ꠢꠎꠞꠔ ꠁꠍꠣ ꠖꠥꠡꠝꠘꠞ ꠝꠥꠇꠣꠛꠤꠟꠣ ꠅꠁꠟꠣ
২০
১ ꠅꠃ ꠍꠚꠞꠞ ꠇꠣꠟꠅ ꠄꠇꠖꠤꠘ ꠢꠎꠞꠔ ꠁꠍꠣ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠝꠣꠎꠦ,
ꠝꠣꠘꠡꠞ ꠉꠦꠍꠦ ꠀꠟ꠆ꠟꠣꠁ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠣꠔ ꠀꠍꠟꠣ।
ꠀꠈꠔꠣꠃ ꠛꠠ ꠁꠝꠣꠝ ꠀꠞ ꠀꠟꠤꠝ ꠅꠇꠟ ꠔꠣꠞꠣꠞ ꠝꠥꠞꠛ꠆ꠛꠤ ꠅꠇꠟꠞꠦ ꠟꠁꠀ ꠀꠁꠀ ꠇꠁꠟꠣ,
২ “ꠀꠁꠌ꠆ꠍꠣ ꠇꠅ ꠌꠣꠁꠘ,
ꠔꠥꠝꠤ ꠇꠥꠘ ꠈꠦꠝꠔꠣꠄ ꠁꠔꠣ ꠇꠣꠝ ꠇꠞꠞꠣꠄ,
ꠔꠥꠝꠣꠞꠦ ꠁꠔꠣꠞ ꠄꠈꠔꠤꠀꠞ ꠇꠦꠉꠤꠄ ꠖꠤꠍꠦ?”
৩ ꠁꠍꠣꠄ ꠎꠥꠀꠙ ꠖꠤꠟꠣ,
“ꠔꠦ ꠀꠝꠤꠅ ꠀꠙꠘꠣꠁꠘ꠆ꠔꠞꠦ ꠎꠤꠇꠣꠁꠞꠣꠝ,
ꠇꠃꠇ꠆ꠇꠣ ꠌꠣꠁꠘ,
৪ ꠄꠢꠤꠀ ꠘꠛꠤꠄ ꠔꠃꠛꠣꠞ ꠉꠥꠍꠟ ꠇꠞꠣꠘꠤꠞ ꠈꠦꠝꠔꠣ ꠙꠣꠁꠍꠟꠣ,
ꠝꠣꠘꠡꠞ ꠉꠦꠍ ꠕꠣꠇꠤ ꠘꠣ ꠀꠟ꠆ꠟꠣꠞ ꠉꠦꠍ ꠕꠣꠇꠤ?”
৫ ꠅꠃ ꠔꠣꠞꠣ ꠄꠇꠦ-ꠅꠁꠘ꠆ꠘꠦ ꠎꠥꠇ꠆ꠔꠤ-ꠙꠞꠣꠝꠤꠡ ꠇꠞꠟ,
“ꠎꠥꠖꠤ ꠇꠁ ꠀꠟ꠆ꠟꠣꠞ ꠉꠦꠍ ꠕꠣꠇꠤ,
ꠔꠦ ꠢꠦ ꠇꠁꠛ,
ꠔꠣꠁꠟꠦ ꠔꠣꠘ ꠃꠙꠞꠦ ꠁꠝꠣꠘ ꠀꠘꠟꠣꠄ ꠘꠣ ꠇꠦꠘꠦ?
৬ ꠀꠞ ꠎꠥꠖꠤ ꠇꠁ ꠝꠣꠘꠡꠞ ꠉꠦꠍ ꠕꠣꠇꠤ,
ꠔꠦ ꠝꠣꠘꠡꠦ ꠀꠝꠞꠣꠞꠦ ꠙꠣꠔ꠆ꠔꠞꠖꠤ ꠝꠣꠞꠛꠣ।
ꠄꠢꠤꠀꠞꠦ ꠔ ꠔꠣꠞꠣ ꠀꠟ꠆ꠟꠣꠞ ꠘꠛꠤ ꠇꠁꠀ ꠝꠣꠘꠂꠘ।”
৭ ꠅꠃ ꠔꠣꠞꠣ ꠇꠂꠟ,
“ꠁ ꠈꠦꠝꠔꠣ ꠇꠥꠀꠁ ꠕꠣꠇꠤ ꠙꠣꠁꠍꠟꠣ,
ꠀꠝꠞꠣ ꠎꠣꠘꠤ ꠘꠣ।”
৮ ꠁꠍꠣꠄ ꠔꠣꠞꠣꠞꠦ ꠇꠁꠟꠣ,
“ꠔꠦ ꠀꠝꠤꠅ ꠇꠁꠔꠣꠝ ꠘꠣꠄ,
ꠇꠥꠘ ꠈꠦꠝꠔꠣꠄ ꠁꠔꠣ ꠇꠞꠞꠣꠝ।”
ꠀꠋꠉꠥꠞ ꠛꠣꠉꠣꠘ ꠛꠣꠉꠤꠖꠣꠞꠞ ꠇꠤꠌ꠆ꠍꠣ
৯ ꠛꠣꠖꠦ ꠁꠍꠣꠄ ꠝꠣꠘꠡꠞꠦ ꠅꠃ ꠇꠤꠌ꠆ꠍꠣ ꠢꠥꠘꠣꠁꠟꠣ,
“ꠄꠇ ꠉꠤꠞꠡ꠆ꠔꠦ ꠀꠋꠉꠥꠞꠞ ꠛꠣꠉꠣꠘ ꠇꠞꠟꠣ,
ꠛꠣꠖꠦ ꠔꠣꠘ ꠛꠣꠉꠣꠘꠞꠦ ꠈꠦꠔꠣꠟ ꠅꠇꠟꠞ ꠉꠦꠍꠦ ꠛꠣꠉꠤ ꠖꠤꠀ ꠛꠃꠔ ꠖꠤꠘꠞ ꠟꠣꠉꠤ ꠛꠤꠖꠦꠡ ꠉꠦꠟꠣꠉꠤ।
১০ ꠀꠋꠉꠥꠞ ꠙꠣꠇꠣꠞ ꠡꠝꠄ ꠅꠁꠟꠦ ꠝꠣꠟꠤꠇꠦ ꠔꠣꠘ ꠛꠣꠐ ꠘꠤꠛꠣꠞ ꠟꠣꠉꠤ ꠄꠇ ꠉꠥꠟꠣꠝꠞꠦ ꠙꠣꠑꠣꠁꠟꠣ।
ꠅꠁꠟꠦ ꠈꠦꠔꠣꠟ ꠅꠇꠟꠦ ꠔꠣꠞꠦ ꠝꠣꠁꠞ-ꠗꠁꠞ ꠇꠞꠤꠀ ꠈꠣꠟꠤ ꠀꠔꠦ ꠚꠤꠞꠣꠁ ꠖꠤꠟ।
১১ ꠛꠣꠖꠦ ꠔꠣꠁꠘ ꠀꠞꠇ ꠉꠥꠟꠣꠝꠞꠦ ꠙꠣꠑꠣꠁꠟꠣ।
ꠔꠣꠞꠣ ꠁ ꠉꠥꠟꠣꠝꠞꠦꠅ ꠝꠣꠁꠞ-ꠗꠁꠞ ꠇꠞꠤ ꠛꠦꠁꠎ꠆ꠎꠔ ꠇꠞꠤꠀ ꠈꠣꠟꠤ ꠀꠔꠦ ꠚꠤꠞꠣꠁ ꠖꠤꠟ।
১২ ꠛꠣꠖꠦ ꠔꠤꠘ ꠘꠝ꠆ꠛꠞ ꠉꠥꠟꠣꠝꠞꠦ ꠙꠣꠑꠣꠁꠟꠦ,
ꠔꠣꠞꠣ ꠄꠅ ꠉꠥꠟꠣꠝꠞꠦ ꠝꠣꠞꠤꠀ ꠎꠈꠝ ꠇꠞꠤꠀ ꠛꠣꠞꠦ ꠚꠣꠟꠣꠁ ꠖꠤꠟ।
১৩ ꠔꠦꠃ ꠛꠣꠉꠣꠘꠞ ꠝꠣꠟꠤꠇꠦ ꠇꠁꠟꠣ,
ꠀꠝꠤ ꠇꠤꠔꠣ ꠇꠞꠔꠣꠝ?
ꠅꠈꠘ ꠀꠝꠤ ꠀꠝꠣꠞ ꠝꠣꠄꠀꠞ ꠙꠥꠔꠞꠦ ꠙꠣꠑꠣꠁꠝꠥ,
ꠔꠦꠃ ꠔꠣꠞꠣ ꠝꠣꠘꠔ ꠙꠣꠞꠦ।
১৪ ꠅꠁꠟꠦ ꠝꠣꠟꠤꠇꠞ ꠙꠥꠀꠞꠦ ꠖꠦꠈꠤꠀ ꠈꠦꠔꠣꠟ ꠅꠇꠟꠦ ꠇꠂꠟ,
ꠅꠃ ꠙꠥꠀꠃ ꠔ ꠔꠣꠞ ꠛꠣꠚꠞ ꠢꠇꠟꠔꠣꠞ ꠝꠣꠟꠤꠇ ꠅꠁꠛ।
ꠀꠅ,
ꠄꠞꠦ ꠝꠣꠞꠤꠀ ꠚꠣꠟꠣꠁ ꠖꠦꠁ।
ꠔꠦꠃ ꠝꠣꠟꠤꠇꠞ ꠢꠇꠟꠔꠣ ꠀꠝꠞꠣ ꠙꠣꠁꠟꠤꠝꠥ।
১৫ ꠅꠈꠣꠘ ꠇꠁꠀ ꠢꠣꠞꠤ ꠔꠣꠞꠦ ꠛꠣꠉꠣꠘꠞ ꠛꠣꠞꠦ ꠘꠤꠀ ꠈꠥꠘ ꠇꠞꠤꠟꠣꠁꠟ।
“ꠅꠈꠘ ꠇꠃꠇ꠆ꠇꠣ ꠌꠣꠁꠘ,
ꠛꠣꠉꠣꠘꠞ ꠝꠣꠟꠤꠇꠦ ꠁ ꠛꠣꠉꠤꠖꠣꠞ ꠅꠇꠟꠞꠦ ꠇꠤꠔꠣ ꠇꠞꠛꠣ?
১৬ ꠔꠣꠁꠘ ꠀꠁꠀ ꠔꠣꠞꠣꠞꠦ ꠘꠤꠙꠣꠔ ꠇꠞꠤꠟꠤꠛꠣ ꠘꠣ ꠘꠤ?
ꠀꠞ ꠔꠣꠘ ꠛꠣꠉꠣꠘ ꠖꠥꠍꠞꠣ ꠝꠣꠘꠡꠞ ꠉꠦꠍꠦ ꠖꠤꠛꠣ ꠘꠣ ꠘꠤ?”
ꠁꠔꠣ ꠢꠥꠘꠤꠀ ꠔꠣꠞꠣ ꠇꠁꠟꠣ,
“ꠘꠣꠃꠎꠥꠛꠤꠟ꠆ꠟꠣ!
ꠀꠟ꠆ꠟꠣꠄ ꠚꠣꠘꠣ ꠖꠦꠃꠇ!”
১৭ ꠔꠦꠃ ꠁꠍꠣꠄ ꠔꠣꠞꠣꠞ ꠛꠣꠄ ꠌꠣꠁꠀ ꠇꠁꠟꠣ,
“ꠔꠦ ꠀꠟ꠆ꠟꠣꠞ ꠇꠣꠟꠣꠝꠅ ꠇꠦꠘꠦ ꠁꠟꠣ ꠟꠦꠈꠣ ꠀꠍꠦ,
ꠞꠣꠎ-ꠝꠦꠡ꠆ꠔꠁꠞ ꠅꠇꠟꠦ ꠎꠦ ꠙꠣꠔ꠆ꠔꠞꠞꠦ ꠛꠦꠇꠣꠝꠣ ꠇꠁꠀ ꠚꠣꠟꠣꠁ ꠖꠤꠍꠤꠟ,
ꠅꠇꠐꠣ ꠖꠤꠀꠃ ꠊꠞꠞ ꠁꠀꠘ ꠈꠥꠐꠤ ꠅꠁꠟ।
১৮ ꠁ ꠙꠣꠔ꠆ꠔꠞꠞ ꠃꠙꠞꠦ ꠇꠦꠃ ꠙꠠꠟꠦ,
ꠁ ꠎꠘ ꠜꠣꠋꠉꠤꠀ ꠐꠥꠇꠞꠣ ꠐꠥꠇꠞꠣ ꠅꠁꠎꠤꠛ,
ꠀꠞ ꠁ ꠙꠣꠔ꠆ꠔꠞꠅ ꠇꠦꠃꠞꠞ ꠃꠙꠞꠦ ꠙꠠꠟꠦ,
ꠢꠦ-ꠅ ꠎꠘ ꠌꠥꠞꠝꠣꠞ ꠅꠁꠎꠤꠛ।”
১৯ ꠅꠈꠣꠘ ꠢꠥꠘꠤꠀꠃ ꠝꠃꠟꠣꠘꠣ ꠀꠞ ꠛꠠ ꠁꠝꠣꠝ ꠅꠇꠟꠦ ꠁꠍꠣꠞꠦ ꠗꠞꠤꠟꠔꠣ ꠌꠣꠁꠟꠣ।
ꠔꠣꠞꠣ ꠛꠥꠎꠤꠟꠤꠟꠣ,
ꠁꠍꠣꠄ ꠁ ꠇꠤꠌ꠆ꠍꠣ ꠔꠣꠞꠣꠞ ꠘꠤꠅꠔꠦꠃ ꠇꠁꠞꠣ।
ꠅꠁꠟꠦ ꠝꠣꠘꠡꠞꠦ ꠒꠞꠣꠁꠀ ꠔꠣꠞꠣ ꠇꠥꠘ꠆ꠔꠣ ꠇꠞꠟꠣ ꠘꠣ।
ꠛꠣꠖꠡꠣꠞ ꠈꠣꠎꠘꠣ ꠖꠦꠅꠀ ꠎꠣꠁꠎ ꠘꠤ
২০ ꠄꠞꠟꠣꠉꠤ ꠔꠣꠞꠣ ꠁꠍꠣꠞꠦ ꠌꠃꠈꠦ ꠌꠃꠈꠦ ꠞꠣꠈꠟꠣ,
ꠔꠣꠘ ꠈꠞꠦ ꠇꠄꠎꠘ ꠉꠥꠁꠀ ꠟꠣꠉꠣꠁꠟꠣ।
ꠉꠥꠁꠀ ꠅꠇꠟꠦ ꠝꠥꠝꠤꠘꠤ ꠛꠦꠡ ꠗꠞꠤꠀ ꠌꠟꠟꠦꠅ,
ꠔꠣꠞꠣꠞ ꠘꠤꠅꠔ ꠅꠁꠟ ꠁꠍꠣꠞꠦ ꠇꠕꠣꠞ ꠚꠣꠘ꠆ꠖꠅ ꠚꠣꠟꠣꠁꠔꠣ,
ꠎꠣꠔꠦ ꠔꠣꠘꠦ ꠖꠦꠡꠞ ꠙꠞꠗꠣꠘ ꠢꠣꠇꠤꠝꠞ ꠀꠖꠣꠟꠔꠅ ꠌꠣꠟꠣꠘ ꠇꠞꠣꠁꠟ ꠎꠣꠄ।
২১ ꠅꠃ ꠉꠥꠁꠀ ꠅꠇꠟꠦ ꠁꠍꠣꠞꠦ ꠇꠁꠟꠣ,
“ꠢꠥꠎꠥꠞ,
ꠀꠙꠘꠦ ꠔ ꠢꠇꠟꠞꠦ ꠢꠝꠣꠘ ꠌꠃꠈꠦ ꠖꠦꠈꠂꠘ।
ꠀꠙꠘꠦ ꠢꠇ ꠝꠣꠔ ꠝꠣꠔꠂꠘ,
ꠢꠇ ꠔꠣꠟꠤꠝ ꠖꠦꠁꠘ।
ꠇꠦꠃꠞꠞꠦ ꠔꠅꠀꠇ꠆ꠇꠣ ꠘꠣ ꠇꠞꠤꠀ,
ꠝꠣꠘꠡꠞꠦ ꠀꠟ꠆ꠟꠣꠞ ꠢꠇ ꠙꠕ ꠖꠦꠈꠣꠁꠘ।
২২ ꠔꠦ ꠇꠃꠇ꠆ꠇꠣ ꠌꠣꠁꠘ,
ꠞꠥꠝꠣꠘ ꠛꠣꠖꠡꠣ ꠇꠂꠍꠞꠞꠦ ꠈꠣꠎꠘꠣ ꠖꠦꠅꠀ ꠎꠣꠁꠎ ꠘꠤ,
ꠘꠣ ꠘꠣꠎꠣꠁꠎ?”
২৩ ꠁꠍꠣꠄ ꠔꠣꠞꠣꠞ ꠇꠥ-ꠝꠔꠟꠛ ꠛꠥꠎꠤꠟꠤꠟꠣ।
ꠛꠥꠎꠤꠀ ꠇꠁꠟꠣ,
২৪ “ꠖꠦꠈꠤ,
ꠀꠝꠣꠞꠦ ꠄꠇꠐꠣ ꠖꠤꠘꠣꠞ ꠖꠦꠈꠣꠅ।”
ꠖꠤꠘꠣꠞ ꠖꠦꠈꠤꠀ ꠇꠁꠟꠣ,
“ꠁꠉꠥꠞ ꠃꠙꠞꠦ ꠇꠣꠞ ꠍꠛꠤ ꠀꠞ ꠘꠣꠝ ꠀꠍꠦ?”
ꠔꠣꠞꠣ ꠇꠁꠟꠣ,
“ꠛꠣꠖꠡꠣ ꠇꠂꠍꠞꠞ।”
২৫ ꠁꠍꠣꠄ ꠇꠁꠟꠣ,
“ꠔꠦ ꠇꠂꠍꠞꠞꠔꠣ ꠇꠂꠍꠞꠞꠦ ꠖꠦꠅ,
ꠀꠞ ꠀꠟ꠆ꠟꠣꠞꠔꠣ ꠀꠟ꠆ꠟꠣꠞꠦ ꠖꠦꠅ।”
২৬ ꠔꠣꠘ ꠎꠥꠀꠙ ꠢꠥꠘꠤꠀ ꠔꠣꠞꠣ ꠔꠣꠁꠎ꠆ꠎꠥꠛ ꠛꠘꠤꠀ ꠘꠤꠞꠣꠁ ꠅꠁꠉꠦꠟꠣ।
ꠉꠥꠁꠀ ꠅꠇꠟꠦ ꠝꠣꠘꠡꠞ ꠍꠣꠝꠘꠦ ꠔꠣꠘꠞꠦ ꠇꠕꠣꠞ ꠚꠣꠘ꠆ꠖꠅ ꠚꠣꠟꠣꠁꠔ ꠙꠣꠞꠟ ꠘꠣ।
ꠀꠈꠦꠞꠣꠔꠞ ꠛꠦꠙꠣꠞꠦ ꠙ꠆ꠞꠡꠘ
২৭ ꠛꠣꠖꠦ ꠍꠤꠖ꠆ꠖꠦꠇꠤꠀ ꠝꠎꠛꠞ ꠇꠤꠍꠥ ꠝꠣꠘꠥꠡ ꠁꠍꠣꠞ ꠉꠦꠍꠦ ꠀꠁꠟꠣ।
ꠅꠃ ꠝꠎꠛꠞ ꠝꠣꠘꠡꠦ ꠝꠘꠅ ꠇꠞꠂꠘ,
ꠝꠞꠣꠞ ꠛꠣꠖꠦ ꠇꠥꠘꠥ ꠎꠣꠘꠖꠣꠞꠃ ꠀꠞ ꠎꠤꠘ꠆ꠖꠣ ꠅꠁꠔꠣ ꠘꠣꠄ।
২৮ ꠔꠣꠞꠣ ꠁꠍꠣꠞꠦ ꠎꠤꠇꠣꠁꠟꠣ,
“ꠢꠥꠎꠥꠞ,
ꠝꠥꠍꠣ ꠘꠛꠤꠄ ꠀꠝꠞꠣꠞ ꠟꠣꠉꠤ ꠅꠃ ꠘꠤꠅꠝ ꠟꠦꠈꠤꠀ ꠉꠦꠍꠂꠘ,
ꠇꠥꠘꠥ ꠝꠣꠘꠡꠦ ꠔꠣꠞ ꠛꠃ ꠕꠁꠀ ꠘꠤꠀꠅꠟꠣꠖꠤ ꠢꠣꠟꠔꠦ ꠝꠞꠤꠉꠦꠟꠦ,
ꠔꠣꠞ ꠜꠣꠁꠄ ꠅꠃ ꠛꠃꠞꠦ ꠛꠤꠀ ꠇꠞꠤꠀ ꠝꠞꠣ ꠜꠣꠁꠞ ꠅꠀꠞꠤꠡ ꠙꠄꠖꠣ ꠇꠞꠛ।
২৯ ꠅꠈꠘ ꠝꠘꠅ ꠇꠞꠃꠇ꠆ꠇꠣ,
ꠄꠇ ꠊꠞꠅ ꠡꠣꠔ ꠜꠣꠁ ꠀꠍꠤꠟ।
ꠙꠄꠟꠣ ꠎꠘꠦ ꠛꠤꠀ ꠇꠞꠤꠀ ꠘꠤꠀꠅꠟꠣꠖꠤ ꠢꠣꠟꠔꠦ ꠝꠞꠤꠉꠦꠟ।
৩০-৩১ ꠛꠣꠖꠦ ꠖꠥꠁ ꠘꠝ꠆ꠛꠞ ꠀꠞ ꠔꠤꠘ ꠘꠝ꠆ꠛꠞ ꠜꠣꠁꠄ ꠅꠃ ꠛꠦꠐꠤꠞꠦ ꠛꠤꠀ ꠇꠞꠟ।
ꠅꠃ ꠟꠣꠈꠣꠘ ꠔꠣꠞꠣ ꠡꠣꠔꠅ ꠜꠣꠁꠄꠃ ꠅꠃ ꠛꠦꠐꠤꠞꠦ ꠛꠤꠀ ꠇꠞꠤꠀ ꠘꠤꠀꠅꠟꠣꠖꠤ ꠢꠣꠟꠔꠦ ꠝꠞꠤꠉꠦꠟ।
৩২ ꠢꠦꠡꠦ ꠅꠃ ꠛꠦꠐꠤꠅ ꠝꠞꠤꠉꠦꠟ।
৩৩ ꠔꠦ ꠇꠤꠀꠝꠔꠞ ꠖꠤꠘ ꠁ ꠛꠦꠐꠤ ꠇꠣꠞ ꠛꠃ ꠅꠁꠛ?
ꠡꠣꠔꠅ ꠎꠘꠦꠃ ꠔ ꠁ ꠛꠦꠐꠤꠞꠦ ꠛꠤꠀ ꠇꠞꠍꠤꠟ।”
৩৪ ꠁꠍꠣꠄ ꠇꠁꠟꠣ,
“ꠁ ꠖꠥꠘꠤꠀꠞ ꠝꠣꠘꠡꠦ ꠛꠤꠀ-ꠡꠣꠖꠤ ꠇꠞꠂꠘ,
ꠀꠞ ꠛꠤꠀ-ꠡꠣꠖꠤ ꠖꠦꠁꠘ।
৩৫ ꠅꠁꠟꠦ ꠝꠃꠔꠞ ꠛꠣꠖꠦ ꠎꠤꠘ꠆ꠖꠣ ꠅꠁꠀ ꠎꠦꠞꠣ ꠀꠈꠦꠞꠣꠔꠅ ꠇꠣꠝꠤꠀꠛꠤꠞ ꠟꠣꠈ ꠅꠁꠎꠣꠄ,
ꠔꠣꠞꠣ ꠀꠞ ꠛꠤꠀ-ꠡꠣꠖꠤ ꠇꠞꠔꠣ ꠘꠣꠄ,
ꠛꠣ ꠛꠤꠀ-ꠡꠣꠖꠤ ꠛꠁꠔꠣꠅ ꠘꠣꠄ।
৩৬ ꠔꠣꠞꠣꠞ ꠇꠥꠘꠥ ꠝꠃꠔꠅ ꠅꠁꠔ ꠘꠣꠄ,
ꠔꠣꠞꠣ ꠚꠤꠞꠤꠡ꠆ꠔꠣꠞ ꠟꠣꠈꠣꠘ ꠅꠁꠎꠤꠛꠣ।
ꠝꠃꠔꠞ ꠛꠣꠖꠦ ꠀꠈꠦꠞ ꠙꠣꠅꠀꠄ ꠔꠣꠞꠣ ꠀꠟ꠆ꠟꠣ ꠙꠣꠇꠞ ꠀꠅꠟꠣꠖ ꠛꠘꠤꠎꠤꠛꠣ।
৩৭ ꠔꠥꠞ ꠙꠣꠠꠞ ꠎꠣꠟꠣꠁꠟ ꠎꠋꠟꠣꠞ ꠛꠄꠀꠘꠤꠞ ꠝꠣꠎꠦ ꠝꠥꠍꠣ ꠘꠛꠤꠄ ꠛꠥꠎꠣꠁꠍꠂꠘ,
ꠝꠥꠞ꠆ꠖꠣ ꠅꠇꠟ ꠔ ꠎꠤꠘ꠆ꠖꠣ ꠅꠁꠀ ꠃꠑꠂꠘ,
ꠄꠞꠟꠣꠉꠤꠃ ꠛꠃꠔ ꠀꠉꠦ ꠎꠦ ꠘꠛꠤ ꠅꠇꠟ ꠝꠣꠞꠣ ꠉꠦꠍꠂꠘ ꠝꠥꠍꠣꠄ ꠝꠣꠛꠥꠖꠞꠦ ꠢꠃ ꠘꠛꠤ ꠅꠇꠟꠞ ꠀꠟ꠆ꠟꠣ ꠇꠁꠀ ꠒꠣꠇꠤꠟꠣ।
ꠔꠣꠁꠘ ꠝꠣꠛꠥꠖꠞꠦ ꠇꠁꠟꠣ,
ꠁꠛ꠆ꠞꠣꠢꠤꠝꠞ ꠀꠟ꠆ꠟꠣ,
ꠁꠍꠢꠣꠇꠞ ꠀꠟ꠆ꠟꠣ ꠀꠞ ꠁꠀꠇꠥꠛꠞ ꠀꠟ꠆ꠟꠣ।
৩৮ ꠔꠦ ꠀꠟ꠆ꠟꠣ ꠔ ꠝꠥꠞ꠆ꠖꠣ ꠅꠇꠟꠞ ꠀꠟ꠆ꠟꠣ ꠘꠣꠄ,
ꠔꠣꠁꠘ ꠎꠤꠘ꠆ꠖꠣ ꠅꠇꠟꠞ ꠀꠟ꠆ꠟꠣ।
ꠔꠣꠘ ꠘꠎꠞꠅ ꠢꠇ꠆ꠇꠟ ꠝꠣꠘꠥꠡꠃ ꠎꠤꠘ꠆ꠖꠣ ꠀꠍꠂꠘ।”
৩৯ ꠔꠦꠃ ꠇꠄꠎꠘ ꠀꠟꠤꠝꠦ ꠇꠁꠟꠣ,
“ꠢꠥꠎꠥꠞ,
ꠀꠙꠘꠦ ꠔ ꠈꠣꠐꠤ ꠝꠣꠔ ꠝꠣꠔꠍꠂꠘ।”
৪০ ꠢꠦꠡꠦ ꠔꠣꠞꠣ ꠁꠍꠣꠞꠦ ꠀꠞ ꠇꠥꠘꠥ ꠍꠅꠀꠟ ꠇꠞꠣꠞ ꠡꠣꠅꠡ ꠙꠣꠁꠟ ꠘꠣ।
ꠀꠟꠤꠝ ꠅꠇꠟꠞꠦ ꠢꠦꠖꠣꠄꠅꠔ
৪১ ꠄꠞꠝꠣꠎꠦ ꠁꠍꠣꠄ ꠅꠃ ꠀꠟꠤꠝ ꠅꠇꠟꠞꠦ ꠎꠤꠇꠣꠁꠟꠣ,
“ꠝꠣꠘꠡꠦ ꠇꠦꠘꠦ ꠀꠟ-ꠝꠍꠤꠞꠦ ꠖꠣꠃꠖ ꠘꠛꠤꠞ ꠀꠅꠟꠣꠖ ꠇꠂꠘ?
৪২-৪৩ ꠎꠛꠥꠞ ꠡꠞꠤꠚꠞ ꠝꠣꠎꠦ ꠖꠣꠃꠖꠦ ꠘꠤꠎꠦꠃ ꠔ ꠅꠈꠣꠘ ꠇꠁꠞꠣ,
ꠝꠣꠛꠥꠖꠦ ꠀꠝꠣꠞ ꠝꠥꠘꠤꠛꠞꠦ ꠇꠁꠟꠣ,
ꠎꠔꠖꠤꠘ ꠔꠥꠝꠣꠞ ꠖꠥꠡꠝꠘ ꠅꠇꠟꠞꠦ
ꠔꠥꠝꠣꠞ ꠙꠣꠅꠞ ꠔꠟꠦ ꠘꠣ ꠚꠣꠟꠣꠁ,
ꠅꠔ ꠖꠤꠘ ꠔꠥꠝꠤ ꠀꠝꠣꠞ ꠒꠣꠁꠘ ꠉꠣꠟꠣꠔ ꠛꠁꠞꠅ।
৪৪ ꠖꠣꠃꠖꠦ ꠔ ꠀꠟ-ꠝꠍꠤꠞꠦ ꠔꠣꠘ ꠝꠥꠘꠤꠛ ꠇꠁꠀ ꠒꠣꠇꠤꠟꠣ,
ꠔꠦ ꠀꠟ-ꠝꠍꠤ ꠇꠦꠝꠘꠦ ꠖꠣꠃꠖꠞ ꠀꠅꠟꠣꠖ ꠅꠁꠛꠣ?”
৪৫ ꠝꠣꠘꠡꠦ ꠁꠍꠣꠞ ꠛꠄꠀꠘ ꠢꠥꠘꠞꠣ,
ꠅꠃ ꠡꠝꠄ ꠔꠣꠁꠘ ꠡꠣꠉꠞꠤꠖ ꠅꠇꠟꠞꠦ ꠇꠁꠟꠣ,
৪৬ “ꠀꠟꠤꠝ ꠅꠇꠟꠞ ꠛꠦꠙꠣꠞꠦ ꠢꠥꠡꠤꠀꠞ ꠅꠅ।
ꠔꠣꠞꠣ ꠟꠣꠝ꠆ꠛꠣ ꠟꠣꠝ꠆ꠛꠣ ꠎꠥꠛ꠆ꠛꠣ ꠚꠤꠘ꠆ꠖꠤꠀ ꠊꠥꠞꠤꠔꠦ ꠈꠥꠛ ꠜꠣꠟꠣ ꠙꠣꠁꠘ।
ꠛꠣꠎꠣꠞ-ꠀꠐꠅ ꠉꠤꠀ ꠍꠣꠟꠣꠝ ꠙꠣꠁꠔꠦ ꠙꠍꠘ꠆ꠖ ꠇꠞꠂꠘ।
ꠝꠍꠤꠖꠅ ꠉꠤꠀ ꠍꠣꠝꠘꠞ ꠇꠣꠔꠣꠞꠅ ꠛꠁꠔꠦ ꠀꠞ ꠝꠎꠟꠤꠍꠅ ꠉꠤꠀ ꠖꠣꠝꠤ ꠎꠣꠉꠣꠔ ꠛꠁꠔꠦ ꠙꠍꠘ꠆ꠖ ꠇꠞꠂꠘ।
৪৭ ꠔꠣꠞꠣ ꠝꠣꠘꠡꠞꠦ ꠖꠦꠈꠣꠘꠤꠞ ꠟꠣꠉꠤ ꠟꠣꠝ꠆ꠛꠣ ꠟꠣꠝ꠆ꠛꠣ ꠖꠥꠀ ꠇꠞꠂꠘ।
ꠢꠤꠞꠛꠣꠞ ꠠꠣꠠꠤ ꠛꠦꠐꠤꠘ꠆ꠔꠞ ꠊꠞ-ꠛꠣꠠꠤ ꠖꠈꠟ ꠇꠞꠂꠘ।
ꠇꠤꠀꠝꠔꠞ ꠖꠤꠘ ꠄꠞꠣꠞ ꠛꠠ ꠇꠑꠤꠘ ꠡꠣꠎꠣ ꠅꠁꠛ।”