ꠝꠣꠇꠤꠖꠘꠤꠀ ꠀꠞ ꠉ꠆ꠞꠤꠍ ꠖꠦꠡꠅ ꠖꠥꠀꠞꠣ ꠍꠚꠞ
২০
১ ꠉꠦꠁꠘꠎꠣꠝ ꠡꠦꠡ ꠅꠀꠞ ꠛꠣꠖꠦ ꠢꠎꠞꠔ ꠙꠣꠃꠟꠥꠍꠦ ꠝꠥꠝꠤꠘ ꠅꠇꠟꠞꠦ ꠈꠛꠞꠖꠤ ꠀꠘꠣꠁꠟꠣ,
ꠔꠣꠞꠣ ꠀꠁꠀ ꠢꠣꠞꠟꠦ ꠔꠣꠁꠘ ꠔꠣꠞꠣꠞꠦ ꠃꠔꠡꠣꠢ ꠖꠤꠀ,
ꠍꠢꠤ-ꠍꠣꠟꠣꠝꠔꠦ ꠛꠤꠖꠣꠄ ꠟꠁꠀ ꠝꠣꠇꠤꠖꠘꠤꠀꠔ ꠎꠣꠁꠔꠣ ꠇꠞꠤ ꠞꠅꠀꠘꠣ ꠅꠁꠟꠣ।
২ ꠝꠣꠇꠤꠖꠘꠤꠀꠞ ꠝꠣꠎꠦꠖꠤ ꠎꠣꠁꠔꠦ ꠎꠣꠁꠔꠦ ꠝꠥꠝꠤꠘ ꠅꠇꠟꠞꠦ ꠛꠃꠔ ꠃꠔꠡꠣꠢ ꠖꠤꠀ,
ꠉ꠆ꠞꠤꠍ ꠖꠦꠡꠅ ꠀꠁꠀ ꠀꠎꠤꠟꠣ।
৩ ꠅꠘꠅ ꠀꠁꠀ ꠔꠤꠘ ꠝꠣꠡ ꠞꠅꠀꠞ ꠛꠣꠖꠦ ꠎꠦꠛꠟꠣ ꠎꠣꠎꠅ ꠇꠞꠤ ꠡꠤꠞꠤꠀ ꠖꠦꠡꠅ ꠎꠣꠁꠔꠣ ꠌꠣꠁꠟꠣ,
ꠅꠃ ꠡꠝꠄ ꠁꠢꠥꠖꠤ ꠅꠇꠟꠦ ꠔꠣꠘ ꠛꠤꠙꠇ꠆ꠇꠦ ꠇꠥ-ꠝꠔꠟꠛ ꠇꠞꠦꠞ ꠢꠥꠘꠤꠀ,
ꠔꠣꠁꠘ ꠝꠣꠇꠤꠖꠘꠤꠀꠞ ꠝꠣꠎꠦꠖꠤ ꠎꠣꠁꠔꠣ ꠇꠞꠤ ꠘꠤꠅꠔ ꠇꠞꠟꠣ।
৪ ꠀꠞ ꠛꠤꠞꠄꠀ ꠐꠣꠃꠘꠞ ꠙꠥꠞꠍꠞ ꠙꠥꠀ ꠍꠥꠙꠣꠔꠍ,
ꠕꠤꠡꠟꠘꠤꠇꠤꠞ ꠀꠞꠤꠡ꠆ꠔꠣꠇꠥꠍ ꠀꠞ ꠍꠤꠇꠥꠘ꠆ꠖꠍ,
ꠖꠞꠛꠤ ꠡꠢꠞꠞ ꠉꠃꠍ,
ꠔꠤꠝꠕꠤ,
ꠀꠞ ꠀꠍꠤꠀ ꠖꠦꠡꠞ ꠔꠥꠈꠤꠇ ꠀꠞ ꠔꠚꠤꠝ,
ꠄꠞꠣ ꠢꠇ꠆ꠇꠟ ꠙꠣꠃꠟꠥꠍꠞ ꠟꠉꠦ ꠉꠦꠟꠣ।
৫ ꠄꠞꠣ ꠀꠉꠦ ꠅꠁꠀ ꠔꠞꠥꠀꠍ ꠐꠣꠃꠘꠅ ꠉꠤꠀ ꠀꠝꠞꠣꠞ ꠟꠣꠉꠤ ꠛꠣꠞ ꠌꠣꠅꠀꠔ ꠀꠍꠟꠣ।
৬ ꠛꠣꠖꠦ ꠈꠣꠝꠤꠞ ꠍꠣꠠꠣ ꠞꠥꠐꠤꠞ ꠁꠖ ꠡꠦꠡ ꠅꠁꠉꠦꠟꠦ ꠀꠝꠞꠣ ꠎꠣꠎꠅ ꠇꠞꠤ ꠚꠤꠟꠤꠙꠤ ꠕꠣꠇꠤ ꠞꠅꠀꠘꠣ ꠖꠤꠀ,
ꠙꠣꠌ ꠖꠤꠘ ꠛꠣꠖꠦ ꠔꠞꠥꠀꠍ ꠀꠁꠀ ꠔꠣꠞꠣꠞ ꠟꠉꠦ ꠝꠤꠟꠟꠣꠝ,
ꠅꠘꠅ ꠡꠣꠔꠖꠤꠘ ꠞꠁꠟꠣꠝ।
ꠢꠎꠞꠔ ꠙꠣꠃꠟꠥꠍꠦ ꠄꠇ ꠝꠥꠞ꠆ꠖꠣꠞꠦ ꠎꠤꠘ꠆ꠖꠣ ꠇꠞꠣ
৭ ꠢꠣꠙ꠆ꠔꠣꠞ ꠙꠄꠟꠣ ꠖꠤꠘ ꠁꠍꠣꠞ ꠝꠦꠎꠛꠣꠘꠤ ꠈꠣꠅꠀꠞ ꠟꠣꠉꠤ ꠀꠝꠞꠣ ꠄꠇꠈꠣꠘꠅ ꠖꠟꠣ ꠅꠁꠟꠦ,
ꠙꠣꠃꠟꠥꠍ ꠛꠣꠖꠞ ꠖꠤꠘ ꠎꠣꠁꠔꠣꠉꠤ ꠇꠞꠤ ꠝꠣꠎ ꠞꠣꠁꠔ ꠙꠞ꠆ꠎꠘ꠆ꠔ ꠝꠥꠝꠤꠘ ꠅꠇꠟꠞ ꠉꠦꠍꠦ ꠅꠀꠎ ꠇꠞꠟꠣ।
৮ ꠀꠝꠞꠣ ꠃꠙꠞꠞ ꠔꠣꠟꠣꠞ ꠎꠦ ꠊꠞꠅ ꠛꠁꠍꠟꠣꠝ ꠢꠤꠈꠣꠘꠅ ꠛꠃꠔ ꠛꠣꠔ꠆ꠔꠤ ꠀꠍꠤꠟ।
৯ ꠀꠞ ꠃꠔꠥꠈ ꠘꠣꠝꠞ ꠄꠇ ꠎꠥꠀꠘ ꠙꠥꠀ ꠈꠤꠠꠇꠤꠞ ꠃꠙꠞꠦ ꠛꠅꠀꠔ ꠀꠍꠤꠟ,
ꠙꠣꠃꠟꠥꠍꠦ ꠛꠃꠔ ꠡꠝꠄ ꠗꠞꠤ ꠅꠀꠎ ꠇꠞꠣꠄ ꠢꠦ ꠢꠥꠘꠤ ꠢꠥꠘꠤ ꠊꠥꠝꠣꠁ ꠉꠦꠍꠤꠟ,
ꠀꠈꠔꠣꠃ ꠢꠦ ꠔꠤꠘ ꠔꠣꠟꠣ ꠕꠣꠇꠤ ꠟꠣꠝꠣꠔ ꠙꠠꠤꠉꠦꠟ।
ꠔꠦꠃ ꠝꠣꠘꠡꠦ ꠔꠣꠞꠦ ꠝꠞꠣ ꠢꠣꠟꠔꠦ ꠔꠥꠟꠟꠣ।
১০ ꠙꠣꠃꠟꠥꠍ ꠟꠣꠝꠣꠔ ꠟꠣꠝꠤꠀ ꠙꠥꠀꠞ ꠃꠙꠞꠦ ꠇꠣꠁꠔ ꠅꠁꠀ ꠀꠁꠘ꠆ꠎꠣ ꠇꠞꠤ ꠗꠞꠤꠀ ꠇꠁꠟꠣ,
“ꠔꠥꠝꠞꠣ ꠃꠟꠁꠡ꠆ꠔꠟ ꠇꠞꠤꠅ ꠘꠣ,
ꠔꠣꠞ ꠜꠤꠔꠞꠦ ꠔ ꠎꠣꠘ ꠀꠍꠦ।”
১১ ꠛꠣꠖꠦ ꠔꠣꠁꠘ ꠢꠤꠞꠛꠣꠞ ꠃꠙꠞꠞ ꠔꠣꠟꠣꠔ ꠉꠤꠀ ꠝꠦꠎꠛꠣꠘꠤ ꠈꠣꠁꠟꠣ,
ꠈꠣꠁꠀ ꠢꠣꠞꠟꠦ ꠚꠎꠞ ꠙꠞ꠆ꠎꠘ꠆ꠔ ꠛꠣꠔꠌꠤꠔ ꠇꠞꠤꠀ ꠛꠤꠖꠣꠄ ꠟꠁꠟꠣ।
১২ ꠄꠞ ꠝꠣꠎꠦ ꠅꠃ ꠙꠥꠀꠞꠦ ꠝꠣꠘꠡꠦ ꠎꠤꠔꠣ ꠢꠣꠟꠔꠦ ꠛꠣꠠꠤꠔ ꠘꠤꠀ ꠎꠣꠞ ꠙꠞ ꠘꠣꠁ ꠈꠥꠡꠤ ꠅꠁꠟꠣ।
১৩ ꠀꠝꠞꠣ ꠀꠉꠦ ꠉꠤꠀ ꠎꠣꠎꠅ ꠇꠞꠤ ꠀꠍꠥꠍ ꠊꠣꠐꠞ ꠛꠣꠄ ꠞꠅꠀꠘꠣ ꠅꠁꠟꠣꠝ,
ꠝꠘꠅ ꠇꠞꠟꠣꠝ ꠙꠣꠃꠟꠥꠍꠞꠦ ꠢꠘ ꠕꠣꠇꠤ ꠔꠥꠟꠝꠥ।
ꠇꠣꠞꠘ ꠔꠣꠁꠘ ꠈꠤꠀꠟ ꠇꠞꠍꠟꠣ ꠀꠐꠤꠀ ꠢꠤꠈꠣꠘꠅ ꠉꠤꠀ ꠃꠑꠔꠣ।
১৪ ꠀꠍꠥꠍ ꠀꠁꠀ ꠔꠣꠁꠘ ꠀꠝꠞꠣꠞ ꠟꠉꠦ ꠝꠤꠟꠣꠞ ꠛꠣꠖꠦ,
ꠀꠝꠞꠣ ꠔꠣꠘꠞꠦ ꠎꠣꠎꠅ ꠔꠥꠟꠤꠀ ꠝꠤꠔꠥꠟꠤꠘꠤꠔ ꠀꠁꠟꠣꠝ।
১৫ ꠛꠣꠖꠞ ꠖꠤꠘ ꠀꠝꠞꠣ ꠎꠣꠎ ꠈꠥꠟꠤꠀ ꠢꠤꠈꠣꠘ ꠕꠣꠇꠤ ꠞꠅꠀꠘꠣ ꠅꠁꠀ ꠈꠤꠅꠍ ꠖꠤꠙꠞ ꠇꠣꠘ꠆ꠖꠣꠔ ꠀꠁꠟꠣꠝ;
ꠄꠞ ꠛꠣꠖꠞ ꠖꠤꠘ ꠀꠝꠞꠣ ꠍꠣꠝꠥꠍ ꠖꠤꠙꠅ ꠞꠁꠟꠣꠝ,
ꠔꠣꠞ ꠛꠣꠖꠞ ꠖꠤꠘ ꠉꠤꠀ ꠀꠝꠞꠣ ꠝꠤꠟꠤꠔꠣ ꠊꠣꠐꠅ ꠜꠤꠠꠤꠟꠣꠝ।
১৬ ꠀꠍꠤꠀ ꠖꠦꠡꠅ ꠙꠣꠃꠟꠥꠍꠦ ꠖꠦꠞꠤ ꠇꠞꠣꠞ ꠈꠤꠀꠟ ꠘꠣ ꠅꠀꠄ ꠔꠣꠁꠘ ꠝꠘꠦ ꠝꠘꠦ ꠑꠤꠇ ꠇꠞꠍꠟꠣ,
ꠁꠚꠤꠍꠅ ꠘꠣ ꠢꠣꠝꠣꠁꠀ ꠄꠞ ꠉꠣꠟꠣꠛꠣꠄ ꠎꠣꠁꠛꠣꠉꠤ,
ꠔꠣꠁꠘ ꠎꠟꠖꠤ ꠇꠞꠤ ꠎꠦꠞꠥꠎꠣꠟꠦꠝꠅ ꠉꠤꠀ ꠢꠣꠞꠤ ꠙꠘ꠆ꠌꠁꠡꠣ ꠁꠖ ꠢꠘꠅ ꠀꠖꠣꠄ ꠇꠞꠔꠣ ꠌꠣꠁꠟꠣ।
ꠁꠚꠤꠍ ꠎꠝꠣꠔꠅ ꠀꠈꠦꠞꠤ ꠛꠄꠀꠘ
১৭ ꠝꠤꠟꠤꠔꠣ ꠕꠣꠇꠤ ꠙꠣꠃꠟꠥꠍꠦ ꠈꠛꠞꠤꠀ ꠙꠣꠑꠣꠁꠀ ꠁꠚꠤꠍꠞ ꠎꠝꠣꠔꠞ ꠝꠥꠞꠛ꠆ꠛꠤ ꠅꠇꠟꠞꠦ ꠀꠘꠣꠁꠟꠣ।
১৮ ꠔꠣꠞꠣ ꠀꠁꠀ ꠙꠃꠍꠣꠞ ꠛꠣꠖꠦ ꠙꠣꠃꠟꠥꠍꠦ ꠇꠁꠟꠣ,
“ꠀꠙꠘꠣꠞꠣ ꠔ ꠎꠣꠘꠂꠘ,
ꠀꠍꠤꠀ ꠖꠦꠡꠅ ꠀꠁꠀ ꠢꠣꠞꠟꠦ ꠀꠝꠤ ꠙꠄꠟꠣ ꠖꠤꠘ ꠕꠣꠇꠤꠃ ꠇꠤꠟꠣ ꠀꠙꠘꠣꠁꠘ꠆ꠔꠞ ꠟꠉꠦ ꠡꠝꠄ ꠇꠣꠐꠣꠁꠍꠤ।
১৯ ꠁꠢꠥꠖꠤ ꠅꠇꠟꠞ ꠛꠃꠔ ꠎꠣꠔꠞ ꠇꠥ-ꠙꠞꠣꠝꠤꠡ ꠕꠣꠇꠤ,
ꠔꠣꠞꠣꠞ ꠙꠣꠔꠣꠁꠟ ꠚꠘ꠆ꠖꠤꠞ ꠝꠣꠎꠦꠅ ꠀꠝꠤ ꠙꠥꠞꠣꠙꠥꠞ ꠘꠞꠝ ꠖꠤꠟꠦ,
ꠌꠃꠈꠞ ꠙꠣꠘꠤ ꠚꠣꠟꠣꠁꠀ ꠝꠣꠛꠥꠖꠞ ꠉꠥꠟꠣꠝꠤ ꠇꠞꠍꠤ।
২০ ꠀꠙꠘꠣꠞꠣꠞ ꠚꠣꠄꠖꠣ ꠅꠁꠛ ꠁꠟꠣ ꠇꠥꠘꠥ ꠔꠣꠟꠤꠝꠃ ꠘꠣ ꠟꠥꠇꠣꠁꠀ ꠙꠥꠞꠣꠙꠥꠞ ꠎꠣꠘꠣꠁꠍꠤ,
ꠈꠥꠟꠣ-ꠝꠦꠟꠣ ꠝꠎꠟꠤꠍꠅ ꠀꠞ ꠊꠞꠅ ꠊꠞꠅ ꠉꠤꠀ ꠔꠣꠟꠤꠝ ꠖꠤꠔꠦꠅ ꠘꠣ ꠇꠞꠍꠤ ꠘꠣ।
২১ ꠁꠢꠥꠖꠤ ꠀꠞ ꠁꠃꠘꠣꠘꠤꠞ ꠉꠦꠍꠦ ꠔꠛꠟꠤꠉ ꠇꠞꠤꠀ ꠛꠥꠎꠣꠁꠍꠤ,
ꠔꠣꠞꠣꠞ ꠉꠥꠘꠣꠞ ꠝꠘ ꠛꠖꠟꠣꠁꠀ ꠀꠟ꠆ꠟꠣꠞ ꠙꠕꠤ ꠅꠁꠔꠣ,
ꠀꠞ ꠀꠝꠞꠣꠞ ꠝꠣꠟꠤꠇ ꠢꠎꠞꠔ ꠁꠍꠣꠞ ꠃꠙꠞꠦ ꠁꠝꠣꠘ ꠀꠘꠔꠣ।
২২ ꠀꠞ ꠅꠈꠘ ꠙꠣꠇ ꠞꠥꠢꠥꠞ ꠢꠥꠇꠥꠝꠛꠘ꠆ꠖꠤ ꠅꠁꠀ ꠀꠝꠤ ꠎꠦꠞꠥꠎꠣꠟꠦꠝꠅ ꠎꠣꠁꠞꠣꠝ,
ꠢꠤꠈꠣꠘꠅ ꠀꠝꠣꠞ ꠇꠥꠘ ꠖꠡꠣ ꠅꠁꠛ,
ꠎꠣꠘꠤ ꠘꠣ।
২৩ ꠈꠣꠟꠤ ꠅꠃ ꠈꠛꠞꠈꠣꠘ ꠎꠣꠘꠤ,
ꠙꠣꠇ ꠞꠥꠢꠦ ꠢꠇ꠆ꠇꠟ ꠐꠣꠃꠘꠅ ꠀꠝꠣꠞꠦ ꠅꠃ ꠇꠕꠣ ꠎꠣꠘꠣꠁꠞꠣ,
ꠔꠇꠟꠤꠚ ꠀꠞ ꠎꠦꠟ ꠈꠣꠐꠣ ꠀꠝꠣꠞ ꠟꠣꠉꠤ ꠛꠣꠞ ꠌꠣꠞ।
২৪ ꠅꠁꠟꠦꠅ ꠀꠝꠣꠞ ꠘꠤꠎꠞ ꠎꠣꠘꠞ ꠙꠞꠥꠀ ꠇꠞꠤ ꠘꠣ,
ꠀꠝꠣꠞ ꠎꠣꠘꠞꠦ ꠅꠔ ꠝꠥꠟ꠆ꠟꠛꠣꠘ ꠝꠘꠅ ꠇꠞꠤ ꠘꠣ।
ꠀꠝꠤ ꠁꠞꠣꠖꠣ ꠇꠞꠣ ꠙꠕꠞ ꠢꠦꠡ ꠑꠤꠇꠣꠘꠣ ꠙꠞ꠆ꠎꠘ꠆ꠔ ꠖꠃꠠꠣꠁꠔꠣꠝ ꠌꠣꠁꠞꠣꠝ।
ꠀꠟ꠆ꠟꠣꠞ ꠞꠢꠝꠔꠞ ꠈꠥꠡ-ꠈꠛꠞꠤꠞ ꠔꠛꠟꠤꠉ ꠀꠞ ꠈꠦꠎꠝꠔꠞ ꠅꠃ ꠎꠦ ꠜꠣꠞ ꠢꠎꠞꠔ ꠁꠍꠣꠞ ꠉꠦꠍ ꠕꠣꠇꠤ ꠙꠣꠁꠍꠤ,
ꠄꠞ ꠁꠘ꠆ꠎꠣꠝ ꠖꠤꠔꠣꠝ ꠌꠣꠁꠞꠣꠝ।
২৫ ꠅꠈꠘ ꠀꠝꠤ ꠄꠅꠈꠣꠘꠅ ꠎꠣꠘꠤ,
ꠀꠙꠘꠣꠞꠣ ꠎꠦꠞꠣꠞ ꠝꠣꠎꠦ ꠀꠝꠤ ꠀꠟ꠆ꠟꠣꠞ ꠛꠣꠖꠡꠣꠁꠞ ꠇꠕꠣ ꠔꠛꠟꠤꠉ ꠇꠞꠞꠣꠝ,
ꠅꠃ ꠀꠙꠘꠣꠁꠘ꠆ꠔꠞ ꠟꠉꠦꠅ ꠀꠞ ꠇꠥꠘꠥꠖꠤꠘ ꠖꠦꠈꠣ ꠅꠁꠔ ꠘꠣꠄ।
২৬ ꠄꠞꠟꠣꠉꠤ ꠀꠝꠤ ꠀꠁꠎ ꠀꠙꠘꠣꠁꠘ꠆ꠔꠞ ꠉꠦꠍꠦ ꠅꠃ ꠎꠛꠣꠘꠛꠘ꠆ꠖꠤ ꠖꠤꠞꠣꠝ,
ꠢꠇ꠆ꠇꠟꠞ ꠟꠃꠞ ꠖꠣꠄ ꠕꠣꠇꠤ ꠀꠝꠤ ꠈꠣꠟꠣꠍ।
২৭ ꠀꠝꠤ ꠀꠟ꠆ꠟꠣ ꠙꠣꠇꠞ ꠢꠇꠟ ꠟꠣꠈꠣꠘ ꠝꠞ꠆ꠎꠤꠞ ꠇꠕꠣ ꠀꠙꠘꠣꠁꠘ꠆ꠔꠞ ꠉꠦꠍꠦ ꠛꠄꠀꠘ ꠇꠞꠔꠦ ꠈꠞꠦꠖꠤ ꠉꠦꠍꠤ ꠘꠣ।
২৮ ꠀꠙꠘꠣꠞꠣ ꠎꠣꠞꠎꠤꠞ ꠛꠦꠙꠣꠞꠦ ꠢꠥꠡꠤꠀꠞ ꠅꠃꠇ꠆ꠇꠣ।
ꠙꠣꠇ ꠞꠥꠢꠦ ꠀꠙꠘꠣꠞꠣꠞꠦ ꠎꠦꠞꠣꠞ ꠌꠣꠟꠇꠖꠣꠞ ꠛꠣꠘꠣꠁꠍꠂꠘ,
ꠔꠣꠞꠣꠞ ꠛꠦꠙꠣꠞꠦ ꠢꠥꠡꠤꠀꠞ ꠅꠃꠇ꠆ꠇꠣ।
ꠀꠟ꠆ꠟꠣꠄ ꠔꠣꠘ ꠘꠤꠎꠞ ꠎꠘꠞꠦꠖꠤ ꠎꠦꠞꠣꠞꠦ ꠈꠞꠤꠖ ꠇꠞꠍꠂꠘ,
ꠢꠤ ꠎꠝꠣꠔꠞꠦ ꠙꠥꠞꠣꠙꠥꠞ ꠖꠦꠈꠣ-ꠢꠥꠘꠣ ꠇꠞꠃꠇ꠆ꠇꠣ,
ꠎꠦꠟꠣ ꠞꠣꠈꠣꠟꠦ ꠔꠣꠞ ꠝꠦꠠꠣꠞ ꠙꠣꠟꠞ ꠖꠦꠈꠣ-ꠢꠥꠘꠣ ꠇꠞꠦ,
ꠁꠝꠣꠝ ꠅꠁꠀ ꠀꠙꠘꠣꠞꠣꠅ ꠅꠃꠟꠣ ꠇꠞꠃꠇ꠆ꠇꠣ।
২৯ ꠀꠝꠤ ꠎꠣꠘꠤ,
ꠀꠝꠤ ꠎꠣꠅꠀꠞ ꠛꠣꠖꠦ ꠔꠥꠝꠞꠣꠞ ꠝꠣꠎꠦ ꠙꠣꠉꠟꠣ ꠛꠣꠊꠞ ꠍꠥꠞꠔꠞ ꠝꠣꠘꠥꠡ ꠀꠁꠀ ꠢꠣꠝꠣꠁꠛꠣ,
ꠔꠣꠞꠣ ꠘꠤꠞ꠆ꠖꠄ ꠅꠁꠀ ꠙꠣꠟꠞ ꠛꠃꠔ ꠈꠦꠔꠤ ꠇꠞꠛꠣ।
৩০ ꠀꠞ ꠀꠙꠘꠣꠁꠘ꠆ꠔꠞ ꠘꠤꠎꠞ ꠝꠣꠎ ꠕꠣꠇꠤꠅ ꠇꠦꠃ ꠇꠦꠃ ꠝꠥꠝꠤꠘ ꠅꠇꠟꠞꠦ ꠔꠣꠞ ꠈꠞꠦ ꠘꠦꠅꠀꠞ ꠟꠣꠉꠤ,
ꠢꠣꠍꠣ ꠔꠣꠟꠤꠝꠞꠦ ꠝꠤꠍꠣ ꠇꠁꠀ ꠘꠄꠀ ꠔꠣꠟꠤꠝ ꠛꠣꠞ ꠇꠞꠛ।
৩১ ꠄꠞꠟꠣꠉꠤ ꠀꠙꠘꠣꠞꠣ ꠢꠎꠣꠉ ꠞꠃꠇ꠆ꠇꠣ,
ꠀꠞ ꠝꠘꠅ ꠞꠣꠈꠛꠣ,
ꠀꠝꠤ ꠔꠤꠘ ꠛꠞꠍ ꠗꠞꠤꠀ ꠞꠣꠁꠔ-ꠖꠤꠘ ꠌꠃꠈꠞ ꠙꠣꠘꠤ ꠚꠣꠟꠣꠁꠀ ꠀꠙꠘꠣꠞꠣꠞꠦ ꠢꠥꠡꠤꠀꠞ ꠇꠞꠔꠦ ꠖꠝ ꠟꠁꠍꠤ ꠘꠣ।
৩২ ꠅꠈꠘ ꠀꠟ꠆ꠟꠣ ꠀꠞ ꠔꠣꠘ ꠞꠢꠝꠔꠞ ꠇꠣꠟꠣꠝꠞ ꠎꠤꠝ꠆ꠝꠣꠄ ꠀꠝꠤ ꠀꠙꠘꠣꠞꠣꠞꠦ ꠡꠙꠤꠟꠣꠝ।
ꠀꠟ꠆ꠟꠣꠞ ꠁ ꠇꠣꠟꠣꠝꠦ ꠀꠙꠘꠣꠞꠣꠞꠦ ꠉꠠꠤꠀ ꠔꠥꠟꠛ ꠀꠞ ꠔꠣꠘ ꠙꠣꠇ ꠛꠘ꠆ꠖꠣ ꠅꠇꠟꠞ ꠟꠣꠉꠤ ꠅꠀꠖꠣ ꠇꠞꠣ ꠛꠦꠢꠦꠡ꠆ꠔꠤ ꠝꠘ꠆ꠎꠤꠟꠅ ꠙꠃꠍꠣꠁ ꠖꠤꠛ।
৩৩ ꠀꠝꠤ ꠔ ꠇꠦꠃꠞꠞ ꠡꠥꠘꠣ-ꠞꠥꠙꠣ ꠛꠣ ꠇꠣꠙꠠ-ꠌꠥꠙꠠꠞ ꠛꠣꠄ ꠟꠣꠟꠌ ꠇꠞꠍꠤ ꠘꠣ।
৩৪ ꠀꠙꠘꠣꠞꠣ ꠘꠤꠎꠦꠃ ꠔ ꠎꠣꠘꠂꠘ,
ꠀꠝꠣꠞ ꠀꠞ ꠀꠝꠣꠞ ꠟꠉꠤ ꠅꠇꠟꠞ ꠅꠜꠣꠛ ꠝꠤꠐꠣꠘꠤꠞ ꠟꠣꠉꠤ ꠀꠝꠤ ꠖꠥꠁꠅ ꠀꠔꠦ ꠇꠣꠝ ꠇꠞꠍꠤ।
৩৫ ꠀꠝꠤ ꠢꠇꠟ ꠟꠣꠈꠣꠘ ꠇꠣꠝꠞ ꠝꠣꠎꠦ ꠘꠝꠥꠘꠣ ꠖꠦꠈꠣꠁꠍꠤ,
ꠅꠃ ꠟꠣꠈꠣꠘ ꠇꠣꠝ ꠇꠞꠤꠀ ꠖꠥꠞꠛꠟ ꠅꠇꠟꠞꠦ ꠡꠣꠁꠎ꠆ꠎ ꠇꠞꠣ ꠎꠞꠥꠞ।
ꠢꠎꠞꠔ ꠁꠍꠣꠞ ꠔꠣꠟꠤꠝꠞꠦ ꠝꠘꠅ ꠞꠣꠈꠅ,
ꠔꠣꠁꠘ ꠘꠤꠎꠦ ꠛꠣꠔꠣꠁꠍꠂꠘ,
ꠘꠦꠅꠀꠞ ꠌꠣꠁꠔꠦ ꠖꠦꠅꠀ ꠗꠁꠘ꠆ꠘ।”