ꠎꠥꠝ꠆ꠝꠣꠛꠣꠞꠞ ꠛꠦꠙꠣꠞꠦ ꠔꠣꠟꠤꠝ
৬
১ ꠄꠇ ꠎꠥꠝ꠆ꠝꠣꠛꠣꠞꠦ ꠁꠍꠣ ꠉꠝ ꠈꠦꠔꠞ ꠀꠁꠟꠦꠖꠤ ꠀꠐꠤꠀ ꠎꠣꠁꠞꠣ।
ꠅꠃ ꠡꠝꠄ ꠔꠣꠘ ꠡꠣꠉꠞꠤꠖ ꠅꠇꠟꠦ ꠉꠝꠞ ꠍꠠꠣ ꠍꠤꠠꠤꠀ ꠀꠔꠅ ꠊꠡꠤ ꠊꠡꠤ ꠈꠣꠁꠞꠣ।
২ ꠁꠔꠣ ꠖꠦꠈꠤꠀ ꠚꠞꠤꠡꠤ ꠝꠎꠛꠞ ꠇꠄꠎꠘꠦ ꠇꠁꠟꠣ,
“ꠝꠥꠍꠣ ꠘꠛꠤꠞ ꠡꠞꠤꠅꠔ ꠝꠣꠚꠤꠇ ꠔ ꠎꠥꠝ꠆ꠝꠣꠛꠣꠞꠦ ꠎꠦꠇꠥꠘꠥ ꠇꠣꠝ ꠇꠞꠣ ꠢꠣꠞꠣꠝ,
ꠔꠦ ꠔꠥꠝꠞꠣ ꠁ ꠗꠣꠘꠞ ꠍꠠꠣ ꠍꠤꠠꠤꠞꠣꠄ ꠇꠦꠘꠦ?”
৩ ꠁꠍꠣꠄ ꠎꠥꠀꠙ ꠖꠤꠟꠣ,
“ꠔꠦ ꠖꠣꠃꠖ ꠘꠛꠤ ꠀꠞ ꠔꠣꠘ ꠟꠉꠞ ꠢꠇꠟꠞ ꠎꠦꠛꠟꠣ ꠜꠥꠈ ꠟꠣꠉꠍꠤꠟ,
ꠢꠤ ꠡꠝꠄ ꠔꠣꠞꠣ ꠇꠤꠔꠣ ꠇꠞꠍꠟꠣ,
ꠁꠔꠣ ꠀꠙꠘꠣꠞꠣ ꠙꠠꠍꠂꠘ ꠘꠣ ꠘꠤ?
৪ ꠔꠣꠁꠘ ꠘꠤꠎꠦ ꠀꠟ꠆ꠟꠣꠞ ꠊꠞꠅ ꠢꠣꠝꠣꠁꠀ ꠙꠛꠤꠔ꠆ꠞ ꠞꠥꠐꠤ ꠈꠣꠁꠍꠟꠣ,
ꠀꠞ ꠔꠣꠘ ꠟꠉꠞ ꠅꠇꠟꠞꠦꠅ ꠈꠣꠅꠀꠁꠍꠟꠣ।
ꠀꠍꠟꠦ ꠈꠣꠟꠤ ꠁꠝꠣꠝ ꠅꠇꠟ ꠍꠣꠠꠣ ꠀꠞ ꠇꠦꠃ ꠁ ꠞꠥꠐꠤ ꠈꠣꠅꠀ ꠎꠣꠁꠎ ꠀꠍꠤꠟ ꠘꠣ।”
৫ ꠛꠣꠖꠦ ꠁꠍꠣꠄ ꠔꠣꠞꠣꠞꠦ ꠇꠁꠟꠣ,
“ꠢꠥꠘꠅ,
ꠀꠝꠤ ꠛꠤꠘ-ꠀꠖꠝꠃ ꠎꠥꠝ꠆ꠝꠣꠛꠣꠞꠞ ꠝꠣꠟꠤꠇ।”
৬ ꠀꠞꠇ ꠎꠥꠝ꠆ꠝꠣꠛꠣꠞꠦ ꠁꠍꠣ ꠝꠍꠤꠖꠅ ꠉꠤꠀ ꠅꠀꠎ ꠘꠍꠤꠅꠔ ꠇꠞꠣꠔ ꠀꠍꠟꠣ।
ꠢꠘꠅ ꠄꠇ ꠛꠦꠝꠣꠞꠤ ꠛꠦꠐꠣ ꠀꠍꠤꠟ,
ꠔꠣꠞ ꠒꠣꠁꠘꠞ ꠀꠔ ꠛꠦꠝꠣꠞꠦ ꠢꠥꠇꠣꠁ ꠉꠦꠍꠦ।
৭ ꠝꠃꠟꠣꠘꠣ ꠀꠞ ꠚꠞꠤꠡꠤ ꠖꠟꠞ ꠝꠣꠘꠡꠦ ꠁꠍꠣꠞꠦ ꠚꠣꠘ꠆ꠖꠅ ꠚꠣꠟꠣꠁꠔꠣ ꠇꠞꠤ ꠜꠣꠘꠣ ꠔꠥꠇꠣꠘꠤꠔ ꠀꠍꠟꠣ।
ꠔꠣꠞꠣ ꠖꠦꠈꠔꠣ ꠌꠣꠁꠟꠣ,
ꠎꠥꠝ꠆ꠝꠣꠞ ꠖꠤꠘ ꠔꠣꠁꠘ ꠇꠦꠃꠞꠞꠦ ꠜꠣꠟꠣ ꠇꠞꠂꠘ ꠘꠤ,
ꠇꠞꠟꠦ ꠔꠣꠘꠞꠦ ꠖꠥꠡꠤ ꠛꠣꠘꠣꠁꠔꠣ ꠙꠣꠞꠛꠣ।
৮ ꠁꠍꠣꠄꠅ ꠔꠣꠞꠣꠞ ꠖꠤꠟꠞ ꠇꠥ-ꠝꠔꠟꠛ ꠛꠥꠎꠤꠟꠤꠟꠣ।
ꠛꠥꠎꠤꠀ ꠔꠣꠁꠘ ꠢꠥꠇꠘꠣ ꠀꠔ ꠀꠟꠣ ꠛꠦꠐꠣꠞꠦ ꠇꠁꠟꠣ,
“ꠅꠛꠣ,
ꠔꠥꠝꠤ ꠀꠁꠀ ꠢꠇꠟꠞ ꠍꠣꠝꠘꠦ ꠃꠛꠣꠅ ꠌꠣꠁꠘ।”
ꠔꠦꠃ ꠛꠦꠐꠣ ꠀꠁꠀ ꠃꠛꠣꠁꠟ।
৯ ꠁꠍꠣꠄ ꠔꠣꠞꠣꠞꠦ ꠎꠤꠇꠣꠁꠟꠣ,
“ꠀꠝꠤ ꠀꠙꠘꠣꠁꠘ꠆ꠔꠞꠦ ꠄꠇꠈꠣꠘ ꠇꠕꠣ ꠎꠤꠇꠣꠁꠞꠣꠝ,
ꠎꠥꠝ꠆ꠝꠣꠛꠣꠞꠦ ꠇꠥꠘ ꠇꠣꠝ ꠇꠞꠣ ꠎꠣꠁꠎ,
ꠜꠣꠟꠣ ꠇꠣꠝ ꠘꠣ ꠛꠣꠖ ꠇꠣꠝ?
ꠎꠣꠘ ꠛꠣꠌꠣꠘꠤ,
ꠘꠣ ꠎꠣꠘꠞ ꠛꠤꠘꠣꠡ ꠇꠞꠣ?”
১০ ꠛꠣꠖꠦ ꠔꠣꠁꠘ ꠌꠣꠁꠞꠅ ꠉꠣꠟꠣꠞ ꠢꠇꠟꠞ ꠛꠣꠄ ꠌꠣꠁꠀ ꠢꠃ ꠛꠦꠐꠣꠞꠦ ꠇꠁꠟꠣ,
“ꠔꠥꠝꠣꠞ ꠀꠔꠈꠣꠘ ꠛꠣꠠꠣꠅ।”
ꠛꠦꠐꠣꠄ ꠔꠣꠞ ꠀꠔ ꠛꠣꠠꠣꠁꠟ,
ꠀꠞ ꠙꠥꠞꠣꠙꠥꠞ ꠜꠣꠟꠣ ꠅꠁꠉꠦꠟ।
১১ ꠁꠔꠣ ꠖꠦꠈꠤꠀ ꠢꠃ ꠝꠥꠟ꠆ꠟꠣ ꠅꠇꠟꠞ ꠈꠥꠛ ꠉꠥꠍꠣ ꠃꠑꠟ।
ꠔꠣꠞꠣ ꠙꠞꠣꠝꠤꠡ ꠌꠣꠟꠣꠁꠟꠣ,
ꠁꠍꠣꠞꠦ ꠇꠦꠝꠘꠦ ꠕꠣꠝꠣꠁꠟ ꠎꠣꠄ।
ꠛꠣꠞꠅꠎꠘ ꠈꠣꠍ ꠍꠣꠢꠣꠛꠤ
১২ ꠛꠣꠖꠦ ꠁꠍꠣ ꠖꠥꠀ ꠇꠞꠣꠞ ꠟꠣꠉꠤ ꠄꠇ ꠙꠣꠠꠅ ꠃꠑꠤꠟꠣ,
ꠀꠞ ꠀꠡ꠆ꠔꠣ ꠞꠣꠁꠔ ꠀꠟ꠆ꠟꠣꠞ ꠉꠦꠍꠦ ꠖꠥꠀ ꠇꠞꠟꠣ।
১৩ ꠛꠤꠀꠘꠤ ꠛꠣꠟꠣ ꠔꠣꠘ ꠡꠣꠉꠞꠤꠖ ꠅꠇꠟꠞꠦ ꠒꠣꠇꠤꠀ ꠇꠣꠘ꠆ꠖꠣꠔ ꠀꠘꠟꠣ,
ꠄꠞꠣꠞ ꠝꠣꠎꠞ ꠛꠣꠞꠅ ꠎꠘꠞꠦ ꠙꠍꠘ꠆ꠖ ꠇꠞꠤꠀ,
ꠔꠣꠘ ꠈꠣꠍ ꠍꠣꠢꠣꠛꠤ ꠛꠣꠘꠣꠁꠟꠣ।
১৪ ꠅꠃ ꠛꠣꠞꠅꠎꠘ ꠅꠁꠟꠣ,
ꠍꠣꠁꠝꠘ—ꠁꠍꠣꠄ ꠄꠘ ꠘꠄꠀ ꠘꠣꠝ ꠖꠤꠟꠣ ꠙꠤꠔꠞ,
ꠍꠣꠁꠝꠘꠞ ꠜꠣꠁ ꠀꠘ꠆ꠖ꠆ꠞꠤꠀꠍ,
ꠁꠀꠇꠥꠛ,
ꠢꠣꠘ꠆ꠘꠣꠘ,
ꠚꠤꠟꠤꠚ,
ꠛꠞꠕꠟꠝꠄ,
১৫ ꠝꠕꠤ,
ꠕꠥꠝꠣꠍ,
ꠀꠟꠚꠤꠞ ꠙꠥꠀ ꠁꠀꠇꠥꠛ,
ꠝꠥꠇ꠆ꠔꠤꠎꠥꠖ꠆ꠖꠣ ꠍꠣꠁꠝꠘ,
১৬ ꠁꠀꠇꠥꠛꠞ ꠙꠥꠀ ꠁꠢꠥꠖꠣ,
ꠀꠞ ꠁꠢꠥꠖꠣ ꠁꠡ꠆ꠇꠣꠞꠤꠀꠔ—ꠅꠃ ꠁꠢꠥꠖꠣꠄ ꠛꠣꠖꠦ ꠛꠦꠁꠝꠣꠘꠤ ꠇꠞꠍꠤꠟ।
ꠙꠣꠠꠞ ꠙꠦꠐꠅ ꠢꠎꠞꠔ ꠁꠍꠣꠞ ꠔꠣꠟꠤꠝ
১৭ ꠄꠞꠝꠣꠎꠦ ꠁꠍꠣꠄ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠟꠁꠀ ꠃꠙꠞꠦ ꠕꠣꠇꠤ ꠟꠣꠝꠤꠀ ꠙꠣꠠꠞ ꠙꠦꠐꠅ ꠢꠝꠣꠘ ꠄꠇ ꠎꠣꠉꠣꠔ ꠀꠁꠀ ꠃꠛꠣꠁꠟꠣ।
ꠢꠤꠘꠅ ꠔꠣꠘ ꠛꠃꠔ ꠃꠝ꠆ꠝꠔ ꠖꠟꠣ ꠅꠁꠍꠟꠣ,
ꠎꠦꠞꠥꠎꠣꠟꠦꠝ ꠐꠣꠃꠘ ꠀꠞ ꠄꠢꠥꠖꠤꠀ ꠎꠤꠟꠣ ꠕꠣꠇꠤ,
ꠖꠞꠤꠀꠞ ꠙꠣꠞꠞ ꠡꠥꠞ ꠀꠞ ꠍꠤꠖꠘ ꠄꠟꠣꠇꠣ ꠕꠣꠇꠤꠅ ꠖꠟ ꠛꠣꠘ꠆ꠖꠤ ꠛꠣꠘ꠆ꠖꠤ ꠝꠣꠘꠥꠡ ꠀꠁꠍꠟꠣ।
১৮ ꠔꠣꠞꠣ ꠔꠣꠘ ꠛꠄꠀꠘ ꠢꠥꠘꠣꠞ ꠈꠤꠀꠟꠦ ꠀꠞ ꠛꠦꠝꠣꠞ ꠕꠣꠇꠤ ꠡꠤꠚꠣ ꠅꠀꠞ ꠘꠤꠅꠔꠦ ꠀꠁꠟꠣ।
ꠀꠞ ꠎꠣꠞꠣꠞ ꠃꠙꠞꠦ ꠎꠤꠘꠞ ꠀꠍꠞ ꠀꠍꠤꠟ,
ꠔꠣꠞꠣꠅ ꠜꠣꠟꠣ ꠅꠁꠟꠣ।
১৯ ꠢꠇꠟ ꠝꠣꠘꠡꠦꠃ ꠔꠣꠘꠞꠦ ꠀꠔ ꠖꠤꠀ ꠍꠁꠔ ꠌꠣꠁꠟ,
ꠇꠣꠞꠘ ꠔꠣꠘ ꠜꠤꠔꠞ ꠕꠣꠇꠤ ꠇꠥꠖꠞꠔꠤ ꠡꠇ꠆ꠔꠤ ꠛꠣꠞꠅꠘꠤꠄ,
ꠄꠞꠣ ꠢꠇꠟꠞ ꠛꠦꠝꠣꠞ ꠇꠝꠍꠤꠟ।
২০ ꠔꠦꠃ ꠁꠍꠣꠄ ꠀꠙꠘ ꠡꠣꠉꠞꠤꠖ ꠅꠇꠟꠞ ꠛꠣꠄ ꠌꠣꠁꠀ ꠇꠁꠟꠣ,
“ꠔꠥꠝꠞꠣ ꠎꠦꠞꠣ ꠉꠞꠤꠛ ꠔꠥꠝꠞꠣꠃ ꠇꠙꠣꠟꠤ,
ꠀꠟ꠆ꠟꠣꠞ ꠛꠣꠖꠡꠣꠁ ꠔ ꠔꠥꠝꠞꠣꠞ ꠟꠣꠉꠤꠃ।
২১ ꠔꠥꠝꠞꠣ ꠎꠔ ꠎꠘꠞ ꠙꠦꠐꠅ ꠜꠥꠈ ꠀꠍꠦ,
ꠔꠥꠝꠞꠣꠃ ꠇꠙꠣꠟꠤ,
ꠔꠥꠝꠞꠣ ꠙꠦꠐ ꠜꠞꠤꠀ ꠈꠣꠁꠛꠣꠄ।
ꠔꠥꠝꠞꠣ ꠎꠦꠞꠣ ꠇꠣꠘ꠆ꠖꠤꠞꠣꠄ ꠔꠥꠝꠞꠣꠃ ꠇꠙꠣꠟꠤ,
ꠛꠣꠖꠦ ꠔ ꠀꠡꠤꠛꠣꠄ।
২২ “ꠔꠥꠝꠞꠣꠃ ꠇꠙꠣꠟꠤ,
ꠎꠦꠛꠟꠣ ꠛꠤꠘ-ꠀꠖꠝꠞ ꠖꠣꠄ ꠝꠣꠘꠡꠦ ꠔꠥꠝꠞꠣꠞꠦ ꠊꠤꠘ꠆ꠘꠣꠄ,
ꠉꠣꠃ ꠕꠣꠇꠤ ꠛꠣꠍꠤꠀ ꠄꠇꠊꠞꠤ ꠇꠞꠦ,
ꠛꠖꠘꠣꠝ ꠉꠣꠄ,
ꠀꠞ ꠔꠥꠝꠞꠣꠞ ꠘꠣꠝ ꠢꠥꠘꠟꠦ ꠝꠥꠈꠞ ꠕꠥ ꠚꠣꠟꠣꠄ।
২৩ ꠁꠟꠣ ꠇꠞꠟꠦ ꠔꠥꠝꠞꠣ ꠈꠥꠡꠤ ꠅꠁꠅ,
ꠚꠥꠞ꠆ꠔꠤꠄ ꠘꠣꠌꠤꠅ,
ꠇꠣꠞꠘ ꠛꠦꠢꠦꠡ꠆ꠔꠅ ꠔꠥꠝꠞꠣ ꠛꠃꠔ ꠛꠠ ꠙꠥꠞꠥꠡ꠆ꠇꠣꠞ ꠙꠣꠁꠛꠣꠄ।
ꠎꠣꠘꠅ ꠘꠤ,
ꠅꠃ ꠘꠣꠚꠞꠝꠣꠘ ꠅꠇꠟꠞ ꠛꠣꠚ-ꠖꠣꠖꠣꠁꠘ꠆ꠔꠦꠅ ꠀꠟ꠆ꠟꠣꠞ ꠘꠛꠤ ꠅꠇꠟꠞ ꠃꠙꠞꠦ ꠅꠟꠣ ꠎꠥꠟꠥꠝ ꠇꠞꠔꠣ।
২৪ “ꠢꠣꠄꠞꠦ ꠗꠘꠤ ꠅꠇꠟ,
ꠔꠥꠝꠞꠣꠞ ꠡꠥꠈ ꠔ ꠖꠥꠘꠤꠀꠔꠃ ꠇꠣꠝꠣꠁꠟꠤꠞꠣꠄ।
২৫ ꠢꠣꠄꠞꠦ ꠙꠦꠐ ꠜꠞꠤꠀ ꠈꠣꠃꠞꠣ ꠅꠇꠟ,
ꠔꠥꠝꠞꠣꠅ ꠜꠥꠈꠦ ꠍꠐꠚꠐ ꠇꠞꠛꠣꠄ।
ꠢꠣꠄꠞꠦ ꠢꠣꠄ ꠎꠦꠞꠣ ꠅꠈꠘ ꠀꠡꠤꠞꠣꠄ,
ꠔꠥꠝꠞꠣ ꠇꠣꠘ꠆ꠖꠣ-ꠇꠣꠐꠤ ꠀꠞ ꠀꠢꠣꠎꠣꠞꠤ ꠇꠞꠛꠣꠄ।
২৬ ꠢꠣꠄꠞꠦ ꠢꠣꠄ,
ꠝꠣꠘꠡꠦ ꠎꠦꠛꠟꠣ ꠔꠥꠝꠞꠣꠞ ꠡꠥꠘꠣꠝ ꠉꠣꠄ,
ꠎꠣꠘꠅ ꠘꠤ,
ꠅꠔꠣ ꠝꠣꠘꠡꠞ ꠛꠣꠚ-ꠖꠣꠖꠣꠁꠘ꠆ꠔꠦꠅ
ꠀꠉꠞ ꠀꠝꠟꠞ ꠜꠘ꠆ꠒ ꠘꠛꠤ ꠅꠇꠟꠞ
ꠅꠟꠣ ꠡꠥꠘꠣꠝ ꠉꠣꠁꠔ।
২৭ “ꠔꠥꠝꠞꠣ ꠎꠔꠎꠘ ꠀꠝꠣꠞ ꠔꠞꠤꠇꠣꠄ ꠌꠟꠔꠣꠄ ꠌꠣꠅ,
ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ,
ꠔꠥꠝꠞꠣ ꠎꠣꠞꠎꠤꠞ ꠖꠥꠡꠝꠘꠞꠦꠅ ꠝꠢꠛ꠆ꠛꠔ ꠇꠞꠤꠅ।
ꠎꠦꠞꠣ ꠔꠥꠝꠞꠣꠞꠦ ꠊꠤꠘ꠆ꠘꠣꠄ,
ꠔꠥꠝꠞꠣ ꠔꠣꠞꠣꠞ ꠜꠣꠟꠣꠁ ꠇꠞꠤꠅ।
২৮ ꠎꠦꠞꠣ ꠔꠥꠝꠞꠣꠞ ꠟꠣꠉꠤ ꠟꠣꠘ꠆ꠘꠔ ꠝꠣꠋꠉꠦ,
ꠔꠥꠝꠞꠣ ꠔꠣꠞꠣꠞ ꠟꠣꠉꠤ ꠞꠢꠝꠔ ꠌꠣꠁꠅ।
ꠀꠞ ꠎꠦꠞꠣ ꠔꠥꠝꠞꠣꠞ ꠛꠖꠘꠣꠝ ꠇꠞꠦ,
ꠔꠥꠝꠞꠣ ꠔꠣꠞꠣꠞ ꠟꠣꠉꠤ ꠖꠥꠀ ꠇꠞꠤꠅ।
২৯ ꠎꠦ ꠔꠥꠝꠣꠞ ꠄꠇ ꠉꠣꠟꠅ ꠌꠠ ꠝꠣꠞꠦ,
ꠔꠣꠞꠦ ꠀꠞꠇ ꠉꠣꠟ ꠙꠣꠔꠤꠀ ꠖꠤꠅ।
ꠎꠦ ꠔꠥꠝꠣꠞ ꠌꠣꠖ꠆ꠖꠞ ꠇꠣꠠꠤꠀ ꠘꠤꠔ ꠌꠣꠄ,
ꠔꠣꠞꠦ ꠇꠥꠞ꠆ꠔꠣꠅ ꠈꠥꠟꠤꠀ ꠖꠤꠅ।
৩০ ꠎꠣꠞꠣ ꠔꠥꠝꠣꠞ ꠉꠦꠍꠦ ꠌꠣꠄ,
ꠔꠣꠞꠣꠞꠦ ꠖꠤꠅ।
ꠇꠦꠃ ꠔꠥꠝꠣꠞ ꠇꠥꠘꠥ ꠌꠤꠎ ꠘꠤꠟꠦꠉꠤ,
ꠔꠣꠞ ꠉꠦꠍꠦ ꠀꠞ ꠚꠤꠞꠔ ꠌꠣꠁꠅ ꠘꠣ।
৩১ ꠢꠥꠘꠅ,
ꠔꠥꠝꠞꠣ ꠝꠣꠘꠡꠞ ꠉꠦꠍ ꠕꠣꠇꠤ ꠎꠦꠟꠣꠈꠣꠘ ꠛꠦꠛꠢꠣꠞ ꠙꠣꠁꠔꠣꠄ ꠌꠣꠅ,
ꠔꠥꠝꠞꠣꠅ ꠢꠇꠟꠞ ꠟꠉꠦ ꠅꠃ ꠟꠣꠈꠣꠘ ꠛꠦꠛꠢꠣꠞ ꠇꠞꠅ।
৩২ “ꠎꠣꠞꠣ ꠔꠥꠝꠞꠣꠞꠦ ꠝꠣꠄꠀ ꠇꠞꠦ,
ꠔꠥꠝꠞꠣ ꠎꠥꠖꠤ ꠈꠣꠟꠤ ꠔꠣꠞꠣꠞꠦꠃ ꠝꠣꠄꠀ ꠇꠞꠅ,
ꠔꠦ ꠔꠥꠝꠞꠣ ꠛꠣꠢꠛꠣ ꠙꠣꠁꠔꠣꠄ ꠇꠤꠟꠣ?
ꠁꠟꠣ ꠔ ꠘꠣꠚꠞꠝꠣꠘ ꠅꠇꠟꠦꠅ ꠄꠇꠦ-ꠅꠁꠘ꠆ꠘꠞꠦ ꠝꠣꠄꠀ ꠇꠞꠦ।
৩৩ ꠀꠞ ꠎꠣꠞꠣ ꠔꠥꠝꠞꠣꠞ ꠜꠣꠟꠣꠁ ꠇꠞꠦ,
ꠔꠥꠝꠞꠣ ꠎꠥꠖꠤ ꠈꠣꠟꠤ ꠔꠣꠞꠣꠞ ꠜꠣꠟꠣꠁ ꠇꠞꠅ,
ꠔꠦ ꠛꠣꠢꠛꠣ ꠙꠣꠁꠛꠣꠄ ꠇꠤꠟꠣ?
ꠘꠣꠚꠞꠝꠣꠘ ꠅꠇꠟꠦꠅ ꠔ ꠁꠟꠣ ꠇꠞꠦ।
৩৪ ꠎꠦ ꠝꠣꠘꠡꠞ ꠉꠦꠍ ꠕꠣꠇꠤ ꠔꠥꠝꠞꠣ ꠇꠞꠎ ꠙꠣꠁꠛꠣꠞ ꠀꠡꠣ ꠀꠍꠦ,
ꠔꠥꠝꠞꠣ ꠎꠥꠖꠤ ꠈꠣꠟꠤ ꠔꠣꠞꠦꠃ ꠇꠞꠎ ꠖꠦꠅ,
ꠔꠦ ꠇꠤꠟꠣ ꠛꠣꠢꠛꠣ ꠙꠣꠁꠛꠣꠄ?
ꠘꠣꠚꠞꠝꠣꠘ ꠅꠇꠟꠦꠅ ꠄꠇꠦ-ꠅꠁꠘ꠆ꠘꠞꠦ ꠁꠟꠣ ꠇꠞꠎ ꠖꠦꠄ,
ꠢꠦ ꠀꠡꠣ ꠇꠞꠎ ꠛꠤꠙꠖꠅ ꠙꠠꠟꠦ ꠢꠦ-ꠅ ꠢꠘ ꠕꠣꠇꠤ ꠇꠞꠎ ꠙꠣꠁꠛ।
৩৫ ꠔꠦ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ,
ꠔꠥꠝꠞꠣ ꠎꠣꠞꠎꠤꠞ ꠖꠥꠡꠝꠘꠞꠦꠅ ꠝꠣꠄꠀ ꠇꠞꠤꠅ,
ꠔꠣꠞꠣꠞ ꠜꠣꠟꠣꠁ ꠇꠞꠤꠅ।
ꠛꠖꠟꠣ ꠙꠣꠅꠀꠞ ꠀꠡꠣ ꠘꠣ ꠇꠞꠤꠀ ꠇꠞꠎ ꠖꠤꠅ,
ꠔꠦꠃ ꠔꠥꠝꠞꠣꠞ ꠟꠣꠉꠤ ꠛꠠ ꠛꠈꠡꠤꠡ ꠀꠍꠦ।
ꠔꠥꠝꠞꠣ ꠀꠟ꠆ꠟꠣ ꠙꠣꠇꠞ ꠀꠅꠟꠣꠖ ꠛꠘꠛꠣꠄ।
ꠔꠣꠁꠘ ꠔ ꠘꠤꠝꠇ-ꠢꠣꠞꠣꠝ ꠀꠞ ꠈꠣꠞꠣꠙ ꠝꠣꠘꠡꠞꠦꠅ ꠖꠄꠀ ꠇꠞꠂꠘ।
৩৬ ꠔꠥꠝꠞꠣꠞ ꠘꠤꠞꠣꠇꠣꠞ ꠛꠣꠚ ꠎꠦꠟꠣ ꠖꠄꠀꠟ,
ꠔꠥꠝꠞꠣꠅ ꠅꠟꠣꠘ ꠖꠄꠀꠟ ꠅꠅ।
৩৭ “ꠝꠣꠘꠡꠞ ꠛꠤꠌꠣꠞ ꠇꠞꠤꠅ ꠘꠣ,
ꠔꠦꠃ ꠔꠥꠝꠞꠣꠅ ꠛꠤꠌꠣꠞꠞ ꠖꠣꠠꠅ ꠙꠠꠔꠣꠄ ꠘꠣꠄ।
ꠇꠦꠃꠞꠞꠦ ꠖꠥꠡꠤ ꠡꠣꠁꠛꠡ꠆ꠔ ꠇꠞꠤꠅ ꠘꠣ,
ꠔꠦꠃ ꠔꠥꠝꠞꠣꠅ ꠖꠥꠡꠤ ꠅꠁꠔꠣꠄ ꠘꠣꠄ।
ꠝꠣꠚ ꠇꠞꠤꠀ ꠖꠤꠅ,
ꠔꠦꠃ ꠔꠥꠝꠞꠣꠅ ꠝꠣꠚꠤ ꠙꠣꠁꠛꠣꠄ।
৩৮ ꠖꠣꠘ-ꠈꠄꠞꠣꠔ ꠖꠦꠅ,
ꠔꠦꠃ ꠔꠥꠝꠞꠣꠞꠦꠅ ꠖꠦꠅꠀ ꠅꠁꠛ।
ꠝꠣꠘꠡꠦ ꠎꠣꠔꠣꠁ ꠎꠣꠔꠣꠁ ꠜꠞꠤꠀ ꠀꠘꠤꠀ ꠔꠥꠝꠞꠣꠞ ꠉꠣꠐꠤꠔ ꠛꠣꠘ꠆ꠖꠤꠀ ꠖꠤꠛꠣ।
ꠔꠥꠝꠞꠣ ꠎꠦꠟꠣ ꠝꠣꠙꠤꠀ ꠖꠤꠛꠣꠄ,
ꠔꠥꠝꠞꠣꠞ ꠟꠣꠉꠤꠅ ꠅꠟꠣ ꠝꠣꠙꠣ ꠅꠁꠛ।”
৩৯ ꠛꠣꠖꠦ ꠁꠍꠣꠄ ꠔꠣꠞꠣꠞꠦ ꠅꠃ ꠇꠤꠌ꠆ꠍꠣ ꠢꠥꠘꠣꠁꠟꠣ,
“ꠄꠇ ꠀꠘ꠆ꠖꠣꠄ ꠇꠥꠘꠥ ꠀꠞꠇ ꠀꠘ꠆ꠖꠣꠞꠦ ꠙꠕ ꠖꠦꠈꠣꠁꠔ ꠙꠣꠞꠦ ꠘꠤ?
ꠔꠦ ꠖꠥꠁꠅꠎꠘꠃ ꠉꠣꠔꠅ ꠙꠠꠔ ꠘꠣꠄ ꠘꠤ?
৪০ ꠡꠣꠉꠞꠤꠖ ꠃꠡ꠆ꠔꠣꠖ ꠕꠣꠇꠤ ꠛꠠ ꠘꠣꠄ,
ꠅꠁꠟꠦ ꠎꠦ ꠡꠣꠉꠞꠤꠖꠦ ꠙꠥꠞꠣꠙꠥꠞ ꠔꠣꠟꠤꠝ ꠟꠄ,
ꠢꠦ-ꠅ ꠃꠡ꠆ꠔꠣꠖꠞ ꠟꠣꠈꠣꠘ ꠛꠘꠤꠎꠣꠄ।
৪১ ꠔꠥꠝꠣꠞ ꠜꠣꠁꠞ ꠌꠈꠥꠔ ꠉꠥꠠꠣ ꠢꠣꠝꠣꠁꠍꠦ ꠅꠈꠣꠘꠃ ꠖꠦꠈꠞꠣꠄ,
ꠅꠁꠟꠦ ꠘꠤꠎꠞ ꠌꠃꠈꠅ ꠉꠣꠍꠞ ꠌꠦꠟꠤ ꠀꠍꠦ ꠁꠔꠣ ꠖꠦꠈꠞꠣꠄ ꠘꠣ?
৪২ ꠔꠥꠝꠣꠞ ꠌꠈꠥꠔ ꠌꠦꠟꠤ ꠢꠣꠝꠣꠁꠍꠦ ꠁꠈꠣꠘ ꠘꠣ ꠌꠣꠁꠀ ꠔꠥꠝꠣꠞ ꠜꠣꠁꠞꠦ ꠇꠤꠟꠣ ꠇꠁꠛꠣꠄ,
ꠜꠣꠁꠍꠣꠛ,
ꠔꠥꠝꠣꠞ ꠌꠃꠈꠅ ꠎꠦ ꠉꠥꠠꠣ ꠙꠠꠍꠦ,
ꠀꠅ,
ꠅꠉꠥ ꠛꠣꠞ ꠇꠞꠤꠀ ꠖꠦꠁ।
ꠔꠥꠝꠣꠞ ꠘꠤꠎꠞ ꠌꠈꠥꠞ ꠌꠦꠟꠤꠃ ꠔ ꠖꠦꠈꠞꠣꠄ ꠘꠣ।
ꠅ ꠜꠘ꠆ꠒ,
ꠙꠄꠟꠣ ꠔꠥꠝꠣꠞ ꠘꠤꠎꠞ ꠌꠃꠈ ꠕꠣꠇꠤ ꠌꠦꠟꠤ ꠢꠞꠣꠅ,
ꠔꠦꠃ ꠜꠣꠁꠞ ꠌꠃꠈ ꠕꠣꠇꠤ ꠉꠥꠠꠣ ꠛꠣꠞ ꠇꠞꠣꠔ ꠟꠣꠉꠟꠦ ꠜꠣꠟꠣ ꠇꠞꠤ ꠖꠦꠈꠔꠣꠄ ꠙꠣꠞꠛꠣꠄ।
৪৩ ꠜꠣꠟꠣ ꠉꠣꠍꠦ ꠔ ꠝꠘ꠆ꠖ ꠚꠟ ꠗꠞꠦ ꠘꠣ,
ꠀꠞ ꠝꠘ꠆ꠖ ꠉꠣꠍꠦ ꠜꠣꠟꠣ ꠚꠟ ꠗꠞꠦ ꠘꠣ।
৪৪ ꠚꠟ ꠖꠦꠈꠤꠀ ꠉꠣꠍ ꠌꠤꠘꠣ ꠎꠣꠄ।
ꠝꠣꠘꠡꠦ ꠔ ꠞꠤꠚꠥꠎꠤ ꠟꠔ ꠕꠣꠇꠤ ꠛꠠꠁ ꠙꠣꠠꠦ ꠘꠣ,
ꠛꠣ ꠍꠥꠔꠞꠣ ꠉꠣꠍ ꠕꠣꠇꠤ ꠀꠋꠉꠥꠞ ꠙꠣꠠꠦ ꠘꠣ।
৪৫ ꠜꠣꠟꠣ ꠝꠣꠘꠡꠞ ꠖꠤꠟꠞ ꠘꠦꠇ ꠜꠣꠘ꠆ꠒꠣꠞ ꠕꠣꠇꠤ ꠜꠣꠟꠣꠁ ꠛꠣꠞꠅꠄ,
ꠀꠞ ꠛꠖ ꠝꠣꠘꠡꠞ ꠛꠖ ꠖꠤꠟ ꠕꠣꠇꠤ ꠛꠖꠃ ꠛꠣꠞꠅꠄ।
ꠝꠣꠘꠡꠞ ꠖꠤꠟꠞ ꠜꠣꠘ꠆ꠒꠣꠞꠅ ꠎꠦꠔꠣ ꠎꠝꠣ ꠀꠍꠦ,
ꠅꠔꠣ ꠕꠣꠇꠤꠃ ꠔ ꠎꠛꠣꠘꠞ ꠛꠥꠟꠤ ꠛꠣꠞꠅꠄ।
৪৬ “ꠔꠥꠝꠞꠣ ꠇꠦꠘꠦ ꠀꠝꠣꠞꠦ ꠈꠣꠟꠤ ꠢꠥꠎꠥꠞ ꠢꠥꠎꠥꠞ ꠇꠁꠞꠣꠄ,
ꠅꠕꠌ ꠀꠝꠤ ꠎꠦꠔꠣ ꠇꠁ,
ꠁꠔꠣ ꠝꠣꠘꠅ ꠘꠣ?
৪৭ ꠀꠝꠣꠞ ꠇꠣꠘ꠆ꠖꠣꠔ ꠀꠁꠀ ꠀꠝꠣꠞ ꠛꠄꠀꠘ ꠢꠥꠘꠤꠀ ꠎꠦ ꠎꠘꠦ ꠀꠝꠟ ꠇꠞꠦ,
ꠢꠦ ꠇꠣꠞ ꠟꠣꠈꠣꠘ,
ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ।
৪৮ ꠢꠦ ꠅꠃ ꠝꠣꠘꠡꠞ ꠟꠣꠈꠣꠘ,
ꠎꠦ ꠊꠞ ꠛꠣꠘꠣꠘꠤꠞ ꠘꠤꠅꠔꠦ ꠉꠁꠘ ꠇꠞꠤ ꠝꠣꠐꠤ ꠈꠥꠖꠤꠀ ꠝꠎꠛꠥꠔ ꠇꠞꠤ ꠊꠞꠞ ꠈꠥꠐꠤ ꠛꠣꠘꠣꠁꠟ,
ꠛꠣꠖꠦ ꠛꠁꠘ꠆ꠘꠣ ꠀꠁꠟ ꠀꠞ ꠙꠣꠘꠤꠞ ꠚꠥꠔꠦ ꠅꠃ ꠊꠞꠞꠦ ꠑꠦꠟꠤꠟ,
ꠅꠁꠟꠦ ꠁꠈꠣꠘ ꠟꠠꠣꠁꠔ ꠙꠣꠞꠟ ꠘꠣ,
ꠁꠈꠣꠘ ꠔ ꠝꠎꠛꠥꠔ ꠇꠞꠤ ꠛꠣꠘꠣꠁꠟ।
৪৯ ꠀꠞ ꠀꠝꠣꠞ ꠛꠄꠀꠘ ꠢꠥꠘꠤꠀ ꠎꠦ ꠎꠘꠦ ꠀꠝꠟ ꠘꠣ ꠇꠞꠦ,
ꠢꠦ ꠅꠃ ꠟꠣꠈꠣꠘ ꠝꠣꠘꠥꠡ,
ꠎꠦꠉꠤꠄ ꠉꠣꠔ ꠘꠣ ꠈꠥꠖꠤꠀ ꠈꠣꠟꠤ ꠘꠞꠝ ꠝꠣꠐꠤꠞ ꠃꠙꠞꠦ ꠊꠞ ꠛꠣꠘꠣꠁꠟ,
ꠛꠣꠖꠦ ꠛꠣꠘꠞ ꠚꠥꠔꠞ ꠗꠣꠇ꠆ꠇꠣꠄ ꠔꠣꠞ ꠊꠞ ꠙꠠꠤꠀ ꠜꠣꠋꠉꠤꠀ ꠌꠥꠞꠝꠣꠞ ꠅꠁꠉꠦꠟ।”