎꠤꠘ꠆ꠖꠣ ꠅꠁꠀ ꠃꠑꠣꠞ ꠀꠉ ꠙꠞ꠆ꠎꠘ꠆ꠔ ꠁꠔꠣ ꠀꠞ ꠇꠦꠃꠞꠞꠦ ꠢꠥꠘꠣꠁꠅ ꠘꠣ।”
১০ ꠍꠣꠢꠣꠛꠤ ꠅꠇꠟꠦ ꠁꠍꠣꠞꠦ ꠎꠤꠇꠣꠁꠟꠣ,
“ꠢꠥꠎꠥꠞ,
ꠝꠃꠟꠣꠘꠣ ꠅꠇꠟꠦ ꠇꠦꠘꠦ ꠇꠂꠘ,
ꠀꠟ-ꠝꠍꠤ ꠀꠁꠛꠣꠞ ꠀꠉꠦ,
ꠙꠄꠟꠣ ꠁꠟꠤꠀꠍ ꠘꠛꠤꠞ ꠀꠅꠀ ꠎꠞꠥꠞ?”
১১ ꠔꠣꠁꠘ ꠇꠁꠟꠣ,
“ꠁꠈꠣꠘ ꠢꠣꠍꠣ ꠇꠕꠣ,
ꠙꠄꠟꠣ ꠢꠎꠞꠔ ꠁꠟꠤꠀꠍꠦ ꠀꠁꠀ ꠢꠇ꠆ꠇꠟꠔꠣ ꠀꠉꠞ ꠢꠣꠟꠔꠅ ꠚꠤꠞꠣꠁꠀ ꠀꠘꠛꠣ।
১২ ꠅꠁꠟꠦ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ,
ꠁꠟꠤꠀꠍ ꠘꠛꠤ ꠑꠤꠇꠃ ꠀꠁꠍꠟꠣ।
ꠁ ꠖꠥꠘꠤꠀꠞ ꠝꠣꠘꠡꠦ ꠔꠣꠘꠞꠦ ꠘꠣ ꠌꠤꠘꠣꠄ,
ꠔꠣꠘ ꠟꠉꠦ ꠎꠦꠔꠣ ꠝꠘꠅ ꠟꠄ ꠅꠔꠣ ꠇꠞꠍꠦ।
ꠀꠞ ꠀꠝꠤ ꠛꠤꠘ-ꠀꠖꠝꠦꠅ ꠅꠃ ꠟꠣꠈꠣꠘ ꠖꠥꠈ-ꠝꠍꠤꠛꠔ ꠙꠥꠀꠘꠤ ꠟꠣꠉꠛ।”
১৩ ꠔꠦꠃ ꠍꠣꠢꠣꠛꠤ ꠅꠇꠟꠦ ꠛꠥꠎꠤꠟꠤꠟꠣ,
ꠔꠣꠁꠘ ꠅꠈꠘ ꠄꠢꠤꠀ ꠘꠛꠤꠞ ꠇꠕꠣ ꠇꠁꠞꠣ।
ꠎꠤꠘꠞ ꠀꠍꠞ ꠀꠟꠣ ꠝꠤꠞꠇꠤ ꠛꠦꠝꠣꠞꠤꠞ ꠡꠤꠚꠣ
১৪ ꠛꠣꠖꠦ ꠔꠣꠞꠣ ꠙꠣꠠ ꠕꠣꠇꠤ ꠟꠣꠝꠤꠀ ꠀꠁꠟꠣ।
ꠅꠘꠅ ꠝꠣꠘꠡꠞ ꠜꠤꠠ ꠀꠍꠤꠟ,
ꠅꠃ ꠜꠤꠠꠞ ꠝꠣꠎꠦ ꠄꠇ ꠛꠦꠐꠣ ꠀꠁꠀ ꠁꠍꠣꠞ ꠍꠣꠝꠘꠦ ꠀꠐꠥ ꠉꠣꠟꠣꠖꠤ ꠛꠁꠀ ꠇꠂꠟ,
১৫ “ꠢꠥꠎꠥꠞ,
ꠀꠝꠣꠞ ꠙꠥꠀꠉꠥꠞꠦ ꠛꠣꠌꠣꠃꠇ꠆ꠇꠣ,
ꠢꠦ ꠝꠤꠞꠇꠤ ꠛꠦꠝꠣꠞꠦ ꠈꠥꠛ ꠇꠡ꠆ꠐ ꠇꠞꠦꠞ।
ꠅꠃ ꠛꠦꠝꠣꠞ ꠃꠑꠟꠦ ꠢꠦ ꠢꠣꠝꠦꠡꠣ ꠀꠉꠥꠘꠤꠔ ꠀꠞ ꠙꠣꠘꠤꠔ ꠙꠠꠤ ꠎꠣꠄ।
১৬ ꠀꠝꠤ ꠔꠣꠞꠦ ꠟꠁꠀ ꠀꠙꠘꠣꠞ ꠍꠣꠢꠣꠛꠤ ꠅꠇꠟꠞ ꠉꠦꠍꠦ ꠀꠁꠍꠟꠣꠝ,
ꠅꠁꠟꠦ ꠔꠣꠞꠣ ꠜꠣꠟꠣ ꠇꠞꠔꠣ ꠙꠣꠞꠍꠂꠘ ꠘꠣ।”
১৭ ꠁꠍꠣꠄ ꠇꠁꠟꠣ,
“ꠢꠣꠄꠞꠦ ꠛꠦꠁꠝꠣꠘ ꠀꠞ ꠘꠣꠚꠞꠝꠣꠘꠞ ꠎꠣꠔ,
ꠀꠝꠤ ꠀꠞ ꠇꠔꠖꠤꠘ ꠔꠥꠝꠞꠣꠞ ꠟꠉꠦ ꠞꠁꠝꠥ,
ꠔꠥꠝꠞꠣꠞ ꠎꠣꠟꠣ ꠇꠔꠖꠤꠘ ꠡꠁꠎ꠆ꠎ ꠇꠞꠝꠥ?
ꠖꠦꠈꠤ,
ꠔꠥꠝꠣꠞ ꠙꠥꠀꠞꠦ ꠅꠘꠅ ꠀꠘꠅ।”
১৮ ꠁꠍꠣꠄ ꠙꠥꠀꠞ ꠟꠉꠞ ꠢꠃ ꠎꠤꠘ꠆ꠘꠣꠔꠞꠦ ꠗꠣꠝꠇꠤ ꠖꠤꠟꠣ,
ꠗꠣꠝꠇꠤ ꠈꠣꠁꠀ ꠎꠤꠘꠦ ꠙꠥꠀꠞꠦ ꠍꠣꠠꠤꠀ ꠉꠦꠟꠉꠤ,
ꠟꠉꠦ ꠟꠉꠦ ꠢꠦ ꠜꠣꠟꠣ ꠅꠁꠉꠦꠟ।
১৯ ꠛꠣꠖꠦ ꠍꠣꠢꠣꠛꠤ ꠅꠇꠟꠦ ꠘꠤꠞꠣꠟꠣꠄ ꠁꠍꠣꠞꠦ ꠎꠤꠇꠣꠁꠟꠣ,
“ꠢꠥꠎꠥꠞ,
ꠀꠝꠞꠣ ꠇꠦꠘꠦ ꠅꠃ ꠎꠤꠘ꠆ꠘꠣꠔ ꠍꠣꠠꠣꠁꠔꠣꠝ ꠙꠣꠞꠟꠣꠝ ꠘꠣ?”
২০ ꠔꠣꠁꠘ ꠇꠁꠟꠣ,
“ꠔꠥꠝꠞꠣꠞ ꠁꠝꠣꠘꠞ ꠇꠝꠎꠥꠞꠤꠞ ꠟꠣꠉꠤꠃ ꠙꠣꠞꠍ ꠘꠣ।
ꠀꠝꠤ ꠢꠣꠍꠣꠃ ꠇꠁꠞꠣꠝ,
ꠔꠥꠝꠞꠣꠞ ꠖꠤꠟꠅ ꠎꠥꠖꠤ ꠄꠉꠥ ꠒꠦꠋꠉꠣ ꠛꠤꠌꠤ ꠙꠞꠤꠝꠣꠘ ꠁꠝꠣꠘ ꠕꠣꠇꠦ,
ꠀꠞ ꠔꠥꠝꠞꠣ ꠅꠃ ꠙꠣꠠꠞꠦ ꠇꠅ,
‘ꠅꠘ ꠕꠣꠇꠤ ꠒꠥꠟꠤꠀ ꠢꠘꠅ ꠎꠣꠅꠉꠤ,’
ꠔꠦ ꠅꠃ ꠙꠣꠠꠅ ꠒꠥꠟꠤꠎꠤꠛ।
ꠔꠥꠝꠞꠣꠞ ꠅꠡꠣꠁꠖ꠆ꠖ ꠇꠥꠘ꠆ꠔꠣꠃ ꠞꠁꠔ ꠘꠣꠄ।
২১ ꠢꠥꠘꠅ,
ꠖꠥꠀ ꠀꠞ ꠞꠥꠎꠣ ꠞꠣꠈꠣ ꠍꠣꠠꠣ ꠁ-ꠎꠣꠔ ꠎꠤꠘ ꠍꠣꠠꠣꠁꠟ ꠎꠣꠄ ꠘꠣ।”
ꠖꠥꠍꠞꠣ ꠛꠣꠞ ꠘꠤꠎꠞ ꠝꠃꠔꠞ ꠀꠉꠣꠝ ꠈꠛꠞ
২২ ꠛꠣꠖꠦ ꠉꠣꠟꠤꠟ ꠎꠤꠟꠣꠔ ꠀꠁꠀ ꠁꠍꠣꠄ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠇꠁꠟꠣ,
“ꠀꠝꠤ ꠛꠤꠘ-ꠀꠖꠝꠞꠦ ꠝꠣꠘꠡꠞ ꠀꠔꠅ ꠗꠞꠣꠁ ꠖꠦꠅꠀ ꠅꠁꠛ।
২৩ ꠔꠣꠞꠣ ꠀꠝꠣꠞꠦ ꠎꠣꠘꠦ ꠝꠣꠞꠤꠟꠤꠛꠣ,
ꠝꠞꠣꠞ ꠔꠤꠘ ꠖꠤꠘꠞ ꠖꠤꠘ ꠀꠝꠤ ꠢꠤꠞꠛꠣꠞ ꠎꠤꠘ꠆ꠖꠣ ꠅꠁꠀ ꠃꠑꠝꠥ।”
ꠁꠈꠣꠘ ꠢꠥꠘꠤꠀ ꠍꠣꠢꠣꠛꠤ ꠅꠇꠟ ꠈꠥꠛ ꠛꠦꠎꠣꠞ ꠅꠁꠉꠦꠟꠣ।
ꠝꠣꠍꠞ ꠝꠥꠈꠅ ꠞꠥꠙꠣꠞ ꠐꠦꠇꠣ
২৪ ꠄꠞꠛꠣꠖꠦ ꠁꠍꠣꠄ ꠍꠣꠢꠣꠛꠤ ꠅꠇꠟꠞꠦ ꠟꠁꠀ ꠇꠚꠞꠘꠣꠃꠝ ꠐꠣꠃꠘꠅ ꠉꠦꠟꠣ,
ꠅꠃ ꠡꠝꠄ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠈꠣꠎꠘꠣ ꠔꠥꠟꠞꠣ ꠅꠇꠟꠦ ꠍꠣꠢꠣꠛꠤ ꠙꠤꠔꠞꠞꠦ ꠇꠁꠟꠣ,
“ꠀꠙꠘꠣꠞꠣꠞ ꠃꠡ꠆ꠔꠣꠖꠦ ꠛꠣꠄꠔꠥꠟ-ꠝꠥꠇꠣꠖ꠆ꠖꠍ ꠇꠣꠛꠣ ꠡꠞꠤꠚꠞ ꠌꠣꠘ꠆ꠖꠣ ꠖꠦꠁꠘ ꠘꠣ ꠘꠤ?”
২৫ ꠙꠤꠔꠞꠦ ꠎꠥꠀꠙ ꠖꠤꠟꠣ,
“ꠎꠤꠅꠄ,
ꠖꠦꠁꠘ ꠔ।”
ꠅꠈꠣꠘ ꠇꠁꠀ ꠙꠤꠔꠞ ꠊꠞꠅ ꠢꠣꠝꠣꠁꠀ ꠇꠥꠘ꠆ꠔꠣ ꠝꠣꠔꠣꠞ ꠀꠉꠦꠃ ꠁꠍꠣꠄ ꠇꠁꠟꠣ,
“ꠙꠤꠔꠞ,
ꠔꠥꠝꠤ ꠇꠤꠔꠣ ꠝꠘꠅ ꠇꠞꠅ?
ꠖꠥꠘꠤꠀꠞ ꠛꠣꠖꠡꠣ ꠅꠇꠟꠦ ꠇꠣꠞ ꠉꠦꠍ ꠕꠣꠇꠤ ꠈꠣꠎꠘꠣ-ꠌꠣꠘ꠆ꠖꠣ ꠀꠖꠣꠄ ꠇꠞꠂꠘ?
ꠘꠤꠎꠞ ꠝꠣꠘꠡꠞ ꠉꠦꠍ ꠕꠣꠇꠤ,
ꠘꠣ ꠛꠣꠞꠣ ꠝꠣꠘꠡꠞ ꠉꠦꠍ ꠕꠣꠇꠤ?”
২৬ ꠙꠤꠔꠞꠦ ꠇꠁꠟꠣ,
“ꠛꠣꠞꠣ ꠝꠣꠘꠡꠞ ꠉꠦꠍ ꠕꠣꠇꠤ।”
ꠔꠦꠃ ꠁꠍꠣꠄ ꠇꠁꠟꠣ,
“ꠔꠦ ꠔ ꠘꠤꠎꠞ ꠝꠣꠘꠥꠡ ꠁꠔꠣ ꠕꠣꠇꠤ ꠛꠣꠌꠤꠉꠦꠟ,
ꠀꠞ ꠀꠝꠞꠣꠅ ꠀꠟ꠆ꠟꠣꠞ ꠀꠙꠘ ꠝꠣꠘꠥꠡ ꠅꠀꠄ ꠀꠟ꠆ꠟꠣꠞ ꠊꠞꠞ ꠈꠣꠎꠘꠣ ꠕꠣꠇꠤ ꠛꠣꠌꠤ ꠉꠦꠍꠤ।
২৭ ꠅꠁꠟꠦ ꠀꠝꠞꠣ ꠄꠞꠣꠞꠦ ꠛꠦꠎꠣꠞ ꠇꠞꠔꠣꠝ ꠘꠣꠄ,
ꠄꠞꠟꠣꠉꠤ ꠔꠥꠝꠤ ꠀꠅꠞꠅ ꠎꠣꠅ,
ꠉꠤꠀ ꠝꠣꠍ ꠝꠣꠞꠣꠞ ꠟꠣꠉꠤ ꠛꠠꠤ ꠚꠣꠟꠣꠅ,
ꠛꠠꠤꠔ ꠙꠄꠟꠣ ꠎꠦ ꠝꠣꠍ ꠟꠣꠉꠛ,
ꠅꠉꠥꠞ ꠝꠥꠈꠞ ꠜꠤꠔꠞꠦ ꠄꠇꠐꠣ ꠞꠥꠙꠣꠞ ꠐꠦꠇꠣ ꠙꠣꠁꠛꠣꠄ।
ꠅꠃ ꠐꠦꠇꠣ ꠘꠤꠀ ꠔꠥꠝꠣꠞ ꠀꠞ ꠀꠝꠣꠞ ꠌꠣꠘ꠆ꠖꠣ ꠖꠤꠟꠣꠅ।”