ꠢꠎꠞꠔ ꠁꠍꠣꠞ ꠃꠚꠣꠔ ꠀꠞ ꠎꠤꠘ꠆ꠖꠣ ꠅꠀ (২৬:১-২৮:২০)
ꠢꠎꠞꠔ ꠁꠍꠣꠞꠦ ꠇꠣꠔꠟ ꠇꠞꠣꠞ ꠙꠞꠣꠝꠤꠡ
২৬
১ ꠅꠃ ꠛꠄꠀꠘ ꠡꠦꠡ ꠅꠁꠀ ꠢꠣꠞꠟꠦ,
ꠁꠍꠣꠄ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠇꠁꠟꠣ,
২ “ꠔꠥꠝꠞꠣꠞ ꠔ ꠎꠣꠘꠣ ꠀꠍꠦ,
ꠀꠞ ꠖꠥꠁ ꠖꠤꠘ ꠛꠣꠖꠦꠃ ꠀꠎꠣꠖꠤ ꠁꠖ।
ꠁꠖꠞ ꠡꠝꠄ ꠀꠝꠤ ꠛꠤꠘ-ꠀꠖꠝꠞꠦ ꠍꠟꠤꠛꠅ ꠟꠐꠇꠣꠁꠀ ꠝꠣꠞꠣꠞ ꠟꠣꠉꠤ ꠗꠞꠣꠁ ꠖꠦꠅꠀ ꠅꠁꠛ।”
৩ ꠅꠃ ꠡꠝꠄ ꠛꠠ ꠁꠝꠣꠝ ꠀꠞ ꠝꠥꠞꠛ꠆ꠛꠤ ꠅꠇꠟ ꠀꠁꠀ,
ꠔꠣꠞꠣꠞ ꠙꠞꠗꠣꠘ ꠁꠝꠣꠝ ꠇꠣꠄꠀꠚꠣꠞ ꠛꠣꠠꠤꠔ ꠖꠟꠣ ꠅꠁꠟꠣ।
৪ ꠖꠟꠣ ꠅꠁꠀ ꠅꠃ ꠙꠞꠣꠝꠤꠡ ꠇꠞꠟꠣ,
ꠁꠍꠣꠞꠦ ꠇꠤꠟꠣ ꠟꠥꠇꠣꠁꠀ ꠀꠐꠇ ꠇꠞꠤꠀ ꠇꠣꠔꠟ ꠇꠞꠣ ꠎꠣꠄ।
৫ ꠅꠁꠟꠦ ꠔꠣꠞꠣ ꠇꠁꠟꠣ,
“ꠁꠖꠞ ꠡꠝꠄ ꠔꠣꠞꠦ ꠗꠞꠔꠣꠝ ꠘꠣꠄ।
ꠗꠞꠟꠦ ꠝꠣꠘꠡꠦ ꠉꠘ꠆ꠒꠉꠥꠟ ꠟꠣꠉꠣꠁ ꠖꠤꠔ ꠙꠣꠞꠦ।”
ꠢꠎꠞꠔ ꠁꠍꠣꠞꠦ ꠢꠣꠎꠣꠘꠤꠞ ꠜꠦꠖ
৬ ꠁꠍꠣ ꠎꠦꠛꠟꠣ ꠛꠣꠄꠔ-ꠀꠘꠤꠀ ꠉꠣꠃꠞ ꠙꠌꠣ-ꠇꠥꠡ꠆ꠑ ꠛꠦꠝꠣꠞꠤ ꠍꠣꠁꠝꠘꠞ ꠛꠣꠠꠤꠔ ꠀꠍꠟꠣ,
৭ ꠅꠃ ꠡꠝꠄ ꠄꠇ ꠛꠦꠐꠤ ꠝꠣꠘꠥꠡ ꠔꠣꠘ ꠉꠦꠍꠦ ꠀꠁꠟꠣ।
ꠛꠦꠐꠤꠄ ꠌꠤꠘꠞ ꠄꠇ ꠛꠂꠀꠝꠅ ꠇꠞꠤ ꠈꠥꠛ ꠖꠣꠝꠤ ꠈꠣꠐꠤ ꠀꠔꠞ ꠀꠘꠍꠤꠟꠣ।
ꠁꠍꠣ ꠈꠣꠅꠀꠔ ꠛꠁꠀ ꠢꠣꠞꠟꠦ ꠛꠦꠐꠤꠄ ꠢꠇꠟ ꠀꠔꠞ ꠔꠣꠘ ꠝꠣꠕꠣꠔ ꠓꠣꠟꠤ ꠖꠤꠟꠣ।
৮ ꠁꠔꠣ ꠖꠦꠈꠤꠀ ꠍꠣꠢꠣꠛꠤ ꠅꠇꠟ ꠛꠤꠞꠇ꠆ꠔ ꠅꠁꠀ ꠇꠁꠟꠣ,
“ꠅꠃ ꠀꠔꠞ ꠚꠥꠐꠣꠁꠘ ꠇꠦꠘꠦ ꠛꠞꠛꠣꠖ ꠇꠞꠣ ꠅꠁꠟ?
৯ ꠁ ꠚꠥꠐꠤꠘ ꠛꠦꠌꠤꠟꠦ ꠔ ꠛꠃꠔ ꠐꠦꠇꠣ ꠙꠣꠁꠀ ꠉꠞꠤꠛ ꠅꠇꠟꠞꠦ ꠛꠤꠟꠣꠁ ꠖꠦꠅꠀ ꠉꠦꠟ ꠅꠘꠦ।”
১০ ꠁꠈꠣꠘ ꠛꠥꠎꠤꠀ ꠁꠍꠣꠄ ꠇꠁꠟꠣ,
“ꠔꠥꠝꠞꠣ ꠁ ꠛꠦꠐꠤꠉꠥꠞꠦ ꠖꠥꠈ ꠖꠤꠞꠣꠄ ꠇꠦꠘꠦ?
ꠔꠣꠁꠘ ꠔ ꠀꠝꠣꠞ ꠟꠣꠉꠤ ꠑꠤꠇ ꠇꠣꠝꠃ ꠇꠞꠍꠂꠘ।
১১ ꠉꠞꠤꠛ ꠅꠇꠟ ꠔ ꠢꠣꠝꠦꠡꠣꠃ ꠔꠥꠝꠞꠣꠞ ꠟꠉꠦ ꠞꠁꠛꠣ।
ꠅꠁꠟꠦ ꠀꠝꠣꠞꠦ ꠔ ꠢꠣꠝꠦꠡꠣ ꠙꠣꠁꠔꠣꠄ ꠘꠣꠄ।
১২ ꠄꠁꠘ ꠀꠁꠀ ꠀꠝꠣꠞ ꠉꠔꠞꠅ ꠀꠔꠞ ꠝꠣꠈꠣꠁꠀ,
ꠖꠣꠚꠘ-ꠇꠣꠚꠘꠞ ꠟꠣꠉꠤ ꠀꠝꠣꠞꠦ ꠎꠥꠁꠔ ꠇꠞꠍꠂꠘ।
১৩ ꠀꠝꠤ ꠔꠥꠝꠞꠣꠞꠦ ꠢꠣꠍꠣ ꠇꠕꠣ ꠇꠁꠞꠣꠝ,
ꠖꠥꠘꠤꠀꠞ ꠎꠦꠇꠥꠘꠥ ꠎꠣꠉꠣꠔ ꠀꠟ꠆ꠟꠣꠞ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠣꠞ ꠡꠝꠄ,
ꠅꠃ ꠛꠦꠌꠣꠠꠤꠞꠦ ꠝꠘꠅ ꠇꠞꠣꠞ ꠟꠣꠉꠤ,
ꠔꠣꠘ ꠁ ꠘꠦꠇ ꠇꠣꠝꠞ ꠇꠕꠣꠈꠣꠘꠅ ꠇꠅꠀ ꠎꠣꠁꠛ।”
ꠍꠣꠢꠣꠛꠤ ꠁꠢꠥꠖꠣꠞ ꠛꠦꠁꠝꠣꠘꠤ
১৪ ꠛꠣꠖꠦ ꠔꠣꠘ ꠛꠣꠞꠅꠎꠘ ꠍꠣꠢꠣꠛꠤꠞ ꠝꠣꠎꠞ ꠄꠇꠎꠘ,
ꠄꠘ ꠘꠣꠝ ꠁꠢꠥꠖꠣ ꠁꠡ꠆ꠇꠣꠞꠤꠀꠔ,
ꠄꠁꠘ ꠛꠠ ꠁꠝꠣꠝ ꠅꠇꠟꠞ ꠉꠦꠍꠦ ꠉꠤꠀ ꠇꠁꠟꠣ,
১৫ “ꠁꠍꠣꠞꠦ ꠀꠙꠘꠣꠞꠣꠞ ꠀꠔꠅ ꠗꠞꠣꠁꠀ ꠖꠤꠟꠦ ꠀꠝꠣꠞꠦ ꠇꠤꠔꠣ ꠖꠤꠛꠣ?”
ꠔꠦꠃ ꠛꠠ ꠁꠝꠣꠝ ꠅꠇꠟꠦ ꠔꠣꠞꠦ ꠞꠥꠙꠣꠞ ꠔꠤꠡ ꠐꠦꠇꠣ ꠖꠤꠟꠣ।
১৬ ꠄꠞꠛꠣꠖ ꠕꠣꠇꠤꠃ ꠁꠢꠥꠖꠣꠄ ꠁꠍꠣꠞꠦ ꠗꠞꠣꠁꠀ ꠖꠦꠅꠀꠞ ꠡꠥꠎꠥꠉ ꠔꠥꠇꠣꠘꠤꠔ ꠞꠁꠟ।
ꠢꠎꠞꠔ ꠁꠍꠣꠞ ꠀꠈꠦꠞꠤ ꠁꠖ
১৭ ꠈꠣꠝꠤꠞ ꠍꠣꠠꠣ ꠞꠥꠐꠤ ꠈꠣꠅꠀꠞ ꠁꠖꠞ ꠙꠄꠟꠣ ꠖꠤꠘ,
ꠍꠣꠢꠣꠛꠤ ꠅꠇꠟꠦ ꠀꠁꠀ ꠁꠍꠣꠞꠦ ꠎꠤꠇꠣꠁꠟꠣ,
“ꠢꠥꠎꠥꠞ,
ꠀꠝꠞꠣ ꠇꠥꠘ ꠎꠣꠉꠣꠔ ꠉꠤꠀ ꠀꠙꠘꠣꠞ ꠟꠣꠉꠤ ꠀꠎꠣꠖꠤ ꠁꠖꠞ ꠈꠣꠘꠣ ꠔꠤꠀꠞ ꠇꠞꠔꠣꠝ?”
১৮ ꠔꠣꠁꠘ ꠎꠥꠀꠙ ꠖꠤꠟꠣ,
“ꠔꠥꠝꠞꠣ ꠐꠣꠃꠘꠅ ꠎꠣꠅ।
ꠉꠤꠀ ꠅꠝꠥꠇ ꠝꠣꠘꠡꠞꠦ ꠇꠁꠅ,
‘ꠢꠥꠎꠥꠞꠦ ꠇꠁꠍꠂꠘ,
ꠀꠝꠣꠞ ꠡꠝꠄ ꠊꠘꠣꠁꠀ ꠀꠁꠌ꠆ꠍꠦ,
ꠔꠦ ꠀꠝꠤ ꠀꠝꠣꠞ ꠍꠣꠢꠣꠛꠤ ꠅꠇꠟꠞꠦ ꠟꠁꠀ ꠔꠥꠝꠣꠞ ꠛꠣꠠꠤꠔ ꠁꠖ ꠇꠞꠝꠥ।’ ”
১৯ ꠁꠍꠣꠞ ꠢꠥꠇꠥꠝ ꠝꠣꠚꠤꠇ ꠍꠣꠢꠣꠛꠤ ꠅꠇꠟꠦ ꠉꠤꠀ ꠀꠎꠣꠖꠤ ꠁꠖꠞ ꠈꠣꠘꠤ ꠔꠤꠀꠞ ꠇꠞꠟꠣ।
২০ ꠛꠣꠖꠦ ꠢꠣꠁꠘ꠆ꠎꠣꠛꠣꠟꠣ ꠁꠍꠣꠄ ꠔꠣꠘ ꠛꠣꠞꠅꠎꠘ ꠍꠣꠢꠣꠛꠤꠞꠦ ꠟꠁꠀ ꠈꠣꠘꠤꠔ ꠛꠁꠟꠣ।
২১ ꠛꠁꠀ ꠇꠁꠟꠣ,
“ꠀꠝꠤ ꠔꠥꠝꠞꠣꠞꠦ ꠢꠣꠍꠣ ꠇꠕꠣ ꠇꠁꠞꠣꠝ,
ꠔꠥꠝꠞꠣꠞ ꠝꠣꠎꠞ ꠄꠇ ꠎꠘꠦꠃ ꠔ ꠀꠝꠣꠞꠦ ꠖꠥꠡꠝꠘꠞ ꠀꠔꠅ ꠗꠞꠣꠁ ꠖꠤꠛ।”
২২ ꠁꠈꠣꠘ ꠢꠥꠘꠤꠀ ꠔꠣꠞꠣ ꠈꠥꠛ ꠛꠦꠎꠣꠞ ꠅꠁꠉꠦꠟꠣ।
ꠄꠞꠟꠣꠉꠤ ꠔꠣꠞꠣ ꠄꠇ ꠄꠇ ꠇꠞꠤ ꠎꠤꠇꠣꠁꠟꠣ,
“ꠢꠥꠎꠥꠞ,
ꠁ ꠎꠘ ꠇꠤꠔꠣ ꠀꠝꠤ ꠘꠤ?”
২৩ ꠔꠣꠁꠘ ꠇꠁꠟꠣ,
“ꠅꠈꠘ ꠎꠦ ꠎꠘꠦ ꠀꠝꠣꠞ ꠟꠉꠦ ꠅꠁꠀ ꠕꠣꠟꠅ ꠀꠔ ꠢꠣꠞꠣꠞ,
ꠢꠦ-ꠃ ꠀꠝꠣꠞꠦ ꠗꠞꠣꠁꠀ ꠖꠤꠛ।
২৪ ꠀꠝꠤ ꠛꠤꠘ-ꠀꠖꠝꠞ ꠝꠃꠔꠞ ꠛꠦꠙꠣꠞꠦ ꠀꠍꠝꠣꠘꠤ ꠇꠤꠔꠣꠛꠅ ꠎꠦꠟꠣ ꠟꠦꠈꠣ ꠀꠍꠦ,
ꠀꠝꠣꠞ ꠝꠃꠔ ꠔ ꠅꠃꠟꠣꠃ ꠅꠁꠛ।
ꠅꠁꠟꠦ ꠀꠚꠍꠥꠍ ꠢꠃ ꠎꠘꠞ ꠟꠣꠉꠤ,
ꠎꠦꠉꠤꠄ ꠀꠝꠣꠞꠦ ꠗꠞꠣꠁꠀ ꠖꠤꠛ।
ꠖꠥꠘꠤꠀꠔ ꠔꠣꠞ ꠎꠘꠝ ꠘꠣ ꠅꠀꠃ,
ꠔꠣꠞ ꠟꠣꠉꠤ ꠛꠃꠔ ꠜꠣꠟꠣ ꠀꠍꠤꠟ।”
২৫ ꠎꠦ ꠁꠢꠥꠖꠣꠄ ꠁꠍꠣꠞꠦ ꠗꠞꠣꠁ ꠖꠤꠔ ꠌꠣꠞ,
ꠢꠦ ꠔꠣꠘꠞꠦ ꠎꠤꠇꠣꠁꠟ,
“ꠢꠥꠎꠥꠞ,
ꠢꠤ ꠎꠘ ꠇꠤꠔꠣ ꠀꠝꠤ ꠘꠤ?”
ꠁꠍꠣꠄ ꠔꠣꠞꠦ ꠇꠁꠟꠣ,
“ꠔꠥꠝꠤ ꠑꠤꠇꠃ ꠇꠁꠞꠣꠄ।”
ꠀꠟ-ꠝꠍꠤꠞ ꠝꠦꠎꠛꠣꠘꠤꠞ ꠘꠝꠥꠘꠣ
২৬ ꠔꠣꠞꠣ ꠈꠣꠘꠣ ꠈꠣꠁꠞꠣ,
ꠅꠃ ꠡꠝꠄ ꠁꠍꠣꠄ ꠞꠥꠐꠤ ꠀꠔꠅ ꠟꠁꠀ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠟꠣ।
ꠔꠣꠁꠘ ꠞꠥꠐꠤ ꠍꠤꠠꠤꠀ ꠐꠥꠇꠞꠣ ꠐꠥꠇꠞꠣ ꠇꠞꠤ ꠍꠣꠢꠣꠛꠤ ꠅꠇꠟꠞꠦ ꠖꠤꠟꠣ।
ꠖꠤꠀ ꠇꠁꠟꠣ,
“ꠅꠃ ꠘꠦꠅ,
ꠈꠣꠅ,
ꠝꠘꠅ ꠇꠞꠅ ꠁꠔꠣ ꠀꠝꠣꠞ ꠇꠣꠄꠀ।”
২৭ ꠛꠣꠖꠦ ꠔꠣꠁꠘ ꠡꠞꠛꠔꠞ ꠙꠤꠀꠟꠣ ꠟꠁꠀ ꠀꠟ꠆ꠟꠣꠞ ꠡꠥꠇꠞꠤꠀ ꠎꠣꠘꠣꠁꠟꠣ,
ꠀꠞ ꠄꠞꠣꠞꠦ ꠖꠤꠀ ꠇꠁꠟꠣ,
“ꠔꠥꠝꠞꠣ ꠢꠇꠟꠦ ꠅꠃ ꠙꠤꠀꠟꠣ ꠕꠣꠇꠤ ꠀꠋꠉꠥꠞꠞ ꠡꠞꠛꠔ ꠈꠣꠅ।
২৮ ꠝꠘꠅ ꠇꠞꠤꠅ,
ꠁꠔꠣ ꠀꠝꠣꠞ ꠟꠃ।
ꠅꠃ ꠟꠃꠞ ꠎꠞꠤꠀꠄ ꠀꠖꠝ ꠎꠣꠔꠤꠞ ꠛꠃꠔꠞ ꠉꠥꠘꠣ ꠝꠣꠚꠤ ꠅꠁꠛ।
ꠀꠟ꠆ꠟꠣꠞ ꠟꠉꠦ ꠝꠣꠘꠡꠞ ꠝꠤꠟꠘꠞ ꠃꠍꠤꠟ꠆ꠟꠣ ꠅꠁꠟ ꠅꠃ ꠟꠃ।
২৯ ꠀꠝꠤ ꠢꠣꠍꠣ ꠇꠕꠣ ꠇꠁꠀꠞ,
ꠀꠝꠤ ꠀꠝꠣꠞ ꠉꠣꠁꠛꠤ ꠛꠣꠚꠞ ꠛꠣꠖꠡꠣꠁꠔ ꠖꠣꠈꠤꠟ ꠅꠁꠀ ꠢꠣꠞꠤ,
ꠔꠥꠝꠞꠣꠞꠦ ꠟꠉꠦ ꠟꠁꠀ ꠎꠔꠖꠤꠘ ꠘꠄꠀ ꠢꠣꠟꠔꠦ ꠀꠋꠉꠥꠞꠞ ꠡꠞꠛꠔ ꠘꠣ ꠈꠣꠁꠍꠤ,
ꠅꠔ ꠖꠤꠘ ꠁ ꠡꠞꠛꠔ ꠀꠞ ꠈꠣꠁꠔꠣꠝ ꠘꠣꠄ।”
৩০ ꠢꠦꠡꠦ ꠔꠣꠞꠣ ꠢꠇꠟꠦ ꠝꠤꠟꠤ ꠄꠇ ꠉꠎꠟ ꠉꠣꠁꠀ,
ꠊꠞ ꠕꠣꠇꠤ ꠛꠣꠞꠅꠁꠀ ꠎꠄꠔꠥꠘ ꠙꠣꠠꠅ ꠉꠦꠟꠣꠉꠤ।
ꠢꠎꠞꠔ ꠙꠤꠔꠞꠦ ꠅꠡ꠆ꠛꠤꠇꠣꠞ ꠇꠞꠣꠞ ꠀꠉꠣꠝ ꠁꠡꠣꠞꠣ
৩১ ꠛꠣꠖꠦ ꠁꠍꠣꠄ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠇꠁꠟꠣ,
“ꠢꠥꠘꠅ,
ꠀꠁꠎ ꠞꠣꠁꠔ ꠔꠥꠝꠞꠣ ꠢꠇꠟꠦꠃ ꠔ ꠀꠝꠣꠞꠦ ꠚꠣꠟꠣꠁꠀ ꠜꠣꠉꠤꠛꠣꠄ।
ꠀꠟ꠆ꠟꠣꠞ ꠇꠣꠟꠣꠝꠅ ꠀꠍꠦ,
‘ꠀꠝꠤ ꠝꠦꠠꠣꠞ ꠙꠣꠟꠞ ꠞꠣꠈꠣꠟꠞꠦ ꠝꠣꠞꠝꠥ,
ꠔꠦꠃ ꠙꠣꠟꠞ ꠝꠦꠠꠣꠁꠘ ꠌꠣꠁꠞꠅꠛꠣꠄ ꠍꠤꠔ꠆ꠞꠤꠎꠤꠛꠣ।’
৩২ ꠅꠁꠟꠦ ꠀꠝꠣꠞꠦ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠇꠞꠣꠞ ꠛꠣꠖꠦ,
ꠔꠥꠝꠞꠣꠞ ꠀꠉꠦꠃ ꠀꠝꠤ ꠉꠣꠟꠤꠟ ꠎꠤꠟꠣꠔ ꠎꠣꠁꠝꠥꠉꠤ।”
৩৩ ꠔꠦꠃ ꠍꠣꠢꠣꠛꠤ ꠙꠤꠔꠞꠦ ꠔꠣꠘꠞꠦ ꠇꠁꠟꠣ,
“ꠢꠥꠎꠥꠞ,
ꠢꠇꠟ ꠜꠣꠉꠤ ꠉꠦꠟꠦꠅ ꠀꠝꠤ ꠜꠣꠉꠤꠔꠣꠝ ꠘꠣꠄ।”
৩৪ ꠁꠍꠣꠄ ꠇꠁꠟꠣ,
“ꠔꠦ ꠢꠥꠘꠅ,
ꠀꠝꠤ ꠔꠥꠝꠣꠞꠦ ꠢꠣꠍꠣ ꠇꠕꠣ ꠇꠁꠞꠣꠝ,
ꠀꠁꠎ ꠙꠔꠣꠛꠣꠟꠣ ꠝꠥꠞꠉꠣꠄ ꠛꠣꠋ ꠖꠤꠛꠣꠞ ꠀꠉꠦꠃ,
ꠔꠥꠝꠤ ꠔꠤꠘꠛꠣꠞ ꠇꠁꠛꠣꠄ, ꠔꠥꠝꠤ ꠀꠝꠣꠞꠦ ꠌꠤꠘꠅ ꠘꠣ।”
৩৫ ꠅꠁꠟꠦ ꠙꠤꠔꠞꠦ ꠇꠁꠟꠣ,
“ꠢꠥꠎꠥꠞ,
ꠅꠃ ꠇꠤꠔꠣ ꠇꠂꠘ,
ꠀꠙꠘꠣꠞ ꠟꠉꠦ ꠎꠥꠖꠤ ꠀꠝꠣꠞ ꠝꠞꠘꠅ ꠅꠄ,
ꠔꠣ-ꠅ ꠀꠝꠤ ꠇꠥꠘꠥꠝꠘ꠆ꠔꠦꠃ ꠀꠙꠘꠣꠞꠦ ꠅꠡ꠆ꠛꠤꠇꠣꠞ ꠇꠞꠔꠣꠝ ꠘꠣꠄ।”
ꠢꠇꠟ ꠍꠣꠢꠣꠛꠤꠄ ꠅꠃ ꠄꠇꠟꠣꠈꠣꠘ ꠇꠁꠟꠣ।
ꠉꠦꠔꠡꠤꠝꠣꠘꠤ ꠛꠣꠉꠣꠘꠅ ꠢꠎꠞꠔ ꠁꠍꠣ
৩৬ ꠛꠣꠖꠦ ꠢꠎꠞꠔ ꠁꠍꠣꠄ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠟꠁꠀ ꠉꠦꠔꠡꠤꠝꠣꠘꠤ ꠘꠣꠝꠞ ꠄꠇ ꠛꠣꠉꠣꠘꠅ ꠀꠁꠟꠣ।
ꠀꠁꠀ ꠄꠞꠣꠞꠦ ꠇꠁꠟꠣ,
“ꠔꠥꠝꠞꠣ ꠅꠘꠅ ꠛꠅ,
ꠀꠝꠤ ꠢꠉꠣꠟꠣꠔ ꠉꠤꠀ ꠖꠥꠀ ꠇꠞꠝꠥ।”
৩৭ ꠅꠈꠣꠘ ꠇꠁꠀ ꠔꠣꠁꠘ ꠙꠤꠔꠞ ꠀꠞ ꠎꠤꠛꠥꠖꠤꠀꠞ ꠖꠥꠁ ꠙꠥꠀꠞꠦ ꠔꠣꠘ ꠟꠉꠦ ꠘꠤꠟꠣ।
ꠀꠡ꠆ꠔꠦ ꠀꠡ꠆ꠔꠦ ꠔꠣꠘ ꠖꠤꠟꠞ ꠝꠣꠎꠦ ꠖꠥꠈ ꠀꠞ ꠢꠣꠄ-ꠢꠥꠔꠣꠡ ꠛꠣꠠꠤꠟ।
৩৮ ꠔꠣꠁꠘ ꠄꠞꠣꠞꠦ ꠇꠁꠟꠣ,
“ꠜꠣꠁꠀꠂꠘꠞꠦ,
ꠖꠥꠈꠦ ꠀꠝꠣꠞ ꠇꠁꠟꠎꠣ ꠚꠣꠐꠤꠎꠣꠞ।
ꠔꠥꠝꠞꠣ ꠅꠘꠅ ꠛꠁꠞꠅ ꠀꠞ ꠀꠝꠣꠞ ꠟꠉꠦ ꠢꠎꠣꠉ ꠞꠁꠅ।”
৩৯ ꠅꠈꠣꠘ ꠇꠁꠀ ꠕꠥꠠꠣ ꠢꠞꠤꠀ ꠉꠤꠀ ꠔꠣꠁꠘ ꠝꠣꠐꠤꠔ ꠍꠁꠎꠖꠣꠔ ꠙꠠꠤꠀ ꠇꠁꠟꠣ,
“ꠅ ꠀꠝꠣꠞ ꠛꠦꠢꠦꠡ꠆ꠔꠤ ꠀꠛ꠆ꠛꠣ,
ꠀꠝꠣꠞ ꠃꠙꠞꠦ ꠅꠃ ꠎꠦ ꠎꠥꠟꠥꠝ-ꠝꠍꠤꠛꠔ ꠀꠁꠅꠞ,
ꠖꠥꠍꠞꠣ ꠇꠥꠘꠥ ꠃꠙꠣꠄ ꠕꠣꠇꠟꠦ ꠁꠈꠣꠘꠔꠣ ꠢꠞꠣꠁꠟꠣꠅ।
ꠅꠁꠟꠦ ꠁꠔꠣ ꠀꠝꠣꠞ ꠁꠌ꠆ꠍꠣꠄ ꠘꠣꠄ,
ꠔꠥꠝꠣꠞ ꠝꠞ꠆ꠎꠤ ꠝꠣꠚꠤꠇꠃ ꠅꠃꠇ।”
৪০ ꠍꠁꠎꠖꠣ ꠕꠣꠇꠤ ꠃꠑꠤꠀ ꠔꠣꠁꠘ ꠍꠣꠢꠣꠛꠤ ꠅꠇꠟꠞ ꠉꠦꠍꠦ ꠀꠁꠀ ꠖꠦꠈꠟꠣ,
ꠄꠞꠣ ꠊꠥꠝꠣꠁ ꠉꠦꠍꠂꠘ।
ꠅꠃ ꠔꠣꠁꠘ ꠙꠤꠔꠞꠞꠦ ꠢꠎꠣꠉ ꠇꠞꠤ ꠇꠁꠟꠣ,
“ꠔꠥꠝꠞꠣ ꠄꠇꠈꠣꠘ ꠊꠘ꠆ꠐꠣꠅ ꠢꠎꠣꠉ ꠞꠁꠔꠣꠄ ꠙꠣꠞꠟꠣꠄ ꠘꠣ ꠘꠤ?
৪১ ꠢꠎꠣꠉ ꠞꠅ ꠖꠥꠀ ꠇꠞꠣꠞ ꠟꠣꠉꠤ,
ꠀꠞ ꠖꠥꠀ ꠇꠞꠅ ꠙꠞꠤꠇ꠆ꠇꠣ ꠕꠣꠇꠤ ꠛꠣꠌꠣꠞ ꠟꠣꠉꠤ।
ꠔꠥꠝꠞꠣꠞ ꠖꠤꠟꠞ ꠝꠣꠎꠦ ꠘꠤꠌꠄ ꠈꠤꠀꠟ ꠀꠍꠦ,
ꠅꠁꠟꠦ ꠇꠣꠄꠀ ꠔ ꠇꠝꠎꠥꠞ।”
৪২ ꠛꠣꠖꠦ ꠔꠣꠁꠘ ꠖꠥꠍꠞꠣꠛꠣꠞ ꠉꠤꠀ ꠖꠥꠀ ꠇꠞꠟꠣ,
“ꠅ ꠀꠝꠣꠞ ꠛꠦꠢꠦꠡ꠆ꠔꠤ ꠀꠛ꠆ꠛꠣ,
ꠅꠃ ꠎꠥꠟꠥꠝ-ꠝꠍꠤꠛꠔ ꠀꠝꠤ ꠡꠁꠎ꠆ꠎ ꠘꠣ ꠇꠞꠟꠦ,
ꠎꠥꠖꠤ ꠖꠥꠍꠞꠣ ꠇꠥꠘꠥ ꠙꠕ ꠘꠣ ꠕꠣꠇꠦ,
ꠔꠣꠁꠟꠦ ꠔꠥꠝꠣꠞ ꠝꠞ꠆ꠎꠤ ꠝꠣꠚꠤꠇꠃ ꠅꠃꠇ।”
৪৩ ꠛꠣꠖꠦ ꠔꠣꠁꠘ ꠢꠤꠞꠛꠣꠞ ꠀꠁꠀ ꠖꠦꠈꠟꠣ,
ꠄꠞꠣ ꠊꠥꠝꠣꠁ ꠉꠦꠍꠂꠘ,
ꠊꠥꠝꠦ ꠔꠣꠞꠣꠞ ꠌꠃꠈ ꠚꠣꠟꠣꠁ ꠖꠦꠞ।
৪৪ ꠖꠦꠈꠤꠀ ꠔꠣꠞꠣꠞꠦ ꠕꠁꠀ ꠔꠣꠁꠘ ꠔꠤꠍꠞꠣ ꠛꠣꠞ ꠉꠤꠀ ꠄꠇꠁ ꠖꠥꠀ ꠇꠞꠟꠣ।
৪৫ ꠄꠞꠛꠣꠖꠦ ꠔꠣꠁꠘ ꠍꠣꠢꠣꠛꠤ ꠅꠇꠟꠞ ꠉꠦꠍꠦ ꠀꠁꠀ ꠇꠁꠟꠣ,
“ꠔꠥꠝꠞꠣ ꠖꠦꠈꠤ ꠅꠈꠘꠅ ꠀꠞꠣꠝꠦ ꠊꠥꠝꠣꠁꠞꠣꠄ।
ꠢꠥꠘꠅ,
ꠡꠝꠄ ꠀꠁꠌ꠆ꠍꠦ,
ꠀꠝꠤ ꠛꠤꠘ-ꠀꠖꠝꠞꠦ ꠉꠥꠘꠣꠉꠣꠞ ꠅꠇꠟꠞ ꠀꠔꠅ ꠡꠝꠎꠣꠁ ꠖꠦꠅꠀ ꠅꠁꠛ।
৪৬ ꠃꠑꠅ,
ꠀꠝꠞꠣ ꠞꠅꠀꠘꠣ ꠖꠦꠁ।
ꠀꠝꠣꠞꠦ ꠎꠦꠉꠤꠄ ꠖꠥꠡꠝꠘꠞ ꠀꠔꠅ ꠗꠞꠣꠁ ꠖꠤꠛ,
ꠢꠦ ꠀꠁꠀ ꠀꠎꠤꠉꠦꠍꠦ।”
ꠢꠎꠞꠔ ꠁꠍꠣ ꠖꠥꠡꠝꠘꠞ ꠀꠔꠅ ꠛꠘ꠆ꠖꠤ
৪৭ ꠔꠣꠁꠘ ꠄꠞꠣꠞ ꠟꠉꠦ ꠝꠣꠔꠅ ꠞꠁꠍꠂꠘ,
ꠅꠃ ꠡꠝꠄ ꠁꠢꠥꠖꠣ ꠢꠘꠅ ꠀꠁꠟ।
ꠢꠦ ꠀꠍꠤꠟ ꠛꠣꠞꠅꠎꠘ ꠍꠣꠢꠣꠛꠤꠞ ꠝꠣꠎꠞ ꠄꠇꠎꠘ।
ꠔꠣꠞ ꠟꠉꠦ ꠅꠁꠀ ꠀꠞꠅ ꠛꠃꠔꠦ ꠟꠣꠑꠤ-ꠍꠐꠣ,
ꠔꠟꠥꠀꠞ ꠟꠁꠀ ꠀꠁꠟ।
ꠛꠠ ꠁꠝꠣꠝ ꠀꠞ ꠝꠥꠞꠛ꠆ꠛꠤ ꠅꠇꠟꠦ ꠄꠞꠣꠞꠦ ꠙꠣꠑꠣꠁꠍꠂꠘ।
৪৮ ꠔꠣꠘꠞꠦ ꠎꠦꠉꠤꠄ ꠗꠞꠣꠁꠀ ꠖꠤꠔ,
ꠅꠃ ꠁꠢꠥꠖꠣꠄ ꠔꠣꠞ ꠟꠉꠞ ꠄꠞꠣꠞꠦ ꠀꠉꠦ ꠢꠤꠇꠣꠁꠀ ꠖꠤꠍꠤꠟ,
“ꠀꠝꠤ ꠉꠤꠀ ꠎꠣꠞ ꠉꠣꠟꠅ ꠢꠥꠋꠉꠣ ꠖꠤꠝꠥ,
ꠢꠦ-ꠃ ꠢꠃ ꠎꠘ।
ꠔꠥꠝꠞꠣ ꠄꠞꠦ ꠀꠐꠇ ꠇꠞꠤꠅ।”
৪৯ ꠄꠞꠟꠣꠉꠤ ꠁꠢꠥꠖꠣꠄ ꠡꠥꠎꠣ-ꠡꠥꠎꠤ ꠁꠍꠣꠞ ꠉꠦꠍꠦ ꠉꠤꠀ ꠇꠂꠟ,
“ꠢꠥꠎꠥꠞ,
ꠀꠍꠍꠣꠟꠣꠝꠥ ꠀꠟꠣꠁꠇꠥꠝ।”
ꠇꠁꠀ ꠢꠦ ꠔꠣꠘꠞꠦ ꠢꠥꠋꠉꠣ ꠖꠤꠟ।
৫০ ꠁꠍꠣꠄ ꠔꠣꠞꠦ ꠇꠁꠟꠣ,
“ꠜꠣꠁꠞꠦ,
ꠎꠦꠔꠣ ꠇꠞꠣꠔ ꠀꠁꠍ,
ꠇꠞꠤꠟꠣꠅ।”
ꠟꠉꠦ ꠟꠉꠦꠃ ꠔꠣꠞꠣ ꠀꠁꠀ ꠁꠍꠣꠞꠦ ꠗꠞꠤꠟꠤꠟ।
৫১ ꠅꠃ ꠡꠝꠄ ꠁꠍꠣꠞ ꠟꠉꠞ ꠄꠇꠎꠘꠦ ꠘꠤꠎꠞ ꠔꠟꠥꠀꠞ ꠛꠣꠞ ꠇꠞꠤꠀ ꠙꠞꠗꠣꠘ ꠁꠝꠣꠝꠞ ꠉꠥꠟꠣꠝꠞꠦ ꠍꠦꠖ ꠝꠣꠞꠟꠣ,
ꠍꠦꠖꠞ ꠟꠉꠦ ꠔꠣꠞ ꠄꠇ ꠇꠣꠘ ꠇꠣꠐꠤꠀ ꠙꠠꠤꠉꠦꠟ।
৫২ ꠔꠦꠃ ꠁꠍꠣꠄ ꠄꠘꠞꠦ ꠇꠁꠟꠣ,
“ꠔꠥꠝꠣꠞ ꠔꠟꠥꠀꠞ ꠛꠦꠉꠅ ꠢꠣꠞꠣꠁꠟꠣꠅ।
ꠔꠟꠥꠀꠞꠖꠤ ꠎꠣꠞꠣ ꠈꠦꠟꠣꠄ,
ꠔꠟꠥꠀꠞꠞ ꠔꠟꠦꠃ ꠔꠣꠞꠣꠞ ꠎꠣꠘ ꠎꠣꠄ।
৫৩ ꠔꠥꠝꠤ ꠁꠈꠣꠘ ꠌꠤꠘ꠆ꠔꠣ ꠇꠞꠅ ꠘꠣ ꠘꠤ,
ꠀꠝꠤ ꠀꠝꠣꠞ ꠛꠣꠔꠥꠘꠤ ꠛꠣꠚꠞ ꠖꠞꠛꠣꠞꠅ ꠀꠞꠎ ꠇꠞꠟꠦ,
ꠔꠣꠁꠘ ꠇꠁꠄꠇ ꠀꠎꠣꠞ ꠚꠤꠞꠤꠡ꠆ꠔꠣ ꠙꠣꠑꠣꠁꠔꠣ ꠘꠣꠄ ꠘꠤ?
৫৪ ꠅꠁꠟꠦ ꠀꠝꠤ ꠁꠟꠣ ꠇꠞꠟꠦ ꠇꠤꠔꠣꠛꠞ ꠇꠕꠣ ꠇꠤꠟꠣ ꠚꠟꠤꠛ?
ꠇꠤꠔꠣꠛꠅ ꠎꠔꠔꠣ ꠛꠣꠔꠣꠁꠟ ꠅꠁꠍꠦ,
ꠁꠔꠣ ꠔ ꠊꠐꠛꠃ।”
৫৫ ꠛꠣꠖꠦ ꠔꠣꠁꠘ ꠅꠔꠣ ꠝꠣꠘꠡꠞꠦ ꠇꠁꠟꠣ,
“ꠇꠤꠔꠣ ꠛꠣ,
ꠀꠝꠤ ꠇꠥꠘꠥ ꠌꠥꠞ-ꠒꠣꠇꠣꠁꠔ ꠘꠤ,
ꠔꠥꠝꠞꠣ ꠖꠦꠈꠤ ꠟꠣꠑꠤ-ꠍꠐꠣ,
ꠔꠟꠥꠀꠞ ꠟꠁꠀ ꠀꠝꠣꠞꠦ ꠗꠞꠣꠔ ꠀꠁꠍ।
ꠀꠝꠤ ꠔ ꠙꠞꠔꠦꠇ ꠖꠤꠘ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠛꠁꠀ ꠔꠣꠟꠤꠝ ꠖꠤꠔꠣꠝ।
ꠅꠃ ꠡꠝꠄ ꠔ ꠔꠥꠝꠞꠣ ꠀꠝꠣꠞꠦ ꠗꠞꠟꠣꠄ ꠘꠣ।
৫৬ ꠀꠍꠟꠦ ꠁꠔꠣ ꠢꠇ꠆ꠇꠟꠔꠣ ꠊꠐꠦꠞ,
ꠎꠣꠔꠦ ꠀꠍꠝꠣꠘꠤ ꠇꠤꠔꠣꠛꠅ ꠘꠛꠤ ꠅꠇꠟꠦ ꠎꠦꠟꠣ ꠛꠣꠔꠣꠁꠍꠂꠘ,
ꠅꠔꠣ ꠙꠥꠞꠣ ꠅꠄ।”
ꠅꠃ ꠡꠝꠄ ꠍꠣꠢꠣꠛꠤ ꠅꠇꠟꠦ ꠁꠍꠣꠞꠦ ꠕꠁꠀ ꠜꠣꠉꠤ ꠉꠦꠟꠣ।
ꠖꠦꠡꠞ ꠚꠔꠥꠀ ꠇꠝꠤꠐꠤꠞ ꠍꠣꠝꠘꠦ ꠢꠎꠞꠔ ꠁꠍꠣ
৫৭ ꠢꠎꠞꠔ ꠁꠍꠣꠞꠦ ꠗꠞꠤꠀ ꠢꠣꠞꠤ ꠅꠃ ꠝꠣꠘꠡꠦ ꠙꠞꠗꠣꠘ ꠁꠝꠣꠝ ꠇꠣꠄꠀꠚꠣꠞ ꠉꠦꠍꠦ ꠟꠁꠀ ꠉꠦꠟ।
ꠢꠘꠅ ꠝꠃꠟꠣꠘꠣ ꠀꠞ ꠝꠥꠞꠛ꠆ꠛꠤ ꠅꠇꠟ ꠄꠇꠈꠣꠘꠅ ꠖꠟꠣ ꠅꠁꠟꠣ।
৫৮ ꠍꠣꠢꠣꠛꠤ ꠙꠤꠔꠞ ꠁꠍꠣꠞ ꠉꠦꠍ ꠕꠘꠦ ꠖꠥꠞꠁ ꠢꠞꠤ ꠢꠞꠤ ꠞꠁꠀ ꠔꠣꠘ ꠈꠞꠦ ꠈꠞꠦ ꠙꠞꠗꠣꠘ ꠁꠝꠣꠝꠞ ꠛꠣꠠꠤꠞ ꠃꠑꠣꠘꠞ ꠇꠣꠘ꠆ꠖꠣꠔ ꠉꠦꠟꠣ।
ꠉꠤꠀ ꠢꠦꠡ-ꠝꠦꠡ ꠇꠤꠔꠣ ꠅꠄ,
ꠅꠈꠣꠘ ꠖꠦꠈꠣꠞ ꠟꠣꠉꠤ ꠃꠑꠣꠘꠞ ꠜꠤꠔꠞꠦ ꠢꠣꠝꠣꠁꠀ,
ꠢꠘꠞ ꠙꠣꠞꠣꠖꠣꠞ ꠅꠇꠟꠞ ꠟꠉꠦ ꠛꠁꠟꠣ।
৫৯ ꠢꠎꠞꠔ ꠁꠍꠣꠞꠦ ꠇꠣꠔꠟ ꠇꠞꠣꠞ ꠟꠣꠉꠤ ꠛꠠ ꠁꠝꠣꠝ ꠅꠇꠟꠦ ꠀꠞ ꠝꠎꠟꠤꠍꠞ ꠢꠇꠟ ꠝꠣꠘꠡꠦ ꠁꠍꠣꠞ ꠛꠤꠙꠇ꠆ꠇꠦ ꠇꠥꠘꠥ ꠘꠣꠟꠤꠡ ꠔꠥꠇꠣꠁꠟꠣ,
৬০ ꠅꠁꠟꠦ ꠙꠣꠁꠟꠣ ꠘꠣ।
ꠝꠎꠟꠤꠍꠅ ꠁꠍꠣꠞ ꠛꠤꠙꠇ꠆ꠇꠦ ꠛꠃꠔꠦ ꠝꠤꠍꠣ ꠡꠣꠇ꠆ꠇꠤ ꠖꠤꠟꠦꠅ,
ꠔꠣꠞꠣꠞ ꠡꠣꠇ꠆ꠇꠤꠞ ꠝꠤꠟ ꠅꠁꠟ ꠘꠣ।
ꠛꠣꠖꠦ ꠖꠥꠁꠎꠘ ꠝꠣꠘꠡꠦ ꠀꠁꠀ ꠔꠣꠘ ꠛꠤꠞꠥꠖ꠆ꠖꠦ ꠝꠤꠍꠣ ꠡꠣꠇ꠆ꠇꠤ ꠖꠤꠀ ꠇꠂꠟ,
৬১ “ꠀꠝꠞꠣ ꠢꠥꠘꠍꠤ,
ꠢꠦ ꠇꠁꠍꠦ,
ꠀꠟ꠆ꠟꠣꠞ ꠇꠣꠛꠣ ꠡꠞꠤꠚ,
ꠝꠣꠘꠤ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞꠦ ꠢꠦ ꠜꠣꠋꠉꠤꠟꠤꠛ,
ꠀꠞ ꠔꠤꠘ ꠖꠤꠘꠞ ꠜꠤꠔꠞꠦ ꠢꠤꠞꠛꠣꠞ ꠛꠣꠘꠣꠁꠛ।”
৬২ ꠔꠦꠃ ꠙꠞꠗꠣꠘ ꠁꠝꠣꠝ ꠃꠛꠣꠁꠀ ꠢꠇꠟꠞ ꠍꠣꠝꠘꠦ ꠁꠍꠣꠞꠦ ꠎꠤꠇꠣꠁꠟꠣ,
“ꠅꠛꠣ,
ꠔꠥꠝꠤ ꠇꠥꠘꠥ ꠝꠣꠔꠞ ꠎꠥꠀꠙ ꠖꠤꠔꠣꠄ ꠘꠣ ꠘꠤ?
ꠁꠔꠣ ꠝꠣꠘꠡꠦ ꠔꠥꠝꠣꠞ ꠛꠦꠙꠣꠞꠦ ꠇꠤꠔꠣ ꠡꠣꠇ꠆ꠇꠤ ꠖꠤꠞꠣ,
ꠢꠥꠘꠞꠣꠄ ꠘꠤ?”
৬৩ ꠅꠁꠟꠦ ꠔꠣꠁꠘ ꠇꠥꠘꠥ ꠎꠥꠀꠙ ꠘꠣ ꠖꠤꠀ ꠘꠤꠞꠣꠁ ꠞꠁꠟꠣ।
ꠙꠞꠗꠣꠘ ꠁꠝꠣꠝꠦ ꠔꠣꠘꠞꠦ ꠢꠤꠞꠛꠣꠞ ꠇꠁꠟꠣ,
“ꠔꠥꠝꠤ ꠎꠤꠘ꠆ꠖꠣ ꠀꠟ꠆ꠟꠣꠞ ꠇꠍꠝ ꠈꠣꠁꠀ ꠇꠅ ꠌꠣꠁꠘ,
ꠔꠥꠝꠤ ꠇꠤꠔꠣ ꠀꠟ꠆ꠟꠣꠞ ꠅꠀꠖꠣ ꠇꠞꠣ ꠢꠃ ꠀꠟ-ꠝꠍꠤ ꠘꠤ,
ꠔꠥꠝꠤꠃ ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣ ꠘꠤ?”
৬৪ ꠔꠣꠁꠘ ꠎꠥꠀꠙ ꠖꠤꠟꠣ,
“ꠀꠙꠘꠣꠞꠣꠃ ꠔ ꠇꠁꠞꠣ।
ꠅꠁꠟꠦ ꠀꠝꠤ ꠇꠁꠞꠣꠝ,
ꠀꠙꠘꠣꠞꠣ ꠖꠦꠈꠛꠣꠘꠦ,
ꠀꠝꠤ ꠛꠤꠘ-ꠀꠖꠝ ꠀꠞꠡꠦ-ꠀꠎꠤꠝꠅ ꠀꠟ꠆ꠟꠣ ꠞꠣꠛ꠆ꠛꠥꠟ ꠀꠟꠣꠝꠤꠘꠞ ꠒꠣꠁꠘꠞ ꠔꠈ꠆ꠔꠅ ꠛꠅꠀꠔ ꠀꠍꠤ।
ꠀꠞꠅ ꠖꠦꠈꠛꠣ,
ꠀꠝꠤ ꠛꠦꠢꠦꠡ꠆ꠔꠤ ꠝꠦꠊꠞ ꠌꠣꠇꠣꠔ ꠅꠁꠀ ꠖꠥꠘꠤꠀꠔ ꠀꠁꠀꠞ।”
৬৫ ꠁꠈꠣꠘ ꠢꠥꠘꠤꠀꠃ ꠙꠞꠗꠣꠘ ꠁꠝꠣꠝꠦ ꠘꠤꠎꠞ ꠚꠤꠘ꠆ꠘꠞ ꠇꠣꠙꠠ ꠍꠤꠠꠤꠀ ꠇꠁꠟꠣ,
“ꠢꠦ ꠔ ꠡꠤꠞꠤꠇꠤ ꠇꠞꠟ,
ꠔꠦ ꠀꠞ ꠇꠥꠘꠥ ꠡꠣꠇ꠆ꠇꠤꠞ ꠎꠞꠥꠞ ꠀꠍꠦ ꠘꠤ?
ꠀꠙꠘꠣꠞꠣ ꠘꠤꠎꠞ ꠇꠣꠘꠦꠃ ꠔ ꠢꠥꠘꠟꠣ,
ꠢꠦ ꠡꠤꠞꠤꠇꠤ ꠇꠞꠟ।
৬৬ ꠔꠦ ꠅꠈꠘ ꠀꠙꠘꠣꠞꠣ ꠇꠤꠔꠣ ꠞꠣꠄ ꠖꠤꠛꠣ?”
ꠔꠣꠞꠣ ꠇꠁꠟꠣ,
“ꠄꠞꠦ ꠔ ꠝꠣꠞꠤꠟꠣꠅꠀ ꠖꠞꠇꠣꠞ।”
৬৭ ꠅꠃ ꠡꠝꠄ ꠔꠣꠞꠣ ꠔꠣꠘ ꠝꠥꠈꠅ ꠍꠦꠚ ꠖꠤꠟ,
ꠀꠞ ꠔꠣꠘꠞꠦ ꠌꠠ-ꠔꠣꠛꠠ ꠝꠣꠞꠟ।
ꠇꠦꠃ ꠇꠦꠃ ꠊꠥꠡꠤ ꠝꠣꠞꠤꠀ ꠇꠂꠟ,
৬৮ “ꠢꠂ ꠀꠟ-ꠝꠍꠤ,
ꠉꠣꠁꠛꠤ ꠇꠅ ꠌꠣꠁꠘ,
ꠔꠞꠦ ꠇꠦꠉꠤꠄ ꠝꠣꠞꠟ?”
ꠢꠎꠞꠔ ꠙꠤꠔꠞꠦ ꠔꠤꠘꠛꠣꠞ ꠅꠡ꠆ꠛꠤꠇꠣꠞ ꠇꠞꠟꠣ
৬৯ ꠙꠤꠔꠞ ꠃꠑꠣꠘꠅ ꠛꠅꠀꠔ ꠀꠍꠟꠣ,
ꠅꠃ ꠡꠝꠄ ꠄꠇ ꠛꠣꠘ꠆ꠖꠤ ꠛꠦꠐꠤ ꠔꠣꠘ ꠇꠣꠘ꠆ꠖꠣꠔ ꠀꠁꠀ ꠇꠂꠟ,
“ꠉꠣꠟꠤꠟꠞ ꠅꠃ ꠁꠍꠣꠞ ꠟꠉꠦ ꠔ ꠀꠙꠘꠦꠅ ꠀꠍꠟꠣ।”
৭০ ꠅꠁꠟꠦ ꠙꠤꠔꠞꠦ ꠢꠇꠟꠞ ꠍꠣꠝꠘꠦ ꠅꠡ꠆ꠛꠤꠇꠣꠞ ꠇꠞꠤꠀ ꠇꠁꠟꠣ,
“ꠘꠣ ꠉ,
ꠔꠥꠝꠤ ꠁꠔꠣ ꠇꠤꠔꠣ ꠝꠣꠔꠅ?
ꠁꠔꠣ ꠇꠥꠘ꠆ꠔꠣꠃ ꠀꠝꠤ ꠎꠣꠘꠤ ꠘꠣ।”
৭১ ꠅꠈꠣꠘ ꠇꠁꠀ ꠙꠤꠔꠞ ꠉꠦꠁꠐꠞ ꠗꠣꠞꠅ ꠉꠦꠟꠣꠉꠤ।
ꠔꠣꠘꠞꠦ ꠖꠦꠈꠤꠀ ꠀꠞꠇ ꠛꠣꠘ꠆ꠖꠤ ꠛꠦꠐꠤꠄ ꠇꠂꠟ,
“ꠅꠃ ꠛꠦꠐꠣꠅ ꠔ ꠘꠣꠍꠣꠞꠔ ꠉꠣꠃꠞ ꠁꠍꠣꠞ ꠟꠉꠦ ꠀꠍꠤꠟ।”
৭২ ꠅꠁꠟꠦ ꠙꠤꠔꠞꠦ ꠢꠤꠞꠛꠣꠞ ꠇꠍꠝ ꠇꠞꠤ ꠇꠁꠟꠣ,
“ꠘꠣ,
ꠘꠣ,
ꠀꠝꠤ ꠔꠣꠞꠦ ꠌꠤꠘꠤꠃ ꠘꠣ।”
৭৩ ꠅꠃ ꠡꠝꠄ ꠔꠣꠘ ꠇꠣꠘ꠆ꠖꠣꠔ ꠎꠦꠞꠣ ꠃꠛꠣ ꠀꠍꠤꠟ,
ꠕꠥꠠꠣ ꠛꠣꠖꠦ ꠔꠣꠞꠣ ꠇꠁꠟꠣ,
“ꠅꠛꠣ,
ꠔꠥꠝꠤꠅ ꠘꠤꠌ꠆ꠌꠄ ꠄꠞꠣꠞ ꠟꠉꠞ,
ꠔꠥꠝꠣꠞ ꠝꠣꠔ-ꠇꠕꠣꠄꠃ ꠔ ꠛꠥꠎꠣ ꠎꠣꠞ।”
৭৪ ꠔꠦꠃ ꠙꠤꠔꠞꠦ ꠇꠁꠟꠣ,
“ꠀꠟ꠆ꠟꠣꠞ ꠉꠎꠛ ꠙꠠꠃꠇ,
ꠀꠝꠤ ꠇꠍꠝ ꠈꠣꠁꠀ ꠇꠁꠀꠞ,
ꠀꠝꠤ ꠝꠥꠐꠦꠃ ꠔꠣꠞꠦ ꠌꠤꠘꠤ ꠘꠣ।”
৭৫ ꠅꠈꠣꠘ ꠇꠁꠔꠦꠃ ꠝꠥꠞꠉꠣꠄ ꠛꠣꠋ ꠖꠤꠟꠣꠁꠟ।
ꠛꠣꠋ ꠢꠥꠘꠔꠦꠃ ꠙꠤꠔꠞꠞ ꠝꠘꠅ ꠅꠁꠉꠦꠟ,
ꠁꠍꠣꠄ ꠀꠉꠦ ꠇꠁꠍꠟꠣ,
“ꠝꠥꠞꠉꠣꠄ ꠛꠣꠋ ꠖꠤꠛꠣꠞ ꠀꠉꠦꠃ ꠔꠥꠝꠤ ꠔꠤꠘꠛꠣꠞ ꠇꠁꠛꠣꠄ,
ꠔꠥꠝꠤ ꠀꠝꠣꠞꠦ ꠌꠤꠘꠅ ꠘꠣ।”
ꠄꠞꠟꠣꠉꠤ ꠔꠣꠁꠘ ꠛꠣꠞꠦ ꠉꠤꠀ ꠀꠃ-ꠀꠃ ꠇꠞꠤ ꠇꠣꠘ꠆ꠖꠘ ꠗꠞꠟꠣ।