ꠀꠟ꠆ꠟꠣꠞ ꠛꠣꠖꠡꠣꠁꠔ ꠚꠟ ꠗꠞꠣꠞ ꠘꠣꠘꠣꠘ ꠘꠝꠥꠘꠣ
৪
১ ꠢꠎꠞꠔ ꠁꠍꠣ ꠢꠤꠞꠛꠣꠞ ꠉꠣꠟꠤꠟ ꠀꠅꠞꠞ ꠙꠣꠞꠅ ꠀꠁꠀ ꠝꠣꠘꠡꠞꠦ ꠔꠣꠟꠤꠝ ꠖꠤꠔꠣ ꠟꠣꠉꠟꠣ।
ꠔꠣꠘ ꠌꠣꠁꠞꠅ ꠉꠣꠟꠣꠛꠣꠄ ꠛꠃꠔ ꠝꠣꠘꠡꠦ ꠜꠤꠠ ꠛꠣꠘ꠆ꠖꠤꠟ꠆ꠟꠣ,
ꠄꠞꠖꠣꠄ ꠔꠣꠁꠘ ꠄꠇ ꠘꠣꠅꠔ ꠃꠑꠤꠀ ꠛꠁꠟꠣ,
ꠀꠞ ꠝꠣꠘꠡꠦ ꠙꠣꠞꠅ ꠕꠘꠦ ꠔꠣꠘ ꠛꠄꠀꠘ ꠢꠥꠘꠟꠣ।
২ ꠔꠣꠁꠘ ꠇꠤꠌ꠆ꠍꠣ ꠢꠥꠘꠣꠁ-ꠢꠥꠘꠣꠁ ꠝꠣꠘꠡꠞꠦ ꠔꠣꠟꠤꠝ ꠖꠦꠅꠀꠔ ꠀꠍꠟꠣ,
ꠄꠞꠝꠣꠎꠦ ꠔꠣꠁꠘ ꠇꠁꠟꠣ,
৩ “ꠗꠞꠃꠇ꠆ꠇꠣ,
ꠄꠇ ꠉꠤꠞꠡ꠆ꠔꠦ ꠎꠣꠟꠣ ꠛꠣꠁꠘ ꠇꠞꠣꠔ ꠉꠦꠟ।
৪ ꠉꠤꠀ ꠛꠣꠁꠘ ꠇꠞꠣꠞ ꠡꠝꠄ ꠇꠤꠍꠥ ꠎꠣꠟꠣ ꠙꠕꠞ ꠇꠣꠘ꠆ꠖꠣꠔ ꠙꠠꠟ,
ꠀꠞ ꠙꠣꠈꠤꠘ꠆ꠔꠦ ꠀꠁꠀ ꠁꠔꠣ ꠈꠣꠁꠟꠤꠟ।
৫ ꠇꠤꠍꠥ ꠎꠣꠟꠣ ꠙꠣꠔ꠆ꠔꠞ ꠀꠟꠣ ꠝꠣꠐꠤꠔ ꠙꠠꠟ,
ꠁꠔꠣꠞ ꠔꠟꠦ ꠛꠦꠡꠤ ꠝꠣꠐꠤ ꠀꠍꠤꠟ ꠘꠣ,
ꠄꠞꠖꠣꠄ ꠔꠟꠦꠖꠤ ꠛꠟ ꠘꠣ ꠇꠞꠤꠀꠃ ꠎꠟꠖꠤ ꠇꠞꠤ ꠚꠥꠐꠤꠉꠦꠟ।
৬ ꠛꠣꠖꠦ ꠡꠥꠞꠥꠎ ꠃꠑꠤꠀ ꠢꠣꠞꠟꠦ ꠎꠁꠞ ꠈꠣꠁꠟꠤꠟ,
ꠀꠞ ꠔꠟꠞ ꠎꠠꠦ ꠞꠡ ꠘꠣ ꠙꠣꠅꠀꠄ ꠢꠥꠇꠣꠁꠀ ꠝꠞꠤꠉꠦꠟ।
৭ ꠇꠤꠍꠥ ꠎꠣꠟꠣ ꠎꠋꠟꠣꠞ ꠝꠣꠎꠦ ꠙꠠꠟ,
ꠔꠦꠃ ꠎꠋꠟꠣ ꠛꠠ ꠅꠁꠀ ꠁꠔꠣꠞꠦ ꠎꠣꠔꠤꠀ ꠗꠞꠟ,
ꠄꠞꠖꠣꠄ ꠇꠥꠘꠥ ꠍꠠꠣ ꠍꠣꠠꠟ ꠘꠣ।
৮ ꠅꠁꠟꠦ ꠇꠤꠍꠥ ꠎꠣꠟꠣ ꠜꠣꠟꠣ ꠎꠝꠤꠘꠅ ꠙꠠꠟ,
ꠁꠔꠣꠄ ꠀꠟꠤ ꠛꠣꠞꠅꠁꠀ ꠛꠠ ꠅꠁꠀ ꠍꠠꠣ ꠍꠣꠠꠟ,
ꠇꠥꠘꠥ ꠍꠠꠣꠄ ꠔꠤꠡ,
ꠇꠥꠘꠥ ꠍꠠꠣꠄ ꠡꠣꠁꠐ,
ꠇꠥꠘꠥ ꠍꠠꠣꠄ ꠄꠇ-ꠡ ꠉꠥꠘ ꠛꠦꠡꠤ ꠗꠣꠘ ꠗꠞꠟ।”
৯ ꠢꠦꠡꠦ ꠁꠍꠣꠄ ꠇꠁꠟꠣ,
“ꠢꠥꠘꠣꠞ ꠟꠣꠈ ꠇꠣꠘ ꠎꠣꠞ ꠀꠍꠦ,
ꠢꠦ ꠢꠥꠘꠃꠇ।”
১০ ꠛꠣꠖꠦ ꠜꠤꠠ ꠇꠝꠤꠀ ꠢꠣꠞꠟꠦ ꠔꠣꠘ ꠟꠉꠞ ꠝꠣꠘꠡꠦ ꠀꠞ ꠛꠣꠞꠅꠎꠘ ꠍꠣꠢꠣꠛꠤꠄ ꠔꠣꠘꠞꠦ ꠎꠤꠇꠣꠁꠟꠣ,
“ꠢꠥꠎꠥꠞ,
ꠁ ꠇꠤꠌ꠆ꠍꠣꠞ ꠝꠥꠟ ꠝꠣꠘꠤ ꠇꠤꠔꠣ?”
১১ ꠁꠍꠣꠄ ꠎꠥꠀꠙ ꠖꠤꠟꠣ,
“ꠀꠟ꠆ꠟꠣꠞ ꠛꠣꠖꠡꠣꠁꠞ ꠉꠥꠙꠘ ꠞꠢꠁꠡ꠆ꠡ ꠎꠣꠘꠣꠞ ꠡꠥꠎꠥꠉ ꠔꠥꠝꠞꠣꠞꠦ ꠖꠦꠅꠀ ꠅꠁꠍꠦ,
ꠅꠁꠟꠦ ꠛꠣꠁꠞꠣ ꠝꠣꠘꠡꠞ ꠉꠦꠍꠦ ꠇꠤꠌ꠆ꠍꠣꠞ ꠝꠣꠎꠖꠤ ꠇꠅꠀ ꠅꠁꠍꠦ।
১২ ꠄꠞ ꠇꠣꠞꠘ ꠅꠁꠟ,
ꠀꠟ꠆ꠟꠣꠞ ꠇꠣꠟꠣꠝꠞ ꠅꠃ ꠀꠄꠀꠔ ꠚꠟꠤꠔꠦ ꠅꠁꠛ,
ꠔꠣꠞꠣ ꠌꠣꠁꠀ ꠕꠣꠇꠟꠦꠅ ꠇꠥꠘ꠆ꠔꠣꠃ ꠖꠦꠈꠔ ꠘꠣꠄ,
ꠢꠥꠘꠟꠦꠅ ꠇꠥꠘ꠆ꠔꠣ ꠛꠥꠎꠔ ꠘꠣꠄ।
ꠇꠤꠎꠣꠘꠥ ꠔꠣꠞꠣ ꠎꠥꠖꠤ ꠀꠟ꠆ꠟꠣꠞ ꠛꠣꠄ ꠚꠤꠞꠤꠎꠣꠁꠘ,
ꠀꠞ ꠝꠣꠚꠤ ꠙꠣꠁꠟꠣꠁꠘ।”
১৩ ꠛꠣꠖꠦ ꠁꠍꠣꠄ ꠔꠣꠞꠣꠞꠦ ꠇꠁꠟꠣ,
“ꠔꠥꠝꠞꠣ ꠅꠃ ꠇꠤꠌ꠆ꠍꠣꠞ ꠝꠣꠘꠤ ꠈꠣꠘꠅ ꠛꠥꠎꠟꠣꠄ ꠘꠣ ꠘꠤ?
ꠔꠦ ꠛꠣꠇꠤ ꠇꠤꠌ꠆ꠍꠣꠞ ꠝꠣꠘꠤ ꠇꠤꠟꠣ ꠛꠥꠎꠛꠣꠄ?
১৪ ꠢꠥꠘꠅ,
ꠉꠤꠞꠡ꠆ꠔꠦ ꠎꠦ ꠎꠣꠟꠣ ꠛꠣꠁꠘ ꠇꠞꠦꠞ,
ꠁ ꠎꠣꠟꠣ ꠅꠁꠟꠉꠤ ꠀꠟ꠆ꠟꠣꠞ ꠇꠣꠟꠣꠝ।
১৫ ꠙꠕꠞ ꠇꠣꠘ꠆ꠖꠣꠔ ꠙꠠꠣ ꠎꠣꠟꠣ ꠖꠤꠀ ꠔꠣꠞꠣꠞ ꠛꠦꠙꠣꠞꠦ ꠛꠥꠎꠣꠁꠟ ꠅꠁꠍꠦ,
ꠎꠦꠞꠣ ꠁ ꠇꠣꠟꠣꠝ ꠢꠥꠘꠦ,
ꠅꠁꠟꠦ ꠟꠉꠦ ꠟꠉꠦ ꠁꠛꠟꠤꠍ ꠀꠁꠀ ꠔꠣꠞꠣꠞ ꠖꠤꠟ ꠕꠣꠇꠤ ꠁ ꠇꠣꠟꠣꠝꠞꠦ ꠇꠣꠠꠤꠀ ꠘꠦꠄꠉꠤ।
১৬ ꠙꠣꠔ꠆ꠔꠞꠞ ꠃꠙꠞꠦ ꠙꠠꠣ ꠎꠣꠟꠣꠖꠤ ꠛꠥꠎꠣꠁꠟ ꠅꠁꠍꠦ,
ꠎꠦꠞꠣ ꠁ ꠇꠣꠟꠣꠝ ꠢꠥꠘꠦ ꠀꠞ ꠈꠥꠛ ꠈꠥꠡꠤ ꠅꠁꠀ ꠟꠉꠦ ꠟꠉꠦ ꠇꠛꠥꠟ ꠇꠞꠤꠟꠣꠄ,
১৭ ꠅꠁꠟꠦ ꠔꠣꠞꠣꠞ ꠖꠤꠟꠅ ꠜꠣꠟꠣꠝꠘ꠆ꠔꠦ ꠢꠣꠝꠣꠄ ꠘꠣ ꠇꠞꠤꠀ,
ꠁꠔꠣ ꠈꠣꠟꠤ ꠕꠥꠠꠣ ꠇꠄꠖꠤꠘ ꠇꠣꠁꠝ ꠞꠄ,
ꠛꠣꠖꠦ ꠁ ꠇꠣꠟꠣꠝꠞ ꠟꠣꠉꠤ ꠇꠥꠘꠥ ꠎꠥꠟꠥꠝ-ꠝꠍꠤꠛꠔ ꠀꠎꠤꠞ ꠅꠁꠟꠦ ꠔꠣꠞꠣ ꠙꠤꠍꠟꠣꠁ ꠎꠣꠄ।
১৮ ꠎꠋꠟꠣꠞ ꠝꠣꠎꠦ ꠙꠠꠣ ꠎꠣꠟꠣꠞ ꠝꠣꠘꠤ ꠅꠁꠟ,
ꠎꠦꠞꠣ ꠁ ꠇꠣꠟꠣꠝ ꠢꠥꠘꠦ,
১৯ ꠅꠁꠟꠦ ꠎꠉꠔꠞ ꠌꠤꠘ꠆ꠔꠣ-ꠜꠣꠛꠘꠣ,
ꠗꠘ-ꠍꠣꠝꠣꠘꠣꠞ ꠝꠣꠄꠀ ꠀꠞ ꠖꠥꠘꠤꠀꠛꠤ ꠟꠣꠟꠌꠦ ꠁ ꠇꠣꠟꠣꠝꠞꠦ ꠎꠣꠔꠤꠀ ꠗꠞꠤꠟꠣꠄ,
ꠄꠞꠖꠣꠄ ꠇꠣꠟꠣꠝꠦ ꠇꠥꠘꠥ ꠀꠝꠟ ꠇꠞꠦ ꠘꠣ।
২০ ꠀꠞ ꠜꠣꠟꠣ ꠎꠝꠤꠘꠅ ꠙꠠꠣ ꠎꠣꠟꠣꠞ ꠝꠣꠘꠤ ꠅꠁꠟ,
ꠎꠦꠞꠣ ꠁ ꠇꠣꠟꠣꠝ ꠢꠥꠘꠦ,
ꠇꠛꠥꠟ ꠇꠞꠦ ꠀꠞ ꠜꠣꠟꠣ ꠚꠟ ꠗꠞꠦ,
ꠇꠦꠃ ꠔꠤꠡ,
ꠇꠦꠃ ꠡꠣꠁꠐ,
ꠇꠦꠃ ꠄꠇ-ꠡ ꠉꠥꠘ ꠚꠟ ꠗꠞꠦ।”
২১ ꠁꠍꠣꠄ ꠀꠞꠅ ꠇꠁꠟꠣ,
“ꠇꠥꠘꠥ ꠝꠣꠘꠡꠦ ꠟꠦꠝ ꠎꠣꠟꠣꠁꠀ ꠐꠥꠇꠞꠤꠞ ꠔꠟꠦ ꠛꠣ ꠌꠇꠤꠞ ꠔꠟꠦ ꠕꠄ ꠘꠤ?
ꠟꠦꠝ ꠎꠣꠟꠣꠁꠀ ꠉꠣꠍꠣꠞ ꠃꠙꠞꠦ ꠕꠂꠘ ꠘꠣ ꠘꠤ?
২২ ꠔꠦ ꠁꠟꠣ ꠟꠥꠇꠣꠁꠟ ꠇꠥꠘ꠆ꠔꠣꠃ ꠘꠣꠁ,
ꠎꠦꠔꠣ ꠛꠣꠞꠅꠁꠔ ꠘꠣꠄ।
ꠀꠞ ꠁꠟꠣ ꠇꠥꠘꠥ ꠛꠣꠔꠥꠘꠤ ꠛꠦꠙꠣꠞꠅ ꠘꠣꠁ,
ꠎꠦꠔꠣ ꠎꠣꠁꠞ ꠅꠁꠔ ꠘꠣꠄ।
২৩ ꠢꠥꠘꠣꠞ ꠟꠣꠈ ꠇꠣꠘ ꠎꠣꠞ ꠀꠍꠦ,
ꠢꠦ ꠢꠥꠘꠃꠇ।”
২৪ ꠛꠣꠖꠦ ꠔꠣꠁꠘ ꠇꠁꠟꠣ,
“ꠔꠥꠝꠞꠣ ꠈꠤꠀꠟ ꠇꠞꠤꠀ ꠢꠥꠘꠅ,
ꠔꠥꠝꠞꠣ ꠎꠦꠟꠣ ꠝꠣꠙꠤꠀ ꠖꠦꠅ,
ꠔꠥꠝꠞꠣꠞ ꠟꠣꠉꠤ ꠅꠃꠟꠣ ꠝꠣꠙꠣ ꠅꠁꠛ।
ꠗꠞꠤꠟꠣꠅ,
ꠔꠥꠝꠞꠣꠞ ꠟꠣꠉꠤ ꠀꠞꠅ ꠛꠦꠡ ꠇꠞꠤ ꠝꠣꠙꠣ ꠅꠁꠛ।
২৫ ꠎꠣꠞ ꠀꠍꠦ ꠔꠣꠞꠦ ꠀꠞꠅ ꠖꠦꠅꠀ ꠅꠁꠛ,
ꠅꠁꠟꠦ ꠎꠣꠞ ꠘꠣꠁ,
ꠔꠣꠞ ꠎꠦꠔꠣ ꠀꠍꠦ ꠄꠅꠔꠣ ꠘꠦꠅꠀ ꠅꠁꠎꠤꠛ।”
২৬ ꠔꠣꠁꠘ ꠀꠞꠇꠛꠣꠞ ꠇꠁꠟꠣ,
“ꠢꠥꠘꠅ,
ꠀꠟ꠆ꠟꠣꠞ ꠛꠣꠖꠡꠣꠁ ꠅꠁꠟ ꠅꠃ ꠟꠣꠈꠣꠘ।
ꠗꠞꠤꠟꠣꠅ,
ꠄꠇ ꠉꠤꠞꠡ꠆ꠔꠦ ꠔꠣꠞ ꠎꠝꠤꠘꠅ ꠎꠣꠟꠣ ꠛꠣꠁꠘ ꠇꠞꠟ।
২৭ ꠛꠣꠖꠦ ꠢꠦ ꠞꠣꠁꠔ ꠅꠁꠟꠦ ꠊꠥꠝꠣꠁꠟ ꠀꠞ ꠖꠤꠘꠞ ꠛꠣꠟꠣ ꠊꠥꠞꠣ-ꠊꠥꠞꠤ ꠇꠞꠟ।
ꠅꠁꠟꠦ ꠎꠣꠟꠣ ꠚꠥꠐꠤꠀ ꠇꠦꠝꠘꠦ ꠉꠣꠍ ꠅꠁꠟ,
ꠢꠦ ꠔ ꠇꠥꠘ꠆ꠔꠣ ꠎꠣꠘꠦ ꠘꠣ।
২৮ ꠎꠝꠤꠘꠦ ꠘꠤꠎꠦ ꠘꠤꠎꠦꠃ ꠁꠔꠣ ꠚꠟꠣꠁꠟ,
ꠙꠄꠟꠣ ꠌꠦꠞꠣ,
ꠛꠣꠖꠦ ꠍꠠꠣ ꠀꠞ ꠍꠠꠣꠞ ꠝꠣꠎꠦ ꠙꠥꠡ꠆ꠐ ꠗꠣꠘ ꠗꠞꠟ।
২৯ ꠗꠣꠘ ꠙꠣꠇꠤꠀ ꠢꠣꠞꠟꠦ ꠢꠦ ꠛꠥꠎꠤꠟꠣꠄ ꠖꠣꠅꠀꠞ ꠡꠝꠄ ꠅꠁꠉꠦꠍꠦ,
ꠔꠦꠃ ꠇꠣꠌꠤ ꠟꠣꠉꠣꠁꠀ ꠖꠣꠄ।”
ꠒꠦꠋꠉꠣ ꠛꠤꠌꠤꠞ ꠇꠤꠌ꠆ꠍꠣ
৩০ ꠢꠎꠞꠔ ꠁꠍꠣꠄ ꠇꠁꠟꠣ,
“ꠀꠟ꠆ꠟꠣꠞ ꠛꠣꠖꠡꠣꠁꠞꠦ ꠀꠝꠞꠣ ꠇꠤꠔꠣꠞ ꠟꠉꠦ ꠔꠥꠟꠘꠣ ꠇꠞꠔꠣꠝ?
ꠇꠤꠔꠣꠖꠤ ꠛꠥꠎꠣꠁꠔꠣꠝ?
৩১ ꠀꠁꠌ꠆ꠍꠣ,
ꠝꠘꠦ ꠇꠞꠅ ꠀꠟ꠆ꠟꠣꠞ ꠛꠣꠖꠡꠣꠁ ꠅꠁꠟ ꠄꠉꠥ ꠒꠦꠋꠉꠣ ꠛꠤꠌꠤꠞ ꠟꠣꠈꠣꠘ।
ꠁ ꠛꠤꠌꠤ ꠛꠣꠁꠘ ꠇꠞꠣꠞ ꠛꠣꠟꠣ ꠖꠦꠈꠣ ꠎꠣꠄ,
ꠢꠇꠟ ꠎꠣꠔꠞ ꠛꠤꠌꠤ ꠕꠘꠦ ꠁꠐꠣ ꠢꠥꠞꠥ-ꠝꠥꠞꠥ।
৩২ ꠅꠁꠟꠦ ꠛꠣꠁꠘ ꠇꠞꠣꠞ ꠛꠣꠖꠦ ꠁꠐꠣ ꠢꠇ꠆ꠇꠟ ꠎꠣꠔꠞ ꠢꠣꠉ ꠕꠘꠦꠅ ꠛꠠ ꠛꠠ ꠙꠣꠔꠣ ꠀꠞ ꠉꠣꠍ ꠅꠄ।
ꠀꠞ ꠝꠥꠐꠣ ꠝꠥꠐꠣ ꠒꠣꠟ ꠛꠣꠞꠅꠄ,
ꠁ ꠒꠣꠟꠞ ꠍꠣꠄꠀꠔ ꠙꠣꠈꠤꠘ꠆ꠔꠦ ꠀꠁꠀ ꠀꠡꠞꠄ ꠟꠂꠘ।”
৩৩ ꠅꠃ ꠟꠣꠈꠣꠘ ꠛꠃꠔ ꠘꠝꠥꠘꠣꠞ ꠇꠤꠌ꠆ꠍꠣ ꠇꠁꠔꠣ,
ꠀꠞ ꠎꠦ ꠎꠦꠟꠣ ꠛꠥꠎꠔ ꠙꠣꠞꠦ,
ꠔꠣꠞ ꠛꠥꠎ ꠝꠣꠚꠤꠇ ꠔꠣꠞꠦ ꠀꠟ꠆ꠟꠣꠞ ꠇꠣꠟꠣꠝ ꠢꠥꠘꠣꠁꠔꠣ।
৩৪ ꠇꠤꠌ꠆ꠍꠣ ꠍꠣꠠꠣ ꠔꠣꠞꠣꠞꠦ ꠇꠥꠘꠥ ꠔꠣꠟꠤꠝ ꠖꠤꠔꠣ ꠘꠣ।
ꠅꠁꠟꠦ ꠈꠣꠟꠤ ꠍꠣꠢꠣꠛꠤ ꠅꠇꠟ ꠎꠦꠛꠟꠣ ꠔꠣꠘ ꠟꠉꠦ ꠞꠁꠔꠣ,
ꠅꠃ ꠡꠝꠄ ꠔꠣꠁꠘ ꠢꠇꠟ ꠜꠦꠖ ꠜꠣꠋꠉꠤꠀ ꠛꠥꠎꠣꠁꠔꠣ।
ꠀꠅꠞꠞ ꠔꠥꠚꠣꠘ ꠛꠘ꠆ꠖ ꠇꠞꠣ
৩৫ ꠅꠃ ꠖꠤꠘ ꠢꠣꠁꠘ꠆ꠎꠣꠛꠣꠟꠣ ꠢꠎꠞꠔ ꠁꠍꠣꠄ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠇꠁꠟꠣ,
“ꠀꠅ,
ꠀꠝꠞꠣ ꠀꠅꠞꠞ ꠢꠙꠣꠞꠅ ꠎꠣꠁꠔꠣꠝ।”
৩৬ ꠔꠦꠃ ꠍꠣꠢꠣꠛꠤ ꠅꠇꠟꠦ ꠝꠣꠘꠡꠞ ꠉꠦꠍ ꠕꠣꠇꠤ ꠛꠤꠖꠣꠄ ꠟꠁꠀ,
ꠁꠍꠣ ꠎꠦ ꠘꠣꠅꠅ ꠛꠅꠀꠔ ꠀꠍꠟꠣ ꠅꠃ ꠘꠣꠅꠅ ꠃꠑꠤꠀ ꠞꠅꠀꠘꠣ ꠖꠤꠟꠣꠁꠟꠣ,
ꠄꠞꠟꠉꠦ ꠀꠞꠅ ꠘꠣꠅꠀꠁꠘꠅ ꠀꠍꠤꠟ।
৩৭ ꠘꠣꠅ ꠌꠟꠦꠞ,
ꠅꠃ ꠡꠝꠄ ꠀꠈꠔꠣꠃ ꠈꠥꠛ ꠛꠠ ꠄꠇ ꠔꠥꠚꠣꠘ ꠀꠁꠟ,
ꠔꠥꠚꠣꠘꠞ ꠖꠣꠄ ꠀꠚꠣꠟꠞ ꠙꠣꠘꠤ ꠢꠣꠝꠣꠁꠀ ꠘꠣꠅ ꠛꠥꠠꠤꠎꠤꠛꠣꠞ ꠖꠡꠣ।
৩৮ ꠁꠍꠣ ꠘꠣꠅꠞ ꠈꠞ ꠉꠣꠟꠣꠔ ꠄꠇ ꠛꠣꠟꠤꠡꠅ ꠢꠤꠔꠣꠘ ꠖꠤꠀ ꠊꠥꠝꠅ ꠀꠍꠟꠣ।
ꠍꠣꠢꠣꠛꠤ ꠅꠇꠟꠦ ꠔꠣꠘꠞꠦ ꠢꠎꠣꠉ ꠇꠞꠤꠀ ꠇꠁꠟꠣ,
“ꠢꠥꠎꠥꠞ,
ꠀꠙꠘꠦ ꠈꠤꠀꠟ ꠇꠞꠞꠣ ꠘꠣ ꠘꠤ,
ꠀꠝꠞꠣ ꠔ ꠝꠞꠤ ꠎꠣꠁꠀꠞ।”
৩৯ ꠔꠣꠁꠘ ꠃꠑꠤꠀ ꠔꠥꠚꠣꠘꠞꠦ ꠗꠝꠇ ꠖꠤꠟꠣ ꠀꠞ ꠀꠅꠞꠞꠦ ꠇꠁꠟꠣ,
“ꠖꠝ ꠟꠅ,
ꠕꠤꠞ ꠅꠅ।”
ꠇꠅꠀꠞ ꠟꠉꠦ ꠟꠉꠦ ꠔꠥꠚꠣꠘ ꠛꠘ꠆ꠖ ꠅꠁꠉꠦꠟ,
ꠀꠞ ꠢꠇ꠆ꠇꠟꠔꠣ ꠕꠤꠞ ꠅꠁꠟ।
৪০ ꠛꠣꠖꠦ ꠔꠣꠁꠘ ꠍꠣꠢꠣꠛꠤ ꠅꠇꠟꠞꠦ ꠇꠁꠟꠣ,
“ꠔꠥꠝꠞꠣ ꠅꠔ ꠒꠞꠣꠟꠥꠇ ꠇꠦꠘꠦ?
ꠔꠥꠝꠞꠣ ꠅꠈꠘꠅ ꠁꠝꠣꠘ ꠀꠘꠍ ꠘꠣ ꠘꠤ?”
৪১ ꠁꠔꠣ ꠖꠦꠈꠤꠀ ꠍꠣꠢꠣꠛꠤ ꠅꠇꠟꠦ ꠈꠥꠛ ꠒꠞꠣꠁꠟꠣ,
ꠀꠞ ꠄꠇꠦ-ꠅꠁꠘ꠆ꠘꠦ ꠇꠁꠟꠣ,
“ꠄꠁꠘ ꠀꠍꠟꠦ ꠇꠦ?
ꠙꠣꠘꠤꠄ ꠀꠞ ꠛꠣꠔꠣꠡꠦꠅ ꠖꠦꠈꠤ ꠔꠣꠘ ꠢꠥꠇꠥꠝ ꠝꠣꠘꠦ।”