ꠀꠔ ꠢꠥꠇꠘꠣ ꠛꠦꠝꠣꠞꠤꠞ ꠡꠤꠚꠣ
৩
১ ꠢꠎꠞꠔ ꠁꠍꠣ ꠢꠤꠞꠛꠣꠞ ꠝꠍꠤꠖꠅ ꠉꠤꠀ ꠢꠣꠝꠣꠁꠟꠣ,
ꠢꠘꠅ ꠅꠟꠣ ꠄꠇ ꠛꠦꠐꠣ ꠀꠍꠤꠟ,
ꠔꠣꠞ ꠄꠇ ꠀꠔ ꠛꠦꠝꠣꠞꠦ ꠢꠥꠇꠣꠁ ꠉꠦꠍꠦ।
২ ꠔꠣꠁꠘ ꠎꠥꠝ꠆ꠝꠣꠛꠣꠞꠦ ꠅꠃ ꠛꠦꠐꠣꠞꠦ ꠜꠣꠟꠣ ꠇꠞꠂꠘ ꠇꠤ ꠘꠣ ꠖꠦꠈꠣꠞ ꠟꠣꠉꠤ ꠚꠞꠤꠡꠤ ꠝꠎꠛꠞ ꠇꠄꠎꠘ ꠝꠣꠘꠡꠦ ꠔꠣꠘ ꠛꠣꠄ ꠈꠥꠛ ꠈꠤꠀꠟ ꠞꠣꠈꠟꠣ,
ꠔꠣꠞꠣ ꠌꠣꠁꠟꠣ ꠔꠣꠘ ꠇꠥꠘꠥ ꠈꠥꠔ ꠛꠣꠞ ꠇꠞꠤꠀ ꠚꠣꠘ꠆ꠖꠅ ꠚꠣꠟꠣꠁꠔꠣ।
৩ ꠁꠍꠣꠄ ꠅꠃ ꠢꠥꠇꠘꠣ ꠀꠔꠀꠟꠣ ꠛꠦꠐꠣꠞꠦ ꠇꠁꠟꠣ,
“ꠅꠛꠣ,
ꠢꠇꠟꠞ ꠍꠣꠝꠘꠦ ꠀꠁꠀ ꠃꠛꠣꠅ ꠌꠣꠁꠘ।”
৪ ꠛꠦꠐꠣ ꠀꠁꠀ ꠢꠣꠞꠟꠦ ꠔꠣꠁꠘ ꠢꠇꠟ ꠝꠣꠘꠡꠞꠦ ꠎꠤꠇꠣꠁꠟꠣ,
“ꠍꠣꠛ ꠅꠇꠟ,
ꠎꠥꠝ꠆ꠝꠣꠛꠣꠞꠦ ꠇꠤꠔꠣ ꠇꠞꠣ ꠎꠞꠥꠞ,
ꠘꠦꠇ ꠇꠣꠝ,
ꠘꠣ ꠛꠖ ꠇꠣꠝ?
ꠎꠣꠘꠞ ꠢꠦꠚꠣꠎꠔ ꠇꠞꠣ,
ꠘꠣ ꠎꠣꠘꠦ ꠝꠣꠞꠣ?”
ꠁꠈꠣꠘ ꠢꠥꠘꠤꠀ ꠔꠣꠞꠣ ꠝꠥꠈ ꠛꠘ꠆ꠖ ꠇꠞꠤ ꠛꠁꠞꠁꠟꠣ।
৫ ꠔꠣꠞꠣꠞ ꠝꠘꠞ ꠁ ꠙꠣꠡꠣꠘ ꠢꠣꠟꠔ ꠖꠦꠈꠤꠀ,
ꠁꠍꠣꠞ ꠖꠤꠟꠅ ꠈꠥꠛ ꠖꠥꠈ ꠢꠣꠝꠣꠁꠟ।
ꠔꠣꠁꠘ ꠔꠣꠞꠣꠞ ꠛꠣꠄ ꠌꠣꠁꠀ ꠉꠥꠍꠣ ꠇꠞꠤ ꠢꠃ ꠛꠦꠝꠣꠞꠤ ꠛꠦꠐꠣꠞꠦ ꠇꠁꠟꠣ,
“ꠔꠥꠝꠣꠞ ꠀꠔꠈꠣꠘ ꠛꠣꠠꠣꠅ।”
ꠢꠦ ꠔꠣꠞ ꠀꠔ ꠛꠣꠠꠣꠁꠔꠦꠃ ꠀꠉꠞ ꠟꠣꠈꠣꠘ ꠙꠥꠞꠣ ꠜꠣꠟꠣ ꠅꠁꠉꠦꠟ।
৬ ꠁꠈꠣꠘ ꠖꠦꠈꠤꠀꠃ ꠚꠞꠤꠡꠤ ꠅꠇꠟ ꠟꠉꠦ ꠟꠉꠦ ꠛꠣꠞꠅꠁ ꠉꠦꠟꠣ,
ꠉꠤꠀ ꠞꠣꠎꠣ ꠢꠦꠞꠥꠖꠞ ꠝꠣꠘꠡꠞ ꠟꠉꠦ ꠝꠤꠟꠤꠀ ꠁꠍꠣꠞꠦ ꠇꠣꠔꠟ ꠇꠞꠣꠞ ꠙꠞꠣꠝꠤꠡ ꠇꠞꠟꠣ।
৭-৮ ꠛꠣꠖꠦ ꠁꠍꠣꠄ ꠔꠣꠘ ꠡꠣꠉꠞꠤꠖ ꠅꠇꠟꠞꠦ ꠟꠁꠀ ꠀꠅꠞꠞ ꠙꠣꠞꠅ ꠉꠦꠟꠣꠉꠤ,
ꠢꠘꠅꠅ ꠛꠃꠔ ꠝꠣꠘꠥꠡ ꠔꠣꠘ ꠈꠞꠦ ꠈꠞꠦ ꠉꠦꠟꠣ।
ꠔꠣꠘ ꠘꠣꠘꠣꠘ ꠝꠥꠎꠦꠎꠣ ꠀꠞ ꠇꠦꠞꠣꠝꠔꠤꠞ ꠈꠛꠞ ꠙꠣꠁꠀ,
ꠄꠢꠥꠖꠤꠀ ꠎꠤꠟꠣ,
ꠉꠣꠟꠤꠟ,
ꠎꠦꠞꠥꠎꠣꠟꠦꠝ,
ꠁꠖꠥꠝ,
ꠎꠞ꠆ꠖꠣꠘ ꠉꠣꠋꠉꠞ ꠢꠙꠣꠞ,
ꠡꠥꠞ ꠀꠞ ꠍꠤꠖꠘ ꠄꠟꠣꠇꠣ ꠕꠣꠇꠤ ꠅꠃ ꠝꠣꠘꠥꠡ ꠅꠇꠟ ꠀꠁꠍꠟꠣ।
৯ ꠝꠣꠘꠡꠞ ꠜꠤꠠ ꠖꠦꠈꠤꠀ ꠔꠣꠁꠘ ꠡꠣꠉꠞꠤꠖ ꠅꠇꠟꠞꠦ ꠇꠁꠟꠣ,
“ꠔꠥꠝꠞꠣ ꠀꠝꠣꠞ ꠟꠣꠉꠤ ꠄꠇꠈꠣꠘ ꠘꠣꠅ ꠎꠥꠁꠔ ꠇꠞꠅ,
ꠀꠞꠘꠣꠄ ꠝꠣꠘꠡꠦ ꠑꠦꠟꠣ-ꠗꠣꠇ꠆ꠇꠣ ꠈꠣꠁꠀ ꠀꠝꠣꠞ ꠃꠙꠞꠦ ꠀꠁꠀ ꠙꠠꠤꠎꠤꠛꠣ।”
১০ ꠔꠣꠁꠘ ꠛꠃꠔ ꠛꠦꠝꠣꠞꠤꠞꠦ ꠡꠤꠚꠣ ꠇꠞꠣꠄ ꠛꠦꠝꠣꠞꠤ ꠝꠣꠘꠡꠦ ꠔꠣꠘꠦ ꠍꠁꠔꠣ ꠇꠞꠤ ꠑꠦꠟꠤꠀ ꠗꠣꠇ꠆ꠇꠣꠁꠀ ꠀꠁꠀ ꠔꠣꠘ ꠃꠙꠞꠦ ꠙꠠꠤꠎꠤꠔꠣ।
১১ ꠀꠞ ꠎꠤꠘ-ꠜꠥꠔ ꠅꠇꠟꠦ ꠔꠣꠘꠦ ꠖꠦꠈꠟꠦꠃ ꠔꠣꠘ ꠍꠣꠝꠘꠦ ꠝꠣꠐꠤꠔ ꠙꠠꠤꠀ ꠍꠁꠎꠖꠣ ꠇꠞꠤꠀ ꠌꠤꠟ꠆ꠟꠣꠁꠀ ꠇꠁꠔ,
“ꠀꠙꠘꠦꠃ ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣ।”
১২ ꠅꠁꠟꠦ ꠁꠍꠣꠄ ꠔꠣꠞꠣꠞꠦ ꠈꠥꠛ ꠇꠠꠣꠇꠠꠤ ꠢꠥꠇꠥꠝ ꠖꠤꠔꠣ,
“ꠈꠛꠞꠖꠣꠞ!
ꠔꠥꠝꠞꠣ ꠀꠝꠣꠞ ꠙꠞꠤꠌꠄ ꠎꠣꠁꠞ ꠇꠞꠤꠅ ꠘꠣ।”
ꠛꠣꠞꠅꠎꠘ ꠍꠣꠢꠣꠛꠤ ꠙꠍꠘ꠆ꠖ ꠇꠞꠣ
১৩ ꠛꠣꠖꠦ ꠢꠎꠞꠔ ꠁꠍꠣ ꠙꠣꠠꠞ ꠃꠙꠞꠦ ꠉꠦꠟꠣꠉꠤ,
ꠉꠤꠀ ꠔꠣꠘ ꠙꠍꠘ꠆ꠖ ꠇꠞꠣ ꠇꠤꠍꠥ ꠡꠣꠉꠞꠤꠖꠞꠦ ꠔꠣꠘ ꠇꠣꠘ꠆ꠖꠣꠔ ꠒꠣꠇꠣꠁꠀ ꠘꠤꠟꠣ।
১৪-১৫ ꠄꠞꠣ ꠀꠁꠀ ꠢꠣꠞꠟꠦ ꠄꠞꠣꠞ ꠝꠣꠎ ꠕꠘꠦ ꠛꠣꠞꠅꠎꠘꠞꠦ ꠔꠣꠁꠘ ꠀꠟꠉ ꠇꠞꠟꠣ,
ꠄꠞꠣ ꠎꠣꠘꠥ ꠔꠣꠘ ꠟꠉꠦ ꠟꠉꠦ ꠞꠂꠘ,
ꠀꠞ ꠎꠤꠘ-ꠜꠥꠔ ꠍꠣꠠꠣꠘꠤꠞ ꠈꠦꠝꠔꠣ ꠖꠤꠀ ꠄꠞꠣꠞꠦ ꠔꠛꠟꠤꠉ ꠇꠣꠝꠅ ꠛꠦꠎꠤꠔꠣ ꠙꠣꠞꠂꠘ।
ꠅꠃ ꠛꠣꠞꠅꠎꠘ ꠅꠁꠟꠣ ꠔꠣꠘ ꠍꠣꠢꠣꠛꠤ।
১৬ ꠔꠣꠁꠘ ꠍꠣꠁꠝꠘꠞ ꠘꠄꠀ ꠘꠣꠝ ꠞꠣꠈꠟꠣ ꠙꠤꠔꠞ।
১৭ ꠎꠤꠛꠥꠖꠤꠀꠞ ꠖꠥꠁ ꠙꠥꠀ ꠁꠀꠇꠥꠛ ꠀꠞ ꠢꠣꠘ꠆ꠘꠣꠘ,
ꠔꠣꠁꠘ ꠄꠞꠣꠞ ꠘꠄꠀ ꠘꠣꠝ ꠖꠤꠟꠣ ꠛꠥꠘꠦꠞꠉꠡ,
ꠝꠣꠘꠤ ꠝꠦꠊꠞ ꠒꠣꠇꠞ ꠙꠥꠀ।
১৮ ꠀꠘ꠆ꠖ꠆ꠞꠤꠀꠍ,
ꠚꠤꠟꠤꠚ,
ꠛꠞꠕꠟꠝꠄ,
ꠝꠕꠤ,
ꠕꠥꠝꠣꠍ,
ꠀꠟꠚꠤꠞ ꠙꠥꠀ ꠁꠀꠇꠥꠛ,
ꠕꠖ꠆ꠖꠦ,
ꠝꠥꠇ꠆ꠔꠤꠎꠥꠖ꠆ꠖꠣ ꠍꠣꠁꠝꠘ,
১৯ ꠀꠞ ꠁꠢꠥꠖꠣ ꠁꠡ꠆ꠇꠣꠞꠤꠀꠔ,
ꠅꠃ ꠁꠢꠥꠖꠣꠄ ꠛꠣꠖꠦ ꠛꠦꠁꠝꠣꠘꠤ ꠇꠞꠤꠀ ꠁꠍꠣꠞꠦ ꠖꠥꠡꠝꠘꠞ ꠀꠔꠅ ꠗꠞꠣꠁꠀ ꠖꠤꠍꠤꠟ।
ꠢꠎꠞꠔ ꠁꠍꠣ ꠀꠞ ꠎꠤꠘꠞ ꠛꠣꠖꠡꠣ
২০ ꠢꠎꠞꠔ ꠁꠍꠣ ꠄꠇ ꠛꠣꠠꠤꠔ ꠉꠦꠟꠣ।
ꠅꠘꠅ ꠀꠁꠀꠅ ꠅꠔ ꠛꠦꠡꠤ ꠝꠣꠘꠡꠦ ꠜꠤꠠ ꠛꠣꠘ꠆ꠖꠤꠟꠣ,
ꠜꠤꠠꠞ ꠟꠣꠉꠤ ꠁꠍꠣꠄ ꠀꠞ ꠍꠣꠢꠣꠛꠤ ꠅꠇꠟꠦꠅ ꠈꠣꠘꠣ ꠈꠣꠁꠔꠣ ꠙꠣꠞꠟꠣ ꠘꠣ।
২১ ꠔꠣꠘ ꠜꠣꠁ-ꠛꠤꠞꠣꠖꠞꠦ ꠁ ꠈꠛꠞ ꠢꠥꠘꠤꠀ ꠔꠣꠘꠞꠦ ꠅꠘ ꠕꠣꠇꠤ ꠛꠣꠞ ꠇꠞꠤ ꠘꠦꠅꠀꠔ ꠀꠁꠟꠣ,
ꠄꠞꠣ ꠇꠁꠟꠣ,
“ꠔꠣꠞ ꠔ ꠝꠣꠕꠣ ꠈꠣꠞꠣꠙ ꠅꠁꠉꠦꠍꠦ।”
২২ ꠎꠦꠞꠥꠎꠣꠟꠦꠝ ꠕꠣꠇꠤ ꠇꠄꠎꠘ ꠝꠃꠟꠣꠘꠣ ꠀꠁꠍꠟꠣ,
ꠔꠣꠞꠣ ꠇꠁꠟꠣ,
“ꠎꠤꠘꠞ ꠛꠣꠖꠡꠣ ꠛꠦꠟ-ꠍꠛꠥꠟꠦ ꠔꠣꠞꠦ ꠀꠍꠞ ꠇꠞꠍꠦ।
ꠅꠃ ꠛꠦꠟ-ꠍꠛꠥꠟꠞ ꠛꠟꠦ ꠢꠦ ꠎꠤꠘ-ꠜꠥꠔ ꠍꠣꠠꠣꠄ।”
২৩ ꠁꠈꠣꠘ ꠢꠥꠘꠤꠀ ꠁꠍꠣꠄ ꠅꠃ ꠝꠃꠟꠣꠘꠣ ꠅꠇꠟꠞꠦ ꠗꠣꠞꠅ ꠀꠘꠣꠁꠀ ꠇꠤꠌ꠆ꠍꠣ ꠖꠤꠀ ꠇꠁꠟꠣ,
“ꠡꠄꠔꠣꠘꠦ ꠇꠤꠟꠣ ꠡꠄꠔꠣꠘꠞꠦ ꠈꠦꠖꠣꠄ?
২৪ ꠇꠥꠘꠥ ꠖꠦꠡꠞ ꠜꠤꠔꠞꠦ ꠖꠟꠣꠖꠟꠤ ꠟꠣꠉꠤꠉꠦꠟꠦ ꠁ ꠖꠦꠡ ꠔ ꠀꠞ ꠐꠤꠇꠦ ꠘꠣ।
২৫ ꠅꠃꠟꠣ ꠇꠥꠘꠥ ꠙꠞꠤꠛꠣꠞꠞ ꠝꠣꠎꠦꠅ ꠎꠦꠛꠟꠣ ꠖꠟꠣꠖꠟꠤ ꠟꠣꠉꠤꠎꠣꠄ,
ꠅꠃ ꠙꠞꠤꠛꠣꠞꠅ ꠀꠞ ꠐꠤꠇꠦ ꠘꠣ।
২৬ ꠔꠦ ꠡꠄꠔꠣꠘꠦꠅ ꠎꠥꠖꠤ ꠘꠤꠎꠞ ꠝꠣꠎꠦ ꠖꠟꠣꠖꠟꠤ ꠟꠣꠉꠣꠁ ꠖꠦꠄ,
ꠢꠦ-ꠅ ꠔ ꠐꠤꠇꠔ ꠘꠣꠄ,
ꠛꠤꠘꠣꠡ ꠅꠁꠎꠤꠛ।
২৭ ꠀꠍꠟ ꠢꠣꠍꠣ ꠇꠕꠣ ꠅꠁꠟ,
ꠇꠥꠘꠥ ꠒꠣꠇꠣꠁꠔ ꠒꠣꠇꠣꠔꠤꠔ ꠀꠁꠀ ꠙꠄꠟꠣ ꠅꠃ ꠛꠣꠠꠤꠞ ꠛꠟꠀꠟꠣ ꠝꠥꠟ ꠉꠤꠞꠡ꠆ꠔꠞꠦ ꠘꠣ ꠛꠣꠘ꠆ꠖꠤꠟꠦ,
ꠢꠦ ꠟꠥꠐ-ꠔꠞꠣꠎ ꠇꠞꠔ ꠙꠣꠞꠔ ꠘꠣꠄ।
ꠅꠁꠟꠦ ꠔꠣꠞꠦ ꠛꠣꠘ꠆ꠖꠤꠀ ꠢꠣꠞꠟꠦ ꠟꠥꠐ-ꠔꠞꠣꠎ ꠇꠞꠔ ꠙꠣꠞꠛ।
২৮ ꠢꠥꠘꠃꠇ꠆ꠇꠣ,
ꠀꠝꠤ ꠢꠣꠍꠣ ꠇꠕꠣ ꠇꠁꠞꠣꠝ,
ꠝꠣꠘꠡꠞ ꠔꠣꠝꠣꠝ ꠘꠝꠥꠘꠣꠞ ꠉꠥꠘꠣ ꠀꠞ ꠇꠥꠚꠥꠞꠤꠞ ꠝꠣꠚꠤ ꠀꠍꠦ,
২৯ ꠅꠁꠟꠦ ꠙꠣꠇ ꠞꠥꠢꠥꠞ ꠛꠦꠙꠣꠞꠦ ꠇꠥꠚꠥꠞꠤ ꠇꠞꠟꠦ,
ꠇꠥꠘꠥꠝꠘ꠆ꠔꠦꠃ ꠁ ꠉꠥꠘꠣꠞ ꠝꠣꠚꠤ ꠝꠤꠟꠔ ꠘꠣꠄ।
ꠁ ꠉꠥꠘꠣ ꠞꠥꠎ ꠢꠣꠡꠞ ꠙꠞ꠆ꠎꠘ꠆ꠔ ꠎꠣꠞꠤ ꠞꠁꠛ।”
৩০ ꠁꠍꠣꠞ ꠃꠙꠞꠦ ꠎꠤꠘꠦ ꠀꠍꠞ ꠇꠞꠍꠦ,
ꠝꠃꠟꠣꠘꠣ ꠅꠇꠟꠦ ꠅꠃ ꠇꠕꠣ ꠇꠅꠀꠄ ꠔꠣꠁꠘ ꠔꠣꠞꠣꠞꠦ ꠅꠃꠟꠣ ꠎꠥꠀꠙ ꠖꠤꠟꠣ।
ꠢꠎꠞꠔ ꠁꠍꠣꠞ ꠀꠙꠘ ꠝꠣꠘꠥꠡ ꠇꠦ?
৩১ ꠅꠃ ꠡꠝꠄ ꠢꠎꠞꠔ ꠁꠍꠣꠞ ꠝꠣ ꠀꠞ ꠜꠣꠁꠀꠂꠘ ꠀꠁꠀ ꠛꠣꠞꠦ ꠕꠘꠦ ꠔꠣꠘ ꠉꠦꠍꠦ ꠈꠛꠞ ꠙꠣꠑꠣꠁꠟꠣ।
৩২ ꠅꠁꠟꠦ ꠌꠣꠁꠞꠅ ꠉꠣꠟꠣꠛꠣꠄ ꠝꠣꠘꠡꠞ ꠜꠤꠠ ꠟꠣꠉꠣꠁꠟ ꠀꠍꠤꠟ,
ꠝꠣꠘꠡꠦ ꠔꠣꠘꠞꠦ ꠇꠁꠟꠣ,
“ꠢꠥꠎꠥꠞ,
ꠀꠙꠘꠣꠞ ꠀꠝ꠆ꠝꠣ ꠀꠞ ꠜꠣꠁꠀꠂꠘ ꠀꠁꠀ ꠛꠣꠞꠦ ꠀꠙꠘꠣꠞ ꠔꠣꠟ꠆ꠟꠣꠡ ꠇꠞꠞꠣ।”
৩৩ ꠔꠣꠁꠘ ꠇꠁꠟꠣ,
“ꠀꠝꠣꠞ ꠝꠣ ꠀꠞ ꠜꠣꠁꠀꠂꠘ ꠇꠦ?”
৩৪ ꠇꠁꠀ ꠔꠣꠁꠘ ꠌꠣꠁꠞꠅ ꠉꠣꠟꠣꠞ ꠝꠣꠘꠡꠞ ꠛꠣꠄ ꠌꠣꠁꠀ ꠇꠁꠟꠣ,
“ꠢꠥꠘꠅ,
ꠄꠞꠣꠃ ꠔ ꠀꠝꠣꠞ ꠝꠣ ꠀꠞ ꠜꠣꠁꠀꠂꠘ।
৩৫ ꠎꠦꠞꠣ ꠀꠟ꠆ꠟꠣꠞ ꠝꠞ꠆ꠎꠤ ꠎꠥꠉꠣꠁꠀ ꠌꠟꠂꠘ,
ꠔꠣꠞꠣꠃ ꠔ ꠀꠝꠣꠞ ꠝꠣ,
ꠀꠞ ꠜꠣꠁ-ꠛꠁꠘ।”