ꠝꠃꠔ ꠛꠣꠖꠦ ꠎꠤꠘ꠆ꠖꠣ ꠅꠁꠟꠣ ꠢꠎꠞꠔ ꠁꠍꠣ (১৬:১-২০)
ꠢꠎꠞꠔ ꠁꠍꠣ ꠎꠤꠘ꠆ꠖꠣ ꠅꠀꠞ ꠙꠞꠝꠣꠘ
১৬
১ ꠔꠣꠞꠣꠞ ꠎꠥꠝ꠆ꠝꠣꠞ ꠖꠤꠘ ꠡꠦꠡ ꠅꠁꠀ ꠢꠣꠞꠟꠦ ꠝꠉꠖꠤꠟꠤꠘꠤ ꠝꠞꠤꠅꠝ,
ꠁꠀꠇꠥꠛꠞ ꠝꠣ ꠝꠞꠤꠅꠝ ꠀꠞ ꠛꠤꠛꠤ ꠍꠣꠟꠥꠝꠤꠄ,
ꠢꠎꠞꠔ ꠁꠍꠣꠞ ꠟꠣꠡꠅ ꠝꠣꠈꠣꠘꠤꠞ ꠟꠣꠉꠤ ꠈꠥꠡꠛꠄ ꠀꠟꠣ ꠝꠡꠟꠣ ꠟꠁꠀ ꠀꠘꠣꠁꠟꠣ।
২ ꠢꠣꠙ꠆ꠔꠣꠞ ꠙꠄꠟꠣ ꠖꠤꠘ ꠛꠤꠀꠘꠦ,
ꠝꠣꠘꠤ ꠞꠛꠤꠛꠣꠞꠦ ꠚꠎꠞꠦ ꠡꠥꠞꠥꠎ ꠃꠑꠣꠞ ꠟꠉꠦ ꠟꠉꠦꠃ ꠄꠞꠣ ꠔꠣꠘ ꠇꠄꠛꠞꠞ ꠇꠣꠍꠣꠔ ꠉꠦꠟꠣ।
৩ ꠅꠃ ꠡꠝꠄ ꠔꠣꠞꠣ ꠄꠇꠦ-ꠅꠁꠘ꠆ꠘꠦ ꠎꠤꠇꠣꠁꠟꠣ,
“ꠇꠄꠛꠞꠞ ꠝꠥꠈꠞ ꠅꠃ ꠙꠣꠔ꠆ꠔꠞ ꠇꠦ ꠢꠞꠣꠁꠛꠣ?”
৪ ꠝꠣꠔꠤ ꠝꠣꠔꠤ ꠔꠣꠞꠣ ꠌꠣꠁꠀ ꠖꠦꠈꠟꠣ,
ꠁ ꠙꠣꠔ꠆ꠔꠞ ꠢꠞꠣꠁꠟ ꠅꠁꠉꠦꠍꠦ।
ꠙꠣꠔ꠆ꠔꠞꠐꠣ ꠀꠍꠤꠟ ꠈꠥꠛ ꠛꠠ।
৫ ꠛꠣꠖꠦ ꠔꠣꠞꠣ ꠇꠄꠛꠞꠅ ꠢꠣꠝꠣꠁꠀ ꠖꠦꠈꠟꠣ,
ꠄꠇ ꠎꠥꠀꠘ ꠛꠦꠐꠣꠄ ꠗꠟꠣ ꠇꠣꠙꠠ ꠚꠤꠘ꠆ꠖꠤꠀ ꠒꠣꠁꠘ ꠉꠣꠟꠣꠔ ꠛꠁ ꠞꠁꠍꠂꠘ।
ꠄꠘꠦ ꠖꠦꠈꠤꠀ ꠔꠣꠞꠣ ꠈꠥꠛ ꠔꠣꠁꠎ꠆ꠎꠥꠛ ꠅꠁꠉꠦꠟꠣ।
৬ ꠅꠃ ꠢꠦꠁꠘ ꠇꠁꠟꠣ,
“ꠔꠣꠁꠎ꠆ꠎꠥꠛ ꠅꠁꠅ ꠘꠣ ꠉ।
ꠔꠥꠝꠤꠔꠣꠁꠘ ꠔ ꠘꠣꠍꠣꠞꠔ ꠉꠣꠃꠞ ꠁꠍꠣꠞꠦꠃ ꠔꠣꠟ꠆ꠟꠣꠡ ꠇꠞꠞꠣꠄ,
ꠎꠦꠘꠞꠦ ꠍꠟꠤꠛꠅ ꠉꠣꠕꠤꠀ ꠇꠣꠔꠟ ꠇꠞꠣ ꠅꠁꠍꠦ?
ꠔꠣꠁꠘ ꠅꠈꠘ ꠁꠘꠅ ꠘꠣꠄ,
ꠔꠣꠘꠞꠦ ꠎꠤꠘ꠆ꠖꠣ ꠇꠞꠣ ꠅꠁꠍꠦ।
ꠖꠦꠈꠤ ꠎꠣꠅ,
ꠅꠃ ꠎꠣꠉꠣꠔꠃ ꠔꠣꠘꠞꠦ ꠖꠣꠚꠘ ꠇꠞꠣ ꠅꠁꠍꠤꠟ।
৭ ꠔꠦ ꠔꠥꠝꠤꠔꠣꠁꠘ ꠅꠈꠘ ꠎꠣꠅ,
ꠉꠤꠀ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠀꠞ ꠙꠤꠔꠞꠞꠦꠅ ꠇꠅ,
ꠔꠣꠁꠘ ꠀꠉꠦ ꠎꠦꠟꠣꠈꠣꠘ ꠇꠁꠍꠟꠣ,
ꠅꠃꠟꠣ ꠔꠥꠝꠞꠣꠞ ꠀꠉꠦ ꠉꠣꠟꠤꠟꠅ ꠎꠣꠁꠞꠣ।
ꠔꠥꠝꠞꠣ ꠢꠘꠅ ꠉꠦꠟꠦ ꠔꠣꠘ ꠖꠞꠡꠘ ꠙꠣꠁꠛꠣꠄ।”
৮ ꠁꠈꠣꠘ ꠢꠥꠘꠤꠀ ꠛꠦꠐꠤꠘ꠆ꠔꠦ ꠇꠄꠛꠞ ꠕꠣꠇꠤ ꠛꠣꠞꠅꠁꠀ ꠖꠃꠠꠣꠁꠀ ꠜꠣꠉꠤꠟꠣ।
ꠔꠣꠞꠣ ꠔꠣꠁꠎ꠆ꠎꠥꠛ ꠛꠘꠤꠉꠦꠟꠣ,
ꠒꠞꠞ ꠌꠥꠐꠦ ꠇꠦꠃꠞꠞꠦ ꠇꠥꠘ꠆ꠔꠣ ꠇꠁꠟꠣ ꠘꠣ।
৯ ꠢꠣꠙ꠆ꠔꠣꠞ ꠙꠄꠟꠣ ꠖꠤꠘ ꠚꠎꠞ ꠅꠇ꠆ꠔꠅ ꠁꠍꠣ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠅꠁꠀ ꠃꠑꠟꠣ,
ꠀꠞ ꠙꠄꠟꠣꠃ ꠝꠉꠖꠤꠟꠤꠘꠤ ꠝꠞꠤꠅꠝꠞꠦ ꠖꠞꠡꠘ ꠖꠤꠟꠣ।
ꠅꠃ ꠝꠞꠤꠅꠝꠞ ꠟꠉ ꠕꠣꠇꠤ ꠔꠣꠁꠘ ꠡꠣꠔꠉꠥ ꠎꠤꠘ꠆ꠘꠣꠔ ꠍꠣꠠꠣꠁꠍꠟꠣ।
১০ ꠔꠣꠘ ꠖꠞꠡꠘ ꠙꠣꠁꠀꠃ ꠝꠞꠤꠅꠝꠦ ꠉꠤꠀ ꠁꠍꠣꠞ ꠟꠉꠞ ꠢꠇꠟꠞꠦ ꠈꠛꠞ ꠎꠣꠘꠣꠁꠟꠣ।
ꠅꠃ ꠡꠝꠄ ꠔꠣꠞꠣ ꠇꠣꠘ꠆ꠖꠣ-ꠇꠣꠐꠤ ꠀꠞ ꠀꠢꠣꠎꠣꠞꠤ ꠇꠞꠣꠔ ꠀꠍꠤꠟ।
১১ ꠅꠁꠟꠦ ꠔꠣꠁꠘ ꠎꠤꠘ꠆ꠖꠣ ꠅꠁꠍꠂꠘ ꠀꠞ ꠝꠞꠤꠅꠝꠞꠦ ꠖꠞꠡꠘꠅ ꠖꠤꠍꠂꠘ,
ꠁꠔꠣ ꠔꠣꠞꠣ ꠇꠦꠃ ꠄꠇꠤꠘ ꠇꠞꠟꠣ ꠘꠣ।
১২ ꠛꠣꠖꠦ ꠔꠣꠘ ꠖꠥꠁꠎꠘ ꠃꠝ꠆ꠝꠔꠦ ꠀꠐꠤ ꠀꠐꠤ ꠉꠣꠃ ꠛꠣꠄꠖꠤ ꠞꠅꠀꠘꠣ ꠅꠁꠟꠣ,
ꠅꠃ ꠡꠝꠄ ꠁꠍꠣꠄ ꠔꠣꠘ ꠍꠥꠞꠔ ꠛꠖꠟꠣꠁꠀ ꠔꠣꠞꠣꠞꠦ ꠖꠞꠡꠘ ꠖꠤꠟꠣ।
১৩ ꠔꠣꠞꠣ ꠉꠤꠀ ꠛꠣꠇꠤ ꠢꠇꠟꠞꠦ ꠅꠃ ꠈꠛꠞ ꠎꠣꠘꠣꠁꠟꠣ।
ꠅꠁꠟꠦ ꠔꠣꠞꠣꠞ ꠇꠕꠣꠅ ꠄꠞꠣ ꠄꠇꠤꠘ ꠇꠞꠟꠣ ꠘꠣ।
ꠢꠎꠞꠔ ꠁꠍꠣꠞ ꠀꠈꠦꠞꠤ ꠍꠛꠇ
১৪ ꠢꠦꠡꠦ ꠢꠎꠞꠔ ꠁꠍꠣꠄ ꠔꠣꠘ ꠄꠉꠣꠞꠅ ꠎꠘ ꠍꠣꠢꠣꠛꠤꠞꠦ ꠖꠞꠡꠘ ꠖꠤꠟꠣ।
ꠅꠃ ꠡꠝꠄ ꠄꠞꠣ ꠈꠣꠅꠀꠔ ꠀꠍꠟꠣ।
ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠅꠀꠞ ꠛꠣꠖꠦ ꠎꠦꠞꠣ ꠔꠣꠘꠞꠦ ꠖꠦꠈꠍꠤꠟ,
ꠔꠣꠞꠣꠞ ꠇꠕꠣ ꠄꠇꠤꠘ ꠘꠣ ꠇꠞꠣꠄ,
ꠄꠞꠣꠞ ꠁꠝꠣꠘꠞ ꠇꠝꠎꠥꠞꠤ ꠀꠞ ꠖꠤꠟꠞ ꠘꠣ-ꠢꠥꠝꠣꠞꠤꠞ ꠟꠣꠉꠤ ꠔꠣꠁꠘ ꠄꠞꠣꠞꠦ ꠗꠝꠇꠣꠁꠟꠣ।
১৫ ꠀꠞ ꠅꠃ ꠍꠣꠢꠣꠛꠤ ꠅꠇꠟꠞꠦ ꠇꠁꠟꠣ,
“ꠔꠥꠝꠞꠣ ꠖꠥꠘꠤꠀꠞ ꠔꠣꠝꠣꠝ ꠎꠣꠉꠣꠔ ꠎꠣꠅ,
ꠉꠤꠀ ꠢꠇꠟ ꠝꠣꠘꠡꠞ ꠉꠦꠍꠦ ꠀꠟ꠆ꠟꠣꠞ ꠛꠣꠔꠣꠁꠟ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠅ।
১৬ ꠎꠦ ꠝꠣꠘꠡꠦ ꠁꠝꠣꠘ ꠀꠘꠤꠀ ꠔꠃꠛꠣꠞ ꠉꠥꠍꠟ ꠇꠞꠦ,
ꠢꠦ-ꠃ ꠞꠦꠢꠣꠁ ꠙꠣꠁꠛ।
ꠎꠦ ꠝꠣꠘꠡꠦ ꠁꠝꠣꠘ ꠀꠘꠔ ꠘꠣꠄ,
ꠢꠦ ꠀꠟ꠆ꠟꠣꠞ ꠖꠞꠛꠣꠞꠅ ꠖꠥꠡꠤ ꠛꠘꠤꠀ ꠡꠣꠎꠣ ꠙꠣꠁꠛ।
১৭ ꠎꠦꠞꠣ ꠁꠝꠣꠘ ꠀꠘꠛ,
ꠄꠞꠣꠞ ꠝꠣꠎꠦ ꠅꠃ ꠘꠤꠡꠣꠘꠣ ꠖꠦꠈꠣ ꠎꠣꠁꠛ:
ꠀꠝꠣꠞ ꠘꠣꠝꠦ ꠔꠣꠞꠣ ꠎꠤꠘ꠆ꠘꠣꠔ ꠍꠣꠠꠣꠁꠛ,
ꠘꠄꠀ ꠘꠄꠀ ꠜꠣꠡꠣꠄ ꠉꠣꠁꠛꠤ ꠛꠥꠟꠤ ꠝꠣꠔꠤꠛ।
১৮ ꠔꠣꠞꠣ ꠎꠣꠔꠤ ꠢꠣꠚꠞꠦ ꠀꠔꠅ ꠟꠁꠛꠣ,
ꠛꠦꠎꠥꠁꠔꠣ ꠛꠤꠡꠣꠇ꠆ꠔ ꠇꠥꠘ꠆ꠔꠣ ꠈꠣꠁꠟꠦꠅ ꠔꠣꠞꠣꠞ ꠇꠥꠘꠥ ꠈꠦꠔꠤ ꠅꠁꠔ ꠘꠣꠄ।
ꠀꠞ ꠇꠥꠘꠥ ꠛꠦꠝꠣꠞꠤꠞꠦ ꠀꠔꠣꠁꠀ ꠖꠤꠟꠦ ꠛꠦꠝꠣꠞ ꠡꠤꠚꠣ ꠅꠁꠎꠤꠛ।”
ꠢꠎꠞꠔ ꠁꠍꠣꠞ ꠛꠦꠢꠦꠡ꠆ꠔꠅ ꠎꠣꠅꠀ