ꠙꠞꠗꠣꠘ ꠢꠣꠇꠤꠝ ꠙꠤꠟꠣꠔꠞ ꠀꠖꠣꠟꠔꠅ ꠢꠎꠞꠔ ꠁꠍꠣ
১৫
১ ꠛꠠ ꠁꠝꠣꠝ ꠅꠇꠟꠦ ꠍꠛꠞꠦ ꠃꠑꠤꠀ ꠝꠥꠞꠛ꠆ꠛꠤ ꠅꠇꠟ,
ꠝꠃꠟꠣꠘꠣ ꠀꠞ ꠚꠔꠥꠀ ꠇꠝꠤꠐꠤꠞ ꠢꠇꠟꠞ ꠟꠉꠦ ꠙꠞꠣꠝꠤꠡ ꠇꠞꠤꠀ,
ꠢꠎꠞꠔ ꠁꠍꠣꠞꠦ ꠛꠣꠘ꠆ꠖꠤꠀ ꠞꠥꠝꠣꠘ ꠢꠣꠇꠤꠝ ꠙꠤꠟꠣꠔꠞ ꠉꠦꠍꠦ ꠟꠁꠀ ꠉꠦꠟꠣ।
২ ꠉꠤꠀ ꠢꠣꠞꠟꠦ ꠢꠣꠇꠤꠝ ꠙꠤꠟꠣꠔꠦ ꠁꠍꠣꠞꠦ ꠎꠤꠇꠣꠁꠟꠣ,
“ꠔꠥꠝꠤ ꠇꠤꠔꠣ ꠁꠢꠥꠖꠤ ꠅꠇꠟꠞ ꠛꠣꠖꠡꠣ ꠘꠤ?”
ꠔꠣꠁꠘ ꠇꠁꠟꠣ,
“ꠀꠙꠘꠦ ꠑꠤꠇ ꠇꠕꠣꠃ ꠇꠁꠞꠣ।”
৩ ꠛꠠ ꠁꠝꠣꠝ ꠅꠇꠟꠦ ꠔꠣꠘ ꠘꠣꠝꠦ ꠛꠃꠔ ꠘꠣꠟꠤꠡ ꠖꠤꠟꠣ।
৪ ꠙꠤꠟꠣꠔꠦ ꠢꠤꠞꠛꠣꠞ ꠇꠁꠟꠣ,
“ꠔꠥꠝꠤ ꠇꠥꠘ꠆ꠔꠣ ꠎꠥꠀꠙ ꠖꠤꠔꠣꠄ ꠘꠣ ꠘꠤ?
ꠖꠦꠈꠞꠣꠄ ꠘꠤ,
ꠔꠣꠞꠣ ꠔꠥꠝꠣꠞ ꠛꠤꠞꠥꠖ꠆ꠖꠦ ꠇꠔ ꠘꠣꠟꠤꠡ ꠖꠦꠞ।”
৫ ꠅꠁꠟꠦ ꠁꠍꠣꠄ ꠇꠥꠘꠥ ꠎꠥꠀꠙ ꠘꠣ ꠖꠦꠅꠀꠄ ꠙꠤꠟꠣꠔ ꠔꠣꠁꠎ꠆ꠎꠥꠛ ꠅꠁꠉꠦꠟꠣ।
৬ ꠀꠎꠣꠖꠤ ꠁꠖꠞ ꠡꠝꠄ ꠢꠣꠇꠤꠝꠦ ꠖꠦꠡꠞ ꠝꠣꠘꠡꠞ ꠙꠍꠘ꠆ꠖ ꠝꠣꠚꠤꠇ,
ꠄꠇꠎꠘ ꠀꠎꠔꠤꠞꠦ ꠈꠣꠟꠣꠍ ꠖꠤꠔꠣ।
৭ ꠅꠃ ꠡꠝꠄ ꠛꠣꠞꠣꠛ꠆ꠛꠣ ꠘꠣꠝꠞ ꠄꠇꠎꠘ ꠝꠣꠘꠥꠡ ꠎꠦꠟꠅ ꠀꠍꠤꠟ।
ꠡꠋꠉꠞꠣꠝꠞ ꠡꠝꠄ ꠢꠦ ꠚꠃꠎꠞ ꠟꠉꠦ ꠞꠁꠀ ꠝꠣꠘꠥꠡ ꠈꠥꠘ ꠇꠞꠍꠤꠟ।
৮ ꠝꠣꠘꠡꠦ ꠙꠤꠟꠣꠔꠞ ꠉꠦꠍꠦ ꠀꠁꠀ ꠖꠣꠛꠤ ꠎꠣꠘꠣꠁꠟꠣ,
“ꠀꠙꠘꠦ ꠀꠙꠘꠣꠞ ꠘꠤꠎꠞ ꠞꠦꠅꠀꠎ ꠝꠣꠚꠤꠇ ꠇꠣꠝ ꠇꠞꠃꠇ꠆ꠇꠣ।”
৯ ꠔꠣꠁꠘ ꠎꠤꠇꠣꠁꠟꠣ,
“ꠔꠥꠝꠞꠣ ꠌꠣꠁꠞꠣꠄ ꠘꠤ,
ꠀꠝꠤ ꠁꠢꠥꠖꠤ ꠅꠇꠟꠞ ꠛꠣꠖꠡꠣꠞꠦ ꠍꠣꠠꠤ ꠖꠤꠔꠣꠝ?”
১০ ꠙꠤꠟꠣꠔꠦ ꠎꠣꠘꠔꠣ,
ꠛꠠ ꠁꠝꠣꠝ ꠅꠇꠟꠦ ꠁꠋꠡꠣ ꠇꠞꠤꠀ ꠁꠍꠣꠞꠦ ꠘꠤꠀ ꠔꠣꠘ ꠀꠔꠅ ꠖꠤꠍꠂꠘ।
১১ ꠛꠠ ꠁꠝꠣꠝ ꠅꠇꠟꠦ ꠝꠣꠘꠡꠞꠦ ꠃꠍꠇꠣꠁꠀ ꠖꠤꠟꠣ,
ꠝꠣꠘꠡꠦ ꠁꠍꠣꠞ ꠝꠥꠇ꠆ꠔꠤ ꠘꠣ ꠌꠣꠁꠀ ꠛꠣꠞꠣꠛ꠆ꠛꠣꠞ ꠝꠥꠇ꠆ꠔꠤ ꠌꠣꠁꠘ।
১২ ꠄꠞꠖꠣꠄ ꠙꠤꠟꠣꠔꠦ ꠢꠤꠞꠛꠣꠞ ꠝꠣꠘꠡꠞꠦ ꠎꠤꠇꠣꠁꠟꠣ,
“ꠔꠦ ꠔꠥꠝꠞꠣ ꠎꠣꠞꠦ ꠁꠢꠥꠖꠤꠞ ꠛꠣꠖꠡꠣ ꠇꠅ,
ꠔꠣꠞꠦ ꠀꠝꠤ ꠇꠤꠔꠣ ꠇꠞꠔꠣꠝ?”
১৩ ꠔꠣꠞꠣ ꠢꠇꠟꠦ ꠌꠤꠟ꠆ꠟꠣꠘꠤ ꠟꠣꠉꠣꠁꠟ,
“ꠔꠣꠞꠦ ꠍꠟꠤꠛꠅ ꠖꠦꠅ।”
১৪ ꠔꠣꠁꠘ ꠇꠂꠟ,
“ꠇꠦꠘꠦ,
ꠢꠦ ꠇꠤꠔꠣ ꠖꠥꠡ ꠇꠞꠍꠦ?”
ꠅꠁꠟꠦ ꠝꠣꠘꠡꠦ ꠀꠞꠅ ꠎꠥꠞꠦ ꠎꠥꠞꠦ ꠌꠤꠟ꠆ꠟꠣꠁꠀ ꠇꠁꠟꠣ,
“ꠍꠟꠤꠛꠅ ꠖꠦꠅ।”
১৫ ꠔꠦꠃ ꠙꠤꠟꠣꠔꠦ ꠔꠣꠞꠣꠞꠦ ꠈꠥꠡꠤ ꠇꠞꠔꠣ ꠇꠞꠤ ꠛꠣꠞꠣꠛ꠆ꠛꠣꠞꠦ ꠈꠣꠟꠣꠍ ꠖꠤꠟꠣꠁꠟꠣ,
ꠀꠞ ꠁꠍꠣꠞꠦ ꠛꠦꠡ ꠇꠞꠤ ꠌꠣꠛꠥꠇ ꠝꠣꠞꠤꠀ,
ꠍꠟꠤꠛꠅ ꠟꠐꠇꠣꠁꠀ ꠇꠣꠔꠟ ꠇꠞꠣꠞ ꠢꠥꠇꠥꠝ ꠖꠤꠟꠣ।
(ꠍꠟꠤꠛ ꠅꠁꠟ ꠟꠣꠇꠠꠤꠖꠤ ꠛꠣꠘꠣꠁꠟ ꠝꠣꠘꠡꠞꠦ ꠟꠐꠇꠣꠁꠀ ꠝꠣꠞꠣꠞ ꠄꠇ ꠎꠤꠘꠤꠡ।)
ꠍꠤꠙꠣꠁ ꠅꠇꠟꠞ ꠑꠣꠐ꠆ꠐꠣ-ꠝꠡꠇꠞꠣ
১৬ ꠛꠣꠖꠦ ꠍꠤꠙꠣꠁ ꠅꠇꠟꠦ ꠁꠍꠣꠞꠦ ꠗꠞꠤꠀ ꠙꠞꠗꠣꠘ ꠢꠣꠇꠤꠝꠞ ꠛꠣꠠꠤꠞ ꠜꠤꠔꠞꠦ ꠟꠁꠀ ꠉꠦꠟꠣ।
ꠢꠘꠅ ꠔꠣꠞꠣ ꠀꠞꠅ ꠍꠤꠙꠣꠁ ꠅꠇꠟ ꠖꠟꠣ ꠇꠞꠟꠣ।
১৭ ꠔꠣꠞꠣ ꠁꠍꠣꠞꠦ ꠛꠣꠁꠋꠉꠘꠤ ꠞꠋꠉꠞ ꠛꠣꠖꠡꠣꠁ ꠟꠦꠛꠣꠍ ꠚꠤꠘ꠆ꠖꠣꠁꠟꠣ,
ꠀꠞ ꠉꠍꠣ-ꠇꠣꠐꠣ ꠖꠤꠀ ꠝꠥꠇꠥꠐ ꠛꠣꠘꠣꠁꠀ ꠔꠣꠘ ꠝꠣꠕꠣꠔ ꠖꠤꠟꠣ।
১৮ ꠛꠣꠖꠦ ꠔꠣꠞꠣ ꠝꠡꠇꠞꠣ ꠇꠞꠤ ꠝꠤꠍꠤꠟ ꠖꠤꠟ,
“ꠁꠢꠥꠖꠤꠞ ꠛꠣꠖꠡꠣ,
ꠝꠣꠞꠢꠣꠛꠣ।”
১৯ ꠀꠞ ꠄꠇ ꠟꠣꠑꠤ ꠀꠘꠤꠀ ꠛꠣꠞꠦ ꠛꠣꠞꠦ ꠔꠣꠘ ꠝꠣꠕꠣꠔ ꠝꠣꠞꠟ,
ꠉꠔꠞꠅ ꠍꠦꠚ ꠖꠤꠟ,
ꠔꠣꠘꠦ ꠁꠎ꠆ꠎꠔ ꠖꠦꠈꠣꠘꠤꠞ ꠜꠣꠘ ꠇꠞꠤꠀ ꠔꠣꠘ ꠍꠣꠝꠘꠦ ꠀꠐꠥ ꠉꠣꠠꠤꠀ ꠛꠁꠟ।
২০ ꠅꠃ ꠟꠣꠈꠣꠘ ꠑꠣꠐ꠆ꠐꠣ-ꠝꠡꠇꠞꠣ ꠀꠞ ꠛꠦꠔ꠆ꠔꠝꠤꠎꠤ ꠇꠞꠣꠞ ꠛꠣꠖꠦ ꠔꠣꠘ ꠚꠤꠘ꠆ꠘꠞ ꠛꠣꠁꠋꠉꠘꠤ ꠟꠦꠛꠣꠍ ꠈꠥꠟꠤꠀ,
ꠔꠣꠘ ꠘꠤꠎꠞ ꠇꠣꠙꠠ ꠚꠤꠘ꠆ꠖꠣꠁꠟ ꠀꠞ ꠍꠟꠤꠛꠅ ꠘꠤꠀ ꠇꠣꠔꠟ ꠇꠞꠣꠞ ꠟꠣꠉꠤ ꠞꠅꠀꠘꠣ ꠖꠤꠟ।
ꠍꠟꠤꠛꠞ ꠃꠙꠞꠦ ꠢꠎꠞꠔ ꠁꠍꠣ
২১ ꠔꠣꠞꠣ ꠟꠁꠀ ꠎꠣꠁꠞꠣ ꠅꠃ ꠡꠝꠄ ꠇꠥꠞꠤꠘꠤ ꠄꠟꠣꠇꠣꠞ ꠍꠤꠇꠘ꠆ꠖꠞ ꠀꠞ ꠞꠃꠚꠞ ꠛꠣꠚ,
ꠍꠣꠁꠝꠘ ꠘꠣꠝꠞ ꠄꠇꠎꠘ ꠝꠣꠘꠥꠡ ꠉꠣꠃ ꠕꠣꠇꠤ ꠅꠃ ꠙꠕꠦꠖꠤ ꠀꠐꠤꠀ ꠎꠣꠅꠀꠔ ꠀꠍꠟꠣ।
ꠍꠤꠙꠣꠁ ꠅꠇꠟꠦ ꠎꠥꠞ ꠇꠞꠤꠀ ꠄꠘꠦꠖꠤ ꠢꠃ ꠍꠟꠤꠛ ꠛꠅꠀꠁꠀ ꠘꠤꠟꠣ।
২২ ꠔꠣꠞꠣ ꠁꠍꠣꠞꠦ ꠉꠟꠉꠣꠕꠣ,
ꠝꠣꠘꠤ ꠇꠟ꠆ꠟꠣꠞ ꠌꠣꠠ ꠘꠣꠝꠞ ꠎꠣꠉꠣꠔ ꠟꠁꠀ ꠉꠦꠟꠣ।
২৩ ꠢꠘꠅ ꠘꠤꠀ ꠔꠣꠘꠞꠦ ꠝꠥꠞꠣ ꠘꠣꠝꠞ ꠅꠡꠥꠗ ꠙꠥꠞꠣꠁꠟ ꠀꠋꠉꠥꠞꠞ ꠡꠞꠛꠔ ꠈꠣꠁꠔꠦ ꠖꠤꠟꠣ,
ꠅꠁꠟꠦ ꠔꠣꠁꠘ ꠁꠔꠣ ꠈꠣꠁꠟꠣ ꠘꠣ।
২৪ ꠛꠣꠖꠦ ꠔꠣꠞꠣ ꠔꠣꠘꠞꠦ ꠍꠟꠤꠛꠅ,
ꠝꠣꠘꠤ ꠉꠣꠍꠅ ꠟꠐꠇꠣꠁꠟ।
ꠍꠤꠙꠣꠁ ꠅꠇꠟꠦ ꠔꠣꠘ ꠇꠣꠙꠠ-ꠌꠥꠙꠠ ꠛꠣꠐꠤꠀ ꠘꠦꠅꠀꠞ ꠟꠣꠉꠤ ꠟꠐꠣꠞꠤ ꠝꠣꠞꠤꠀ ꠜꠣꠁꠉ꠆ꠉ ꠙꠞꠤꠇ꠆ꠇꠣ ꠇꠞꠟ।
২৫ ꠛꠤꠀꠘꠦ ꠘꠄꠐꠣꠞ ꠡꠝꠄ ꠔꠣꠞꠣ ꠔꠣꠘꠞꠦ ꠎꠣꠘꠦ ꠝꠣꠞꠣꠞ ꠟꠣꠉꠤ ꠍꠟꠤꠛꠅ ꠉꠣꠕꠤꠟ।
২৬ ꠀꠞ ꠔꠣꠘ ꠅꠙꠞꠣꠗ-ꠘꠣꠝꠣꠞ ꠝꠣꠎꠦ ꠟꠦꠈꠟ,
“ꠁꠢꠥꠖꠤꠞ ꠛꠣꠖꠡꠣ।”
২৭ ꠔꠣꠞꠣ ꠖꠥꠁꠎꠘ ꠒꠣꠇꠣꠁꠔꠞꠦꠅ ꠔꠣꠘ ꠟꠉꠦ ꠍꠟꠤꠛꠅ ꠟꠐꠇꠣꠁꠟ,
ꠄꠇꠎꠘ ꠒꠣꠁꠘ ꠉꠣꠟꠣꠔ,
ꠅꠁꠘ꠆ꠘꠎꠘ ꠛꠣꠃ ꠉꠣꠟꠣꠔ।
২৮ ꠄꠞꠖꠣꠄ ꠀꠟ꠆ꠟꠣꠞ ꠇꠣꠟꠣꠝꠞ ꠅꠃ ꠀꠄꠀꠔꠅ ꠚꠟꠤꠉꠦꠟ,
“ꠔꠣꠘꠞꠦ ꠘꠣꠚꠞꠝꠣꠘ ꠅꠇꠟꠞ ꠟꠉꠦ ꠉꠘꠣ ꠅꠁꠍꠦ।”
২৯ ꠢꠃ ꠙꠕꠦꠖꠤ ꠎꠦꠞꠣ ꠎꠣꠅꠀꠔ ꠀꠍꠤꠟ ꠔꠣꠞꠣ ꠝꠣꠕꠣ ꠟꠣꠠꠣꠁꠀ ꠁꠍꠣꠞꠦ ꠍꠤꠠꠣꠁꠀ ꠇꠂꠟ,
“ꠅꠂ ꠝꠤꠀ,
ꠔꠥꠝꠤ ꠛꠥꠟꠦ ꠇꠣꠛꠣ ꠊꠞ ꠜꠣꠋꠉꠤꠀ ꠔꠤꠘ ꠖꠤꠘꠞ ꠝꠣꠎꠦ ꠢꠤꠞꠛꠣꠞ ꠛꠣꠘꠣꠁꠔꠣꠄ ꠙꠣꠞꠛꠣꠄ!
৩০ ꠔꠦ ꠅꠈꠘ ꠍꠟꠤꠛ ꠕꠣꠇꠤ ꠟꠣꠝꠤꠀ ꠀꠁꠀ ꠘꠤꠎꠞ ꠎꠣꠘ ꠛꠣꠌꠣꠅ ꠘꠣ।”
৩১ ꠛꠠ ꠁꠝꠣꠝ ꠀꠞ ꠝꠃꠟꠣꠘꠣ ꠅꠇꠟꠦꠅ ꠔꠣꠘꠞꠦ ꠍꠤꠠꠣꠁꠀ ꠝꠣꠔꠣ-ꠝꠣꠔꠤ ꠇꠞꠟꠣ,
“ꠢꠦ ꠔ ꠝꠣꠘꠡꠞ ꠎꠣꠘ ꠛꠣꠌꠣꠁꠔ,
ꠅꠈꠘ ꠘꠤꠎꠞ ꠎꠣꠘ ꠛꠣꠌꠣꠁꠔ ꠙꠣꠞꠦꠞ ꠘꠣ।
৩২ ꠢꠦ ꠛꠥꠟꠦ ꠅꠀꠖꠣ ꠇꠞꠣ ꠢꠃ ꠀꠟ-ꠝꠍꠤ,
ꠛꠘꠤ ꠁꠍꠞꠣꠁꠟꠞ ꠛꠣꠖꠡꠣ!
ꠔꠦ ꠙꠣꠞꠟꠦ ꠅꠈꠘ ꠍꠟꠤꠛ ꠕꠣꠇꠤ ꠟꠣꠝꠤꠀ ꠀꠃꠇ,
ꠔꠦꠃ ꠀꠝꠞꠣꠅ ꠅꠔꠣ ꠖꠦꠈꠤꠀ ꠁꠝꠣꠘ ꠀꠘꠝꠥ।”
ꠔꠣꠘ ꠒꠣꠁꠘꠦ-ꠛꠣꠃꠄ ꠎꠦꠞꠣꠞꠦ ꠍꠟꠤꠛꠅ ꠟꠐꠇꠣꠁꠟ ꠅꠁꠍꠤꠟ,
ꠔꠣꠞꠣꠅ ꠔꠣꠘꠞꠦ ꠍꠤꠠꠣꠁꠟ।
ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠃꠚꠣꠔ
৩৩ ꠛꠣꠖꠦ ꠛꠦꠁꠟ ꠖꠥꠁꠚꠞ ꠕꠣꠇꠤ ꠎꠥꠢꠞꠞ ꠛꠣꠖ ꠙꠞ꠆ꠎꠘ꠆ꠔ ꠔꠤꠘ ꠊꠘ꠆ꠐꠣ ꠀꠡ꠆ꠔꠣ ꠖꠦꠡ ꠀꠘ꠆ꠖꠣꠁꠞ ꠅꠁꠉꠦꠟ।
৩৪ ꠄꠞꠛꠣꠖꠦꠃ ꠔꠣꠁꠘ ꠈꠥꠛ ꠎꠥꠞꠦ ꠎꠥꠞꠦ ꠇꠁꠟꠣ,
“ꠄꠟꠥꠁ,
ꠄꠟꠥꠁ,
ꠟꠣꠝꠣ ꠡꠣꠛꠣꠇ꠆ꠔꠣꠘꠤ,”
ꠝꠣꠘꠤ,
“ꠅ ꠀꠝꠣꠞ ꠀꠟ꠆ꠟꠣ,
ꠀꠝꠣꠞ ꠝꠃꠟꠣ,
ꠔꠥꠝꠤ ꠇꠦꠘꠦ ꠀꠝꠣꠞ ꠟꠉ ꠍꠣꠠꠤ ꠖꠤꠟꠣꠄ?”
৩৫ ꠅꠃ ꠡꠝꠄ ꠎꠦꠞꠣ ꠔꠣꠘ ꠗꠣꠞꠅ ꠃꠛꠣ ꠀꠍꠤꠟ,
ꠔꠣꠞꠣ ꠁꠈꠣꠘ ꠢꠥꠘꠤꠀ ꠇꠁꠟꠣ,
“ꠢꠥꠘꠅ,
ꠢꠥꠘꠅ,
ꠢꠦ ꠢꠎꠞꠔ ꠁꠟꠤꠀꠍ ꠘꠛꠤꠞꠦ ꠒꠣꠇꠦꠞ।”
৩৬ ꠅꠈꠣꠘ ꠢꠥꠘꠤꠀ ꠄꠇꠎꠘ ꠝꠣꠘꠡꠦ ꠖꠃꠠꠣꠁꠀ ꠉꠤꠀ ꠄꠇꠈꠣꠘ ꠔꠦꠘꠣ ꠀꠘꠤꠀ ꠐꠦꠋꠉꠣ ꠀꠋꠉꠥꠞꠞ ꠡꠞꠛꠔꠞ ꠝꠣꠎꠦ ꠜꠤꠎꠣꠁꠀ,
ꠄꠇ ꠟꠣꠑꠤꠞ ꠝꠣꠕꠣꠔ ꠛꠣꠘ꠆ꠖꠤꠀ ꠃꠌꠣ ꠇꠞꠤ ꠔꠣꠘꠞꠦ ꠈꠣꠁꠔꠦ ꠖꠤꠟ।
ꠢꠦ ꠇꠂꠟ,
“ꠅꠃꠇ,
ꠖꠦꠈꠤ ꠘꠣ ꠁꠟꠤꠀꠍꠦ ꠔꠣꠞꠦ ꠟꠣꠝꠣꠁꠀ ꠘꠦꠅꠀꠔ ꠀꠁꠘ ꠘꠤ।”
৩৭ ꠢꠦꠡꠦ ꠁꠍꠣꠄ ꠎꠥꠞꠦ ꠀꠅꠀꠎ ꠇꠞꠤꠀ ꠀꠈꠦꠞꠤ ꠖꠝ ꠚꠣꠟꠣꠁꠀ ꠁꠘ꠆ꠔꠦꠇꠣꠟ ꠇꠞꠟꠣ।
৩৮ ꠟꠉꠦ ꠟꠉꠦ ꠎꠦꠞꠥꠎꠣꠟꠦꠝꠅ ꠇꠣꠛꠣ ꠊꠞꠞ ꠢꠦꠞꠦꠝ ꠡꠞꠤꠚꠞ ꠙꠞ꠆ꠖꠣꠈꠣꠘ,
ꠃꠙꠞꠦ ꠕꠣꠇꠤ ꠔꠟ ꠙꠞ꠆ꠎꠘ꠆ꠔ ꠍꠤꠠꠤꠀ ꠖꠥꠁ ꠐꠥꠇꠞꠣ ꠅꠁꠉꠦꠟ।
৩৯ ꠍꠤꠙꠣꠁꠞ ꠎꠦ ꠅꠚꠤꠡꠣꠞ ꠢꠘꠅ ꠙꠣꠞꠣ ꠖꠦꠅꠀꠔ ꠀꠍꠟꠣ,
ꠄꠁꠘ ꠁꠍꠣꠞ ꠝꠃꠔꠞ ꠁ ꠢꠣꠟꠔ ꠖꠦꠈꠤꠀ ꠇꠁꠟꠣ,
“ꠘꠤꠌ꠆ꠌꠄ,
ꠄꠁꠘꠃ ꠀꠍꠟꠣ ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣ।”
৪০ ꠇꠄꠎꠘ ꠛꠦꠐꠤ ꠝꠣꠘꠡꠦꠅ ꠖꠥꠞꠁ ꠃꠛꠣꠁꠀ ꠁꠔꠣ ꠖꠦꠈꠟꠣ,
ꠄꠞꠣꠞ ꠝꠣꠎꠦ ꠀꠍꠟꠣ ꠝꠉꠖꠤꠟꠤꠘꠤ ꠝꠞꠤꠅꠝ,
ꠁꠃꠍꠤ ꠀꠞ ꠢꠥꠞꠥ ꠁꠀꠇꠥꠛꠞ ꠝꠣ ꠝꠞꠤꠅꠝ,
ꠀꠞ ꠛꠤꠛꠤ ꠍꠣꠟꠥꠝꠤ।
৪১ ꠁꠍꠣ ꠎꠦꠛꠟꠣ ꠉꠣꠟꠤꠟꠅ ꠀꠍꠟꠣ,
ꠅꠃ ꠡꠝꠄ ꠅꠃ ꠛꠦꠐꠤꠘ ꠢꠣꠝꠦꠡꠣ ꠔꠣꠘ ꠟꠉꠦ ꠟꠉꠦ ꠞꠁꠔꠣ ꠀꠞ ꠔꠣꠘ ꠈꠦꠎꠝꠔ ꠇꠞꠔꠣ।
ꠀꠞꠅ ꠛꠃꠔ ꠛꠦꠐꠤ ꠝꠣꠘꠥꠡ,
ꠎꠦꠞꠣ ꠔꠣꠘ ꠟꠉꠦ ꠅꠁꠀ ꠎꠦꠞꠥꠎꠣꠟꠦꠝ ꠀꠁꠍꠟꠣ,
ꠔꠣꠞꠣꠅ ꠁꠔꠣ ꠖꠦꠈꠟꠣ।
ꠢꠎꠞꠔ ꠁꠍꠣꠞ ꠞꠅꠎꠣ ꠝꠥꠛꠣꠞꠇ
৪২ ꠁ ꠖꠤꠘ ꠀꠍꠤꠟ ꠁꠘ꠆ꠔꠦꠎꠣꠝꠞ ꠖꠤꠘ,
ꠝꠣꠘꠤ ꠁꠢꠥꠖꠤꠞ ꠎꠥꠝ꠆ꠝꠣꠛꠣꠞꠞ ꠀꠉꠞ ꠖꠤꠘ,
ꠅꠃ ꠖꠤꠘ ꠡꠥꠞꠥꠎ ꠒꠥꠛꠣꠞ ꠛꠣꠖꠦ ꠕꠘꠦ ꠇꠥꠘꠥꠎꠣꠔ ꠇꠣꠝ ꠇꠞꠣ ꠢꠣꠞꠣꠝ ꠀꠍꠤꠟ।
৪৩ ꠄꠞꠖꠣꠄ ꠅꠃ ꠛꠤꠀꠟꠤ ꠛꠣꠟꠣ ꠚꠔꠥꠀ ꠇꠝꠤꠐꠤꠞ ꠁꠎ꠆ꠎꠔꠤ ꠝꠘꠔ꠆ꠞꠤ,
ꠀꠞꠤꠝꠣꠕꠤꠀ ꠉꠣꠃꠞ ꠁꠃꠍꠥꠚ ꠘꠣꠝꠞ ꠄꠇꠎꠘ ꠝꠣꠘꠡꠦ,
ꠡꠣꠅꠡ ꠇꠞꠤꠀ ꠢꠣꠇꠤꠝ ꠙꠤꠟꠣꠔꠞ ꠉꠦꠍꠦ ꠀꠁꠀ,
ꠢꠎꠞꠔ ꠁꠍꠣꠞ ꠟꠣꠡ ꠘꠤꠔꠣ ꠌꠣꠁꠟꠣ।
ꠀꠟ꠆ꠟꠣꠞ ꠛꠣꠖꠡꠣꠁ ꠇꠣꠁꠝ ꠅꠀꠞ ꠟꠣꠉꠤ ꠄꠁꠘ ꠛꠣꠞ ꠌꠣꠅꠀꠔ ꠀꠍꠟꠣ।
৪৪ ꠙꠤꠟꠣꠔꠦ ꠢꠥꠘꠤꠀ ꠈꠥꠛ ꠔꠣꠁꠎ꠆ꠎꠥꠛ ꠅꠁꠉꠦꠟꠣ ꠎꠦꠘ,
ꠁꠍꠣꠄ ꠅꠔ ꠎꠟꠖꠤ ꠇꠞꠤ ꠁꠘ꠆ꠔꠦꠇꠣꠟ ꠚꠞꠝꠣꠁꠍꠂꠘ।
ꠄꠞꠖꠣꠄ ꠔꠣꠁꠘ ꠍꠤꠙꠣꠁꠞ ꠍꠥꠛꠦꠖꠣꠞꠞꠦ ꠀꠘꠤꠀ ꠎꠤꠇꠣꠁꠟꠣ,
ꠢꠣꠍꠣꠃ ꠁꠍꠣꠞ ꠞꠥꠢꠥ ꠛꠣꠞꠅꠁ ꠉꠦꠍꠦ ꠘꠤ।
৪৫ ꠍꠥꠛꠦꠖꠣꠞꠦ ꠎꠦꠛꠟꠣ ꠇꠁꠟꠣ,
“ꠎꠤꠅꠄ,
ꠔꠣꠁꠘ ꠝꠣꠞꠣ ꠉꠦꠍꠂꠘ”,
ꠅꠃ ꠙꠤꠟꠣꠔꠦ ꠁꠍꠣꠞ ꠟꠣꠡ ꠁꠃꠍꠥꠚꠞ ꠎꠤꠝ꠆ꠝꠣꠄ ꠡꠝꠎꠣꠁ ꠖꠤꠟꠣ।
৪৬ ꠁꠃꠍꠥꠚꠦ ꠉꠤꠀ ꠇꠣꠚꠘꠞ ꠇꠣꠙꠠ ꠈꠞꠤꠖ ꠇꠞꠤ ꠀꠘꠤꠀ,
ꠁꠍꠣꠞ ꠟꠣꠡ ꠍꠟꠤꠛ ꠕꠣꠇꠤ ꠟꠣꠝꠣꠁꠀ,
ꠇꠣꠚꠘ ꠚꠤꠘ꠆ꠖꠣꠁꠀ,
ꠙꠣꠔ꠆ꠔꠞ ꠇꠣꠐꠤꠀ ꠛꠣꠘꠣꠁꠟ ꠄꠇ ꠇꠄꠛꠞꠞ ꠝꠣꠎꠦ ꠔꠣꠘꠞꠦ ꠖꠣꠚꠘ ꠇꠞꠟꠣ,
ꠁ ꠟꠣꠈꠣꠘ ꠇꠄꠛꠞꠅ ꠝꠣꠐꠤ ꠖꠦꠅꠀ ꠟꠣꠉꠦ ꠘꠣ।
ꠄꠞꠖꠣꠄ ꠔꠣꠞꠣ ꠛꠠ ꠄꠇ ꠙꠣꠔ꠆ꠔꠞ ꠉꠠꠤꠀꠁꠀ ꠀꠘꠤꠀ ꠇꠄꠛꠞꠞ ꠝꠥꠈꠅ ꠖꠤꠟꠣ।
৪৭ ꠅꠃ ꠡꠝꠄ ꠝꠉꠖꠤꠟꠤꠘꠤ ꠝꠞꠤꠅꠝ ꠀꠞ ꠁꠃꠍꠤꠞ ꠝꠣ ꠝꠞꠤꠅꠝꠦ ꠖꠦꠈꠟꠣ,
ꠔꠣꠘꠞꠦ ꠇꠥꠘ ꠎꠣꠉꠣꠔ ꠖꠣꠚꠘ ꠇꠞꠍꠂꠘ।